1. მუ ოკო აკეთან ქრისტიანეფქ, ნამდა ქიმერთან ფინიშიშ ხაზშა?

ქრისტიანეფ ჩართულ რენა სიცოცხლეშო რულას. ვა უღჷ მნიშვნელობა, ასერდე დიბჭყით რულა დო ვარ წანეფიშ წოხოლე, ჩქი დუდ ოკო ვადვანებათ თის დო გუვაგრძელათ, სოიშა ფინიშიშ ხაზშა ვემურთ. რჩევა, ნამუთ მოციქულ პავლექ ფილიპელ ქრისტიანეფს მეჩჷ, ჩქი ხოლო მარზენა ძალას დუდ ვადვანებათ რულას. ფილიპეშ კრებაშ ნამთინე წევრი წანეფ რდუ, მუთ ომსახურუდ იეჰოვას, მუჟამსით პავლექ წერილ მეჭარ თინეფს. თე და დო ჯიმალეფ ართგურო მსახურენდეს, მარა პავლექ ხოლო ართშა ქუგაშინ, ნამდა დუდ ვა დანებესკო დო გაგრძელესკო იეჰოვაშ მსახურება. მოციქულს ოკოდ, ნამდა ფილიპელ ქრისტიანეფქ მიაჸუნესკო მუშ მაგალითის დო მინჭუესკო მიზანშა (ფილ. 3:14).

2. მუშენ რდუ ფილიპელეფშა მეჩამილ პავლეშ რჩევა დროულ?

² ფილიპელეფშა მეჩამილ პავლეშ რჩევა დროულ რდუ თინეფშო. ქალაქ ფილიპეს, კრებაშ დაარსებაშე ქრისტიანეფ წინააღმდეგობეფს შეხვადუდეს. თე ირფელქ სოდგარენ ახ. წ 50 წანას დიჭყ, მუჟამსით პავლე დო სილაქ დემორჩილეს ღორონთიშ მითითებას დო მიდართეს მაკედონიაშ ქალაქ ფილიპეშა (საქ. 16:9). თექ უქადაგეს ოსურს, ნამუსით ლიდია ჯოხოდ, მუშენდა იეჰოვაქ გურ გოუნწყჷ, ნამდა ყურადღებით ქიმირჩქილუკო სახიოლო ამბე (საქ. 16:14). ჭიჭე ხანშა ლიდიაქ დო არძაქ, მით თიშ ჸუდეს ცხოვრენდ, დინათეს. მარა ეშმაკიქ ხეთეშე ქიდიჭყჷ მოქმედება: ქალაქიშ დუდკოჩეფქ პავლე დო სილა სახელმწიფო მოხელეეფშა ძალით ქიმიჸონეს დო ქალაქშა არეულობაშ მიშაღალა ქეკაბრელეს. თეშ უკულ პავლე დო სილა გოლახეს დო ციხეს ქუდახუნეს. უმოს გვიანო გექთაშკვეს დო უზოჯეს, ნამდა ქალაქ ქიდიტესკო (საქ. 16:16—40). მიოტუესო თინეფქ ქადაგება? მუშო ოკო რაგად, ვარ! მუშ რაგად შილებე თი და დო ჯიმალეფშე, მით ფილიპეს ახალ ჩამოყალიბებულ კრებას რდეს? მუშო ოკო რაგად, თინეფქ ხოლო ართგურო გაგრძელეს მსახურება. არგამა რე,  პავლე დო სილაშ ჯგირ მაგალით გურშა ელუკინანდჷ დო გამანგარენდჷ თინეფს.

3. მუ უჩქუდ პავლე მოციქულს დო მუ კითხვეფს გუვარჩიენთ?

³ პავლეს მტკიცაშო აფუდ გინოჭყვიდილ, ბოლოშა მითვინკო დო ვემიოტუკო სიცოცხლეშო რულა (2 კორ. 4:16). თის უჩქუდ, ნამდა ფინიშიშ ხაზშა მიოულარო, მთელ ყურადღება მუშ მიზანშა ოკო გეგნიღკო. მუშ გურაფა შემლებნა პავლეშ მაგალითშე? ნამ თანამედროვე მაგალთეფ მოხვარნა თიშ ძირაფას, ნამდა შემლებნა ბოლოშა მიფთვინათ პრობლემეფიშ უმკუჯინუო? მუჭო მოხვარა მომავალიშ იმენდი, მტკიცას მაფდან გინოჭყვიდილ, ვემვოტუათ სიცოცხლეშო რულა?

4. მუჭო ახერხენდჷ პავლე აქტიურო მსახურებას მუშ მდგომარეობაშ უმკუჯინუო?

⁴ დეფიფქრათ, მუ მდგომარეობას რდუ პავლე მოციქულ, მუჟამსით ფილიპელ ქრისტიანეფს წერილ მეჭარ. თინა რომს შინაპატიმრობას რდუ, ათეშენ ვეშულებუდ მსახურებაშა მიდართკო, მარა ირნერო ოცადუდ გეგმირინუკო მუშ მდგომარეობა. პავლე უქადაგუდ მუშ მაძირაფალეფს დო წერილეფს ჭარუნდჷ კრებეფს. ამდღა ხოლო ბრელ ქრისტიან, მიდგას ჯამრთელობაშ გურშენ ვეშულებ ჸუდეშე გიმულა, ირნერო ოცად ქუქადაგას სახიოლო ამბე თინეფს, მით ჸუდეშა აკითხანს. თინეფ გურიშემაკინალ წერილეფს ხოლო მეჭარნა მობინადრეეფს, მით ჸუდეს ვადოხვადუნა.

5. მუჭოთ ფილიპელეფიშ 3:12—14-ის ინოჭარ, მუქ მეხვარ პავლეს მსახურებაშ გაგრძელებას?

⁵ პავლე ვარზენდჷ საშვალებას მუშ მიღწევეფს ვარდა ულირ შეცდომეფს, ქეცილკო მსახურებას. სინამდვილეს თიქ თქუ, ნამდა მიზანიშ მიოჭირნაფალო საჭირო რდუ ირფელიშ გოჭყოლიდაფა, „მუდგაქ ულირს დოსკიდ“ (წეკითხით ფილიპელები 3:12—14). მუქ შილებედ პავლეს ყურადღება შხვა მუდგარენშა გეგნაღალაფუკო? პირველ რიგის თი მიღწევეფქ, ნამუთ თიმწკუმა უღუდ, მუჟამსით იუდაიზმიშ მიმაჸუნალ რდუ. მარა ქრისტიანო გინირთუნ თიშ უკულ, პავლე თე მიღწევეფს მუთუნო ვემირჩქინანდჷ (ფილ. 3:3—8). მაჟია, დანაშაულიშ გრძნობაქ, ნამუთ პირველ საუკუნეშ ქრისტიანეფიშ თხოზინიშ გურშენ უღუდ, შილებე ქეცილკო იეჰოვაშ მსახურებას, მარა პავლექ გასაქან ვემეჩ თეცალ უარყოფით გრძნობეფს. დო მასმა, თიქ შილებე იფიქრუკო, ნამდა ირფელს ქიმიოჭირინუ იეჰოვაშ მსახურებას, მარა მუშო ოკო რაგად თაშ ვამუქციებ, პირიქით ღურაშახ ართგურო აგრძელენდჷ ქადაგებაშ საქმეს. თის მსახურებას ჯგირ შედეგეფ უღუდ თიცალ სირთულეეფიშ უმკუჯინუო, მუნერით რდუ ციხე, ლახუა, ქუალეფით ჩაქოლვა, გემიშ აკოტახუა, შკირენა დო ბარგიშ უღონობა (2 კორ. 11:23—27). მარა პავლეს უჩქუდ, ნამდა მიღწევეფიშ დო სირთულეეფიშ უმკუჯინუო, ოკო გაგრძელკო იეჰოვაშ მსახურება. ჩქი ხოლო შემლებნა მივაჸუნათ პავლეშ მაგალითის დო ვემვოტუათ მსახურება.

6. მუ მიშურს ულირ საქმეეფშა, ნამუთ ოკო გიბჭყოლიდუათ?

⁶ მუჭო შემლებნა მივაჸუნათ პავლეშ მაგალითის დო გიბჭყოლიდუათ თინა, „მუდგაქ უკახალე დოსკიდ“? ნამთინეს შილებე ულირს დაშებულიშ გურშენ ამდღა ხოლო აწუხენდას დანაშაულიშ გრძნობა. თაშ ქორენ-და, ჯგირ იჸუაფ ჩეტარათ პირად გურაფა დო დეფიქრათ, მუს ნიშნენს თქვანო ქრისტეშ გიშაჸიდირალ. თე საკითხიშ უჯგუშო გიმორკვიება, დაფიქრება დო ლოცვა მიგეხვარებნა ზედმეტო ვეშქაწუხან დანაშაულიშ გრძნობაქ. დრო ხანიშ უკულ, შილებე მიოტუათ თქვან დუდიშ დადანაშაულება თი ცოდვეფშენ, ნამუთ ქუგაპატუეს იეჰოვაქ. დეფიფქრათ ხოლო ართ მხარეშე, ნამდგას პავლეშ მაგალითშე ბგურფალენთ. ნამთინექ, სამეფოშ საქმე პირველ ადგილს ქიგიორინუკონ თიშენ, შილებე წარმატებულ კარიერა დო სამუშაშე თქუკო ვარია. თაშ ქორენ-და, ოკო ვედიბჭყათ ულირშე ფიქრ დო თიშე ნარღება, მუ ჯგირ მუდგარენშენ  ფთქვით ვარია (რიცხ. 11:4—6; ეკლ. 7:10). ულირ საქმეეფშა შილებე მიშურდას ჩქინ მიღწევეფ ვარდა განსაცდელეფ, ნამუთ მოთვინებათ გინიბღით. მუშო ოკო რაგად, თიშე ფიქრ, მუჭო ელამრდეს დო მაკურთხენდეს იეჰოვა, უმოსო მაახლოვენა ჩქინ ზეციერ მუმაწკუმა. მარა დღას ოკო ვეფიფქრათ, ნამდა ბოლოშა შევასრულით ჩქინ საქმე დო მეტიშ კეთება ვა რე საჭირო იეჰოვაშ მსახურებას (1 კორ. 15:58).

7. მუჭოთ 1 კორინთელეფიშ 9:24—27-ის რე ეჭარილ, მუ რე საჭირო, ნამდა ქიმეფრთათ ფინიშიშ ხაზშა? ქიმიჸონით მაგალით.

⁷ პავლეს ჯგირო არჩქილედ იესოშ სიტყვეფ: „დუდ ვადაზოგათ“ (ლუკ. 13:23, 24). თის უჩქუდ, ნამდა იესოცალო, სიცოცხლეშ ბოლოშა დუდ უდუზოგებუო ოკო ემსახურკო იეჰოვას. ათეშენ, პავლექ ქრისტიანულ ცხოვრება რულას შეადარ (წეკითხით 1 კორინთელები 9:24—27). მარულეშ მიზან რე ქიმერთას ფინიშიშ ხაზშა, ათეშენ ყურადღება შხვა მუთუნშა ვეგნუღ. მაგალთო, დიდ ქალაქეფს რულაშ დროს მარულეფს შილებე თიცალ მუდგარენეფქ ქუმუჸოლან თოლშა, მუთ თინეფიშ ყურადღებას მიქციენს. მუქ შილებე მოხვადას, მუჟამსით მარულეფ გაჩენდუნა დო მაღაზიაშ ვიტრინეფიშ გოჯინას ქიდიჭყანა? მუშო ოკო რაგად, თინეფ წაგენა, მუშენდა ვემიართენა ფინიშიშ ხაზშა. თეშნერო, ჩქი ხოლო სიცოცხლეშო რულას ვორეთ ჩართულ, ათეშენ დუდ ოკო ევუჩილითუათ ირფელს, მუთ ჩქინ ყურადღებას შხვა მუდგარენშა გეგნიღანს. მარა ჯილდოს აუცილებერო მიბღენთ, მუჟამსით პავლეცალო, ჩქი ხოლო დუც ვა დაბზოგენთ დო მთელ ყურადღებას ჩქინ მიზანშა გეგნიბღანთ.

8. ნამ სუმ სირთულეს გუვარჩიენთ?

⁸ გუვარჩუათ სუმ სირთულე, ნამდგაქ შილებე გურ გომტახან. თენა რე დიდ ხანიშ ჯინა, ფიზიკურ დაუძლურება დო განსაცდელეფ, ნამუთ ბრელ ხანს იგრძელებ. თეცალ დროს ჯგირ იჸუაფ დეფიფქრათ თინეფიშ მაგალითეფშე, მიდგაქ მერუ თეცალ სიტუაციეფს (ფილ. 3:17).

9. მუჭო შილებე იმოქმედას ჩქინწკუმა დიდ ხანიშ ჯინაქ?

⁹ დიდ ხანიშ ჯინა. ბუნებრივ რე, ნამდა ველუთ თი ირფელიშ შესრულებას, მუთ იეჰოვაქ დემეპირეს. წინასწარმეტყველ აბაკუმქ მუშ  გურჭუა გიმოხანტჷ დო იეჰოვას უწუ, ნამდა მანგარო ოკოდ იუდას უბადობაქ მალას მისპუკო, მარა იეჰოვაშ პასუხ რდუ, ნამდა ქიჯინკო (აბაკ. 2:3). შილებე საქმეშ კეთებაშ სურვილქ მემდინან ვარდა გვალო გურქ გომტირხან, მუჟამსით მოკონან თინა, ჩქი ველუთუნ ფერ დროს ვა მოხვადუ (იგავ. 13:12). თეცალ მდგომარეობას იჸუ ნამთინე ჯიმაქ მა-20 საუკუნეშ დაჭყაფუს. თი დროს ბრელ ცხებულ ქრისტიან ელუდ, ნამდა 1914 წანას მიღენდჷ ზეციერ ჯილდოს. მუჭო მიქცუეს ართგურ და დო ჯიმალეფქ, მუჟამსით თაშ ვა მოხვად?

10. მუჭო მიქცუ ართ წყვილქ, მუჟამსით თინეფიშ მოლოდინქ ვეშესრულ?

¹⁰ ქობძირათ ჟირ ართგურ მსახურიშ მაგალით, მიდგაქ თეცალ სიტუაციას შეხვად. ჯიმა როიალ სპაციქ 1908 წანას, 20 წანერ რდუნ თეშ ინათ. თინა დარწმუნებულ რდუ, ნამდა მალას მიღენდჷ ჯილდოს. 1911 წანას მუშ საოსუროს პერლის თეცალ სიტყვეფ უწუ: „ხომ ქოიჩქ, მუქ ოკო მოხვადას 1914 წანას. თაშ ნამდა, მორთ მალას დებქორწინათ!“. მიოტუო თე წყვილქ სიცოცხლეშო რულა, მუჟამსით 1914 წანას ვემიღეს ზეციერ ჯილდო? მუშო ოკო რაგად ვარ, მუშენდა თინეფიშ მთავარ მიზან რდუ ღორონთიშ ნებაშ ართგურო შესრულება დო ვართ ხოლო ჯილდოშ მეღება. თინეფს გინოჭყვიდილ აფდეს მოთვინებათ გაგრძელესკო სიცოცხლეშო რულა. ნამდვილო, როიალ დო პერლი ბრელ წანაშ დინახალე აგრძელენდეს აქტიურ მსახურებას, სოიშახ ვა გათუეს მიწიერ ცხოვრება. ალბათ მთელ გურით ელუთ თი დროს მუჟამსით იეჰოვა წანწმინდენს მუშ სახელს დო უზენაესობას დო შეასრულენს მუშ არძა დუნაპირებუს. დარწმუნებულ რდათ, თე ირფელ იეჰოვაშ დანიშნულ დროს ქუმოხვადუ. მორთ თე დროშ მოულაშახ, გუვაგრძელათ იეჰოვაშ მსახურება დო ჩქინ მოლოდინეფქ დიდ ხანს გეგრძელ-და, გურ იშენით ვეგიბტახათ.

11, 12. მუშენ ოკო გუვაგრძელათ იეჰოვაშ მსახურება თიშ უმკუჯინუო, ნამდა თისხი ვა მაკეთებენა, მუდგას ადრე ვორთუდით? ქიმიჸონით მაგალით.

¹¹ ფიზიკურ დაუძლურება. მარულეშ გინაწონს, სულიერ სიძლიერეშ შეიონარჩუნებელო ფიზიკურ ძალა ვა რე საჭირო. ბრელ, მით ფიზიკურო დაუძლურებულ რე, ირნერო ოცად გაგრძელას იეჰოვაშ მსახურება (2 კორ. 4:16). მაგალთო, ჯიმა არტურ სეკორდი, * ნამუთ 55 წანას მსახურენდჷ ბეთელს, 88 წანერ რდუნ თეშ, ფიზიკურო მანგარო დეუძლურ. ართ დაქ, ნამუთ თის ულუანდჷ, უწუ: „ჯიმა სეკორდ, თქვა ბრელ მუდგარენ აკეთით იეჰოვაშ მსახურებას“. მარა ჯიმა სეკორდ ყურადღებას თიშა ვამახვილენდჷ, მუთ ულირს უკეთებ. თიქ ქენაჯინ თე დას, გუძიცუ დო უპასუხ: „ქო, მართალ რექ. მარა მნიშვნელოვან თინა ვა რე, მუთ მიკეთებნა. მთავარ თინა რე, ამდღარშე მუს ვაკეთენთ, ნამდა ართგურეფქ ქუდოფსკიდათ“.

¹² შილებე ბრელ წანა რე ომსახურუთ იეჰოვას დო ასე გლახა ჯამრთელობაშ გურშენ თისხი ვა გაკეთებენა, მუდგას ადრე ორთუდით. თაშ ქორენ-და, გურქ ვა გოიტირხან.  დარწმუნებულ რდათ, იეჰოვას დღას ვა გაჭყორდუ ულირს კეთებულ თქვან ჯგირ საქმეეფ დო აფასენს თქვან ართგურ მსახურებას (ებრ. 6:10). ირიათო რშუდან, იეჰოვაშა ჩქინ ჸოროფა დო ართგურობა თით ვეფასებ, მუსხიშ კეთება შემლებნა თიშ მსახურებას. მთავარ რე, მიღდან დადებით განწყობა დო ვაკეთათ ირფელს, მუთ ჩქინ ძალეფს რე (კოლ. 3:23). იეჰოვას არჩქილე ჩქინ შესაძლებლობეფ დო შებლებნან თიშე უმოსის დღას ვა მოფთხინა (მარ. 12:43, 44).

13. მუჭო ელამკინანა გურშა ანატოლი დო ლიდიაშ გაბედულება, სირთულეეფიშ უმკუჯინუო ვემვოტუათ იეჰოვაშ მსახურება?

¹³ განსაცდელეფ, ნამუთ ბრელ ხანს იგრძელებ. იეჰოვაშ ნამთინე მსახურ წანეფიშ დინახალე ურზუდ სირთულეეფს დო თხოზინს. მაგალთო, ანატოლი მელნიკ * 12 წანერ რდუ, მუჟამსით თიშ მუმა ციხეს ქუდახუნეს დო უკულ ციმბირშა გეგნახორუეს, ნამუთ 7 000 კილომეტრით რდუ დაშორებულ მოლდოვაშე, სოდეთ მუშ ოჯახ ცხოვრენდჷ. ართ წანაშ უკულ, ანატოლი, მუშ დიდა დო ბები დო ბაბუ ხოლო გეგნახორუეს ციმბირშა. დროხანიშ უკულ თინეფს ქაშუეს საშვალებაქ, ქიდესწრესკო კრებაშ შეხვალამეფს შხვა სოფელს. მარა თექ მიოულარო 30 კილომეტრის მიშეს კუჩხით თირს დო ნულ გრადუსშე დაბალ ტემპერატურას. უმოს გვიანო, ჯიმა მელნიკი რწმენაშ გურშენ სუმ წანას ხედჷ ციხეს. თის მუშ ოსურ ლიდიაქ დო 1 წანერ ბაღანაქ აჸუ დატებელქ. სირთულეეფ წანეფიშ დინახალე იგრძელებუდ, მარა ანატოლი დო თიშ ოჯახის გინოჭყვიდილ აფდეს გაგრძელესკო იეჰოვაშ მსახურება. ასე თინა 82 წანერ რე დო ცენტრალურ აზიას ფილიალიშ კომიტეტის მსახურენს. მორთ ჩქი ხოლო ირიათო ანატოლი დო ლიდიაცალო გინოჭყვიდილ მაფდან, დღას ვემვოტუათ იეჰოვაშ მსახურება დო გუვაკეთათ ირფელ, მუთ შემლებნა (გალ. 6:9).

14. მუშ კეთება ოსაჭირუდ პავლეს, ნამდა ქიმიოჭირნუკო მიზანს?

¹⁴ პავლე დარწმუნებულ რდუ, ნამდა ქიმიშ ფინიშიშ ხაზშა დო ქიმიოჭირნუანდჷ მიზანს. მუჭოთ ცხებულ ქრისტიან, თინა მთელ გურით ელუდ „ღორონთშე ზეციურ ჯილდოშ“ მეღებას. მარა თის არჩქილედ, ნამდა თე ჯილდოშ მიოღებელო ბოლოშა ოკო გაგრძელკო მსახურება (ფილ. 3:14). პავლექ საინტერესო შედარება მოუჸონ ფილიპელეფს, ნამდა ქიმეხვარკო თინეფს, მთელ ყურადღება მუნეფიშ მიზანშა გეგნიღესკო.

15. მუჭო გიმირინუ პავლექ მოქალაქეობაშ მაგალით თიშ ოძირაფალო, ნამდა ფილიპელ ქრისტიანეფქ მსახურება გაგრძელესკო?

¹⁵ პავლექ ფილიპელეფს ზეციურ მოქალაქეობა ქუგაშინ (ფილ. 3:20). მუშენ ოსაჭირდეს  თეშ გოშინა? თიმ დროს რომიშ მოქალაქეობა ხალხის ბრელ უფლებას არზენდჷ, ათეშენ არძას ოკოდ თიშ მეღება. * მარა ცხებულ ქრისტიანეფს ბრელით უჯგუშ მოქალაქეობა უღდეს, ნამუთ ჯგირობუას მუღანდჷ თინეფს, ვინემ რომიშ მოქალაქეობა. ათეშენ პავლექ ფილიპელეფს ელუჩ: „მიქცით ქრისტეშ გურშენ სახიოლო ამბეშ ღირსო“ (ფილ. 1:27). თე მუხლის მოშინაფილ სიტყვა „მიქცით“ ნიშნენს მოქალაქეშ მოვალეობაშ შესრულებას. ამდღა ცხებულ ქრისტიანეფ მინჭუაფნა მუნეფიშ მიზანშა, მიღან მარადიულ სიცოცხლე ზეცას დო თეთ, ჯგირ მაგალითის მარზენა არძას.

16. მუჭოთ ფილიპელეფიშ 4:6, 7-ის ჭარ, მუშ კეთება ოკო გუვაგრძელათ?

¹⁶ ვა უღჷ მნიშვნელობა, ზეციურ იმენდჷ მიღნა დო ვარ დედამიწას მარადიულ ცხოვრებას ველუთ, მთავარ რე, ვეცადათ თე მიზანიშ მეჭირნაფას. მუდგა მდგომარეობას ვა ვორდათინ, დღას ვეკნიბჯინათ უკახალე დო მუთუნს ვემეფჩათ თიშ უფლება, მიმოტებაფუან იეჰოვაშ მსახურება (ფილ. 3:16). შილებე ბრელ ხან რე ვუჯინეთ, მუჟამ შესრულებ იეჰოვაშ დუნაპირებ ვარდა ჯვეშობურო ფიზიკურ ძალეფ ვამღუნა. შილებე წანეფ რე ვურზუთ შხვადოშხვა სირთულეს დო თხოზინს. მარა მუდგა სიტუაციას ვა ვორდათინ, მუჭოთ ღორონთიშ სიტყვა მირაგადნა, მუთუნშე ოკო ვებწუხათ. თეშ მანგიორო, არძა ჩქინ ოწუხებელ ღორონც მივანდათ დო თინა ქომჩანა მშვიდობას, ნამუთ ირნერ აზრიშე უმოს რე (წეკითხით ფილიპელები 4:6, 7).

17. მუს გუვარჩიენთ უკულიან სტატიას?

¹⁷ მარულეცალო, ნამუთ ირნერო ოცად ქიმერთას ფინიშიშ ხაზშა, ჩქი ხოლო მთელ ყურადღება ჩქინ მიზანშა ოკო გეგნიბღათ, ნამდა მიბღათ ჯილდო. მუჭოთ მდგომარეობა დო შესაძლებლობეფ მუჩანა საშვალებას, მუთ შემლებნან, ირფელ გუვაკეთათ, ნამდა მთელ ყურადღება გეგნიბღათ თი სარკო მომავალშა, ნამუთ წოხლე მელნა. მუ ოკო ვაკეთათ, ნამდა ვეგნვურთათ სწორ მიმართულებას დო ბოლოშა მიფთვინათ? უკულიან სტატია მიმეხვარებნა დუვადგინათ სწორ პრიორიტეტეფ დო დებრწმუნათ, „მუ რე უმოს მნიშვნელოვან“ (ფილ. 1:9, 10).