ოგურაფალ სტატია 33
მით მირჩქილუანსინ, გინასკიდუ
„ირიათო ქიდეკვირ მუჭოთ სქან დუც, თეშ თის, მუს დო მუჭო ოგურუანქ. ირო თაშ ქიმიქცი დო სქან დუცით ირსხენქ დო მარჩქილეეფს ხოლო “(1 ტიმ. 4:16).
ობირეში 67 „იქადაქით სიტყვა“
შინაარსი *
1. მუს იფსურვენდით ჩქინ ოჯახიშ წევრეფშო?
ართ და, სახელო პოლინ * იჩიებ: „მუჟამსით ჭეშმარიტება გებგჷ, მოკოდ ჩქიმ ოჯახიშ წევრეფ ხოლო ჩქიმწკუმა ართო ჸოფედესკო სამოთხეს დედამიწას. განსაკუთრებულო მოკოდ ჩქიმ ქომონჯ უეინ დო ჩქიმ ბოშწკუმა ართო ვემსახურკო იეჰოვას“. თქვა ხოლო ხომ ვარჸუნა თიცალ ნათესეფ, მით დიო ვეჩინენა იეჰოვას? მუშო ოკო რაგად, პოლინცალო თქვა ხოლო მანგარო გოკოდან იჸი ოჯახიშ წევრეფწკუმა ართო ემსახურათ ღორონც.
2. მუ კითხვეფს გუვარჩიენთ თე სტატიას?
2 ჩქი ვეშემლებნა დუვანძალათ ნათესეფს ქიმირჩქილუან სახიოლო ამბე დო იცხოვრან მარადიულო, მარა შემლებნა ქიმვეხვარათ, დეფიქრან დო მიღან ბიბლიურ ცნობა (2 ტიმ. 3:14, 15). მუშენ ოკო ვუქადაგათ ნათესეფს? მუშენ ოკო ვოცადუდათ თინეფიშ მდგომარეობაშა მიშულას? მუშ კეთება შემლებნა, ნამდა ქიმვეხვარათ ნათესეფს ჩქინცალო ქიჸოროფუან იეჰოვა? მუჭო შეულებნა კრებაშ წევრეფს ჩქინ მოხვარა?
მუშენ ოკო ვუქადაგათ ნათესეფს?
3. მუჭოთ 2 პეტრეშ 3:9-ს ჭარჷ, მუშენ ოკო ვუქადაგათ ჩქინ ნათესეფს?
3 მალას იეჰოვა მოსპუნს თე სისტემას დო ხვალე თინეფ გინასკიდუნა, მით მარადიულ სიცოცხლეშო რენა განწყობილეფ (საქ. 13:48). ჩქი ბრელ დრო დო ენერგიას ვუთმენთ უჩინებ კათაწკუმა ქადაგებას დო მუშო ოკო რაგად, მოკონა ნათესეფს ხოლო გეგნოფჩათ სახიოლო ამბე, ნამდა ჩქინწკუმა ართო ემსახურან იეჰოვას. ჩქინ მოჸოროფე მუმა იეჰოვას „ვაკო მითინქ დოღურას, თის ოკო, არძაქ მინანუას“ (წეკითხით 2 პეტრე 3:9).
4. მუ შეცდომა შილებე დუშვათ ნათესეფწკუმა ქადაგებაშ დროს?
4 ირიათო ოკო ფშუდან, ნამდა სახიოლო ამბე შილებე ჯგირო ვარდა გლახათ გეგნოფჩათ შხვეფს. მაგალთო, უჩინებუეფწკუმა შილებე უმოს ტაქტიანო ფქადაგენდათ, მარა ნათესეფწკუმა ნაბეტან პირდაპირეფ ვორდათ.
5. მუ ოკო ფშუდან ნათესეფწკუმა ქადაგებაშ დოჭყაფაშახ?
5 მუჟამსით გუმაშინენა ნათესეფწკუმა ჩქინ პირველ ქადაგება, შილებე ბნარღენდათ, მუშენდა თექ ტაქტიანო ვეგშამირთეს დო ფიფქრენდათ, ნამდა ბრელით უჯგუშო შემლებდეს თეშ კეთება. მოციქულ პავლექ თანაქრისტიანეფს ელუჩ: „თქვან სიტყვა ირიათო მარდიან რდას, ჯიმუთ ეზადილ, ნამდა გიჩქუდან, მის მუნერ პასუხ მეჩათ“ (კოლ. 4:5, 6). მუჟამსით ნათესეფს ვუქადაგუთ, ჯგირ იჸუაფ ირიათო ფშუდან თე რჩევა. თაშ ვემიფქციებუთ-და, მომრჩქილუანინ თიშ მანგიორო, შილებე გუვაღიზიანათ თინეფ.
მუშ კეთება შემლებნა, ნამდა ქიმვეხვარათ ჩქინ ნათესეფს?
მუჟამსით ნათესეფიშ მდგომარეობაშა მიშურთ დო თეს საქმეეფით ვოძირანთ, თენა ჯგირ დამოწმება რე თინეფშო ქოძირით აბზაცეფი 6—8) *
6, 7. ქიმიჸონით თიშ მაგალით, მუშენ რე აუცილებერ ქუგუგათ იეჰოვაშ მოწმე ვა რენ ფერ მეუღლეს.
6 მიშელით თინეფიშ მდგომარეობაშა. ჟიშე მოშინაფილ პოლინ იჩიებ: „დუდშე, ჩქიმ ქომონჯწკუმა ხვალე სულიერ საკითხეფშე ჩიება მოკოდ. ათეშენ, ცხოვრებისეულ თემეფშე ნაკლებო ბრაგადანდით“. პოლინიშ ქომონჯის, უეინს, ბრელ მუთუნ ვა უჩქუდ ბიბლიაშე დო ათეშენ ვენანჭუდ თის, მუდგას მუშ ოსურ იჩიებუდ. თის მიორჩქუდ, ნამდა პოლინს მუშ რელიგიაშ მეტ მუთუნ ვაინტერესუდ დო ფიქრენდჷ, თინა საშიშ სექტაშა რდუ მიშატყურაფილ.
7 პოლინ აღიარენს, ნამდა კრებას, მსახურებას, და დო ჯიმალეფწკუმა ურთიერთობას დო მეგობრულ შეხვალამეფს ბრელ დროს უთმენდჷ. თინა იჩიებ: „მინშა უეინს ჸუდეშ მოულირს მითინ ვა დოხვადუდ დო დუც ხვალახეთ გინაფლენდჷ“. მუშო ოკო რაგად, თის ონატრუდ მუშ ჩილ დო სქუა. თინა ვეჩინენდჷ თი კათას, მიდგაწკუმა პოლინ მეტ დროს ატარენდჷ დო თეშ იძირედ, ნამდა მუშ ოსურშო ახალ მეგობრეფ უმოს მნიშვნელოვან რდუ, ვინემ ქომონჯ. ათეშენ, უეინქ ოსურს დარცქინ, ნამდა გეკარღვანდჷ ოჯახის. მუჭო შეულებუდ პოლინს უმოსო გემშართუკო მეუღლეშ მდგომარეობაშა?
8. მუჭოთ 1 პეტრეშ 3:1, 2-შე იძირე, არძაშ უმოსო მუქ შილებე იმოქმედას ჩქინ ნათესეფწკუმა?
8 თქვან ჯგირ საქციელით მაგალით ქიმეჩით. ხშირას ნათესეფ ჩქინ საქციელს უმოსო ოკვირნა ვინემ თის, მუდგას ბრაგადანთ (წეკითხით 1 პეტრე 3:1, 2). საბოლათ, პოლინქ დერწმუნ თე სიტყვეფიშ ჭეშმარიტებას. თინა იჩიებ: „მიჩქუდ, ნამდა ჩქიმ ქომონც ჟირხოლო ვუჸორდით დო სინამდვილეს ვაკოდ ოჯახიშ ეკორღვაფა. თე ირფელქ მიმოხვამილუ, ნამდა საჭირო რდუ თი ბიბლიურ რჩევეფიშ გიმორნაფა, ნამუთ ქორწინებას ოხუ. ათეშენ გინობჭყვიდ თიშ მანგიორო, ნამდა ირიათო ჭეშმარიტებაშენ ვეჩიკო, ჩქიმ ჯგირ საქციელით მაგალით ქიმეფჩიკო“. თეშ უკულ, პოლინს ვა დუჩემებ უეინშა ბიბლიურ თემეფშე ჩიება დო ქიდიჭყჷ თიწკუმა ცხოვრებისეულ საკითხეფშე რაგადი. უეინქ ქოძირ, ნამდა მუშ ოსურქ უჯგუშობაშა დითირ დო მუშ სქუა ხოლო ჯგირო იქციებუდ (იგავ. 31:18, 27, 28). თე ირფელქ მეხვარ თის, გურშა მიღუკო ღორონთიშ სიტყვა (1 კორ. 7:12—14, 16).
9. მუშენ ოკო ვემვოტუათ ჩქინ ნათესეფწკუმა ქადაგება?
9 ვემიოტუათ თქვან ნათესეფწკუმა ქადაგება. თეშ ჯგირ მაგალითის იეჰოვა მარზენა. ხალხიქ ხეთეშე ვემირჩქილუ-და, თინა კინ არზენს თინეფს საშვალებას, ქიმირჩქილუან სახიოლო ამბე დო გინასკიდან (იერ. 44:4). პავლექ უწუ ტიმოთეს, ნამდა ვემუტებუდკო შხვეფშა ქადაგება. თეცალ საქციელით, მუჭოთ მუშ დუც, თეშ მარჩქილეეფს ხოლო ირსხენდჷ (1 ტიმ. 4:16). ჩქი მიჸორა ნათესეფ დო ათეშენ მოკონა, თინეფქ ხოლო ქიგეგან ჭეშმარიტება. დრო ხანიშ მიკულაწკუმა ართო, პოლინიშ სიტყვეფ დო საქმეეფქ ჯგირო იმოქმედ თიშ ოჯახიშ წევრეფწკუმა. ამდღა თინა ბედნერ რე, მუშენდა ქომონჯწკუმა ართო ომსახურ იეჰოვას, ჟირხოლო პიონერეფ რენა დო უეინ უხუცესო მსახურენს.
10. მუშენ ოკო გიმიფრჩქინათ მოთვინება?
10 გეგმიფრჩქინათ მოთვინება. მუჟამსით ჩქინ ცხოვრებას ღორონთიშ მოსაწონო ფთირანთ, ჩქინ ოჯახიშ წევრეფს შილებე გუჭირდან თეშა მერჩქვანაქ. ხშირას პირველ, მუდგას თინეფ ორწყენა, თინა რე, ნამდა ვა ბღებულენთ მონაწილებას ვართ რელიგიურ დღახუეფს დო ვართ პოლიტიკას. ათეშენ დუდშე ნამთინე ჩქინ ნათესეს შილებე გურქ მოურთას ჩქინდე (მათ. 10:35, 36). მარა ჯგირ იჸუაფ ვეფიფქრათ, ნამდა თინეფ დღას ვედითირუნა. თინეფწკუმა ქადაგებას მივოტენთ-და, თიცალო გიშურს, ნამდა უკვე გეგშვუღით განაჩენ დო მარადიულ ცხოვრებაშ ღირსო ვა ფთვალუნთ. იეჰოვას გასამართლებაშ უფლება ჩქინდა ვარინ, ხვალე იესოშა აფჷ მეჩამილ (იოან. 5:22). მოთვინებას გეგმიფრჩქინანთ-და, საბოლათ შილებე ჩქინ ნათესეფქ ქუმომრჩქილუან (ქოძირით ჩარჩო „ გურაფაშ დროს გეგმირინეთ ჩქინ ვებგვერდი“).
11—13. მუს ბგურაფლენთ ელისიშ მაგალითშე, მუჭო მექცუ თიქ მშობლეფს?
11 რდათ მტკიცე, მარა ტაქტიან (იგავ. 15:2). გუვარჩუათ ელისიშ მაგალით. თიქ ჭეშმარიტება თიმწკუმა გეგჷ, მუჟამსით დიდა დო მუმაშე შორს რდუ. თიშ მშობლეფს ღორონთ ვა წანდეს დო აქტიურო ღებულენდეს მონაწილებას პოლიტიკურ საქმეეფს. ელისიქ ქიმეხვად, მშობლეფშა მუთ შილებე მალას ოკო ქუთქუალუდკო, ნამდა ბიბლიაშ გურაფა დიჭყჷ. თინა იჩიებ: „მუთ უმოსო გინოდვანქ ოჯახიშ წევრეფშა სქან რწმენაშ გურშენ რაგადის, თით უმოსო გეღიზიანებნა“. ელის ოცადუდ თიცალ თემეფ დუგორუდკო, ნამუთ მუშ აზრით მშობლეფშო საინტერესო იჸუაფუდ, მაგალთო ეჩუკო ჸოროფაშ გურშენ. თიქ მუსხირენ წერილ ქიმეჭარ თინეფს, სოდეთ მიშინუ, მუს იჩიებ ბიბლია თე საკითხეფშე დო კითხჷ, მუს ფიქრენდეს თეშ გურშენ (1 კორ. 13:1—13). თეს გეძინელ, წერილს მარდულობას გიმოხანტუნდჷ თი ირფელშე, მუთ მშობლეფქ თიშო აკეთეს დო საჩუქრეფ ხოლო ქიმუჯღონ თინეფს. მუჟამსით მშობლეფს ქიმიაკითხუნ, მუთ შეულებუდ, ირნერო ქიმეხვარ მუშ დიდას ოჯახიშ საქმეეფიშ კეთებას. დუდშე მშობლეფს ბრელით ვემეწონეს, მუჟამსით ელისიქ მუშ ახალ რწმენაშ გურშენ ქუგაგებაფუ.
12 ელისის ბიბლიაშ ირდღაშიან კითხირ, მშობლეფწკუმა რდუნ თიმ დროს ხოლო ვემუტებ. თინა იჩიებ: „თექ მეხვარ ჩქიმ დიდას ქუძირუდკო, მუსხით მნიშვნელოვან რდუ ჩქიმო ბიბლია“. თეწკუმა ართო, ელისიშ მუმაქ გეგნოჭყვიდ, მეტ ქიგეგუკო ბიბლიაშ გურშენ, მუშენდა ოინტერესუდ, მუქ თირუ თაშ მუშ სქუა. თეს გეძინელ, თის ოკოდ თიცალ მუდგარენ დოუგორუკო ბიბლიას, მუდგას უკულ გაკრიტიკენდჷ. ელის აგრძელენს: „თის ჩქიმ პირად ბიბლია ქიმეფჩჷ, სოდეთ ჩანაწერეფ მაფუდ კეთებულ“. მუ შედეგიქ მაჸუნ თეს? თის მუთუნ კილქ ვაგორ, პირიქით, ღორონთიშ სიტყვაშ კითხირქ მანგარო იმოქმედ თიშ გურს.
13 ჩქი გიმიფრჩქინანთ სიმტკიცეს, მარა ტაქტიანეფ ოკო ვორდათ თიმწკუმა ხოლო, მუჟამსით პრობლემეფს შეფხვადუთ (1 კორ. 4:12ბ). მაგალთო, ელისის წინააღმდეგობა მუშ დიდაშე უღუდ. თინა იჩიებ: „მუჟამსით დიბნათინ, დიაჩქიმქ მიწუ, ნამდა მანგარ ჯიუტ პიროვნება ვორდჷ“. მუჭო მიქცუ ელისიქ? თინა აგრძელენს: „თიწკუმა ჩიებაშა დუდ ვემჩილითუაფ, პატიცემათ გევუნწყჷ, ნამდა გინოჭყვიდილ მაფუდ იეჰოვაშ მოწმე ვორდკო დო დღას ვა ფთირანდჷ ჩქიმ გადაწყვეტილებას. ვოცადუდ დუვარწმუნკო დიაჩქიმ, ნამდა მანგარო მიჸორდჷ; ჩქი ჟირხოლოს ქუმანგარინეს. თეშ უკულ, გემუან ოჭკუმალ გავუკეთ. დროხანიშ მიკულაწკუმა ართო თიქ ქუგოხვად, ნამდა ბიბლია უჯგუშობაშა ფთირანდჷ“.
14. მუშენ ოკო ვემეფჩათ ნათესეფს თიშ უფლება, დუმოთირაფუან ჩქინ გადაწყვეტილება, ვემსახურათ იეჰოვას?
14 ჩქინ ნათესეფს დრო ოსაჭირნა, ნამდა ბოლოშა ქიმეხვადან, მუსხით მნიშვნელოვან რე ჩქინო იეჰოვაშ მსახურება. მაგალთო, მუჟამსით ელისიქ გინოჭყვიდ პიონერო მსახურება დო ვარია ქოთქუ კარიერაშე, ნამუთ მშობლეფს თიშო ოკოდეს, დიამუშიქ კინ ნგარა ქიდიჭყჷ. მარა ელისის ვა უთირუ მუშ გადაწყვეტილება. თინა იჩიებ: „მუჟამსით ოჯახიშ წევრეფს ართშა ვარა ქუდაჸუნუქ დო მნიშვნელოვან გადაწყვეტილებას დოთირანქ, შილებე უკულ ხოლო ქეცადან შხვა მნიშვნელოვან გადაწყვეტილებეფ დუგოთირაფუან. მარა სიმტკიცეწკუმა ართო ტაქტიანობას ხოლო გეგმირჩქინანქ-და, ოჯახიშ ნამთინე წევრიქ შილებე ქუმოირჩქილუას“. ელისიშ შემთხვევას ხოლო თაშ იჸუ. ასე თიშ მშობლეფ პიონერეფ რენა დო მუმა უხუცესო მსახურენს.
მუჭო შეულებნა კრებაშ წევრეფს ჩქინ მოხვარა?
მუჭო შეულებნა კრებაშ წევრეფს, მეხვარან ჩქინ ოჯახიშ წევრეფს, მით ვა რენა იეჰოვაშ მოწმეეფ? (ქოძირით აბზაცეფი 15, 16) *
15. მუჭოთ მათეშ 5:14—16 დო 1 პეტრეშ 2:12-შე იძირე, მუჭო შეულებ შხვეფიშ ჯგირ საქმეეფს, მეხვარას ჩქინ ნათესეფს?
15 იეჰოვას მუშ ხოლოშა მოჸუნს ხალხი. ართ-ართ საშვალება, მუდგას თეშო გიმირინუანს, მუშ მსახურეფიშ ჯგირ საქმეეფ რე (წეკითხით მათე 5:14—16; 1 პეტრე 2:12). თქვან მეუღლე იეჰოვაშ მოწმე ვარენ-და, ხომ ვა გაჩინებაფუანდით თის კრებაშ წევრეფს? პოლინქ, ნამუთ ჟიშე მიფშინეთ, ჸუდეშა ქუდაპეჯ და დო ჯიმალეფ, ნამდა მუშ ქომონჯიქ გეჩინებაფუკო თინეფ. უეინ იშინანს, მუჭო მეხვარ ართ ჯიმაქ მოწმეეფიშ გურშენ არასწორ წარმოდგენაშ თირუას. თინა იჩიებ: «თე ჯიმაქ სამუშაშე ართ დღა ქითხუ, ნამდა ჩქიმ ჸუდეშა ქუმორთუკო დო სპორტულ ლაჸაფის ართო ქუჯინითკო. თეშ უკულ იფიფქრჷ: „ჩვეულებრივ კოჩ ჸოფე!“».
16. მუშენ ოკო დუვაპატიჟათ ნათესეფ კრებაშ შეხვალამეფშა?
16 ჩქინ ნათესეფს თიმწკუმა ხოლო მივეხვარებუთ, მუჟამსით კრებაშ შეხვალამეფშა ქუდვაპეჯენთ (1 კორ. 14:24, 25). პირველ შეხვალამა, ნამუსით უეინქ დესწრჷ, რდუ ქრისტეშ გოშინაშ ონჯუა, მუშენდა თე შეხვალამა სამუშაშ უკულ იტარებუდ დო პროგრამა ხოლო ბრელ ხანს ვემიშ. თინა იჩიებ: „მოხსენებაშე ბრელ მუთუნ ვეგებგჷ, მარა დღას ვაგმოჭყორდუ ხალხიშ ყურადღება. თინეფ ჩქიმდა მიშეს დო ბრელ ხანიშ ნაჩინებცალო გიწომღანდეს ხეს. არგამათ იძირედ, ნამდა ალალ კათა რდეს“. ართ ჩილ დო ქომონჯ განსაკუთრებულო ელურდჷ პოლინს თით, ნამდა თიშ ბოშის ყურადღებას აქციენდეს კრებას დო მსახურებას. მუჟამსით უეინქ გეგნოჭყვიდ, პოლინიშ ახალ რწმენაშ გურშენ მეტიშ გაგება, თე ჯიმას ქოთხუ ქუდაგურუკო ბიბლია.
17. მუ ოკო ვადვაბრალათ ჩქინ დუც დო მუშენ ოკო ვემიოლან გურქ ჩქინ ნათესეფწკუმა ქადაგებაშა?
17 იმენდ მიღნა, ნამდა ჩქინ ნათესეფ ჩქინწკუმა ართო ქიდიჭყანა იეჰოვაშ მსახურებას. შილებე ირნერო ვოცადუდათ, ქიმვეხვარათ ჩქინ ნათესეფს გინირთან ღორონთიშ მსახურეფო, მარა თინეფქ დღას ვეგნოდგან თე ნაბიჯ. თექ თაშ ქიჸუ-და, ჩქინ დუც ოკო ვადვაბრალათ, მუშენდა გადაწყვეტილებას თინეფ ღებულენა. მუშო ოკო რაგად, მითინშა ვადმანძალებენა ჭეშმარიტებაშ მეღება. მარა, მუჟამსით ნათესეფ ქოძირნა, ნამდა იეჰოვაშ მსახურებას თქვანდა ბედნერობა მოუღ, თენა ჯგირო იმოქმედენს თინეფწკუმა. ილოცით თინეფშო დო ტაქტიანო უქადაგით. დღას ვეიოლან გურქ თეშ კეთებაშა! (საქ. 20:20). რჯერდან, იეჰოვა აკურთხენს თქვან მონდომას. ნათესეფქ ქუმოირჩქილუეს-და, თინეფ აუცილებერო გინასქიდუნა!
ობირეში 57 ვუქადაქენთ ირნერ ხალხის
^ აბზ. 5 არძას მოკონა ჩქინ ნათესეფქ გეჩინებაფუან იეჰოვა, მარა მუნეფიშ გინაჭყვიდირალ რე, ემსახურებნა დო ვარ ღორონც. თე სტატიას გუვარჩიენთ, მუშ კეთება შემლებნა, ნამდა ნათესეფს ადვილქ აჸუან ჩქინ მორჩქილაფაქ.
^ აბზ. 1 ნამთინე სახელ თირელ რე. თე სტატიას მოშინაფილ სიტყვაშა „ნათესეფ“ მიშურს ოჯახიშ წევრეფ, მით დიო ვამსახურნა იეჰოვას.
^ აბზ. 53 სურათიშ ეჭარუა: ახალგაზრდა ჯიმა მანქანაშ კეთებას ოხვარ მუშ მუმას, ნამუთ იეჰოვაშ მოწმე ვა რე. მოხუჯურ დროს, თინა ოძირანს ვიდეოს ჩქინ ვებგვერდშე.
^ აბზ. 55 სურათიშ ეჭარუა: ართ და ყურადღებით ურჩქილე მუშ ქომონჯის, ნამუთ იეჰოვაშ მოწმე ვა რე, მუჟამსით თინა დღაშ დინახალე მოხვალამირ ამბეს ეჩიებ. უმოს გვიანო, თე და მუშ ოჯახწკუმა ართო სასიამოვნოთ ატარენს დროს.
^ აბზ. 57 სურათიშ ეჭარუა: დაქ კრებაშ ნამთინე წევრი მუშ ჸუდეშა ქუდაპატიჟ. თინეფ ოცადნა უჯგუშო გეჩინებაფუან თე დაშ ქომონჯ. უმოს გვიანო, თინა მუშ მეუღლეწკუმა ართო ოსწრჷ გოშინაშ ონჯუას.
