1. მიქ შეუნწყუ ხე ქალაქ ფილიპეს ახალ კრებაშ ჩამოყალიბებას

მუჟამსით მოციქულ პავლე, სილა, ლუკა დო ტიმოთექ რომიშ კოლონიაშა, ფილიპეშა ქიმერთეს, ბრელ თიცალ კათა ქოძირეს, მიდგაქ სახიოლო ამბეთ დეინტერეს. თე ოთხ დუდგინოდვალირ ჯიმაქ ხე შეუნწყუ ახალ კრებაშ ჩამოყალიბებას. არძა ახალნათილ და დო ჯიმა, სავარაუდოთ, ართ სტუმარიშ მოჸოროფე დაშ, ლიდიაშ ჸუდეს იშაყარუდ (საქ. 16:40).

2. მუ პრობლემას შეხვად ფილიპეშ კრებაქ?

² ახალ კრებაქ ხეთეშე ქეშეხვად პრობლემას. ჭეშმარიტებაშ ნტერეფქ, ნამუთ სატანაშ ახნარებულ რდეს, პავლეს დო თიშ თანამსახურეფს მანგარო ქეწინააღმდეგეს. პავლე დო სილა ოჭოფეს, გოლახეს დო ციხეს ქუდახუნუეს. ციხეშე გათავისუფლებაშ უკულ, თინეფქ ახალ ნათილ და დო ჯიმალეფს ქიმიაკითხუეს დო გურშა ელუკინეს. თეშ უკულ პავლე, სილა დო ტიმოთექ ქიდიტუეს ქალაქ, მარა ლუკაქ თექ ქუდოსქიდ. ხომ ვა გუჭირდუდეს თე და დო ჯიმალეფს მსახურებაშ გაგრძელება? იეჰოვაშ წმინდა შურიშ საშვალებათ თინეფქ გაგრძელეს გურგედვალირო მსახურება (ფილ. 2:12). პავლეს ნამდვილო უღუდ თიშ მიზეზ, იამაყუკო თინეფით!

3. მუჭოთ ფილიპელეფიშ 1:9—11-ის ჭარ, მუშ გურშენ ლოცულენდჷ პავლე?

³ სოდგარენ ვით წანაშ უკულ პავლექ ფილიპეშ კრებას წერილ მეჭარ. თე წერილშე ჯგირო იძირე მუჭო უჸორდჷ მოციქულს და დო ჯიმალეფ. თიქ ჭარჷ: „არძა მონატრუთ, მუშენდა მა ხოლო თეშ ენომხეთ გურშა, მუჭოთ ქრისტე იესოს“ (ფილ. 1:8). პავლექ ფილიპელ ქრისტიანეფს მეჭარ, ნამდა თინეფიშ გურშენ ლოცულენდჷ. თინა იეჰოვას თხინდჷ, ქიმეხვარკო  ფილიპელეფს, უმოსო მირდესკო ჸოროფას, დერწმუნესკო, მუ რდუ არძაშ უმოს მნიშვნელოვან, მუთუნს ბრალქ ვეგიადვესკო, შხვეფ ვა დაბრკოლესკო დო გაგრძელესკო სიმართლეშ ნაყოფიშ მიკოღალა. მუშო ოკო რაგად, პავლეშ შურდოგურით ნათქუელ სიტყვეფშე ჩქი ხოლო ბრელ მუთუნიშ გურაფა შემლებნა. თაშ ნამდა, მორთ, წეპკითხათ, მუ მეჭარ პავლექ ფილიპელ ქრისტიანეფს (წეკითხით ფილიპელები 1:9—11). თე სტატიაშე ქობძირუნთ თი აზრეფს, ნამუთ პავლექ მიშინუ დო გუვარჩიენთ, მუჭო შემლებნა თინეფიშ გიმორნაფა.

4. ა) მუჭოთ 1 იოანეშ 4:9, 10-ის ინოჭარ, მუჭო გიმირჩქინ იეჰოვაქ ჩქინწკუმა დიდ ჸოროფა? ბ) მუ ზომაშა ოკო მიჸორდან ღორონთ?

⁴ იეჰოვაქ ჩქინწკუმა დიდ ჸოროფა გიმირჩქინ, მუჟამსით მუშ სქუა ქუმაშქვჷ დედამიწაშა, ნამდა ჩქინ ცოდვეფიშ გურშენ დოღურედკო (წეკითხით 1 იოანე 4:9, 10). ღორონთიშ გიმორჩქინელ თეცალ დიდ ჸოროფა ჩქი ხოლო აღბძრენა, მიჸორდან თინა (რომ. 5:8). მუ ზომაშა ოკო მიჸორდან ღორონთ? თე კითხვაშ პასუხ იძირე იესოშ სიტყვეფშე, ნამუთ ფარისეველს უწუ: „გიჸორდას იეჰოვა, სქან ღორონთ, მთელ გურით, მთელ შურით დო მთელ გონებათ“ (მათ. 22:36, 37). ვა მოკონა, ნამდა ღორონთ გვერდ გურით მიჸორდან. ჩქი მოკონა იეჰოვაშ ჸოროფაქ ირ დღას მიძინას. პავლექ ფილიპელ ქრისტიანეფს ელუჩ, თინეფიშ ჸოროფაქ უმოსო მირდუკო. მუ ოკო ვაკეთათ, ნამდა უმოსო მიბრდათ იეჰოვაშ ჸოროფას?

5. მუ რე საჭირო, ნამდა ღორონთ ხოლო უმოსო ქიპჸოროფუათ?

⁵ ღორონთ ქიპჸოროფუათინ, საჭირო რე, გეფჩინებაფუათ თინა. ბიბლია იჩიებ: „მიდგას ვა უჸორს, თინა ვეჩინენს ღორონც, მუშენდა ღორონთ ჸოროფა რე“ (1 იოან. 4:8). მოციქულ პავლექ თქუ, ნამდა ღორონთ უმოსო ქიმეჸოროფებნა, მუჟამსით მიბღენთ ზუსტ რჩქინას დო ბოლოშა ქინვანჭუთ თის (ფილ. 1:9). მუჟამსით ბიბლიაშ გურაფა დიბჭყით, ღორონთიშ თვისებეფიშ გურშენ ზოგად რჩქინა მიბღით დო ღორონთიქ ქიმეჸოროფეს. მუთ უმოსის ბგებულენდით იეჰოვაშ გურშენ, თით უმოსო ირდუდ ჩქინ ჸოროფა. ათეშენ ჩქინ ცხოვრებას არძაშ უმოს მნიშვნელოვან ადგილ ქიდეკინ ღორონთიშ სიტყვაშ გურაფაქ დო თიშე ფიქრიქ (ფილ. 2:16).

6. მუჭოთ 1 იოანეშ 4:11, 20, 21-ის ჭარ, ხოლო მი ოკო მიჸორდან?

⁶ ღორონთიშ ჸოროფა აღბძრენა მიჸორდან ჯიმალეფ (წეკითხით 1 იოანე 4:11, 20, 21). შილებე იფიფქრათ, ნამდა და დო ჯიმალეფ ადვილო მეჸოროფებნა, მუშენდა იეჰოვას ვომსახურუთ, თიშ ჯგირ თვისებეფს მეპუნთ დო ვოცადუთ მივაჸუნათ იესოშ მაგალითის, ნამუქით ჩქინო დუდ გაწირ დო თეთ დიდ ჸოროფა გიმირჩქინ. მარა შილებე მინშა გამჭირდან მივაჸუნათ მითითებას, მიჸორდან ართიან. მორთ, გუვარჩუათ ფილიპეშ კრებაშ მაგალით.

7. მუშ გურაფა შემლებნა პავლეშ რჩევაშე, ნამუთ თიქ ევოდიას დო სინტიქეს მეჩჷ?

⁷ ევოდია დო სინტიქე მსახურებაშო დუდგინოდვალირ ქრისტიანეფ რდეს. თინეფ პავლეწკუმა ართო მსახურენდეს. მარა თე დალეფქ მიოტეს ართიანწკუმა მეგობრობა. შილებე თეშ მიზეზ თინა რდუ, ნამდა მუდგარენ საკითხშე განსხვავებულ აზრ უღდეს. ფილიპეშ კრებაშა მეჭარილ წერილს, სოდეთ თე დალეფ მსახურენდეს, პავლექ სახელეფით მიშინუ თინეფ დო პირდაპირ რჩევა მეჩჷ, ნამდა „ართ აზრ უღდესკო“ (ფილ. 4:2, 3). თეს გეძინელ, პავლექ ქოძირ თიშ საჭიროება, ნამდა მთელ კრებაშა ქიმუჩამუდკო შენიშვნა: „ირფელ უმიზეზო ჩიულიშ დო ნირზიშ უმშო აკეთით“ (ფილ. 2:14). მუშო ოკო რაგად, პავლეშ მეჩამილ პირდაპირ რჩევაქ ხვალე თე ართგურ დალეფს ვარინ მთელ კრებას მეხვარ უმოსო ქიჸოროფესკო ართიან.

8. მუჟამ შილებე გამჭირდან და დო ჯიმალეფწკუმა ჸოროფაშ გიმორჩქინაქ დო მუ მიმეხვარებნა თეცალ დროს?

 ⁸ ევოდია დო სინტიქეცალო, შილებე ჩქი ხოლო გამჭირდან მთელ გურით ქიპჸოროფუათ და დო ჯიმალეფ, მუჟამსით მთელ ყურადღებას თინეფიშ არასრულყოფილებაშა გეგნიბღანთ. შეცდომეფ არძას მუმალენა, ათეშენ შხვეფიშ შეცდომეფშე ფიქრ გუვაგრძელით-და, გამჭირდუნა ქიპჸოროფუათ თინეფ. მაგალთო, ჯიმას შილებე გაჭყორდჷ ქიმმეხვარესკო სამეფო დარბაზიშ დონწყუალას დო თეშ გურშენ გურქ მომირთეს. თე ჯიმაშ დაშვებულ შხვა შეცდომეფშე ფიქრ ქიდიპჭყით-და, უმოსო ქუმმალენა გურ დო გამჭირდუნა ჸოროფაშ გიმორჩქინა. თეცალ სიტუაციას ქეშეფხვადით-და, ჯგირ იჸუაფ ქიგიფშინათ, ნამდა იეჰოვა ორწყე, მუჭოთ ჩქინ, თეშ და დო ჯიმალეფიშ შეცდომეფს ხოლო. მარა თეშ უმკუჯინუო, ღორონც იშენით არძა ვუჸორთ. თაშ ნამდა, მივაჸუნათ იეჰოვაშ მაგალითის, მიჸორდან და დო ჯიმალეფ დო ყურადღება თინეფიშ ჯგირ თვისებეფშა გეგნიბღათ. მუჟამსით ირნერო ვოცადუთ და დო ჯიმალეფიშ ჸოროფა გუვავითარათ, თეთ ხეს ვუნწყუნთ ართობას (ფილ. 2:1, 2).

9. ნამ მნიშვნელოვან საკითხეფ მიშინუ პავლექ ფილიპელეფშა მეჭარილ წერილს?

⁹ წმინდა შურიშ ხემძღვანელობათ პავლექ მითითება მეჩჷ ფილიპელეფს დო არძა ქრისტიანს, ნამდა დერწმუნესკო მუ რდუ უმოს მნიშვნელოვან (ფილ. 1:10). თე მნიშვნელოვან საკითხეფშა მიშურს იეჰოვაშ სახელიშ განწმენდა, თიშ განზრახვეფიშ შესრულება დო თეწკუმა ართო, მშვიდობა დო ართობაშ შენარჩუნება კრებას (მათ. 6:9, 10; იოან. 13:35). მუჟამსით თე საკითხეფს არძაშ უმოს მნიშვნელოვან ადგილ უკინებ ჩქინ ცხოვრებას, თეთ ვოძირანთ, ნამდა მიჸორა იეჰოვა.

10. მუ ოკო ვაკეთათ, ნამდა იეჰოვაშ თოლს ბრალქ ვეგმადვან?

¹⁰ თეს გეძინელ, პავლექ თინა ხოლო თქუ, ნამდა რდესკო წმინდეფ. მუშო ოკო რაგად, ჩქი დღას ვეპჸუაფუთ სრულყოფილო წმინდეფ, მუნერით ჩქინ წმინდა ღორონთ იეჰოვა რე. მარა თიშ თოლს წმინდეფ იპჸუაფუთ, მუჟამსით ირფელს გუვაკეთენთ, ნამდა უმოსო ქიპჸოროფუათ და დო ჯიმალეფ დო დებრწმუნათ, მუ რე უმოს მნიშვნელოვან. ჸოროფაშ გიმორჩქინაშ ართ-ართ საშვალება რე, ირნერო ვეცადათ ვადვაბრკოლათ შხვეფ.

11. მუშენ ოკო ვადვაბრკოლათ შხვეფ?

¹¹ მითითება, „ვა დაბრკოლათ შხვეფ“, სერიოზულ საკითხ რე. შხვეფქ შილებე დებრკოლან ჩქინ გიშაგორილ გართობათ, მიკაქუნალით ვარდა სამუშათ. ჩქინ არჩევან შილებე იეჰოვაშო მისაღებ რდას, მარა შხვეფს ქუვაბრკოლენთ-და, თენა სერიოზულ საკითხ რე. მუჭოთ იესოქ თქუნ, თი კოჩშო, მით ართ-ართ მუშ მიმაჸუნალს ვარა დაბრკოლენდუნ, თიშო უჯგუშ იჸუაფუდ, კისერს სქიბუშ ქუა ქიგიობუნესკო დო ზღვას ქინაჸათესკო (მათ. 18:6).

12. მუს ბგურაფლენთ ართ პიონერ წყვილიშ მაგალითშე?

¹² ქობძირათ, მუჭო გეთვალისწინ ართ პიონერ წყვილქ იესოშ ნარაგად. თე წყვილიშ კრებას ახალნათილ ჩილ დო ქომონჯ მსახურენდჷ. თინეფქ თიცალ მკაცრ ოჯახის ირდეს, სოდეთ ბრელ მუთუნიშ კეთება ვეშილებედ. ათეშენ ფიქრენდეს, ნამდა ქრისტიანეფს ოკო ვა ულინდესკო კინოთეატრშა დო ვა უჯინდესკო თიცალ ფილმეფშა ხოლო, სოდეთ გლახა მუთუნს ვაძირანდეს. თე ჩილ დო ქომონჯის მანგარო გუკვირდ, მუჟამსით ქიგეგეს, ნამდა პიონერ წყვილ კინოთეატრის რდუ. თე ამბეშ უკულ თინეფქ მიოტეს კინოთეატრშა გილულა, სოიშახ ახალნათილ წყვილქ მეტ რჩქინა ვემიღ დო თე საკითხშე თვალსაზრის ვა თირუ (ებრ. 5:14). თეცალ  საქციელით პიონერ წყვილქ ქაძირუ, ნამდა ხვალე მუნეფიშ დუდშე ვა ფიქრენდეს. თინეფქ სიტყვათ დო საქმეთ დამტკიცეს და დო ჯიმალეფიშ ჸოროფა (რომ. 14:19—21; 1 იოან. 3:18).

13. ხოლო მუჭო შილებე დუვაბრკოლათ შხვეფ?

¹³ შხვეფს თიმწკუმა ხოლო დუვაბრკოლენთ, მუჟამსით თიცალ სიტუაციას ქინვოჸოთანთ, მუდგაქ შილებე საბოლათ ცოდვაშა ქიმიჸონას თინეფ. მუჭო შილებე მოხვადას თექ? წერმიბდგინათ თეცალ სიტუაცია: დიდ მონდომაშ უკულ ბიბლიაშ მაგურაფალქ დუდ დანებ ალკოჰოლიშ შუმას. თის არჩქილე, ნამდა დღას ოკო ვა შვას ოშუმალი. თიქ დითირუ ცხოვრებაშ წეს დო დინათ. ჭიჭე ხანიშ უკულ, თინა მეგობრულ შეხვალამაშა ქუდაპეჯეს, სოდეთ ოჯახიშ დუდიქ დანძალ ალკოჰოლიშ შუმა. თინა ურაგად: „ასე უკვე ქრისტიან რექ დო სქანწკუმა იეჰოვაშ წმინდა შურ რე. წმინდა შურიშ ნაყოფიშ ართ-ართ მხარე რე დუდშეკება. თე თვისებას გეგმირჩქინანქ-და, შეგალებე ზედმეტ ვაშვე“. წერმიდგინით, მუ მოხვადუდ თე ჯიმას თეცალ გლახა რჩევაშა ქუდუჸუნალუდკო!

14. მუჭო მოხვარნა კრებაშ შეხვალამეფ, ფილიპელეფიშ 1:10-ის მოჩამილ მითითებეფიშ გიმორნაფას?

¹⁴ კრებაშ შეხვალამეფ მოხვარნა შხვადოშხვანერო გიმიბრინუათ ფილიპელეფიშ 1:10-ის მოჩამილ რჩევეფ. პირველ, მუდგას შეხვალამეფიშ დროს ვარჩიენთინ, გუმოშინანა, ნამდა იეჰოვაშ აზრეფ ირფელშე უმოს მნიშვნელოვან რე. მაჟია, ბგურაფლენთ, მუჭო გიმიბრინუათ ნაგურეფ, ნამდა ბრალქ ვეგმადვან. დო მასმა, აღბძრენა ართიანწკუმა ჸოროფა გეგმიფჩქინათ დო ვაკეთათ  ჯგირ საქმეეფ (ებრ. 10:24, 25). მუჟამსით და დო ჯიმალეფ გურშა ელამკინანა, თენა მოხვარნა, ხოლო უმოსო ქიპჸოროფუათ ღორონთ დო ჩქინ საჯიმალო. ღორონთიშ დო და დო ჯიმალეფიშ ჸოროფათ გურ ეფშა ქუმაფნან-და, ირფელს გუვაკეთენთ, ვადვაბრკოლათ ჯიმალეფ.

15. მუჭო შეილებნა „გემკიღათ სიმართლეშ ნაყოფი“?

¹⁵ პავლე ლოცულენდჷ, ნამდა ფილიპელეფს „სიმართლეშ ნაყოფი“ გემკუღალდესკო (ფილ. 1:11). თეშა მიშეშ იეჰოვაშ დო თიშ ხალხწკუმა ჸოროფაშ გიმორჩქინა, თეს გეძინელ შხვეფწკუმა იესო ქრისტეშ რწმენაშ დო დიდებულ მომავალიშ გურშენ ჩიება ხოლო. ფილიპელეფიშ 2:15-ის მოჸუნაფილ რე თეცალ სიტყვეფ: „მურიცხეფცალო ვანათენდათ ქვეყნიერებას“. თენა გუმოშინანა იესოშ სიტყვეფს, ნამუთ მუშ მოწაფეეფს უწუ: „თქვა რეთ ქვეყნიერებაშ სინთე“ (მათ. 5:14—16). იესოქ დავალ მუშ მიმაჸუნალეფს მოწაფეეფო მამზადესკო ხალხ დო თქუ, ნამდა თინეფ იჸუაფდეს „მოწმეეფ . . . დედამიწაშ არძა კუნთხუს“ (მათ. 28:18—20; საქ. 1:8). „სიმართლეშ ნაყოფი“ თიმწკუმა მიკმომღუნა, მუჟამსით მონაწილებას ბღებულენთ, არძაშ უმოს მნიშვნელოვან საქმეს.

16. მუჭო იძირე ფილიპელეფიშ 1:12—14-შე, ნამდა მუ სიტუაციას ვა ვორდათინ, შემლებნა მურიცხეფცალო ვანათენდათ? (ქოძირით სურათ გალენ გვერდის).

¹⁶ მუდგა სიტუაციას ვა ვორდათინ, შემლებნა მურიცხეფცალო ვანათენდათ. მინშა, მუთ დიდ პრობლემათ მიმორჩქუნან თიქ, შილებე ხე შემინწყუან სახიოლო ამბეშ ქადაგებას. მოციქულ პავლე რომს შინაპატიმრობას რდუ, მუჟამსით ფილიპელეფს თე წერილ მეჭარ. მარა თეს ვაუცილებ პავლეშა უქადაგკო მუშ მცველეფს დო თინეფს, მით ჸუდეშა აკითხანდჷ. პავლე ირნერ  სიტუაციას გურგედვალირო ქადაგენდჷ დო თეშ მეჯინუ, შხვა ჯიმალეფ ხოლო გაბედულო დო უშქურანჯო აცხადენდეს ღორონთიშ სიტყვას (წეკითხით ფილიპელები 1:12—14; 4:22).

17. ქიმიჸონით თიშ თანამედროვე მაგალით, მუჭო ქადაგენს ნამთინე და დო ჯიმა რთულ სიტუაციეფიშ უმკუჯინუო.

¹⁷ ბრელ და დო ჯიმას შეულებ მიაჸუნას პავლეშ გაბედულებაშ მაგალითის. ნამთინე თიცალ ქიანას ცხოვრენს, სოდეთ ჩქინ საქმიანობა აკრძალურ რე ვარდა კარდოკარ ქადაგებაშ ნება ვა უღნა, ათეშენ სახიოლო ამბეშ ქადაგებაშო შხვა შარეფს გორნა (მათ. 10:16—20). ართ-ართ ქიანას, სოდეთ თეცალ სიტუაცია რე, რაიონულ ზედამხედველქ ელუჩ და დო ჯიმალეფს, ნამდა თინეფიშ „უბან“ ჸოფედკო ნათესეფ, მეზობელეფ, კლასელეფ, თანამშრომლეფ დო ნაჩინებუეფ. ჟირ წანაშ დინახლე თე რაიონს კრებეფიშ რიცხვიქ მანგარო ქიმიძინ. შილებე ჩქი ვა ფცხოვრენდათ თიცალ ქიანას, სოდეთ თეცალ სიტუაცია რე, მარა ჩქინ და დო ჯიმალეფიშ მაგალითშე ართ მუდგარენიშ გურაფა შემლებნა: ირიათო ოკო ბგორათ შხვადოშხვა საშვალებეფ, ნამდა სრულაშე მიბღათ მონაწილება ქადაგებაშ საქმეს დო შემლებნა დარწმუნებულ ვორდათ, იეჰოვა ქომჩანა ძალას, გივორჯგინათ არძანერ სირთულეს (ფილ. 2:13).

18. მუშ კეთება ოკო მაფდან გინოჭყვიდილ?

¹⁸ განსაკუთრებულო ამდღარ დროს, გინოჭყვიდილ ოკო მაფდან მივაჸუნათ პავლეშ რჩევას, ნამდგას ფილიპელეფშა მეჭარილ წერილს ბკითხულენთ. მორთ, დებრწმუნათ მუ რე უმოს მნიშვნელოვან, ვეცადათ ბრალქ ვეგმადვან, ვადვაბრკოლათ შხვეფ დო სიმართლეშ ნაყოფი გემკიბღათ. თაშ ქიმიფქციებუთ-და, უმოსო გეგმიფრჩქინანთ ჸოროფას დო განვადიდენთ ჩქინ მოჸოროფე მუმა იეჰოვას.