1. მუ ნაბიჯეფ გინოდგჷ ბრელ ახალგაზრდაქ?

 ᲘᲠ ᲬᲐᲜᲐᲡ ანთასობით ახალგაზრდა ინათუ. სი გეგნოდგიო უკვე თე ნაბიჯ? თაშ ქორენ-და, სქან სულიერ და დო ჯიმალეფ დო იეჰოვა ხარენა თეთ! (იგავ. 27:11). ართ წუთის დეფიქრ, უკვე მუსხი მუდგარენ აკეთ; მაგალთო, მთელ გურით გურაფლენდჷ ბიბლიას შილებე წანეფიშ დინახალე, მუდგაქ დუგარწმუნ, ნამდა თინა ღორონთიშ სიტყვა რე. თეს გეძინელ, გეჩინებაფე დო ქიჸოროფე თე წმინდა წიგნიშ ავტორ. იეჰოვაშ მიმართ სქან ჸოროფაქ თეშ მირდჷ, ნამდა დუდ მეუძღვინ თის დო ასე თიშ ნათილ მსახურ რექ. მუშმაჯგირა გადაწყვეტილება რე!

2. მუს გუვარჩიენთ თე სტატიას?

 ² მუშო ოკო რაგად, ონდო დინათუდინ, სქან რწმენაქ ბრელნერო გიმიცად. მარა დროშ ულაწკუმა ართო, შხვა სირთულეეფს ხოლო შეხვადუქ. სატანა ირნერო ეცადებ, დასუსტას იეჰოვაშ მიმართ სქან ჸოროფა დო მიგოტებაფუას თიშ მსახურება (ეფეს. 4:14). მარა თეშ უფლება ოკო ვემეჩე. მუ მიგეხვარებ, ვადინუე იეჰოვაშ ართგურობა დო შეასრულე ღორონთშა მეჩამილ პირობა? სი ოკო გაგრძელე წიმი ულა სულიერ მოწიფულობაშა (ებრ. 6:1). თე სტატიას გუვარჩიენთ, მუჭო შეილებ თეშ კეთება.

3. მუ ოკო აკეთას არძა ქრისტიანქ ნათუაშ უკულ?

³ ნათუაშ უკულ საჭირო რე, არძაქ მივაჸუნათ მოციქულ პავლეშ რჩევას, ნამუთ ეფესოელ ქრისტიანეფს მეჩჷ. პავლე ელუჩანდჷ თინეფს, ჸოფედესკო „რდუალათებულ“ ქრისტიანეფ (ეფეს. 4:13). შხვა სიტყვეფით ქოფთქუათინ,  თიქ უწუ: „გაგრძელით წიმი ულა“. ჩქი მარჩქილენა, მუშ რაგად ოკოდ პავლეს, მუჟამსით სულიერ რდუალა ბაღანაშ ფიზიკურ რდუალას ქეშუდარ. ახალდაბადებულ ბაღანა მშობლეფშო ხიოლიშ დიდ მიზეზ რე, მარა თინა ირო ჭიჭე ვეჸუაფ; დროშ მიკულაწკუმა ართო „ირფელ ბაღანურს ჩეთხინუანს“ (1 კორ. 13:11). ნათუაშ უკულ ხოლო საჭირო რე სულიერო წიმი ულა. მორთ გუვარჩუათ ნამთინე მხარე, მუთ მიმეხვარებნა თეშ კეთებას.

4. მუ თვისება მიგეხვარებ სულიერო წიმი ულას? გენწყჷ (ფილ. 1:9)

⁴ ირიათო გემანგარ იეჰოვაშ ჸოროფა. მუშო ოკო რაგად, სი უკვე გიღჷ იეჰოვაშ ძალიერ ჸოროფა, მარა თიშ უმოს გამანგარება ხოლო შილებე. ართ-ართ, მუთ თეს მიგეხვარებ, მოციქულ პავლექ მიშინუ ფილიპელეფიშ 1:9-ს (წეკითხით). პავლე ლოცულენდჷ, ფილიპელეფიშ ჸოროფაქ უმოსო დო უმოსო ქიმიძინკო. თაშ ნამდა, ჩქი შემლებნა გუვამანგარათ იეჰოვაშ ჸოროფა, მუდგაშო საჭირო რე ზუსტ რჩქინა დო ინონჭაფაშ უნარ. მუთ უმოსო გეფჩინებაფუანთ იეჰოვას, თით უმოსო ქიმეჸოროფებნა თინა, დუვაფასენთ თიშ თვისებეფს დო თის, მუჭო მოქმედენს. თეს გეძინელ, გემემანგარებნა სურვილ, ვასიამოვნათ თის დო ვა ვაკეთათ თიცალ მუდგარენ, მუდგათ გურს უწყუნუანდით. ჩქი მუთ შემლებნან ირფელს ვორთუთ, ნამდა ქიგებგათ, მუ რე თიშ ნება დო შევასრულათ თინა.

5, 6. მუჭო შემლებნა უმოსო ქიპჸოროფუათ იეჰოვა? გენწყით.

⁵ იეჰოვაშ ჸოროფას გემამნგარენთ, მუჟამსით უჯგუშო გეფჩინებაფუანთ იესოს, მით ზუსტას მეჸუნს მუმაშ მაგალითის (ებრ. 1:3). იესოშ გაჩინებაფაშ არძაშ უჯგუშ საშვალება სახარებეფიშ გიმორკვიება რე. ბიბლიაშ ირდღაშიან კითხირიშ ჯგირ ჩვევა გავითარებულ დიო ხოლო ვა გაფუნ-და, ჯგირ იჸუაფ, ასეშე ქიდიჭყე. იესოშ გურშენ კითხირიშ დროს განსაკუთრებულ ყურადღება თიშ თვისებეფს ქიმიაქცი; მუნერ უშუალო რდჷ თინა ვარდა მუჭო იხუტოლუანდჷ ბაღანეფს ჸოროფათ (მარ. 10:13—16). იესო მეგობრულ რდჷ დო მოწაფეეფს ვა უჭირდეს თიწკუმა მუნეფიშ აზრიშ გიმოხანტუა (მათ. 16:22). თეშნერო თინა მეჸუნდჷ ზეციერ მუმაშ მაგალითის. იეჰოვა ხოლო თეშნერ უშუალო რე. ჩქი შემლებნა ზეციერ მუმას ლოცვათ დურაგადუათ დო გურ გეგნუფაჩათ. დარწმუნებულ ვორეთ, ნამდა თინა ვა გამდღანნა, თის უჸორთ დო ზრუნენს ჩქინდე (1 პეტ. 5:7).

⁶ იესო მიშეშ შხვეფიშ მდგომარეობაშა. მოციქულ მათე იჩიებ: „ხალხის ორწყედუნ, გურს ონტუდ თინეფიშ გურშენ, მუშენდა უჭყიშო შხურცალო ძალაგიშალიებურ დო მიკოცუმილ რდეს“ (მათ. 9:36). მუშ რაგად შილებე იეჰოვაშე? იესოქ თქუ: „ჩქიმ ზეციერ მუმას ვაკო, ნამდა თე ჭიჭე ჯგუფშე, ართ რდასინ ხოლო, მითინქ დოღურას“ (მათ. 18:14). გურს ხიოლით ემიფშანა თიშ რჩქინა, ნამდა იეჰოვას ჩქი მანგარო უჸორთ. მუთ უმოსო გეფჩინებაფუანთ იესოს, თით უმოსო ქიმეჸოროფებნა იეჰოვა.

7. მუჭო მიგეხვარებ მოწიფულ ქრისტიანეფწკუმა ურთიერთობა?

⁷ კრებას მოწიფულ და დო ჯიმალეფიშ ხოლოს გაჩინებაფა მიგეხვარებ, უმოსო გეგმოხანტე ჸოროფა დო სულიერო წიმი იდე. ქიდეკვირ, მუნერ ხიოლ უღნა თინეფს. თე ქრისტიანეფ ვა ნარღენა, ნამდა გინოჭყვიდეს, ემსახურესკო იეჰოვას. ქოთხი თინეფს, ქიგეჩუან საინტერესო შემთხვევეფ მუნეფიშ მსახურებაშე. მუჟამსით მნიშვნელოვან გადაწყვეტილება გაფჷ მიოღებელ, ქელაკითხე მოწიფულ თანაქრისტიანეფს რჩევა. რშუდას, „სოდეთ ბრელ ელმაჩამალ რე, თექ რსხება რე“ (იგავ. 11:14).

8. ბიბლიურ გურაფეფიშ მიმართ ეჭვეფქ გოირჩქინდ-და, მუ ოკო აკეთე?

 ⁸ გიორჯგინ ეჭვეფს. მუჭოთ  მაჟია აბზაცის რდჷ მოჩამილ, სატანა ეცადებ, გეცილას წიმი ულას. ართ-ართ საშვალება, მუდგას თეშო ირინუანს რე ეჭვეფ. თიქ შილებე ეჭვეფ გოირჩქინას ბიბლიაშ ნამთინე გურაფაწკუმა დაკავშირებით. მაგალთო, ნამთინექ შილებე ეცადას, დუგარწმუნას, ნამდა ევოლუციაშ შედეგო გოფრჩქინდით. ბაღანობას ალბათ ბრელ მუდგარენ ვაიჩქუდ თე საკითხშე, მარა გემწირდინ, სკოლას ქეშეხვად თის. ევოლუციაშ გურშენ სქან მასწავლებერეფიშ ნარაგად შილებე ლოგიკურო გაძირედას, მარა თინეფს ალბათ დღას ვა მუნდომებნა, გეგმურკვიებდესკო გუმაჭყაფალიშ არსებობაშ მტკიცებულებეფ. რშუდას იგავეფიშ 18:17-ის მოჩამილ პრინციპ: „სასამართლოს პირველ გიშმაულარ მართალო მიორჩქუნა, სოიშახ მაჟია ვა მოურს დო მუშის ვა თქუანს“. თიშ მანგიორო, ნამდა თოლწკურილო ენდე, მუდგას სკოლას გიწინა, ყურადღებათ გეგმირკვი ღორონთიშ სიტყვას, ბიბლიას, მოჩამილ ჭეშმარიტება; დოგორ თე საკითხიშ გურშენ ინფორმაცია ჩქინ პუბლიკაციეფს; ქუდურაგადე თი და დო ჯიმალეფს, მიდგას ულირს ევოლუციაშ ჯერდეს დო ქოკითხ, მუქ დარწმუნ, ნამდა არსებენს გუმაჭყაფალ, ნამდგას უჸორთ. თეცალ ჩიებეფ მიგეხვარებ, ყურადღება თი ფაქტეფშა გეგნიღე, ნამუთ გუმაჭყაფალიშ არსებობას ამტკიცენს.

9. მუს გურაფლენთ მელისაშ შემთხვევაშე?

⁹ მელისას * მანგარო მეხვარ შემოქმედებაშ გურშენ გიმორკვიებაქ. თინა იჩიებ: «სკოლას ევოლუციაშ თეორიას თეშ ოგურუანა, ნამდა ლოგიკურო იძირე, ათეშენ ეჭვეფქ გომრჩქინდჷ. დუდშე ირნერო ურიდანდჷ დუდის გიმორკვიებას, მუშენდა მოშქურუდ, ჩქიმ ეჭვეფქ მართალქ ვეჸუკო. მარა თიშე ხოლო ფიფქრენდჷ, ნამდა იეჰოვას ვაკო, გაუაზრებელო ვემსახურათ. ათეშენ ქიდიბჭყჷ გიმორკვიება. წებკითხჷ წიგნ „არსებენსო მზრუნველ გუმაჭყაფალ?“ (ქორთ.) დო ბროშურეფ „მუშით გორჩქინდუო სიცოცხლექ?“ (ქორთ.) დო „სიცოცხლეშ გოჭყაფა — ხუთ კითხვა, ნამდგაშე ღირჷ დაფიქრება“ (ქორთ.). თენა ზუსტას თინა რდჷ, მუთ მოსაჭირუდ. ნოტე უმოს ადრე გამკეთებუდკო».

10, 11. მუ მიგეხვარებ, ზნეობრივო წმინდათ ქუდოსქიდე? (1 თეს. 4:3, 4)

 ¹⁰ დუდ ეუჩილითე გლახა საქმეეფს. მოზარდობაშ დროს სექსუალურ გრძნობეფ შილებე განსაკუთრებულო რდას მოზღვავებულ. თეწკუმა ართო, ნამთინექ შილებე ეცადას, ქუდოიჸუნუას უზნეობაშა. სატანას ხოლო ზუსტას თენა ოკო. მარა მუ მიგეხვარებ, ვეიაჸუნე ცდუნებას დო ვადინუე ზნეობრივ სიწმინდე? (წეკითხით 1 თესალონიკელეფიშ 4:3, 4). პირად ლოცვეფიშ დროს გურ გეგნუფაჩ იეჰოვას; ქეჩი, მუს გინაფლენქ დო ქოთხი, ძალა ქიმერჩას (მათ. 6:13). რშუდას, იეჰოვას სქან მოხვარა ოკო დო ვართ ხოლო დასაჯება (ფსალმ. 103:13, 14). თეწკუმა ართო, შეილებ ღორონთიშ სიტყვა ხოლო ქიმიხვარუე. მელისა ობრძოლუდ უზნეო ფიქრეფს. თინა იჩიებ: „ბიბლიაშ ირდღაშიან კითხირქ მიმეხვარ, ვემემტებუდკო ჩქიმ არასწორ სურვილეფწკუმა ბრძოლა. თინა გუმოშინანდჷ, ნამდა იეჰოვას ვოკუთვნუქ დო თიშ მსახურება მოკო“ (ფსალმ. 119:9).

¹¹ სქან პრობლემეფწკუმა რკინება ხვალე ვემინდომა. ქეჩი მშობლეფს, მუს ობრძოლუქ. მუშო ოკო რაგად, ადვილ ვა რე თეცალ საკითხეფშე ჩიება, მარა თეშ კეთება მნიშვნელოვან რე. მელისა იჩიებ: „იეჰოვას ლოცვას გაბედულება ქოფთხი დო მუაჩქიმს ქუდურაგადე ჩქიმ პრობლემაშ გურშენ. თეშ უკულ დუდ ბრელით უჯგუშო იბგინ. მიჩქუდ, ნამდა იეჰოვას ვოამაყუდ“.

12. მუჭო შეილებ მიღე სწორ გადაწყვეტილებეფ?

¹² იხემძღვანელ ბიბლიურ პრინციპეფით. ჭიე-ჭიეთ მშობლეფ უმოს თავისუფლებას ქიმერჩანა დო შეგალებე, სქანით მიღე გადაწყვეტილებეფ. მარა თენა ვა ნიშნენს, ნამდა დიდ ცხოვრებისეულ გამოცდილება გიღჷ. მუჭო შეილებ დუდ ეუჩილითუე თიცალ შეცდომეფს, მუთ გილაილუანდჷ იეჰოვაწკუმა ურთიერთობას? (იგავ. 22:3). ართ და, კარი, ენწყუნს, მუქ მეხვარ, მიღკო სწორ გადაწყვეტილებეფ. თიქ ქუგოხვად, ნამდა მოწიფულ ქრისტიანს არძა სიტუაციაშო კანონეფ ვასაჭირ. კარი იჩიებ: „საჭირო რდჷ, ბიბლიურ პრინციპეფს ქინვანჭკო დო ვართ ხოლო ხვალე კანონეფს“. ბიბლიაშ კითხირიშ დროს ქოკითხ სქან დუდის: „მუს ბგურაფლენქ ნაკითხირშე იეჰოვაშ აზროვნებაშ გურშენ? რენო თაქ თიცალ პრინციპეფ, ნამუთ სწორას მოქმედებას მიმეხვარებ? თაშ ქორენ-და, მუ ჯგირობუას მომღანს თინეფიშ მეჸუნა?“ (ფსალმ. 19:7; ეს. 48:17, 18). ბიბლიაშ კითხირით დო თექ მოჩამილ პრინციპეფშე ჯგირო დაფიქრებათ შეგალებე მარტივო მიღე თიცალ გადაწყვეტილებეფ, ნამდგათ გურს გუხარენქ იეჰოვას. სულიერო წიმი ულას გაგრძელენქ-და, ქიმეხვადუქ, ნამდა არძა სიტუაციაშო კანონეფ ვა გოსაჭირ, მუშენდა ქინანჭუქ იეჰოვაშ აზროვნებას შხვადოშხვა საკითხწკუმა დაკავშირებით.

13. მუჭო შეულებნა ჯგირ მეგობრეფს სქან მოხვარა? (იგავ. 13:20)

¹³ მეგობრეფ იეჰოვაშ მოჸოროფეეფ შქას გეგშეგორ. მუჭოთ ჟიშე მიფშინეთ, მეგობრეფს შეულებნა სქან სულიერ რდუალას ხე ქეშუნწყუან (წეკითხით იგავეფიშ 13:20). ქიმიპჸუნათ და სარაშ მაგალით. თინა ხიოლს ოდინუანდჷ, მარა უკულ თიცალ მუდგარენქ მოხვად, მუდგაქ განწყობა დურთინუ. სარა იჩიებ: «ჯგირ მეგობრეფქ ჩქიმ ცხოვრებას ზუსტას საჭირო დროს გემკორჩქინდეს. ართ ახალგაზრდა და დო მა ირმარას ართო ვამზადენდით „გინაჯინალ კოშკის“. მაჟია მეგობარქ მიმეხვარ, კრებას კომენტარეფიშ კეთება ქიდიბჭყიკო. თინეფიშ მოხვარათ ლოცვას დო პირად გურაფას უმოს სერიოზულ ყურადღება ქიმვაქცი, ქიდიბჭყჷ იეჰოვაწკუმა ურთიერთობაშ გამანგარება დო კინ ქიბგინ ხიოლ».

14. მუჭო იშუ ჟულიენქ ჯგირ მეგობრეფ?

 ¹⁴ მუჭო შეილებ დემეგობრე თიცალ ადამიანეფს, მით სულიერო წიმი ულას მიგეხვარებ? ჟულიენ, ნამუთ უხუცესო მსახურენს, იჩიებ: „ახალგაზრდობას მსახურებაშ დროს ბრელ ჯგირ ქრისტიანს დევემეგობრჷ. თე დუდგინოდვალირ მაქადაგებელეფიშ მაგალითიქ მიმეხვარ, ქობძირკო, მუშმადიდა ხიოლ მოუღ მსახურებას. თეშ უკულ მიზანო მიღუდ, სრულ დროთ მსახურება ქიდიბჭყიკო. თეს გეძინელ, ქიმეფხვად, ნამდა მეგობრეფს ხვალე ჩქიმ მახანეფწკუმა ბგორუნდინ თიშენ, ხეშე უტენდჷ საშვალებას, პჸუნდკო ბრელ ჯგირ მეგობარ. ბეთელს მსახურებაშ დოჭყაფაშ უკულ თექ ხოლო ბრელს დევემეგობრჷ. თინეფიშ მაგალითიქ მიმეხვარ, გონივრულო გეგშებგორკო გართობა დო თექ უმოსო დუმაახლოვ იეჰოვაწკუმა“.

15. მუ გაფრთხილება მეჩჷ პავლექ ტიმოთეს? (2 ტიმ. 2:20—22)

¹⁵ მუ ოკო ქიმნე, მუჟამსით ქიმეხვადუქ, ნამდა კრებას ნამთინეწკუმა ურთიერთობაქ, შილებე იეჰოვაწკუმა მეგობრობა გილაილუას? პავლეს უჩქუდ, ნამდა პირველ საუკუნეშ კრებას, არძას ვა უღუდ სულიერ აზროვნება, ათეშენ გაფრთხილ ტიმოთე, დუდ შორს ქიდეკინკო თინეფშე (წეკითხით 2 ტიმოთეშ 2:20—22). იეჰოვაწკუმა მეგობრობა მანგარ ძვირფას რე. ჩქი ბრელ იფხანდით თეშ მიოჭირნაფალო, ათეშენ მითინს ოკო ვემეფჩათ უფლება, გილამლუან ზეციერ მუმაწკუმა ურთიერთობა (ფსალმ. 26:4).

16. მუნერ მიზნეფ შეილებ გიშეგორე?

¹⁶ გიღდას ჯგირ მიზნეფ. თიცალ მიზნეფ გეგშეგორ, ნამუთ გამანგარენს სქან რწმენას დო სულიერო წიმი ეწოიკინანს (ეფეს. 3:16). მაგალთო, ბიბლიაშ კითხირიშ დო პირად გურაფაშ გეგმა ხომ ვა გაფჷ გაუჯგუშებელ? (ფსალმ. 1:2, 3). ხომ ვეგნოჭყვიდუნდჷ, უმოს ხშირას დო მთელ გურით ილოცკო ვარდა ჭკვერულო გიშეგორკო გართობა დო გონივრულო განაწილკო დრო? (ეფეს. 5:15, 16). მუჟამსით იეჰოვა ქოძირუნს, ნამდა მონდომას ვარკენქ სულიერო წიმი ულას, თის გურ ხიოლით გეიაფშაფუ.

17. მუ ჯგირობუას მოიღანს შხვეფიშ მოხვარა?

¹⁷ შხვეფიშ მოხვარა მოწიფულ ქრისტიანო  გინგოშქვანს. იესოქ თქუ: „ჯგირიშ კეთებას უმოს მეტ ბედნერობა მოუღ, ვინემ აშო მეღებას“ (საქ. 20:35). სქან დროშ დო ახალგაზრდულ ძალეფიშ შხვეფიშ მახვარებელო გიმორნაფა ჯგირობუას მოიღანს. მაგალთო, შეილებ მიზანო გიღდას, ქიმეხვარე კრებას ხანშამიშულირეფს დო თიცალ და დო ჯიმალეფს, მიდგას ბრელ მუთუნიშ კეთება ვეშულებ. შეილებ თინეფიშ მანგიორო მიდართე ოჸიდეეფშა ვარდა ქიმეხვარე ელექტრონულ მოწყობილობეფიშ გიმორნაფას. ჯიმა ქორექ-და, მიზანო გიღდას, გინირთე მომსახურეთ, ნამდა მემსახურე და დო ჯიმალეფს (ფილ. 2:4). ჸოროფაშ გიმოხანტუა კრებაშ გალე ხოლო შეილებ, მუჟამსით სამეფოშ გურშენ სახიოლო ამბეს შხვეფს გინოჩანქ (მათ. 9:36, 37). მდგომარეობა ხეს ქოინწყუნს-და, მიზანო გიღდას, სრულ დროთ ემსახურე იეჰოვას.

18. მუჭო მიგეხვარებ სრულ დროთ მსახურება სულიერო რდუალას?

¹⁸ სრულ დროთ მსახურება ბრელნერ საშვალებას მერჩანს, ნამდა სულიერო წიმი მიდართე. მაგალთო, პიონერო მსახურება კარს გოინჯანს, იგურუე სამეფოშ მახარობელეფიშ სკოლას, იმსახურე ბეთელს ვარდა თეოკრატიულ სამშენებლო პროექტეფს. ართ ახალგაზრდა პიონერ და, კეტრინ, იჩიებ: „ნათუაშ უკულ გამოცდილ და დო ჯიმალეფწკუმა მსახურებაქ მანგარო მიმეხვარ სულიერო წიმი ულას. თინეფიშ მაგალითიქ გინმოჭყვიდირაფუ, უმოს ტომბას გეგმიბრკვიკო ბიბლია დო გუვაუჯგუშკო გურაფაშ უნარ“.

19. სულიერო წიმი ულას გაგრძელენქ-და, მუ კურთხევეფს მიღენქ?

¹⁹ სულიერო წიმი ულას გაგრძელენქ-და, ბრელ კურთხევას მიღენქ. ახალგაზრდულ წანეფს უაზრო მიზნეფიშ თხოზინს ვემკალიენქ (1 იოან. 2:17). დუდის ეუჩილითუანქ ზედმეტ გურჭუას, ნამუთ გლახა გადაწყვეტილებეფიშ მეღებას მოჸუნს დო მიღენქ ნამდვილ წარმატება დო ბედნერობას (იგავ. 16:3). თაშ ქიმიქციებუქ-და, სამაგალითო იჸუაფუქ მუჭოთ ახალგაზრდა, თეშ ხანშამიშულირ თანამორწმუნეეფშო (1 ტიმ. 4:12). მუთ არძაშ უმოს მნიშვნელოვან რე, გეხარენქ თი სიმშვიდეთ დო კმაყოფილებათ, ნამუთ იეჰოვაშ გურიშ გახარებას დო თიწკუმა ხოლოშიან ურთიერთობას მოჸუნს (იგავ. 23:15, 16).