1. მუ გამოცდაშ წოხოლე გედირთჷ იოსებიქ დო მუჭო მიქცუ?

 ᲘᲐᲙᲝᲑᲘᲨ სქუა იოსებ რთულ გამოცდაშ წოხოლე გერდჷ. მუშ ბატონიშ ოსურ ოცადუდ, უზნეობაშა გეიჸუნუკო დო ურაგადუდ: „ქიდინჯირ ჩქიმწკუმა“. მარა იოსებ ვარიას ურაგადუდ თის. ნამთინექ შილებე იფიქრას: „მუშენ მიქცუ იოსებიქ თაშ?“. ფოტიფარ ჸუდეს ვა რდჷ, თეს გეძინელ, იოსებ თექ მოინალე რდჷ. თინა ვარიას ქუწინდ-და, თე ოსურკოჩის შეულებუდ თის სიცოცხლე გაუნწარკო. მარა იოსებ იშენ ვა დოჸუნდჷ თის. მიზეზის კინ მუ იჩიებ: „მუჭო ვაკეთა თე დიდ უბადობა დო მუჭო შებცოდა ღორონთის?!“ (დაბ. 39:7—12).

2. სოვრეშე უჩქუდ იოსების, ნამდა მრუშობა ღორონთიშ თოლს ცოდვა რდჷ?

² სოვრეშე უჩქუდ იოსების, ნამდა მრუშობა ღორონთიშ თოლს „დიდ უბადობა“ რდჷ? მოსეშ კანონ, ნამდგაშა მიშეშ პირდაპირ მითითება — „ვემრუშა“, თეშ უკულ ხოლო ჟიროშ წანას ვა ჭარე (გამ. 20:14). მარა იოსებ თიშმაჯგირას იჩინენდჷ იეჰოვას, ნამდა უჩქუდ, მუ დამოკიდებულება უღუდ თის უზნეობაშ მიმართ. მაგალთო, მუშო ოკო რაგად, იოსების უჩქუდ, ნამდა იეჰოვაქ ქორწინება ართ ქომოლკოჩ დო ართ ოსურკოჩ შქას გაჭყჷ. თინა ხოლო გაგებულ აჸიდ, მუჭო თხილუ იეჰოვაქ ჟირ შემთხვევას მუშ დიდ ბებ სარა, ნამდა ქომონჯიშ ართგურქ ქუდოსქიდკო. თეცალ მუდგარენ ღორონთიქ ისაკიშ ოსურ რებეკაშ შემთხვევას ხოლო აკეთ (დაბ. 2:24; 12:14—20; 20:2—7; 26:6—11). თე ირფელშე ფიქრიშ დროს იოსებ ქიმეხვადუდ, მუ რდჷ ღორონთიშ თოლს სწორ დო მუ — ვარ. იოსების უჸორდჷ იეჰოვა, ათეშენ გინოჭყვიდილ აფუდ, მიაჸუნკო თიშ ნორმეფს.

3. მუს გუვარჩიენთ თე სტატიას?

 ³ ქოიჸორსო სიმართლე? მუშო ოკო რაგად, თაშ რე! მარა ჩქი არძა არასრულყოფილეფ ვორეთ, ათეშენ ფრთხილას ვეპჸით-და, შილებე ქვეყნიერებას გავრცელებურ დამოკიდებულებაქ სიმართლეწკუმა დაკავშირებით ჩქინდა ხოლო ადვილო ქიმოქმედას (ეს. 5:20; რომ. 12:2). თე სტატიას გუვარჩიენთ, მუ რე სიმართლე დო მუ ჯგირობუა მოუღ თიშ ჸოროფას. თეს გეძინელ, ქიფჩიებუთ სუმ ნაბიჯშე, ნამუთ იეჰოვაშ ნორმეფიშ მიმართ ჸოროფას გამმანგარენა.

4. მუ არასწორ შეხედულება უღჷ ნამთინეს სიმართლეწკუმა დაკავშირებით?

⁴ იესოშ დროს რელიგიურ ლიდერეფს მუნეფიშ დუდ მართალო მეუღდეს. მარა ქრისტექ გუდღან თინეფს, მუშენდა აკრიტიკენდეს შხვეფს დო სწორ დო არასწორიშ გურშენ მუნეფიშ ნორმეფ აფდეს დოდგინელ (ეკლ. 7:16; ლუკ. 16:15). ამდღა ხოლო ნამთინე იჩიებ, ნამდა გლახას მუთუნს ვართჷ, მარა თაშ მუნეფიშ მოგონილ ნორმეფიშ გურშენ ფიქრენა. უმენტაშო თეცალ ადამიანეფს მუნეფიშ დუდ მანგარო მოწონა, შხვეფს აკრიტიკენა დო მიორჩქუნა, ნამდა თინეფშე უჯგუშეფ რენა. თეცალ თვისებეფს, ნამუთ სიმართლეშ სარხოს ვა რე, ვეწონუანს იეჰოვა.

5. მუჭოთ ბიბლიაშე იძირე, მუ რე სიმართლე? ქიმიჸონით მაგალითეფ.

⁵ მარტივო გემნწყათინ, სიმართლე ნიშნენს, აკეთე თინა, მუთ იეჰოვა ღორონთიშ თოლს რე სწორ. ბიბლიას სიტყვეფს, ნამუთ თე სიმართლეშ ეიოჭარალო გიმირინუაფ, არძაშ უმოს მაღალ ნორმეფით, იეჰოვაშ ნორმეფით, ცხოვრებაშ აზრ ინოძ. მაგალთო, იეჰოვაქ ვაჭარეფს უზოჯ „ზუსტ ოწონალ“ გეგმირინუესკო (კან. 25:15). თაშ ნამდა, ქრისტიანქ, ნამდგას ოკო, ღორონთიშ თოლს მართალ რდას, ირნერო პატიოსნურო ოკო მიქცუას სამუშას. მართალ კოჩის სამართლიანობა ხოლო უჸორს დო ჯოგჷ თიშ ძირაფა, მუჟამსით შხვას უსამართლოთ ოქცუნა. თეს გეძინელ, მართალ პიროვნება თიშო, ნამდა იეჰოვას ირნერო ქასიამოვნას, გადაწყვეტილებაშ მეღებაშახ ფიქრენს, მეწონებ დო ვარ თინა ღორონთის (კოლ. 1:10).

6. მუშენ შემლებნა ვონდუდათ იეჰოვაშ ნორმეფს სწორ დო არასწორიშ გურშენ? (ეს. 55:8, 9)

⁶ ბიბლია იეჰოვაშენ იჩიებ, ნამდა თიშე მოურს სიმართლე (იერ. 50:7). მუჭოთ ირფელიშ გუმაჭყაფალს, თის უღჷ უფლება, დადგინას ნორმეფ სწორ დო არასწორიშ გურშენ. ჩქი ცოდვილ დო არასრულყოფილ ადამიანეფს ირო ვეშემლებნა ქინვანჭათ, მუ რე სწორ დო მუ — არასწორ, მარა იეჰოვას შეულებ, მუშენდა თინა სრულყოფილ რე (იგავ. 14:12; წეკითხით ესაიაშ 55:8, 9). მარა ღორონთიშ ამნახანტო ვორეთ გოჭყაფილ, ათეშენ შემლებნა ვაკეთათ თინა, მუთ თიშ თოლს რე სწორ (დაბ. 1:27). ჩქი ქოთ მოკონა თაშ მოქციება. ჸოროფა, ნამუთ ღორონთიშ მიმართ მიღნა, გინმოჭყვიდირაფუანა, მუთ შემლებნა ირფელ გუვაკეთათ, ნამდა მივაჸუნათ თიშ მაგალითის (ეფეს. 5:1).

7. მუშენ მოსაჭირნა დოდგინელ ნორმეფ? ქიმიჸონით მაგალით.

⁷ ჩქინდა ჯგირობუა მოუღ, მუჟამსით ართგურო ვომორჩილუთ იეჰოვაშ ნორმეფს სწორ დო არასწორიშ გურშენ. მუშენ შემლებნა თეშ რაგად? მაგალთო, წერმიდგინით, მუ არეულობა იჸუაფუდ ვალუტაშ კურსის არძა ბანკ მუშით გინოჭყვიდუნდასინ ვარდა მუსხი ადამიანიშ ღურა ქუმაჸუნუდ ექიმეფ დო ექთანეფ მკურნალობაწკუმა დაკავშირებულ კონკრეტულ ნორმეფს ვემიაჸუნუდეს-და. დოდგინელ ნორმეფშა მეჸუნა კინ ჩქი ფთხილანა. თეშ რაგად შემლებნა სწორ დო არასწორწკუმა დაკავშირებით ღორონთიშ ნორმეფიშ გურშენ ხოლო.

8. მუ კურთხევეფ ელნა თინეფს, მიდგას უჸორა სწორიშ კეთება?

 ⁸ იეჰოვა კურთხევეფს ვარკენს თინეფს, მით ოცადნა, იცხოვრან თიშ ნორმეფით. თინა მოპირნა: „მართალეფ დემკვიდრენა დედამიწას დო მარადიულო იცხოვრენა თექ“ (ფსალმ. 37:29). წარმოდგენილ ქუგაფნანო, მუნერ ართობა, მშვიდობა დო ხიოლ აღვენუნა ადამიანეფს, მუჟამსით არძა იეჰოვაშ ნორმეფით იცხოვრენს. იეჰოვას ოკო, სი ხოლო გეხარე თეცალ ცხოვრებათ. ნამდვილო, არძას ჯგირ მიზეზ მიღნა, ნამდა მიჸორდან სიმართლე! მუჭო შემლებნა უმოსო ქიპჸოროფუათ თინა? მორთ გუვარჩუათ სუმ ნაბიჯ.

9. მუ მიმეხვარებნა, მიჸორდან სიმართლე?

⁹ პირველ ნაბიჯ: გიჸორდან თინა, მით ადგინენს ნორმეფს. სიმართლე ქომიჸორდანინ, საჭირო რე, ქიპჸოროფუათ თინა, მით სწორ დო არასწორიშ გურშენ ნორმეფს მიდგინენა. მუთ უმოსო ქიპჸოროფუანთ იეჰოვას, თით უმოსო მოკოდან იჸი, იფცხოვრათ თიშ სამართლიან ნორმეფით. მაგალთო, დეფიქრით, ადამ დო ევას იეჰოვა ქუჸორდესკონ, ვეგნურთანდეს თიშ კანონს (დაბ. 3:1—6, 16—19).

10. მუ აკეთ აბრაამქ, ნამდა უჯგუშო ქინანჭუკო იეჰოვაშ აზროვნებას?

¹⁰ მუშო ოკო რაგად, ჩქი ვამკონა, ადამ დო ევაცალო მიფქცუათ. თექ ვა მაღოლანინ, საჭირო რე, ირიათო ბგურაფლენდათ იეჰოვაშ გურშენ, ვაფასენდათ თიშ თვისებეფს დო ვოცადუდათ, ქენვანჭათ თიშ აზროვნებას. თეშნერო იეჰოვა უმოსო ქიმეჸოროფებნა. დეფიფქრათ აბრაამიშ მაგალითშე. თის მთელ გურით უჸორდჷ იეჰოვა დო თიმწკუმა ხოლო ომორჩილუდ, მუჟამსით ბოლოშახ ვენანჭუდ თიშ გადაწყვეტილებეფს. აბრაამ ოცადუდ, უჯგუშო გეჩინებაფუკო ზეციერ მუმა. მაგალთო, მუჟამსით ქიგეგ, ნამდა თის სოდომ დო გომორაშ განადგურება აფუდ გინოჭყვიდილ, დუდშე აშქურინ დო უჭირდჷ თიშ დაჯერება, ნამდა „მთელ დედამიწაშ მოსამართლე“ უბადოეფწკუმა ართო მართალეფს ხოლო განადგურენდჷ. ათეშენ ართიანიშ მეჸუნელო, მარა თანდაბლურო დუსვჷ იეჰოვას მუსხირენ კითხვა, მუდგაშეთ იეჰოვა მოთვინებათ პასუხენდჷ. საბოლათ თიქ ქიმეხვად, ნამდა იეჰოვა ირკვიენს თითოულ ადამიანიშ გურს დო დღას ვა დასაჯენს მართალს უბადოწკუმა ართო (დაბ. 18:20—32).

11. მუჭო ოძირუ აბრაამქ, ნამდა უჸორდჷ იეჰოვა დო ონდუდ თის?

¹¹ აბრაამშა მანგარო იმოქმედ იეჰოვაწკუმა სოდომ დო გომორაშ გურშენ ჩიებაქ. თეშ უკულ თის უმოსო ქეჸოროფებუდ იეჰოვა დო უმოს პატიცემა გურჩქინდუდ თიშ მიმართ. წანეფიშ უკულ იეჰოვაშ მიმართ აბრაამიშ ნდობაქ სერიოზულ გამოცდაშ წოხოლე ქიგედირთჷ. იეჰოვაქ თის უწუ, მუშ ართკაკალ სქუა, ისაკ, მსხვერპლო შეწირკო. მარა აბრაამ უკვე უჯგუშო იჩინენდჷ ღორონთის, ათეშენ თე შემთხვევას მუთუნნერ კითხვა ვა გორჩქინუ. უბრალოთ თიშ კეთებას ქიმიაჸუნ, მუთ იეჰოვაქ უწუ. წერმიდგინით, მუშმანწარა იჸუაფუდ აბრაამშო თე დავალებაშო მომზადება. თინა ბრელს ფიქრენდკონ იჸიდ თი ირფელშენ, მუთ იეჰოვაშ გურშენ დიგურუ. თის უჩქუდ, ნამდა იეჰოვა დღას ვემიქციებუდ უსამართლოთ დო უგურეთ. მუჭოთ პავლე მოციქულ ენწყუნს, აბრაამს ჯერდჷ, ნამდა იეჰოვას შეულებუდ გათელკო თიშ ძვირფას სქუა, ისაკ (ებრ. 11:17—19). იეჰოვას აბრაამშა პირობა აფუდ მეჩამილ, ნამდა ისაკიშ გამნარყშე ერ გიშელენდჷ, მარა ისაკის დიო სქუალეფ ვა ჸუნდჷ. აბრაამს უჸორდჷ იეჰოვა, ათეშენ ჯერდჷ, თინა უსამართლოთ ვემიქციებუდ. თიშ უმკუჯინუო,  ნამდა თე დავალებაშ შესრულება მანგარ რთულ რდჷ, აბრაამს რწმენაქ მეხვარ, იშენ დემორჩილკო ღორონთის (დაბ. 22:1—12).

12. მუჭო შემლებნა მივაჸუნათ აბრაამიშ მაგალითის? (ფსალმ. 73:28)

¹² მუჭო შემლებნა მივაჸუნათ აბრაამიშ მაგალითის? ვემვოტუათ იეჰოვაშ გურშენ გურაფა. თეშნერო, უმოსო დევეახლოვებუთ თის დო უმოსო ქიმეჸოროფებნა (წეკითხით ფსალმუნიშ 73:28). ჩქინ სინდის თეშ იჸუაფ გოწაფილ, ნამდა მეურდას იჸი იეჰოვაშ ნორმეფს (ებრ. 5:14). შედეგო, მითინ ჩქინ მეჩილითაფას ქეცადებუნ-და, ვევაჸუნუთ თის. თეშით ხოლო ვეფიფქრენთ თიცალ მუდგარენიშ კეთებაშე, მუთ გურს უწყუნუანდჷ ჩქინ მუმას დო გილამლუანდეს თიწკუმა ურთიერთობას. ხოლო მუჭო შემლებნა ვოძირუათ, ნამდა მიჸორა სიმართლე?

13. მუჭო შემლებნა იმჭუათ სიმართლეშა? (იგავ. 15:9)

¹³ მაჟია ნაბიჯ: ქეცადით, ირდღას უმოსო ქიჸოროფუათ სიმართლე. მუჭოთ რეგულარულ ვარჯიშით იმამნგარენთ სხეულს, თეშ ირდღაშიან ხანდა რე საჭირო, ნამდა ქიპჸოროფუათ იეჰოვაშ ნორმეფ სწორ დო არასწორწკუმა დაკავშირებით. თენა შეიოლებერ რე, მუშენდა იეჰოვა დღას ვა მოფთხინა თიცალ მუდგარენიშ კეთებას, მუთ ვეშემლებნა (ფსალმ. 103:14). ღორონთ მარწმუნენა, ნამდა უჸორს თინეფ, მით „სიმართლეშა ინჭუაფ“ (წეკითხით იგავეფიშ 15:9). მუჟამსით იეჰოვაშ მსახურებას კონკრეტულ მიზანშა იმჭუაფუთ, მონდომას ვა ვარკენთ, ნამდა ქიმვოჭირინუათ თის. თაშ ოკო ვაკეთათ თიმ დროს ხოლო, მუჟამსით სიმართლეშა იმჭუაფუთ. იეჰოვა მოთვინებათ ქიმმეხვარებნა, გუვაგრძელათ წიმი ულა (ფსალმ. 84:5, 7).

14. მუ რე „სიმართლეშ ჯავშან“ დო მუშენ მოსაჭირნა თინა?

¹⁴ იეჰოვა ჸოროფათ გუმოშინანა, ნამდა სიმართლეშ მეჸუნა ოღალ ვა რე (1 იოან. 5:3). სინამდვილეს თენა ფთხილანა, მუთ ირიათო მოსაჭირნა. ქიგიშინით სულიერ საჭურველ, ნამუთ მოციქულ პავლექ გიმოკორცხჷ (ეფეს. 6:14—18). საჭურველიშ ნამ ნაწილ თხილანს ჯარიშკოჩიშ გურს?  თენა რე „სიმართლეშ ჯავშან“, მუთ იეჰოვაშ სამართლიან ნორმეფს ნიშნენს. მუჭოთ ჯავშან თხილანს ფიზიკურ გურს, თეშ იეჰოვაშ სამართლიან ნორმეფს შეულებ დოთხილუას ჩქინ სიმბოლურ გურ — შინაგან პიროვნება. თეშ გურშენ რე მნიშვნელოვან, ჩქინ საჭურველშა სიმართლეშ ჯავშან ხოლო მიშეშას! (იგავ. 4:23).

15. მუჭო შემლებნა მიკიბქუნათ სიმართლეშ ჯავშან?

¹⁵ მუჭო შეილებნა მიკიქუნათ სიმართლეშ ჯავშან? თაშ ქიმიქციებუთ, მუჟამსით ირდღაშიან გადაწყვეტილებეფიშ მეღებაშ დროს ღორონთიშ ნორმეფს ქიმიაჸუნუთ. ონდო გინოჭყვიდუნდათ, მუს თქუანთ, მუნერ მუსიკას ურჩქილეთ, მუს უჯინეთ ვარდა ნამ წიგნის იკითხენთ, ქოკითხით თქვან დუდის: მუნერ საზრდოს ვარზენქ ჩქიმ გურს? ქორენო თინა იეჰოვაშ მოსაწონ, დოვარ ხუჯის უკინენს უზნეობას, ძალადობას, ჰარამობას, ეგოისტობას — თიცალ მუდგარენეფს, მუთ იეჰოვაშ თოლს ვა რე სწორ? (ფილ. 4:8). გადაწყვეტილებეფიშ მეღებაშ დროს იეჰოვაშ ნებას გეთვალისწინენთ-და, თეშნერო თიშ სამართლიან ნორმეფს საშვალებას ქიმეჩანთ, დოთხილუას თქვან გურ.

16, 17. მუჭო მარწმუნენა ესაიაშ 48:18, ნამდა მარადიულო შემლებნა იფცხოვრათ იეჰოვაშ ნორმეფით?

¹⁶ ხომ ვეშუწუხებუთ თიშე ფიქრის, შეგალებედეს დო ვარ იეჰოვაშ ნორმეფით ცხოვრება დღალეფიშ ვარდა წანეფიშ უკულ ხოლო? გუვარჩუათ მაგალით, ნამუთ მოჩამილ რე ესაიაშ 48:18-ს (წეკითხით). იეჰოვა მოპირნა, ნამდა ჩქინ სიმართლე „ზღვაშ ტალღეფცალო“ იჸუაფ. წერმიდგინით, ნამდა ზღვაპიჯის გერეთ დო უჯინეთ, მუჭო ეკოჸუნა ტალღეფ ართიანს. თეცალ წყნარ გარემოს თიშე დიჭყანდითო წუხებას, ნამდა თე ტალღეფ აკა დღას გაჩენდუ? მუშო ოკო რაგად, ვარ! მუშენდა გიჩქნა, ნამდა უკვე ანთასობით წანა რე, მუთ თე ტალღეფ მოურს დო მოურს დო თენა დღას ვემეჭყორდუ.

¹⁷ თქვან სიმართლე ხოლო შილებე ზღვაშ ტალღეფცალო რდას. გადაწყვეტილებაშ მეღებაშახ დეფიქრით, მუს ელჷ იეჰოვა თქვანდე დო თეშ ქიმიქცით. მუდგა რთულ გადაწყვეტილებაშ წოხოლე ვეგერდათინ, თქვან მოჸოროფე მუმა ირიათო თქვანწკუმა იჸუაფ, ქიმერჩანა ძალას დო ქიმგეხვარებნა, ნამდა ზღვაშ ტალღეფცალო ვა გაჩერდათ დო გაგრძელათ თიშ კეთება, მუთ სწორ რე (ეს. 40:29—31).

18. მუშენ ოკო ვაგვასამართლათ შხვეფ ჩქინ ნორმეფით?

¹⁸ მასმა ნაბიჯ: გასამართლება იეჰოვას მიანდით. იეჰოვაშ ნორმეფით ცხოვრება ქუმოკონან-და, დუდ ოკო ეუჩილითუათ შხვეფიშ გასამართლებას დო სწორ დო არასწორწკუმა დაკავშირებით ჩქინ ნორმეფ ვადვადგინათ. თიშ მანგიორო, ნამდა შხვეფს ჟიშე გივოჯინათ, ითამ ჩქინ დოდგინელ ნორმეფით თინეფიშ გასამართლებაშ უფლება მიღდან, ირიათო ოკო ფშუდან, ნამდა იეჰოვა რე „მთელ დედამიწაშ მოსამართლე“ (დაბ. 18:25). თის ჩქინდა გასამართლებაშ უფლება ვა მუჩამ. თეს იესო ხოლო მირაგადნა: „მეტო ვა გასამართლათ, ნამდა თქვა ხოლო ვეგესამართლათ“ (მათ. 7:1). *

19. მუჭო ოძირუ იოსებიქ, ნამდა გასამართლებას იეჰოვას ონდუდ?

¹⁹ ხოლო ართშა დუვართათ მართალ კოჩ იოსებიშ მაგალითის. თის თინეფ ხოლო ვა გუსამართლებ, მიდგაქ გლახათ  მექცუ. მუშ ჯიმალეფქ ოჭოფეს თინა, მონათ გეგმოჩეს დო მუნეფიშ მუმა დარწმუნეს, ნამდა იოსებ ღურელ რდჷ. წანეფიშ უკულ, მუჟამსით კინ ქეშეხვად მუშ ოჯახის, თინა უკვე ძალიერ მართველ რდჷ, ათეშენ შეულებუდ მკაცრას გასამართლუკო მუშ ჯიმალეფ დო მანგიორ გეგნუგკო თინეფს. ჯიმალეფს ოშქურდეს, ნამდა ნარღენდესინ თიშ უმკუჯინუო, იოსებიქ იშენით პასუხ ვა მოთხუკო თინეფს, მარა თიქ უწუ: „ვა გაშქურნან! ღორონთ ხომ ვა ვორექ?!“ (დაბ. 37:18—20, 27, 28, 31—35; 50:15—21). იოსებიქ გასამართლება თანდაბლურო მიანდჷ იეჰოვას.

20, 21. მუ ოკო ვაკეთათ, ნამდა შხვეფშე მართალეფო ვეგშეპჸონათ ჩქინ დუდ?

²⁰ იოსებცალო ჩქი ხოლო გასამართლებას იეჰოვას ვონდუთ. მაგალთო, გლახა მოტივეფს ვემვოჭარანთ და დო ჯიმალეფიშ მოქმედებეფს. ჯგირო მარჩქილენა, ნამდა ვეშემლებნა ქობძირათ, მუ უღჷ ადამიანს გურს, თენა ხვალე იეჰოვას შეულებ (იგავ. 16:2). იეჰოვას არძანერ ადამიან უჸორს, არძანერ კულტურაშ დო წარმოშობაშ. თინა მირაგადნა, ნამდა ჩქი ხოლო არძას ფართას გუნჯათ გურიშ კარ (2 კორ. 6:13). ჩქი ოკო მიჸორდან და დო ჯიმალეფ დო ვაგვასამართლათ ართიან.

²¹ თეშა მიშურს, ნამდა ვაგვასამართლათ თინეფ ხოლო, მით კრებაშ გალე რენა (1 ტიმ. 2:3, 4). დღას ქოითქუალნანო თქვან ნათესეშე: „თენა დღას ვემიღენს ჭეშმარიტებას“. თეცალ დამოკიდებულებათ ვოძირანდით, ნამდა ჩქინ სიმართლე მიღნა. იეჰოვა ირკოჩის არზენს საშვალებას, მინანუას (საქ. 17:30). დღას ვაგგოჭყორდან, იეჰოვაშ თოლს თინეფ ხოლო უმართლოეფ რენა, მიდგას დუდ შხვეფშე უმოს მართალეფო მეუღნა.

22. მუშენ გაფნა გინოჭყვიდილ, გიჸორდან სიმართლე?

²² იეჰოვაშ ნორმეფიშ ჸოროფა მომღანა ხიოლს დო შხვეფს გინაჭყვიდირაფუანს უმოსო დემეახლოვან ჩქი დო მუთ მთავარ რე, დეახლოვან იეჰოვას. მორთ ირიათო ვორდათ „სიმართლეს მოშქირნაფილეფ დო მოჸუმენაფილეფ“ (მათ. 5:6). რჯერდან, იეჰოვა ორწყე თქვან მონდომას დო ოხიოლ თქვან წიმი ულა. თე ქვეყნიერება უმოსო დო უმოსო ინწყუ უმართლობას, მარა მშვიდას რდათ დო ირიათო რშუდან, ნამდა „იეჰოვას უჸორს მართალეფ“ (ფსალმ. 146:8).