ᲝᲒᲣᲠᲐᲤᲐᲚ ᲡᲢᲐᲢᲘᲐ 33
იეჰოვა ოკვირ მუშ ხალხის
„იეჰოვა ოკვირ თინეფს, მიდგას მუშ შიშ უღნა“ (ᲤᲡᲐᲚᲛ. 33:18).
ᲝᲑᲘᲠᲔᲨᲘ 4 „იეჰოვა რე ჩქიმ ჭყიში“
ᲨᲘᲜᲐᲐᲠᲡ *
1. მუშენ თხუ იესოქ იეჰოვას, დუთხილუდკო მუშ მიმაჸუნალეფ?
ᲦᲣᲠᲐᲨ წოხოლენ სერს იესოქ მუშ ზეციერ მუმას განსაკუთრებულ მუდგარენ თხუ — დოთხილუკო მუშ მიმაჸუნალეფ (იოან. 17:15, 20). მუშო ოკო რაგად, იეჰოვა მუშ ხალხის ირიათო ოკვირუდ — ზრუნენდჷ თინეფშე დო თხილანდჷ. მარა იესოს უჩქუდ, მუშ მიმაჸუნალეფ სატანაშე დღას ვა ჸოფენ თიცალ წინააღმდეგობეფს ქეშეხვადუდეს დო თინა ხოლო არჩქილედ, ნამდა იეჰოვაშ მოხვარა დესაჭირებდეს თეშ გარზებელო.
2. მუჭოთ ფსალმუნიშ 33:18—20-ის ჭარჷ, მუშენ ვა მიღნა შიშიშ მუთუნნერ მიზეზ?
2 სატანაშ ქვეყნიერება ჭეშმარიტ ქრისტიანეფს დიდ პრობლემეფს ურჩქინანს. ჩქი ფხვადუთ სირთულეეფს, ნამდგაქ შილებე გურ გომტახან დო იეჰოვაშ მიმართ ჩქინ ართგურობა ხოლო გეგმოცადას. მარა, მუჭოთ თე სტატიაშე ბძირუნთ, შიშიშ მუთუნნერ მიზეზ ვა მიღნა, მუშენდა იეჰოვა მოკვირნა. თინა ორწყე, მუ სირთულეეფს ფხვადუთ დო მზათ რე ჩქინ მახვარებელო. მორთ გუვარჩუათ ჟირ ბიბლიურ მაგალით, სოვრეშეთ იძირე, ნამდა იეჰოვა ოკვირ თინეფს, მიდგას მუშ შიშ უღნა (წეკითხით ფსალმუნიშ 33:18—20).
ᲛᲣᲟᲐᲛᲡᲘᲗ ᲓᲣᲓᲘᲡ ᲮᲕᲐᲚᲐᲮᲔᲗ ᲑᲒᲘᲜᲐᲤᲚᲔᲜᲗ
3. მუჟამ შილებე დუდის ხვალახეთ ბგინაფლენდათ?
3 მართალ რე, იეჰოვაშ მსახურეფიშ დიდ ოჯახის ვორეთ, მარა მინშა შილებე დუდ ხვალახეთ იბგინათ. მაგალთო, ახალგაზრდეფ შილებე დუდის ხვალახეთ გინაფლენდან, მუჟამსით სკოლაშ ამხანაგეფიშ წოხოლე მუნეფიშ რწმენაშ გურშენ აფნა ოჩიებელ ვარდა მუჟამსით ახალ კრებაშა გინულა. ჩქინდე ნამთინეს შილებე უარყოფით ემოციეფშა დო დეპრესიაშა მაფდან ობრძოლებერ დო ფიფქრენდათ, ნამდა თე პრობლემას ხვალე ოკო მიკვოჯინათ. შილებე მითინს ვა ურაგადუდათ ჩქინ გრძნობეფიშ გურშენ, მუშენდა ჩქინ აზრით, მითინ ვენანჭუ დო ვართ მითინს ოინტერეს, მუს ბგინაფლენთ. დუდის ხვალახეთ მუდგა მიზეზით ვა ბგინაფლენდათინ, თიქ შილებე ოწუხებელ ქიგემძინან დო მოფიქრებაფუან, ნამდა დაუცველეფ ვორეთ. იეჰოვას ვაკო, თაშ იფიფქრათ. მუშენ შემლებნა თეშ რაგად?
4. მუშენ თქუ წინასწარმეტყველ ელიაქ: „ხვალე მა დობსქიდ ცოცხალქ“?
4 გუვარჩუათ ართ ართგურ კოჩიშ, ელიაშ, მაგალით. თინა 40 დღაშე მეტ ხანს ტყობუდ, მუშენდა დედოფალ იზებელქ დარცქინ, ნამდა დოჸვილუნდჷ (1 მეფ. 19:1—9). მუჟამსით გამოქვაბულს ხვალე რდჷ, თიქ იეჰოვას უწუ: „[წინასწარმეტყველეფშე] ხვალე მა დობსქიდ ცოცხალქ“ (1 მეფ. 19:10). თექ შხვა წინასწარმეტყველეფ ხოლო რდეს; ობადიაქ 100 წინასწარმეტყველ ოტყობინუ, ნამდა იზებელს ვა უჸვილუდკო თინეფ (1 მეფ. 18:7, 13). იმწკუმა მუშენ გინაფლენდჷ ელია დუდის ხვალახეთ? ხომ ვა ფიქრენდჷ, ნამდა თე წინასწარმეტყველეფ არძა ღურელ რდჷ? ქარმელიშ გვალას ბაალიშ გამოცდაშ უკულ იეჰოვაშ თაყვანიშცემა მითინს ვა დუჭყაფუნ, თიშენ ხომ ვა გინაფლენდჷ დუდის ხვალახეთ? ხომ ვა ფიქრენდჷ, ნამდა მითინ ვენანჭუდ ვარდა მითინს ვაინტერესუდ, მუ ოშქურანჯ სიტუაციას რდჷ? ბიბლია კილ-კილშა ვენწყუნს ელიაშ გრძნობეფს, მარა ართ მუდგარენ ზუსტას მიჩქნა: იეჰოვას არჩქილედ, მუშენ გინაფლენდჷ თინა დუდის ხვალახეთ დო გვალო ჯგირო უჩქუდ, მუჭო მეხვარკო.
თიშ რჩქინა, მუჭო მეხვარ იეჰოვაქ ელიას, ჩქი მუჭო ემქექუანა გურშა, მუჟამსით დუდის ხვალახეთ ბგინაფლენთ? (ქოძირით აბზაცეფ 5, 6)
5. მუჭო დარწმუნ იეჰოვაქ ელია, ნამდა ხვალე ვა რდჷ?
5 იეჰოვაქ ბრელნერო მეხვარ ელიას. რაგადშა გეიჸუნუკონ თიშენ, თიქ ჟირშა კითხჷ: „თაქ მუს ორთუქ ელია?“ (1 მეფ. 19:9, 13). იეჰოვა მთელ გურით ურჩქილედ, მუჟამსით ელია მუშ გრძნობეფიშ გურშენ ეჩიებუდ. თეშ უკულ თიქ ქაძირუ მუშ წინასწარმეტყველს, ნამდა თიწკუმა რდჷ დო დიდ ძალა უღუდ. თეშნერო უპასუხ თის. თეს გეძინელ, დარწმუნ, ნამდა ბრელ თანამსახურ ჸუნდჷ (1 მეფ. 19:11, 12, 18). მუშო ოკო რაგად, ელიაქ დუდ უჯგუშო იგინ, მუჟამსით გურ გეგნუფაჩ იეჰოვას დო თიშ პასუხ ხოლო მირჩქილუ. იეჰოვაქ თის მუსხირენ მნიშვნელოვან დავალება მეჩჷ: ხაზაელ სირიაშ მეფეთ უცხებუდკო, იეჰუ — ისრაელიშ მეფეთ დო ელისე — წინასწარმეტყველო (1 მეფ. 19:15, 16). თე დავალებეფიშ მეჩამათ იეჰოვაქ ელიას მეხვარ, ყურადღება დადებითშა გეგნუღალუდკო. თეწკუმა ართო, თიშე ხოლო იზრუნ, ნამდა ჸუნდკო თანამსახურ — ელისე, ნამდგაწკუმა ხოლოშიან ურთიერთობა აღვენუდ. თქვა მუჭო შეილებნა მიღათ იეჰოვაშე მოხვარა, მუჟამსით დუდის ხვალახეთ გინაფლენთ?
6. მუშ გურშენ შეილებ ილოცე, მუჟამსით დუდის ხვალახეთ გინაფლენქ? (ფსალმ. 62:8)
6 იეჰოვას ოკო, ლოცვათ ქუდურაგადუე თის. თინა ორწყე სქან გაჭირებას დო გარწმუნენს, ნამდა ნებისმიერ დროს ქუმოირჩქილუანს (1 თეს. 5:17). თის ოჰამ მუშ მსახურეფშე ლოცვაშ მორჩქილაფა (იგავ. 15:8). მუშ გურშენ შეილებ ილოცე, მუჟამსით დუდის ხვალახეთ გინაფლენქ? გურ გეგნუფაჩ იეჰოვას, მუჭოთ თენა ელიაქ აკეთ (წეკითხით ფსალმუნიშ 62:8). სკოლას სქან რწმენაშ გურშენ ჩიებაშ დროს დუდის ხვალახეთ ქოგინაფლენქ დო ქუგოშქურუნ-და, ქოთხი იეჰოვას, ქიმერჩას გაბედულება დო სიბრძნე, ნამდა ტაქტიანო დამოწმე (ლუკ. 21:14, 15). უარყოფით ემოციეფს ქაბრძოლუქ-და, ქოთხი იეჰოვას, ქიმგეხვარას, თეშ გურშენ გამოცდილ ქრისტიანს ქეჩუე დო თის ქიმეხვარას, ქინანჭას სქან გრძნობეფს. გურ გეგნუფაჩ იეჰოვას, ქიდეკვირ, მუჭო უპასუხენს თინა სქან ლოცვეფს დო მიღჷ შხვეფშე მოხვარა; შედეგო დუდის ნაკლებო იგინანქ ხვალახეთ.
გოინტერესნო, მუჭო აკეთე მსახურებას უმოს შხვეფწკუმა ართო? (ქოძირით აბზაც 7)
7. მუ დიგურეთ მაურისიოშ მაგალითშე?
7 იეჰოვაქ არძას მნიშვნელოვან საქმე მუჩეს. შეილებ დარწმუნებულ რდე, ნამდა თინა ორწყე დო აფასენს თი ირფელს, მუდგას კრებას დო მსახურებას ორთუქ (ფსალმ. 110:3). მუჭო შეულებ სულიერ საქმეეფს ჩქინ მოხვარა, მუჟამსით დუდის ხვალახეთ ბგინაფლენთ? გუვარჩუათ ახალგაზრდა ჯიმაშ, მაურისიოშ, * მაგალით. მაურისიოშ ნათუაშ უკულ ხეთეშე თიშ ხოლოშიან მეგობარქ ჭიე-ჭიეთ ჭეშმარიტებაშ შარაშე გინულა ქიდიჭყჷ. თინა იჩიებ: „თე შემთხვევაქ ჩქიმ დუდიშ რწმენა მემდინუ. ფიფქრენდჷ, ქეშმალებედუო, შევასრულკო მეძღვინუაშ აღთქმა დო ქუდოფსქიდკო იეჰოვას ოჯახის? დუდის ხვალახეთ ბგინაფლენდჷ დო მიმორჩქუდ, ნამდა მითინ ვენანჭუდ ჩქიმ გრძნობეფს“. მუქ მეხვარ მაურისიოს? „მსახურებას უმოსიშ კეთება ქიდიბჭყჷ, მუდგაქ მიმეხვარ, მთელ ყურადღება ჩქიმ დუდშა დო უარყოფით გრძნობეფშა ვა მაფუდკო გინოღალირ. მუჟამსით შხვეფწკუმა ართო ვმსახურენდჷ, ხიოლ მიღუდ დო ხვალახეთ ხოლო ნაკლებო ბგინაფლენდჷ დუდის“. თიმწკუმა ხოლო, მუჟამსით ფიზიკურო ვეშემლებნა თანამორწმუნეეფწკუმა ართო ოქადაგებშა ულა, წერილეფით დო ტელეფონით მსახურება მანგარო ელამკინანა გურშა. მაურისიო იჩიებ, ხოლო მუქ მეხვარ თის: „დაკავებულ ვორდჷ კრებაშ საქმეეფით; შურ დო გურით ვამზადენდჷ დო ვასრულენდჷ კრებას მოსწავლეშ დავალებეფს. თე დავალებეფიშ საშვალებათ იეჰოვაშ დო შხვეფიშ თოლს დაფასებულო ბგინაფლენდჷ დუდის“.
ᲛᲣᲟᲐᲛᲡᲘᲗ ᲓᲣᲓᲘᲡ ᲓᲘᲓ ᲝᲬᲣᲮᲔᲑᲔᲚ ᲒᲘᲛᲝᲢᲘᲠᲮᲜᲐ
8. მუჭო მოქმედენს ჩქინდა დიდ განსაცდელ?
8 თე ბოლო დღალეფს განსაცდელეფ ვამკვენა (2 ტიმ. 3:1). მარა შილებე თიქ ვეველუთინ თეშ ქიგმოტირხან ვარდა თიცალ ოწუხებელქ ქუმაშუან, ნამდგაშე დღას ვეფიფქრენდით, ნამდა ქუმაღოლედეს. მაგალთო, ეკონომიკურო გამჭირდან, გლახა დიაგნოზ ქიგემშქვან ვარდა საჸოროფო ადამიანქ დომღურან. თეცალ დროს შილებე გურგოტახილო დო ძალაგიშალიებურო ბგინაფლენდათ დუდის. განსაკუთრებულო თიმწკუმა, მუჟამსით ართ ოწუხებელს მაჟია გიაჸუნუ ვარდა ირფელ ართათ გიმოტირხუნა. ფშუდან, ნამდა იეჰოვა მოკვირნა დო თიშ მოხვარათ, მოთვინებათ გეგნიბღანთ ნებისმიერ განსაცდელს.
9. გეჭარით ნამთინე განსაცდელ, ნამდგას იობიქ შეხვად.
9 გუვარჩუათ, მუჭო მეხვარ იეჰოვაქ მუშ ართგურ მსახურ იობის. თის ჭიჭე დროშ დინახალე მუსხირენ სერიოზულ განსაცდელქ ქიგიოტირხჷ დუდის. ართ დღას ქუმუღეს ამბე, ნამდა საქონელ მიდუღეს დო მსახურეფ გუჭყვიდეს. ხოლო უფრაშ, თიმ დღას თის სქუალეფქ ხოლო დუღურ (იობ. 1:13—19). თეშ უკულ ხეთეშე მუშ გაჭირებათ გურხაშილ იობის ლახალაქ ქაღოლ, მუდგაშ გურშენ მანგარ ჭუათ იტანჯებუდ დო საშინელ მიოჯინალ რდჷ (იობ. 2:7). თეცალ გლახა სიტუაციაშ გურშენ იობის გურშა ქათაკათ დო თქუ: „რინაქ გემეჯოგ. ვა მოკო ცხოვრება“ (იობ. 7:16).
მუშ ჸოროფათ მზრუნველობაშა დარწმუნასინ თიშენ იეჰოვა იობის ურაგად, მუჭო ზრუნენს მუშ გუნაჭყეფუეფშე (ქოძირით აბზაც 10)
10. მუჭო მეხვარ იეჰოვაქ იობის, ნამდა ქუგურზკო განსაცდელეფს? (ქოძირით სურათ გალენ გვერდის).
10 იეჰოვა ოკვირუდ იობის. თის უჸორდჷ იობ, ათეშენ ირფელნერო ქიმეხვარ, ნამდა ქუგურზკო განსაცდელეფს. იეჰოვაქ ქუდურაგადუ იობის დო ქუგაშინ, მუშმადიდა სიბრძნეს გიმირჩქინანს დო მუჭო ზრუნენს ჸოროფათ მუშ გუნაჭყეფუეფშე. თიქ ბრელ ოშქურანჯ ცხოველ მიშინუ (იობ. 38:1, 2; 39:9, 13, 19, 27; 40:15; 41:1, 2). თეწკუმა ართო, გეგმირინუ ართგურ ახალგაზრდა ელიჰუ, ნამდა გამანგარკო დო გურშა ეუქექუკო იობის. ელიჰუქ დარწმუნ იობ, ნამდა იეჰოვა ირო აკურთხენს მუშ მსახურეფს მოთვინებაშენ. მარა იეჰოვაშ შთაგონებათ თიქ იობის ჸოროფათ მუსხირენ რჩევა ხოლო მეჩჷ. ელიჰუქ იობის ქიმეხვარ, ხვალე მუშ დუდშე ვეფიქრკო დო ქუგაშინ, სამყაროშ გუმაჭყაფალიშ, იეჰოვაშ, გინაწონს მუშმაჭიჭა ვორეთ (იობ. 37:14). იეჰოვაქ იობის დავალება ქიმეჩ, ნამდა ილოცკო მუშ სუმ მეგობარშო, მიდგაქ შეცოდ (იობ. 42:8—10). მუჭო მოხვარნა იეჰოვა ამდღა, მუჟამსით განსაცდელეფს ფხვადუთ?
11. მუჭო ემქექუანა ბიბლია განსაცდელეფიშ დროს?
11 მართალ რე, იეჰოვა ამდღა თეშ ვამრაგადნა, მუჭოთ იობის დურაგადუ, მარა თეშო მუშ სიტყვას, ბიბლიას, ირინუანს (რომ. 15:4). თინა მომავალიშ იმენდით გურშა ემქექუანა. გუვარჩუათ ბიბლიაშე მუსხირენ აზრ, ნამდგას შეულებ რთულ სიტუაციეფიშ დროს გურშა ელამკინან. წმინდა წერილეფით იეჰოვა მარწმუნენა, ნამდა მუთუნს, თინეფ შქას დიდ განსაცდელს, „ვეშიალებე გემკმოჸოთან [თიშ] ჸოროფას“ (რომ. 8:38, 39). ღორონთ თის ხოლო მირაგადნა, ნამდა თინა ხოლოს რე არძაწკუმა, მით ლოცვათ დურაგადუანს (ფსალმ. 145:18). მუჭოთ იეჰოვა მეჩიებნა, თის ქიმვენდებუთ-და, შემლებნა ქუგურზათ ნებისმიერ განსაცდელს დო ხვალე თენა ვარინ, თიმწკუმა ხოლო მიღდან ხიოლ, მუჟამსით იბტანჯებუთ (1 კორ. 10:13; იაკ. 1:2, 12). ღორონთიშ სიტყვა გუმოშინანა, ნამდა ჩქინ განსაცდელეფ ჭიჭე ხანს იჸუაფ დო თინეფ მუთუნ ვა რე თი მარადიულ კურთხევეფიშ გინაწონს, ნამდგას ღორონთ მოპირნა (2 კორ. 4:16—18). იეჰოვა მოპირნა, ნამდა მოსპუნს ჩქინ პრობლემეფიშ დუდის, სატანა ეშმაკის, დო თინეფს, მით მეჸუნა თიშ უბადობაშ მაგალითის; თენა აუცილებერო შისრულებ (ფსალმ. 37:10). შეილებნო, ქიდემახსოვრე ნამთინე გურიშემაკინალ ბიბლიურ მონაკვეთ, ნამუთ მიგეხვარებ, ქუგურზე მომავალ განსაცდელეფს?
12. მუშ კეთებას ელჷ იეჰოვა ჩქინდე, თიშ სიტყვაშე სრულ სარგებელ ქიმიბღათინ?
12 იეჰოვა ჩქინდე ელჷ, ნამდა დროს გეგმურთუნთ ბიბლიაშ რეგულარულო გურაფას დო ნაკითხირშე ჯგირო დაფიქრებას. მუჟამსით მეპჸუნთ თის, მუდგას ბგურაფლენთ, ჩქინ რწმენა იმანგარებ დო უმოს ხოლოშიან ურთიერთობას ვავითარენთ ზეციერ მუმაწკუმა, მუდგაშ შედეგო შემლებნა ქუგურზათ განსაცდელეფს. თეს გეძინელ, ბიბლიას ონდუნან თინეფს იეჰოვა არზენს წმინდა შურს, მუდგას შეულებ მუჩან „ძალა, ნამუთ ჩვეულებრივშე უმოს რე“, ნამდა გივორჯგინათ ნებისმიერ განსაცდელს (2 კორ. 4:7—10).
13. მუჭო მოხვარნა „ართგურ დო გონიერ მონაშე“ მეღებულ სულიერ საზრდო განსაცდელეფიშ გარზებას?
13 იეჰოვა ირინუანს „ართგურ დო გონიერ მონას“, ნამდა ხვეიანო მიღდან სტატიეფ, ვიდეოეფ დო მუსიკა, მუთ მოხვარნა, გემამნგარათ რწმენა დო ქუდოფსქიდათ სულიერო კურცხას (მათ. 24:45). ჩქი სრულას ოკო გეგმიბრინუათ თე დროულო მეღებულ საშვალებეფ. შეერთებულ შტატეფს მახორუ და მთელ გურით გიმოხანტუნს მარდულობას თე არძა სულიერ საზრდოშე. თიქ თქუ: „40 წანიან მსახურებაშ დინახალე ჩქიმ ართგურობა ირიათო გიმიცადებუდ“. თიქ მანგარ დიდ განსაცდელეფს შეხვად. თიშ ბაბუ შუმილ შოფერქ ქიგლაჸვილ, მშობლეფქ სერიოზულ ლახალაშ შედეგო დოუღურ დო მუს ჟირშა გეუშქვეს კიბოშ დიაგნოზ. მუქ მეხვარ თის გარზებას? თინა ენწყუნს: «იეჰოვა ირიათო ზრუნენდჷ ჩქიმდე. სულიერ საზრდო, ნამდგას თინა ართგურ დო გონიერ მონაშ საშვალებათ მარზენდჷ, მოხვარუდ გარზებას. შედეგო დუდის თეშ ბგინაფლენდჷ, მუჭოთ იობ, ნამდგაქ თქუ: „ონდო ცოცხალ ვორექ, ვა უღალატენქ ღორონთის!“» (იობ. 27:5).
მუჭო შემლებნა მივეხვარათ შხვეფს კრებას? (ქოძირით აბზაც 14)
14. მუჭო ირინუანს იეჰოვა ჩქინ თანამორწმუნეეფს, ნამდა ქელამდირთან სირთულეეფიშ დროს? (1 თეს. 4:9)
14 იეჰოვაქ მამზად მუშ ხალხ, ნამდა რთულ სიტუაციეფიშ დროს ჸოროფა ქაძირესკო დო გურშა ეუქექუესკო ართიანს (2 კორ. 1:3, 4; წეკითხით 1 თესალონიკელეფიშ 4:9). ჩქინ და დო ჯიმალეფ მეჸუნა ელიჰუშ მაგალითის დო მზათ რენა, რთულ სიტუაციეფიშ დროს ქიმმეხვარან, ვა ვოდინუათ ართგურობა (საქ. 14:22). მაგალთო, გუვარჩუათ, მუჭო ელუკინ გურშა კრებაქ დიანას დო მუჭო მეხვარ, ვადინუკო სულიერ სიმტკიცე, მუჟამსით თიშ ქომონჯის ჯამრთელობაშ სერიოზულ პრობლემაქ ქაშუ. თინა იჩიებუდ: „მანგარ ძნელ დროქ დომდირთეს, მარა თე თუთეფიშ დინახალე იეჰოვაშ მოჸოროფე დო ძალიერ ხეს ბგინაფლენდით. ჩქინ კრება ბრელნერო ელამრდეს, მუმაკითხანდეს, მირეკუნდეს, მახუტოლუდეს, მუთ მანგარო მოსაჭირდეს გარზებელო. მანქანაშ ჸონაფა ვამჩქუდუნ თიშენ და დო ჯიმალეფ ირნერო მოხვარდეს, მუჭოთ შემალებუდუნ, ქიდვესწრიკო კრებაშ შეხვალამეფს დო მონაწილება მიბღიკო მსახურებას“. მუ ბედნერეფ ვორეთ, ნამდა პჸუნა თეცალ მოჸოროფე და დო ჯიმალეფ კრებას.
ᲛᲐᲠᲓᲣᲚᲔᲤ ᲘᲔᲰᲝᲕᲐᲨ ᲸᲝᲠᲝᲤᲐᲗ ᲛᲖᲠᲣᲜᲕᲔᲚᲝᲑᲐᲨᲔᲜ
15. მუშენ ვორეთ დარწმუნებულ, ნამდა გივორჯგინანთ სირთულეეფს?
15 მუდგარენ სირთულეს არძა შეფხვადუთ, მარა, მუჭოთ უკვე ბძირით, თე სირთულეეფწკუმა ხვალე დღას ვა დოფსქიდუთ. მუჭოთ მოჸოროფე მუმა, იეჰოვა ირო მოკვირნა. თინა ჩქინწკუმა რე, მზათ რე, ქუმომრჩქილუან, მუჟამსით მოხვარას ფთხინთ, დო ქელამდირთან (ეს. 43:2). დარწმუნებულ ვორეთ, ნამდა შემლებნა გივორჯგინათ სირთულეეფს, მუშენდა თინა ხვეიანო მარზენა ირფელს, მუთ მოსაჭირნა გარზებელო. თეშო თიქ მუჩეს ლოცვაშ ძღვინ, ბიბლია, ქიანაშ სულიერ საზრდო დო მოჸოროფე საჯიმალო.
16. მუჭო დოფსქიდათ იეჰოვაშ მზრუნველობაშ თუდო?
16 მუ მარდულეფ ვორეთ, ნამდა პჸუნა ზეციერ მუმა, ნამუთ მოკვირნა. „თიშით რე ჩქინ გურ ხიოლით ეფშა“ (ფსალმ. 33:21). იეჰოვაშ ჸოროფათ მზრუნველობაშენ მარდულობას გეგმოფხანტუნთ, მუჟამსით გეგმიბრინუანთ თი ირფელს, მუდგას მარზენა. თეწკუმა ართო, საჭირო რე, ღორონთიშ მზრუნველობაშ თუდო ქუდოფსქიდათ. შხვა სიტყვეფით ქოფთქუათინ, ირნერო ვეცადათ, დევემორჩილათ იეჰოვას დო სწორას მიფქცუათ თიშ თოლს; თინა მარადიულო დემეკვირებნა (1 პეტ. 3:12).
ᲝᲑᲘᲠᲔᲨᲘ 30 ჩქიმ მუმა, ჩქიმ ღორონთ დო მეგობარი