1, 2. ა) მუ რე ცოდა დო მუჭო შემლებუნა მიბგათ თიშ წინააღმდეგ ბრძოლას? (ქოძირით „განმარტება“). ბ) მუს გუვარჩიენთ თე სტატიას დო თე ნომერს მოჩამილ შხვა სტატიეფს? (ქოძირით თე ჟურნალს მოჩამილ ჩარჩო „ინფორმაცია მაკითხეშო“).

 ᲡᲝᲕᲠᲔᲨᲔ იძირე, მუსხით მანგარო უჸორქ იეჰოვას? თეშ გაგება ქუგოკონ-და, ირფელიშ უჯგუშ იჸი, გეგმირკვიე, მუ აკეთ თიქ ცოდა დო ღურაშე დაირსხუკონ. ცოდა a კოჩიშ არძაშ უდიდაშ ნტერ რე, ნამდგაშა ჩქინით ნამთინს ვამმარიებენა. ცოდამეფ ვორეთინ თიშენ, თითოულ ირდღას ვაშენთ დო საბოლათ ბღურუთ (რომ. 5:12). მარა ჯგირ თინა რე, ნამდა იეჰოვაშ მოხვარათ, ჩქი შემალებენა საბოლათ გეფთავისფალათ ცოდა დო ღურაშე!

² იეჰოვა სოდგარენ, 6 000 წანა რე, მოხვარუნა ადამიანეფს, ქივებრძოლათ ცოდას დო არასრულყოფილეფ ვორეთინ თიშ უმკუჯინუო, თიშ მეგობრეფ ვორდათ. მუჭო ფიქრენთ, მუშენ ორთჷ თეს? მუშენდა თის მანგარო უჸორს ადამიანეფ გოჭყაფაშ დღაშე მოჸუნაფილ. ათეშენ ირფელ გაკეთ, ნამდა ქიმმეხვარესკო ცოდაშ წინააღმდეგ ბრძოლას. თის ჯგირო უჩქჷ, ნამდა ცოდა ღურაშა მემჸუნანა, დო მუთუნით ვაკო, თექ ქუმოხვადას; იეჰოვას ოკო, თითოულქ მარადიულო იფცოცხლათ (რომ. 6:23). თე სტატიას გუვარჩიენთ სუმ კითხვას: 1) მუ იმენდ მეჩჷ იეჰოვაქ ცოდამ ადამიანეფს? 2) მუჭო ღებულენდეს ადამიანეფ იეჰოვაშ მოწონას ჯვეშ დროს, თიშ უმკუჯინუო, ნამდა ცოდამეფ რდესჷ? დო 3) მუ აკეთ იესოქ ადამიანეფიშ ცოდა დო ღურაშე დარსხებელო?

 ᲛᲣ ᲘᲛᲔᲜᲓ ᲛᲔᲩᲷ ᲘᲔᲰᲝᲕᲐᲥ ᲪᲝᲓᲐᲛ ᲐᲓᲐᲛᲘᲐᲜᲔᲤᲡ?

3. მუჭო გინირთეს ადამ დო ევაქ ცოდამეფო?

³ მუჟამსით იეჰოვაქ პირველ ოსურკოჩ დო ქომოლკოჩ გაჭყჷ, ირფელ გაკეთ, ნამდა ბედნერეფ ქოჸოფედესკო. თინეფს უღუდეს სქვამ ოცხოვრებელ, ჸუნდეს ართიან დო მიღეს დავალება, ნამდგაშ შესრულება სასიამოვნო იჸუაფუდ თინეფშო: მთელ პლანეტა ედემიშ ბაღცალ სამოთხეთ ოკო გინაშქვესკო დო მუნეფიშ გამნარყით გეიოფშესკო დედამიწა. იეჰოვაქ თინეფს ხვალე ართ მუდგარენ უვარუ დო გაფრთხილ, ნამდა თიშ ნარაგადის გინურთანდეს-და, თენა შეგნებულო თიშ წინააღმდეგ ულა იჸუაფუდ, მუთ ცოდამეფო გინაშქვანდჷ თინეფს დო შედეგო, დოღურუდეს. ჯგირო მიჩქუნა, მუქ მოხვად უკულ. გამკორჩქინდჷ ართ უბადო ანგელოზიქ, ნამდგას ვართ იეჰოვა უჸორდჷ დო ვართ ადამ დო ევა. თიქ ეცად თე ჩილ დო ქომონჯიშ ჩილითაფას დო თინეფქ ხოლო გეიაჸუნეს თის. ადამ დო ევაქ მოჸოროფე ზეციერ მუმაშ მანგიორო სატანას ქურჩქილეს, ქუდაშუეს დო ცოდამეფო გინირთეს. მუშო ოკო რაგად, იეჰოვაშ ნარაგადიქ შისრულ დო თე დღაშე მოჸუნაფილ თინეფ ცოდაშ გლახა შედეგეფს ღებულენდეს — ირჩინუდეს დო ბოლოს დოღურეს (დაბ. 1:28, 29; 2:8, 9, 16—18; 3:1—6, 17—19, 24; 5:5).

4. მუშენ ჯოგჷ იეჰოვას ცოდა დო მუშენ მოხვარუნა, თის ქივებრძოლათ? (რომ. 8:20, 21).

⁴ იეჰოვაქ თე შემთხვევა ბიბლიაშა თიშენ ინომჭარეს, ნამდა ქინვანჭითკო, მუშენ ჯოგჷ თეშმანწარას ცოდა — თინა ჩქინ ზეციერ მუმაწკუმა ურთიერთობას გილმამლუანა დო საბოლათ, ღურაშა მეპჸუნთ (ეს. 59:2). ზუსტას ათეშენ ოჩილითუ სატანაქ ადამ დო ევა. თის ვაძირუაფ ვართ იეჰოვა დო ვართ ადამიანეფ, ათეშენ ამდღარშახ აგრძელენს ხალხიშ ჩილითაფას. მუჟამსით ადამ დო ევაქ შეცოდეს, სატანა ფიქრენდუკონ იჸიდ, ნამდა ორჯგინ იეჰოვას დო გეგმეფ აკურღვჷ. მარა შუროთ ვა ნოჩქვე, მუნერ მოჸოროფე ღორონთ რე იეჰოვა. თის ქიანაშა უსხუნ ადამიანეფ დო ხეთეშე ქიმიფიქრჷ, მუჭო დერსხუკო თინეფ (წეკითხით რომაელეფიშ 8:20, 21). იეჰოვას უჩქუდ, ნამდა ადამ დო ევაშ გამნარყშე ნამთინეს უჸორდუკონ იჸიდ თინა დო დემორჩილებუდ თის. თინეფს მოჸოროფე მუმა დო გუმაჭყაფალ ქიმეხვარებუდ, დეახლოვესკო თის დო, საბოლათ, გეთავისფალესკო ცოდა დო ღურაშე. მუ აკეთ იეჰოვაქ თეშო?

5. გვალო პირველო მუჟამ მუკოსინთუ იმენდიქ ცოდამ ადამიანეფშო დო მუ წინასწარმეტყველება ენოჭარ დაბადებაშ 3:15-ის?

⁵ წეკითხით დაბადებაშ 3:15. ადამიანეფშო გვალო პირველო იმენდიქ თიმწკუმა მუკოსინთუ, მუჟამსით იეჰოვაქ გაცხად, მუ აღოლედ სატანას. ღორონთიქ იწინასწარმეტყველ, ნამდა ქიმიშ „გამნარყ“, ნამუთ ირსხენდ ადამიანეფს, განადგურენდ სატანას დო ჩამთხინუანდეს თიშ მოღალირ ირნერ უბადობას (1 იოან. 3:8). მარა, ონდო თეს გაკეთენდ, „გამნარყის“ დიო ოტანჯებელ აჸიდ. სატანა თის „ქურს ქაჩამუდ“ — დოჸვილუნდ. მუშო ოკო რაგად, იეჰოვას თენა მანგარო უწყუნუანდ გურს, მარა თის ანაყუ ადამიანიშ რსხება დო ცოდა დო ღურაშ მოსპუალა უღირუდ თე ჭუაშ გარზებაშა.

ᲛᲣᲭᲝ ᲦᲔᲑᲣᲚᲔᲜᲓᲔᲡ ᲑᲘᲑᲚᲘᲣᲠ ᲓᲠᲝᲡ ᲪᲝᲓᲐᲛ ᲐᲓᲐᲛᲘᲐᲜᲔᲤ ᲘᲔᲰᲝᲕᲐᲨ ᲛᲝᲬᲝᲜᲐᲡ?

6. მუს ორთუდეს აბელ, ნოე დო ღორონთიშ შხვა ართგურ მსახურეფ, ნამდა იეჰოვას დეახლოვესკო?

⁶ საუკუნეეფიშ დინახალე იეჰოვა ირიათო უმოსის ოგებაფუანდჷ ცოდამ ადამიანეფს თიშ გურშენ, მუჭო შეულებუდეს თიწკუმა დაახლოება. მაგალთო, აბელ, მით ადამ დო ევაშ მაჟია სქუა რდჷ, პირველ ადამიან რდჷ ედემიშ ბაღის მოხვალამირ ამბეშ უკულ, მიდგაქ იეჰოვა ირწმუნ. თის უჸორდჷ იეჰოვა დო თიწკუმა დაახლოება ოკოდუნ თიშენ, მსხვერპლ შეწირ. აბელ მეშხურე რდჷ, ათეშენ პირველმოგებულ კირიბეფ შეწირ  იეჰოვას. მუჭოთ ბიბლიას პკითხულენთ, „იეჰოვაქ მიწონუ აბელ დო თიშ შესაწირ“ (დაბ. 4:4). იეჰოვა თეშ უკულ ხოლო იწონუანდჷ თიცალ ადამიანეფიშ მსხვერპლის, მიდგას უჸორდჷ თინა დო წანდჷ თიშ, მაგალთო, მუნერით რდჷ ნოე (დაბ. 8:20, 21). თეცალ მსხვერპლის იწონუანდუნ თეთ იეჰოვა ოძირანდჷ, ნამდა ცოდამ ადამიანეფს ხოლო შეულებუნა თიშ მოწონაშ მეღება დო თიწკუმა დაახლოება. b

7. მუს ოძირანდჷ თინა, ნამდა აბრაამ მზათ რდჷ იეჰოვაშ დავალებაშ შეიოსრულებერო?

⁷ ართშა იეჰოვაქ ძალიერ რწმენა უღუდუნ ფერ კოჩის, აბრაამს, მანგარ ძნელ მუდგარენიშ კეთება მოთხუ — თიქ მუშ ართკაკალია სქუა ოკო შეწირუკო ღორონთის. აბრაამშო თეშ უფრაშ მარჩქილაფარ მუთუნ ვეჸიდ. თიშ უმკუჯინუო, ნამდა თის მანგარ ნწარე აჸიდ თეშ კეთება, იშენით მზათ რდჷ, დემორჩილუკო იეჰოვაშ მითითებას. აბრაამქ ისაკ ოკო ჸვილუკონ თიმ მომენტის, ღორონთიქ გაჩერ თინა. მართალ რე, იეჰოვაქ თის ვაჸვილაფუ მუშ სქუა, მარა თინა თეშ ოკეთებელო მზათ რდუნ თენა ოძირანდჷ, მუს გაკეთენდჷ იეჰოვა მომავალს — აბრაამცალო თინა ხოლო მზათ იჸიდ, მუშ სქუას გამასქიდუკო ჩქინო. თეშმანწარას უჸორს თის ადამიანეფ! (დაბ. 22:1—18).

8. მუს ოძირანდჷ თი შესაწირავეფ, ნამდგას კანონ ითხინდჷ? (ლევ. 4:27—29; 17:11).

⁸ საუკუნეეფიშ უკულ ისრაელეფშა მეჩამილ კანონს იეჰოვა ითხინდჷ, ნამდა ცოდეფქ ქეპატუესკონ თიშენ თინეფქ ცხოველეფ შეწირესკო (წეკითხით ლევიანეფიშ 4:27—29; 17:11). თე შესაწირავეფ ოძირანდჷ, მუს გაკეთენდ იეჰოვა მომავალს — თინა არძაშ უმოს დიდ მსხვერპლის შეწირენდ, ნამუთ საბოლათ დერსხენდ ადამიანეფს ცოდაშე. ღორონთიშ შთაგონებათ წინასწარმეტყველეფქ ჭარეს, ნამდა ქიმიშ დუნაპირებ გამნარყ, ნამუთ დეტანჯებუდ დო თის შესაწირავ შხურცალო დოჸვილუნდეს. მუჭოთ უკულ ქიძირ, თინა ღორონთიშ საჸოროფო სქუა ჸოფე (ეს. 53:1—12). წერმიდგინ, მუშმაშხვა მუდგარენ აკეთ იეჰოვაქ: თიქ მუშ საჸოროფო სქუა გაწირ, ნამდა მთელ კაცობრიობა დერსხუკო ცოდა დო ღურაშე. თიქ თენა სქანო ხოლო აკეთ!

ᲛᲣ ᲐᲙᲔᲗ ᲘᲔᲡᲝᲥ ᲪᲝᲓᲐᲛ ᲐᲓᲐᲛᲘᲐᲜᲔᲤᲘᲨ ᲓᲐᲠᲡᲮᲔᲑᲔᲚᲝ?

9. მუ თქუ მანათალ იოანექ იესოშ გურშენ? (ებრ. 9:22; 10:1—4, 12).

⁹ ახ. წ. 29 წანას მანათალ იოანექ იესო ნაზარეთელ ქოძირუნ, თეცალ მუდგარენ თქუ: „თენა ღორონთიშ კირიბ რე, ნამუთ თე ქიანაშ ცოდას მოსპუნს!“ (იოან. 1:29). თე სიტყვეფ, ნამუთ თის ღორონთიქ ორაგადაფუ, ოძირანდჷ, ნამდა დუნაპირებ გამნარყ იესო რდჷ, მით მუშ სიცოცხლეს გაწირენდ ადამიანეფშო. თე მომენტის გვალო არგამათ ქიძირ, ნამდა ცოდამ ადამიანეფშო მართალო არსებენდჷ რსხებაშ იმენდ — დუნაპირებ გამნარყიქ ქუმორთ დო საბოლათ გიორჯგინანდ ცოდას (წეკითხით ებრაელეფიშ 9:22; 10:1—4, 12).

10. მუჭო ოძირუ იესოქ, ნამდა ცოდამეფშო რდჷ მოულირ?

¹⁰ იესოს ჯგირო არჩქილედ, ნამდა ირნერ უბედრობაშ დუდ ცოდა რდჷ, ათეშენ განსაკუთრებულო თიცალ ადამიანეფიშ მოხვარას ოცადუდ, მიდგას ცოდამეფ რდესინ თიშ გურშენ გურ აფუდეს დამონკებულ დო ურაგადუდ, მუშ მიმაჸუნალეფო გინირთესკო. თიქ თქუ: „ექიმ ჯანმრთელეფს ვარინ, ლეხეფს ოსაჭირუნა . . . მა მართალეფშო ვარინ, ცოდამეფშო მოფრთჷ“ (მათ. 9:12, 13). იესო სიტყვათ დო საქმეთ ოძირანდჷ, ნამდა მართალო თეშა რდჷ მოულირ. მაგალთო, თიქ მთელ გურით აპატუ ცოდამ ოსურკოჩის, მიდგაქ მუშ ჩილამურეფით  უბონ კუჩხეფ (ლუკ. 7:37—50). თიქ ჭეშმარიტება ქუგაგებაფუ სამარიელ ოსურს ხოლო, თიშ უმკუჯინუო, ნამდა უჩქუდ, თინა უზნეოთ ცხოვრენდუნ (იოან. 4:7, 17—19, 25, 26). ღორონთიქ იესოს თიშ ძალა ხოლო მეჩჷ, ნამდა ორჯგინუკო ცოდაშ არძაშ უმოს დიდ შედეგის — ღურას. თინა ათელენდჷ ჭიჭეს დო დიდის, ოსურს დო კოჩის (მათ. 11:5).

11. მუშენ გინაფლენდეს ცოდამ ადამიანეფ იესოწკუმა დუდის თავისფალო?

¹¹ იესო მიშეშ ცოდამ ადამიანეფიშ მდგომარეობაშა დო ჯგირო ოქცუდ თინეფს. ათეშენ გასაკვირ ვა რე, ნამდა თინეფ იესოწკუმა დუდის თავისფალო გინაფლენდეს დო ვაშქურუდეს თიწკუმა ჩიებაშა (ლუკ. 15:1, 2). იესო ოცქვანდჷ დო ჯგირს ურთუდ თინეფს, მით თიშ რწმენას გიმირჩქინანდჷ (ლუკ. 19:1—10). თეწკუმა ართო, თინა ცოდამ ადამიანეფს ოხვარუდ, დოთირუესკო მუნეფიშ ცხოვრება დო ქეკაჸუნესკო თის (ლუკ. 5:27, 28). თინა სრულყოფილო მეჸუნდჷ მუმაშ მაგალითის დო ხალხის ოძირანდჷ, მუნერ მოჭყოლოფე მუმა ჸუნდჷ (იოან. 14:9). თიშ სიტყვეფშე დო საქმეეფშე ქიძირ, ნამდა იეჰოვას მანგარო უჸორს ადამიანეფ, მიშურს თინეფიშ მდგომარეობაშა დო ოკო, ქიმეხვარას თინეფს ცოდაშა გერჯგინას.

12. მუს ურაგადუდ იესო ხალხის მუშ ღურაშ გურშენ?

¹² იესოს ჯგირო უჩქუდ, მუ ელუდ წიმი. თიქ მუშ მიმაჸუნალეფს მუსხირენშა უწუ, კოჩიშ სქუას უღალატენა დო ძელს ქიმკაჭკადანანია (მათ. 17:22; 20:18, 19). იესოს არჩქილედ, ნამდა თიშ მსხვერპლ კაცობრიობას ცოდაშე დერსხენდ. თეშნერო შისრულებუდ  წინასწარმეტყველებეფ დო თინა, მუდგას მანათალ იოანე იჩიებუდ. იესოქ ხალხის თინა ხოლო უწუ, ნამდა ღურაშ უკულ ირნერ კოჩის ქიმიჸუნანდ მუშა (იოან. 12:32). თინეფ, მით იესოშ რწმენას გეგმირჩქინანდეს დო თიშ მითითებეფს ქიმიაჸუნუდეს, მიღენდეს იეჰოვაშე მოწონას. თეშნერო, საბოლათ გეთავისფალებუდეს ცოდაშე (რომ. 6:14, 18, 22; იოან. 8:32). ათეშენ იესო მზათ რდჷ, წამებულო დოღურუკო ჩქინ ორსხებელო (იოან. 10:17, 18).

13. მუჭო ღურჷ იესოქ დო მუს მოგურუანა თენა იეჰოვაშ გურშენ? (ქოძირით სურათ).

¹³ იესოს ხოლოშიან მეგობარქ უღალატ. უკულ თინა ოჭოფეს, ლანძღუნდეს, ლახუნდეს, ტყურეფ ქეკაწამეს, ბრალ ქიგედვეს დო აწამეს. ბოლოს ჯარიშკოჩეფქ თინა თი ადგილშა ქიმიჸონეს, სოდეთ ღურათ ოკო დასაჯესკო, დო ძელს ქიმკაჭკადეს. იესოქ ართგურო გურზჷ თეშმანწარა ჭუას, მარა მუშ სქუაშ ტანჯებაშ მიმაჯინუ, ვართ იეჰოვას უტანჯებ ნაკლებო. თის უღუდ ძალა, გეიოჩილითუკო მუშ სქუას თეშმადიდა ჭუა, მარა თენა ვაკეთ. მუშენ ვერსხჷ იეჰოვაქ საჸოროფო სქუა თეცალ ტანჯება დო ღურაშე? თენა ჩქინ ჸოროფაშ გურშენ აკეთ. იესოქ თქუ: „ღორონთიქ თიშმანწარას ქიჸოროფუ თე ქიანა, ნამდა მუშ ხვალეგუნაჭყეფ სქუა ქიმეჩ, მუშენდა მით თიშ რწმენას გიმირჩქინანს, ვა ღურას დო ულიებ სიცოცხლე უღუდას“ (იოან. 3:16).

14. მუშ მტკიცებულება რე იესოშ მსხვერპლ?

¹⁴ იესოშ მსხვერპლ თიშ არძაშ უმოს დიდ მტკიცებულება რე, ნამდა იეჰოვას მანგარო უჸორს ადამ დო ევაშ გამნარყ დო უჸორქ სი. თიქ არძაშ უმოს საჸოროფო პიროვნება დათმჷ სქანო დო სასწაულ ჭუას გურზჷ, ნამდა დაირსხუკო ცოდა დო ღურაშე (1 იოან. 4:9, 10). არგამა რე, იეჰოვას ოკო, ქიმმეხვარან, ვებრძოლათ ცოდას დო გივორჯგინათ თის!

15. მუ ოკო ვაკეთათ, გიშაჸიდირალქ ჯგირობუა ქუმომღანინ?

¹⁵ ჸოროფათ კეთებულ იეჰოვაშ ძღვინ, გიშაჸიდირალ, საშვალებას მარზენა, მეპატუან ცოდეფქ. მარა იეჰოვაქ ქუმაპატუანინ, ჩქინ მხარეშე მუდგარენიშ კეთება რე საჭირო, მუთ მანათალ იოანექ დო უკულ იესოქ ხოლო თქუ: „ინარღით დაშებულ, მუშენდა მონჭაფილ რე ზეციერ სამეფო“ (მათ. 3:1, 2; 4:17). თაშ ნამდა, ჩქინ ზეციერ მუმაწკუმა ხოლოშიან ურთიერთობა დო ცოდეფიშ პატიება ქუმოკონან-და, მთელ გურით ოკო იმნარღათ დაშებულ. უკულიან სტატიას გუვარჩიენთ, მუს ნიშნენს დაშებულიშ ნარღება დო მუჭო მოხვარუნა თინა, მიბღათ იეჰოვაშ მოწონა, თიშ უმკუჯინუო, ნამდა ცოდამეფ ვორეთ.