1. მუ ოკო იეჰოვას, არძა ადამიანქ გაკეთასინ?

 ᲘᲔᲰᲝᲕᲐᲥ არძა ადამიანს ნებაშ თავისუფლება მუჩეს, ნამდგას ირიათო იბრინუანთ გადაწყვეტილებეფიშ მეღებაშ დროს. არძაშ უმოს მნიშვნელოვან გადაწყვეტილება იეჰოვაშა დუდიშ მეძღვინუა დო თიშ ოჯახიშ წევრო გინორთა რე. იეჰოვას ოკო, არძა ადამიანქ გუვაკეთათ თენა, მუშენდა მანგარო უჸორთ დო ჯგირ ოკო ჩქინო; ოკო, თიშ მეგობრეფ ვორდათ დო მარადიულო იფცხოვრათ (კან. 30:19, 20; გალ. 6:7, 8).

2. მუ ოკო იეჰოვას მანგარო, მუჟამსით მიდგაინ ვა ნარღენს დაშებულს? (1 იოან. 2:1)

² მარა იეჰოვა მითინს ვანძალს მუშ მსახურებას, თის ოკო, თე ამბე არძაქ მუშით გინოჭყვიდას. მუჭო ოკო მეუდირთას კრებაქ ნათილ ქრისტიანს, ნამუთ გინურთანს ღორონთიშ კანონს დო სერიოზულო ცოდენს? თეცალ პიროვნება ოკო ვედიტუან კრებას (1 კორ. 5:13). მარა თეშ უკულ ხოლო, იეჰოვას მანგარო ოკო, თე პიროვნებაქ ინარღას დაშებულ დო დართას თის. თიქ ზუსტას თიშენ გინიგ გიშაჸიდირალ, ნამდა დაშებულს ნარღენან ფერ ადამიანეფს ცოდეფქ ქეპატუან (წეკითხით 1 იოანე 2:1). თინეფს, მით სერიოზულო აშენა, მოჸოროფე ღორონთ შურ დო გურით ურაგად, ნამდა ინარღან მუნეფიშ საქციელ (ზაქ. 1:3; რომ. 2:4; იაკ. 4:8).

3. მუს გუვარჩიენთ თე სტატიას?

³ იეჰოვას ოკო, მუცალო უჯინედათ ქოთ სერიოზულ ცოდას  დო ქოთ დუმაშებელს. ზუსტას თეს ქიმმეხვარებუნა თე სტატია, სოდეთ გუვარჩიენთ: 1) მუჭო მეუდირთჷ პირველ საუკუნეს კორინთიშ კრებაქ ჯიმას, ნამუთ სერიოზულო აშენდჷ, 2) მუ მითითება მეჩჷ პავლექ თინეფს, მუჟამსით თე პიროვნებაქ ინარღჷ დაშებულ დო 3) მუჭო უჯინე იეჰოვა თი ქრისტიანეფს, მით სერიოზულო აშენა.

ᲛᲣᲭᲝ ᲛᲔᲣᲓᲘᲠᲗᲷ ᲞᲘᲠᲕᲔᲚ ᲡᲐᲣᲙᲣᲜᲔᲡ ᲙᲝᲠᲘᲜᲗᲘᲨ ᲙᲠᲔᲑᲐᲥ ᲐᲠᲗ ᲯᲘᲛᲐᲡ, ᲜᲐᲛᲣᲗ ᲡᲔᲠᲘᲝᲖᲣᲚᲝ ᲐᲨᲔᲜᲓᲷ?

4. მუქ მოხვად პირველ საუკუნეს კორინთიშ კრებას? (1 კორ. 5:1, 2).

⁴ წეკითხით 1 კორინთელეფიშ 5:1, 2. მასმა მისიონერულ მოგზაურობაშ დროს პავლე გებულენს, ნამდა კორინთიშ ახალჩამოყალიბებურ კრებას მანგარ გლახა ამბე ხვადუ — ართ ჯიმას მუშ დიდაჸონერწკუმა ნოღვე საქმე. მუჭოთ პავლექ თქუ, თეცალ საონჯღორო ამბე ღორონთის ვამსახურუდუნ ფერ ხალხ შქას ხოლო ვა ხვადუდ. მარა თექიან და დო ჯიმალეფს მუთუნ პრობლემათ ვემიორჩქუდეს, თე ჯიმაქ კრებას ქუდოსქიდუკო, დო ხვალე თენა ვარინ შილებე გვალო იცქვანდესკო თეთ. შილებე ნამთინე ფიქრენდუკო, ნამდა თეშნერო იეჰოვაცალო ჭყოლოფას გიმირჩქინანდჷ თე ჯიმაშ მიმართ დო არჩქილედ თიშ. მარა იეჰოვა დღას ვემიწონუანს არასწორ საქციელს. თეცალ საონჯღორო საქციელით შილებე თე კოჩ სახელს უტახუნდჷ ქრისტიანულ კრებას დო გლახათ მოქმედენდჷ თი და დო ჯიმალეფშა ხოლო, მიდგას ურთიერთობა უღუდ თიწკუმა. მუ მითითება მეჩჷ პავლექ კორინთიშ კრებას?

5. მუ უწუ პავლექ კორინთიშ კრებას დო მუს ნიშნენდჷ თიშ ნარაგად? (1 კორ. 5:13; ქოძირით სურათ).

⁵ წეკითხით 1 კორინთელეფიშ 5:13. ღორონთიშ შთაგონებათ პავლექ წერილ ქიმეჭარ კრებას, სოდეთ მითითება მეჩჷ, ნამდა დაშებულს ვა ნარღენდუნ ფერ კოჩ კრებას ვედიტუესკო. მუჭო ოკო მექცუესკო თის და დო ჯიმალეფქ? პავლექ უწუ: „ვაიღუდან მუთუნნერ ურთიერთობა თიწკუმა“. მუს ნიშნენდჷ თენა? თინა გეუძინანს: „თეცალეფწკუმა ართო ოჭკუმალ ხოლო ვა ჭკუმათ“ (1 კორ. 5:11). მუჟამსით მიდგაინწკუმა ოჭკუმშა დობზოჯუნთ, თეს ჩიება დო ურთიერთობა მოჸუნს. ათეშენ გიშურს, პავლეს თიშ რაგად ოკოდ, ნამდა და დო ჯიმალეფქ თავისფალ დრო ოკო ვა გატარესკო თე კოჩწკუმა. თენა დოთხილანდ თინეფს თიშ გლახა გავლენაშე (1 კორ. 5:5—7). თეს გეძინელ, მუჟამსით და დო ჯიმალეფს ურთიერთობა ვაღვენუდეს თე კოჩწკუმა, შილებედ თიქ ქუგოხვადუკო, მუშმაშხვას აშენდჷ ღორონთიშ წოხოლე, ონჯღორექ დაგურუკო დო ინარღუკო.

6. მუ აკეთ პავლეშ წერილიშ მეღებაშ უკულ კრებაქ დო თი კოჩიქ, ნამუთ სერიოზულო აშენდჷ?

 ⁶ კორინთელ ქრისტიანეფშა თე წერილიშ მეჭარუაშ უკულ, პავლეს ოინტერესუდ, მუს ქიმინუნდ კრება. ჭიჭე ხანშა, ტიტექ პავლეს მანგარ ჯგირ ამბე ქუგაგებაფუ — კრებაქ ქიმიაჸუნ თიშ მითითებეფს (2 კორ. 7:6, 7). ხვალე თენა ვარინ, პავლეშ წერილიშ ჯღონუაშე გვალო მუსხირენ თუთაშა, თე კოჩიქ ინარღჷ დაშებულ, მიოტუ არასწორიშ კეთება დო კინ იეჰოვაშ ნორმეფით ცხოვრება ქიდიჭყჷ (2 კორ. 7:8—11). საინტერესო რე, ანწ მუ მითითებას მეჩანს პავლე თინეფს.

ᲛᲣ ᲐᲙᲔᲗ ᲙᲠᲔᲑᲐᲥ, ᲛᲣᲟᲐᲛᲡᲘᲗ ᲨᲔᲛᲪᲝᲓᲕᲔᲚᲥ ᲘᲜᲐᲠᲦᲷ ᲓᲐᲨᲔᲑᲣᲚ?

7. მუ ჯგირ შედეგიქ მაჸუნ თის, ნამდა აშენდუნ თი ჯიმა კრებას ვედიტუეს? (2 კორ. 2:5—8).

⁷ წეკითხით 2 კორინთელეფიშ 2:5—8. პავლექ თქუ, ნამდა თე კოჩიქ დასაჯებულქ  იჸუ დო თენა ხოლო უბაღუდ. შხვა სიტყვეფით ქოფთქუათინ, აღმზრდელობით ზომეფქ, ნამდგაქ თიწკუმა იჸუ გიმორნაფილქ, ქიმიოჭირინუ მუშ მიზანს — ქიმიჸუნ თე კოჩ ნარღებაშა (ებრ. 12:11).

8. ხოლო მუ მითითება მეჩჷ პავლექ კრებას?

⁸ პავლე კრებას თი ჯიმაშ გურშენ ურაგად: „მთელ გურით ოკო ქაპატუათ დო გურშა ეუქექუათ . . . ქაძირეთ თის თქვან ჸოროფა“. ქიდეკვირით, პავლე ვა ურაგად, უბრალოთ დართინეთ კრებაშა დო კინ ღორონთიშ ხალხ შქას რდასია. თიქ უწუ, ნამდა თე ჯიმას მუნეფიშ სიტყვათ დო საქმეთ ქაგინაფუესკო, მუჭო პატიებულ აფუდეს დო მთელ გურით უჸორდეს. თეშნერო ქაძირანდეს, ნამდა მართალო ოხიოლუდეს თიშ კრებაშა დორთა.

9. მუშენ შილებე კორინთიშ კრებას ნამთინეს უჭირდუკო დორთელ ჯიმაშა პატიება?

⁹ კრებას ნამთინეს ხომ ვა გუჭირდჷ დორთელ ჯიმაშ მთელ გურით მეღებაქ? ბიბლიას თენა ვა ჭარჷ, მარა ვა რე გამორიცხულ, თაშ ჸოფედუკო. მუშენ იფჩიებუთ თეს? ნამთინე შილებე დიო ხოლო გურმულირ რდუკო თე ჯიმაშე, მუშენდა თიშ საქციელქ მთელ კრებას ეცილ ვარდა შილებე კრებას ნამთინე ქრისტიანქ გილანძღჷ თე ამბეშ გურშენ. ნამთინეს შილებე უსამართლობათ მიორჩქუდუკო, ნამდა მუნეფ თეზმას ხანდენდეს ზნეობრივო სუფთეფქ ქუდოსქიდესკონ დო თეცალ საონჯღორო საქმეს ორთუდუნ ფერ კოჩის ასე გემუანო ოკო დოხვადესკო კრებას (ქეშუდარით ლუკაშ 15:28—30). თე ირფელიშ უმკუჯინუო, მუშენ რდჷ მნიშვნელოვან, კრებაქ ჸოროფა ქაგინაფუკო დორთელ ჯიმას?

10, 11. მუქ შილებედ მოხვადუკო, უხუცესეფ თე ჯიმას ვა დართინუანდეს-და?

¹⁰ დეფიქრით, მუ მოხვადუდ, დაშებულს ნარღენდუნ ფერ კოჩ უხუცესეფს კრებაშა ვა დურთინუაფუდესკონ ვარდა დორთინაფაშ უკულ კრებას თიშა ჸოროფა ვა უგინაფუაფუდუკონ. თიქ შილებედ ნაბეტან წუხებას გეგნაჸუნუკო ვარდა იფიქრუკო, ნამდა ანწ დღას ვეჸუაფუდ იეჰოვაშ მსახურ დო ღორონთ თის მუთუნით ვაპატიენდ, ათეშენ თირუას ხოლო მუთუნ აზრ ვა უღუდ.

¹¹ მუთ ხოლო უმოს უფრაშ რე, თანაქრისტიანეფ კრებაშა დორთელ ჯიმას ვაპატიენდეს-და, თეთ იეჰოვაწკუმა მუნეფიშ ურთიერთობას ხოლო ეცილებუდეს. მუშენ იფჩიებუთ თეს? მუშენდა თეშნერო, იეჰოვაცალ მოჭყოლოფეეფ ვეჸუაფუდესინ, სატანაცალო უდუნდებელო მიქციებუდეს. თინეფ სატანას გეგმარინაფუანდეს მუნეფიშ დუდის, ნამდა თე კოჩ სულიერო განადგურუკო (2 კორ. 2:10, 11; ეფეს. 4:27).

12. მუჭო შეულებუდეს კორინთელ ქრისტიანეფს მიაჸუნესკო იეჰოვაშ მაგალითის?

¹² მუჭო შეულებუდეს კორინთელ ქრისტიანეფს სატანაცალო ვარინ, იეჰოვაცალო მიქცუესკო? თინეფქ ოკო დეფიქრესკო, მუჭო ოქცუდ იეჰოვა დაშებულს ნარღენდუნ ფერ ადამიანეფს დო მიაჸუნესკო თიშ მაგალითის. ქიდეკვირით, მუს იჩიებ ბიბლიაშ ნამთინე მაჭარალ იეჰოვაშ გურშენ. დავითიქ თის უწუ: „მუშმაჯგირა დო მუნერ მპატიებელ რექჷ“ (ფსალმ. 86:5). მიქაქ ჭარჷ: „ნამ ღორონთ პატიენს სქანცალო დაშებულს დო ხასლას ელულუანს ცოდას?!“ (მიქ. 7:18). ესაიაქ თქუ: „მიოტუას უბადოქ მუშ შარა, უბადობაშ მაკეთებელქ — მუშ აზრეფ, დართას იეჰოვას, ნამუთ ქიჭყოლოფუანს, ჩქინ ღორონთის, მუშენდა თინა ბრელ მუდგარენს პატიენს“ (ეს. 55:7).

13.მუშენ ვა რდჷ საჭირო მეტიშ ჯინა დაშებულს ნარღენდუნ ფერ შემცოდველიშ დართინაფალო? (ქოძირით ჩარჩო  „მუზმა ხანშა მოხვად კორინთიშ კრებაშა შემცოდველიშ დორთინაფაქ?“).

¹³ კრებაშა დორთელ ჯიმას მთელ გურით მიღენდეს დო ჸოროფას ქაგინაფუანდეს-და, კორინთელეფ იეჰოვაშ მაგალითის ქიმიაჸუნუდეს.  პავლეშ მითითებაშ მეჸუნათ თინეფ ქაძირანდეს, ნამდა ომორჩილუდეს ხელმძღვანელობას (2 კორ. 2:9). მართალ რე, გვალო მუსხირენ თუთა რდჷ მიკულირ თევრეშე, მუთ თის კრება დატებაფუეს, მარა აღმზრდელობით ზომეფს, ნამუთ თე ჯიმაშ მიმართ გიმირინუეს, უკვე მენჭირნაფილ აფუდ მუშ მიზანშა დო თე კოჩ ნარღენდჷ დაშებულს. თაშ ნამდა, მუთუნ საჭირო ვა რდჷ, უხუცესეფქ დრო იღესკო დო ვა დართინუესკო თინა კრებაშა.

ᲛᲘᲕᲐᲸᲣᲜᲐᲗ ᲘᲔᲰᲝᲕᲐᲨ ᲡᲐᲛᲐᲠᲗᲚᲘᲐᲜᲝᲑᲐᲨ ᲓᲝ ᲭᲧᲝᲚᲝᲤᲐᲨ ᲛᲐᲒᲐᲚᲘᲗᲘᲡ

14, 15. მუს მოგურუანა კორინთიშ კრებას მოხვალამირ შემთხვევა? (2 პეტ. 3:9; ქოძირით სურათ).

¹⁴ კორინთის მოხვალამირ შემთხვევაქ „ჩქინ ოგურაფალო იჭარ“ (რომ. 15:4). თავრეშე ბგურაფლენთ, ნამდა მუჟამსით იეჰოვაშ ხალხშე ნამდგაინ სერიოზულო აშენს, თინა თოლს ვა წკურუნს თეშე. მიდგაინ შილებე ფიქრენდას, ნამდა იეჰოვაშო დაშებულს ვა ნარღენსინ ფერ პიროვნებაშ კრებას დოტება პრობლემა ვა რე, მუშენდა თინა მოჭყოლოფე რე. მარა იეჰოვა მოჭყოლოფე რენ თენა ვა ნიშნენს, ნამდა ირფელშე თოლს წკურუნს. თინა ვართ მუშ მაღალზნეობრივ ნორმეფს თირანს (იუდ. 4). იეჰოვა თაშ ქიქციებუდას დო დაშებულს ვა ნარღენსინ ფერ ადამიანეფს კრებას ქიტენდასინ, სინამდვილეს თენა შუროთ ვეჸიდ ჭყოლოფაშ გიმორჩქინა, მუშენდა თენა მთელ კრებაშო მოცილე იჸიდ (იგავ. 13:20; 1 კორ. 15:33).

 ¹⁵ თე შემთხვევაშე თის ხოლო ბგებულენთ, ნამდა იეჰოვას ვაკო, მითინქ გენადგურას. შურო საშველ ქორენ-და, თის ოკო, ადამიანეფქ გეგნოსქიდან. თინა ჭყოლოფას გიმირჩქინანს თიცალ ადამიანეფიშ მიმართ, მით ითირუნა დო ოკონა, მუწკუმა ხოლოშიან ურთიერთობა დირთინუან (ეზეკ. 33:11; წეკითხით 2 პეტრეშ 3:9). ათეშენ, მუჟამსით შემცოდველქ, ნამდგას კრება დატებაფუეს, ინარღჷ დაშებულ დო გეგშესწორ, იეჰოვაქ პავლეშ პიჯით გეუნწყჷ კრებას, ნამდა ქაპატუესკო თის დო მთელ გურით მიღესკო.

16. მუჭო იმოქმედ თქვანდა კორინთიშ კრებას მოხვალამირ შემთხვევაშ გარჩიებაქ?

¹⁶ კორინთიშ კრებას მოხვალამირ შემთხვევაშ გარჩიებაქ ქუმოძირუეს, მუნერ მოჸოროფე დო სამართლიან რე იეჰოვა (ფსალმ. 33:5). თენა მიკორინუანა, ხოლო უმოსო განვადიდათ თინა. ჩქი არძა ცოდამეფ ვორეთ დო არძას მოსაჭირუნა თიშე პატიება. ათეშენ თითოულ მარდულ ოკო ვაფუდათ იეჰოვას გიშაჸიდირალშო, ნამდგაშ ჭყოლოფათ მეპატიებუნა ჩქინ ცოდეფ. მუნერ გურიშემაქექაფალ რე დო მუჭო ემოფშანა ძალეფით თიშ რჩქინა, ნამდა იეჰოვას დასურო მანგარო უჸორთ დო ჯგირ ოკო ჩქინო!

17. მუ კითხვეფს გუვარჩიენთ უკულიან სტატიეფს?

¹⁷ მუშ რაგად შილებე ამდღარ დროშე? მუ ხვადუ, მუჟამსით მიდგაინ სერიოზულო აშენს? მუჭო შეულებუნა უხუცესეფს, იეჰოვაცალო ჸოროფათ ქიმეხვარან პიროვნებას, ინარღას დაშებულ? მუჭო ოკო მიქცუას კრებაქ, მუჟამსით უხუცესეფ გინოჭყვიდუნა, მიდგაინ კრებას ვედიტუან ვარდა დართინუან კრებაშა? თე კითხვეფს უკულიან სტატიეფს ქუპასუხენთ.