1. მუშენ აფჷ ამდღა ბრელს ბიბლიაშ მიმართ ნდობა დინაფილ?

 ᲐᲛᲓᲦᲐ ბრელ ადამიანს უჭირს ნდობაშ გიმორჩქინა დო ვა უჩქჷ, მის ენდას. თინეფ ვა რენა დარწმუნებულ, ნამდა თი ადამიანეფ, მიდგას პატის ცენა, მაგალთო, პოლიტიკოსეფ, მეცნიერეფ დო ბიზნესმენეფ, ირო ეცადებნა, ხალხიშ საჯგირობუოთ იმოქმედან. თეს გეძინელ, თინეფს იშენდოიშენ გურს ვეგიოხანტნა ქრისტიანულ სამყაროშ სამღვდელოება. ათეშენ გასაკვირ ვა რე, მუშენ უჯინე ხალხ ეჭვიშ თოლით ბიბლიას, წიგნის, ნამდგაშეთ თე რელიგიურ ლიდერეფ აცხადენა, ნამდა მეჸუნა.

2. ფსალმუნიშ 119:160-იშ თანახმას, მუშა შემლებნა ვორდათ დარწმუნებულ?

² ჩქი, მუჭოთ იეჰოვაშ მსახურეფ, დარწმუნებულ ვორეთ, ნამდა თინა რე „ჭეშმარიტებაშ ღორონთ“ დო ირიათო არძაშ უჯგუშ ოკო ჩქინო (ფსალმ. 31:5; ეს. 48:17). ჩქი მიჩქნა, ნამდა შემლებნა ვონდუდათ ბიბლიას ინოჭარილ სიტყვეფს: „მთელ [ღორონთიშ] სიტყვა ჭეშმარიტება რე“ (წეკითხით ფსალმუნიშ 119:160). ჩქი ვოთანხმუთ თის, მუთ ბიბლიაშ ართ მარკვიებელქ ჭარჷ: „აკაბცხა ტყურა ხოლო ვაკათ ღორონთიშ ნარაგადის დო გამორიცხულ რე, ვეშესრულასინ. ღორონთიშ ხალხის შეულებ ენდას თიშ სიტყვეფს, მუშენდა ონდუნა ღორონთის, მით თეს იჩიებ“.

3. მუს გუვარჩიენთ თე სტატიას?

³ მუჭო შემლებნა მივეხვარათ შხვეფს, ჩქინცალ დამოკიდებულება უღდან ღორონთიშ სიტყვაშ მიმართ? გუვარჩუათ სუმ მიზეზ, მუდგაშ გურშენ შემლებნა ვენდათ ბიბლიას: 1) მუზმათ ზუსტ რე თექ მოჩამილ ინფორმაცია? 2) მუჭო შისრულ წინასწარმეტყველებეფქ? დო 3) მუჭო თირანს ხალხიშ ცხოვრებას?

4. მუშენ ფიქრენს ნამთინე, ნამდა ბიბლიურ ცნობა თირელ რე?

⁴ იეჰოვაქ მუშ სიტყვაშ ოჭარალო, სოდგარენ 40-შახ ქომოლკოჩ გიმირინუ. ორიგინალ მანუსკრიპტეფშე b ამდღარ დღაშახ ნამთინს ვა მურთუმ. ამდღა მუდგაშ ძირაფა შემლებნან, თენა რე, გინნაჭარაშ გინნაჭარა. ათეშენ ადამიანეფს უჭირა თიშ დაჯერება, ნამდა ამდღარ ბიბლიეფ ზუსტას გინოჩანს თი ინფორმაციას, მუდგაქ დუდშე იჸუ ჭარილქ. დღას დაინტერესებეთო თე საკითხით?

5. მუჭო ხვადუდ ებრაულ წერილეფიშ გინოჭარუა? (ქოძირით სურათ გალენ გვერდის).

⁵ მუშ სიტყვაქ ვადინკონ თიშენ იეჰოვაქ ზოჯჷ, ნამდა მუშ ხალხიქ თინა გეგნოჭარკო. თიქ ისრაელიშ მეფეეფს მითითება მეჩჷ, მუნეფიშ ხეთ გეგნოჭარესკო ჭარილ კანონ დო ლევიანეფ დანიშნჷ, ნამდა თე კანონ ხალხის ქუდაგურესკო (კან. 17:18; 31:24—26; ნეემ. 8:7). იუდეველეფიშ ბაბილონშე გათავისფალებაშ უკულ გამოცდილ გინმაჭარალეფქ ქიდიჭყეს ებრაულ წერილეფიშ ბრელ ასლიშ კეთება (ეზრ. 7:6). თინეფ თე საქმეს ფრთხილას მეურდეს დო ხვალე სიტყვეფს ვარინ, ასოეფს ხოლო კოროცხუნდეს, ნამდა დერწმუნესკო, ირფელ ზუსტას აფდეს გინოღალირ. თეშ უმკუჯინუო, გინმაჭარალეფ არასრულყოფილეფ რდეს დო ათეშენ ტექსტის ჭიჭე-ჭიჭე შეცდომეფ იშენით უღდეს. მარა ართდოიგივე ტექსტიშ ბრელ ასლ არსებენდუნ თიშ გურშენ, თე შეცდომეფქ უმოს ადვილო იჸუ ძირაფილქ. მორთ ქობძირათ მუჭო?

6. მუჭო შილებე ბიბლიაშ გინნაჭარა ტექსტეფს შეცდომეფიშ ძირაფა?

⁶ თანამედროვე მარკვიებელეფს ჯგირ მეთოდ უღნა თი შეცდომეფიშ ოძირაფალო, მუდგაქ ბიბლიაშ გინოჭარუაშ დროს მოხვად. მაგალთო, წერმიდგინით, ნამდა 100 კოჩის ქიმეჩეს ართდოიგივე ტექსტ დო დავალეს, ხეთ გეგნოჭარესკო. ართიქ ჭიჭე შეცდომა დუშვჷ გინოჭარუაშ დროს. ართ-ართ საშვალება, მუდგათ თე შეცდომაშ ძირაფა შემლებნა, თიშ შხვეფიშ გინნაჭარაშა შედარება რე. თეშნერო, ბიბლიაშ ბრელ ხეშნაჭარაშ ართიანშა შედარებათ, მარკვიებელეფს შეულებნა ძირან შეცდომეფ დო გიშატებულ აზრეფ.

7. სოვრეშე იძირე ბიბლიაშ გინმაჭარალეფიშ სიფრთხილე?

⁷ თინეფ, მით ბიბლიაშ მანუსკრიპტეფს ორთუდეს, ოცადდეს თენა ზუსტას გაკეთესკო. ქობძირათ ართ მაგალით, სოვრეშეთ თენა ჯგირო იძირე. ებრაულ წერილეფიშ არძაშ უმოს ჯვეშ მთლიან მანუსკრიპტ დათარიღებულ რე ახ. წ. 1008—1009 წანეფით. თის ლენინგრადიშ კოდექსის უძახნა. მარა ამარდე, ბიბლიაშ მუსხირენ მანუსკრიპტ ვარდა მანუსკრიპტიშ ნაწილქ იჸუ ძირაფილქ, ნამუთ სოდგარენ 1 000 წანათ უმოს ჯვეშ რე, ვინემ ლენინგრადიშ კოდექს. ნამთინექ შილებე იფიქრას, ნამდა 1 000 წანაშ დინახალე, მანუსკრიპტიშ თეზმაშა გინოჭარუაშ უკულ, ლენინგრადიშ კოდექს მანგარ განსხვავებულ იჸუაფუდ თე ჯვეშ ხეშნაჭარეფშე, მარა თენა შუროთ ვა რდჷ თაშ. მარკვიებელეფქ, მით თე ჯვეშ ხეშნაჭარეფ უკულიანს შეუდარეს, ქოძირეს, ნამდა თექ ხვალე უმნიშვნელო შეცდომეფ რდჷ დო ბიბლიაშ მთავარ ცნობა შურო ვა რდჷ თირელ.

8. მუ განსხვავება რე ქრისტიანულ-ბერძნულ წერილეფიშ ასლეფ დო შხვა წიგნეფიშ ასლეფ შქას?

⁸ პირველ საუკუნეშ ქრისტიანეფქ ხოლო გაგრძელეს ებრაულ წერილეფიშ გინოჭარუაშ ტრადიცია. თინეფქ ფრთხილას გეგნოჭარეს ბერძნულ წერილეფიშ მთლიან 27 წიგნ, ნამდგას კრებაშ შეხვალამეფს დო მსახურებაშ დროს ირინუანდეს. თიშ უკულ, მუთ ბერძნულ წერილეფიშ დოსქილადირ ხეშნაჭარეფ თიმდროიან შხვა ნაშრომეფწკუმა შეადარ, ართ მარკვიებელქ თეცალ დასკვნა აკეთ: „სინამდვილეს, [ბერძნულ წერილეფიშ მანუსკრიპტეფ] შხვა  წიგნეფიშ გინაწონს უმოსო რე დოსქილადირ . . . დო უმოს სრულ რე“. ართ წიგნის, ნამუთ მარკვიებელეფქ გიშაშქვეს, ჭარჷ: „ართ-ართ, მუდგაშათ შემლებნა დარწმუნებულ ვორდათინ თინა რე, ნამდა ჯგირ, თანამედროვე თარგმანს [ბერძნულ წერილეფიშ] შემლებნა იბკითხათ ზუსტას თი აზრ, მუთ ჯვეშ ავტორეფქ ჭარეს“ (Anatomy of the New Testament).

9. მუჭოთ საიაშ 40:8-ს ჭარჷ, მუშ რაგად შემლებნა ბიბლიურ ცნობაშ გურშენ?

⁹ საუკუნეეფიშ დინახალე ბრელ გინმაჭარალ მანგარო ხანდენდჷ, ნამდა ფრთხილას გეგნოჭარკო ბიბლია. ათეშენ მიღნა ბიბლიაშ ზუსტ თარგმან, ნამდგას ბკითხულენთ დო ნამდგაშე ბგურაფლენთ ამდღა. c მუშო ოკო რაგად, იეჰოვაშ ჭყოლოფათ თიშ სიტყვაქ ვათირენ თეშ ქუმაჭირინუ ჩქინდა (წეკითხით ესაიაშ 40:8). ნამთინექ შილებე თქუას, ნამდა ბიბლიაქ ამდღარ დღაშა ვათირენ თეშ მაჭირინუნ თენა ვა ნიშნენს, ნამდა თინა ღორონთშე რე შთაგონებულ. ათეშენ, გუვარჩუათ მუსხირენ მტკიცებულება, სოვრეშეთ იძირე, ნამდა ბიბლიას მართალო ღორონთიშ აზრეფ ჭარჷ.

10. ქიმიჸონით შესრულებურ წინასწარმეტყველებაშ მაგალით, მუთ ამტკიცენს 2 პეტრეშ 1:21-ის მოჩამილ სიტყვეფიშ ჭეშმარიტებას (ქოძირით სურათეფ).

¹⁰ ბიბლიას ბრელ შესრულებურ წინასწარმეტყველება რე მოჩამილ, თინეფშე ნამთინექ ინოჭარუაშე ოშობით წანაშ უკულ შისრულ, მუდგას ისტორია ხოლო ადასტურენს. თენა შუროთ ვამკვენა, მუშენდა მიჩქნა, ნამდა ბიბლიურ წინასწარმეტყველებეფიშ ავტორ იეჰოვა რე (წეკითხით 2 პეტრეშ 1:21). დეფიქრით წინასწარმეტყველებაშე, ნამუთ ჯვეშ ქალაქ ბაბილონიშ განადგურებას ოხუ. ჯვ. წ. მა-8 საუკუნეს, წინასწარმეტყველ ესაიაქ ღორონთიშ შთაგონებათ იწინასწარმეტყველ, ნამდა ძალიერ ქალაქ ბაბილონს გეჭოფუნდეს. თეს გეძინელ, თინა ხოლო იწინასწარმეტყველ, ნამდა ბაბილონიშ ემაჭოფალ მეფე კიროს იჸუაფუდ დო თინა ხოლო კილ-კილშა ეჭარ, მუჭო გაკეთენდჷ თეს (ეს. 44:27—45:2). თეწკუმა ართო, ესაიაქ იწინასწარმეტყველ, ნამდა ბაბილონ საბოლათ გენადგურებუდ დო  თექ დღას მითინ ვედიხორუდ (ეს. 13:19, 20). თექ ზუსტას თაშ ქუმოხვად. ჯვ. წ. 539 წანას მიდია-სპარსეთიქ გეჭოფ ბაბილონ დო ართ დროს დიდებულ ქალაქ ამდღა საბოლათ განადგურებულ რე (ქოძირით წიგნიშ „მარადიულო გეხარით ცხოვრებათ!“ ელექტრონულ გიშაშქუმალას მა-3 დუდიშ მა-5 პუნქტის მოჩამილ ვიდეო: „ბიბლიაქ იწინასწარმეტყველ ბაბილონიშ განადგურებაშ გურშენ“).

11. გენწყით, მუჭო ისრულებ დანიელიშ 2:41—43-ს ინოჭარილ წინასწარმეტყველება ამდღა.

¹¹ ბიბლიურ წინასწარმეტყველებეფ ხვალე ულირს ვეშესრულებე, თინა ამდღა ხოლო ისრულებ. მაგალთო, დეფიქრით დანიელიშ მნიშვნელოვან წინასწარმეტყველებაშე, ნამუთ ოხუ ინგლის-ამერიკაშ მსოფლიო იმპერიას (წეკითხით დანიელიშ 2:41—43). დანიელ ზუსტას წინასწარმეტყველენს, ნამდა თე იმპერია იჸუაფუდ „გვერდო ძალიერ“, მუჭოთ რკინა დო „გვერდო ადვილო ტირხუნ ფერ“, მუჭოთ თიხა. თენა ზუსტას თაშ რე. ბრიტანეთ დო ამერიკაქ ჟირხოლო მსოფლიო ომი მიგეს, მუდგათ ოძირეს, ნამდა რკინაცალ ძალა უღნა. თინეფ აგრძელენა მუნეფიშ დიდ სამხედრო ძალაშ გიმორნაფას. მარა თინეფიშ ძალა დასუსტეს მოქალაქეეფქ, მით ითხინა მუნეფიშ უფლებეფიშ დაცვას პროფკავშირეფიშ, მოქალაქეეფიშ უფლებეფიშ დამცველეფიშ დო დამოუკიდებლობაშო მებრძოლეფიშ საშვალებათ. პოლიტიკურ საკითხეფიშ ექსპერტიქ ამარდე თეცალ მუდგარენ თქუ: „მსოფლიოს თანამედროვე დემოკრატიულ ქიანეფ შქას ვა არსებენს პოლიტიკურო თიშე უმოს გორთილ ქიანა, მუნერით ამდღა ამერიკაშ შეერთებულ შტატეფ რე“. ბრიტანეთიქ, თე მსოფლიო იმპერიაშ მაჟია მხარექ, განსაკუთრებულო გირთჷ ბოლო წანეფს, მუშენდა ხალხის ართ აზრშა ვემიართინ თიწკუმა დაკავშირებით, მუნერ ურთიერთობა ოკო უღდას ბრიტანეთის ევროკავშირიშ ქიანეფწკუმა. თე გორთუალაქ მანგარო ეცილ ინგლის-ამერიკაშ მსოფლიო იმპერიას, ქიდიჭყუკო გადამწყვეტ მოქმედება.

12. მუშა მარწმუნენა ბიბლიურ წინასწარმეტყველება?

¹² თი ბრელ ბიბლიურ წინასწარმეტყველება, ნამდგაქ უკვე შისრულ, მიმანგარენა ნდობას, ნამდა ღორონთ შეასრულენს მუშ დუნაპირებუს მომავალწკუმა დაკავშირებით. ჩქი ხოლო ფსალმუნმაბირეცალო ბგინაფლენთ დუდის, მიდგაქ იეჰოვას ლოცვას უწუ: „შურ მოლჷ, მუჟამ მირსხენქ, მუშენდა სქან სიტყვაშა ვორექ დაიმენდებულ“ (ფსალმ. 119:81). ბიბლიაშ საშვალებათ იეჰოვა ჸოროფათ მარზენა „მომავალიშ იმენდის“ (იერ. 29:11). ჩქინ იმენდ ადამიანეფიშ მონდომაშა ვარინ, იეჰოვაშ დუნაპირებუეფშა რე გერსხილ. მორთ გუვაგრძელათ ღორონთიშ სიტყვაშ მიმართ ნდობაშ გამანგარება ბიბლიურ წინასწარმეტყველებეფიშ გურგედვალირ გიმორკვიებათ.

13. მუჭოთ ფსალმუნიშ 119:66, 138-შე იძირე, ხოლო მუ ამტკიცენს, ნამდა ბიბლია სანდო რე?

¹³ ხოლო ართ მიზეზ, მუდგაშ გურშენ შემლებნა ვენდათ ბიბლიას, რე თი ადამიანეფიშ შემთხვევეფ, მიდგას ბიბლიურ რჩევეფიშ გიმორნაფაქ ჯგირობუა მოუღ (წეკითხით ფსალმუნიშ 119:66, 138). მაგალთო, ართ დაქორწინებულ წყვილს, მიდგას ოჯახიშ ეკოცუმაშა აკაბცხა მეუძუდ, ბიბლიურ რჩევეფიშ გიმორნაფაშ ჭყოლოფათ ამდღა ბედნერ ოჯახურ ცხოვრება უღჷ. თინეფიშ სქუალეფ ირდუნა ქრისტიანულ ოჯახის, ჸოროფიან გარემოს, სოდეთ თხილერ რენა დო ზრუნენა თინეფშე (ეფეს. 5:22—29).

14. ქიმიჸონით მაგალით, მუჭო შეულებ ბიბლიურ ჭეშმარიტებას, უჯგუშობაშა დოთირუას ადამიანიშ ცხოვრება.

¹⁴ ბიბლიას მოჩამილ ბრძნულ რჩევეფიშ გიმორნაფაქ საშიშ დამნაშავეეფს ხოლო მეხვარ, მუნეფიშ ცხოვრება უჯგუშობაშა დოთირესკო. გუვარჩუათ ართ პატიმარიშ,  ჯეკიშ, d შემთხვევა. თინა უდუნდებელ კრიმინალ რდჷ. თის არძაშ უმოს ოშქურანჯო იჩინენდეს თი პატიმარეფ შქას, მიდგას ღურა აფდეს მესაჯებულ. ართშა ჯეკიქ ბიბლიაშ გურაფას დესწრჷ დო პატიმარეფიშ მიმართ ჯიმალეფიშ გიმორჩქინელ სიჯგირაქ თეშ შეხუ თიშ გურს, ნამდა მუქ ხოლო ქიდიჭყჷ ბიბლიაშ გურაფა. მუშ ცხოვრებას მუთ უმოსო ირინუანდჷ ბიბლიურ ჭეშმარიტებას, თიშ საქმეეფ დო შინაგან პიროვნება თით უმოსო იუჯგუშებუდ. მუდგარენ დროშ უკულ ჯეკიქ მოუნათლავ მაუწყებელო დენიშნჷ დო დინათ. თიქ მთელ მონდომათ უქადაგ შხვა პატიმარეფს ღორონთიშ სამეფოშ გურშენ დო არძაშ უკლაშ, ოთხ პიროვნებას მეხვარ ბიბლიურ ჭეშმარიტებაშ გაგებას. მუჟამსით თიშ ღურათ დასაჯებაშ დღაქ ქუდოდირთჷ, ჯეკ გვალო შხვა პიროვნება რდჷ. თიშ ართ-ართ ადვოკატიქ თქუ: „თენა თი ჯეკ ვა რე, ნამუთ 20 წანაშ წოხოლე გეფჩინებაფე. იეჰოვაშ მოწმეეფწკუმა ბიბლიაშ გურაფაქ თიშ ცხოვრება დოთირუ“. მართალ რე, ჯეკ ღურათ დასაჯეს, მარა თიშ მაგალითშე ჯგირო იძირე, ნამდა შემლებნა ვენდათ ღორონთიშ სიტყვას დო თის, ნამდა ბიბლიას უღჷ ძალა, უჯგუშობაშა დოთირუას ადამიანიშ ცხოვრება (ეს. 11:6—9).

15. მუჭო გიშართუნს ბიბლიურ ჭეშმარიტებაშ მეჸუნა ღორონთიშ ხალხის ქვეყნიერებაშე? (ქოძირით სურათ).

¹⁵ იეჰოვაშ ხალხის ართობა უღჷ, მუშენდა მეჸუნა ბიბლიურ ჭეშმარიტებას (იოან. 13:35; 1 კორ. 1:10). ჩქინ მშვიდობა დო ართობა განსაკუთრებულო თოლშამალაფარ რე თე ქვეყნიერებას, მუშენდა ვორწყეთ, თე ქვეყნიერება პოლიტიკურო, ეთნიკურო დო სოციალურო გორთილ რე. იეჰოვაშ ხალხ შქას თეცალ ართობაშ ძირაფაქ მანგარო იმოქმედ ართ ახალგაზრდა კოჩშა, სახელო ჟანშა. თიქ აფრიკაშ ართ-ართ ქიანას მირდჷ. მუჟამსით სამოქალაქო ომქ ქიდიჭყჷ, ჯარშა მიდართჷ, მარა უმოს გვიანო, მეზობელ ქიანაშა ინტჷ, სოდეთ იეჰოვაშ მოწმეეფს ქეშეხვად. ჟან იჩიებ: „ქიგებგჷ, ნამდა ჭეშმარიტ რელიგიაშ მიმაჸუნალეფ ვემშულა პოლიტიკაშა დო ვართ გორთილეფ რენა. თეშ გინაწონს, უჸორა ართიან. ჩქიმ ცხოვრება ჩქიმ ქიანაშ დაცვებაშა მაფუდ მეძღვინელ, მარა ბიბლიურ ჭეშმარიტებაშ  გაგებაშ უკულ გეგნობჭყვიდ, თინა იეჰოვას ქიმუძღვინკო“. ჟანქ სრულას დითირ. თიშ მანგიორო, ნამდა შხვა ეროვნებაშ ადამიანეფს ებრძოლას, ასე არძას, მიდგას შეხვადუ, გინოჩანს ბიბლიურ ჭეშმარიტებას, ნამუთ ართობას უნწყუნს ხეს. თაშ რე, ბიბლიურ რჩევეფ არძანერ წარმომავლობაშ ხალხის ოხვარ, მუთ არგამათ ოძირანს, ნამდა შემლებნა ვენდათ ღორონთიშ სიტყვას.

16. მუშენ რე მნიშვნელოვან, გუვამანგარათ ღორონთიშ სიტყვაშ მიმართ ნდობა?

¹⁶ ქვეყნიერებას მდგომარეობა ირდღას იუფრაშებ, მუდგაშ გურშენ ღორონთიშ სიტყვაშ მიმართ ჩქინ ნდობა უმოსო გიმიცადებ. ადამიანეფქ შილებე ეცადან, ჩქინ გურს ეჭვეფ ქინათასან, თიწკუმა დაკავშირებით ქორენ დო ვარ ბიბლია სანდო დო ქორენ დო ვარ იეჰოვაშე დანიშნულ ართგურ დო გონიერ მონა, ნამდა უხემძღვანელას მუშ ხალხის. მარა ღორონთიშ სიტყვაშ ჭეშმარიტებაშა ბოლოშა დარწმუნებულ ქუვორეთ-და, შემალებენა გივორჯგინათ რწმენაშ თეცალ გამოცდეფს. თეშნერო, გინოჭყვიდილ მაჸინა, დევემორჩილათ იეჰოვაშ წესეფს „მთელ ცხოვრება . . . ღურა დღაშახ“ (ფსალმ. 119:112). ონჯღორე ვადმაგურენა, შხვას ბიბლიურ ჭეშმარიტება გეგნოფჩათ დო ელუჩათ, მუნეფიშ ცხოვრებას გეგმირინუან თინა (ფსალმ. 119:46). თეს გეძინელ, შემალებენა არძაშე უმოს რთულ სიტუაციეფს, თინეფ შქას თხოზინს, „მოთვინებათ დო ხიოლით გურზათ“ (კოლ. 1:11; ფსალმ. 119:143, 157).

17. მუს გუმოშინანა თე წანაშ მუხლ?

¹⁷ მანგარ მარდულ ვორეთ იეჰოვაშ, ნამდა ჭეშმარიტება გუმოგებაფეს. ბიბლიურ ჭეშმარიტება მოხვარნა, ვორდათ მშვიდას დო მოგურუანა, მუჭო იფცხოვრათ თე ქვეყნიერებას, სოდეთ ქაოს რე დო მდგომარეობა უმოსო იუფრაშებ. თეს გეძინელ, მარზენა უჯგუშ მომავალიშ იმენდის, მუდგას ღორონთიშ სამეფო მიღანს. მოკონა, 2023 წანაშ მუხლიქ მიმეხვარან, უმოსო გუვამანგარათ თიშ ნდობა, ნამდა ღორონთიშ მთელ სიტყვა ჭეშმარიტება რე! (ფსალმ. 119:160).