1, 2. მუ ოკო ვემვოტუათ ნათუაშ უკულ ხოლო? გენწყით.

 ᲛᲣᲡᲮᲘᲗ ხშირას ონწყუნთ ჸუდეს? ალბათ გურგედვალირო დანწყუნდით, მუჟამსით პირველო გინორთით თექ ოცხოვრებშა. მარა მუ მოხვადუდ თიშ უკულ შურო ვადანწყუნდით-და? არგამა რე, ირფელს ხეთეშე ტვერ ქიმნადვალუდ დო წინდა ოჭკუმუნდჷ. ათეშენ, თექ ვა მოხვადასინ საჭირო რე, ირიათო დანწყუათ.

² თეშნერო ირიათო აუცილებერ რე, მონდომა ვადვარკათ ჩქინ აზროვნებაშ დო პიროვნებაშ თირუას. მუშო ოკო რაგად, ონდო დიმნათუდით ირნერო ვოცადუდით, საჭირო ცვლილებეფ გემშებღითკო ჩქინ ცხოვრებას, ნამდა გეფსუფთითკო „თი ირფელშე, მუთ გილმალუანს სხეულს დო გონებას“ (2 კორ. 7:1). მარა საჭირო რე, ამდღა ხოლო მივაჸუნათ პავლე მოციქულიშ რჩევას: „ვემიოტუათ ახალ აზროვნებაშ გავითარება“ (ეფეს. 4:23). მუშენ რე საჭირო ვემვოტუათ ჩქინ პიროვნებაშ თირუა? მუშენდა, შილებე ქვეყნიერებაშ ტვერქ დო წინდაქ ხეთეშე დიშაყარას ჩქინ გონებას. თეს დუდ აურიდათ დო იეჰოვაშ მოწონება ვა ვოდინუათინ, საჭირო რე, ირიათო გეგმიბრკუათ ჩქინ აზროვნება, შინაგან პიროვნება დო სურვილეფ.

3. მუს ნიშნენს აზროვნებაშ თირუა? (რომ. 12:2)

³ მუ რე საჭირო, ნამდა დიფთირუათ აზროვნება (წეკითხით რომაელეფიშ 12:2). თენა ვა ნიშნენს, ნამდა უბრალოთ მუსხირენ ჯგირ საქმე ვაკეთათ. ჩქი გურგედვალირო ოკო გეგმიბრკუათ ჩქინ პიროვნება, ქობძირათ მუნერეფ ვორეთ სინამდვილეს დო დოფთირუათ თინა, მუთ ოთირალ მაფნა, ნამდა ჩქინ ცხოვრება მუთ შილებე ირნერო მეურდას  იეჰოვაშ ნორმეფს. თეშ კეთება ართშა ვარინ ირო რე საჭირო.

4. მუჭო შემლებნა დუდ აურიდუათ ქვეყნიერებაშ ჭკუაშა ცხოვრებას?

⁴ მუჟამსით სრულყოფილებას ქიმვოჭირინუანთ, შემალებენა ირფელით გურ გუხარათ იეჰოვას. თეიშახ საჭირო რე, ბრელ იფხანდათ, ნამდა ვასიამოვნათ იეჰოვას. ქიდეკვირით, მუჭო დუკავშირ პავლექ ართიანს აზროვნებაშ თირუა დო ღორონთიშ ნებაშ ინონჭაფა რომაელეფიშ 12:2-ს. თიშ მანგიორო, ნამდა ქვეყნიერებას მეფჩათ უფლება მუშ ჭკუაშა გილამიჸონან, პირველ რიგის ჩქინ დუდ ოკო გეგმიბრკუათ, ნამდა ქობძირათ, მუსხით ვარზენთ ღორონთიშ აზროვნებას დო ვართ ხოლო ქვეყნიერებას თიშ უფლებას, იმოქმედას ჩქინ მიზნეფ დო გადაწყვეტილებეფშა.

5. მუჭო შემლებნა გეგმიბრკუათ ჩქინ აზროვნება ღორონთიშ დღაშ მონჭაფაშენ? (ქოძირით სურათ).

⁵ გუვარჩუათ მაგალით. იეჰოვას ოკო, მთელ გურით ველდათ თი დროს, მუჟამსით ქუდოდირთუ თიშ დღა (2 პეტ. 3:12). ქოკითხით თქვან დუდის: „ქუვოძირანქო ჩქიმ ცხოვრებათ, ნამდა მარჩქილე მუსხით ხოლოს ვორექ თე ქვეყნიერებაშ აღსასრულწკუმა? ქაძირანსო გურაფაწკუმა დო სამუშაწკუმა მეღებულ გადაწყვეტილებეფ, ნამდა ჩქიმ ცხოვრებას არძაშ უმოს მნიშვნელოვან იეჰოვაშ მსახურება რე? ქობჯერსო, ნამდა იეჰოვა იზრუნენს ჩქიმდე დო ჩქიმ ოჯახშე, დოვარ ირიათო მატერიალურშე ბწუხენქჷ?“. დეფიქრით, მუჭო ოხიოლ იეჰოვას თიშ ძირაფა, ნამდა თიშ ნებაშ თანახმას ფცხოვრენთ (მათ. 6:25—27, 33; ფილ. 4:12, 13).

6. მუშ კეთება ოკო ვემვოტუათ?

⁶ ჩქი რეგულარულო ოკო შევამოწმათ ჩქინ აზროვნება დო გუვაკეთათ საჭირო ცვლილებეფ. პავლექ კორინთელეფს უწუ: „ირიათო ქიდეკვირით თქვან დუდის, ქოიღნან დო ვარ რწმენა; გეგმოცადით თქვან დუდ“ (2 კორ. 13:5). რწმენას ვორდათინ,  ნიშნენს უმოს მეტ ვაკეთათ, ვინემ კანკალეშა კრებაშ შეხვალამეფშა დასწრება დო მსახურებას მონაწილებაშ მეღება რე. თეშა ჩქინ ფიქრეფ, სურვილეფ დო მოტივეფ ხოლო მიშურს. ათეშენ საჭირო რე, ღორონთიშ სიტყვაშ კითხირით დიფთირუათ აზროვნება, გუვავითარათ თიცალ საკითხეფიშ მიმართ თიცალ დამოკიდებულება, მუნერით იეჰოვას უღჷ დო გუვაკეთათ ირფელ, ნამდა იფცხოვრათ ღორონთიშ ნებაშ შესაბამისო (1 კორ. 2:14—16).

7. მუჭოთ ეფესოელეფიშ 4:31, 32–ს ჭარჷ, ხოლო მუ ოკო ვაკეთათ დო მუშენ შილებე თექ გამჭირდან?

⁷ (წეკითხით ეფესოელეფიშ 4:31, 32). ჩქინ აზროვნებაშ თირუაწკუმა ართო საჭირო რე, „ქიმკიფქუნათ ახალ პიროვნება“ (ეფეს. 4:24). თეშ მიოჭირნაფალო ბრელ ოკო იფხანდათ. თე ირფელწკუმა ართო, მონდომა ოკო ვადვარკათ, ნამდა გივორჯგინათ თიცალ თვისებეფს, მუნერით რე ჟღამ, გურიშ მოულა დო რისხუა. მუშენ შილებე თექ გამჭირდან? მუშენდა ნამთინე უარყოფით თვისებას შილებე ტომბას აფდას ჩხვიჩხვ გოდგუმილ. მაგალთო, ბიბლიას ჭარჷ, ნამდა ნამთინე „ადვილო ირისხებ“ დო „ფიცხე რე“ (იგავ. 29:22). თეცალ თვისებეფიშ ჩათხინაფას ნათუაშ უკულ ხოლო მანგარ მონდომა ოსაჭირ. მორთ გუვარჩუათ თეშ ართ შემთხვევა.

8, 9. მუჭო ოძირანს სტეფანიშ შემთხვევა, ნამდა საჭირო რე ჩეფთხინუათ ჯვეშ პიროვნება?

⁸ ართ ჯიმას სტეფანს, უჭირდჷ რისხუაშ გაკონტროლება. თინა იჩიებ: «იბნათინ თიშ უკულ ხოლო მოსაჭირუდ ვემვოტეკო რისხუაშ კონტროლ. მაგალთო, ართშა მუჟამსით კარდოკარ მსახურებას ვორდჷ, გამვათხოზ ართ კოჩის, მიდგაქ ჩქიმ მანქანაშე რადიო იხირ. ქეკუოჭიშენ, რადიო ქუდაჸათ დო ინტჷ. მუჟამსით შხვეფს ვეჩი მუჭო დიფრთინე რადიო, ჩქინ ჯგუფშე ართ უხუცესიქ ბკითხჷ: „სტეფან, მუს ღოლანდ თი კოჩ ოიჭოფუდკონ?“. თე კითხვაქ დუმაფიქრჷ დო გინმოჭყვიდირაფუ, მონდომა ვადვარკკო, გინიფრთიკო მშვიდობაშ მოჸოროფეთ». b

⁹ სტეფანიშ შემთხვევაშე ჯგირო იძირე, ნამდა უარყოფით თვისებაქ, ნამდგას ჩქინ პიროვნებას ტომბას აფჷ ჩხვიჩხვ გოდგუმილ, შილებე ვეველუთინ თეშ ქირჩქინას დუდ დო თიმწკუმა ხოლო, მუჟამსით მიმორჩქუდეს, ნამდა ვაკონტროლენდით. თექ თქვა ხოლო ქუგაღოლეს-და, გურქ ვა გოიტირხან დო ვეფიქრათ, ნამდა გლახა ქრისტიან რეთ. მოციქულ პავლექ თეცალ მუდგარენ თქუ: „მოკო ვაკეთე, მუთ სწორ რე, მარა გლახა ვამოთხუ“ (რომ. 7:21—23). არძა ქრისტიან ობრძოლ უარყოფით თვისებეფს, ნამუთ ირიათო ირჩქინანს დუდის, თეშ მუჭოთ ტვერ დო წინდა რჩქინდუ ჸუდეს. ათეშენ, ირნერო ოკო ვოცადუდათ, ვორდათ სუფთეფ. მუჭო შემლებნა თეშ კეთება?

10. მუჭო შემლებნა ქივეწინააღმდეგათ უარყოფით თვისებეფს? ( იოან. 5:14, 15).

¹⁰ იეჰოვას ლოცვას მოხვარა ქოთხით, მუჟამსით გიჭირა ჩეთხინუათ უარყოფით თვისება დო რჯერდან, ნამდა თინა ქუმოირჩქილუანა დო ქიმგეხვარებნა (წეკითხით 1 იოანეშ 5:14, 15). მართალ რე, იეჰოვა სასწაულებრივო ვა ჩაითხინუანა უარყოფით თვისებას მარა შეულებ მერჩან ძალა, გიორჯგინათ თის (1 პეტ. 5:10). თეწკუმა ართო, იმოქმედით ლოცვეფიშ თანახმას დო ვაკეთათ თიცალ მუდგარენ, მუდგაქ შილებე ჯვეშ პიროვნებაშ თვისებეფ დოირთინუან. მაგალთო, ფრთხილას რდათ ფილმეფიშ დო სატელევიზიო პროგრამეფიშ ჯინაშ დროს ვარდა თიცალ ისტორიეფიშ კითხირიშ დროს, სოდეთ თი უარყოფით თვისება, ნამდგას თქვა ობრძოლუთ, შილებე დადებითო რდას ეჭარილ.  ვემეჩათ თქვან გონებას უფლება, გოირჩქინან არასწორ სურვილეფ (ფილ. 4:8; კოლ. 3:2).

11. მუშ კეთება რე საჭირო, ნამდა გინიფრთათ ახალ პიროვნებათ?

¹¹ მართალ რე, ჯვეშ პიროვნება დითირეთ მარა საჭირო რე, გევითარათ ახალ პიროვნება. მუჭო შეილებნა თეშ კეთება? მიზანო გიღდან, მიაჸუნათ იეჰოვაშ მაგალითის, მუჟამსით ირკვიენთ თიშ თვისებეფს (ეფეს. 5:1, 2). მაგალთო, მუჟამსით ბიბლიას კითხულენთ თიცალ მონაკვეთეფს, სოდეთ იძირე მუჭო აპატუ იეჰოვაქ შხვეფს, ქოკითხით თქვან დუდის: „მა ქუვაპატიენქო შხვეფს?“ ვარდა მუჟამსით ბკითხულენთ, მუჭო მეუღ იეჰოვას გურშა თინეფიშ გაჭირება, მით რთულ სიტუაციას რე, ქოკითხით თქვან დუდის: „გიმიფრჩქინანქო თე თვისებას თი თანაქრისტიანეფიშ მიმართ, მიდგას მატერიალურ ელარნა ოსაჭირ დო ქუვოძირანქო თეს ჩქიმ საქმეეფით?“. დითირეთ აზროვნება ახალ პიროვნებათ გინორთათ დო თე დროს გეგმირჩქინით მოთვინება თქვან დუდიშ მიმართ.

12. მუჭო გიმოცად სტეფანქ მუშ დუდშა ბიბლიაშ ძალა?

¹² ჟიშე მოშინაფილ სტეფანს შეიალებუ ჭიე-ჭიეთ დითირკო ახალ პიროვნებათ. თინა იჩიებ: „ნათუაშ უკულ შეფხვად მუსხირენ თიცალ სიტუაციას, სოდეთ შილებე ადვილო გევაჸუნკო რისხუას. დიბგურე, ნამდა ჩევეთხიკო თი ხალხის, მით ოცადდეს, მდგომარეობაშე გეგშამჸუნესკო, დო ირნერო ვეცადკო, სიტუაციაქ ვეგეუფრაშკო. მუჟამსით თეცალ სიტუაციეფს სიმშვიდეს გიმიფრჩქინანქ დო ვებრისხებუქ, ბრელ მოცქვანს, თინეფ შქას ჩქიმ ოსურ ხოლო. მინშა ჩქიმ დუდიშ მა ხოლო მიკვენს. მუშო ოკო რაგად, ახალ პიროვნებათ გინორთა ჩქიმ დამსახურება ვა რე! მა ბჯერს, ნამდა ბიბლიას უღჷ თიშ ძალა, დოთირუას ადამიანიშ შინაგან პიროვნება“.

13. მუ მიმეხვარებნა ვაკეთათ თინა, მუთ სწორ რე? (გალ. 5:16)

¹³ (წეკითხით გალატელეფიშ 5:16). იეჰოვა გურხვეთ მარზენა წმინდა შურს, ნამდა ვაკეთათ თინა, მუთ სწორ რე დო მიბგათ თე ბრძოლას. მუჟამსით ღორონთიშ სიტყვას იბრკვიენთ, წმინდა შურს ჩქინდა მოქმედებაშ საშვალებას ვარზენთ. თის კრებაშ შეხვალამეფშე ხოლო ბღებულენთ. თეცალ ქრისტიანულ შეხვალამეფს ურთიერთობა მიღნა თი და დო ჯიმალეფწკუმა, მით ჩქინცალო დუდის ვა ზოგენა აკეთან თინა, მუთ სწორ რე დო თენა გურშა ელამკინანა (ებრ. 10:24, 25; 13:7). მუჟამსით ალალას ბლოცულენთ დო იეჰოვას მოხვარას ფთხინთ გიმორჯგინაფუან ჩქინ სისუსტეეფშა, თინა წმინდა შურით გუმამანგარენა, ნამდა გუვაგრძელათ ბრძოლა. შილებე თე ირფელქ გლახა სურვილეფ ვა ჩამთხინუან, მარა მიმეხვარებნა, ქივეწინააღმდეგათ თინეფს დო ხეთეშე ქიმოფქმედათ. მუჭოთ გალატელეფიშ 5:16 იჩიებ, თინეფ, მით ღორონთიშ შურით გილულა ვეიაჸუნუნა „ხორციშ სურვილეფს“.

14. მუ მიმეხვარებნა ირო გუვავითარათ სწორიშ კეთებაშ სურვილ?

¹⁴ მუჟამსით სულიერ საქმეეფს მონაწილება ჩქინ ირდღაშიან ცხოვრებაშ ნაწილო გინირთუ, მნიშვნელოვან რე, გუვაგრძელათ თაშ მოქციება დო ვემვოტუათ სწორ სურვილეფიშ გავითარება, მუშენდა ჩქინ ნტერეფ ირიათო კურცხას რენა დო მობრძოლნა. თინეფ ირიათო ოცადნა, გუმოკეთებაფუან თინა, მუთ გლახა რე. ნათუაშ უკულ ხოლო შილებე თიცალ მუდგარენიშ კეთებაშ სურვილქ გომრჩქინდან, მუდგას სინამდვილეს დუდ ოკო ეუჩილითუათ. მაგალთო, მუნერით რე, აზარტულ ლაჸაფეფ, ბრელ შუმა ვარდა პორნოგრაფიაშ ჯინა (ეფეს. 5:3, 4). ართ ახალგაზრდა ჯიმა იჩიებ: „ართ, მუდგაშა გერჯგინა მანგარო მიჭირს თინა რე, ნამდა ჩქიმ სქესიშ  ადამიანეფ მობწონს. ფიფქრენდჷ, თენა დროშ მიკულაწკუმა ართო ჩემეთხიებუდ, მარა თე პრობლემა ასეშახ მაწუხენს“. მუ მიგეხვარებნა ქეწინააღმდეგათ არასწორ სურვილს, ნამუთ მანგარ ძალიერ რე?

15. მუშენ ელამკინანა გურშა თიშ რჩქინა, ნამდა არასწორ სურვილეფ ადამიანეფს ირო უღდეს? (ქოძირით სურათ).

¹⁵ მუჟამსით ობრძოლუთ არასწორ სურვილს, ნამუთ მანგარ ძალიერ რე, რშუდან, ხვალე ვა რეთ. ბიბლია იჩიებ: „ვა ნორღვენა ცდუნება ადამიანურიშ მეტ“ (1 კორ 10:13ა). შხვა თარგმანს თე მუხლ თეცალო რე მოჩამილ: „ვა ნორღვენა თიცალ ცდუნება, ნამუთ ადამიანშო უცხო რე“. პავლექ თე სიტყვეფ კორინთელ და დო ჯიმალეფს მეჭარ. თინეფშე ნამთინე ულირს მეძავ რდჷ, ნამთინე ჰომოსექსუალ დო ნამთინე შუმას გინოჸუნელ (1 კორ. 6:9—11). მუჭო ფიქრენთ, ნათუაშ უკულ დღას ვა ნოღვენანო თინეფს არასწორ სურვილეფ? მუშო ოკო რაგად, აღვენუდეს. მართალ რე, თინეფ ცხებულ ქრისტიანეფ რდეს მარა ოკო ვაგმოჭყორდან, ნამდა არასრულყოფილეფ რდეს. მუშო ოკო რაგად, კანკალეშა ობრძოლდეს არასწორ სურვილეფს. თეშ რჩქინა გურშა ელამკინანა. თენა ოძირანს, ნამდა მუდგა არასწორ სურვილს ვა ვობრძოლუდათინ, რენა თიცალეფ, მიდგაქ გიორჯგინეს თის. ნამდვილო, თქვა შეილებნა გიღდან თეშ ძალიერ რწმენა, მუშენდა გიჩქნა, ნამდა „თეცალ ოტანჯებელ თქვან ჯიმალეფს ხოლო უღნა ქვეყნიერებას“ (1 პეტ. 5:9).

16. მუ საფრთხეს ოკო ევუჩილითუათ დუდ დო მუშენ?

¹⁶ დღას ვეფიქრათ, ნამდა მითინს ვეშულებ ბოლოშა ქინანჭას თი სირთულეს, ნამდგას ობრძოლუთ. დუდ ეუჩილითეთ თე საფრთხეს. თეს შეულებ გოფიქრებაფუან, ნამდა თქვან სიტუაცია უიმენდო რე დო მუთუნიშ კეთება ვეშეილებნა, ნამდა ქეწინააღმდეგათ არასწორ სურვილეფს. მარა ბიბლია გვალო შხვა მუდგარენს იჩიებ. თექ ჭარჷ: „ღორონთ ართგურ რე დო ვა დუშვენს თიცალ ცდუნებას, ნამდგაშ გარზება ვეშქალებენა, დო გამოსავალს  ხოლო ქუგოძირანა, ნამდა ბოლოშა მითვინათ“ (1 კორ. 10:13ბ). ათეშენ, თიმწკუმა ხოლო, მუჟამსით არასწორ სურვილ ძალიერ რე, შემლებნა გივორჯგინათ თის. იეჰოვაშ მოხვარათ შემლებნა დუდ ევუჩილითუათ გლახაშ კეთებას.

17. თიშ უმკუჯინუო, ნამდა არასწორ სურვილეფშა დუდ ვემაჩილითენა, მუშ კეთება შემლებნა?

¹⁷ დღას ვაგგოჭყორდან, არასრულყოფილებაშ გურშენ დუდ ვემაჩილითენა არასწორ სურვილეფშა, მარა თეცალ სურვილეფ გომრჩქინდუნან, შემლებნა ხეთეშე ჩეფთხინუათ თინეფ, მუჭოთ თენა იოსებიქ აკეთ, მუჟამსით ფოტიფარიშ ოსურს ენტჷ (დაბ. 39:12). დღას ვეიაჸუნათ არასწორ სურვილეფს!

18, 19. მუ კითხვეფშე შემლებნა დეფიფქრათ, მუჟამსით ვოცადუთ აზროვნებაშ თირუას?

¹⁸ აზროვნებაშ თირუას ირიათო ოსაჭირ მონდომა. თეშა მიშურს, ნამდა ჩქინ ფიქრეფ დო საქმეეფ იეჰოვაშო მოსაწონ რდას. ირო შეამოწმით თქვან დუდ დო დეფიქრით: „ქუვოძირანქო ჩქიმ საქმეეფით, ნამდა მარჩქილე მუნერ მნიშვნელოვან დროს ფცხოვრენქ? ქიძირენო, ნამდა ახალ პიროვნებათ იფთირუქ? ქუვარზენქო იეჰოვაშ წმინდა შურს საშვალებას ქუხემძღვანელას ჩქიმ ცხოვრებას, ნამდა შემალებუას ვარია ფთქუე გევაჸუნე ხორციშ სურვილეფს?“.

¹⁹ თქვან დუდიშ გიმორკვიებაშ დროს, ყურადღება გეგნიღით თიშა მუდგას მიოჭირინეთ დო ველდათ, ნამდა ირფელ სრულყოფილო გიშქალენა. მუჟამსით ქოძირუნთ მუდგარენს გაუჯგუშება გოსაჭირნა, გურქ ვა გოიტირხან. თეშ მანგიორო, მიაჸუნით ფილიპელეფიშ 3:16-ის მოჩამილ რჩევას: „კინ გუვაგრძელათ მოწესრიგებულო ულა ართ მიმართულებათ თიშ უმკუჯინუო, მი მუსხით რე მოწიფულ“. მუჟამსით თაშ ქიმიქციებუთ, დარწმუნებულ რდათ, იეჰოვა აკურთხენს თქვან მონდომას, ნამდა გაგრძელათ აზროვნებაშ თირუა.