1, 2. მუშენ ვოსწრუთ ირწანას გოშინაშ ონჯუას?

 ᲡᲝᲓᲒᲐᲠᲔᲜ 2 000 წანაშ წოხოლე, იესო ქრისტექ მუშ სიცოცხლე გაწირ მთელ კაცობრიობაშო, მუდგათ მარადიულ სიცოცხლეშ შესაძლებლობა მუჩეს. ღურაშ წოხოლენ სერს, თიქ მუშ მოწაფეეფს დავალ, თე ჸოროფათ კეთებულ მსხვერპლ უბრალო რიტუალით აღნიშნესკო, სოდეთ გიმორნაფილ იჸუაფუდ ღვინ დო ქობალ (1 კორ. 11:23—26).

² ჩქი მეპჸუნთ იესოშ თე მითითებას, მუშენდა მანგარო მიჸორა თინა (იოან. 14:15). ირწანას, გოშინაშ ონჯუაშ პერიოდის, დროს გიმურთუნთ ფიქრის დო თიშე ლოცვას, მუთ იესოქ აკეთ მთელ კაცობრიობაშო დო თეშნერო გიმოფხანტუნთ მარდულობას. თეს გეძინელ, მონაწილებას ბღებულენთ მსახურებას დო მონდომას ვა ვარკენთ, ნამდა მუთ შილებე მეტ ადამიან დუვაპატიჟათ თე მნიშვნელოვან ღონისძიებაშა. დო მუთ არძაშ უმოს მთავარ რე, გინოჭყვიდილ მაფნა, მუთუნს ვემეფჩათ უფლება, მეცილან დევესწრათ თე ღონისძიებას.

3. მუს გუვარჩიენთ თე სტატიას?

³ თე სტატიას გუვარჩიენთ სუმ მხარეს მუთ ოძირანს, ნამდა იეჰოვაშ მოწმეეფ, მუთ შეულებნა ირფელს ორთნა, ნამდა აღნიშნან ქრისტეშ ღურაშ გოშინაშ ონჯუა: 1) თინეფ თეშ აღნიშნენა თე ღონისძიებას, მუჭოთ იესოქ დიჩინ, 2) შხვეფს ხოლო აპატიჟენა თე შეხვალამაშა, დო 3) ირფელს ორთნა, ნამდა სირთულეეფიშ უმკუჯინუო, დესწრან თის.

4. მუ მნიშვნელოვან კითხვეფს მიაჩამუ პასუხ ირწანას გოშინაშ ონჯუას დო მუშენ რე თე პასუხეფიშ რჩქინა ჩქინო მნიშვნელოვან? (ლუკ. 22:19, 20)

⁴ ირწანას გოშინაშ ონჯუას იფრჩქილუაფუთ ბიბლიაშა გერსხილ მოხსენებას, ნამუთ ბრელ საინტერესო კითხვას  არზენს პასუხის. ბგებულენთ, მუშენ ოსაჭირ კაცობრიობას გიშაჸიდირალ დო მუჭო შეულებ ართ კოჩიშ ღურას, მთელ კაცობრიობა დერსხას ცოდვაშე. თეს გეძინელ, თის ხოლო ბგებულენთ, მუშ სიმბოლო რე ქობალ დო ღვინ დო მის შეულებ თინეფიშ მეღება (წეკითხით ლუკაშ 22:19, 20). თე დროს ფიფქრენთ თი კურთხევეფშე ხოლო, ნამუთ ელნა თი ადამიანეფს, მიდგას დედამიწას მარადიულ ცხოვრებაშ იმენდ უღნა (ეს. 35:5, 6; 65:17, 21—23). ჩქი ოკო ვაფასენდათ თე ირფელს, მუშენდა მილიონობით კათას მუთუნ ვა უჩქჷ თე მნიშვნელოვან საკითხეფშენ დო ვარჩქილენა, მუსხით ძვირფას რე იესოშ კეთებულ მსხვერპლ. თინეფ ვაღნიშნენა ქრისტეშ ღურაშ გოშინაშ ონჯუას თეშ, მუჭოთ თენა იესოქ დიჩინ. მუშენ ხვადუ თაშ?

5. მუქ მოხვად თიშ უკულ, მუთ მოციქულეფშე უმენტაშიქ დოღურ?

⁵ თიშ უკულ, მუთ ქრისტეშ მოწაფეეფშე უმენტაშიქ დოღურ, ქრისტიანულ კრებას გემკორჩქინდეს თიცალეფქ, მიდგას ქრისტეშ მიმაჸუნალეფო მეუღდეს დუდ (მათ. 13:24—27, 37—39). თინეფ გინაკეთენდეს ქრისტეშ გურაფეფს, ნამდა შხვა მოწაფეეფ გეიჸუნუესკო (საქ. 20:29, 30). ართ-ართ ბიბლიურ გურაფა, ნამუთ თე ადამიანეფქ „გინაკეთეს“ თინა რდჷ, ნამდა იესოქ „ართშა შეწირ სიცოცხლე დო თეშნერო გიშეჸიდ ბრელიშ ცოდვეფ“ (ებრ. 9:27, 28). თე ითამ ქრისტიანეფ ამტკიცენდეს, ნამდა ართშა შეწირუა ვა რდჷ დასაბაღ დო იესოქ ბრელშა ოკო შეწირკო მუშ სიცოცხლე. სანარღოთ, ამდღა ხოლო ბრელ ალალ გურიშ კათას ჯერს თე ტყურაშ. თინეფ, მუნეფიშ ეკლესიას ირმარას, მინშა ირდღას ხოლო აკიშაყარნა, ნამდა დესწრან წირვას, ნამდგას კათოლიკურ ეკლესია „მესას“ უძახ. b შხვა ქრისტიანულ რელიგიეფს წირვა თეცალ ხშირას ვეტარებ, მარა მუჭოდგა ვა რდასინ, თე რელიგიეფიშ მიმაჸუნალეფიშ უმენტაშის ვარჩქილე, სინამდვილეს მუს ნიშნენს ქრისტეშ მსხვერპლ. ნამთინე შილებე ფიქრენდას: „მართალო მათავისფალენსო ქრისტეშ ღურა ცოდვეფშე?“. ხშირ შემთხვევას თე კითხვა თიშენ ურჩქინდუნა, ნამდა თინეფიშ აზროვნებაშა მოქმედენს თიცალ კათა, მიდგას ვა ჯერს, ნამდა ქრისტეშ მსხვერპლიქ შეიოლებერო გინაშქვჷ ცოდვეფიშ პატიება. მუ დამოკიდებულება უღნა ქრისტეშ მიმაჸუნალეფს თიშ კეთებულ მსხვერპლიშ მიმართ?

6. მუ დასკვნაშა მერთეს ბიბლიაშ მარკვიებელეფქ 1872 წანას?

⁶ მა-19 საუკუნეშ ბოლოს ბიბლიაშ მარკვიებელეფიშ ჯგუფიქ, ნამდგას ჩარლზ ტეიზ რასელ ხემძღვანელენდჷ, ქიდიჭყჷ წმინდა წერილეფიშ გურგედვალირ გიმორკვიება. თინეფს ოკოდეს, ქიგეგესკო, სინამდვილეს მუს ნიშნენდჷ ქრისტეშ გიშაჸიდირალ დო მუჭო აღნიშნესკო თიშ ღურა. 1872 წანას თინეფქ თი დასკვნაშა მერთეს, ნამდა ქრისტეშ გიშაჸიდირს მთელ კაცობრიობაშო მოუღ ჯგირობუა დო ოკოდეს, შხვეფს ხოლო ქუგაგებაფესკო თენა, მუდგას წიგნეფიშ, ჟურნალეფიშ დო გაზეთეფიშ საშვალებათ ორთუდეს. თეშ უკულ, პირველ საუკუნეშ ქრისტიანეფცალო, თინეფქ ხოლო ქიდიჭყეს წარმოწანაშე ართშა ქრისტეშ ღურაშ გოშინაშ ონჯუაშ აღნიშნება.

7. მუ ჯგირობუა მოუღ ჩქინდა თის, მუთ ბიბლიაშ მარკვიებელეფქ გიმირკვის?

⁷ ამდღა, წანეფიშ უკულ, ჩქინდა ხოლო მოუღ ჯგირობუა თი ირფელს, მუთ თე ჯგუფიქ გიმირკუ. იეჰოვაშ ჭყოლოფათ ქიგებგით, მუს ნიშნენს სინამდვილეს იესოშ მსხვერპლ დო მუ ჯგირობუას მომღანა თინა, მუჭოთ ჩქი, თეშ მთელ კაცობრიობას (1 იოან. 2:1, 2). თეს გეძინელ, ბიბლიაშე ქიგებგით, ნამდა იეჰოვაშ ართგურეფშო ჟირნერ იმენდ არსებენს: პირველ — უკვდავ სიცოცხლე ზეცას, ნამდგას ჭიჭე ჯგუფ მიღენს, დო მაჟია — მარადიულ სიცოცხლე  დედამიწას, ნამდგას მილიონობით ადამიან მიღენს. მუთ უმოსო ვორწყეთ, მუჭო ვუჸორთ ჩქინ ზეციერ მუმას დო მუ ჯგირობუა მოუღ პირადო ჩქინდა ქრისტეშ გიშაჸიდირალს, თით უმოსო ვავითარენთ იეჰოვაწკუმა ხოლოშიან ურთიერთობას (1 პეტ. 3:18; 1 იოან. 4:9). ულირს მახორუ ართგურ და დო ჯიმალეფცალო, ჩქი ხოლო ვაპატიჟენთ ხალხის, ნამდა ჩქინწკუმა ართო აღნიშნან გოშინაშ ონჯუა თეშ, მუჭოთ თენა ქრისტექ დიჩინ.

8. მუ აკეთეს იეჰოვაშ მოწმეეფქ, ნამდა შხვეფ გოშინაშ ონჯუაშა დაპატიჟესკო? (ქოძირით სურათ).

⁸ იეჰოვაშ მოწმეეფ წანეფ რე, მუთ ხალხის გოშინაშ ონჯუაშა აპატიჟენა. მაგალთო, 1881 წანას ამერიკას და დო ჯიმალეფს უწის, ნამდა ქალაქ ალეგანს (პენსილვანიას) ართო გეკიშაყარესკო ართ ჯიმაშ ჸუდეს თე განსაკუთრებულ ღონისძიებაშ აღნიშნებელო. უმოს გვიანო, არძა კრება მუშით ატარენდჷ გოშინაშ ონჯუას. 1940 წანაშ მარტის, მოწმეეფქ მიღეს მითითება, ნამდა შეულებდეს გოშინაშ ონჯუაშა დაპატიჟესკო არძა, მით ინტერესის გეგმირჩქინანდჷ. 1960 წანას კრებეფქ ბეთელშე პირველო მიღეს ბეშტელ მაწვიებელეფ. თიშ უკულ, იეჰოვაშ მოწმეეფქ მილიარდობით მაწვიებელ გავრცელეს. მუ რე თიშ მიზეზ, ნამდა მთელ მონდომათ ვაპატიჟენთ ხალხის თე განსაკუთრებულ ღონისძიებაშა?

9, 10. მიშო მოუღ ჯგირობუა გოშინაშ ონჯუაშა დაპატიჟებას? (იოან. 3:16)

⁹ ართ-ართ მიზეზ, მუდგაშ გურშენ შხვეფს გოშინაშ ონჯუაშა ვაპატიჟენთ თინა რე, ნამდა მოკონა თინეფქ, მით პირველო დესწრებნა თე ღონისძიებას ქიგეგან, მუ აკეთეს იეჰოვაქ დო იესოქ მთელ კაცობრიობაშო (წეკითხით იოანეშ 3:16). თეს  გეძინელ, იმენდ მიღნა, ნამდა გოშინაშ ონჯუას პირველო დესწრებნან თინეფს, მორჩქილაფირ დო ძირაფილ სურვილს გურჩქინანს, უმოს მეტ ქიგეგან იეჰოვაშ გურშენ დო გინირთან თიშ მსახურეფო. მარა თე შეხვალამას ჯგირობუა შხვეფშა ხოლო მოუღ.

¹⁰ შხვეფწკუმა ართო ქრისტეშ ღურაშ გოშინაშ ონჯუაშა მთელ გურით ვაპატიჟენთ არააქტიურეფს, ნამდა ქიგიშინან, მუჭო უჸორს თინეფ იეჰოვას. თე შეხვალამას თინეფიშ ძირაფა გურს ხიოლით ემიფშანა. გოშინაშ ონჯუა თე და დო ჯიმალეფს ქუგაშინანს, მუ ხიოლ უღდეს, მუჟამსით იეჰოვას ომსახურდეს. გუვარჩუათ მონიკაშ მაგალით. c თინა არააქტიურ რდჷ, მარა კოვიდ-19 პანდემიაშ დროს, ქიდიჭყჷ აქტიურო მსახურება. მონიკაშა მანგარო იმოქმედ 2021 წანაშ გოშინაშ ონჯუაშა დასწრებაქ. თინა იჩიებ: „თიმ წანაშ გოშინაშ ონჯუა, განსაკუთრებულ რდჷ ჩქიმო. 20 წანაშ უკულ პირველო იფქადაგ დო შხვეფ ხოლო დუვაპატიჟ თე მნიშვნელოვან ღონისძიებაშა. თე საქმეშ ოკეთებელო შურ დო გურ ვა დამრკებ, მუშენდა მანგარ მარდულ ვორექ იეჰოვა დო იესოშ თი ირფელშო, მუთ ჩქიმო აკეთეს“ (ფსალმ. 103:1—4). ვა უღჷ მნიშვნელობა, ხალხ მიღენს დო ვარ ჩქინ მოწვიებას, ჩქი იშენით მთელ გურით ვაგრძელენთ თეშ კეთებას, მუშენდა მიჩქნა, ნამდა იეჰოვა აფასენს ჩქინ მონდომას.

11. სოვრეშე იძირე, ნამდა იეჰოვა კურთხევას ვარკენს ჩქინ გიმორჩქინელ მონდომას? (ანგ. 2:7)

¹¹ არგამა რე, იეჰოვაქ აკურთხჷ ჩქინ მონდომა, დუვაპატიჟითკო ხალხ გოშინაშ ონჯუაშა. თიშ უმკუჯინუო, ნამდა 2021 წანას, კოვიდ-19 პანდემიაშ გურშენ შეზღუდვეფ რდჷ, გოშინაშ ონჯუას 21 367 603 პიროვნებაქ დესწრჷ. იეჰოვაშ მოწმეეფიშ ისტორიას თენა პირველ შემთხვევა რდჷ! თენა მთელ მსოფლიოს რენან თი იეჰოვაშ მოწმეეფიშ რაოდენობაშე დახე ჟირდოგვერდშა უმოს რე. მუშო ოკო რაგად, ჩქინ ღორონთშო მნიშვნელოვან ციფრეფ ვარინ, თითოულ ადამიან რე, მით თე შეხვალამას ოსწრჷ (ლუკ. 15:7; 1 ტიმ. 2:3, 4). დარწმუნებულეფ ვორეთ, ნამდა შხვეფიშ დაპატიჟებათ, ღორონთ მოხვარნა, ქიმვოგორუათ ალალ გურიშ კათას (წეკითხით ანგიაშ 2:7).

12. მუ სირთულეეფიშ გურშენ შილებე გამჭირდან გოშინაშ ონჯუაშ აღნიშნებაქ? (ქოძირით სურათ).

¹² იესოქ იწინასწარმეტყველ, ნამდა ბოლო დღალეფს შეფხვადუდით თიცალ სირთულეეფს, მუნერით რე: ოჯახშე წინააღმდეგობა, თხოზინ, ომეფ, ეპიდემიეფ დო ხოლო შხვა (მათ. 10:36; მარ. 13:9; ლუკ. 21:10, 11). თე სიტუაციეფიშ გურშენ მინშა რთულ რე, აბღნიშნათ ქრისტეშ ღურაშ გოშინაშ ონჯუა. მორთ ქობძირათ, იეჰოვაშ მოხვარათ, მუჭო გიორჯგინეს თე სირთულეეფს ჩქინ და დო ჯიმალეფქ.

13. მუჭო აკურთხჷ იეჰოვაქ არტემიშ გაბედულება დო გადაწყვეტილება, ნამდა აღნიშნუკო გოშინაშ ონჯუა ციხეს?

¹³ პატიმრობა. ჩქინ თანაქრისტიანეფ, მით რწმენაშ გურშენ ჭოფილ რენა, მუთ შეულებნა ირფელს ორთნა, ნამდა აღნიშნან ქრისტეშ ღურაშ გოშინაშ ონჯუა. ქიმიპჸონათ არტემიშ მაგალით. თინა 2020 წანას გოშინაშ ონჯუაშ პერიოდის ციხეს 17 კვადრატულ მეტრიან საკანს ხედჷ, სოდეთ თიწკუმა ართო 4–5 პატიმარ რდჷ. მართალ რე, თე ჯიმა ციხეს ხედჷ, მარა შეიალებუ, ქიშუკო სიმბოლოეფ გოშინაშ ონჯუაშო დო წეკითხკო მოხსენება. მარა არტემწკუმა ართო საკანს ხედესინ თინეფ, ირიათო სიგარეტის შუნდეს დო ბრელს იგორაფდეს. თიქ თე პატიმარეფს თხუ, ქეშულებდეს-და, ართ საათით მიოტუესკო სიგარეტიშ შუმა დო გორაფა. არტემს მანგარო გუკვირდჷ, პატიმარეფქ ქუდაჸუნესინ. თინა იშინანს: „თინეფს შეფთავაზ, ნამდა გოშინაშ ონჯუას  გურშენ უმოსის ქივეჩიებუდ“. მართალ რე, დუდშე შუროთ ვაკოდეს მორჩქილაფა, მარა არტემქ გოშინაშ ონჯუაშ აღნიშნება გათუნ, ქიანაშ კითხვა ქუდუსვეს.

14. კოვიდ-19 პანდემიაშ უმკუჯინუო, მუჭო აღნიშნეს იეჰოვაშ მოწმეეფქ გოშინაშ ონჯუა?

¹⁴ კოვიდ-19 პანდემია. მართალ რე, პანდემიაშ გურშენ იეჰოვაშ მოწმეეფს ვეშულებდეს გოშინაშ ონჯუას ფიზიკურო ართო აკოშაყარუა, მარა თეს ვა უცილებ თინეფშა, ნამდა აღნიშნესკო თე ღონისძიება. d მთელ მსოფლიოს კრებეფქ ვიდეო კონფერენციათ ჩატარეს თე შეხვალამა. ნამთინე ქიანას, სოდეთ ინტერნეტ ვა უღნა, გოშინაშ ონჯუაშ მოხსენებაქ რადიოთ დო ტელევიზიათ იჸუ გინოჩამილქ. თეს გეძინელ, ფილიალეფქ, სოდგარენ 500-შე მეტ ნინაშა ინაჭარეს მოხსენებეფ, ნამდა შორ ტერიტორიას მახორუ ხალხიქ ხოლო ქიმირჩქილუკო თინა. ხვალე თენა ვარინ, ჯიმალეფქ ირფელ გაკეთეს, ნამდა თე ჩანაწერეფ დანიშნულებაშ ადგილშა ქიმიღესკო.

15. მუ დიგურეთ სიუშ მაგალითშე?

¹⁵ ოჯახშე წინააღმდეგობა. ხოლო ართ სირთულე, ნამდგაქ შილებე გოშინაშ ონჯუაშა  დასწრებას მეცილან რე, წინააღმდეგობა ოჯახშე. გუვარჩუათ სიუშ მაგალით, ნამუთ ბიბლიას გურაფლენდჷ. 2021 წანას, გოშინაშ ონჯუაშ წოხოლენ დღას, სიუქ მუშ ბიბლიაშ მასწავლებერს უწუ, ნამდა ვეშიალებედ თე ღონისძიებაშა დასწრება, მუშენდა ოჯახიშ წევრეფ ოწინააღმდეგდეს. ჩქინ დაქ სიუს ლუკაშ 22:44 წუკითხჷ. უკულ ეუნწყჷ, ნამდა, მუჟამსით სირთულეეფს ფხვადუთ ოკო მივაჸუნათ იესოშ მაგალითის თით, ნამდა იბლოცათ დო ბოლოშა მივენდათ იეჰოვას. მაჟია დღას სიუქ სიმბოლოეფ მამზად დო ჩქინ ვებგვერდის გედვალირ სპეციალურ ოჭმარეშ თაყვანიშცემაშ პროგრამას ხოლო ქუჯინ. გოშინაშ ონჯუაშ დღას თიქ მუშ ოთახშა გამნორთჷ დო პროგრამას ტელეფონით ქუმურჩქილუ. უკულ მუშ ბიბლიაშ მასწავლებერს თეცალ სიტყვეფ მეჭარ: „გოღა მანგარო ელამკინ გურშა. ჩქიმ მხარეშე ირფელ გუვაკეთ, ნამდა დევესწრიკო თე შეხვალამას დო დანარჩენს იეჰოვაქ ქუმკაჯინ. ნინათ ვემაჭარე, მუნერ ბედნერ დო მარდულ ვორექ!“. მუჭო ფიქრენთ, თეცალ სიტუაციას ქორეთ-და, თქვა ვემგეხვარებნანო იეჰოვა?

16. მუშენ შემლებნა ბჯერდან, ნამდა იეჰოვა აკურთხენს ჩქინ მონდომას დევესწრათ გოშინაშ ონჯუას? (რომ. 8:31, 32)

¹⁶ იეჰოვა მანგარო აფასენს ჩქინ მონდომას, ნამდა ირნერო ვოცადუთ, აბღნიშნათ ქრისტეშ ღურაშ გოშინაშ ონჯუა. შემლებნა დარწმუნებულ ვორდათ, ნამდა მუჟამსით მარდულობას გეგმოფხანტუნთ თი ირფელიშ მიმართ, მუთ ღორონთიქ ჩქინო აკეთ, თინა კურთხევეფით ემოფშანა (წეკითხით რომაელეფიშ 8:31, 32). მორთ გინოჭყვიდილ მაფდან, დევესწრათ გოშინაშ ონჯუას თე წანას დო მუთ შემლებნან ირფელ გუვაკეთათ, ნამდა მონაწილება მიბღათ თი სულიერ ღონისძიებეფს, ნამუთ გოშინაშ ონჯუაშ პერიოდის იჸუაფ.