1, 2. მუშენ იჸუაფნა ღარიბეფ ირიათო თე ქიანას?

ამდღარ ეკონომიკურ სისტემა უდუნდებ დო უსამართო რე. ახალგაზრდეფს უჭირა სამუშაშ გორუა, ათეშენ ბრელ რისკშა მეურს დო მდიდარ ქიანაშა გინმურს ოცხოვრებშა. მარა თეცალ ქიანეფს ხოლო რე სიღარიბე. მსოფლიოს მდიდარეფ დო ღარიბეფ შქას განსხვავება უმოსო იძინანს. ბოლო მონაცემეფით, მდიდარეფიშ ართ პროცენტის მალას თისხი ქონება აღვენუ, მუსხით მთელ მსოფლიოშ მახორუშ 99 პროცენტის უღუ ამდღა. თე ციფრეფს შილებე ბოლოშა ვენდას კოჩიქ, მარა სინამდვილე რე, ნამდა მილიონეფ სიღარიბეს ცხოვრენს, მუჟამსით ნამთინეს თისხი ქონება უღნა, მუთ მთელ მუშ გამნარყის უბაღ. იესოს არჩქილედ თე ირფელ დო თქუ: „ღარიბეფ ირო რენა თქვანწკუმა“ (მარ. 14:7). მუშენ არსებენს თეცალ უსამართობა?

² იესოს არჩქილედ, ნამდა ამდღანერ ეკონომიკურ მდგომარეობა ვეთირუდ ღორონთიშ სამეფოშ მოულაშა. ბიბლია პოლიტიკას, რელიგიას დო კომერციულ სამყაროს „დიდვაჭარეფო“ მიშინუანს, ნამუთ სატანაშ ქიანაშ ნაწილ რე (გამოცხ. 18:3). მართალ რე, ღორონთიშ ხალხიქ პოლიტიკა დო ტყურა რელიგია ედომშამო ქიდიტუ, მარა თინეფს ბოლოშა ვეშიალებენა გეგშართან სატანაშ კომერციულ სამყაროშე.

3. მუ კითხვეფს გენიფხილენთ?

³ ქრისტიანეფქ, ჯგირ იჸუაფ, ქიგნვოჯინათ მუ აზრიშ ვორეთ ამდღარ კომერციულ სისტემაშე დო ჩქინ დუც ქოპკითხათ: მუჭო  შემლებნა მატერიალურ ქონებაშ გიმორნაფა თეშ ნამდა, ვოძირათ იეჰოვაშ რწმენა? მუჭო შემლებნა ვა ვორდათ გინოჸუნელ კომერციულ საქმეეფს? ნამ მაგალითეფშე იძირე, ნამდა ღორონთიშ ხალხი ბოლოშა ონდუ იეჰოვას დო გიმირჩქინანს თიშ რწმენას?

4, 5. ა) მუ სიტუაციას რდუ იესოშ მაგალითის მოშინაფილ მართველი? ბ) მუ რჩევა მეჩ იესოქ მუშ მიმაჸუნალეფს?

⁴ წეკითხით ლუკა 16:1—9. * უმართო მართველიშ მაგალით, ნამუთ იესოქ მიჸონუნ, ბრელ მუთუნშა მაფიქრენა. მუჟამსით თე მართველს ქონებაშ გაოხრება ქეკაბრალესინ, თიქ „ჭკვერულო“ მიქცუ დო გირჩქინ „მეგობრეფი“, მით ქიმეხვარებდეს დო ქელუდირთუდეს თის მართველობაშ მიდაღალაშ უკულ. * მუშო ოკო რაგად, იესოს თე მაგალითით თიშ ძირაფა ვაკოდ, მუშ მოციქულეფს უსამართო შარათ ეუჯუმუაფდესკო დუდი. იესო იჩიებ, ნამდა თაშ „თე ქიანაშ სქუალეფი“ იქციებნა. თე მაგალითშე მნიშვნელოვან გაკვეთილს ბგურაფლენთ.

⁵ იესოს უჩქუდ, ნამდა თი მართველცალო, ნამუთ რთულ სიტუაციას რდუ, მუშ მიმაჸუნალეფს ხოლო უსამართო ქიანას აჸიდეს ოცხოვრებელ. ათეშგურშენ უწუ თინეფს: „გირჩქინით მეგობრეფ უმართო ქონებათ, ნამდა, მუჟამსით თინა ძალას მიოდინუანსინ, თინეფქ [იეჰოვაქ დო იესოქ] სამუდამო ოკვირდეშა მეიღან“. მუს ბგურაფლენთ იესოშ თე სიტყვეფშე?

6. სოვრეშე მიჩქნა, ნამდა იეჰოვაშ განზრახვაშა ვემშეშ კომერციულ სისტემა?

⁶ მართალ რე, იესო ვეჩიებ, მუშენ გიოდ ქონებას „უმართო“, მარა ბიბლიაშე ჯგირო იძირე, იეჰოვაშ განზრახვა ვარდ კომერციულ სისტემა დო თინა, ნამდა ხალხიქ უსამართო შარათ შაყარუკო ქონება. თიქ ადამ დო ევას თიშე უმოს მეჩ, მუთ ოსაჭირდესინ (დაბ. 2:15, 16). უმოს გვიანო, მუჟამსით პირველ საუკუნეშ კრებაშ ცხებულეფშა წმინდა შურქ გეგნორთუნ, „თინეფშე ნამთინ ვეჩიებუდ მუნეფიშ ქონებაშე, ჩქიმ რენია; ირფელ საერთო უღდეს“ (საქ. 4:32). ესაიაქ იწინასწარმეტყველ თი დროშენ, მუჟამსით ირკოჩ სრულაშე გეგმირინუანდ დედამიწაშ მატერიალურ რესურსეფს (ეს. 25:6—9; 65:21, 22). მარა თე დროშ მოულაშახ, იესოშ მიმაჸუნალეფქ დუდი გეიჯუმესკო დო თეწკუმა ართო ღორონთიშ მოსაწონო ხოლო ქიმიქცისკო თიშენ, ამდღარ ქიანაშ უმართო ქონება ჭკვერულო ოკო გეგმირინუესკო.

7. მუ რჩევა რე მოჩამილ ლუკაშ 16:10—13?

⁷ წეკითხით ლუკა 16:10—13. * იესოშ მაგალითის მოშინაფილ მართველქ მუშ ჯგირობუაშო გირჩქინ მეგობრეფი. მარა იესოქ მუშ მიმაჸუნალეფს უწუ, ნამდა ეგოისტურ მიზნეფიშ უმშო გირჩქინესკო მეგობრეფ ზეცას.  თე მაგალითიშ უკულ მოჸუნაფილ მუხლეფშე იძირე, მუჭო რე დაკავშირებულ ღორონთიშ რწმენაწკუმა „უმართო ქონება“. იესოშ სიტყვეფშე რჩქუ, ნამდა შემლებნა მატერიალურ ქონებაშ გიმორნაფათ, ვოძირათ იეჰოვაშ რწმენა. მუჭო რე თენა შეიოლებერ?

8, 9. ქიმიჸონით მუსხირენ მაგალით, მუჭო ოძირანა და დო ჯიმალეფ რწმენას უმართო ქონებაშ გიმორნაფათ.

⁸ რწმენაშ გიმორჩქინაშ ართ-ართ საშვალება რე, მატერიალურო ქელუდირთათ მსოფლიო ქადაქებაშ საქმეს. თეთ ხეს შეუნწყუნთ მათეშ 24:14-ის ინოჭარილ იესოშ წინასწარმეტყველებაშ შესრულებას. მაგალთო, ინდოეთის ართ ჭიჭე ძღაბის ფარაშ ოშაყარალ ჭკუდ უღუდ, სოდეთ ხურდეფს ინაშაყარანდ. თინა ოლაჸაფინიეფს ხოლო ვა ჸიდულენდ. მუჟამსით თე ფარაშ ჭკუდიქ გეიფშუნ, თიქ თე ფარა ქადაქებაშ საქმეშო შეწირ. ართ ინდოელ ჯიმა, ნამუსით ქოქოსიშ პალმეფ უჩანსინ, მალაიალამაშ მათარგმნალეფიშ ოფისის ქოქოსის უჯღონანს. თენა ფარათ ალარნაშ მოტოლუა რე, მუშენდა თინეფს იშენით ოჸიდე აფნა ქოქოსი. საბერძნეთის ხოლო ჯიმალეფ შესაწირს ირიათო ორთნა დო ზეითუნიშ ზეთის, ჸვალს დო შხვა ოჭკომალს ოჯღონანა ბეთელიშ ოჯახშა. ნამდვილო, მატერიალურ ქონებაშ თეცალო გიმორნაფა ჭკვერულ რე.

⁹ შრილანკელ ჯიმაქ, ნამუთ ასე საზღვარგარეთის ცხოვრენსინ, მუშ ოზე-კარ დუთმ და დო ჯიმალეფს კრებეფიშ დო კონგრესეფიშ ოტარებელო; თეს გეძინელ თექ სრულ დროთ მსახურეფ ხოლო ცხოვრენა. ფაქტიურო თენა ფინანსურ შესაწირ რე, ნამუთ ღარიბო ცხოვრენან ფერ და დო ჯიმალეფშო ბრელს ნიშნენს. თი ქიანეფს, სოდეთ ქადაქებაშ საქმე თავისფალო ვეშულებნან, ჯიმალეფ მუნეფიშ ჸუდეეფს გიმირინუანა სამეფო დარბაზეფიშ მანგიორო. თენა საშვალებას არზენს ღარიბო ცხოვრენან ფერ პიონერეფს დო შხვეფს დესწრან კრებაშ შეხვალამეფს, მუშ გურშენით ქირა ვაფნა ოგაფალ.

10. მუ კურთხევეფს მიბღენთ, გურხვე ქიპჸით-და?

¹⁰ თე მაგალითეფშე იძირე, ნამდა ღორონთიშ ხალხი ჭიჭე საქმეს ხოლო რენა ართგურეფ, მუშენდა შხვეფიშ საჯგირობუოთ გიმირინუანა მატერიალურ ქონებას, მუსით სულიერ ქონებაშა ვემიართე (ლუკ. 16:10). მუს ფიქრენა იეჰოვაშ მეგობრეფ თეცალ შესაწირშე? თინეფს არჩქილენა, ნამდა გურხვე ქიჸუაფნან-და, „ნამდვილ“ ქონება ქაშინა (ლუკ. 16:11). ართ და ნამუთ, სამეფო საქმეშო შესაწირს ირიათო ორთუნ, მუშ კურთხევეფშე იჩიებ: „მუთ მეტის გიშეფშკვანქ ხეშენ, თით უმოსო გურხვე ვორექ. თენა მოხვარ უმოსო ვაპატუე შხვეფს, მუთვინე, მიბღე რჩევეფ დო ყურადღება ვემვაქცუე გურიშგოტახუას“. ბრელქ ქიმეხვად, ნამდა ხეგოფაჩილობა სულიერო ამდიდრენს კოც (ფსალმ. 112:5; იგავ. 22:9).

11. ა) მუჭო შემლებნა ჭკვერულო გიმიბრინუათ ქონება? ბ) მუჭო იფინანსებ ღორონთიშ ხალხიშ საქმე ამდღა? (ქოძირით სურათ მა-7 გვერდის).

¹¹ ჭკვერულო თიმწკუმა ხოლო იბქციებუთ, მუჟამსით მატერიალურ ქონებას გიმიბრინუანთ, ნამდა შხვეფს მსახურებას ქელუდირთათ. მიდგას ვეშულებ სრულ დროთ მსახურება ვარდა შხვა ქიანაშა გინულან, ხიოლით ოხვარ მატერიალურო შხვეფს, ნამდა უმოს მეტ აკეთან მსახურებას (იგავ. 19:17). ნებაყოფლობით შესაწირიშ ჭყოლოფუათ იბეშტუ ლიტერატურა დო ქადაქებაშ საქმე წიმი მეურს თიცალ ტერიტორიეფს, სოდეთ სიღარიბე რე, მარა ჭეშმარიტება ბრელს ოინტერეს. წანეფიშ  დინახალე თიცალ ქიანეფს, მუნერით რე კონგო, მადაგასკარი დო რუანდა, ჯიმალეფს ხშირას გიშაგორალ აფდეს, ოჯახშო ოჭკომალ იჸიდესკო დო ვარ ბიბლია, ნამუშ ოჸიდეთ ართ მარაშ ვარდა ართ თუთაშ ხელფას რე საჭირო. მარა ბრელ ჩქინ და დო ჯიმაშ შესაწირიშ ჭყოლოფუათ იეჰოვაშ ორგანიზაცია თარგმნუნს დო გიშმაშკვანს ბიბლიეფს, ნამუთ ხეშამალაფარ რე ოჯახიშ თითოულ წევრშო დო ბიბლიაშ მაგურაფალეფშო (წეკითხით 2 კორინთელები 8:13—15). * თაშ ნამდა, იეჰოვაშ მეგობრობა შეულებ არძას, მით შხვეფს ოხვარ დო მით ღებულენს თეცალ მოხვარას.

12. მუჭო ოძირუ აბრაამქ, ნამდა ღორონც ონდუდ?

¹² იეჰოვაწკუმა მეგობრობას თით ხოლო ვოძირანთ, მუჟამსით ვა ვორეთ გინოჸუნელ კომერციულ საქმეეფს დო ჩქინ მდგომარეობას „ნამდვილ“ ქონებაშ ოგორალო გიმიბრინუანთ. აბრაამქ, ნამუთ ბიბლიურ დროს ცხოვრენდუნ, რწმენა გეგმირჩქინ დო დემორჩილ ღორონც. თიქ ქიდიტუ ქონებათ ეფშა ქალაქ ური დო კარვეფს ცხოვრენდ, მუშენდა იეჰოვაწკუმა ოკოდ მეგობრობა (ებრ. 11:8—10). თინა ირიათო დარწმუნებულ რდუ, ნამდა ნამდვილ ქონება ღორონთშე მიშ დო მატერიალურ ქონებაშ შაყარუას ვემეთხოზუდ. თეცალ საქციელ ვეჸიდ ღორონთიშ ნდობაშ მაძირაფალ (დაბ. 14:22, 23). იესო არძას ელუჩანდ, უღდესკო თეცალ რწმენა. თიქ ართ ახალგაზრდა ქონებიერ კოც უწუ: „ქუგოკო სრულყოფილქ ქიჸუე-და, მეუ, გეგმოჩ სქან ქონება, ღარიბეფს დურიგ დო გაღვენუ ქონება ზეცას; უკულ ქუმორთ დო ქეკმაჸუნ“ (მათ. 19:21). თე ახალგაზრდას აბრაამცალ რწმენა ვა უღუდ, მარა რდეს თიცალეფ, მიდგაქ ქაძირეს, ნამდა ბოლოშა ონდუდეს ღორონც.

13. ა) მუ გაფრთხილება მეჩ პავლექ ტიმოთეს? ბ) მუჭო შემლებნა პავლეშ რჩევაშ გიმორნაფა ამდღა?

¹³ ტიმოთე რწმენაშ ჯგირ მაგალითის ირზენს. თიშ უკულ, მუთ პავლექ ტიმოთე „იესოშ ღირსუან მეომარო“ მიშინუნ, თქუ: „ნამთინ მეომარ ვა რე გინოჸუნელ ირდღაშიან სავაჭრო საქმეეფს, ნამდა თიშ მოწონა დემსახურას, მიდგაქ მეომარეფიშ რიგეფშა მიღ“ (2 ტიმ. 2:3, 4). იესოშ მიმაჸუნალეფ შკას რე ართ მილიონშე მეტ სრულ დროთ მსახურ, მით ირნერო ოცად გეგმირინუას პავლეშ რჩევა. თინეფ თე ჰარამ ქიანაშ გავლენას ოწინააღმდეგნა დო შუნა ბიბლიას მოჩამილ პრინციპი: „მოვალე მევალეშ მოინალე რე“ (იგავ. 22:7). სატანას ოკო კომერციულ სისტემაშ მონეფო გინიფრთათ დო მთელ ჩქინ დრო დო ენერგია თის ქიმკვალიათ. ჩქინ გინნაჭყვიდირა ნამთინე საქმეშ გურშენ შილებე წანეფით ვეგშმართინან ვალეფშე. დიდ სესხიშ ეჭოფუაქ ჸუდეშ ოჸიდეთ, ოგურაფალო ვარდა განსაკუთრებულ ქორწილიშ ოკეთებელო შილებე ფინანსურ პრობლემეფ ქუმომღან. ათეშენ ჭკვერულ იჸი, უბრალოთ იბცხოვრათ დო მოზოგებულო ვახარჯათ; თენა საშვალებას მუჩანა ვორდათ ღორონთიშ დო ვართ ხოლო ამდღარ კომერციულ სამყაროშ მონეფი (1 ტიმ. 6:10).

14. მუ ოკო მაფდან გინოჭყვიდილ? ქიმიჸონით მაგალითეფი.

¹⁴ უბრალოთ ქიბცხოვრათინ, ოკო დუვადგინათ, მუს გივორნუანთ ჩქინ ცხოვრებას პირველ ადგილს. ართ წყვილს დიდ ბიზნეს უღუდ. მარა თინეფს სრულ დროთ მსახურებაშ დოჭყაფა ოკოდეს, ათეშენ გეგმოჩეს მუნეფიშ ბიზნეს, ნავი დო შხვა მატერიალურ ნივთეფი. თინეფქ უორიკის (ნიუ იორკი) მთავარ სამმართველოშ აშენებას მიღეს მონაწილება. თე წყვილშო არძაშ უმოს კურთხევა თინა რდუ, ნამდა მუნეფიშ ოსურსქუა დო სინჯაწკუმა ართო მსახურენდეს ბეთელს. თეს გეძინელ, მუსხირენ მარათ უორიკიშ პროექტის თე ჯიმაშ მშობლეფი ხოლო მსახურენდეს. ართ პიონერ და, ნამუთ კოლორადოს (აშშ) ცხოვრენსინ, გვერდ სამუშა დღას მუშენდ ბანკის. თიშ მუშობა მანგარო მოწონდეს, ათეშენ ქოთხუეს  მთლიან დღას ქუმუშებუდკო დო სუმმაგო ქუმუძინანდეს ხელფასის. მარა თეცალ სამუშა ხეს შეუშალენდ მსახურებას, ათეშენ ვარია ქოთქუ. თენა ხვალე მუსხირენ მაგალით რე თი და დო ჯიმალეფიშ, მით პირველ ადგილს გიორინუანს იეჰოვაშ მსახურებას. სამეფოშ საქმეშ პირველ ადგილს გერნაფა ოძირანს, ნამდა ვაფასენთ ღორონთწკუმა მეგობრობას დო სულიერ ქონებას, ვინემ თის მუთ ამდღარ კომერციულ სამყაროშე შილებე იფშუათ.

15. მუნერ ქონებას მოუღ დიდ კმაყოფილება?

¹⁵ მატერიალურ ქონება იშენდოიშენ ვა ნიშნენს თის, ნამდა ღორონთშე ვორეთ კურთხეულ. იეჰოვა თინეფს აკურთხენს, მით „ჯგირ საქმეეფით“ რე ქონებიერ (წეკითხით 1 ტიმოთე 6:17—19). * მაგალთო, ართ იტალიელ და ლუჩიაქ, * ქიგეგ, ნამდა ალბანეთის მაქადაქებელეფიშ საჭიროება რდუ. მართალ რე, თის სამუშა ვა უღუდ, მარა ბოლოშა ქიმიენდ იეჰოვას დო 1993 წანას თექ გინილ ოქადაქებშა. თიქ ქიდიგურუ ალბანურ ნინა დო სოდგარენ 60 კოჩის მეხვარ, დუდ მეუძღვინესკო ღორონც დო დინათესკო. მართალ რე, არძას ვა უღუ თეცალ ჯგირ შედეგეფ, მარა ირფელ მუდგას ვორთუთინ, ოხვარ ხალხის დოგორან დო ქუდოსკიდან სიცოცხლეშ შარას. თეს მარადიულო დუვაფასენთ მუჭოთ ჩქინ, თეშ შხვეფ ხოლო (მათ. 6:20).

16. ა) მუ ელუ ამდღარ კომერციულ სისიტემას? ბ) მუ მიმეხვარებნა, სწორ თოლწონუა მიღდან მატერიალურ ნივთეფშენ?

¹⁶ იესოქ თქუ: „მუჟამსით თინა [უმართო ქონება] ძალას მიოდინუანს“, დო ვართ ხოლო ძალაქ მეუდინ-და (ლუკ. 16:9). ბოლო პერიოდის ბრელ ქიანას ბანკეფქ გეკოტრ დო ეკონომიკურ პრობლემეფ რე, მარა თე ირფელ მუთუნ ვა რე თიშ გინაწონს, მუდგაქ მალას მთელ მსოფლიოს ოკო მოხვადას. პოლიტიკა, რელიგია დო კომერცია, ნამუთ სატანაშ სისტემაშ ნაწილ რენ, აკოცენს. მუჭოთ ეზეკიელქ დო სოფონიაქ იწინასწარმეტყველესინ, ოქროს დო ვარჩხილს, ნამუთ საუკუნეეფ რე კომერციულ სისტემას ფასენსინ, მალას ფასი მეუდინუ (ეზეკ. 7:19; სოფ. 1:18). მუჭო იგინანდით დუც ხანშა მიშელენდით დო ქიმეხვადუდით, ნამდა ქვეყნიერებაშ „უმართო ქონება“ შეწირით ნამდვილ ქონება? შილებე დუდ თი კოჩცალო იგინათ, ნამუთ მთელ ცხოვრებას მუშენდ ბრელ ფარაშ ოშაყარალო, მარა ბოლოს ქიგეგ ნამდა ყალბ რდუ (იგავ. 18:11). ნამდვილო, თეცალ ქონება საბოლათ იშენით გენადგურებ, ათეშენ ირფელ გუვაკეთათ, ნამდა „გიფრჩქინათ მეგობრეფ“ ზეცას. იფხანდათ ღორონთიშ სამეფოშ საქმეშ წიმი ოულარო დო თეგვარო სულიერ ქონებას დობშაყარანთ.

17, 18. მუ ელუ ღორონთიშ მეგობრეფს მომავალს?

¹⁷ ღორონთიშ სამეფო ქუმურსინ, გეფთავისუფლებუთ ქირაშე დო სესხშე, ოჭკუმალ უფასო დო არძაშ დასაბაღ იჸუაფ; წამალ დო ექიმ დღას ვედმესაჭირებნა. იეჰოვაშ მიწიერ ოჯახიშ წევრეფ ბოლოშა ქიგებგენთ დედამიწას ცხოვრებაშ გემოს. ოქროს, ვარჩხილს დო ძვირფას ქუალეფს გასკვამებელო გეგმიბრინუანთ დო ვართ ხოლო ქონებაშ ოშაყარალო. ჯგირ ხარისხიშ ჯაშ მასალა, ქუალეფ დო მეტალეფ უფასოთ იჸი ხეშა მალაფარ ჸუდეეფიშ ოშენებელო. ჩქინ მეგობრეფ ხიოლით მოხვარდან იჸი დო ვართ ფარაშ გურშენ. ახალ ქიანას არძას შეიალებედას იჸი დედამიწაშ რესურსეფიშ გიმორნაფა.

¹⁸ თენა ფას ვეგიდვინენ ფერ ჯილდოშ ნაწილ რე თინეფშო, მიდგას მეგობრეფ ზეცას ჸუნს. იეჰოვაშ მსახურეფიშ ხიოლს საზღვარ ვაღვენუ, მუჟამსით ქიგეგონენა იესოშ სიტყვეფს: „ქუმორთით ჩქიმ მუმაშე ხვამილეფ, დეკვირდით ქიანაშ გოჭყაფაშე თქვანო გახაზირებულ სამეფო“ (მათ. 25:34).