ნამთინე ქრისტიან თანამედროვე ტექნოლოგიეფს ირინუანს, ნამდა ურთიერთობა უღდას ოჯახიშ წევრეფ დო თანაქრისტიანეფწკუმა. მუშო ოკო რაგად, მოწიფულ ქრისტიანს ირიათო შჷ რჩევა: „წიმი იჯინენ ფერ ორწყე საფრთხეს დო იტყობუ, მარა გამოუცდელ პირდაპირ მეურს დო სასჯელს გიტახანს დუდშა“ (იგავ. 27:12).

ჩქი ვაფასენთ თის, ნამდა იეჰოვა ფთხილანა. ათეშენ ურთიერთობა ვა მიღნა თინეფწკუმა, მიდგას კრებაშა არეულობა მიშუღ, გარიცხულ რე ვარდა არასწორ გურაფეფს ავრცელენს (რომ. 16:17; 1 კორ. 5:11; 2 იოან. 10, 11). ნამთინე, მიდგას კრებაწკუმა უღჷ ურთიერთობა, შილებე ვა ცხოვრენდას ბიბლიურ ნორმეფით (2 ტიმ. 2:20, 21). მეგობრეფიშ გიშაგორუაშ დროს თე ირფელს ყურადღება ოკო მივაქცუათ. მარა თენა შილებე ადვილ ვა რდას თი ელექტრონულ აპლიკაციეფიშ გიმორნაფაშ დროს, ნამდგათ შეტყობინებეფს ვოჯღონანთ.

სიფრთხილე განსაკუთრებულო მნიშვნელოვან რე, მუჟამსით საქმე ოხუ დიდ ჯგუფეფს გაწევრიანებას. ნამთინე ქრისტიანქ, მით თეცალ ჯგუფის რდუ გაწევრიანებულ, გლახა შედეგეფ მიღჷ. მუჭო შეულებ დას ვარდა ჯიმას გეგმირჩქინას სიფრთხილე, მუჟამსით ჯგუფის ოშობით ვარდა ანთასობით ადამიან რე გაწევრიანებულ? შეიოლებერ ვა რე არძას იფჩინენდათ დო მიჩქუდან თინეფიშ სულიერ მდგომარეობა. ფსალმუნიშ 26:4 იჩიებ: „მეტყურე ხალხწკუმა საქმეს ვებკინენქ დო დუდის ვურიდანქ თიცალ კათას, მით ფულუნს, სინამდვილეს, მუნერ რე“. უმოს ჭკვერულ ვეჸინო, თეცალ აპლიკაციეფ ხვალე თიცალ ხალხწკუმა ურთიერთობაშო გიმიბრინუათ, მიდგას პირადო იფჩინენთ?

მარა თიმწკუმა ხოლო, მუჟამსით ჯგუფის ბრელ ხალხ ვა რე, ქრისტიანქ იშენით ოკო დეფიქრას, მუზმა დროს უთმენს თის დო მუშ გურშენ მეურს თე ჯგუფეფს ჩიება. ვა უღჷ მნიშვნელობა მუ საკითხშე მეურს ჯგუფის ჩიება ვარდა მუსხი დრო დესაჭირებ პასუხიშ მეჩამას, ვალდებულო ოკო ვემიფრჩქინათ ჩქინ დუდ, ნამდა ვუპასუხათ არძა შეტყობინებას, ნამდგას ბღებულენთ. პავლექ უწუ ტიმოთეს, მუთხილუკო ჭორიკანეფს დო თიცალეფს, მით შხვაშ საქმეშა მიშეშეს (1 ტიმ. 5:13). ამდღა შილებე თეცალ მუდგარენ ელექტრონულო ხოლო ხვადუდას.

მოწიფულ ქრისტიან თანამორწმუნეეფიშ გურშენ კრიტიკულ კომენტარეფს ვარდა კონფიდენციალურ ინფორმაციას ვართ ავრცელენს დო ვართ ირჩქილუანს (ფსალმ. 15:3; იგავ. 20:19). თინა სენსაციურ ვარდა დაუდასტურებელ ინფორმაციაშ მორჩქილაფას დო გავრცელებას დუდის ეუჩილითუანს (ეფეს. 4:25). ჩქინ ვებგვერდშე jw.org დო JW მაუწყებლობაშ^® ირ თუთიან პროგრამეფშე ხვეიანო ბღებულენთ სულიერ საზრდოს დო სანდო ახალ ამბეეფს.

ნამთინე იეჰოვაშ მოწმე ელექტრონულ შეტყობინებეფს ირინუანს მუდგარენიშ გიმაჩამალო, ოჸიდეთ, რეკლამაშ ოკეთებელო დო შხვეფიშ დასაქმებელო. თენა კომერციულ საქმიანობა რე დო ვართ თეოკრატიულ. ქრისტიან, ნამდგას ოკო, იცხოვრას „ფარაშ ჸოროფაშ უმშო“, დღას ვეცადებ საჯიმალო კომერციულ მიზნეფშო გიმირინუას (ებრ. 13:5).

მარა მუშ რაგად შემლებნა თეცალ აპლიკაციეფიშ სტიქიურ უბედრობათ დაზარალებურ ვარდა უჭირსინ ფერ თანამორწმუნეეფიშ მახვარებელო გიმორნაფაშენ? ჩქი ჸოროფათ გიმიფრჩქინანთ ინტერესის, ნამდა ქიმვეხვარათ დო გურშა ელუკინათ ართიანს (იაკ. 2:15, 16). მარა თეშ კეთებას შეტყობინებეფიშ დიდ ჯგუფიშ საშვალებათ ქივეცადით-და, შილებე ვეცილათ ადგილობრივ ფილიალს ვარდა კრებას, უჯგუშო ქიმეხვარას თინეფს (1 ტიმ. 5:3, 4, 9, 10, 16). მუშო ოკო რაგად, ჩქი ვა მოკონა, შხვეფს ვოფიქრებაფუათ, ნამდა განსაკუთრებულ დავალება მიღნა, ღორონთიშ შხურშა მიკაჯინალო.

ჩქი თიშ კეთება მოკონა, მუთ ღორონთის მოუღანს დიდებას (1 კორ. 10:31). ათეშენ, მუჟამსით გინოჭყვიდუნთ თეცალ აპლიკაციეფიშ ვარდა შხვა ტექნოლოგიაშ გიმორნაფას, დეფიქრით, მუ საფრთხეეფქ შილებე თეს მაჸუნას დო რდათ კურცხას.