1. მუშენ თხუ იესოქ იეჰოვას, ნამდა დოთხილუკო მუშ მოწაფეეფ?

ღურაშ წოხოლენ სერს იესო ფიქრენდჷ თი განსაცდელეფშე, მუდგას მოწაფეეფ შეხვადუდეს. მეგობრეფ უჸორდუნ თიშენ, თიქ მუშ მუმას თხუ, დოთხილუკო თინეფ უბადოშე (იოან. 17:14, 15). იესოს უჩქუდ, ნამდა ზეცაშა დორთაშ უკულ სატანა ეშმაკ გაგრძელენდჷ თინეფიშ წინააღმდეგ ბრძოლას, მიდგას ოკოდ იეჰოვას ემსახურკო. არგამა რე, იეჰოვაშ ხალხის დესაჭირებუდ თხილუა.

2. მუშენ შემლებნა ვორდათ დარწმუნებულ, ნამდა იეჰოვა ქუპასუხენს ჩქინ ლოცვეფს?

² იეჰოვაქ ქუპასუხ იესოშ ლოცვას, მუშენდა უჸორს მუშ სქუა. იეჰოვაშ გურიშ გახარებას ირნერო ქივეცადებუთ-და, თინა ჩქი ხოლო ქომიჸოროფუანა დო ქუპასუხენს ჩქინ ლოცვეფს, მუჟამსით ფთხინთ, ქიმმეხვარან დო დოფთხილუან. მუჭოთ ჯგირ ოჯახიშ დუდ, იეჰოვა გაგრძელენს მუშ სქუალეფშა ჸოროფათ ზრუნვას. თაშ ვაკეთ-და, თენა მუშ სახელ დო რეპუტაციაშე გლახათ იმოქმედენს!

3. მუშენ მოსაჭირნა ამდღა იეჰოვაშე თხილუა?

³ ჩქი არძაშ უმოსო ამდღა მოსაჭირნა იეჰოვაშე თხილუა. სატანაქ გითოჸოთამილქ იჸუ ზეცაშე „მანგარ გაჟღამებულქ“ (გამოცხ. 12:12). თიქ ნამთინე, მით ჩქი ფთხოზუნა, დარწმუნ, ნამდა თეშნერო „ღორონთის ომსახურნა“ (იოან. 16:2). შხვეფ, მიდგას ვა წანა ღორონთიშ, თიშენ ფთხოზნა, ნამდა ჩქი ქვეყნიერებაშე განსხვავებულ ვორეთ. მიზეზ მუდგა ვა რდასინ, შემლებნა თამამას ვორდათ, მუშენდა ღორონთიშ სიტყვა მირაგადნა: „ართგურ რე უფალ, თინა გუგამანგარენა დო დორთხილანა უბადოშე“ (2 თეს. 3:3). მუჭო ფთხილანა იეჰოვა? მორთ გუვარჩუათ ჟირ მხარე.

4. მუჭოთ ეფესოელეფიშ 6:13—17-ის ჭარჷ, მუ აკეთ იეჰოვაქ ჩქინ ოთხილარო?

⁴ იეჰოვაქ იზრუნ, მიღდან საჭურველ, ნამუთ ფთხილანა სატანაშ შემოტევეფშე (წეკითხით ეფესოელეფიშ 6:13—17). თე სულიერ საჭურველ ძალიერ დო ეფექტურ რე! მარა თინა ხვალე თი შემთხვევას დოფთხილანა, მუჟამსით თიშ თითოულ ნაწილ მაღვენუნა დო ვა ჩეფთხინუანთ. მუს განასახიერენს თე ნაწილეფ? მორთ, უმოს უჯგუშო ქიგებგათ.

5. მუ რე ჭეშმარიტებაშ ორტყაფ დო მუშენ ოკო იბკეთათ თინა?

⁵ ჭეშმარიტებაშ ორტყაფ განასახიერენს ღორონთიშ სიტყვას, ბიბლიას, მოჩამილ ჭეშმარიტებას. მუშენ ოკო მიკეთდან თე ორტყაფ? მუშენდა სატანა „ტყურაშ მუმა რე“ (იოან. 8:44). თის ღორებაშ ანთასობით წანაშ გამოცდილება უღჷ დო შეცდომაშა აფჷ მიშაჸუნაფილ მთელ მსოფლიო (გამოცხ. 12:9). მარა ბიბლიას მოჩამილ ჭეშმარიტება მიცვენა, ნამდა ვა დებღორათ. მუჭო ოკო იბკეთათ თე სიმბოლურ ორტყაფ? ჩქი თის იბკეთენთ, მუჟამსით ბგურაფლენთ ჭეშმარიტებას იეჰოვაშ გურშენ, თაყვანს ფცენთ თის „შურით დო ჭეშმარიტებათ“ დო ირნერ საქმეს პატიოსნურო იფქციებუთ (იოან. 4:24; ეფეს. 4:25; ებრ. 13:18).

6. მუ რე სიმართლეშ ჯავშან დო მუშენ ოკო მიკმოქუნდან თინა?

⁶ სიმართლეშ ჯავშან განასახიერენს იეჰოვაშ სამართლიან ნორმეფს. მუშენ ოკო მიკმოქუნდან თინა? მუჭოთ ჯავშან თხილანს ჯარიშკოჩიშ გურს ნჭყოლუაშე, თეშ სიმართლეშ ჯავშან თხილანს ჩქინ სიმბოლურ გურს — შინაგან პიროვნებას ქვეყნიერებაშ გლახა გავლენაშე (იგავ. 4:23). იეჰოვა ჩქინდე ელჷ, ნამდა მთელ გურით მიჸორდან იჸი დო ვემსახურებუთ (მათ. 22:36, 37). ათეშენ სატანა ოცად, ქომიჸოროფუან თი მუდგარენეფ, მუდგას ქვეყნიერება ფთავაზენა დო მუთ იეჰოვას ჯოგჷ დო თეშნერო გორთას ჩქინ გურ (იაკ. 4:4; 1 იოან. 2:15, 16). თექ ვეგშურთ-და, თინა ეცადებ, ჩქინ შქურნაფათ იეჰოვაშ ნორმეფიშ წინააღმდეგ მიდამიჸონან.

7. მუჭო ოკო მიკიფქუნათ სიმართლეშ ჯავშან?

⁷ სიმართლეშ ჯავშან მიკმოქუნა, მუჟამსით მეპჸუნთ იეჰოვაშ ნორმეფს სწორ დო არასწორიშ გურშენ დო ფცხოვრენთ თე ნორმეფით (ფსალმ. 97:10). ნამთინე შილებე ფიქრენდას, ნამდა იეჰოვაშ ნორმეფ შემზღუდველ რე. მარა ღორონთიშ პრინციპეფიშ ცხოვრებას გიმორნაფას ქიმვოტენთ-და, თი ჯარიშკოჩცალ იპჸით, მიდგაქ შქა ომს გამკინწყჷ ჯავშან, მუშენდა ფიქრენდჷ, ნამდა მანგარ მონკა რდუ. მუნერ არაგონივრულ საქციელ იჸუაფუდ თენა! იეჰოვა უჸორსინ თინეფშო თიშ მითითებეფ „დუმამონკებელ“ ვარინ, გინმასქილიდაფარ რე (1 იოან. 5:3).

8. მუს ნიშნენს, ვორდათ მშვიდობაშ გურშენ სახიოლო ამბეშ გაცხადებელო კუჩხშა მოდვალირ?

⁸ თეს გეძინელ, პავლე ელამჩანა, ვორდათ მშვიდობაშ გურშენ სახიოლო ამბეშ გაცხადებელო კუჩხშა მოდვალირ. შხვა სიტყვეფით ქოფთქუათინ, ირო მზათ ოკო ვორდათ სამეფოშ გურშენ სახიოლო ამბეშ ოქადაგებელო. მუჟამსით ბიბლიურ ცნობას შხვეფს გინოფჩანთ, ჩქინ რწმენა ხოლო იმანგარებ. დასურო გურიშემაკინალ რე თიშ ძირაფა, მუჭო ოცად იეჰოვაშ ხალხ მთელ მსოფლიოს, დოგორას საშვალებეფ სახიოლო ამბეშ გაცხადებელო სამუშას, სკოლას, საქმიან ტერიტორიას დო კარდოკარ მსახურებაშ დროს, ჸიდირიშ დროს, მუჟამსით ურწმუნო ნათესეეფს აკითხანა, ნაჩინებუეფწკუმა რაგადანა, დო თიმწკუმა ხოლო, მუჟამსით ჸუდეშე ვაგმართინენა. მაშქურნენა დო ქადაგებას ქიმვოტენთ-და, თი ჯარიშკოჩცალ იპჸით, მით მადვალარს ომიშ დროს მინწყუნს; თინა ადვილო იწყუნუანდჷ კუჩხეფს. შედეგო, ნაკლებო იჸუაფუდ თხილერ ნტერშე დო ვეშიალებედ მუშ მეთაურიშ ბრძანებეფიშ მეჸუნა.

9. მუშენ ოკო მიკინებდან რწმენაშ დიდ ფარ?

 ⁹ რწმენაშ დიდ ფარ განასახიერენს რწმენას, ნამუთ იეჰოვაშ მიმართ მიღნა. ჩქი ბჯერა, ნამდა თინა მუშ არძა დუნაპირებუს შეასრულენს დო თე რწმენაშ ჭყოლოფათ შემალებენა „უბადოშ დაჩხირმონტებულ ისარეფიშ ეჩილითაფა“. მუშენ ოკო მიკინებდან თე დიდ ფარ? მუშენდა თენა ფთხილანა, ნამდა განდგომილეფიშ გურაფაქ დო შხვეფიშ გოძიცაქ ჩქინდა გლახათ ვემოქმედას. რწმენაშ უმშო ვეშმალებენა ქივეწინააღმდეგათ თინეფს, მით ოცადნა, იეჰოვაშ ნორმეფს გეგნურთათ. თეშ გინაწონს, მიკინებნა ფარ, მუჟამსით ჩქინ რწმენას მტკიცაშო გივორეთ სამუშას ვარდა სკოლას დო მუჟამსით ვარიას იფჩიებუთ უჯგუშ ხელფასიან სამუშაშენ, ნამუთ ეცილებუდ ჩქინ მსახურებაშ განრიგის (1 პეტ. 3:15; ებრ. 13:5, 6). თეს გეძინელ, ირო, მუჟამსით ვომსახურუთ იეჰოვას წინააღმდეგობაშ უმკუჯინუო, ჩქინ ფარ ფთხილანა (1 თეს. 2:2).

10. მუ რე რსხებაშ მუზარად დო მუშენ ოკო გიფრთვათ თინა?

¹⁰ რსხებაშ მუზარად რე იეჰოვაშ მოჩამილ იმენდ — ღურაშე რსხებაშ დო თიშ იმენდ, ნამდა ჯილდოს მიღენს არძა, მით ასრულენს ღორონთიშ ნებას (1 თეს. 5:8;  1 ტიმ. 4:10; ტიტ. 1:1, 2). მუჭოთ მუზარად თხილანს ჯარიშკოჩიშ დუდის, თეშ რსხებაშ მუზარად თხილანს ჩქინ აზროვნებაშ უნარს. მუჭო ორთჷ თეს? თე იმენდ მოხვარნა, ყურადღება ღორონთიშ დუნაპირებუეფშა მაფდან გინოღალირ დო პრობლემეფშე სწორ დამოკიდებულება მიღდან. მუს ნიშნენს, გიფრთვათ თე მუზარად? თენა ნიშნენს, ჩქინ აზროვნება ღორონთიშ აზროვნებაწკუმა შევათანხმათ. მაგალთო, ჩქი ღორონთიშ იმენდ მიღნა დო ვართ ხოლო სიმდიდრეშ, ნამუთ ვა რე საიმენდო (ფსალმ. 26:2; 104:34; 1 ტიმ. 6:17).

11. მუ რე შურიშ ყამა დო მუშენ მოსაჭირნა თიშ გიმორნაფა?

¹¹ შურიშ ყამა რე ღორონთიშ სიტყვა, ბიბლია. თე ყამას უღჷ ძალა, გეგმაარგამას ირნერ ტყურა დო გათავისფალას ხალხ ტყურა გურაფეფიშ დო მოცილე ჩვევეფიშ მონობაშე (2 კორ. 10:4, 5; 2 ტიმ. 3:16, 17; ებრ. 4:12). თე ყამაშ სწორაშე გიმორნაფას ბგურაფლენთ პირად დო თი გურაფაშ საშვალებათ, მუდგას ღორონთიშ ორგანიზაციაშე ბღებულენთ (2 ტიმ. 2:15). სრულ საჭურველწკუმა ართო იეჰოვა ხოლო შხვა ძალიერ საშვალებათ ფთხილანა. მუ რე თენა?

12. ხოლო მუ მოსაჭირნა დო მუშენ?

¹² გამოცდილ ჯარიშკოჩის უჩქჷ, ნამდა ხვალე ვეშულებ დიდ ჯარშა გერჯგინა; თის შხვა ჯარიშკოჩეფშე ხოლო ოსაჭირ მოხვარა. თეცალო, ვეშემლებნა ჩქინით გივორჯგინათ სატანას დო თიშ მიმაჸუნალეფს; თეშო და დო ჯიმალეფიშ მოხვარა მოსაჭირნა. იეჰოვაქ ჩქინ მახვარებელო მსოფლიო „საჯიმალო მუჩეს“ (1 პეტ. 2:17).

13. მუჭოთ ებრაელეფიშ 10:24, 25-ის ჭარჷ, მუ ჯგირობუა მოუღ კრებაშ შეხვალამეფშა დასწრებას?

¹³ ართ-ართ მხარე, სოვრეშეთ მოხვარას ბღებულენთ, შეხვალამეფშა დასწრება რე (წეკითხით ებრაელეფიშ 10:24, 25). მინშა არძას მიტირხუნა გურ. თეცალ დროს შეხვალამეფს შეულებ გურშა ელამკინან. ჩქი გურშა ელამკინანა და დო ჯიმალეფიშ მთელ გურით კეთებულ კომენტარეფ. ბიბლიაშა გერსხილ მოხსენებეფ დო ინსცენირებეფ, ნამდგას თინეფ ორთნა, უმოსო აღბძრენა, გუვაგრძელათ იეჰოვაშ მსახურება. შეხვალამაშ დოჭყაფაშახ დო თებაშ უკულ და დო ჯიმალეფწკუმა გურიშემაკინალ ჩიებეფ ხოლო მამანგარენა (1 თეს. 5:14). თეს გეძინელ, ჩქინ შეხვალამეფ მარზენა საშვალებას, მიღდან ხიოლ, ნამუთ შხვეფიშ მოხვარას მოუღ (საქ. 20:35; რომ. 1:11, 12). შეხვალამეფ შხვა მხარეეფით ხოლო მოხვარნა. თინეფ მამზადენა, ნამდა ვორდათ უჯგუშ მაქადაგებელეფ დო მასწავლებერეფ დო თეშნერო აუჯგუშენა ჩქინ ბრძოლაშ უნარეფს. მაგალთო, ჩქი ბგურაფლენთ, მუჭო გიმიბრინუათ ეფექტურო თი ირფელ, მუთ გურაფას მოხვარნან ფერ საშვალებეფშა მიშურს. ათეშენ ჯგირო მემზადით კრებაშ შეხვალამეფშო, ყურადღებით ქურჩქილით დო უკულ გეგმირინეთ, მუთ თექ მირჩქილეთ. თეშნერ მოქციებათ იჸუაფუთ ქრისტე იესოშ ღირსუან მეომარეფ (2 ტიმ. 2:3).

14. ხოლო მუ მოხვარას ბღებულენთ?

¹⁴ ჩქი მილიონობით ძალიერ ანგელოზ ხოლო ელამრენა. დეფიქრით, ხვალე ართ ანგელოზის მუზმა შეულებ! (ეს. 37:36). თეშ უკულ დეფიქრით, მუშ კეთება შეიალებე ანგელოზეფიშ მთელ ჯარს. ნამთინ ადამიანს ვარდა დემონს ველაჸუნნე იეჰოვაშ ძალიერ ჯარშა. ათეშენ, ართ ართგურ მოწმე რდასინ ხოლო, მუჟამსით თის იეჰოვა ელურე, თინა მოწინააღმდეგეეფშე ბრელით უმოს ძალიერ რე (მსაჯ. 6:16). შემლებნა დარწმუნებულ ვორდათ, ნამდა თენა თაშ რე! რშუდან თენა, მუჟამსით თანამშრომელიშ, ამხანაგიშ ვარდა ურწმუნო ოჯახიშ წევრიშ ჩიება ვარდა მოქციება გურს გიტახნა. ვაგგოჭყორდან, თე ბრძოლას ხვალე ვა რეთ. თქვა იეჰოვაშ ხემძღვანელობას მეჸუნთ.

15. მუჭოთ ესაიაშ 54:15, 17-შე იძირე, მუშენ ვემიოტენს იეჰოვაშ ხალხ დღას ქადაგებას?

¹⁵ ქვეყნიერებას, ნამდგას სატანა მართუნს, ბრელ მიზეზ უღჷ, ნამდა ბჯოგუდათ. ჩქი მტკიცას იფცვენთ პოლიტიკურ ნეიტრალიტეტის დო ვა მეურთ ჯარშა. ვაცხადენთ ღორონთიშ სახელს, ფქადაგენთ, ნამდა ხვალე თიშ სამეფო მიღანს მშვიდობას დო ხუჯის ვუკინენთ თიშ სამართლიან ნორმეფს. ჩქი ვაარგამენთ, ნამდა თე ქვეყნიერებაშ მართველ მეტყურე დო მაჸვილარ რე (იოან. 8:44). თეს გეძინელ, ვაცხადენთ, ნამდა სატანაშ ქვეყნიერება აუცილებერო მისპუ. მარა, ჩქი სატანაშ დო თიშ მიმაჸუნალეფს ვა გუვაჩერებეთ. თეშ გინაწონს, არძანერ საშვალებათ, მუთ ჩქინო შეიოლებერ რე, გუვაგრძელენთ იეჰოვაშ განდიდებას! მართალ რე, სატანას დიდ ძალა უღჷ, მარა თის ვეშულებ, ქეცილას მთელ მსოფლიოს სამეფოშ ცნობაშ ხალხშა გინოჩამაშ საქმეს. თენა ხვალე თიშ გურშენ რე შეიოლებერ, ნამდა იეჰოვა ფთხილანა (წეკითხით ესაიაშ 54:15, 17).

16. მუჭო ირსხენს იეჰოვა მუშ ხალხის დიდ გასაჭირიშ დროს?

¹⁶ მუ მელნა წიმი? დიდ გასაჭირიშ დროს იეჰოვა მირსხენა ჟირ სარკო საშვალებათ. თინა ირსხენს მუშ ართგურ მსახურეფს, მუჟამსით დედამიწაშ მეფეეფს გეიახნარენს, ნამდა განადგურან დიდ ბაბილონ — ტყურა რელიგიეფიშ იმპერია (გამოცხ. 17:16—18; 18:2, 4). თეშ უკულ, თინა ირსხენს მუშ ხალხის, მუჟამსით არმაგედონს სატანაშ ქვეყნიერებაშ ირნერ კვალს მოსპუნს (გამოცხ. 7:9, 10; 16:14, 16).

17. მუ ჯგირობუას მომღანა იეჰოვაწკუმა ხოლოშიან ურთიერთობას ვემვოდინუანთ-და?

¹⁷ იეჰოვაწკუმა ხოლოშიან ურთიერთობას ვემვოდინუანთ-და, სატანას თიცალ მუთუნ ვაკეთებე ჩქინდა, მუთ ვეგშისწორებე. სინამდვილეს, თინა მიღენს სამუდამო ტანჯებას (რომ. 16:20). ათეშენ გიღდან სრულ საჭურველ დო ვა ჩეთხინუათ თინა! ვემინდომათ ხვალე ბრძოლა. ხუჯ ქუდუკინით და დო ჯიმალეფს დო მიაჸუნით იეჰოვაშ ხემძღვანელობას. თაშ გაკეთენთ-და, შეილებნა დარწმუნებულ რდათ, ნამდა თქვან მოჸოროფე ზეციერ მუმა გუგამანგარენა დო დორთხილანა (ეს. 41:10).