ᲝᲒᲣᲠᲐᲤᲐᲚ ᲡᲢᲐᲢᲘᲐ 12
ᲝᲑᲘᲠᲔᲨᲘ 77 სინთე უკუმელა ქიანას
ვედათ უკმელაშა — ქუდოსქიდით სინთეს!
„ართ დროს უკმელას რდითჷ, მარა ასე სინთეს რეთჷ“ (ᲔᲤᲔᲡ. 5:8).
ᲛᲘᲖᲐᲜ
ქობძირუნთ, მუშ გურაფა შემლებუნა ეფესოელეფიშ მა-5 დუდის მოჸუნაფილ „უკმელაშ“ დო „სინთეშ“ შედარებეფშე.
1, 2. ა) მუ სიტუაციას რდჷ პავლე, მუჟამსით ეფესოელეფს წერილ მეჭარ? ბ) მუს გუარჩიენთ თე სტატიას?
ᲞᲐᲕᲚᲔ რომს, შინაპატიმრობას რე. თის მანგარო ოკო, გურშა ელუკინას თანაქრისტიანეფს. რახანს იშო ვემიართე, წერილეფს ჭარუნს თინეფს. თე წერილეფშე ართ-ართ რე ახ. წ. სოდგარენ 60—61 წანას ეფესოელეფშა მეჭარილ წერილ (ეფეს. 1:1; 4:1).
2 სოდგარენ ვით წანაშ წოხოლე პავლე ძალამ ხანს რდჷ ეფესოს, სოდეთ ქადაგენდჷ სახიოლო ამბეს დო ოგურუანდჷ ხალხის (საქ. 19:1, 8—10; 20:20, 21). თის მანგარო უჸორს თექიან და დო ჯიმალეფ დო ოკო, ქიმეხვარას, იეჰოვაშ ართგურო ქუდოსქიდან. თე სტატიაშე ქიგებგენთ, მუშენ მეჭარ პავლე მოციქულქ ეფესოელ ქრისტიანეფს „უკმელა“ დო „სინთეშ“ გურშენ დო მუშ გურაფა შემლებუნა ამდღა არძა ქრისტიანს თიშ რჩევაშე.
ᲣᲙᲛᲔᲚᲐᲨᲔ ᲡᲘᲜᲗᲔᲨᲐ ᲒᲘᲨᲣᲚᲐ
3. მუ შედარება გიმირინუ პავლექ ეფესოელეფშა მეჭარილ წერილს?
3 პავლექ ეფესოელ ქრისტიანეფს მეჭარ: „ართ დროს უკმელას რდითჷ, მარა ასე სინთეს რეთჷ“ (ეფეს. 5:8). მოციქულქ „უკმელას“ შეადარ ეფესოელეფიშ სულიერ მდგომარეობა ჭეშმარიტებაშ გაგებაშახ დო „სინთეს“ — ჭეშმარიტებაშ გაგებაშ უკულ. მორთჷ დიო გუარჩუათ, მუშენ თქუ პავლექ, ნამდა ეფესოელეფ ართ დროს „უკმელას“ რდესჷ.
4. მუ გაგებათ რდესჷ ეფესოელეფ უკმელას ტყურა რელიგიაშ გურშენ?
4 ტყურა რელიგიაშ უკმელა. ონდო ჭეშმარიტებას გეგენდეს დო ქრისტიანეფო გინირთუდეს, ეფესოელეფ ტყურა რელიგიეფიშ გურაფეფიშ დო ცრურწმენეფიშ მონობას რდესჷ. ქალაქ ეფესოს რდჷ არტემიდაშ ტაძარ, ნამუთ მსოფლიოშ შქვით საოცრებაშა მიშეშ. თე ტაძარ, თაშ ქოფთქუათინ, კერპთაყვანიშმცემლობაშ ბუდე რდჷ. არტემიდაშ ჭიჭე ტაძარეფიშ დო კერპეფიშ კეთება დო გიმოჩამას მანგარ ფარა მიშაძუდ (საქ. 19:23—27). თეს გეძინელ, ქალაქ ეფესო ცნობილ რდჷ ჯადოქრობათ (საქ. 19:19).
5. მუ გაგებათ რდესჷ ეფესოელეფ უკმელას უზნეობაშ გურშენ?
5 უზნეობაშ უკმელა. ეფესოს უკანასკნელშა გილალუაფირ დო უონჯღორე ხალხ ცხოვრენდჷ. თეატრეფს დოვარ რელიგიურ ღონისძიებეფს უწმაწურ ჩიება ჩვეულებრივ ამბე რდჷ (ეფეს. 5:3). ეფესოს ბრელ „ირნერო ზნეობადინაფილ რდჷ“. თი ბერძნულ სიტყვა, ნამუთ პავლექ თაქ გიმირინუ, პირდაპირ გაგებათ ნიშნენს, „ვა გინაფლენდე მუთუნნერ ჭუას“ (ეფეს. 4:17—19). ჭეშმარიტებაშ გაგებაშახ ეფესოელეფ ვა გინაფლენდეს მუთუნნერ ვალდებულებას იეჰოვაშ წოხოლე დო სინდის შურო ვაწუხენდეს მუნეფიშ საქმეეფიშ გურშენ. ათეშენ თქუ პავლექ თინეფშენ, ნამდა „გონება აფუდეს კილერ დო მოჩილათირ რდესჷ ღორონთშე მოურსუნ თი სიცოცხლეს“.
6. მუშენ უწუ პავლექ ეფესოელეფს, ასე „სინთეს რეთია“?
6 მარა არძა ეფესოელ ვა დოსქილადე უკმელას. თეცალეფს პავლექ უწუ: „ასე სინთეს რეთჷ, მუშენდა უფალს ოკუთვნუთ“ (ეფეს. 5:8). თინეფ ასე ღორონთიშ სიტყვაშ თანახმას ცხოვრენდეს, ნამუთ, თაშ ქოფთქუათინ, „უსინთანდჷ“ ოულურს (ფსალმ. 119:105). თე ქრისტიანეფქ მიოტუეს ტყურა რელიგიაწკუმა დაკავშირებულ საქმეეფიშ კეთება დო უზნეო ცხოვრება. თინეფ მეჸუნდეს ღორონთიშ მაგალითის დო ირნერო ოცადუდეს, განადიდესკო იეჰოვა დო გურ გუხარესკო თის (ეფეს. 5:1).
7. მუთ მოგენს ართიანს ჩქინ დო ეფესოელეფიშ სიტუაცია?
7 თეშნერო, ჩქი ხოლო ჭეშმარიტებაშ გაგებაშახ უკმელას ვორდით ტყურა რელიგიაშ დო უზნეობაშ გურშენ. ნამთინე აბღნიშნენდით ტყურა რელიგიურ დღესასწაულეფს; ნამთინე ხოლო უზნეო ცხოვრებათ ფცხოვრენდით. მარა, მუჟამსით ქიგებგით, მუ რე იეჰოვაშ თოლს სწორ დო არასწორ, თეშ დოფთირეთ ცხოვრება, ნამდა მეურდუკო იეჰოვაშ ნორმეფს, მუდგაქ არძას ბრელ ჯგირობუა მომღეს (ეს. 48:17). მართალ რე, გიშებლით უკმელაშე, მარა თეთ ირფელ ვათებე. ირიათო კურცხას ოკო ვორდათ, ნამდა ვადვართათ „უკმელას“, ნამუთ უკახალე ეკიბტეთ, დო გილაფრთათ, „მუჭოთ სინთეშ სქუალეფქ“. მუჭო შემლებუნა თეშ კეთება?
Image digitally reproduced with the permission of the Papyrology Collection, Graduate Library, University of Michigan, P.Mich.inv. 6238. Licensed under CC by 3.0
ეფესოელეფშა ჸოროფათ მეჭარილ პავლეშ რჩევაშ გიმორნაფა ჩქი ხოლო შემლებუნა (ქოძირით აბზაც 7) b
ᲕᲔᲓᲐᲗ ᲣᲙᲛᲔᲚᲐᲨᲐ
8. მუჭოთ ეფესოელეფიშ 5:3—5-ის იძირე, მუშ კეთებას ოკო ეუჩილითუესკო დუდ თე ქრისტიანეფქ?
8 წეკითხით ეფესოელეფიშ 5:3—5. უზნეობაშ უკმელაშე შორს ქიგედირთესკონ, ეფესოელ ქრისტიანეფქ ოკო ვა დართესკო თი საქმეეფს, მუდგას იეჰოვა ვეწონუანდჷ. თეშა ხვალე უზნეობა ვარინ, უწმაწურ ჩიება ხოლო მიშეშ. პავლექ გაშინ ეფესოელ ქრისტიანეფს, ნამდა „ღორონთიშ დო ქრისტეშ სამეფოშ“ დამკვიდრება ქაკოდეს-და, დუდ ოკო ეუჩილითუესკო თეცალ საქმეეფს.
9. მუშენ ოკო ეუჩილითუათ დუდ თიცალ მუდგარენს, მუდგაქ შილებე უზნეობაშა ქიმემიჸონან?
9 ეფესოელ ქრისტიანეფცალო, ჩქი ხოლო ირიათო ოკო ვებრძოლათ „უკმელაშ საქმეეფს, ნამდგას მუთუნნერ ჯგირობუა ვა მოუღ“ (ეფეს. 5:11). მუჭოთ გამოცდილებაქ ოძირუ, პიროვნება მუთ უმოსის ურჩქილე, უჯინე ვარდა იჩიებ უზნეობაშე, თით უმოს ადვილ რე თიშო, არასწორო მიქცუას (დაბ. 3:6; იაკ. 1:14, 15). მაგალთო, ართ ქიანას და დო ჯიმალეფქ ინტერნეტის ჯგუფ გაკეთეს, სოდეთ დუდშე უმენტაშო სულიერ საკითხეფშე ჭარუნდეს. მარა ჭიე-ჭიეთ თიცალ მუდგარენეფშე ქიდიჭყეს ჩიება, მუთ იეჰოვაშო ვა რდჷ მოსაწონ დო თინეფიშ მთავარ ორაგადე თემათ სექსიქ გინირთჷ. თე და დო ჯიმალეფშე ბრელქ აღიარ, ნამდა თეცალ ჩიებაქ საბოლათ უზნეობაშა ქიმიჸუნ.
10. მუჭო ოცად სატანა, დუმაღორან? (ეფეს. 5:6).
10 სატანაშ ქვეყნიერება ოცად, დუმაღორან დო დუმარწმუნან, ნამდა თინა, მუთ ღორონთიშ თოლს უზნეო დო არასწორ რე, შუროთ ვა რე გლახა (2 პეტ. 2:19). თენა ჩქინო ახალ ვა რე, მუშენდა სატანა დღამუშის თე მეთოდის ირინუანს. თინა ოცად, ადამიანეფს ტვინ გამნურთინუას, ნამდა ვა გოხვადან, მუ რე სწორ დო მუ — ვარ (ეს. 5:20; 2 კორ. 4:4). ათეშენ ვამკვენა, ნამდა კინოეფს, სატელევიზიო შოუეფს დო ვებგვერდეფს ირიათო თიცალ მუდგარენეფიშ პროპაგანდა მეურს, მუთ ოწინააღმდეგ იეჰოვაშ ნორმეფს. თეშნერო, სატანა ოცად, დუმოჯერუან, ნამდა ამდღარ მსოფლიოს პოპულარულ უზნეო ცხოვრება დო საქმეეფ, გლახა ვარინ, სასიამოვნო რე დო მუთუნ მოცილე ვა რე (წეკითხით ეფესოელეფიშ 5:6).
11. მუჭო იძირე ანჟელაშ შემთხვევაშე, ნამდა მანგარ მნიშვნელოვან რე, მივაჸუნათ ეფესოელეფიშ 5:7-ის მოჩამილ რჩევას? (ქოძირით სურათ).
11 სატანას ოკო, თიცალ ხალხის ქუაკათათ, ნამდგაწკუმა ურთიერთობაშ შედეგო, უმოს ძნელ მაჸინა იეჰოვაშ ნორმეფიშ მეჸუნა. ზუსტას ათეშენ უწუ პავლექ ეფესოელეფს, საერთო ვა უღუდესკო თიცალეფწკუმა, მით ღორონთიშ თოლს არასწორო იქციებუდეს (ეფეს. 5:7). მარა ჩქი ეფესოელეფშე უმოს კურცხას ოკო ვორდათ, მუშენდა ამდღა შხვეფწკუმა ურთიერთობა ხვალე პირადო ვარინ, სოციალურ ქსელეფით ხოლო რე შეიოლებერ. აზიას მახორუ ართ დაშ, ანჟელაშ a შემთხვევაშე იძირე, მუსხით მნიშვნელოვან რე, ფრთხილას ვორდათ სოციალურ ქსელეფიშ გიმორნაფაშ დროს. თინა იჩიებ: „ჩქიმ მაგალითშე ქობძირ, ნამდა სოციალურ ქსელეფ მახეს მოგენს, ნამუთ ჭიე-ჭიეთ მიშაიტყურუანს დო ვა გოგინაფუანსინ თეშ გითირანს აზროვნებას. ჭიჭე ხანშა უკვე ვა მაწუხენდჷ, ნამდა მეგობრეფს თიცალ ხალხ პჸუნდჷ, მიდგას მუთუნო ვემიორჩქუდ ბიბლიურ პრინციპეფ დო საბოლათ თი დონეშა ქიმეფრთჷ, ნამდა მობწონდჷ თიცალ ცხოვრებაშ სტილ, ნამუთ იეჰოვაშ თოლს ვა რე სწორ“. მოჸოროფე უხუცესეფიშ მოხვარათ ანჟელაქ დითირუ დამოკიდებულება. თინა გეუძინანს: „თიშ მანგიორო, ნამდა მთელ ყურადღება სოციალურ ქსელეფშა მაფუდას გინოღალირ, ვოცადუქ, ჩქიმ გონება სულიერ აზრეფით ევოფშე“.
ჯგირ მეგობრეფიშ გიშაგორუაშ ჭყოლოფათ უმოს ადვილ მაჸინა, მივაჸუნათ იეჰოვაშ ნორმეფს (ქოძირით აბზაც 11)
12. მუ მიმეხვარებუნა, ვეგნურთათ იეჰოვაშ ნორმეფს?
12 ირნერო ოკო ვეცადათ, ვებრძოლათ სატანაშ ქვეყნიერებას გავრცელებურ აზროვნებას, ნამდა უზნეო ცხოვრებას მუთუნ ვა რე გლახა. ჩქი ხომ ქომიჩქნა, ნამდა თენა სიმართლეშ სარხოს ვა რე (ეფეს. 4:19, 20). მარა იშენით ჯგირ იჸი, ქობკითხათ ჩქინ დუდის: ქუოცადუქო, დუდ ეუჩილითუე ნაბეტან ურთიერთობას თანამშრომელეფწკუმა, კლასელეფწკუმა ვარდა თიცალეფწკუმა, მიდგაშო მნიშვნელოვან ვა რე იეჰოვაშ ნორმეფ? ქიგმიფრჩქინანქო გაბედულებას დო ქიმეპჸუნქო იეჰოვაშ ნორმეფს, თიშ უმკუჯინუო, ნამდა შილებე თენა მინშა ვა მომწონუან? მუჭოთ 2 ტიმოთეშ 2:20—22-ს ჭარჷ, მეგობრეფ თანაქრისტიანეფ შქას ხოლო ყურადღებათ ოკო გიშებგორათ, მუშენდა კრებას ხოლო შილებე ნამთინეწკუმა ხოლოშიან ურთიერთობაქ მეცილან იეჰოვაშ ართგურო მსახურებას.
ᲒᲘᲚᲐᲠᲗᲘᲗ, „ᲛᲣᲭᲝᲗ ᲡᲘᲜᲗᲔᲨ ᲡᲥᲣᲐᲚᲔᲤᲥ“
13. მუს ნიშნენს, გილაფრთათ, „მუჭოთ სინთეშ სქუალეფქ“? (ეფეს. 5:7—9).
13 პავლექ ეფესოელ ქრისტიანეფს ხვალე თინა ველუჩ, ნამდა ვა დართესკო უკმელას, თინა ხოლო უწუ, ნამდა გაგრძელესკო გილულა, „მუჭოთ სინთეშ სქუალეფქ“ (წეკითხით ეფესოელეფიშ 5:7—9). მუს ნიშნენს თენა? მოკლეთ ქოფთქუათინ, თენა ნიშნენს, ირიათო ნამდვილ ქრისტიანეფცალო იფქციებუდათ. ართ-ართ, მუთ თეშ კეთებას მიმეხვარებუნა, რე ბიბლიაშ დო ბიბლიურ პუბლიკაციეფიშ გურგედვალირო კითხირ დო გიმორკვიება. განსაკუთრებულო მნიშვნელოვან რე, დევეკვირათ დო ქიდიბგურუათ იესო ქრისტეშ მაგალითშე, მით „თე ქიანაშ სინთე“ რე (იოან. 8:12; იგავ. 6:23).
14. მუჭო მიმეხვარებუნა ღორონთიშ წმინდა შურ?
14 თეწკუმა ართო, მოსაჭირუნა ღორონთიშ წმინდა შურიშ მოხვარა, ნამდა თეშ გუაგრძელათ მოქციება, „მუჭოთ სინთეშ სქუალეფს“ ოსქვანს, მუშენდა უზნეობათ ეფშა ქიანას ზნეობრივ სისუფთავეშ დაცვება ჭიჭე ამბე ვა რე (1 თეს. 4:3—5, 7, 8). ღორონთიშ წმინდა შურით შემალებენა ვებრძოლათ ქვეყნიერებაშ აზროვნებას, მუდგაშა მიშურს ფილოსოფიურ აზრეფ დო თიცალ დამოკიდებულებეფ, მუთ ღორონთიშ აზროვნებას ვემურე. ღორონთიშ წმინდა ძალა თის ხოლო მიმეხვარებუნა, თაშ ქოფთქუათინ, გუავითარათ „თი ირფელ, მუთ ჯგირ დო მართალ რე“ (ეფეს. 5:9).
15. მუჭო შემლებუნა მიბღათ წმინდა შურ? (ეფეს. 5:19, 20).
15 წმინდა შურიშ მიოღებელო ართ-ართ საშვალება ლოცვა რე. იესოქ თქუ, ნამდა იეჰოვა ქიმეჩანს წმინდა შურს თინეფს, მით თხინსჷ (ლუკ. 11:13). თის თიმწკუმა ხოლო ბღებულენთ, მუჟამსით ქრისტიანულ შეხვალამეფს ართო განვადიდენთ იეჰოვას (წეკითხით ეფესოელეფიშ 5:19, 20). წმინდა შურს შეულებ თეშ იმოქმედას ჩქინდა, ნამდა შემალებუან ღორონთიშ მოსაწონო ცხოვრებაქ.
16. მუ მიმეხვარებუნა სწორ გადაწყვეტილებეფიშ მეღებას? (ეფეს. 5:10, 17).
16 მნიშვნელოვან გადაწყვეტილებაშ წოხოლე ქიგვორეთ-და, ოკო გეგმიბრკვიათ, მუ რე იეჰოვაშ ნება დო თიშ თანახმას მიფქცუათ (წეკითხით ეფესოელეფიშ 5:10, 17). მუჟამსით ბგორუნთ თი ბიბლიურ პრინციპეფს, ნამუთ ჩქინ სიტუაციას მეურე, ვოცადუთ, ქიგებგათ, მუ დამოკიდებულება უღჷ იეჰოვას კონკრეტულ საკითხშე. გიმორკვიებულ პრინციპის გეგმიბრინუანთ-და, უმოსო შემალებენა სწორ გადაწყვეტილებეფიშ მეღება.
17. მუჭო შემლებუნა დროშ ჭკვერულო გიმორნაფა? (ეფეს. 5:15, 16; ქოძირით სურათ).
17 პავლექ ეფესოელ ქრისტიანეფს დროშ ჭკვერულო გიმორნაფა ხოლო ელუჩ (წეკითხით ეფესოელეფიშ 5:15, 16). ბიბლიას მოშინაფილ „უბადო“, ნამუთ ჩქინ ნტერ, სატანა რე, ირნერო ოცად, თეშ ვორდათ გინოჸუნელ ქვეყნიერებაშ საქმეეფს, ნამდა იეჰოვაშ მსახურებაშო დროქ ვადმოსქიდან (1 იოან. 5:19). გვალო ადვილო შილებე ქრისტიანშო იეჰოვაშ მსახურებაშე უმოს მნიშვნელოვანო ფარაქ, განათლებაქ ვარდა კარიერაქ გინირთას. მუშო ოკო რაგად, თის ვეფჩიებუთ, ნამდა თე ირფელ იშენდოიშენ გლახა რე, მარა იეჰოვაშ მეტ მუთუნს ოკო ვემეფჩათ საშვალება, ჩქინ ცხოვრებას პირველ ადგილ ქიდეკინას. ქრისტიანშო არძაშ უმოს მნიშვნელოვანო თე ირფელქ გინირთ-და, გიშურს, ნამდა თიშა ქვეყნიერებაშ აზროვნება მოქმედენს. „სინთეშ სქუალეფცალო“ ქიგლაფრთათინ, საჭირო რე, ჭკვერულო გეგმიბრინუათ დრო, შხვანერო ქოფთქუათინ, მთელ ყურადღება თიშა გეგნიბღათ, მუთ არძაშ უმოს მნიშვნელოვან რე.
ეფესოელეფ ჭკვერულო ირინუანდეს დროს დო ქადაგენდეს (ქოძირით აბზაც 17)
18. მუ აკეთ დონალდიქ, ნამდა უჯგუშო გეგმირინუკო დრო?
18 გორით ირნერ საშვალება, ნამდა მუთ შეილებუნან, ირფელ გაკეთათ იეჰოვაშო. ზუსტას თაშ მიქცუ სამხრეთ აფრიკას მახორუ ჩქინ ართ ჯიმაქ, დონალდიქ. თინა იჩიებ: „ფიფქრენდჷ ჩქიმ ცხოვრებაშე დო ირო ბლოცულენდჷ, იეჰოვაქ ქიმმეხვარუკო, ნამდა შემალებუკო თიშო უმოსიშ კეთებაქ. თიცალ სამუშაშე ბლოცულენდჷ, ნამუთ ქომჩანდ საშვალებას, მეტ იფქადაგიკო. იეჰოვაშ მოხვარათ ქოთ ქიფში თეცალ სამუშა, მუდგაქ მა დო ჩქიმ მეუღლეს სრულ დროთ მსახურებაშ დოჭყაფაშ საშვალება ქომუჩეს“.
19. მუ მიმეხვარებუნა, გუაგრძელათ გილულა, „მუჭოთ სინთეშ სქუალეფქ“?
19 პავლეშ წერილ ეფესოელეფს მართალო მანგარო მეხვარებუდ, გაგრძელესკო იეჰოვაშ ართგურო მსახურება. თე წერილ ხვალე ეფესოელეფს ვარინ, ჩქი ხოლო მოხვარუნა. მუჭოთ გუარჩით, თის შეულებ მიმეხვარან, ჭკვერულო გიშებგორათ გართობა დო მეგობრეფ. თინა გინმოჭყვიდირაფუანა, რეგულარულო გიმიბრკვიათ ბიბლია, ნამდა მუდგას ვა ვორთუდათინ, ირიათო ჭეშმარიტებაშ სინთე მისინთუანდან. თეს გეძინელ, ეფესოელეფშა მეჭარილ წერილ მოძირანა, მუსხით მნიშვნელოვან რე წმინდა შურ, ნამუთ მოხვარუნა ჯგირ თვისებეფიშ გავითარებას. პავლეშ ნაჭარა თე წერილ მიმეხვარებუნა სწორ გადაწყვეტილებეფიშ მეღებას, ნამუთ მეურდას იჸი იეჰოვაშ აზროვნებას. შედეგო, დღას ვა ურთჷ უკმელაშა დო ქუდოფსქიდუთ სინთეს!
ᲛᲣᲭᲝ ᲣᲞᲐᲡᲣᲮᲔᲜᲗ?
-
მუ იგულისხმებ ეფესოელეფიშ 5:8-ს მოშინაფილ „უკმელას“ დო „სინთეს“?
-
მუ ოკო ვაკეთათ, ნამდა ვებდათ „უკმელაშა“?
-
მუჭო შემლებუნა გუაგრძელათ გილულა, „მუჭოთ სინთეშ სქუალეფქ“?
ᲝᲑᲘᲠᲔᲨᲘ 95 სინთე უმოსო ვარკალანს
a ნამთინე სახელ თირელ რე.
b ᲡᲣᲠᲐᲗᲘᲨ ᲔᲭᲐᲠᲣᲐ: ეფესოელეფშა მეჭარილ პავლეშ წერილიშ ჯვეშ ასლ.
