1, 2. მუ რე ოკეთებელ ნათუაშახ?

 ᲣᲚᲘᲠ ხუთ წანაშ დინახალე მილიონშე უმოს ადამიანქ ინათ. თინეფშე ბრელს, პირველ საუკუნეს მახორუ ტიმოთეცალო, დაბადებაშე ოგურუანდეს ჭეშმარიტებას (2 ტიმ. 3:​14, 15). ნამთინექ უმოს გვიანო გეგჷ ჭეშმარიტება დო ნამთინექ — გვალო მოხუცებულობას. მაგალთო, მუსხირენ წანაშ წოხოლე 97 წანერ ოსურქ ინათ.

² ბიბლიაშ მაგურაფალ ქორექ ვარდა იეჰოვაშ მოწმე მშობლეფ ქორჸუნს-და, სი ხოლო ხომ ვა ფიქრენქ ნათუაშე? თაშ ქორენ-და, მანგარ ჯგირ მიზან ნორღვე! მარა ნათუაშახ დიო დუდ ოკო მეუძღვინე იეჰოვას. თე სტატიას გუარჩიენთ, მუს ნიშნენს მეძღვინუა დო თის ხოლო ქობძირუნთ, მუშენ ოკო ვეღე დრო, მუჟამსით მზათ რექჷ თე ნაბიჯიშ გინადგუმალო.

ᲛᲣᲡ ᲜᲘᲨᲜᲔᲜᲡ ᲛᲔᲫᲦᲕᲘᲜᲣᲐ?

3. ქიმიჸუნით თინეფიშ მაგალითეფ, მით იეჰოვაშა რდესჷ მეძღვინელ.

³ ბიბლიურ გაგებათ მეძღვინუა ნიშნენს წმინდა დანიშნულებაშო გიშაგორუას. მუჭოთ მიჩქუნა, ისრაელ ღორონთშა მეძღვინელ ერ რდჷ, მარა თე ერს ხოლო, ნამთინე განსაკუთრებულო რდჷ იეჰოვაშა მეძღვინელ. მაგალთო, მღვდელმთავარ აარონიშ დუდიშ გიორთუმალარს წოხოლე უღუდ „მეძღვინუაშ წმინდა ნიშან“ — ოქროშ რწკინუნდუნ ფერ ფირფიტა, მუთ ოძირანდჷ, ნამდა თინა თე წმინდა მსახურებაშო რდჷ გიშაგორილ (ლევ. 8:9). ნაზირეფ ხოლო განსაკუთრებულო რდესჷ იეჰოვაშა მეძღვინელ. ებრაულ სიტყვა „ნაზირ“ ნიშნენს „გიშართილს“ ვარდა  „მეძღვინელს“. ნაზირეფ მეჸუნდეს მითითებეფს, ნამუთ თინეფშო მოსეშ კანონს რდჷ მოჩამილ (რიცხ. 6:​2—8).

4. ა) მუს ოძირანქ, მუჟამსით დუდის უძღვინენქ იეჰოვას? ბ) მუს ნიშნენს სქან დუდშე „ვარიაშ რაგად“? (ქოძირით სურათ).

⁴ მუჟამსით დუდის უძღვინენქ იეჰოვას, ოძირანქ, ნამდა გინოჭყვიდილ გაფჷ, გინირთე ქრისტეშ მოწაფეთ დო ღორონთიშ ნებაშ შესრულება ცხოვრებას პირველ ადგილს გიორინუე. მუ მეთხიებ ქრისტიანს ღორონთშა დუდიშ მეძღვინუაშ უკულ? იესოქ თქუ: „მითინს ჩქიმ მოწაფეთ გინორთა ქაკონ-და, ვარია ქოთქუას მუშ დუდშე“ (მათ. 16:24). იეჰოვაშა დუდიშ მეძღვინუაშ უკულ ვარია ოკო თქუე თი ირფელშე, მუთ ვემურე თიშ ნებას (2 კორ. 5:​14, 15). თენა ნიშნენს, ვარია ქოთქუე „ხორციშ საქმეეფშე“, მაგალთო, მუნერით რე, სექსუალურ უზნეობა (გალ. 5:​19—21; 1 კორ. 6:18). მუჭო ფიქრენქ, მონკა ოღალო გიმანჯირუნანო თეცალ ნორმეფიშ მეჸუნა? იეჰოვა ქომიჸორა დო თიშ კანონეფ ჩქინ საჯგირობუოთ რენ ქობჯერან-და, თაშ ვეჸუაფ (ფსალმ. 119:97; ეს. 48:​17, 18). ართ ჯიმა, ნიკოლას, თეშ გურშენ იჩიებ: „ღორონთიშ ნორმეფ გისოსეფს მოგენს, ოღონც გარჩქ, სი მუჭო უჯინექ — თეშ, მუჭოთ ციხეშ გისოსეფს, ნამუთ მილგოხვილანს, დოვარ, მუჭოთ ლომიშ გალიაშ გისოსეფს, ნამუთ რთხილანს თე მხეცშე“.

5. ა) მუჭო ხვადუ მეძღვინუა? ბ) მუ განსხვავება რე მეძღვინუა დო ნათუა შქას? (ქოძირით სურათ).

⁵ მუჭო ხვადუ მეძღვინუა? მეძღვინუაშ დროს ლოცვას პირობას არზენქ იეჰოვას, ნამდა ხვალე თის ცენქჷ თაყვანს, თიშ ნებას ცხოვრებას პირველ ადგილს გიორინუანქ დო ირიათო „მთელ გურით, მთელ შურით, მთელ გონებათ დო მთელ ძალათ“ გიჸორდას იჸი თინა (მარ. 12:30). მუჟამსით დუდის უძღვინენქ იეჰოვას, თეშ გურშენ ხვალე სი  დო თის გიჩქუნა, მარა ნათუათ შხვეფს ხოლო ოძირანქ, ნამდა თიშა დუდ გაფჷ მეძღვინელ. დუდიშ მეძღვინუა სერიოზულ აღთქმა რე, ათეშენ ირნერო ოკო ეცადე, შეასრულე დოდვალირ პირობა. იეჰოვა ხოლო ზუსტას თეს ელჷ სქანდე (ეკლ. 5:​4, 5).

ᲛᲣ ᲒᲘᲜᲛᲝᲭᲧᲕᲘᲓᲘᲠᲐᲤᲣᲐᲜᲐ ᲘᲔᲰᲝᲕᲐᲨᲐ ᲓᲣᲓᲘᲨ ᲛᲔᲫᲦᲕᲘᲜᲣᲐᲡ?

6. მუ გინგოჭყვიდირაფუანს იეჰოვაშა დუდიშ მეძღვინუას?

⁶ იეჰოვაშ ჸოროფა რე მთავარ მიზეზ, მუთ თიშა დუდიშ მეძღვინუას გინგოჭყვიდირაფუანს. თე ჸოროფა იეჰოვაშ დო თიშ განზრახვეფიშ გურშენ უმოსიშ გაგებაქ გაივითარ. თაშ ნამდა, თინა უბრალოთ ემოციეფშა ვარინ, ზუსტ რჩქინაშა გაფჷ გერსხილ (კოლ. 1:9). ბიბლიაშ გურაფაქ დუგარწმუნ, ნამდა 1) იეჰოვა მართალო არსებენს, 2) ბიბლია თიშ სიტყვა რე დო 3) თინა მუშ ნებას მუშ ორგანიზაციაშ საშვალებათ ასრულენს.

7. მუს ოკო ორთუდას პიროვნება იეჰოვაშა დუდიშ მეძღვინუაშახ?

⁷ თის, მით დუდის უძღვინენს იეჰოვას, ოკო უჩქუდას ბიბლიაშ მთავარ გურაფეფ დო ცხოვრენდას თინეფიშ თანახმას. თეწკუმა ართო, მუჭოთ შეულებუნ თეშ, შხვეფს ხოლო ოკო გინოჩანდას ნაგურეფუს (მათ. 28:​19, 20). თეცალ პიროვნებას ირიათო უმოსო ეჸოროფებ იეჰოვა დო ოკო, ხვალე თის ემსახურას. იეჰოვა სი ხოლო თეშნერო ქოიჸორს-და, მეძღვინუას დო ნათუას ბიბლიაშ მასწავლებერიშ ვარდა მშობლეფიშ ხათრით ვეგნოჭყვიდუნქ დო ვართ თიშენ, ნამდა სქან არძა მეგობარ ინათუ.

8. მუშ კეთებას გინმოჭყვიდირაფუანა იეჰოვაშ მიმართ მარდულობა? (ფსალმ. 116:​12—14).

 ⁸ მუჟამსით ფიქრენქ თი ირფელშე, მუთ იეჰოვაქ სქანო აკეთ, გურ მარდულობათ ეგაფშაფუ დო გირჩქინდუ სურვილ, დუდ მეუძღვინე თის (წეკითხით ფსალმუნიშ 116:12—14). გასაკვირ ვა რე, ნამდა ბიბლია იეჰოვას არძანერ ჯგირ დო სრულყოფილ ძღვინიშ მუმაჩამალო მიშინუანს (იაკ. 1:17). არძაშ უმოს დიდ ძღვინ, მუთ იეჰოვაქ მუჩეს, თინა რე, ნამდა მუშ სქუაშ სიცოცხლე დათმჷ ჩქინ გიშაჸიდირალო. დეფიქრით, იეჰოვას თე ძღვინ ვა მუჩამუდუკონ, ვა მაღვენუდეს თიწკუმა ხოლოშიან ურთიერთობაშ საშვალება დო მარადიულ ცხოვრებაშ იმენდ (1 იოან. 4:​9, 10, 19). დუდიშ მეძღვინუათ მარდულობას გიმიფრჩქინანთ იეჰოვაშე მეღებულ კურთხევეფშო დო თი არძაშ უდიდაშ ჸოროფაშო, ნამუთ თიქ გიმირჩქინ (კან. 16:17; 2 კორ. 5:15). ზუსტას თეცალ მარდულობაშე მეურს ჩიება წიგნიშ „მარადიულო გეხარით ცხოვრებათ!“ 46-ა დუდიშ მა-4 პუნქტის, სოდეთ მოჩამილ რე სუმწუთიან ვიდეო სათაურით „ქიმეჩით თქვან ძღვინ ღორონთის“.

ᲥᲝᲠᲔᲥᲝ ᲛᲖᲐᲗ ᲛᲔᲫᲦᲕᲘᲜᲣᲐ ᲓᲝ ᲜᲐᲗᲣᲐᲨᲝ?

9. მუ ოცილ ნამთინეს, ნამდა დუდ მეუძღვინას იეჰოვას?

⁹ შილებე ორწყექ, ნამდა დიო ვა რექჷ მზათ მეძღვინუა დო ნათუაშო, მუშენდა დიო ხოლო გაფჷ მუდგარენეფ ოთირალ, ნამდა სქან ცხოვრება იეჰოვაშ ნორმეფს მეურდას ვარდა უმოს დრო გოსაჭირ რწმენაშ გამანგარებელო (კოლ. 2:​6, 7). ვაგგოჭყორდას, არძა ბიბლიაშ მაგურაფალ ართნერო ვემურს სულიერო წიმი დო ვართ არძა მოზარდ რე მზათ ართ ასაკის მეძღვინუა დო ნათუაშო. ათეშენ დუდ შხვას ვეშუდარა; სქან სულიერო წიმი ულა თიშ მიხედვით შეაფას, სი მუშ კეთება შეილებ (გალ. 6:​4, 5).

10. მუშ კეთება შეილებ, მუჟამსით ორწყექ, ნამდა დიო ვა რექჷ მზათ მეძღვინუა დო ნათუაშო? (ქოძირით ჩარჩო  „რჩევეფ თინეფშო, მიდგაქ ჭეშმარიტებას ირდეს“).

¹⁰ მუჟამსით ორწყექ, ნამდა დიო ვა რექჷ მზათ მეძღვინუა დო ნათუაშო, დუდ ვადოდვა დო ირნერო ქეცად, ქიმიოჭირინუე თე მიზანს. ქოთხი იეჰოვას, აკურთხას სქან მონდომა, ნამდა დითირე (ფილ. 2:13; 3:16). რჯერდას, თინა ქიმირჩქილუანს სქან ოთხუალს დო ქიმგეხვარებ (1 იოან. 5:14).

ᲛᲣᲨᲔᲜ ᲒᲘᲜᲝᲓᲕᲐᲜᲡ ᲜᲐᲛᲗᲘᲜᲔ ᲛᲔᲫᲦᲕᲘᲜᲣᲐᲡ ᲓᲝ ᲜᲐᲗᲣᲐᲡ?

11. მუჭო მიგეხვარებუნა იეჰოვა, რდათჷ თიშ ართგურეფ?

¹¹ ნამთინე, მით უკვე მზათ რე მეძღვინუა დო ნათუაშო, იშენით გინოდვანს თე ნაბიჯეფიშ გინოდგუმას. თინეფს შილებე ოშქურუდან, ნამდა ნათუაშ უკულ მეჩირთუნა დო გერიცხებუნა. ნათუას სი ხოლო თე მიზეზით გინოდვანქ-და, რჯერდას, იეჰოვა ირნერო მიგეხვარებ, თიშ „ღირსო გილართე დო ირფელს ასიამოვნე“ (კოლ. 1:10). თის ბრელშა მუხვარებ, ნამდა გაკეთესკო თინა, მუთ სწორ რე. ათეშენ რჯერდას, სი ხოლო მერჩანს ძალას, თაშ მიქცუე (1 კორ. 10:13). იეჰოვა ირნერო ოხვარ მუშ ხალხის, ვადინუან ართგურობა. ზუსტას ათეშენ რე, ნამდა გარიცხულეფიშ რაოდენობა დიდ ვა რე.

12. მუ მიმეხვარებუნა, ღორონთიშ წოხოლე სერიოზულო ვა დუაშუათ?

¹² არძა არასრულყოფილ ადამიან გედირთუ ცდუნებაშ წოხოლე, ნამდა გაკეთას თინა, მუთ გლახა რე (იაკ. 1:14). მარა ევაჸუნუთ დო ვარ ცდუნებას, თენა ჩქინდა რე დამოკიდებულ. ნამთინე იჩიებ, ნამდა ადამიანეფს ვეშემლებუნა გუაკონტროლათ ჩქინ  სურვილეფ დო მოქმედებეფ. მარა სინამდვილეს, ჩქინდა რე დამოკიდებულ, მუჭო მიფქციებუთ. თიმწკუმა ხოლო, მუჟამსით არასწორ სურვილეფ გირჩქინდუ, შეილებ ორჯგინე თინეფს. თეშ კეთებას მიგეხვარებ ირდღას ლოცვა, ჯგირ პირად გურაფა, კრებაშ შეხვალამეფშა დასწრება დო სქან რწმენაშ გურშენ შხვეფწკუმა ჩიება. თე ირფელს რეგულარულო გაკეთენქ-და, შეგალებე ვეგნურთე მეძღვინუაშ აღთქმას. დღას ვაგგოჭყორდას, თეშ კეთებას იეჰოვა ხოლო მიგეხვარებ! (გალ. 5:16).

13. მუ მაგალით დომტუეს იოსებიქ?

¹³ მეძღვინუაშ აღთქმაშ მეჸუნა უმოს ადვილ გაჸი, მუჟამსით წინასწარ დეფიქრებუქ, მუჭო მიქციებუქ ცდუნებაშ დროს. ბიბლიას ბრელ თიცალ ადამიანიშ შემთხვევა რე მოჩამილ, მიდგას შეიალებუ თეშ კეთებაქ, თიშ უმკუჯინუო, ნამდა ჩქინცალო არასრულყოფილეფ რდესჷ. მაგალთო, ართ-ართ რე იოსებ. ფოტიფარიშ ოსურ ირიათო ოცადუდ, მიოჩილითუკო თინა, მარა იოსების მტკიცას აფუდ გინოჭყვიდილ, მუჭო მიქცუკო. ბიბლიაშე ბგებულენთ, ნამდა თინა „ვარიას ურაგადუდ“ ფოტიფარიშ ოსურს. იოსებიქ თის უწუ: „მუჭო ვაკეთა თე დიდ უბადობა დო მუჭო შეფცოდა ღორონთის?!“ (დაბ. 39:​8—10). მუჭოთ იძირე, იოსების წინასწარ აფუდ ნაფიქრებ, მუჭო მიქციებუდ. ზუსტას თექ მეხვარ, ვეიაჸუნუკო ცდუნებას.

14. მუ მიმეხვარებუნა ცდუნებაშ დროს ხეთეშე ვარიაშ რაგადის?

¹⁴ მუშ გურაფა შეილებ იოსებშე? ასეშე გეგნოჭყვიდ, მუჭო მიქციებუქ, მუჟამსით ცდუნებაშ წოხოლე ქიგედირთუქ. ქიდიგურე, ხეთეშე, ვედეფიქრენ თეშ, ქოთქუე ვარია თიშე, მუთ იეჰოვას ჯოგჷ (ფსალმ. 97:10; 119:165). თაშ გაკეთენქ-და, ადგილს ვა გაჸი მაფიქრებელ, მუს ქიმინუნქ, მუშენდა უკვე გარჩქვენუ, მუ გაფჷ ოკეთებელ.

15. მუჭო შეილებ ოძირუე, ნამდა მთელ გურით გორუნქ იეჰოვას? (ებრ. 11:6).

¹⁵ შილებე რჯერსჷ, ნამდა მუდგას გურაფლენქ, ჭეშმარიტება რე დო მთელ გურით გოკო, იეჰოვას ემსახურე. მარა მუდგარენ იშენით რჭოფუნს, გეგნოდგე ნაბიჯ, მეუძღვინე დუდ იეჰოვას დო დინათე. თაშ ქორენ-და, მეფე დავითცალო ქოთხი იეჰოვას: „ღორონთ, გეგმომრკვი დო ქოძირ ჩქიმ გურ. ქიდმეკვირ დო ქიგეგ, მუ მიდინუანს სიმშვიდეს; ქოძირ, გლახაშა  ხომ ვა მაძახ გურ, დო ქეწმაჸუნ მარადიულობაშ შარას!“ (ფსალმ. 139:​23, 24). იეჰოვა „აჯილდოვენს თინეფს, მით მთელ გურით გორუნს თის“. ზუსტას თეს ორთუქ, მუჟამსით მონდომას ვარკენქ, ნამდა ქიმიოჭირინუე მიზანს — მეუძღვინე დუდ იეჰოვას დო დინათე (წეკითხით ებრაელეფიშ 11:6).

ᲕᲔᲛᲘᲝᲢᲣᲐ ᲘᲔᲰᲝᲕᲐᲬᲙᲣᲛᲐ ᲓᲐᲐᲮᲚᲝᲔᲑᲐ

16, 17. მუჭო მეჸუნს იეჰოვას მუშ ხოლოშა თინეფ, მიდგაქ ჭეშმარიტებას ირდეს? (იოან. 6:44).

¹⁶ იესოქ თქუ, ნამდა თიშ მოწაფეეფ იეჰოვას მეჸუნს მუშ ხოლოშა (წეკითხით იოანეშ 6:44). ართ წუთის დეფიქრ, მუნერ მნიშვნელოვან აზრ რე თენა დო მუჭო გოხუ პირადო სი. იეჰოვა თითოულ ადამიანიშ გურს, მით მუშ ხოლოშა მეყუნს, მუდგარენ ჯგირს ორწყე. თინა მუშ სიტყვაშე მოგებაფუანა, ნამდა თინეფ გიშაგორილეფ რენა დო მუს ოკუთვნუნა (კან. 7:6). რჯერდას, სი ხოლო თეცალ ძვირფას რექჷ იეჰოვაშო.

¹⁷ მარა შილებე იეჰოვაშ მოწმეეფიშ ოჯახის ირდჷ დო ათეშენ ფიქრენქ, იეჰოვას მშობლეფიშ გურშენ ომსახურუქ დო ვართ ხოლო თიშენ, ნამდა მუქ მეიჸონ მუშ ხოლოშა. იეჰოვაშო უბრალოთ მუშ ხალხიშ ნაწილ ვა რექჷ. თის არძა ადამიან პირადო მეჸუნს მუშ ხოლოშა, თინეფ შქას თინეფ ხოლო, მიდგაქ ჭეშმარიტებას ირდეს. თეს გეძინელ, ბიბლია იჩიებ: „დეახლოვით ღორონთის დო თინა ხოლო დეგეახლოვებუნა“ (იაკ. 4:8; 1 მატ. 28:9). თაშ ნამდა, მუჟამსით სი გინოდგუნქ ნაბიჯის, ნამდა დეახლოვე იეჰოვას, მუჭოთ იაკობიშ 4:8-შე ბძირით, თინა ხოლო გეახლოვებ (ქეშუდარით 2 თესალონიკელეფიშ 2:13).

18. მუს გუარჩიენთ უკულიან სტატიას? (ფსალმ. 40:8).

¹⁸ მუჟამსით დუდის უძღვინენქ იეჰოვას დო ინათუქ, იესოცალო იქციებუქ, ნამდგაქ თე ნაბიჯიშ გინოდგუმათ ოძირუ, ნამდა მზათ რდჷ, შეასრულუკო ირფელ, მუდგას მუამუშ თხინდჷ (წეკითხით ფსალმუნიშ 40:8; ებრ. 10:7). უკულიან სტატიას გუარჩიენთ, მუ მიგეხვარებ, ნათუაშ უკულ ხოლო გაგრძელე იეჰოვაშ ართგურო მსახურება.