„ირიათო სქან ჭეშმარიტებათ გილურქ“
„ქუდმოგურე სქან შარა, იეჰოვა დო ირიათო სქან ჭეშმარიტებათ გილურქ“ (ფსალმ. 86:11).
ობირეშეფი: 31, 72
1—3. ა) მუნერ დამოკიდებულება ოკო მიღდან ჭეშმარიტებაშენ? ქიმიჸონით მაგალით (ქოძირით სურათ თე გვერდის). ბ) მუ კითხვეფს გუვარჩიენთ თე სტატიას?
ნაჸიდერიშ დორთინაფა ამდღა ჩვეულებრივ მუდგარენ რე. გამოკვლევეფ ოძირანს, ნამდა ნამთინე ქიანას ჸიდირებულ ნივთეფიშ 9 პროცენტის ორთინუანა. ონლაინ მაღაზიას ჸიდირებულიშ 30 პროცენტშე მეტის ორთინუანა. მიზეზ შილებე თინა რდას, ნამდა ელდესინ თიჯგუაქ ვეჸუ, კილუანქ ქიჸუ ვარდა ვემეწონეს. ათეშენ გინოჭყვიდეს გინოთირუა ვარდა ფარაშ დორთინაფა.
2 ნაჸიდერ ნივთეფ ჩქი ხოლო შილებე დუვორთინუათ, მარა ბიბლიურ ჭეშმარიტებაშ „ზუსტ რჩქინას“ დღას ვა გოფთირანთ შხვა მუთუნშა (წეკითხით იგავები 23:23; * 1 ტიმ. 2:4). მუჭოთ წოხოლენ სტატიაშე გებგით, ჩქი დაფთმით დრო, ნამდა ჭეშმარიტება ქუგამგებდესკო. თეს გეძინელ, შილებე კარიერა დო პირად ურთიერთობეფ დაფთმით, დოფთირეთ აზროვნება დო მივოტეთ ღორონც ვა მოწონს ფერ წეს-ჩვეულებეფ დო ტრადიციეფ. მარა კურთხევეფ, ნამუთ თეს მოჸუნს, ირფელს გინოწონუნს.
3 იესოქ მიჸონ მაგალით დიდვაჭარშე, ნამუთ ძვირფას მარგალიტის გორუნდჷ. მუჟამსით ქოძირუნ, ხეთეშე გეგმოჩ ირფელ, ნამდა თინა ქიჸიდკო. თე მარგალიტ ღორონთიშ სამეფოშ გურშენ ჭეშმარიტებაწკუმა რე შედარებულ. თე მაგალითით იესოქ ქუმოძირეს, მუსხით მნიშვნელოვან რე ჭეშმარიტება თინეფშო, მით თის გორუნს (მათ. 13:45, 46). თეგვარო, მუჟამსით ღორონთიშ სამეფოშენ ჭეშმარიტება ქიგებგით, ირფელ დაფთმით თიშ მიოღებელო. ჩქი მანგარო ვაფასენთ ჭეშმარიტებას, ათეშენ დღას ვეგმოფჩანთ თის. მარა სანარღოთ, ნამთინექ ვა დაფას ჭეშმარიტება დო მიოტუ სწორ შარათ გილულა. ჩქი ვა მოკონა თაშ მიფქცუათ, ათეშენ ოკო მივაჸუნათ ბიბლიას მოჩამილ რჩევას დო გილაფრთათ ჭეშმარიტებას (წეკითხით 3 იოანე 2—4). * თენა თის ნიშნენს, ნამდა ჩქინ ცხოვრებას პირველ ადგილს ჭეშმარიტება ოკო გივორინუათ დო თიშ შესაბამისო იფცხოვრათ. მორთ, გუვარჩუათ თეცალ კითხვეფ: მუშენ დო მუჭო შილებე ნამთინექ ჭეშმარიტებას გეგნურთას? მუჭო შემლებნა დუდ ევუჩილითუათ თეცალ შეცდომაშ დაშვებას? მუ ოკო ვაკეთათ, ნამდა ირიათო ჭეშმარიტებათ გილაფრთათ?
მუშენ დო მუჭო დათმჷ ნამთინექ ჭეშმარიტება
4. მუშენ მიოტუ ნამთინექ ჭეშმარიტება პირველ საუკუნეს?
4 პირველ საუკუნეს, ნამთინექ მიდგაქ იესოშ ქადაქებაშ შედეგო ჭეშმარიტება მიღჷ, ჭიჭე ხანშა მიოტუ თე შარათ გილულა. მაგალთო, მუჟამსით იესოქ ეკოშაყარელ ხალხ სასწაულებრივო დადიარუ, თინეფქ თის გალილეაშ ზღვაშ მაჟია ნაპირშახ ქეკაჸუნეს. თე დროს იესოქ თიცალ მუდგარენ უწუ, ნამუთიქ გაკვირვჷ თინეფ: „კოჩიშ სქუაშ ხორცის ვა ჭკუმუნთ დო თიშ ზისხირს ვა შუნთ-და, სიცოცხლე ვაიღნა“. თიშ მანგიორო, ნამდა იესოშა თე სიტყვეფიშ ენწყუმა ქუთხუდესკო, თინეფქ დებრკოლეს დო უწის: „თეს მუს იჩიებ? შილებენო თეშ მორჩქილაფა?“. თეშ უკულ „ბრელ თიშ მოწაფექ ადრეიან საქმეეფს დართჷ დო მიოტეს თიშ ეკოჸუნა“ (იოან. 6:53—66).
5, 6. ა) მუშენ გინურთანს ნამთინე ჭეშმარიტებაშ შარას? ბ) მუჭო შილებე პიროვნებაქ ჭიჭე-ჭიჭეთ გემკაჩირთას ჭეშმარიტებას?
5 სანარღოთ, ამდღა ხოლო ნამთინექ მიოტუ ჭეშმარიტებაშ შარათ გილულა. ნამთინე დაბრკოლ ბიბლიურ გაგებაშ თირუაქ ვარდა პასუხიშმგებელ ჯიმაშ ნარაგადიქ დო საქციელქ. შხვეფს ბიბლიურ რჩევაშ მეჩამაქ გუჭირდჷ ვარდა თანაქრისტიანწკუმა პირად უთანხმოებაშ გურშენ ქიდიტეს ჭეშმარიტება. ათეშენ ნამთინექ განდგომილეფიშ დო შხვა მოწინააღმდეგეეფიშ მხარე ქიდეკინ, მით ჩქინ გურაფეფშენ ტყურა ინფორმაციას ავრცელენდჷ. შედეგო, თინეფქ მიოტეს იეჰოვა დო კრება (ებრ. 3:12—14). მუშ მაჯგირა იჸუაფუდ, რწმენა ვა უდინუაფდესკო დო იესოს ქიმიენდესკო, მუჭოთ თენა მოციქულ პეტრექ ქიმინ. მუჟამსით იესოქ მოწაფეეფს კითხჷ, ულა ხომ ვაკოდეს, პეტრექ უპასუხ: „უფალი, მიშა იბდათ? სი გიღჷ მარადიულ სიცოცხლეშ სიტყვეფი“ (იოან. 6:67—69).
6 შხვეფს შუროთ ვა უგინაფნან თეშ, ჭიჭე-ჭიჭეთ გემკაჩირთეს ჭეშმარიტებას. თეცალ კათა თი გემს გუ, ნამუთ ჭიჭე-ჭიჭეთ ეთხიებ ნაპირს. ბიბლია მაფრთხილენა, ვეფჩირთათ შარას (ებრ. 2:1). შილებე, პიროვნებაქ ჭეშმარიტებაშ შარას გარზახ ვეგნურთას, მარა საშვალებას არზენდას იეჰოვაწკუმა ურთიერთობაქ დესუსტას დო საბოლათ მიოტუას ჭეშმარიტებაშ შარათ გილულა. მუჭო შილებე დუდ ევუჩილითუათ თეცალ სიტუაციას?
მუ ოკო ვაკეთათ, ნამდა ვეგმოფჩათ ჭეშმარიტება?
7. მუ მიმეხვარებნა ვა დაფთმათ ჭეშმარიტება?
7 ჭეშმარიტებას გილაფრთათინ თიშო, საჭირო რე დევემორჩილათ იეჰოვაშ არძა მითითებას. თეს გეძინელ, ჭეშმარიტება პირველ ადგილს ოკო გივორინუათ დო ბიბლიურ პრინციპეფით იფცხოვრათ. მეფე დავითიქ იეჰოვას ლოცვას უწუ: „ირიათო სქან ჭეშმარიტებათ გილურქ“ (ფსალმ. 86:11). დავითცალო ჩქი ხოლო გინოჭყვიდილ ოკო მაფდან, ირიათო გილაფრთათ ჭეშმარიტებაშ შარათ. თაშ ვემიფქციებუთ-და, შილებე თი მუდგარენეფშე ქიდიპჭყათ ფიქრი, მუთ ჭეშმარიტებაშენ დაფთმით დო კინ დუვართათ თის. თეშ გინაწონს, ირნერო ოკო ვეცადათ ვედვეთხუათ ჭეშმარიტებას. ჩქი ვეშემლებნა გინოპჭყვიდათ ნამ გურაფას დევეთანხმათ დო ნამუს — ვარ. ჩქი ოკო გილაფრთათ „ირნერ ჭეშმარიტებათ“ (იოან. 16:13). წოხოლენ სტატიას გუვარჩით ხუთ მუდგარენ, მუთ ჭეშმარიტებაშ გურშენ დაფთმით. ასე ქობძირუნთ, მუჭო ოკო მიფქცუათ, ნამდა დღას ვადვართათ თინეფს (მათ. 6:19).
8. მუჭო ოკო გიმირინუას ქრისტიანქ დრო გონივრულო, ნამდა ვეგნურთას ჭეშმარიტებას? ქიმიჸონით მაგალით.
8 დრო. ჭეშმარიტებაშ შარას ვეგნურთათინ, საჭირო რე გონივრულო გიმიბრინუათ ჩქინ დრო. ყურადღებით ვეპჸით-და, შილებე ზედმეტ დრო დუთმათ გართობას, ჰობის, ინტერნეტის დო ტელევიზორიშ ჯინას. თე ირფელ გლახა ვა რე, მარა თინეფ მიდამღანა თი დროს, ნამდგას პირად გურაფა დო სულიერ საქმეეფშო ვახარჯენდით. გუვარჩუათ ართ დაშ, ემაშ მაგალით. * თის ბაღანობაშე უჸორდ ცხენეფ. მუჭოთ საშვალება ქიმიაჩამუდ, ცხენით ჯირითენდჷ. მარა დრო ხანიშ უკულ ქიმეხვად, ნამდა ბრელ დროს უთმენდჷ თე საქმეს. თიქ გინოჭყვიდ ნაკლებო ჸოფედკო დაკავებულ მუშ ჰობით დო პირველ ადგილს სულიერ საქმეეფ ქიგიორინუკო. ემას გურშა ელუკინ კორი უელსიშ მაგალითიქ, ნამუთ ადრე ცხენეფიშ შეჯიბრებას მონაწილენდჷ. * ასე ემა მეტ დროს სულიერ საქმეეფს, მუშ ოჯახის დო მეგობრეფს უთმენს. თინა უმოს ხოლოს რე იეჰოვაწკუმა დო შინაგან სიმშვიდე უღჷ, მუშენდა უჩქჷ, ნამდა დროს გონივრულო გიმირინუანს.
9. მუჭო შილებე მატერიალურ ჯგირობუაქ უმოს მნიშვნელოვანქ გინირთას ჩქინო?
9 მატერიალურ ჯგირობუა. ქუმოკონა ჭეშმარიტებაშ შარას ვეგნურთათ-და, მატერიალურ ჯგირობუას მუშ ადგილ ოკო ქიმურჩქინათ. მუჟამსით ჭეშმარიტება გებგით, ჩქინო მატერიალურ ნივთეფქ მაჟია ხარისხოვანო გინირთჷ, მუშენდა პირველ ადგილს სულიერ საკითხეფ გივორინეთ. მარა მუჟამსით ვორწყეთ, ნამდა შხვეფ ჸიდულენა უახალაშ ელექტრონულ მოწყობილობეფს ვარდა შხვა მატერიალურ ნივთეფს, შილებე თეშ იფიფქრათ, ნამდა ჩქი თე ირფელ მორკუნა. ათეშენ შილებე, ვედეპკმაყოფილათ თით, მუთ მიღნა დო მთელ ყურადღება მატერიალურ ჯგირობუაშა გეგნიბღათ. თენა გუმოშინანა დემასიშ შემთხვევას. თიქ ქვეყნიერება თეშ ქიჸოროფუ, ნამდა მოციქულ პავლეწკუმა მსახურებაშე ვარია ქოთქუ (2 ტიმ. 4:10). მუ რდუ თეშ მიზეზ? ბიბლიას კონკრეტულო ვა ჭარჷ თეშ პასუხ, მარა შილებე თეშ მიზეზ მატერიალურ ნივთეფიშ ჸოროფა ვარდა სულიერ საქმეეფიშ წოხოლე პირად ინტერესეფიშ გერინა ჸოფედკო. ათეშენ კურცხას ოკო ვორდათ, მუშენდა, შილებე მატერიალურ ნივთეფიშ ჸოროფაქ ჭეშმარიტებაშ შარაშე გემკმოჸოთან.
10. მუ ოკო ვაკეთათ, ნამდა ჭეშმარიტებას გილულა გუვაგრძელათ?
10 ურთიერთობეფ. ჭეშმარიტებას გილულა გუვაგრძელათინ, შხვეფს ოკო ვემეფჩათ თიშ უფლება, გავლენა უღდან ჩქინწკუმა. ჭეშმარიტებაშ გაგებაშ უკულ იეჰოვაშ მოწმე ვა რენან ფერ ნათესეფ დო მეგობრეფწკუმა ჩქინ ურთიერთობაქ დითირ. თინეფშე ნამთინექ ქუგამგეს, მარა ნამთინექ ჩქინ წინააღმდეგ მიდართჷ (1 პეტ. 4:4). მართალ რე, ოჯახიშ წევრეფს ჯგირო ვოქცუთ, მარა ფრთხილას ოკო ვორდათ, ნამდა თინეფს ქუვასიამოვნათინ თიშენ კომპრომისშა ვებდათ. მუშო ოკო რაგად, ირნერო ვეცადებუთ, ოჯახიშ წევრეფწკუმა ჯგირ ურთიერთობა მიღდან. მარა იფთვალისწინენთ 1 კორინთელეფიშ 15:33-ს მოჩამილ რჩევას დო ხოლოშიან ურთიერთობა ხვალე თინეფწკუმა მიღნა, მისით იეჰოვა უჸორს.
11. მუ მიმეხვარებნა დუდ ევუჩილითუათ ღორონც ვა მოწონსინ ფერ ფიქრეფს დო მოქმედებეფს?
11 ღორონც ვა მოწონსინ ფერ ფიქრეფ დო მოქმედებეფ. არძა, მით ჭეშმარიტებას გილურს, წმინდა ოკო რდას (ეს. 35:8; წეკითხით 1 პეტრე 1:14—16). * მუჟამსით ჭეშმარიტება ქიგებგით, ჩქინ ცხოვრება ბიბლიურ ნორმეფიშ შესაბამისო დოფთირეთ. ნამთინეს უმოს დიდ ცვლილებეფქ აჸუ ოკეთებელქ. მუდგაქ ვა მოხვადასინ, დღას ოკო ვაფთირუათ სუფთა ცხოვრებაშ წეს უზნეო ცხოვრებაშა. მუჭო შემლებნა თეშ კეთება? დეფიქრით, მუშ მადიდა საფასურ გინიგ იეჰოვაქ — მუშ სქუაშ ძვირფას ზისხირ, ნამდა წმინდეფ ვორდითკო (1 პეტ. 1:18, 19). იეჰოვაშ თოლს წმინდეფ ქუვორდათინ, იესოშ გიშაჸიდირალ ირიათო ოკო ფშუდან.
12, 13. ა) მუშენ რე მნიშვნელოვან დღახუეფს იეჰოვაშ თოლით ვუჯინედათ? ბ) მუს გუვარჩიენთ?
12 ტრადიციეფ დო წეს-ჩვეულებეფ, ნამუთ ბიბლიაშა ვა რე გერსხილ. ოჯახიშ წევრეფ, თანამშრომელეფ დო კლასელეფ შილებე ოცადუდან მონაწილება მიმოღებაფუან მუნეფიშ დღახუეფს. მუჭო შემლებნა ვადვაჸუნათ თიშ ცდუნებას, ნამდა მონაწილება მიბღათ იეჰოვას ვა მოწონსინ ფერ ტრადიციეფს დო დღახუეფს? თენა შემალებენა, მუჟამსით ვეგიპჭყოლიდუანთ, მუჭო უჯინე ღორონთ თეგვარ საქმეეფს. იეჰოვაშ თვალსაზრის ირიათო ქოფშუდანინ, ჩქინ პუბლიკაციეფს ოკო გიმიბრკუათ, მუს იჩიებ ბიბლია თე დღახუეფიშ გურშენ. მუჟამსით ჩქინ დუც გუვოშინანთ თიშ მიზეზის, მუშენ ვა ბღებულენთ მონაწილებას თეცალ დღახუეფს, დებრწმუნებუთ, ნამდა გილურთ თიშ შარათ, ნამუთ „უფალშო რე მოსაწონ“ (ეფეს. 5:10). იეჰოვაშ დო თიშ სიტყვაშა მენდება მიმეხვარებნა ვამღუდან კოჩიშ შიშ (იგავ. 29:25).
13 ჭეშმარიტებაშ შარათ გილულა მუდმივ პროცეს რე, ნამდგას მოკონა მარადიულო მივაუნათ. მუ მიმეხვარებნა, ნამდა უმოს მტკიცაშე მაფდან გინოჭყვიდილ ჭეშმარიტებაშ შარათ გილულა? მორთ, გუვარჩუათ სუმ მხარე.
გინოჭყვიდილ გაფდან ირიათო ჭეშმარიტებაშ შარათ გილულა
14. ა) მუჭო მიმეხვარებნა ბიბლიაშ გურაფა, დღას ვა გოფთირუათ ჭეშმარიტება? ბ) მუშენ რე მნიშვნელოვან სიბრძნე, გაგებაშ უნარ დო დარიგებაშ მეღება?
14 პირველ, მუთ მნიშვნელოვან რე, გაგრძელით ღორონთიშ სიტყვაშე ჭეშმარიტებაშ გურაფა დო თიშე ფიქრი. ჭეშმარიტება ქიგეჸოროფებნა დო დღას ვა გოთირანთ შხვა მუთუნშა, მუჟამსით რეგულარულო გეგმურთუნთ დროს თიშ გურაფას. იგავეფიშ 23:23 თის ხოლო მირაგადნა, ნამდა ქიპჸიდათ „სიბრძნე, დარიგება დო გაგებაშ უნარ“. ხვალე რჩქინაშ მეღება დასაბაღ ვა რე; მნიშვნელოვან რე, იმოფქმედათ დო გეგმიბრინუათ თინა ცხოვრებას, მუდგას გაგებაშ უნარ დო გონიერება მიმეხვარებნა. მინშა ჭეშმარიტება ჩქინო „დარიგება“ რე, ნამუთ მოძირანა მუ მაფნა ოთირალ. მორთ, ირიათო მივაჸუნათ ბიბლიას მოჩამილ მითითებეფს, ნამუთ ვარჩხილშე უმოს ძვირფას რე (იგავ. 8:10).
15. მუჭო მიცვენა ჭეშმარიტებაშ ორტყაფ?
15 მაჟია, მტკიცას გაფდან გინოჭყვიდილ, მიაჸუნათ ჭეშმარიტებას ირ დღას. ბიბლია ჭეშმარიტებას ჯარიშკოჩიშ ორტყაფის ადარენს (ეფეს. 6:14). ბიბლიურ დროს, ორტყაფ ოხვარუდ ჯარიშკოჩის დო იცვენდჷ თიშ შინაგან ორგანოეფს. მარა თის ორტყაფ მანგარო ოკო გინუნჭირუდკო დო ვა უდინუაფუდკო. მუჭო მიცვენა ამდღა ჭეშმარიტება ორტყაფცალო? ბიბლიურ ჭეშმარიტება ირიათო ოკო ფშუდან; თინა სწორ ვა რენ ფერ მსჯელობაშე დამცვენა დო მიმეხვარებნა მიბღათ გონივრულ გადაწყვეტილებეფ. მუჟამსით ცდუნებეფს ვარდა განსაცდელეფს შეფხვადუთ, ჭეშმარიტება ქომჩანა ძალას ვაკეთათ თინა, მუთ სწორ რე. ჯარიშკოჩ დღას ვემიშ ოჩხუპებშა ორტყაფიშ უმშო, თეგვარო ჩქი ხოლო გინოჭყვიდილ მაფდან ოკო, ჭეშმარიტება მუთუნშა დღას ვა გოფთირუათ. ირფელ ოკო გუვაკეთათ, ნამდა თინა ორტყაფცალო მიკოპჭაბდან დო თიშ შესაბამისო იფცხოვრათ. ჯარიშკოჩიშ ორტყაფის ხოლო ართ დანიშნულება უღუდ, თინა ყამაშ გიობუნაფალო რდუ მოხუჯურ. მორთ ასე ქიფჩუათ მუშ გურაფა შემლებნა თავრეშე.
16. მუჭო მიმეხვარებნა შხვეფშა ჭეშმარიტებაშ გურაფა, გილაფრთათ ჭეშმარიტებას?
16 მასმა, მუთ შემლებნან, სრულაშე ოკო მიბღათ მონაწილება შხვეფშა ბიბლიურ ჭეშმარიტებაშ გურაფაშ საქმეს. მუჭოთ ჯარიშკოჩის მტკიცაშე აფუდ ყამა მიკომარგებულინ, თეშ ჩქი ხოლო მტკიცაშე ოკო ვორდათ ჭეშმარიტებას (ეფეს. 6:17). არძაქ ოკო ვეცადათ გუვაუჯგუშათ გურაფაშ უნარეფ, ნამდა ვორდათ თიცალ მასწავლებერეფ, ნამუთ „სწორას გინოჩანს ჭეშმარიტებაშ სიტყვეფს“ (2 ტიმ. 2:15). მუჟამსით შხვეფს ბიბლიურ ჭეშმარიტებას ვოგურუანთ, უმოსო მეჸოროფებნა ჭეშმარიტება. თეგვარო უმოს მტკიცაშე მაჸინა გინოჭყვიდილ, ჭეშმარიტებაშ შარათ გილაფრთათ.
17. მუშენ რე თქვანო ძვირფას ჭეშმარიტება?
17 ჭეშმარიტება ძვირფას საჩუქარ რე იეჰოვაშე. თე საჩუქარ საშვალებას მარზენა მიღდან ხოლოშიან ურთიერთობა ჩქინ ზეციერ მუმა იეჰოვაწკუმა. მუდგას იეჰოვა მოგურუანა, თენა ხვალე დაჭყაფ რე! თიქ პირობა მუჩეს, ნამდა მარადიულო დუმოგურუანა. თაშ ნამდა, მორთი ძვირფას მარგალიტცალო დუვაფასათ ჭეშმარიტება. ირიათო გავაგრძელათ ღორონთიშ გურშენ ჭეშმარიტებაშ მეღება დო დღას ვაგობთირუათ თინა შხვა მუთუნშა. თაშ ქიმიქციებუთ-და, დავითცალო ჩქი ხოლო შევასრულენთ თე პირობას: „ირიათო სქან ჭეშმარიტებათ გილურქ“ (ფსალმ. 86:11).
^ აბზ. 2 იგავ. 23:23: ქიჸიდ ჭეშმარიტება დო დღას ვეგმოჩა თინა; ქიჸიდ სიბრძნე, დარიგება დო გაგებაშ უნარ.
^ აბზ. 3 3 იოან. 2—4: 2 ჩქიმ საჸოროფო ჯიმა, ბლოცულენქ, ნამდა ჯამრთელო ქიჸუე დო ირნერ საქმეს წარმატებულ რდე თეშ, მუჭოთ ასე რექ წარმატებულ. 3 მანგარო მახიოლ, მუჟამსით ჯიმალეფქ ქუმორთეს დო დამოწმეს თი ჭეშმარიტებაშე, ნამდგას რექ დო გილურქ. 4 ვა მიღჷ მარდულობაშ თიშე უმოს დიდ მიზეზ, ვინემ თიშ მორჩქილაფა, ნამდა ჩქიმ სქუალეფ ჭეშმარიტებას გილულა.
^ აბზ. 8 სახელ თირელ რე.
^ აბზ. 8 JW მაუწყებლობა, ინტერვიუები და შემთხვევები > ჭეშმარიტება ცვლის ცხოვრებას.
^ აბზ. 11 1 პეტ. 1:14—16: 14 მუჭოთ გამგონე სქუალეფქ, ვეიაჸუნათ თიცალ სურვილეფს, ნამუთ თეიშახ, ურჩქინჯობაშ დროს გიღდეს, 15 ირნერ საქციელს წმინდეფ რდათ თი წმინდაცალო, ნამუთიქ დოიძახეს, 16 მუშენდა ჭარილ რე: „წმინდეფ რდათ, მუშენდა წმინდა ვორექ მა“.
