1. მუშენ მოსაჭირნა გურიშ ელაკინა?

ჩქი არძას მოსაჭირნა გურიშ ელაკინა, მუშენდა ოწუხებელ დო გურჭუა ჩქინ ცხოვრებაშ ნაწილ რე. შილებე ვობრძოლუდათ გურიშ გოტახუას, ნამუთ ხანშა მიშულას, ლახალას, ვარდა საჸოროფო პიროვნებაშ ღურას მოჸუნს. ნამთინეს შილებე გლახათ მოქცუდან, მუშენდა მუთ დრო მიკურს, ძალადობა უმოსო იძინანს. თე ირფელ მარწმუნენა, ნამდა „ბოლო დღალეფს“ ფცხოვრენთ, ნამუთ „ძნელ გინაღალარ“ რე დო ირ დღას უმოს ხოლოს ვორეთ ახალ ქიანაწკუმა (2 ტიმ. 3:1). შილებე ბრელ ხან რე ველუთ იეჰოვაშ დუნაპირებუშ შესრულებას დო თეწკუმა ართო, სირთულეეფ უმოსო იძინანს. მუ ელამკინანა გურშა თეცალ დროს?

2, 3. ა) მუ მიჩქუნა აბაკუმიშ გურშენ? ბ) მუშენ გუვარჩიენთ აბაკუმიშ წიგნის?

² თე კითხვაშა პასუხიშ მიოღებელო, გუვარჩუათ აბაკუმიშ წიგნი. მართალ რე, წმინდა წერილეფს კონკრეტულო ვა ჭარ აბაკუმიშ ცხოვრებაშ დო საქმიანობაშ გურშენ, მარა თე წიგნი არძას გურშა ელუკინანს. შილებე სახელ აბაკუმ „გურშა ხუტოლაფას“ ნიშნენდას. თენა შილებე მეუთითენდას თიშა, ნამდა იეჰოვა გურშა ელუკინანს მუშ მსახურეფს; თეს გეძინელ, შილებე თის ხოლო ნიშნენდას, ნამდა ღორონთიშ მსახურეფ მთლიანო თიშა რენა მენდებულ. აბაკუმქ მუსხირენ კითხვა დუსვჷ იეჰოვას. ღორონთიქ ქუპასუხ წინასწარმეტყველს დო თენა  ბიბლიას ქინაჭარაფუ, მუშენდა უჩქუდ, თენა ჩქი ხოლო გიმმოდირთუდეს (აბაკ. 2:2).

³ წინასწარმეტყველ აბაკუმიშ გურშენ ინფორმაციას ხვალე თი ბიბლიურ მონაკვეთშე ბგებულენთ, სოდეთ თინა მუშ გურჭუაშენ იეჰოვას ეჩიებ. მარა შხვა წიგნეფცალო, აბაკუმიშ წიგნი თიშ ნაწილ რე, „მუთ ადრე იჭარ ჩქინ ოგურაფალო . . . მუშენდა მოთვინებათ დო წმინდა წერილეფშე მეღებულ გურიშ ექექაფათ მიღდან იმენდ“ (რომ. 15:4). მუ სარგებელ მოუღ პირადო ჩქინო აბაკუმიშ წიგნის? თე წიგნი მოგურუანა, მუს ნიშნენს იეჰოვაშა მენდება. თეს გეძინელ, აბაკუმიშ წინასწარმეტყველება მარწმუნენა, ნამდა პრობლემეფიშ დო ოწუხებელიშ დროს შემლებნა ვა ვოდინუათ სიმშვიდე. მორთ, უმოს დეტალურო გუვარჩუათ თე წიგნი.

4. მუშენ აფუდ აბაკუმს გურ გოტახილ?

⁴ წეკითხით აბაკუმი 1:2, 3. * აბაკუმი მანგარ რთულ პერიოდის ცხოვრენდჷ. თინა შეწუხებულ რდუ, მუშენდა უბადო ხალხ შკას ცხოვრენდჷ. მუჟამ მეღებუდ ბოლო თინეფიშ უბადობას? მუშენ ვემოქმედ იეჰოვაქ ხეთეშე? აბაკუმი ორწყედ, ნამდა ისრაელეფ აჩაგრენდეს დო უსამართლოთ ოქცუდეს ართიანს. თის იმენდიქ მეუდინ. ზუსტას თე დროს, იეჰოვას ქოთხუ მოხვარა. დუდშე შილებე იფიქრუკო, ნამდა იეჰოვას უკვე ვაინტერესუდ მუშ ხალხი ვარდა თინა დიდ ხანს ვა მუღენდჷ ბოლოს თე ირფელს. თქვა ხოლო ხომ ვამგალენა მინშა თეცალ ფიქრეფ?

5. მუ მნიშვნელოვან გაკვეთილს ბგურაფლენთ აბაკუმიშ წიგნიშე? (ქოძირით სურათ მა-13 გვერდის).

⁵ მეუდინუო აბაკუმს იეჰოვაშ ნდობაქ დო თიშ დუნაპირებუშ რწმენაქ? მუშო ოკო რაგად, ვარ! თიქ მუშ პრობლემეფ დო ოწუხებელ იეჰოვას მიანდჷ დო ვართ ხოლო ადამიანეფს, მუთ ამტკიცენს, ნამდა გურ ვაგოტახუ. თინა შეწუხებულ რდუ, მუშენდა ვარჩქილედ, მუშენ ვა მოქმედენდჷ იეჰოვა თესხი ხანს დო მუშენ უშვენდჷ, ჸოფედკო თეცალ რთულ სიტუაციას. იეჰოვაქ ჩქი ხოლო მნიშვნელოვან გაკვეთილ დუმოგურუეს, მუჟამსით აბაკუმს მუშ ოწუხებელიშ გურშენ ოჭარაფუ: ჩქი ოკო ვა მაშკურნან, ქივეჩუათ იეჰოვას ჩქინ ოწუხებელშენ. ღორონც ოკო, გურ გეგნუფაჩათ ლოცვას დო მივანდათ ჩქინ პრობლემეფ (ფსალმ. 50:15; 62:8). მუჭოთ იძირე, აბაკუმს ჯგირო არჩქილედ იგავეფიშ 3:5-ს ინოჭარილ სიტყვეფ, ნამუთ მირაგადნა: „ქიმიენდ იეჰოვას მთელ გურით დო სქან ჭკუას ვენდა“.

6. მუშენ რე მნიშვნელოვან ლოცვა?

⁶ აბაკუმი მუშ მეგობარ დო მუმას, იეჰოვას ონდუდ, ათეშენ გეგნოდგჷ ნაბიჯ, დეახლოვკო თის. თის ვა უცადებ მუშით მაგვარკო სიტუაცია, ნამუთ მანგარო აწუხენდჷ. თიქ იეჰოვას ქეჩუ ლოცვას მუშ გრძნობეფიშ დო ოწუხებელიშ გურშენ დო თეთ, ჩქი ხოლო ჯგირ მაგალით მუჩეს. იეჰოვა, ნამუთ ლოცვეფს ირჩქილუანს, მირაგადნა, ქივეჩუათ ჩქინ ოწუხებელშენ დო თეთ ნდობა გეგმიფრჩქინათ (ფსალმ. 65:2). მუჟამსით თაშ ქიმიფქციებუთ, იეჰოვა ქუპასუხენს ჩქინ ლოცვეფს. თინა გურშა ელამკინანა დო ხემძღვანელობას ქომჩანა (ფსალმ. 73:23, 24). მუნერ სირთულეეფს ვეშეფხვადათინ, იეჰოვა ქიმმეხვარებნა თიშ გაგებას, მუს ფიქრენს ჩქინ მდგომარეობაშენ. ნამდვილო, შურ დო გურით ნათქუელ ლოცვეფ არძაშ უჯგუშ საშვალება რე, გეგმიფრჩქინათ იეჰოვაშ ნდობა.

7. მუნერ რეაქცია უღუდ იეჰოვას აბაკუმიშ ოწუხებელშენ?

⁷ წეკითხით აბაკუმი 1:5—7. * მუჟამსით მუშ  ოწუხებელ იეჰოვას მიანდუნ, აბაკუმს ალბათ ოინტერესუდ მუნერ რეაქცია აღვენუდ ღორონც. მოჸოროფე მუმა იეჰოვას არჩქილედ, მუჭო გინაფლენდჷ დუც აბაკუმი, ათეშენ ვაგუდღანებ თიშა. თიქ აბაკუმს უწუ, ნამდა მალას ჩერიებუდ დო ბოლოს მუღენდჷ თე მდგომარეობას. მუჭოთ იძირენ, აბაკუმი პირველ რდუ, მიდგას იეჰოვაქ მუშ განზრახვაშენ უწუ.

8. მუშენ რდუ მოულოდნელ იეჰოვაშ პასუხი აბაკუმშო?

⁸ იეჰოვაქ აბაკუმს ქუგაგებაფუ, ნამდა მზათ რდუ, ქიმოქმედკო. თინა აუცილებერო დასაჯენდჷ თე მოძალადე დო უბადო მოდგმას. გამოთქმა „თქვან დროს“ თიშა მეუთითენდჷ, ნამდა წინასწარმეტყველ აბაკუმი ვარდა თიშ დროს მახორუ კათა ქოძირუნდეს ისრაელეფიშ დასაჯებას. მარა აბაკუმი ველუდ იეჰოვაშე თეცალ პასუხის, მუშენდა ძალადობა დო უბადობა უმოსო ქიმიძინანდჷ, მუთ უმოს პრობლემეფს მუღანდჷ იუდას. * ქალდეველეფ (ბაბილონელეფ) უმოს სასტიკ დო უდუნდებელეფ რდეს ვინემ ისრაელეფ, მიდგას უჩქუდ იეჰოვაშ კანონეფ. მუშენ გინოჭყვიდ იეჰოვაქ მუშ ხალხიშ დასაჯება წარმართ ერიშ საშვალებათ? მუნერო იგინანდით დუც აბაკუმიშ მანგიორო თქვა ქოჸოფედითკო?

9. ხოლო მუ კითხვეფ უღუდ აბაკუმს?

⁹ წეკითხით აბაკუმი 1:12—14, 17. * აბაკუმს უჩქუდ, ნამდა იეჰოვა ბაბილონიშ საშვალებათ დასაჯენდჷ უბადოეფს, მარა თის იშენით ბოლოშა ვარჩქილედ თე გადაწყვეტილება. მარა თინა იშენით გიმირჩქინანდჷ თანდაბლობას დო აგრძელენდჷ იეჰოვაშ მენდებას. თიქ თქუ, ნამდა იეჰოვა თიშ „კირდე“ რდუ (კან. 32:4; ეს. 26:4). აბაკუმი მოთვინებას გიმირჩქინანდჷ; თინა დარწმუნებულ რდუ იეჰოვაშ ჸოროფა დო სიჯგირაშა. თის ვაშკურნებ დო კინ დუსვჷ იეჰოვას თეცალ კითხვეფ: მუშენ უშვენქ ხოლო უმოსო გეუფრაშას მდგომარეობაქ იუდას? მუშენ ვა მუღენქ ბოლოს ხეთეშე ირფელს? მუშენ ითვინენქ თესხი უბადობას? სი ხომ „წმინდა ღორონთ“ რექ დო სქან „თოლეფ თიცალ წმინდა, ნამდა უბადობაშა“ ვაგაჯინნე?!

10. მუჭო შილებე იბგინათ ჩქი ხოლო მინშა დუდ?

¹⁰ მინშა შილებე ჩქი ხოლო აბაკუმცალო იბგინათ დუდ. ჩქი ვურჩქილეთ იეჰოვას, ვონდუთ, პკითხულენთ დო ბგურაფლენთ თიშ სიტყვას, მუთ იმენდის მარზენა. ღორონთიშ დაპირებეფიშ გურშენ ბგებულენთ თი მითითებეფშე, ნამუსით თიშ ორგანიზაცია მარზენა. მარა შილებე იშენით მაწუხენდან კითხვა: „მუჟამ მეღებუ ბოლო ჩქინ პრობლემეფს?“. თეშ გაგება შემლებნა თევრეშე, მუჭო მიქცუ აბაკუმქ.

11. მუ გინოჭყვიდ აბაკუმქ იეჰოვაწკუმა რაგადიშ უკულ?

¹¹ წეკითხით აბაკუმი 2:1. * იეჰოვაწკუმა რაგადიშ უკულ აბაკუმქ მშვიდას იგინ დუდ. თიქ გეგნოჭყვიდ ქუჯინკო იეჰოვას, სოიშახ თინა იმოქმედენდჷ. თე გადაწყვეტილება ნაჩქარევ ვა ჸოფე, მუშენდა უმოს გვიანო, კინ გემეორ მუშ გადაწყვეტილება დო თქუ: „მშვიდას ვუჯინექ გაჭირებაშ დღას“ (აბაკ. 3:16). ღორონთიშ შხვა ართგურ მსახურეფ ხოლო თეცალ ნდობას გიმირჩქინანდეს დო თინეფიშ მაგალით მოხვარნა, ვა დოფშურდათ დო ვუჯინათ იეჰოვას (მიქ. 7:7; იაკ. 5:7, 8).

12. მუს ბგურაფლენთ აბაკუმიშ მაგალითშე?

 ¹² მუშ გურაფა შემლებნა აბაკუმიშ გადაწყვეტილებაშე? პირველ, მუდგა პრობლემაშ წოხოლე ვა ვორდათ, დღას ოკო ვემვოტუათ ლოცვა. მაჟია, ოკო ვურჩქილათ იეჰოვაშ მითითებეფს, მუდგას მუშ სიტყვაშ დო ორგანიზაციაშ საშვალებათ მარზენა. მასმა, მოთვინებათ ოკო ვუჯინათ იეჰოვას დო სრულაშო მივენდათ, ნამდა მუშ დროს ჩამთხინუანა ჩქინ გურჭუას. აბაკუმცალო ჩქი ხოლო მშვიდას იბგინანთ დუც, მუჟამსით გუვაგრძელენთ იეჰოვაწკუმა რაგადის, თიშ რჩქილას დო მოთვინებათ ქუჯინეთ თის. იმენდ მიმეხვარებნა უმოსო მიფთვინათ დო სირთულეეფიშ დროს ხიოლ ვა ვოდინუათ. თეს გეძინელ, იმენდ მარწმუნენა, ნამდა ჩქინ ზეციერ მუმა აუცილებერო ქიმოქმედენს (რომ. 12:12).

13. მუჭო ელუკინ გურშა იეჰოვაქ აბაკუმს?

¹³ წეკითხით აბაკუმი 2:3. * იეჰოვა კმაყოფილ რდუ აბაკუმიშ გადაწყვეტილებათ. თის ჯგირო არჩქილედ აბაკუმიშ მდგომარეობა, ათეშენ ჸოროფათ გურშა ელუკინ წინასწარმეტყველს დო დარწმუნ, ნამდა მალას ქუპასუხენდჷ თიშ კითხვეფს. ფაქტობრივო იეჰოვაქ აბაკუმს უწუ: „ქიმითვინ დო ქიმმენდჷ. მა ვუპასუხენქ სქან ლოცვას ბრელ დროქ მიკორთას ხოლო“. იეჰოვაქ ქუგაშინ თის, ნამდა დანიშნულ აფუდ დრო, მუჟამსით შეასრულენდჷ მუშ დუნაპირებუს. ღორონთიქ ელუჩ აბაკუმს, მოთვინებათ ქიჯინკო დო საბოლათ გურ ვა გუტირხუდ.

14. მუ ოკო მაფდან გინოჭყვიდილ პრობლემეფიშ დროს?

¹⁴ იეჰოვაშა მოთვინებათ ჯინა დო თიშ რჩქილა, მუსით მირაგადნა, გამმანგარენა ნდობას დო მიმეხვარებნა გურჭუაშ დო პრობლემეფიშ უმკუჯინუო, ვა ვოდინუათ სიმშვიდე. იესოქ ელამჩეს, მივენდათ იეჰოვას დო ყურადღება ვეგნიბღათ დროეფშა დო ვადეფშა, ნამუთ ღორონც ვა გუცხადებ (საქ. 1:7). ათეშენ მორთ, ქუჯინათ იეჰოვას, მუდგას მიმეხვარებნა თანდაბლობა, რწმენა დო მოთვინებაშ გიმორჩქინა; თეს გეძინელ, გონივრულო გიმიბრინუათ დრო დო ვემსახურათ იეჰოვას მთელ ჩქინ შესაძლებლობეფით (მარ. 13:35—37; გალ. 6:9).

15, 16. ა) მუ მნიშვნელოვან დუნაპირებშენ ბგებულენთ აბაკუმიშ წიგნშე? ბ) მუს ბგურაფლენთ ღორონთიშ თე დუნაპირებშე?

¹⁵ იეჰოვა მუშ მსახურეფს ოპირ: „მართალ მუშ ართგურობათ იცოცხლენს“ დო „გეიფშაფუ დედამიწა იეჰოვაშ სიდიადეშ რჩქინათ“ (აბაკ. 2:4, 14). ნამდვილო, თინეფ მით მოთვინებას დო იეჰოვაშ ნდობას გიმირჩქინანა, გეხარენა მარადიულ სიცოცხლეთ.

¹⁶ ართ მეჯინათ, აბაკუმიშ 2:4-ის ინოჭარილ დუნაპირებ, შილებე კონკრეტულ დაპირებათ ვეძირედას. მარა პავლეს ჯგირო არჩქილედ, მუსხით მნიშვნელოვან რდუ თე დუნაპირებ, ათეშენ თინა სუმშა მიშინუ მუშ წერილეფს (რომ. 1:17; გალ. 3:11; ებრ. 10:38). მუდგანერ პრობლემეფს დო სირთულეეფს ვეშეფხვადათინ, შემლებნა დარწმუნებულ ვორდათ, ნამდა იეჰოვაშ ართგურეფ ქუდოფსკიდუთ-და, ქობძირუნთ მუჭო შეასრულენს თინა მუშ დუნაპირებუს. იეჰოვას ოკო, მთელ ყურადღება მომავალიშ იმენდშა მაფდან გინოღალირ.

17. მუშა მარწმუნენა აბაკუმიშ წიგნი?

¹⁷ აბაკუმიშ წიგნი მნიშვნელოვან გაკვეთილ რე არძაშო, მით ბოლო დღალეფს ცხოვრენს. იეჰოვა მარადიულ სიცოცხლეს ოპირ არძას, მით თიშ რწმენას დო ნდობას გიმირჩქინანს. თაშ ნამდა, პრობლემეფიშ დო სირთულეეფიშ უმკუჯინუო, ოკო გუვაგრძელათ ღორონთიშ რწმენაშ დო ნდობაშ გამანგარება. აბაკუმიშ შემთხვევა მარწმუნენა, ნამდა იეჰოვა ჩქი ხოლო ქიმმეხვარებნა დო გუმამანგარენა. თინა ჸოროფათ ფთხინა, ქიმვენდათ თის დო მოთვინებათ ვუჯინათ მერჩქინელ დროს, მუჟამსით ღორონთიშ სამეფოშ მართველობაშ  შედეგო, მთელ დედამიწა ბედნერ დო ლიბ ხასიათიშ კათათ ეიფშაფუ (მათ. 5:5; ებრ. 10:36—39).

18. მუჭო იმოქმედ იეჰოვაშ სიტყვეფქ აბაკუმწკუმა?

¹⁸ წეკითხით აბაკუმი 3:16—19. * იეჰოვაშ სიტყვეფქ მანგარო იმოქმედ აბაკუმწკუმა. თინა ფიქრენდჷ, მუჭო ოხვარუდ იეჰოვა ჯვეშ დროს მუშ ხალხის. თეგვარო, თის ღორონთიშ ნდობაქ გემანგარ დო დერწმუნ, ნამდა მალას იმოქმედენდჷ. თექ გურშა ელუკინ წინასწარმეტყველს თიშ უმკუჯინუო, ნამდა უჩქუდ მუშ ტანჯება გეგრძელებუდ. აბაკუმს უკვე მუთუნნერ ეჭვეფ ვა უღუდ დო სრულაშო ქიმიენდჷ იეჰოვაშ მარსხებელ ძალას. მა-18 მუხლის ინოჭარილ აბაკუმიშ სიტყვეფ, არძაშ უმოსო ამტკიცენს, ნამდა თინა ნამდვილო ღორონთშა რდუ მენდებულ. ნამთინე მეცნიერიშ აზრით თე მუხლის ინოჭარილ სიტყვეფ სიტყვასიტყვით ხიოლით ტრიალს დო გილასხაპინს ნიშნენს. მუშ მადიდა იმენდის მარზენა თენა არძას. იეჰოვა ხვალე მომავალიშ დიდებულ იმენდის ვა მოპირნა; თინა მარწმუნენა, ნამდა უკვე მოქმედენს მუშ დუნაპირებუშ შეიოსრულებელო.

19. მუჭო შემლებნა მიბღათ თიცალ გურიშ ელაკინა, მუშნერით აბაკუმქ მიღჷ?

¹⁹ აბაკუმიშ წიგნშე ბგებულენთ, ნამდა იეჰოვაშა მენდება მნიშვნელოვან რე (აბაკ. 2:4). ნდობას გუვავითარენთ, მუჟამსით გუვამანგარენთ იეჰოვაწკუმა ურთიერთობას. ათეშენ საჭირო რე: 1) ვემვოტუათ ლოცვა დო ჩქინ ოწუხებელ იეჰოვას მივანდათ, 2) მთელ ყურადღება იეჰოვაშ სიტყვაშა დო თი მითითებეფშა გეგნიბღათ, მუდგას თიშ ორგანიზაციაშე ბღებულენთ, 3) გეგმიფრჩქინათ ართგურობა დო მოთვინებათ ვუჯინათ იეჰოვას. აბაკუმქ თეშ ჯგირ მაგალით დომტუეს. დუდშე თის მანგარო აფუდ გურ გოტახილ, მარა იეჰოვაწკუმა რაგადიშ უკულ, გურშა ელაკინ დო ხიოლქ დართჷ. აბაკუმიშ მაგალითის ქიმვაჸუნუთ-და, ზეციერ მუმა, იეჰოვა, ჩქი ხოლო ელამკინანა გურშა. თე უბადობათ ეფშა ქიანას, თეშე უმოს გურიშ ელაკინა სოთინ ვა მაგორენა!