1, 2. ა) მუჭო უპასუხ იესოქ პეტრეშ რჩევას? (ქოძირით სურათ თე გვერდის). ბ) მუშენ მეჩჷ იესოქ პეტრეს თეცალ პასუხ?

იესოშ მოწაფეეფს უჭირა თიშ დაჯერება, მუთ გეგეს. თინეფ ფიქრენა, იესო ისრაელიშ სამეფოს აღადგინენს, მარა თინა ურაგად, ნამდა მალას აწამენა დო დოჸვილნა. ზუსტას თე დროს მოციქულ პეტრე იესოს ურაგად: „უფალი, ქეშიცოდილე დუდი! ვა უკეთა თენა სქან დუც“. მარა იესო პასუხენს: „დემეთხი, სატანა! დაბრკოლება რექ ჩქიმო, მუშენდა მუთ ღორონთშე რენ თიშე ვარინ, მუთ კოჩშე რენ თიშე ფიქრენქ“ (მათ. 16:21—23; საქ. 1:6).

² თე სიტყვეფით იესოქ ქაძირუ, მუ განსხვავება რე ღორონთიშ აზროვნება დო ქვეყნიერებაშ აზროვნება შქას, ნამუსით სატანა მართუნს (1 იოან. 5:19). პეტრექ იესოს ელუჩ მუშ დუდშე უფიქრებუდკო, მუთ ქვეყნიერებაშო რე დამახასიათებელ. მარა ქრისტეს არჩქილედ, ნამდა მუშ ზეციერ მუმა შხვანერო ფიქრენდჷ. თის უჩქუდ, ნამდა ღორონც ოკოდ, მემზადკო ტანჯვა დო ღურაშო, მუთ წოხოლე ელუდ. იესოქ მუშ პასუხით ქაძირუ, ნამდა თიშო მნიშვნელოვან იეჰოვაშ აზროვნება რდუ დო ვეიაჸუნ ქვეყნიურ აზროვნებას.

3. მუშენ რე ძნელ მიღდან იეჰოვაშ აზროვნება?

 ³ მუშ რაგად შილებე ჩქინდე? იეჰოვაშ მოსაწონ აზროვნება მიღნა დო ვარ ქვეყნიერებაშ? მუშო ოკო რაგად, ირნერო ვოცადუთ ვასიამოვნათ ღორონც. მარა მუშ რაგად შილებე ჩქინ აზროვნებაშე? ქუვოცადუთო მიღდან იეჰოვაშ აზროვნება დო შეხედულებეფი? თეშო დიდ მონდომა რე საჭირო, მარა თეშ გინაწონს, ბრელ მუთუნ ვაკო, გევაჸუნათ ქვეყნიერებაშ აზროვნებას. თეშ მიზეზ თინა რე, ნამდა ქვეყნიერებაშ შურ ირდიხას რე გავრცელებურ (ეფეს. 2:2). ხალხიშ უმენტაშ ეგოისტურ სურვილეფს გიმირჩქინანს, ათეშენ შილებე ადვილო გევაჸუნათ თის. ნამდვილო, ადვილ ვა რე მიღდან იეჰოვაშ აზროვნება, მარა შუროთ ვა რე ძნელ, გევაჸუნათ ქვეყნიერებაშ აზროვნებას.

4. ა) მუშენ ოკო ვემეფჩათ ქვეყნიერებას საშვალება, ქიმოქმედას ჩქინ აზროვნებაწკუმა? ბ) მუს მიმეხვარებნა თე სტატია?

⁴ ქვეყნიერებას ქიმეფჩანთ საშვალებას ჩქინ აზროვნებაწკუმა ქიმოქმედას-და, ვა რე გამორიცხულ, ეგოისტურ სურვილეფქ გომრჩქინდან დო ჩქინით გეგნობჭყვიდათ ჯგირ დო ფურ (მარ. 7:21, 22). თაშ ნამდა, მნიშვნელოვან რე, გუვავითარათ ღორონთიშ მოსაწონ აზროვნება დო ვართ ხოლო ქვეყნიერებაშ. თე სტატიაშე ქიგებგენთ, ნამდა იეჰოვაშ აზროვნება სასარგებლო რე; თინა ზედმეტო მკაცრ ვა რე. თეწკუმა ართო თის ხოლო ქობძირუნთ, მუჭო დეფცვათ დუდ ქვეყნიურ აზროვნებაშე. თეშ უკულიან სტატიას გარჩიებულ იჸი, მუჭო შემლებნა მიღდან იეჰოვაშ აზროვნება შხვადოშხვა საკითხის.

5. მუშენ ვაკო ნამთინეს თინეფიშ აზროვნებაწკუმა მითინქ ქიმოქმედას?

⁵ ნამთინეს ვაკო თინეფიშ აზროვნებაწკუმა მითინქ ქიმოქმედას. თეცალ კათა იჩიებ: „მა ჩქიმ აზრი მიღჷ“. თე სიტყვეფით თიშ რაგად ოკონა, ნამდა უფლება უღნა მუნეფიშით მიღან გადაწყვეტილებეფ. თინეფს ვაკონა შხვეფქ აკონტროლან დო ვართ თინა, ნამდა ინდივიდუალურობა მიოდინუან. *

6. ა) მუნერ თავისუფლება მუჩეს იეჰოვაქ? ბ) ქოუღუნო თე თავისუფლებას საზღვარ?

⁶ შემლებნა დარწმუნებულ ვორდათ, ნამდა შხვადოშხვა საკითხეფშა იეჰოვაშ თოლით ჯინა, ვა ნიშნენს, ვეგმოფხანტათ ჩქინ აზრი. მუჭოთ 2 კორინთელეფიშ 3:17-ის ჭარჷ: „სოდეთ იეჰოვაშ შურ რენ თექ თავისუფლება რე“. იეჰოვა მარზენა საშვალებას გიშაბგორათ დო ვაკეთათ თინა, მუთ მოინტერესნა. სინამდვილეს, იეჰოვაქ გაჭყჷ კოჩ თეცალო. მარა ჩქინ თავისუფლებას საზღვარ უღჷ (წეკითხით 1 პეტრე 2:16). * მუჟამსით საქმე ოხუ ჯგირ დო ფურიშ გინოჭყვიდუას ოხუ, იეჰოვას ოკო, იფხემძღვანელათ თი მითითებეფით, ნამუთ მოჩამილ რე მუშ სიტყვას. ზედმეტო ხომ ვა ბზღუდენა თენა დო ვარ სასარგებლო რე?

7, 8. მუშენ ვა ნიშნენს იეჰოვაშ აზროვნებაშ გავითარება, ჩქინ თავისუფლებაშ შეზღუდვას? ქიმიჸონით მაგალით.

⁷ ქიმიპჸონათ მაგალით. მშობლეფ ოცადნა სქუალეფს ჯგირ ფასეულობეფ ჩაუნერგან. თინეფ შილებე ოგურუანა, ნამდა რდან პატიოსანეფ, ყურადღებიანეფ დო უჸორდან მუშობა. მარა თენა თის ვა ნიშნენს, ბაღანას მანგარო ზღუდენა. პირიქით, მშობლეფ ამზადენა თინეფს, წარმატებულ ცხოვრებაშო. მუჟამსით სქუალეფ მირდუნა დო ცალკე გინილენა ოცხოვრეფშა, თინეფს შეიალებენა მუნეფიშით მიღან გადაწყვეტილებეფ. მშობლეფიშ დუნაგურეფ  ფასეულობეფით ქიცხოვრენან-და, თიცალ გადაწყვეტილებეფს მიღენა, ნამუსით დღას ვენარღენა. შედეგო ბრელ პრობლემეფს დო ოწუხებელს ეიჩილითუანა.

⁸ ჯგირ მშობელცალო, იეჰოვას ხოლო ოკო მუშ სქუალეფქ ბედნერო იცხოვრან (ეს. 48:17, 18). ათეშენ თინა მარზენა მნიშვნელოვან პრინციპეფს ზნეობაშე დო თიშე, მუჭო მივექცუათ შხვეფს. თეცალ საკითხეფს იეჰოვას ოკო, მუს უღუნ თიცალ თვალსაზრის მიღდან დო იფცხოვრათ თიშ შესაბამისო. თე ირფელ ჩქინ თავისუფლებას ვა ზღუდენს. პირიქით, თენა მოხვარნა მიღდან სწორ აზროვნება (ფსალმ. 92:5; იგავ. 2:1—5; ეს. 55:9). თეს გეძინელ, თენა მიმეხვარებნა სწორ არჩევანიშ კეთებას, ნამუთ ბედნერობას მომღანა; თეწკუმა ართო შემალებენა ვაკეთათ თინა, მუთ მიჸორა დო მოინტერესნა (ფსალმ. 1:2, 3). ნამდვილო, იეჰოვაცალ აზროვნება ირიათო ჯგირობუას მომღანა.

9, 10. მუთ რე აღმატებულ ღორონთიშ აზროვნება ქვეყნიერებაშ აზროვნებაშე?

⁹ ხოლო ართ მიზეზ, მუშენ ოკო გუვავითარათ იეჰოვაცალ აზროვნება, თინა რე, ნამდა ღორონთიშ აზროვნება ქვეყნიერებაშ აზროვნებაშე აღმატებულ რე. ქვეყნიერება ფთავაზენა რჩევეფს ზნეობაშე, ოჯახურ ბედნერობაშე, წარმატებულ კარიერაშე დო შხვა ცხოვრებისეულ საკითხეფშენ. მარა თინა შურო ვემურე ღორონთიშ აზროვნებას. მაგალთო, ქვეყნიერება ხშირას მომწოდენა ხვალე ჩქინ დუდშო იფიფქრათ. თეს გეძინელ, ელამჩანა უზნეობა ჩვეულებრივ მუდგარენო მიფრჩქინათ. ცალ-ცალკე ცხოვრება დო განქორწინება სერიოზულ მიზეზიშ უმშო პრობლემათ ვარინ, ბედნერ ცხოვრებაშ ართ-ართ საშვალებათ მიორჩქუნა. თენა ოწინააღმდეგ ბიბლიურ თვალსაზრისის. მარა ქორენო ამდღა ბიბლიურ რჩევეფ პრაქტიკულ?

¹⁰ იესოქ თქუ: „სიბრძნეშ სიმართლეს საქმეეფ ოძირანს“ (მათ. 11:19). ქვეყნიერებაქ დიდ წარმატებას მიოჭირინუ ტექნოლოგიას, მარა თის ვეშულებ მაგვარას თიცალ პრობლემეფ, ნამუთ ბედნერობას მიდმამღანა, მაგალთო ჩხუპი, რასიზმი დო დამნაშავეობა. თეს გეძინელ, ქვეყნიერებას უზნეობა ჩვეულებრივ მუდგარენო მიორჩქუნა. მარა ხალხიშ უმენტაშ იჩიებ, ნამდა თენა ოჯახეფს აკმარღვანს, ჯამრთელობაშ პრობლებეფს ორჩქინანს დო შხვა გლახა შედეგეფ მოჸუნს. თეშ გინაწონს, ქრისტიანეფს, მიდგას ღორონთიშ თოლით უჯინე თე საკითხეფს, უმოს ბედნერ ოჯახ უღნა, უმოს ჯამრთელეფ რენა დო ართიანწკუმა მშვიდობა უღნა (ეს. 2:4; საქ. 10:34, 35; 1 კორ. 6:9—11). ვერწყებენო თავრეშე, ნამდა ღორონთიშ აზროვნება აღმატებულ რე ქვეყნიერებაშ აზროვნებაშე?

11. მის არზენდჷ საშვალებას მოსე, ქიმოქმედკო თიშ აზროვნებაწკუმა დო მუ შედეგიქ მაჸუნ თეს?

¹¹ ჯვეშ დროს მახორუ ართგურ მსახურეფს უჩქუდეს, ნამდა იეჰოვაშ აზროვნება აღმატებულ რდუ. მაგალთო, მოსეს „ეგვიპტელეფიშ მთელ სიბრძნე“ აფუდ დოგურაფილ, მარა თის უჩქუდ, ნამდა ნამდვილ სიბრძნე ღორონთშე მიშ (საქ. 7:22; ფსალმ. 90:12). თიქ იეჰოვას თხუ: „ქუგმოგებაფე სქან შარეფი“ (გამ. 33:13). მოსე საშვალებას არზენდჷ იეჰოვას, ქიმოქმედკო თიშ აზროვნებაწკუმა, ათეშენ ღორონთიქ თინა მუშ განზრახვაშ შეიოსრულებერო გეგმირინუ; თეს გეძინელ, წმინდა წერილეფს მოსე მოშინაფილ რე პიროვნებათ, მიდგას დიდ რწმენა უღუდ (ებრ. 11:24—27).

12. ნამ პრინციპეფით ხემძღვანელენდჷ პავლე?

¹² პავლე მოციქულ გურაფილ კოჩ რდუ; თის არძაშ უნაკლებაშ ჟირ ნინა უჩქუდ (საქ. 5:34; 21:37, 39; 22:2, 3). მარა მუჟამსით საქმე ჯგირ დო ფურს ოხუდ, თინა ქვეყნიურ სიბრძნეთ ვარინ, წმინდა წერილეფით ხემძღვანელენდჷ (წეკითხით საქმეები 17:2; 1 კორინთელები  2:6, 7, 13). * შედეგო, თინა წარმატებულო მსახურენდჷ დო მარადიულ ჯილდოს უჯინედ (2 ტიმ. 4:8).

13. მიშ პასუხიშმგებლობა რე თიცალ აზროვნებაშ გავითარება, მუნერით ღორონც უღჷ?

¹³ ნამდვილო, ღორონთიშ აზროვნება აღმატებულ რე ქვეყნიერებაშ აზროვნებაშე. ღორონთიშ აზროვნებათ ცხოვრება დიდ ბედნერობა დო წარმატებას მომღანა. მარა იეჰოვა ვა მანძალენა მიღდან თიშ აზროვნება. ვართ „ართგურ დო გონიერ მონა“ დო ვართ უხუცესეფ აკონტროლენა ჩქინ ფიქრეფს (მათ. 24:45; 2 კორ. 1:24). თეშ მანგიორო, თითოულ ქრისტიანიშ პასუხიშმგებლობა რე, გავითარას თიცალ აზროვნება, მუნერით ღორონც უღჷ. მუჭო შემლებნა თეშ კეთება?

14, 15. ა) მუშ გურშენ ოკო იფიფქრათ, ნამდა იეჰოვაცალ აზროვნება გუვავითარათ? ბ) მუჭოთ რომაელეფიშ 12:2-ს ჭარუნ, მუშენ ოკო ევუჩილითუათ დუდ ქვეყნიურ აზროვნებას? ქიმიჸონით მაგალით.

¹⁴ რომაელეფიშ 12:2-ს ჭარჷ: „ვეცხოვრათ ქვეყნიერებაშ ნებაშა, გეახალით გონება დო დითირით, ნამდა დერწმუნათ, მუ რე ღორონთიშ ნება — ჯგირ, მოსაწონ დო სრულყოფილ“. თე სიტყვეფშე იძირე, ნამდა მუდგანერ აზროვნება ვამღუდესკონ, ჭეშმარიტებაშ გაგებაშ უკულ, ოკო დოფთირუათ თინა დო გუვავითარათ ღორონთიშ მოსაწონ აზროვნება. მართალ რე, გენეტიკა დო ულირ ცხოვრება მოქმედენს ჩქინ აზროვნებაწკუმა, მარა იშენით შეიოლებერ რე დიფთირათ. ცვლილებეფ უმენტაშო დამოკიდებულ რე თიშა, მუშ ფიქრიშ საშვალებას ვარზენთ ჩქინ გონებას. იეჰოვაშ აზრეფშენ ქოფიფქრენთ-და, ჩქინ დუდშა გეგმოფცადუნთ, ნამდა თიშ აზროვნება სწორ რე. თეშ უკულ, უმოსო ქუმაშინა სურვილ, ღორონთიშ თოლით ვუჯინათ საკითხეფს.

¹⁵ იეჰოვაშ აზროვნებაშ გავითარებელო აუცილებერ რე, საშვალება ვემეფჩათ ქვეყნიერებას ქიმოქმედას ჩქინ აზროვნებაწკუმა. თენა ნიშნენს, ჩეფთხინუათ თიცალ აზროვნება დო ფიქრეფ, მუთ ოწინააღმდეგ ღორონთიშ აზროვნებას. თე საკითხიშ უჯგუშო გაგებას მიმეხვარებნა ოჭკუმალიშ მაგალით. ჯგირ ჯამრთელობაშო საჭირო რე მიბღათ ჯანსაღ ოჭკუმალ. მარა ქიმერგებნანო თინა, მოწამალერ ოჭკუმალწკუმა ართო ობჭკუმით-და? თეგვარო, იეჰოვაშ აზროვნება ხოლო ვემოქმედებ ჩქინწკუმა, ქვეყნიურ აზრეფშენ ხოლო ქოფიფქრენთ-და.

16. მუს ოკო ევუჩილითუათ დუდ?

¹⁶ ქეშმალებენანო სრულაშო ევუჩილითუათ დუდ ქვეყნიურ აზროვნებას? მუშო ოკო რაგად, ვარ (1 კორ. 5:9, 10). მაგალთო, ქადაქებაშ დროს შეფხვადუთ თიცალ კათას, მიდგას სწორ ვა რენ ფერ აზროვნება უღჷ დო ტყურა გურაფეფიშ წანს. მართალ რე, თეცალ კათაშა დუდ ვემაჩილითენა, მარა ვევაჸუნათ ოკო თინეფიშ აზროვნებას. იესოცალო, ჩქი ხოლო ხეთეშე ვარია ოკო ქოფთქუათ თიცალ აზრეფშე, ნამუთ სატანაშე მოურს. თაშ ნამდა, ირნერო ქივეცადათ, დეფცვათ დუდ ქვეყნიერებაშ აზროვნებაშე (წეკითხით იგავები 4:23). *

17. მუჭო შემლებნა დუდ ევუჩილითუათ ქვეყნიურ აზროვნებას?

¹⁷ მაგალთო, კურცხას ოკო ვორდათ მეგობრეფიშ გიშაგორუაშ დროს. ბიბლია მაფრთხილენა, ნამდა თი კათაწკუმა მეგობრობა,  მით ვამსახურ იეჰოვას, გლახათ იმოქმედენს ჩქინ აზროვნებაწკუმა (იგავ. 13:20; 1 კორ. 15:12, 32, 33). კურცხას ოკო ვორდათ გართობაშ გიშაგორუაშ დროს ხოლო. ვეგშაბგორათ ოკო თიცალ გართობა, ნამუთ ხუც უკინენს ევოლუციას, ძალადობას დო უზნეობას. თეგვარო, შემალებენა დეფცვათ ჩქინ აზროვნება დო ვებდათ „ღორონთიშ გურშენ რჩქინაშ წინააღმდეგ“ (2 კორ. 10:5).

18, 19. ა) მუშენ ოკო დეფცათ დუდ თიცალ ქვეყნიურ აზროვნებაშე, ნამუთ არგამათ ვეძირე? ბ) მუ კითხვეფ ოკო დუსვათ ჩქინ დუც დო მუშენ?

¹⁸ ჯგირ იჸუაფ გეგშიფჩინათ დო ვევაჸუნათ თიცალ აზროვნებას, ნამუთ არგამათ ვეძირე. მაგალთო, ახალ ამბეფს შილებე თიცალო გინოჩანდან, ნამდა ნამდგაინ პოლიტიკურ აზრის უკინენდან ხუჯის. ნამთინე გადაცემას შხვადოშხვა პიროვნებეფიშ ისტორიეფს გინოჩანა, სოდეთ ქვეყნიურ მიზნეფ დო მიღწევეფშა ამახვილენა ყურადღებას. ნამთინე ფილმის დო წიგნის ჯგირო რე ძირაფილ პირველ რიგის პირად ინტერესეფიშ დო ოჯახიშ გერნაფა, მარა თეცალ დამოკიდებულება ოწინააღმდეგ ბიბლიას მოჩამილ აზრეფს. ღორონთიშ სიტყვა მირაგადნა, ნამდა წარმატებულ ოჯახ მაღვენუნა დო ბედნერეფ თიმწკუმა იპჸუაფუთ, მუჟამსით არძაშ უმოსო იეჰოვას ქიპჸოროფუანთ (მათ. 22:36—39). ბაღანეფიშ მოთხრობეფიშ უმენტაშის გლახა მუთუნ ვა ჭარჷ, მარა თექ ხოლო შილებე თიცალ მუდგარენ რდას, მუთ უზნეობაშა უბიძგენს.

¹⁹ მარა თე ირფელ ვა ნიშნენს, საერთოდ ვარია ქოფთქუათ გართობაშე. ჯგირ იჸუაფ ქოპკითხათ ჩქინ დუც: ქეშმალებენო ქვეყნიურ აზროვნებაშ გიშაჩინება თიმწკუმა ხოლო, მუჟამსით არგამათ ვეძირე? ქუვაკონტროლენქო ბაღანეფს დო ჩქიმ დუც, ნამდა თეცალ გადაცემეფიშ ჯინას დო წიგნეფიშ კითხირს დუდ ევუჩილითუე? ქუვოხვარუქო ბაღანეფს უღდან იეჰოვაშ აზროვნება შხვადოშხვა საკითხეფს, ნამდა ქვეყნიურ აზროვნებაქ ვემოქმედას თინეფწკუმა? ქვეყნიერება ვემოქმედებ ჩქინწკუმა, მუჟამსით მარჩქვენუნა, მუ განსხვავება რე ღორონთიშ აზროვნება დო ქვეყნიურ აზროვნება შკას.

20. მუშა რე დამოკიდებულ, მუნერ აზროვნება მაღვენუნა?

²⁰ ირიათო ფშუდან, ნამდა არსებენს ჟირნერ აზროვნება: ართ რე იეჰოვაშ დო მაჟია — ქვეყნიერებაშ, ნამუსით სატანა მართუნს. ნამუშ აზროვნება მოქმედენს ჩქინწკუმა? თენა დამოკიდებულ რე თიშა, სოვრეშე ბღებულენთ ინფორმაციას. ქვეყნიურშენ ქოფიფქრენთ-და, თენა იმოქმედებ ჩქინ აზროვნებაწკუმა დო შედეგო, თიცალ ფიქრეფ დო მოქმედება მაღვენუნა, მუნერით ამდღა ხალხიშ უმენტაშის უღჷ. ათეშენ, მნიშვნელოვან რე დეფიფქრათ, მუთ რე ჩქინ გონება დაკავებულ დო მუშე ფიფქრენთ.

21. მუ მნიშვნელოვან კითხვას გუვარჩიენთ თეშ უკულიან სტატიას?

²¹ თე სტატიაშე ქობძირით, ნამდა ქუმოკონა იეჰოვაშ აზროვნება გუვავითარათ-და, დუდ ოკო ევუჩილითუათ ქვეყნიურ აზროვნებას. თეს გეძინელ, ოკო იფიფქრათ ღორონთიშ აზრეფშე, ნამდა ჩქი ხოლო მიღდან თიშ აზროვნება ირნერ საკითხის. თეშ უკულიან სტატიას ქობძირუნთ, მუჭო შემლებნა თეშ კეთება.