1, 2. მუს მიმეხვარებნა იეჰოვაშ უმოსო გაჩინებაფა? ქიმიჸონით მაგალით.

წერმიდგინით, ნამდა ჭიჭე ბაღანას საჩუქარს არზენა. მშობლეფ ურაგადნა: „მადლობა ქუწი“. ბაღანას ვარჩქილე თეშ მნიშვნელობა, მარა ომორჩილ თინეფს. მუჭოთ ირდუნ, უმოსო ესმებ, მუშენ ფიქრენა მშობლეფ, ნამდა მნიშვნელოვან რე სიმარდულიშ გიმოხანტუა. ათეშენ, ასე უკვე მთელ შურ დო გურით გიმოხანტუნს სიმარდულს.

² თეგვარო, მუჟამსით პირველო გებგით ჭეშმარიტება, ქობძირით, მუშენ რე მნიშვნელოვან ღორონთიშ ძირითად მითითებეფიშ მორჩილება. მარა, მუთ უმოსო იფჩინებაფუანთ იეჰოვას, თით უმოსო მარჩქილენა, მუჭო უჯინე თინა შხვადოშხვა საკითხეფს, თეს გეძინელ, მუ მოწონს დო მუ ვა მოწონს. მუჟამსით, საშვალებას ვარზენთ იეჰოვაშ აზროვნებას ქიმოქმედას ჩქინ გადაწყვეტილებეფშა დო საქციელშა, თეთ ვოძირანთ, ნამდა საკითხეფს იეჰოვაშ თოლით ვუჯინეთ.

3. მუშენ ვა რე ადვილ გუვავითარათ თიცალ აზროვნება, მუნერით იეჰოვას უღჷ?

³ მართალ რე, მოსიამოვნუნა თიშ გაგება, მუჭო უჯინე იეჰოვა საკითხეფს, მარა არასრულყოფილეფ ვორეთ, ათეშენ ირიათო ადვილ ვა რე გუვავითარათ იეჰოვაშ აზროვნება. მაგალთო, შილებე  ბოლოშა ვა მარჩქილენა იეჰოვაშ თვალსაზრის თიცალ საკითხეფს მუნერით რე: ზნეობა, მატერიალიზმი, ქადაგებაშ საქმე, ზისხირიშ გინობუნა დო შხვა. მუჭო შემლებნა დიბგურუათ, იეჰოვაშ აზროვნებაშ გავითარება თეცალ საკითხეფს? მუჭო იმოქმედენს თენა ჩქინ გადაწყვეტილებეფშა ამდღა დო მომავალს?

4. მუ რე საჭირო, მივაჸუნათ პავლეშ რჩევას დო გუვაახალათ გონება?

⁴ წეკითხით რომაელები 12:2. * მოციქულ პავლე თაქ იჩიებ, მუ ოკო ვაკეთათ, ნამდა გუვავითარათ თიცალ აზროვნება, მუნერით ღორონც უღჷ. წოხლენ სტატიაშე ქიგებგით, ნამდა ქვეყნიერებაშ ნებაშა ვეფცხოვრათინ თიშო, აუცილებერ რე ჩეფთხინუათ ქვეყნიურ აზროვნება დო თვისებეფ. მარა პავლექ ქრისტიანეფს თინა ხოლო უწუ: „გეახალით გონება“. თეშო აუცილებერ რე ბიბლიაშ გურაფა, თექ მოჩამილ აზრეფშე დაფიქრება დო მონდომა, ნამდა გუვავითარათ თიცალ აზროვნება, მუნერით ღორონც უღჷ.

5. გენწყით, მუ განსხვავება რე მიკოსურებულ კითხირ დო გურაფა შქას.

⁵ გურაფა უმოს მეტის ნიშნენს, ვინემ მიკოსურებულო კითხირს დო სწორ პასუხეფიშ გოხაზუას. გურაფაშ დროს ოკო დეფიფქრათ, მუს მოგურუანა თე საკითხ იეჰოვაშე, თიშ შარეფშე დო აზროვნებაშე. თეს გეძინელ, ოკო ვეცადათ ქიგებგათ მუშენ იწონუანს იეჰოვა ნამთინე საკითხის დო ნამთინეს — ვარ. თეწკუმა ართო, ოკო დეფიფქრათ მუ მაფნა ოთირალ ჩქინ ფიქრეფს დო ცხოვრებას. მუშო ოკო რაგად, გურაფაშ დროს არძა თე საკითხშე დაფიქრებაქ შილებე ვეშმალებუან, მარა ჯგირ იჸუაფ დრო გეგმვურთათ გურაფას და ნაკითხერშე ფიქრის (ფსალმ. 119:97; 1 ტიმ. 4:15).

6. მუ შედეგ მაჸუნუ, მუჟამსით ღორონთიშ სიტყვაშე დიბჭყანთ ფიქრის?

⁶ მუჟამსით ღორონთიშ სიტყვაშე რეგულარულო დეფიფქრებუთ, უმოსო ქინვანჭუთ დო დებრწმუნებუთ, ნამდა იეჰოვაშ აზროვნება სრულყოფილ რე. თე დროს ჩქი ხოლო იბჭყანთ საკითხეფიშ იეჰოვაშ თოლით ჯინას. თეგვარო, ჩქინ აზროვნება იახალებ დო ვავითარენთ იეჰოვაშ აზროვნებას.

7, 8. ა) მუნერ თვალსაზრის უღჷ იეჰოვას მატერიალურ საკითხეფწკუმა? (ქოძირით სურათეფ 23-ა გვერდის) ბ) მუჟამსით თეცალ აზროვნებას გუვავითარენთ, მუს გივორინუანთ ირიათო პირველ ადგილს?

⁷ ფიქრი ხვალე საკითხეფწკუმა დამოკიდებულებას ვარინ, ჩქინ საქციელწკუმა ხოლო მოქმედენს (მარ. 7:21—23; იაკ. 2:17). მორთ, გუვარჩუათ მუსხირენ მაგალით დო უჯგუშო ქიგებგათ თე საკითხი. პირველ, სახარებეფშე ჯგირო იძირე, მუჭო უჯინე იეჰოვა მატერიალურ საკითხეფს. ღორონთიქ გიშეგორ ღარიბ წყვილ მარიამ დო იოსებ, ნამდა მორდესკო იესო (ლევ. 12:8; ლუკ. 2:24). მუჟამსით იესოქ დებად, მარიამქ თინა „ფინახარს ქინანჯირუ, მუშენდა სასტუმროს ადგილ ვარდ“ (ლუკ. 2:7). იეჰოვას ქაკოდკონ ირფელს გაკეთენდჷ, ნამდა იესოქ უჯგუშ პირობეფს ქიდებადუკო. მარა, თიშო მთავარ რდუ სულიერ გარემო, სოდეთ იესოშე იზრუნენდეს დო მორდუნდეს.

⁸ ბიბლიას მოჩამილ თე შემთხვევაშე ვორწყეთ, იეჰოვაშ თვალსაზრისის მატერიალურ საკითხეფშე. ნამთინე მშობელს უსხუნ, ნამდა მუნეფიშ სქუალეფს მატერიალურო ჯგირ მდგომარეობა უღდან სულიერობაშ ხარჯშა. მარა, არგამა რე, ნამდა იეჰოვაშო მთავარ ჩქინ სულიერ მდგომარეობა რე. ქუჯინექო თე საკითხის იეჰოვაშ თოლით? მუს ოძირანს სქან საქმეეფ? (წეკითხით ებრაელები 13:5). *

9, 10. მუჭო ვოძირანთ, ნამდა შხვეფიშ დაბრკოლებას იეჰოვაშ თოლით ვუჯინეთ?

 ⁹ მაჟია საკითხ თინა რე, მუჭო უჯინე იეჰოვა თი პიროვნებას, ნამუთ შხვეფს აბრკოლენს. იესოქ თქუ: „მით დაბრკოლენს ართის თე ჭიჭე ჯგუფშე, მიდგას მა ბწანქ, თიშო უჯგჷ, კისერს სქიბუშ ქუა ქიგიობუნუან დო შქა ზღვას ქინაჸათან“ (მარ. 9:42). იესოს უჩქუდ, ნამდა შხვეფიშ დაბრკოლება სერიოზულ საკითხ რდუ. თინა სრულყოფილო გიმირჩქინანს მუშ მუმაშ თვისებეფს, ათეშენ შემლებნა დარწმუნებულ ვორდათ, ნამდა იეჰოვა შხვეფიშ დაბრკოლებაშ საკითხის სერიოზულო უჯინე (იოან. 14:9).

¹⁰ ქომღუნანო თე საკითხშე თიცალ თვალსაზრის, მუნერით იეჰოვას დო იესოს უღნა? მუს ოძირანს ჩქინ საქციელ? მაგალთო, შილებე გარკვეულ სტილიშ გარეგნობა დო მიკაქუნალ მობწონა. მარა, მუჭო მიფქციებუთ, მუჟამსით ქიგებგენთ, ნამდა თენა კრებაშ წევრეფს აბრკოლენს ვარდა უზნეო ფიქრეფს ურჩქინანს? ჯიმალეფიშ ჸოროფა მიმეხვარებნა ვარია ქოფთქუათ თიცალ გარეგნობაშე დო მიკოქუნაშ სტილშე, ნამუთ დაბრკოლენს თინეფს (1 ტიმ. 2:9, 10).

11, 12. მუჭო დამცვენა გლახაშ კეთებაშე დუდშეკება დო თიცალ აზროვნება, მუნერით იეჰოვას უღჷ?

¹¹ ხოლო რე მასმა საკითხ: იეჰოვას ჯოგჷ უსამართლობა (ეს. 61:8). მუშო ოკო რაგად, თის ჯგირო არჩქილე, ნამდა არასრულყოფილეფ ვორეთ, ათეშენ მინშა რთულ რე ვაკეთათ თინა, მუთ სწორ რე. მარა ღორონც ოკო უსამართლობაშე თიცალ თვალსაზრის გუვავითარათ, მუნერით მუს უღჷ (წეკითხით ფსალმუნი 97:10). * თიშე ფიქრი, მუშენ ჯოგჷ იეჰოვას გლახა საქმეეფ, მიმეხვარებნა მიღდან თიშ აზროვნება დო შემალებენა ვა ვაკეთათ თინა, მუთ ღორონთიშ თოლს სწორ ვა რე.

¹² უსამართლობაშე იეჰოვაშ თვალსაზრისიშ გავითარება მიმეხვარებნა თიშ გააზრებას, ნამდა რე თიშნერ საკითხეფ, ნამუთ ღორონთიშ სიტყვას კონკრეტულო ვა რე მოშინაფილ, მარა სწორ ვა რე. მაგალთო, თეცალ რე ეროტიკულ სხაპუა, ნამუთ მთელ მსოფლიოს რე გავრცელებურ. ნამთინექ, შილებე თეცალ საქციელ გლახათ ვემირჩქინას, მუშენდა თე დროს სექსუალურ ურთიერთობა ვა უღჷ მითინწკუმა. * მარა ქორენო თეცალ საქციელ მოსაწონ იეჰოვაშო, ნამუსით ჯოგჷ ირნერ გლახა საქციელ? მორთ, გუვავითარათ დუდშეკება, ნამდა შორს ქიდებკინათ დუდ თიცალ საქმეეფშე, ნამუთ ჯოგჷ იეჰოვას (რომ. 12:9).

13. მუშენ ოკო დეფიფქრათ ამდღარშე, მუჭო უჯინე იეჰოვა შხვადოშხვა საკითხეფს?

¹³ გურაფაშ დროს ოკო დეფიფქრათ, მუჭო უჯინე იეჰოვა შხვადოშხვა საკითხეფს, მუთ მიმეხვარებნა მიბღათ სწორ გადაწყვეტილებეფ მომავალს. თენა მიმეხვარებნა მზათ იპჸუათ თიცალ სიტუაციეფშო, მუჟამსით მნიშვნელოვან გადაწყვეტილებეფ უცბას მაჸინა მიოღებელ (იგავ. 22:3). მორთ, გუვარჩუათ მუსხირენ ბიბლიურ მაგალით.

14. მუს ბგურაფლენთ იოსებიშ მაგალითშე?

¹⁴ მუჟამსით ფოტიფარიშ ოსურქ იოსებიშ მეჩილითაფა მინდომ, თიქ ხეთეშე ვარია ქუწუ დო თეთ ქაძირუ, ნამდა იეჰოვაშ თვალსაზრის უღუდ ქორწინებაშ საკითხის (წეკითხით დაბადება 39:8, 9). * თენა იძირე თი  სიტყვეფშე, ნამუთ იოსებიქ ფოტიფარიშ ოსურს უწუ: „მუჭო ვაკეთა თეშ მადიდა უბადობა დო შებცოდა ღორონც?!“. მუშ რაგად შილებე ჩქინდე? მუჭო მიფქციებუთ, მუჟამსით ვორწყეთ, ნამდა თანამშრომელ მოფლირტავნა? მუნერ რეაქცია მაღვენუნა, მუჟამსით სექსუალურ უზნეობაშ ამსახველ წერილს ვარდა სურათის მომჯღონანა? * თეცალ საკთიხეფშე წინასწარ დაფიქრება დო იეჰოვაშ თვალსაზრისიშ გაგება მიმეხვარებნა, ქუდოფსკიდათ თიშ ართგურეფქ.

15. მუჭო შემლებნა, სუმ ებრაელცალო ნებისმიერ სიტუაციას იეჰოვაშ ართგურეფ ქიდოფსკიდათ?

¹⁵ მორთ, გუვარჩუათ სუმ ებრაელიშ, შადრაქი, მეშაქი დო აბედნეგოშ მაგალით. მუჟამსით მეფე ნაბუქოდონოსორქ თინეფს უზოჯ, თაყვან ქოცესკო ოქროშ ქანდაკებას, მეფეშა მეჩამილ მტკიცე პასუხით ქაძირეს, ნამდა ჯგირო არჩქილედეს, მუ რდჷ საჭირო იეჰოვაშ ართგურქ ქიდოსქიდესკონ (გამ. 20:4, 5; დან. 3:4—6, 12, 16—18). წერმიდგინით, ნამდა თქვან უნჩაშ რთხინა ფარაშ დოდვალას ტყურა რელიგიურ დღახუშ აღნიშნებელო. მუჭო მიქციებუდით? ონდო თეცალ სიტუაციას შეხვადუდათ, ჯგირ იჸუაფ ამდღარშე დეფიქრათ, მუჭო უჯინე იეჰოვა თე საკითხის. თაშ ნამდა, მუჟამსით თეცალ სიტუაციას ქუმოხვადუთ, სუმ ებრაელცალო წინასწარ ფიქრი გაიადვილენა, თიშ კეთებას დო რაგადის მუთ სწორ რე.

16. მუჭო მიმეხვარებნა იეჰოვაშ აზროვნებაშე ფიქრი, მზათ ვორდათ სასწრაფო სამედიცინო სიტუაციეფშო?

¹⁶ იეჰოვაშ აზროვნებაშე ფიქრი, მიმეხვარებნა ართგურეფქ ქიდოფსკიდათ თიმწკუმა ხოლო, მუჟამსით სასწრაფო სამედიცინო დახმარება დემესაჭირებნა. შილებე გინოჭყვადილ მაფნა, ვეგნიბბათ ზისხირ ვარდა თიშ შემცველ ოთხ მთავარ კომპონენტშე ნამდგაინ. მარა მკურნალობაშ ნამთინე მეთოდიშ დროს, ნამუთ ზისხირიშ გიმორნაფას ითხინს, საჭირო რე ბიბლიურ პრინციპეფიშ საფუძველშა მიბღათ თიცალ გადაწყვეტილება, მუდგათ ვოძირანთ, ნამდა თე საკითხის იეჰოვაშ თოლით ვუჯინეთ (საქ. 15:28, 29). მუშო ოკო რაგად, ჯგირ ვეჸუაფ თენა საავადმყოფოს ვორეთინ თეშ, ნაჩქარევო გუვაკეთათ. ჩქი წინასწარ ოკო გეგმიბრკუათ თე საკითხ, შევავსათ იურიდიულ სამედიცინო დოკუმენტ, სოდეთ ჩქინ სურვილ იჸუაფ გიმოხანტილ  დო ქუდურაგადუათ პირად ექიმს. *

17—19. მუშენ რე მნიშვნელოვან ამდღარშე დეფიფქრათ, მუჭო უჯინე იეჰოვა შხვადოშხვა საკითხეფს? ქიმიჸონით მუსხირენ სიტუაცია, სოდეთ საჭირო რე წინასწარ მომზადება.

¹⁷ ბოლოს მორთ, გუვარჩუათ იესოშ მაგალით, მუჭო უპასუხ პეტრეს, მუჟამსით უწუ: „უფალი, ქეშიცოდილე დუდი!“. მუჭოთ იძირენ, იესო ბრელს ფიქრენდჷ ღორონთიშ განზრახვაშე დო წმინდა წერილეფს ინოჭარილ წინასწარმეტყველებეფშე, ნამუთ დედამიწას მუშ ცხოვრებას დო ღურას ოხუდ. თექ გუმანგარ იესოს გადაწყვეტილება, ქუდოსკიდკო ღორონთიშ ართგურქ დო მსხვერპლო შეუწირუდკო მუშ დუდ (წეკითხით მათე 16:21—23). *

¹⁸ ღორონც ოკო თიშ მეგობარეფ ვორდათ დო მუთ შემლებნან სრულაშო მიბღათ მონაწილება ქადაქებაშ საქმეს (მათ. 6:33; 28:19, 20; იაკ. 4:8). მარა პეტრეცალო, ნამუსით იესოშო ჯგირ ოკოდ, ნამთინე ჯგირიშ მაკორინე კათა შილებე ოცადუდას ვარია ქუმორაგადაფუან თე ირფელშე. მაგალთო, მუჭო მიქციებუთ, მუჟამსით თქვან უნჩაშ უჯგუშ სამუშას რთავაზენა, მარა თი დრო ოკო დუთმათ, ნამუთ სულიერ საქმეეფშო გაფნა გიმორთილ? ვარდა მუჭო მიქციებუთ, მუჟამსით რთავაზენა უმოს მეტ განათლებაშ მიოღებელო, თქვან ჸუდეშე შორშა ულას? გადაწყვეტილებეფიშ მეღებაშახ ჯგირ იჸუაფ ქილოცათ, გეგმირკუათ თე საკითხი დო ქუდურაგადათ თქვან ოჯახიშ წევრეფს ვარდა უხუცესეფს. მორთ, ამდღარშე დეფიფქრათ, მუს ფიქრენს იეჰოვა თე საკითხეფშე დო ჩქი ხოლო გუვავითარათ თიშ აზროვნება. თეგვარო, თეცალ სიტუაციეფიშ დროს, მარჩქვენუნა მუჭო მიფქცუათ, მუშენდა გინოჭყვიდილ მაჸინა იეჰოვაშ ართგურ ქუდოფსკიდათ.

¹⁹ რე შხვა სიტუაციეფ ხოლო, ნამდგაქ შილებე ღორონთწკუმა თქვან ართგურობა გიმოცადას. მუშო ოკო რაგად, არძანერ სიტუაციაშო წინასწარ ვა ვორეთ მზათ. მარა, პირად გურაფაშ დროს იეჰოვაშ აზროვნებაშე დაფიქრება მიმეხვარებნა, მუდგა სიტუაციას ვეშეფხვადათ, გეგმიბრინუათ ნაგურეფ დო გონივრულ გადაწყვეტილებეფ მიბღათ. თაშ ნამდა, მორთ, ირიათო იფიფქრათ იეჰოვაშ აზროვნებაშე დო ვეცადათ ჩქი ხოლო თიშ თოლით ვუჯინათ საკითხეფს. თენა მიმეხვარებნა სწორაშო მიფქცუათ, მუჭოთ ამდღა თეშ მომავალს.

20, 21. ა) მუშენ გეფხარენთ თავისუფლებათ ახალ ქიანას? ბ) მუჭო შემლებნა მიღდან ხიოლ ამდღარშე?

²⁰ ჩქი ველუთ ახალ ქიანას დო მიღნა იმენდჷ, ნამდა სამოთხეთ გინორთელ დედამიწას მარადიულო იფცხოვრენთ. ღორონთიშ სამეფოშ მართველობაშ დროს კაცობრიობა გეთავისუფლებ ოწუხებელშე, ნამუთ ქვეყნიერებას არსებენს. მუშო ოკო რაგად, მაღვენუნა ნებაშ თავისუფლება დო თითოულ პიროვნებას შეიალებე მუშ სურვილეფიშ შესაბამისო მიღას გადაწყვეტილებეფ.

²¹ მუშო ოკო რაგად, თენა თის ვა ნიშნენს, ნამდა უსაზღვრო თავისუფლება მაღვენუნა. მუჟამსით, თანდაბალ კათას ჯგირ დო ფურ შქას არჩევან აჸი ოკეთებელ, თინეფ იხემძღვანელენა იეჰოვაშ კანონეფით დო თიშ აზროვნებათ. თენა დიდ ხიოლს დო მშვიდობას მოუღანს თინეფს (ფსალმ. 37:11). თე დროშ მოულაშახ, შემლებნა გუვავითარათ იეჰოვაშ აზროვნება დო თეგვარო, ამდღარშე ხიოლ მიღდან.