1, 2. ა) მუ რე თქვანო არძაშ უმოს ძვირფას ცხოვრებას? ბ) ნამ რე თი ნამთინე ბიბლიურ გურაფა, მუდგას ვაფასენთ დო მუშენ? (ქოძირით სურათ თე გვერდის).

მუ რე თქვანო ცხოვრებას არძაშ უმოს ძვირფას? გოთირანდითო თის შხვა მუთუნშა? იეჰოვაშ მეძღვინელ მსახურეფშო თე კითხვეფშა პასუხეფიშ მეჩამა ადვილ რე. ჩქინო არძაშ უმოს ძვირფას ღორონთწკუმა ურთიერთობა რე დო თეს მუთუნშა ვა გოფთირანთ. თეს გეძინელ, ვაფასენთ ბიბლიურ ჭეშმარიტებას, ნამუთ მარზენა საშვალებას მიღდან ხოლოშიან ურთიერთობა ზეციერ მუმაწკუმა (კოლ. 1:9, 10).

² დეფიფქრათ თი ირფელშე, მუდგას ჩქინ დიდებულ გუმაჭყაფალ მუშ სიტყვა, ბიბლიაშე მოგურუანა. თინა მოგებაფუანა ჭეშმარიტებას მუშ სახელიშ დო თვისებეფიშ გურშენ. იეჰოვაქ მუშ სქუაშ სიცოცხლე დათმჷ ჩქინ გურშენ, სოვრეშეთ თიშ ჸოროფას ვორწყეთ. თეს გეძინელ, იეჰოვა მირაგადნა, მუს მომღანა ზეციერ სამეფო დო მომავალიშ იმენდის მარზენა. თინა ცხებულეფს ზეციურ დო „შხვა შხურეფს“ დედამიწას სამოთხეს ცხოვრებაშ იმენდის არზენს (იოან. 10:16). იეჰოვა მოგურუანა დო მარზენა მითითებეფს, ნამდა  ქიფცხოვრათ თიშ ნებას ოსადაგუნ თეშ. ჩქი ვაფასენთ თე ირფელს, მუშენდა თენა მაახლოვენა ღორონთწკუმა დო ჩქინ ცხოვრებას აზრიანს გინაშკვანს.

3. მუს ვა ნიშნენს ჭეშმარიტებაშ ჸიდირ?

³ იეჰოვა ხეგოფაჩილ ღორონთ რე. თინა ოხვარ არძას, მით გორუნს ჭეშმარიტებას. თიქ მუშ ძვირფას სქუაშ სიცოცხლე მუჩეს ძღვინო. მუშო ოკო რაგად, თინა დღას ვა მოფთხინა ჭეშმარიტება ფარაშა ქიპჸიდათ. ართშა ართ კოჩიქ, სახელო სიმონქ მოციქულ პეტრეს ფარა მიარზუ. თის ოკოდ მეუღებუდკო ძალაუფლება, ნამდა მიდგას ხეს გედვანდ, წმინდა შურ მეუღებუდკო. მარა პეტრექ თის უწუ: „ფურჩათ გინორთედას სქან ვარჩხილ, მუშენდა მინდომ, ფარათ ქოიშიბუდკო ღორონთშე უფასოთ მოჩამილ ძღვინ“ (საქ. 8:18—20). ჭეშმარიტება ფარათ ვეჸიდირენ-და, მუს ნიშნენს ბიბლიურ მითითება: „ქიჸიდ ჭეშმარიტება?“.

4. მუს გებგენთ თე სტატიას ჭეშმარიტებაშ გურშენ?

⁴ წეკითხით იგავები 23:23. * ბიბლიაშე ჭეშმარიტებაშ გაგებელო მონდომა რე საჭირო. ჩქი მზათ ოკო ვორდათ, ნამდა ირფელ დაფთმათ თიშ მიოღებელო. მუჭოთ იგავეფიშ მაჭარალქ თქუ, მუჟამსით ჭეშმარიტებას ქიგებგენთ, ფრთხილას ოკო ვორდათ, ვა ვოდინუათ თინა. მორთ, გუვარჩუათ მუს ნიშნენს სიტყვეფ „ქიჸიდ ჭეშმარიტება“ დო მუქ შილებე მაჸუან თეშო დათმებელქ. ჩქი უმოსო ოკო დუვაფასათ ჭეშმარიტება დო მტკიცაშო ოკო მაფდან გინოჭყვიდილ, დღას ვა გოფთირათ თინა შხვა მუთუნშა. თე სტატიაშე ქობძირუნთ, ნამდა ჭეშმარიტება ირფელშე უმოს ძვირფას რე.

5, 6. ა) მუჭო შემლებნა ჭეშმარიტებაშ ჸიდირ უფარეთ? ქიმიჸონით მაგალით. ბ) მუ ჯგირობუა მოუღ ჩქინო ჭეშმარიტებას?

⁵ მუჟამსით მუდგარენს უფასოთ მარზენა, თენა თის ვა ნიშნენს, ნამდა თიშ მიოღებელო მონდომა ვა რე საჭირო. ებრაულ სიტყვა, ნამუთ იგავეფიშ 23:23-ს თარგმნილ რე, მუჭოთ „ქიჸიდ“, შილებე მუდგარენიშ შეძენას ხოლო ნიშნენდას. ჟირხოლო სიტყვა ნიშნენს, მონდომაშ გიმორჩქინას ვარდა მუდგაინიშ დათმებას თიშ მიოღებელო, მუთ ძვირფას რე. მორთ, გუვარჩუათ თეცალ მაგალით. მაღაზიას ქობძირით განცხადება, ნამდა ბანანეფს უფასოთ ირზენა. ხომ ვა ნიშნენს თენა თის, ბანან ჩქინ სტოლს მუშით გორჩქინდუ? მუშო ოკო რაგად, ვარ. ჩქი მაღაზიაშა ოკო მიდაფრთათ დო გებჭოფათ თინა. მართალ რე ბანანეფ უფასოთ რე, მარა თიშ მიოღებელო მონდომა ოკო გეგმიფრჩქინათ დო დრო გეგმურთათ მაღაზიაშა ულას. თეგვარო, ჭეშმარიტებაშ მიოღებელო, ფარა ვარ მარა მონდომა საჭირო რე.

⁶ წეკითხით ესაია 55:1—3. * იეჰოვაშ სიტყვეფ, ნამუთ ესაიაშ წინასწარმეტყველებას რე მოჩამილ, მოხვარნა ქიგებგათ, მუს ნიშნენს ჭეშმარიტებაშ ჸიდირ. ბიბლიაშ თე მონაკვეთის იეჰოვა მუშ სიტყვას წყარს, ბჟას დო ღვინს ადარენს. რგილ დო წკონდა წყარცალო ღორონთიშ სიტყვას ინოჭარილ ჭეშმარიტება ძალეფიშ გაახალებას ომსახურ. მუჭოთ ბჟა ამანგარენს ჩქინ ორგანიზმის დო ხეს უნწყუნს ბაღანაშ რდუალას, თეშ იეჰოვაშ სიტყვა ხოლო მამანგარენა დო მოხვარნა, მიბრდათ სულიერო. მარა, მუ გაგებათ რე ღორონთიშ სიტყვა შედარებულ ღვინწკუმა? ბიბლიას ღვინ მხიარულებაწკუმა რე დაკავშირებულ (ფსალმ. 104:15). თაშ ნამდა, მუჟამსით ღორონთ მირაგადნა, „უფასოთ გეჭოფით ღვინ“, თეთ მარწმუნენა, ნამდა თიშ მცნებეფიშ დაცვება ხიოლს მომღანა (ფსალმ. 19:8). თე შედარებათ იეჰოვაქ ქუმოძირეს, მუ ჯგირ შედეგეფ მაჸუნუ ბიბლიას ინოჭარილ ჭეშმარიტებაშ  გურაფას დო თიშ დაცვებას. მორთ, გუვარჩუათ ხუთ საშვალება, ნამდგაშ დათმებათ შემლებნა ჭეშმარიტებაშ ჸიდირ.

7, 8. ა) მუშენ ოკო დაფთმათ დრო, ნამდა მიბღათ ჭეშმარიტება? ბ) მუ დათმჷ ართ ახალგაზრდა სტუდენტიქ დო მუ შედეგეფქ მაჸუნ თეს?

⁷ დრო. ჭეშმარიტება მიბღათინ, დროშ დათმება რე საჭირო. დრო რე საჭირო, ნამდა ქიმიფრჩქილუათ სახიოლო ამბე, წეპკითხათ ბიბლია დო თიშა გერსხილ პუბლიკაციეფ, ჩუვატარათ პირად გურაფა, მივემზადათ კრებაშ შეხვალამეფშო დო დევესწრათ თინეფს. ჩქი ბრელ დრო ოკო ვა დუთმათ ნაკლებო მნიშვნელოვან საქმეეფს (წეკითხით ეფესოელები 5:15, 16). * მუსხი დრო ქუმოკონა, ნამდა ქინვანჭათ ძირითად ბიბლიურ გურაფეფს? თენა ჩქინ მდგომარეობაშა რე დამოკიდებულ. მარა იეჰოვაშ სიბრძნეს, თიშ შარეფს დო საქმეეფს ქინვანჭათინ, მარადიულობა ვამბაღნა (რომ. 11:33). „გინაჯინალ კოშკიშ“ პირველ გიშაშკუმალას ჭეშმარიტება შედარებულ რდუ ჭიჭე ყვავილშა. თექ ჭარუდ: „ვეგეჯერდათ ჭეშმარიტებაშ ხვალე ართ ყვავილს. ართ ცალ დასაბაღ ქორდუკონ, შხვეფ საჭირო ვეჸიდ. ართის ქოძირუნთინ, შხვეფიშ გორუა ხოლო გაგრძელით“. თაშ ნამდა, ქოპკითხათ ჩქინ დუც: „მუსხი მუდგარენ მიჩქნა იეჰოვაშ გურშენ?“. ჩქი ირიათო უმოსის გებგენთ იეჰოვაშენ მარადიულობაშ განმავლობას. ამდღა განსაკუთრებულო მნიშვნელოვან რე, დრო ჭკვერულო გიმიბრინუათ დო მუთ შემლებნან მეტ ქიგებგათ ჭეშმარიტებაშენ. გუვარჩუათ მუსხირენ პიროვნებაშ მაგალით, მიდგაქ თეგვარო მიქცუ.

⁸ ახალგაზრდა მარიამქ *, ნამუთ იაპონიაშე რე, ოგურაფშა ნიუ-იორკშა (შეერთებულ შტატეფი) გეგნორთჷ. თე დროშო თიქ ართ-ართ რელიგიურ მოძრაობას ქაკათ, ნამდგაქ 1950-იან წანეფიშ ბოლოს ჩემეყალიბ. ართ დღას თის პიონერ დაქ ქეშეხვად, ნამუთ კარდოკარ მსახურენდჷ. ბიბლიაშ გურაფაშ დოჭყაფა თეშ ოხიოლუდ, პიონერ დას ქოთხუ, თინა მარაშე ჟირშა ჩუტარებდესკო. მარიამს გურაფაშ გადატვირთულ გრაფიკ უღუდ დო გვერდ განაკვეთიან სამუშას ხოლო მუშენდჷ, მარა თეშ უმკუჯინუო, თიქ ხეთეშე ქიდიჭყჷ კრებაშ შეხვალამეფშა გილულა. თეს გეძინელ, ჭეშმარიტებაშ გურაფაშა უმოს მეტ დრო დუთმებუდკონ, მიოტუ შხვადოშხვა საზოგადოებრივ საქმიანობეფს მონაწილებაშ მეღება. თეგვარ მსხვერპლშა ულაქ მეხვარ მარიამს სულიერო წიმი ულას დო ართ წანაშ დინახალე დინათ. ამშვ თუთაშ უკულ, 2006 წანას თიქ პიონერობა ქიდიჭყჷ დო ამდღა ხოლო აგრძელენს მსახურებას.

9, 10. ა) მუჭო თირანს ჭეშმარიტება ჩქინ დამოკიდებულებას მატერიალურ ჯგირობუაშენ? ბ) მუ დათმჷ ართ ახალგაზრდა ძღაბიქ დო მუ ჯგირობუა მოუღ თექ?

⁹ მატერიალურ ჯგირობუა. ჭეშმარიტებაშ მიოღებელო შილებე მაღალ ხელფასიან სამუშაქ ვარდა კარიერაქ მაჸუან დათმებელქ. მეჩხომეეფქ, პეტრე დო ანდრიაქ მიოტეს „მუნეფიშ ბადეეფ“, მუჟამსით იესოქ მუშ მოწაფეობა შეთავაზ (მათ. 4:18—20). მუშო ოკო რაგად, ბრელს მით ამდღა ჭეშმარიტებას გურაფელნს, ვემიატებე სამუშა, მუშენდა ოჯახიშ ეჯუმალა ოვალნა (1 ტიმ. 5:8). მარა თინეფქ, მით ჭეშმარიტებას გურაფლენა, ოკო დოთირუან მუნეფიშ შეხედულება მატერიალურ ჯგირობუაშენ დო სწორ პრიორიტეტეფ დადგინან. იესოქ ხაზ გუსვჷ თეს, მუჟამსით თქუ: „ვაშაყარუათ ქონება დედამიწას . . . დოშაყარეთ ქონება ზეცას“ (მათ. 6:19, 20). გუვარჩუათ ართ ახალგაზრდა ძღაბიშ მაგალით.

¹⁰ მარია ჭიჭანობაშე გოლფიშ კლუბშა გილეშ. მუთ დრო მიკიშუნ, უჯგუშო ლაჸაფენდჷ, ათეშენ უნივერსიტეტიშ ოგურაფალო სტიპენდია დაუნიშნეს. გოლფ თიშ ცხოვრებაშ ნაწილ რდუ დო მიზანო უღუდ, პროფესიონალ მოლაჸაფე ჸოფედკო. თეშ უკულ მარიაქ  ბიბლიაშ გურაფა ქიდიჭყჷ დო ქეჸოროფ ჭეშმარიტებაქ. თის ოხიოლუდ, ნამდა ჭეშმარიტებაქ ცხოვრებაშ თირუას ქიმეხვარ. მარია იჩიებ: „მუთ უმოსო ვოცადუდ ჩქიმ ცხოვრება დოფთირეკო, თით უმოს ბედნერ ვორდჷ“. თიქ ქიმეხვად, ნამდა ვეშიალებედ სულიერ დო მატერიალურ, ჟირხლო მნიშვნელოვან ადგილს გიორინუკო ცხოვრებას (მათ. 6:24). ათეშენ მარიაქ გინოჭყვიდ, დუდ დანებკო გოლფიშ ლაჸაფის. ამდღა თინა პიონერო მსახურენს, ბედნერ რე დო უღჷ აზრიან ცხოვრება.

11. მუქ შილებე მოხვადას, მუჟამსით ჭეშმარიტებას მიბღენთ?

¹¹ ურთიერთობეფ. მუჟამსით ბიბლიურ ჭეშმარიტებათ იბჭყანთ ცხოვრებას, შილებე მეგობრეფ დო ნათესეფწკუმა ჩქინ ურთიერთობაქ დითირას. თეშ მიზეზის იესოშ ლოცვაშე ბგებულენთ, სოდეთ მუშ მიმაჸუნალეფშე ღორონთის თხუ: „განწმინდ თინეფ სქან ჭეშმარიტებათ. სქან სიტყვა ჭეშმარიტება რე“ (იოან. 17:17). სიტყვეფ „განწმინდ თინეფ“ შილებე „გიშართუალას“ ხოლო ნიშნენდას. მუჟამსით ჭეშმარიტება მიბღით, გეგშვუართით ქვეყნიერებას, მუშენდა ფასეულობეფქ დუმათირეს. ჩქი ბიბლიურ პრინციპეფით ფცხოვრენთ, ათეშენ შხვანერეფო მივორჩქუთ. მუშო ოკო რაგად, ჩქი არძაწკუმა ჯგირ ურთიერთობა მოკონა, მარა რწმენაშ გურშენ, შილებე ნამთინე მეგობარქ დო ოჯახიშ წევრიქ ოჭიშ ქომრთინუან ვარდა ქიმეწინააღმდეგან. თენა ვამკვენა, მუშენდა იესოქ თქუ: „კოჩის მუშ ოჯახიშ წევრეფ გინართუ ნტერო“ (მათ. 10:36). თეს გეძინელ, თიქ დემეპირეს, ნამდა ჭეშმარიტებაშ გურშენ მუდგაქ ვა მაჸუან დათმებელქ, უმოს მეტის მიბღენთ (წეკითხით მარკოზი 10:28—30). *

12. მუქ აჸუ დათმებელქ ართ ებრაელ კოჩის ჭეშმარიტებაშ გურშენ?

¹² ართ ებრაელ ბიზნესმენ, აარონს წანეფიშ დინახალე ჯერდჷ, ნამდა ღორონთიშ სახელიშ თქუალა ვეშილებედ. მარა, თის მთელ გურით ოკოდ ჭეშმარიტებაშ გაგება ღორონთიშ გურშენ. ართ დღას, იეჰოვაშ მოწმეეფქ ქაძირეს, ნამდა ღორონთიშ სახელ, ნამუთ ოთხ ებრაულ თანხმოვანშე შითმოდირთუ, ხმოვნეფწკუმა ართო ირაგადუ მუჭოთ „იეჰოვა“. თეშ გაგებაშ უკულ ხეთეშე თიქ სინაგოგაშა მიდართჷ დო მუთ გეგუნ, რაბინეფს გეგნოჩ. მარა თინეფიშ რეაქციაქ აარონს მანგარო გუკვირდჷ. თიშ მანგიორო, ნამდა ღორონთიშ სახელიშ გურშენ ჭეშმარიტებაშ გაგებაქ ახიოლესკონ, თინეფქ ქუგაფურტინეს აარონს დო სინაგოგაშე გეგმაჸათეს. თეს გეძინელ, მუშ ოჯახიშ წევრეფწკუმა ხოლო აკუცუ ურთიერთობაქ. თე ირფელიშ უმკუჯინუო, აარონ აგრძელენდჷ ჭეშმარიტებაშ გურაფას დო გაბედულო ომსახურუდ იეჰოვას მთელ მუშ ცხოვრებას. ჭეშმარიტებაშ გაგებაშ უკულ, აარონცალო მზათ ოკო ვორდათ თიშო, ნამდა შხვეფწკუმა ჩქინ ურთიერთობეფქ შილებე დითირას.

13, 14. მუ რე საჭირო ჭეშმარიტებაშ მიოღებელო? ქიმიჸონით მაგალით.

¹³ ღორონც ვა მოწონსინ ფერ ფიქრეფ დო მოქმედებეფ. მუჟამსით ბგებულენთ ჭეშმარიტებას დო ცხოვრებას ბიბლიურ ნორმეფით იბჭყანთ, საჭირო რე დოფთირუათ ჩქინ ფიქრეფ დო მოქმედებეფ. მოციქულ პეტრექ ღორონთიშ შთაგონებათ ჭარჷ: „მუჭოთ მორჩილ სქუალეფ, ვეიაჸუნათ თიცალ კორნებეფს, ნამუთ თეიშახ ურჩქინჯობაშ დროს გიღდეს . . . ირნერ საქციელს წმინდეფ რდათ“ (1 პეტ. 1:14, 15). ჭეშმარიტებაშ გაგებაშ უკულ, კორინთის მახორუ ხალხის ოკო დუთირუდკო ცხოვრებაშ წესი დო ღორონთიშ მოსაწონო უცხოვრებუდკო (1 კორ. 6:9—11). ამდღა ხოლო თინეფ, მით ჭეშმარიტებას ღებულენა,  ოკო მიოტუან ღორონც ვა მოწონსინ ფერ საქმეეფ. მოციქულ პეტრექ ქრისტიანეფს მეჭარ: „თქვანო თინა ხოლო დასაბაღ რე, ნამდა თეიშახ ქვეყნიერებაშ ნებაშა გილეშით: თავხედურო იქციებუდით, ვნებეფს ეჸუნდით, უზომედ შუნდით ღვინს დო ქეიფენდით, შუმას ართიანს ონირზუდით დო კანონით დაუშვებელ კერპთაყვანიშმცემლობას მეჸუნდით“ (1 პეტ. 4:3).

¹⁴ წანეფიშ დინახალე დევინ დო ჟასმინ შუმას რდეს გინოჸუნელ. დევინ გამოცდილ ბუღალტერ რდუ, მარა თინა ირიათო შუნდჷ, ათეშენ სამუშა ირიათო ვა უღუდ. ჟასმინ აგრესიულ დო უხეშ ხასიათიშ რდუ. ართშა შუმილ რდუნ თეშ, შარას ჟირ იეჰოვაშ მოწმე მისიონერქ ქეშეხვად. თინეფქ ბიბლიაშ გურაფაშე მირაგადუეს მარა, მუჟამსით ჸუდეშა ქიმიაკითხეს, დევინ დო ჟასმინქ შუმილო ქუდოხვადეს. თინეფ ველდეს, ნამდა მისიონერეფ ჸუდეშა ქიმიაკითხანდეს. მაჟია მეკითხირიშ დროს, მოწმეეფს შხვანერ სიტუაციაქ ქუდოხვადეს. ჟასმინ დო დევინქ ხეთეშე გურგედვალირო ქიდიჭყეს ბიბლიაშ გურაფა დო ნაგურეფუს ცხოვრებას გიმირინუანდეს. სუმ თუთაშ დინახალე, თინეფქ დუდ დანებეს შუმას დო უმოს გვიანო, კანონიერო დექორწინეს. თინეფიშ სოფელს ირ კოჩიქ ქოძირ, ნამდა დევინ დო ჟასმინქ ცხოვრება დოთირეს, მუდგაქ ბრელს მეხვარ ბიბლიაშ გურაფაშ დოჭყაფას.

15. მუქ შილებე იჸუას არძაშ უმოს რთულ დათმებელქ ჭეშმარიტებაშ მიოღებელო?

¹⁵ ტრადიციეფ დო წეს-ჩვეულებეფ, ნამუთ ბიბლიაშა ვა რე გერსხილ. არძაშ უმოს რთულ შილებე თი ტრადიციეფშე დო ჩვევეფშე დუდიშ დანებება რდას, ნამუთ ბიბლიაშა ვა რე გერსხილ. ნამთინეშო თენა ადვილ რე, მარა შხვეფს შილებე დიდ მონდომაქ დესაჭირან, მუშენდა ოჯახიშ წევრეფიშ, თანამშრომელეფიშ ვარდა მეგობრეფიშ ზეწოლას გინაფლენა. განსაკუთრებულო რთულ რე თიცალ წეს-ჩვეულებეფშე ვარიაშ რაგად, ნამუთ ღურელეფიშ პატიცემას ოხუ (კან. 14:1). თეცალ დროს შხვეფიშ გაბედულ მაგალითეფ მიმეხვარებნა მიბღათ სწორ გადაწყვეტილება. გუვარჩუათ პირველ საუკუნეს მახორუ ნამთინე გაბედულ ეფესოელიშ მაგალით.

16. მუ დათმჷ ნამთინე ეფესოელქ ჭეშმარიტებაშ გურშენ?

¹⁶ ეფესოს ჯადოქრობა მანგარო რდუ გავრცელებურ. მუჭო მიქცუეს თი ეფესოელეფქ, მიდგაქ ჭეშმარიტება ქიგეგ დო ქრისტიანო გინირთჷ? ბიბლია იჩიებ: „ბრელქ, მით ჯადოქრობას მეჸუნდჷ, ქიმიღ მუშ წიგნეფ დო ირ კოჩიშ წოხოლე დოჭვჷ. თინეფქ აკოძინეს არძა წიგნიშ ფასი დო ჟარნეჩდოვით ანთას ვარჩხილქ გიშართჷ. თაშ ირდუდ დო იმანგარებუდ იეჰოვაშ სიტყვა“ (საქ. 19:19, 20). ართგურ ქრისტიანეფქ დათმეს ძვირიან წიგნეფ დო კურთხევეფ მიღეს.

17. ა) მუქ შილებე მაჸუან დათმებელქ ჭეშმარიტებაშ გურშენ? ბ) მუ კითხვას გუვარჩიენთ უკულიან სტატიას?

¹⁷ პირადო თქვა, მუ დათმით ჭეშმარიტებაშ გურშენ? თითოულქ დაფთმით ჩქინ დრო. ნამთინექ ვარია ქოთქუ მატერიალურ ჯგირობუაშე დო ოთირალქ აჸუ შხვეფწკუმა ურთიერთობაქ. ბრელქ დოთირუ მუშ ფიქრეფ დო საქციელ. თეს გეძინელ, ვარია ქოთქუ თი ტრადიციეფიშ დო წეს-ჩვეულებეფიშ მეჸუნაშენ, მუდგასით ღორონთ ვეწონუანს. მარა, მუდგაქ ვა მაჸუესკო დათმებელქ, დარწმუნებულ ვორეთ, ნამდა ჭეშმარიტება თეშა ღირუდ. თეგვარო, ჩქი არძაშე უმოს ძვირფას მუდგარენ მიღნა — იეჰოვაწკუმა ხოლოშიან ურთიერთობა. მუჟამსით ფიფქრენთ, მუშმადიდა კურთხევა რე, ჭეშმარიტება მიჩქუნა, რთულ დაჯერებელ რე, მუჭო შილებე მიდგაინს აზრო მოურთას თიშ დათმებაქ. მუჭო შილებე თექ მოხვადას დო დავუშვათ თეცალ სანარღო შეცდომა? თე კითხვას უკულიან სტატიას გუვარჩიენთ.