1, 2. ა) მუ უსამართლობას შეხვადეს ნაბოთიქ დო თიშ ქომოლსქუალეფქ? ბ) მუ ჟირ თვისებას გენიფხილენთ თე სტატიას?

წერმიდგინით, კოჩის დიდ ტყურა ქეკაბრალეს. გლახა კათაქ თის ტყურა მტკიცებეფ ქუმწურინეს დო ათეშენ ოღურალ განაჩენ გეგშუღეს. თექ ოჯახიშ წევრეფშო დო მეგობრეფშო მანგარ გურიშ დუმამონკებელქ იჸუ. მუჭო იგინანდეს დუც სიმართლეშ მოჸოროფე კათა, მუჟამსით ქოძირუნდეს ბრალ ვა უღუდუნ ფერ კოჩიშ დო თიშ ქომოლსქუალეფიშ ღურას. თენა მოგონილ ამბე ვა რე. თენა იეჰოვაშ მსახურ ნაბოთიშ ამბე რე, ნამუთ ისრაელიშ მეფე ახაბიშ დროს ცხოვრენდ (1 მეფ. 21:11—13; 2 მეფ. 9:26).

² თე სტატიას გენიფხილენთ მუჭოთ ნაბოთიშ მაგალითის თეშ, თი ართგურ უხუცესიშ მაგალითის ხოლო, ნამუთ პირველ საუკუნეს ცხოვრენდ. თიქ სერიოზულ შეცდომა დუშვუ. თე ბიბლიურ მაგალითეფიშ განხილვაშ დროს, ქიგებგენთ, მუშენ რე მნიშვნელოვან თანდაბლობა, ნამდა თეშ ქუჯინათ სამართლიანობას, მუჭოთ იეჰოვა. კრებას შილებე უსამართლობას ქეშეფხვადათ, მარა პატიებაშო მზათ ქუვორეთ-და, თენა მიმეხვარებნა, მიღუდან იეჰოვაშ თოლწონუა სამართლიანობაშენ.

3, 4. მუნერ კოჩ რდუ ნაბოთ დო მუშენ ვემეჸიდ თიქ ბინეხ მეფე ახაბის?

³ მუჟამსით ისრაელეფიშ უმენტაშობა მეფე ახაბიშ დო ბოროტ დედოფალ იზებელიშ გლახა მაგალითის მეჸუნდესინ, ნაბოთ იეჰოვაშ ართგურ რდუ. ბაალიშ თაყვანიშმცემელეფ საერთოთ ვაფასენდეს იეჰოვას დო თიშ კანონეფს. მარა ნაბოთ იეჰოვაწკუმა ურთიერთობას მუშ სიცოცხლეშე უმოსო აფასენდ.

⁴ წეკითხით 1 მეფეეფიშ 21:1—3. მუჟამსით ახაბიქ ნაბოთის უწუ, ნამდა ბინეხ თიშა ქიმუჸიდირუდკო ვარდა უჯგუშ ბინეხშა გუთირუდკონ, თიქ ვარია ქუწუ დო მიზეზ ხოლო გეუნწყ: „იეჰოვაქ დამფარას, ჩქიმ ჯვეშეფიშ მეკვირდობა სი მერჩე“. ნაბოთის უჩქუდ ისრაელეფშა მეჩამილ კანონი, ნამუთ უფლებას ვარზენდ თინეფს, სამუდამოთ გეგმუჩამდესკო მეკვირდობა (ლევ. 25:23; რიცხ. 36:7). არგამა რდუ, ნაბოთ იეჰოვაშ თოლით უჯინედ საკითხეფს.

5. მუ ბრალ მიშუძ იზებელს ნაბოთიშ ჸვილუაშა?

⁵ სანარღოთ, ნაბოთიშ უარყოფით პასუხიშ უკულ მეფე ახაბიქ დო თიშ ოსურ იზებელქ საცოდება მუდგარენ გაკეთეს. მუშ ქომონჯის თე ბინეხ ხეშა ქეშუჸოთამუდუკონ თიშენ, იზებელქ მუსხირენ ტყურა მოწმე ქიგურინუ ნაბოთის დო თინა დო თიშ ქომოლსქუალეფ დაჸვილაფუ. მუჭო მიქციებუდ იეჰოვა თეცალ უსამართლობაშ დროს?

6, 7. მუჭო ოძირ იეჰოვაქ სამართლიანობაშ მოჸოროფე რდუნ დო მუშენ მოუჰამუანდ გურს თეშ რჩქინა ნაბოთიშ ნათესეფს დო მეგობრეფს?

⁶ იეჰოვაქ ხეთეშე გოუტუ ელია ახაბიშ შეიოხვამილაფშა. ელიაქ გეგმაარგამ, ნამდა ახაბ კოჩიშ მაჸვილარ დო მახინჯ რდუ. მუ განაჩენ გიშეღ იეჰოვაქ თე შემთხვევას? ახაბის, მუშ ოსურს დო თიშ სქუალეფს ზუსტას თი ბედ აჭარუდეს, მუთ ნაბოთის დო თიშ ქომოლსქუალეფს (1 მეფ. 21:17—25).

⁷ ნაბოთიშ ოჯახიშ წევრეფ დო მეგობრეფ ახაბიშ საქციელიშ გურშენ გურგოტახილ რდეს. თინეფს გურს მოუჰამუანდ თიშ რჩქინა, ნამდა იეჰოვას თე უსამართლობა უჩქუდ დო ხეთეშე აფუდ ზომეფი მიღებული. მარა თინეფიშ თანდაბლობა დო იეჰოვაშა მენდება გამოცდაშ წოხოლე ქიგედირთუდ, მუჟამსით ველუდესინ თეშ დითირუდ სიტუაცია.

8. მუჭო მიქცუ ახაბიქ იეჰოვაშ განაჩენიშ მორჩქილაფაშ უკულ დო მუქ მაჸუნ თეს?

⁸ მუჟამსით ახაბიქ იეჰოვაშ განაჩენ ქიგეგუნ, თიქ „ბარგ ქიგისოფ დო ჯვალო ქიგნიქუნ. ხონენდ, ჯვალოს მიშაჯანუდ დო გურაკოჭირებულ გილეშ“. თიქ თანდაბლობა გეგმირჩქინ! მუქ მაჸუნ თეს? იეჰოვაქ ელიას უწუ: „რახან თიქ ჩქიმ წოხოლე თანდაბლობა გეგმირჩქინუნ, მუშ სიცოცხლეს დღას ვეგვოტახანქ დუც უბედრობას, თიშ ქომოლსქუაშ სიცოცხლეს გივოტახანქ თიშ ჸუდეს უბედრობას“ (1 მეფ. 21:27—29; 2 მეფ. 10:10, 11, 17). „გურეფიშ მარკვიებელ“ იეჰოვაქ ქიდენდ ახაბი (იგავ. 17:3).

9. მუჭო დეცვენდ თანდაბლობა ნაბოთიშ ოჯახის დო მეგობრეფს?

⁹ მუჭო იმოქმედ თეშ გაგებაქ თინეფწკუმა, მიდგას უჩქუდ, მუ აფუდ ახაბის კეთებული? სიტუაციაშ თეშნერო თირუაქ შილებედ ნაბოთიშ ოჯახიშ დო მეგობრეფიშ რწმენა გეგმოცადკო. თაშ ქიჸიდ-და, თანდაბლობა დეცვენდ დო მეხვარებუდ თინეფს, ართგურო გუგრძელეფდესკო იეჰოვაშა მსახურება, თიშა დარწმუნებულეფს, ნამდა ღორონთ უსამართლოთ ვემიქციებუდ (წეკითხით კანონიშ 32:3, 4). ნაბოთ, თიშ ქომოლსქუალეფ დო თინეფიშ ოჯახეფ სრულაშე ქოძირნა სამართლიანობას, მუჟამსით იეჰოვა სიცოცხლეს  დურთინუანს თე მართალ კათას (იობ. 14:14, 15; იოან. 5:28, 29). თეს გეძინელ თანდაბალ პიროვნებას ირო შუ, ნამდა „ირ საქმეს ჭეშმარიტ ღორონთ გასამართლენს, ირფელს, მუთ ფორილ რენ, დო გარჩიენს ჯგირ რე დო ვარ ფური“ (ეკლ. 12:14). მუჟამს იეჰოვას განაჩენ გიშმუღუნ, თინა თიცალ მუდგარენეფს აქცენს ყურადღებას, ნამუთ ჩქი ვამჩქუნა. თაშ ნამდა, თანდაბლობა იცვენს ბრალ ვა უღუნ ფერ კათას სულიერ ზიანშე.

10, 11. ა) მუ სიტუაციას შილებე გიმიცადას ჩქინ რწმენაქ? ბ) მუჭო დამცვენა თანდაბლობა?

¹⁰ მუჭო მიქციებუდით, უხუცესეფქ თქვა ვეგესმებუნა დო ვათანხმუთინ ფერ გადაწყვეტილებეფ მიღეს-და? მაგალთო, მუს ქიმინუნდით, მუჟამსით თქვა ვარდა თქვანო საჸოროფო პიროვნება მიოდინუანდით თი პასუხიშმგებლობას, ნამუთ თქვანო ძვირფას რდუ? მუჭო მიქციებუდით თქვან მეუღლექ, სქუაქ ვარდა ხოლოშიან მეგობარქ გერიცხ დო თქვა თეს ვათანხმუთ-და? მუჭო მიქციებუდით, ქიმგორჩქუნა, ნამდა უხუცესეფქ ჭყოლოფა გეგმირჩქინეს თიწკუმა, მიდგაქ შეცოდ? თეცალ სიტუაციეფიშ დროს შილებე გეგმიცადას იეჰოვაშა ჩქინ რწმენაქ დო ეჭვიშ თუდო ქიგვორინუათ გადაწყვეტილებეფ, ნამუსით ორგანიზაცია ღებულენს. მუჭო მიგეხვარებუნა თანდაბლობა  თეცალ დროს? მორთ, გუვარჩუათ თეშ ჟირ საშვალება.

¹¹ პირველ რიგის თანდაბლობა მიმეხვარებნა, ვაღიარათ, ნამდა ირფელ ვამჩქუნა თე საკითხიშ გურშენ. ვა უღუ მნიშვნელობა, მუჭომ ჯგირო მიჩქუნა თე სიტუაცია, ხვალე იეჰოვას შეულებ ქოძირას, კოც გურს მუ უღუნ თინა (1 სამ. 16:7). თე ირფელიშ ჯგირო გაგება მიმეხვარებნა, ვორდათ თანდაბლეფი, ვაღიარათ, ნამდა ირფელ ვამჩქუნა დო აზრი დიფთირუათ თე საკითხიშ გურშენ. მაჟია, თანდაბლობა მიმეხვარებნა, ვორდათ მორჩილეფ დო მოთვინებათ ქუჯინათ იეჰოვას, მუჭო გიშასწორენს თე უსამართლობას. ბიბლია იჩიებ: „ჭეშმარიტ ღორონთიშ შიშ უღუნან თინეფს ხვამა აღვენუნა . . . მარა უბადოს ხვამა ვაღვენუ დო ვამაძინინე მუშ დღალეფშა“ (ეკლ. 8:12, 13). თაშ ნამდა, თანდაბლობა მუჭოთ შხვეფს თეშ, ჩქი ხოლო მიმეხვარებნა (წეკითხით 1 პეტრეშ 5:5).

12. მუს გენიფხილენთ დო მუშენ?

¹² პირველ საუკუნეშ ქრისტიანეფქ სირიაშ ანტიოქიას ქეშეხვადეს თიცალ სიტუაციას, სოდეთ ხვალე თინეფიშ თანდაბლობაქ ვარინ, თიქ ხოლო გეგმიცად, მზათ ქორდეს დო ვარ პატიებაშო. მორთ გუვარჩუათ თე შემთხვევა დო ქიგებგათ, მუჭო ვუჯინეთ პატიებას დო უმოსო ქენვანჭათ, მუჭო რე დაკავშირებულ პატიება იეჰოვაშ თოლწონუაწკუმა სამართლიანობაშ გურშენ.

13, 14. მუ პატი უღუდ პეტრე მოციქულს დო მუჭო გიმირჩქინ თიქ გაბედულება?

¹³ მოციქულ პეტრე უხუცეს რდუ დო თის ირ კოჩ იჩინენდ ქრისტიანულ კრებას. თინა იესოშ ხოლოშიან მეგობარ რდუ დო მნიშვნელოვან პასუხიშმგებლობეფი ობარუდ (მათ. 16:19). მაგალთო, ახალ წანაკოროცხუათ 36 წანას, პეტრეს დიდ პატი უღუდ სახიოლო ამბე ქუქადაქუკო კორნელიუსის დო თიშ ოჯახის. თე შემთხვევა თით რდუ მნიშვნელოვან, ნამდა კორნელიუს ვარდ ებრაელი. მუჟამსით კორნელიუსიქ დო თიშ ოჯახიშ წევრეფქ წმინდა შურ მიღესინ, პეტრექ თქუ: „მის შეულებ წყარს ნათუაშენ ვარია უწუას თინეფს, მიდგაქ ჩქინცალო მიღეს წმინდა შური?“ (საქ. 10:47).

¹⁴ ახალ წანაკოროცხუათ 49 წანას მოციქულეფქ დო უხუცესეფქ ეკიშაყარეს იერუსალიმს, ნამდა გურჩიებდესკო, საჭირო ქორდ დო ვარ წინადაცვეთა თინეფშო, მიდგა ებრაელეფ ვა რდეს დო ოკოდეს ქრისტიანობა. თე შეხვალამას პეტრექ თამამას რაგადუ დო ქუგაშინ ჯიმალეფს, ნამდა მუსხირენ წანათ ადრე, ებრაელეფი ვარდესინ ფერ კათაქ მიღ წმინდა შური. თინეფ წანადაცვეთილ ვა რდეს. პეტრეს თე საკითხი ჯგირო არჩქილედ დო თიშ ნარაგადიქ მეხვარ პირველ საუკუნეს ხემძღვანელ საბჭოს თე საკითხიშ გინოჭკირუას (საქ. 15:6—11, 13, 14, 28, 29). იუდეველეფქ დო ებრაელ ვარდეს ფერ ქრისტიანეფქ დაფასეს თინა, ნამდა პეტრექ უშკურანჯუო იჩუ თე საკითხიშ გურშენ. მუ ადვილ იჸუაფუდ თეცალ ართგურ დო მოწიფულ კოჩიშ მენდება! (ებრ. 13:7).

15. მუ შეცთომა დუშვუ პეტრექ სირიაშ ანტიოქიას? (ქოძირით სურათ 23-მა გვერდის).

¹⁵ ახალ წანაკოროცხუათ 49 წანას შეხვალამაშ უკულ პეტრექ სირიაშ ანტიოქიაშა იდუ. თექ პეტრეს ჩვეულებრივ ურთიერთობა უღუდ ებრაელ ვარდეს ფერ ჯიმალეფწკუმა. მუშო ოკო რაგად, თინეფ ბრელს გურაფლენდეს პეტრეშ რჩქინა დო გამოცდილებაშე. წერმიბდგინათ, მუჭო გუკვირდუდეს თინეფს დო გუტირხუდეს გურ, მუჟამსით პეტრე თინეფწკუმა ართო ჭკომუას მიოტალენდ. კრებაშ შხვა ებრაელ წევრეფ დო ბარნაბა ხოლო პეტრეშ გავლენაშ თუდო რდეს დო თენეფქ ხოლო თიშნერო მიქცუეს. მუშენ  დუშვუ გამოცდილ უხუცესიქ თეცალ შეცთომა, ნამუქით შილებედ კრება აკარღვუკო? მუშ გურაფა შემლებნა პეტრეშ შეცთომაშენ, მუჟამსით უხუცესიშ საქციელ ვარდა სიტყვეფი მოწყინნა?

16. მუ რჩევა მეჩეს პეტრეს დო მუ კითხვეფი წიმიჭკირუ?

¹⁶ წეკითხით გალატელეფიშ 2:11—14. პეტრეს კოჩშა აშკურინ (იგავ. 29:25). პეტრეს უჩქუდ, მუს ფიქრენდ იეჰოვა თე საკითხიშ გურშენ, მარა თის თიშა აშკურინ, მუს იფიქრენდეს იერუსალიმიშ კრებაშ წინადაცვეთილ ებრაელეფი. პავლე მოციქულქ, ნამუთ ახალ წანაკოროცხუათ 49 წანას იერუსალიმს შეხვალამას ოსწრუდუნ, გეგმაარგამ პეტრეშ თოთმაცობა ანტიოქიას (საქ. 15:12). მუჭო მიქციებუდეს ებრაელეფ ვარდეს ფერ ქრისტიანეფ, მიდგას პირადო შეხუ პეტრეშ უსამართლო საქციელქ? ხომ ვედებრკოლებუდეს თინეფ? მიოდინუანდუო პეტრე ძვირფას პასუხიშმგებლობეფს თე შეცდომაშ გურშენ?

17. მუჭო გიმადირთ პეტრეს თიქ, ნამდა იეჰოვას შეულებ აპატუას?

¹⁷ არგამა რე, ნამდა პეტრექ თანდაბლობა გეგმირჩქინ დო მიღ პავლეშ რჩევა. ბიბლიას სოთინ ვა ჭარ, ნამდა თიქ მიოდინუ მუშ პასუხიშმგებლობეფი. უმოს გვიანო თიქ ღორონთიშ შთაგონებათ ჟირ წერილ ჭარ, ნამუქით ბიბლიაშ წიგნეფო გინირთ. მუშ მაჟია წერილს, პეტრე პავლეს „საჸოროფო ჯიმათ“ მიშინუანს (2 პეტ. 3:15). შილებე პეტრეშ შეცთომაქ გურ ქელაჭუკო ებრაელ ვარდესინ ფერ ქრისტიანეფს, მარა კრებაშ დუდ, იესო ქრისტე აგრძელენდ თიშ გიმორნაფას (ეფეს. 1:22). კრებაშ წევრეფს შეულებდეს მიაჸუნესკო იესოშ დო თიშ მუმაშ მაგალითის პატიებაშ გიმორჩქინას. იმენდ რე, ნამდა მითინ ვადაბრკოლებე არასულყოფილ კოჩიშ შეცდომაშ გურშენ.

18. მუნერ შემთხვევას შილებე დემასაჭირან თიცალ თოლწონუაქ სამართლიაონობაშენ, მუნერით იეჰოვას უღუ?

¹⁸ მუჭოთ პირველ საუკუნეს თეშ, ამდღა ხოლო ვარენა უხუცესეფი სრულყოფილეფი, „მუშენდა ჩქი არძა ხშირას ფჩირთუთ“ (იაკ. 3:2). თენა არძას ჯგირო მარჩქილენა, მარა პრობლემა თიმწკუმა წიმიჭკირუ, მუჟამსით პირადო შემეხებუნა არასრულყოფილ თანაქრისტიანიშ საქციელ. თეცალ დროს ქუმაღვენუნანო თიცალ თოლწონუა სამართლიაონობაშენ, მუნერით იეჰოვას უღუ? მაგალთო, მუჭო მიქციებუთ, მუჟამსით უხუცესი თიცალ მუდგარენს ქოიწინა, ნამუსით უსამართლობათ მირჩქინანთ? ხომ ვედებრკოლებუთ, უხუცესიქ უდუფიქრებუო თიცალ მუდგარენ ქოთქუას, ნამუთ გურს ქელგოჭუანდეს? თიშ მანგიორო, ნაჩქარევო მიფრჩქინათ, ნამდა თე ჯიმა უხუცესობას ვეშეფერებუნ, ვა უჯგუნო მოთვინებათ ქუჯინათ იესოს, კრებაშ დუც? შეცთომაშა ყურადღებაშ მექციებაშ მანგიორო, ვა უჯგუნო დეფიქრათ, ნამდა თე ჯიმა ბრელ წანას ართგურო ომსახურუდ იეჰოვას? ქუგაღვენუნანო ხიოლი თიშ უმკუჯინუო, ნამდა ჯიმა გიშენა, მარა თინა იშენით მსახურენს უხუცესო დო ღებულენს ახალ პასუხიშმგებლობეფს? პატიებაშო მზათ ქორეთ-და, ოძირანთ, ნამდა თიცალ თოლწონუა გიღუნა სამართლიაონობაშენ, მუნერით იეჰოვას უღუ (წეკითხით მათეშ 6:14, 15).

19. მუ ოკო მაფუდან გინოჭყვიდილ?

¹⁹ სამართლიანობაშ მოჸოროფეეფს ართ შურ უღუნა, მუჟამ მუღენს იეჰოვა ბოლოს ირნერ უსამართლობას, ნამუთ სატანაშ დო თიშ უბადო ქიანაშ ჭყოლოფუათ არსებენს (ეს. 65:17). ონდო თენა მოხვადუნ, მორთ, გინოჭყვიდილ მაფუდან თანდაბლურო ვაღიარათ ჩქინ შეზღუდულ შესაძლებლობეფი დო ქუვაპატუათ თინეფს, მით ჩქი მიშენა. თენა მიმეხვარებუნა, თიცალო უჯინათ სამართლიაონობას, მუჭოთ იეჰოვა.