1, 2. ა) მუთ გუ ამდღანერ ქიანა ღურა მესაჯებულ პატიმარს? (ქოძირით სურთ თე გვერდის) ბ) მუს მომღანა თე ქიანაშ განადგურება?

„ღურელ მოურს!“ თაშ უძახდეს უდუნდებელ კრიმინალს, მუჟამსით საკანშე გიმოჸუნდეს დო რკინაშ კარეფს ქიმიოკილანდეს. მუშენ იძახდეს მცველეფი თეცალ სიტყვეფს, მუჟამსით კოჩ ცოცხალ დო ჯამრთელ რდუ დო ოღურალ ხოლო მუთუნ ვაჭირუდ? მუშენდა მცეველეფს თინა თი ადგილშა მეჸუნდეს, სოდეთ ღურათ ოკო დასაჯესკო. ათეშგურშენ თე ბრალგედვალირ კრიმინალ ღურელს მუთუნით ვაუჯგუდ. *

² ამდღარ უბადო ქიანა მუდგარენით გუ თი პატიმარს, ნამდგაშა ღურა რე მესაჯებულ. ბრელ ხან რე თე უბადო ქიანაშა განაჩენ გიშაღალირ რენ დო თიშ აღსრულებაშა მუთუნს ვეწარნე. ბიბლია იჩიებ: „გინმურს თე ქიანა“ (1 იოან. 2:17). თე სისტემაშ განადგურება კარშა რე მონჭაფილ. მარა ართ დიდ განსხვავება რე თე ქიანა დო თი პატიმარ შკას. ნამთინექ შილებე უსამართლობათ მირჩქინას პატიმარიშ ღურათ დასაჯება დო თეშ წინააღმდეგ მიდართას, თი იმენდით ნამდა, ბოლო წუთის გეგნიფიქრენა განაჩენიშ აღსრულებას. მარა თე ქიანას განაჩენ გიშუღ სამყაროშ სრულყოფილ დო სამართლიან  უზენაეს ღორონთიქ (კან. 32:4). თე განაჩენიშ სამართლიანობაშა მითინს ვემშაღინე ეჭვი დო ვართ ღორონთი გინიფიქრენს თიშ აღსრულებას. მუჟამსით თენა ქუმოხვადუნ, სამყაროშ არძა გონიერ ქმნილება მთელ გურით დეთანხმებ, ნამდა თე განაჩენ სამართლიან რდუ. თენა არძას შურს მოუდგუნს!

3. მუს გენიფხილენთ თე სტატიას?

³ მუ მიშმურს „თე ქიანაშა“, ნამუთ „გინმურს“? თი გლახა საქმეეფი, ნამუთ ამდღა ხალხის ჩვეულებრივ მუდგარენო მიორჩქუნ, მისპუ. გლახა ამბე რენო თენა? მუშო ოკო რაგად, ვარ! სინამდველეს თენა „ღორონთიშ სამეფოშ გურშენ სახიოლო ამბეშ“ მნიშვნელოვან ნაწილ რე (მათ. 24:14). თე სტატიას გენიფხილენთ ოთხნერ პრობლემას, ნამუსით ღორონთიშ სამეფო გინოჭკირუნს, მუჟამსით ქუმურს. თენეფ რე: უბადო ხალხი, კორუმპირებულ ორგანიზაციეფი, არასწორ საქმეეფი დო გლახა პირობეფი. თითოულ პრობლემაშ გარჩიებაშ დროს ქეშვეხებუთ სუმ საკითხის: 1) მუჭო მოქმედენს ამდღა თე პრობლემეფი ჩქინწკუმა, 2) მუს ქიმინუნს იეჰოვა თე ირფელ გეგნოჭკირასინ თიშენ დო 3) მუჭო თირანს თე პრობლემეფს ირფელ ჯგირით.

4. მუჭო მოქმედენს უბადო ხალხი ჩქინწკუმა?

⁴ მუჭო მოქმედენს უბადო ხალხი ჩქინწკუმა? პავლექ ღორონთიშ შთაგონებათ იწინასწარმეტყველ, ნამდა „ძნელ გინაღალარ დრო დოდირთუდ“ დო თინა ხოლო თქუ, მუჭო „უბადოეფი დო თვითმარქვიეფი ხოლო უფრაშო მიქციებუდეს“ (2 ტიმ. 3:1—5, 13). ქარწყეთო თე წინასწარმეტყველებაშ შესრულებას? ჩქინდე ბრელ შილებე თიცალ უბადო ხალხშე შეფხვადითკო პრობლემეფს, მუნერით რენა მოძალადეეფ, რასისტეფ დო კრიმინალეფი. ნამთინე არგამათ გიმირჩქინანს უბადობას, მარა ნამთინე სამართლიანეფ რდან თეშ მუგოძირუანა დუც დო ავრე გლახას ორთუნა. შილებე პირადო ჩქი ვანობღვენა თეცალ კათაშე პრობლემა, მარა თინეფ იშენით მოქმედენა ჩქინწკუმა. გურ ბჭყორდუნა, მუჟამსით თინეფიშ გლახა ამბეფიშ გურშენ ბგებულენთ. შიში ენმაჭკირუნა, მუჟამსით ვორწყეთ, ნამდა თინეფ უდუნდებუო ოქცუნა ბაღანეფს, უნჩაშეფს დო თინეფს, მიდგას დუდიშ დაცვება ვეშულებნა. უბადო ხალხი არაადამიანურ, ცხოველურ დო დემონურ თვისებეფს გიმირჩქინანს (იაკ. 3:15). საბედნიეროთ, იეჰოვაშ სიტყვა სახიოლო ამბეთ ელამკინანა გურშა.

5. ა) მუშ საშვალება უღუნა დიო ხოლო უბადო კათას? ბ) მუ აღოლე თი უბადო ხალხის, მით ვადოთირანს მუშ ცხოვრებას?

⁵ მუჭო გინოჭკირუნს იეჰოვა თე პრობლემას? ამდღა იეჰოვა საშველებას არძენს უბადო ხალხის, ნამდა დოთირუან მუნეფიშ ცხოვრება (ეს. 55:7). საბოლო განაჩენ თე ქიანაშა რე გიშაღალირ დო ვართ ხოლო ცალკე პიროვნებეფშა. მარა მუ შილებე ითქუას თი პიროვნებეფშენ, მიდგას ვაკო დითირას დო ხუჯის უკინენს თე ქიანას დიდ გასაჭირიშ დოჭყაფაშახ? იეჰოვაქ პირობა დოდ, ნამდა ართ დო სამუდამოთ გოწიმინდას დედამიწას უბადო ხალხშე (წეკითხით ფსალმუნიშ 37:10). უბადო ხალხი შილებე ფიქრენდას, ნამდა გასამართლება მუნეფს ვეშეხებუ. ბრელქ ქიდიგურუ, მუჭო ფორას დანაშაულ დო თეშ იძირე, ნამდა მითინ ვა მოთხინს პასუხის დო გიოსკიდნა თე ირფელ (იობ. 21:7, 9). მარა ბიბლია მირაგადნა: „[ღორონთიშ] თოლეფი გინაჯინე კოჩიშ შარას დო ორწყე თიშ ნაბიჯეფს. ვა არსებენს ვართ უკუმელა დო ვართ წკურუმ, სოდეთ უბადოშ მაქიმნალეფ დიტყობუდეს“ (იობ. 34:21, 22). იეჰოვა ღორონთშე მითინს ვატყობინე. ნამთინ თაღლითის ვაღორებე თინა, მუშენდა ვა არსებენეს თიცალ მუთუნ, მუდგას ღორონთიშ თოლი ვაძირუნს. არმაგედონიშ უკულ,  ქობძირუნთ დედამიწას, სოდეთ ვეჸუაფნა უბადო ხალხი, მუშენდა თინეფ ართ დო სამუდამოთ მისპუნა! (ფსალმ. 37:12—15).

6. მი დოსკიდუ უბადოეფიშ განადგურებაშ უკულ დო მუშენ რე თენა სახიოლო ამბე?

⁶ მი დოსკიდუ უბადოეფიშ განადგურებაშ უკულ? იეჰოვა გურიშემაკინალ პირობას მარზენა: „თვინიერეფ დემკვიდრენა დედამიწას დო გეხარებუნა დიდ მშვიდობათ“. კინ თე ფსალმუნს პკითხულენთ: „მართალეფი დემკვიდრენა დედამიწას დო მარადიულო იცხოვრენა თექ“ (ფსალმ. 37:11, 29). მი რენა „თვინიერეფ“ დო „მართალეფი“? თვინიერეფ რენა თინეფ, მით თანდაბალო მეჸუანა იეჰოვაშ ხემძღვანელობას დო ურჩქილენა თის; მართალეფი რენა თინეფ, მისით უჸორს თიშ კეთება, მუთ იეჰოვა ღორონთიშ თოლს სწორ რე. ამდღარ მსოფლიოს მართალ ხალხი ექი-აქო რე, მარა მუჟამსით ახალ ქვეყნიერება ქუდოდირთუნ, ხვალე თვინიერეფი დო მართალეფ იცხოვრენს თექ. ნამდვილო, თეცალ კათა მთელ ქიანას სამოთხეთ გინართინუანს!

7. მუჭო მოქმედენს ჩქინწკუმა კორუმპირებულ ორგანიზაციეფი?

⁷ მუჭო მოქმედენს ჩქინწკუმა კორუმპირებულ ორგანიზაციეფი? თი გლახა საქმეეფიშ უმენტაშ, ნამუთ ამდღა მუთმოხვადუ, თე ორგანიზაციფიშ ბრალ რე დო ვართ ხოლო ცალ-ცალკე მითინიშ. მაგალთო, დეფიქრით თი რელიგიურ ორგანიზაციეფშენ, მიდგას შეცთომაშა მიშაჸუნს მილიონეფი დო ტყურას ურაგადნა ღორონთიშ, ბიბლიაშ სანდოობაშ, დედამიწაშ დო კაცობრიობაშ მომავალიშ დო ბრელ შხვა საკითხეფიშ გურშენ. მუ შილებე ფთქუათ თი მთავრობეფიშ გურშენ, მით ხეს უნწყუნს ჩხუპეფს დო ეთნიკურ კონფლიქტეფს, ქრთამიშ ეჭოფუას დო გიშაკერძაფას, ნამუსით გაჭირებულ დო დაუცველ კათაშ დაჩაგრება მოჸუნს? ვარდა მუ შილებე ფთქუათ თი ჰარამ ორგანიზაციეფიშ გურშენ, მით აფუჭენს გარემოს დო არდებულო გიმირინუანს ბუნებრივ რესურსეფს? თეს გეძინელ, ბრელ ფარა ქიშუანინ თიშენ, თინეფ გიმირინუანა პატიოსან ხალხის, მუჟამსით მილიონობით კოჩი უღონობაშ თუდო ცხოვრენს. მუშო ოკო რაგად, კორუმპირებულ ორგანიზაციეფი რენა პასუხიშმგებელი ამდღა მთელ მსოფლიოს ხალხი წვალენსინ თიშენ.

8. მუ აღოლე თი ორგანიზაციეფს, ნამუთ ამდღა საიმენდოთ მიორქჩუნა?

⁸ მუჭო გინოჭკირუნს იეჰოვა თე პრობლემას? დიდ გასაჭირ თიმწკუმა ქიდიჭყაფუ, მუჟამსით მთავრობეფი ტყურა რელიგიეფიშ წინააღმდეგ მიდულა, ნამუსით ბიბლია მეძავო დო დიდ ბაბილონო მიშინუანს (გამოცხ. 17:1, 2, 16; 18:1—4). ტყურა რელიგიეფი მთლიანო გენადგურებუ. მუ აღოლე არძა შხვა კორუმპირებულ ორგანიზაციეფს? ბიბლია გვალეფს დო კუნძულეფს ადარენს ბრელ თი ორგანიზაციას დო დაწესებულებას, ნამუთ ამდღა საიმენდოთ მიორჩქუნა (წეკითხით გამოცხადებაშ 6:14). ღორონთიშ სიტყვას ნაწინასწარმეტყველებ რე, ნამდა მთავრობეფი დო თის ოქვებდებარუნ თი ორგანიზაციეფი, ვადოსკიდნა მუნეფიშ ადგილს. დიდ გასაჭირ კულმინაციაშ მიოჭირინუას, მუჟამსით განადგურენს მთავრობეფს დო არძას, მით თინეფწკუმა ართო ღორონთიშ სამეფოშ წინააღმდეგ მეურს (იერ. 25:31—33). თეშ უკულ კორუმპირებულ ორგანიზაციეფ დღას ვეარსებენს!

9. მუშენ შემლებნა ვორდათ დარწმუნებულ, ნამდა „ახალ დედამიწა“ ჯგირო იჸი ორგანიზებულ?

⁹ მუთ დითირუ თე კორუმპირებულ ორგანიზაციეფი? ქიარსებენსო არმაგედონიშ უკულ, მუთუნნერ ორგანიცაზია? ბიბლიას ჭარ: „ჩქი თიშ დუნაპირებუთ ველუთ  ახალ ცას დო ახალ დედამიწას, სოდეთ დამკვიდრებულ იჸუაფ სიმართლე“ (2 პეტ. 3:13). ჯვეშ ცა დო დედამიწა გენადგურებ, ნამდგაშა მიშმურს კორუმპირებულ მთავრობეფი დო თინეფიშ კონტროლიშ თუდო რენ ფერ საზოგადოება. მუთ დითირუ თინეფ? სიტყვეფი „ახალ ცა დო ახალ დედამიწა“ ნიშნენს ახალ მთავრობას დო ახალ საზოგადოებას, ნამუთ თის დემორჩილებ. ზეციერ მთავრობა, ნამდგაშ მეფე იესო ქრისტე რენ, სრულყოფილო გეგმირჩქინანს თვისებეფს, ნამუსით იეჰოვა, წესრიგიშ ღორონთი გიმირჩქინანს (1 კორ. 14:33). თაშ ნამდა „ახალ დედამიწას“ იცხოვრენს თიცალ კათა, მით ბრელ მუთუნს უხემძღვანელენს (ფსალმ. 45:16). თინეფს იესო ქრისტე დო 144 000 ცხებული ქრსტიანი ქიმეჩანა მითითებას. წერმიდგინით თი დროს, მუჟამსით არძა კორუმპირებულ ორგანიზაციაშ მანგიორო იარსებენს ხვალე ართ, გაერთიანებულ დო სამართლიან ორგანიზაცია!

10. მუნერ საქმეეფით რე ამდღარ მსოფლიო ეფშა დო მუჭო მოქმედენს თენა თქვანწკუმა დო თქვან ოჯახწკუმა?

¹⁰ მუჭო მოქმედენს ჩქინწკუმა გლახა საქმეეფი? ჩქი ფცხვორენთ თიცალ ქიანას, სოდეთ ირ ნაბიჯის შეფხვადუთ უზნეობას, უპატიოსნობას დო ძალადობას. განსაკუთრებულო მშობლეფს აფნა ობრძოლებელ, ნამდა დეცვან მუნეფიშ სქუალეფი გლახა გავლენაშე. გართობაშ ინდუსტრია ირფელ გლახას ჯგირ რდასინ თეშ ოძირანს დო ღორონთიშ სამართლიან ნორმეფ ოძიცეთ ვა უბაღ (ეს. 5:20). ჭეშმარიტ ქრისტიანეფ ირნერო ოცადუნა, ნამდა რდან ღორონთიშ ართგურეფ თიცალ მსოფლიოს, ნამუთ გლახა საქმეეფით რე ეფშა დო სოდეთ იეჰოვაშ ნორმეფს მითინ ვაცენს პატის.

11. მუს ბგურაფლენთ სოდომ დო გომორაშ შემთხვევაშე?

¹¹ მუჭო გინოჭკირუნს იეჰოვა თე პრობლემას? ქიგიფშინათ, მუჭო მიქცუ იეჰოვაქ, მუჟამსით სოდომქ დო გომორაქ გლახა საქმეეფით ეიფშუ (წეკითხით 2 პეტ. 2:6—8). მართალ ლოტი დო მუშ ოჯახი გაწამებულ რდეს თი გლახა საქმეეფით, ნამუსით თექიანეფ ორთუდეს. იეჰოვას თე ქალაქეფიშ განადგურებათ უბადობაშა ხვალე ვამუღებ ბოლო; თიქ „ათეთ ქაძირუ უღორონთოეფს, მუ აღოლენა მომავალს“. მუჭოთ ჯვეშო მოუღ ბოლო უზნეობას თეშ, იეჰოვა ბოლოს მუღენს ამდღანერ უბადობას, მუჟამსით გასამართლენს თე ქვეყნიერებას.

12. ნამ საქმეეფიშ კეთება გილამნა, მუჟამსით თე ქიანა მისპუ?

¹² მუთ დითირუ გლახა საქმეეფი? სამოთხეთ გინორთელ დედამიწა ჯგირ საქმეეფით ეიფშაფუ. დეფიფქრათ, მუშმაჯგირა საქმე იჸი მთელ დედამიწაშ სამოთხეთ გინოშკუმალა ვარდა ჸუდეეფიშ შენება მუჭოთ ჩქინო თეშ, ჩქინ საჸოროფო ხალხშო ხოლო! წერმიდგინით მუშმადიდა ხიოლი მაღვენუნა, მუჟამსით ქობძირუნთ მილიონობით გათელებულ ღურელს დო ქუდვოგურუანთ თინეფს იეჰოვაშ შარეფიშ გურშენ; თეშ გარდა, მუჭო ოქცუდ თინა კაცობრიობას (ეს. 65:21, 22; საქ. 24:15). ჩქი ვორთუდათ იჸი თიცალ საქმეეფს, ნამუთ ხიოლს მომღანა დო იეჰოვას ხოლო განადიდენს!

13. მუ გლახა შედეგეფი მომღეს ამდღა სატანაშ, ადამიშ დო ევაშ უდუჯერებუობაქ?

¹³ მუჭო მოქმედენს ჩქინწკუმა გლახა პირობეფი? უბადო კათა, კორუმპირებული ორგანიზაციეფ დო გლახა საქმეეფი ხეს უნწყუნა დედამიწას ოცხოვრებელ პირობეფიშ გაუფრაშებას. მის შეულებ თქუას, ნამდა დღას ვეგმუცადებ ჩხუპი, უღონობა დო რასიზმი ვარდა ლახალა დო  ღურა? თენა ირფელ თიშ შედეგ რე, ნამდა სუმ უბადო პიროვნებაქ — სატანაქ, ადამქ დო ევაქ იეჰოვაშ წინააღმდეგ მიდართეს. ამდღა მითინს ვანტინე თი გლახა შედეგეფშა, ნამუქით მაჸუნ თინეფიშ უდუჯერებუობას.

14. მუჭო მუღენს იეჰოვა ბოლოს გლახა პირობეფს?

¹⁴ მუჭო მუღენს იეჰოვა ბოლოს გლახა პირობეფს? იეჰოვაქ პირობა დოდვუ, ნამდა ბოლოს მუღენდ ჩხუპის (წეკითხით ფსალმუნიშ 46:8, 9). მუშ რაგად შილებე ლახალა დო ღურაშე? იეჰოვა ართ დო სამუდამოთ მოსპუნს თინეფს (ეს. 33:24; ეს. 25:8). თინა უღონობას ხოლო მოსპუნს (ფსალმ. 72:12—16). ღორონთი შხვა არძა გლახა პირობეფს მუღენს ბოლოს, ნამუთ ამდღა ცხოვრებას აუფრაშენს. თინა სატანაშ დო მუშ დემონეფიშ გლახა გავლენას ხოლო მოსპუნს (ეფეს. 2:2).

15. მუ ვეჸი არმაგედონიშ უკულ?

¹⁵ ქუგაფნანო წარმოდგენილ ქიანა ჩხუპიშ, ლახალაშ დო ღურაშ უმშო? დეფიქრით, ვართ ჯარი, ვართ ოჩხუპებელ იარაღ დო ჩხუპის ნაღურა ხალხიშ მემორიალეფ იჸუაფ. თეს გეძინელ ვართ საავადმყოფოეფი, ექიმეფ, ექთანეფი, ჯამთელობაშ დაზღვევა, მორგეფი, სარიტუალო ჸუდეეფ, მეჭკუდეფ დო სასაფლეფი ვეჸი! მუჟამსით კრიმინალ მისპუნ, საჭირო ვეჸი უსაფრთხოებაშ სამსახური, სიგნალიზაციეფ, პოლიცია დო შილებე ვართ ბორქომეფქ დო ვართ კილეფქ იჸუას საჭიროქ! მუჯგირ იჸი, ნამდა ოწუხებელ მუთუნ ვამაღვენუნა.

16, 17. ა) მუჭო იგინანა დუც არმაგედონს გინოსკილადირეფ? (ქიმიჸონით მაგალით). ბ) მუჭო შემლებნა დარწმუნებულ ვორდათ, ნამდა გინოფსკიდუთ თე ქიანაშ განადგურებაშ დროს?

¹⁶ მუნერ ცხოვრება მაღვენუნა, მუჟამსით გლახა პირობეფი ვეჸი? თეშ წარმოდგენა ადვილ ვა რე. ჩქი თისხი ხან რე თე ქიანას ფცხოვრენთინ, ნამდა შილებე უკვე ვა ბგინაფლენდათ, მუშმადიდა სტრესიშ თუდო ვორეთ თეცალ პირობეფიშ მიმაჯინუ. მაგალთო, პიროვნება, ნამუთ მატარებელიშ სადგურიშ გოხოლუას ცხოვრენსინ, შილებე უკვე მერჩქვანელ რდან ხმაურს; ვარდა თინეფ, მით გვამიშ დარღვაფალ ადგილიშ ხოლოს ცხოვრენან, შილებე ვაგინაფლენდან შურს. მარა, მუჟამსით თე ირფელ მისპუნ, დიდ შვებას იბგინანთ!

¹⁷ მუთ დითირუ, სტრესი, ნამუთ ამდღა მიღნა? ფსალმუნიშ 37:11 პასუხენს: „[თინეფ] გეხარებნა დიდ მშვიდობათ“. გურშა ველიაკინესო თე სიყტვეფქ? ზუსტას თენა ოკო იეჰოვას თქვანო. ირნერო ქეცადით, ნამდა ხოლოს რდათ იეჰოვა ღორონთი დო თიშ ორგანიზაციაწკუმა თე ბოლო დღალეფს! დეფიქრით დო დაფასით თქვან იმენდ, რეალურო მირჩქინით თინა დო შხვეფს ხოლო ქეჩით თიშ გურშენ (1 ტიმ. 4:15, 16; 1 პეტ. 3:15). თეგვარო, თქვა დარწმუნებულ იჸით, ნამდა განაჩენ გიშაღალირ ქიანაწკუმა ართო ვეგენადგურებუთ. პირიქით, თქვა ბედნერ დო მარადიულ ცხოვრება გაღვენუნა!