1^—3. ა) მუ სირთულეეფს შეხვადნა ახალგაზრდეფ დო მუს შილებე თენა შევადარათ? (ქოძირით სურათ თე გვერდის). ბ) მუჭო შეულებნა ქრისტიან ახალგაზრდეფს გიორჯგინან თე სირთულეეფს?

წერმიდგინით, ნამდა განსაკუთრებულ შეხვალამაშა მეურთ დო შორ შარა გაფნა ოულარ. თექ ავტობუსით ისხუნეთ ულა. ავტობუსეფიშ გაჩერებას, ბრელ ხალხი გილესოფ დო ბრელ ავტობუსის ორწყეთ. მუშმაჯგირა რე, ნამდა თქვა გიჩქნა სო გაფნა ოულარ დო ნამ ავტობუსით, ათეშენ თქვა შხვა ავტობუსშა ვემთურთ, მუშენდა გიჩქნა თინა არასწორ მიმართულებათ გიჸონანა.

² ამდღა ახალგაზრდეფ ზუსტას თე მგზავრეფს ქოგნა, მუშენ-და თინეფს ხოლო ცხოვრებაშ შორ შარაშა აფნა ოულარ. მინშა თინეფს ბრელ გადაწყვეტილება აფნა მიოღებელ, ნამუთიქ შილებე დუდ აურუას. ახალგაზრდეფ, თქვა შეილებნა უმოს ადვილო მიღათ გადაწყვეტილებეფ, მუჟამსით ზუსტას გიჩქნა მუ მიზანს მიონჭირნუათინ. ნამ შარას გიშაგორუნთ ცხოვრებას?

³ თე სტატია პასუხის არძენს თე კითხვას დო ელუჩანს ახალგაზრდეფს, ქიმიოჭირინუან სულიერ მიზნეფს, ნამუთ გურს უხარენს იეჰოვას. თენა ნიშნენს, ნამდა გეფთვალისწინათ იეჰოვაშ მითითებეფ  თიცალ გადაწყვეტილებეფიშ მეღებაშ დროს, მუნერით რე: განათლებაშ მეღება, სამუშა, ოჯახურ პასუხიშმგებლობეფ დო შხვა საკითხეფ. თეშ კეთებათ მივოჭირინუანთ სულიერ მიზნეფს. თი ახალგაზრდეფ, მით იეჰოვაშ მსახურებას ოცადუნ, ცხოვრებას დიდ კურთხევეფს მიღენა (წეკითხით იგავები 16:3). *

4. მუს გუვარჩიენთ თე სტატიას?

⁴ სულიერ მიზნეფიშ მეჭირნაფა ჯგირ შედეგის მომღანა. მუშენ შემლებნა თეშ რაგად? მორთ, გუვარჩუათ თეშ სუმ მიზეზი. პირველ ჟირ მიზეზშე იძირე, ნამდა სულიერ მიზნეფიშ მეჭირნაფა, ამანგარენს იეჰოვაწკუმა ჩქინ ურთიერთობას. მასმა მიზეზშე შემლებნა ბძირათ, მუ ჯგირობუას მომღანა თეოკრატიულ მიზნეფიშ მეჭირნაფა

5. მუშენ ოკო მივოჭირინუათ სულიერ მიზნეფს?

⁵ სულიერ მიზნეფიშ მეჭირნაფაშ მთავარ მიზეზ თინა რე, ნამდა გეგმოფხანტათ იეჰოვაშ მარდულობა, თიშ გიმორჩქინელ ჸოროფაშე დო ირფელიშ გურშენ, მუთ ჩქინდა აფჷ კეთებულ. ფსალმუნმაბირექ ჭარ: „ჯგირ რე, ვუმარდუდათ იეჰოვას . . . იეჰოვა სი გუმახარ, სქან საქმეეფით, გახარებულ იპჸიქ სქან ნოხელუერიშ გურშენ“ (ფსალმ. 92:1, 4). ახალგაზრდეფ ქიფიქრით, მუსხი მუდგარენ მერჩეს იეჰოვაქ: სიცოცხლე, რწმენა, ბიბლია, კრებაშ შეხვალამეფ დო მომავალიშ დიდებულ იმენდ. სულიერ მიზნეფიშ მეჭირნაფათ ვოძირანთ, ნამდა მარდულეფ ვორეთ თე კურთხევეფიშ გურშენ დო შედეგო, უმოს ხოლოს იპჸით ღორონთწკუმა.

6. ა) მუჭო მოქმედენს სულიერ მიზნეფ იეჰოვაწკუმა თქვან ურთიერთობაშა? ბ) მუნერ მიზნეფშე შეულებნა ფიქრი ახალგაზრდეფს?

⁶ ჩქი მიღნა მაჟია მიზეზ მუშ გურშენით ოკო იფიქრათ სულიერ მიზნეფშე. მუჟამსით სულიერ მიზნეფიშ მიოჭირნაფალო ნაბიჯებს გინმოდგუნთინ, ღორონთიშ თოლს ჯგირს ვორთუთ დო შედეგო, უმოს ხოლო იპჸით თიწკუმა. მოციქულ პავლექ თეცალ დაპირება მუჩეს: „ღორონთ უსამართლო ვა რე, ვეგიჭყოლიდუანს თქვან ხანდას დო ჸოროფას, ნამუთ თიშ სახელიშ გურშენ გიმირჩქინით“ (ებრ. 6:10). ვეფიქრათ, ნამდა დიო მანგარ ახალგაზრდა რეთ დო ადრე რე სულიერ მიზნეფშე ფიქრი. ქრისტინა ვით წანერ რდუ, მუჟამსით რეგურალურო ქიდიჭყჷ ართგურ მოწმეეფიშ ბიოგრაფიებიშ კითხირ. ტობიქ 12 წანერ რდუნ თეშ გინოჭყვიდ, ნათუაშახ მთლიანო წუკითხირუდკო ბიბლია. მაქსიმ 11 წანერ რდუ დო თიშ და ნოემ 10 წანერ, მუჟამსით ინათეს. თევრეშე მოჸუნაფილ, ჟირხოლოქ ბეთელს მსახურებაშე ქიდიჭყჷ ფიქრი. თე მიზანქ ვა გაჭყორდესკონ თიშენ, ბეთელიშ ბლანკ კიდალას ქიმკაჭაბეს. შეილებნანო თქვა ხოლო დეფიქრათ სულიერ მიზნეფშენ დო გეგნოდგათ ნაბიჯეფ თინეფიშ მიოჭირნაფალო? (წეკითხით ფილიპელები 1:10, 11). *

7, 8. ა) მუჭო მიადვილენა სულიერ მიზნეფშე ფიქრ გადაწყვეტილებეფიშ მეღებას? ბ) მუშენ თქუ ართ ახალგაზრდაქ ვარია უნივერსიტეტის გურაფაშენ?

⁷ გადაწყვეტილებეფიშ მეღება რე თიშ მასმა მიზეზ, ნამდა ახალგაზრდეფქ ადრეშე ქიდიჭყან ფიქრ მუნეფიშ მიზნეფიშ გურშენ. შხვა საკითხეფწკუმა ართო თინეფს გინაჭყვიდირალ აფნა, მუნერ განათლებას დო სამუშას გიშეგორნა. გადაწყვეტილებეფიშ მეღება მოგენს სწორ შარაშ გიშაგორუას, მუჟამსით შარა აკართუს გერეთ. მუჟამსით დარწმუნებულ რეთ, სო გაფნა ოულარინ, ადვილ რე სწორ შარაშ გიშაგორუა. თეგვარო, სწორ გადაწყვეტილებეფიშ მეღება ვაგაიჭირდუნა, მუჟამსით ნაფიქრებ გაჸინა თქვან მიზნეფიშ გურშენ. იგავეფიშ 21:5-ის ჭარ: „მოხანდეშ გეგმეფს წიმოძინა აღვენუ“. მუთ უმოს ადრე დიჭყანთ თქვან გეგმეფიშ გურშენ ფიქრისინ, თით უმოს მალას მიოჭირნუანთ წარმატებას. თეშ ჯგირ მაგალით რე ართ და, სახელო დამარის, ნამუსით ახალგაზრდობას მნიშვნელოვან გადაწყვეტილებაქ აჸუ მიოღებელქ.

 ⁸ დამარისიქ სკოლა მაღალ ნიშნეფშა ათუ. თის შეულებუდ უფასოთ გუგრძელებუდკო გურაფა უნივერსიტეტის იურიდიულ ფაკულტეტის. მარა თიქ ბანკის მუშობა ისხუნუ. თინა იჩიებ: „მა პიონერო მსახურება მაფუდ გინოჭყვიდილ. ათეშგურშენ თიცალ სამუშა მოკოდ, სოდეთ გვერდ განაკვეთის მაჸიდ ომუშებელ. უნივერსიტეტიშ დიპლომით ბრელ ფარას იბშინდჷ, მარა გვერდ განაკვეთიან სამუშაშ გორუა გამჭირდუდ“. დამარის უკვე 20 წანა რე პიონერო მსახურენს. მუს ფიქრენს თინა მუშ გადაწყვეტილებაშ გურშენ, ნამუთ ახალგაზრდობას მიღჷ? დამარის იჩიებ: „ბანკის, სოდეთ მუფშენქინ, ბრელ იურისტწკუმა მიღჷ ურთიერთობა. თინეფს თიცალ სამუშა უღნა, ნამუთ მა ხოლო მაღვენუდ, იურიდიულ ქომგურუაფუდკონ. მარა თინეფიშ უმენტაშ ვა რე კმაყოფილ მუნეფიშ სამუშათ. პიონერო მსახურებაშ დოჭყაფაქ მიმეხვარ დუდ ევუჩილითეკო გურიშგოტახუას, ნამუთ ქვეყნიურ სამუშას მოჸუნს დო ხიოლით ვემსახურკო იეჰოვას“.

9. მუშენ რენა ახალგაზრდეფ ცქვაფაშ ღირს?

⁹ მთელ მსოფლიოს ანთასობით ახალგაზრდა ცქვაფაშ ღირს რე, მუშენდა მუნეფიშ ცხოვრება იეჰოვას მეუძღვინეს დო პირველ ადგილს თეოკრატიულ მიზნეფ ქიგიორინეს. თინეფ კმაყოფილ რენა მუნეფიშ ცხოვრებათ დო თეწკუმა ართო მეჸუნა იეჰოვაშ ხემძღვანელობას თიცალ საკითხეფს, მუნერით რე განათლება, სამუშა დო ოჯახი. მეფე სოლომონქ ჭარ: „ქიმიენდი იეჰოვას მთელ გურით დო სქან ჭკუას ვენდა. ქორშუდას თინა არძა სქან შარას დო თინა გაისწორენს ოულარს“ (იგავ. 3:5, 6). ქრისტიან ახალგაზრდეფ ძვირფას რენა იეჰოვაშ თოლს. ღორონც უჸორს თინეფ, იცვენს, ხემძღვანელენს დო კურთხევეფს ვარკენს.

10. ა) მუშენ ოკო გემრდან მსახურება პირველ ადგილშა? ბ) მუჭო შემლებნა უმოს უჯგუშო გეგნოფჩათ შხვეფს სახიოლო ამბე?

¹⁰ ახალგაზრდა, ნამუთ იეჰოვაშ მსახურებას პირველ ადგილს გიორინუანსინ, ქადაქებას განსაკუთრებულ ყურადღებას აქციენს. იესო ქრისტექ თქუ, ნამდა „სახიოლო ამბექ ოკო ექადაქას არძა ხალხის“ (მარ. 13:10). თავრეშე იძირე, ნამდა სახიოლო ამბეშ ქადაქება საჩქარო რე, ათეშენ თინა პირველ ადგილს ოკო გემრდან. ხომ ვეშეილებნა თეშ დაგეგმათ, ნამდა უმოს ხშირას იქადაქათ ვარდა პიონერო იმსახურათ? მუშ რაგად შილებე ქადაქებას თქვანდა დიდ ხიოლ ვამუღუნ-და? მუჭო შეილებნა უმოს უჯგუშო გეგნოჩათ შხვეფს სახიოლო ამბე? თეს ჟირ მუდგარენ მიგეხვარებნა: ჯგირო მიმზადათ დო გაგძრელათ შხვეფშა იეჰოვაშ გურშენ რჩქინაშ გინოჩამა. თაშ ქიმიქციუბუთ-და, ქოძირუნთ მუ ხიოლს მოიღანა ქადაქება.

11, 12. ა) მუჭო შეულებნა ახალგაზრდეფს მემზადან ქადაქებაშო? ბ) მუჭო იქადაქ ართ ახალგაზრდაქ მუშ სკოლას?

¹¹ შეილებნა მამზადათ თიცალ კითხვეფიშ პასუხეფ, მუნერით რე: „მუშენ რწანს ღორონთი?“. ჩქინ ვებ-გვერდის jw.org მოჩამილ რე სტატიეფ, ნამუთ მეხვარებ ახალგაზრდეფს ჯგირო მამზადან თე კითხვაშ პასუხი. მაგალთო, შეილებნა ქოძირათ განყოფილება (ბიბლიური სწავლებები > ახალგაზრდები), სოდეთ მოჩამილ რე სამუშა ფურცელი („რატომ მწამს ღმერთი?“). სამუშა ფურცელს მოჸუნაფილ რე სუმ ბიბლიურ მუხლი, ნამუთ მიგეხვარებნა გეუნწყათ შხვეფს, მუშენ რწანა ღორონთი. თე მუხლეფ რე: ებრაელეფიშ 3:4, რომაელეფიშ 1:20 დო ფსალმუნიშ 139:14. ჩქინ ვებ-გვერდის მოჩამილ რე შხვა სამუშა ფურცელეფ ხოლო, ნამუთ მიგეხვარებნა მამზადათ შხვადოშხვა კითხვეფიშ პასუხეფი (წეკითხით 1 პეტრე 3:15). *

¹² მუჟამსით საშვალება ქუმგაჩამუნან, ქუწით თქვან ამხანაგეფს, ნამდა შეულებნა მიშელან ვებ-გვერდშა jw.org დო ქოძირან მუნეფშო საინტერესო საკითხეფი. მაგალთო, თაშ მიქცუ ართ ახალგაზრდა ქრისტიან ლუკაქ. თიშ კლასის შხვადოშხვა რელიგიეფიშ  გურშენ რაგადანდეს. ლუკაქ ქოძირ, ნამდა წიგნის სწორ ვარდუნ ფერ ინფორმაცია რდუ მოჩამილ იეჰოვაშ მოწმეეფიშ გურშენ. მართალ რე, დუდშე თაკილენდჷ, მარა უკულ მასწავლებელს ქოთხუ, ქიმუჩამუდკო უფლება, გენწყუკო, მუშენ ვარდ თექ მოჩამილ ინფორმაცია სწორ. ლუკაქ ქეჩუ კლასელეფს მუშ რწმენაშენ დო თეს გეძინელ, ვებ-გვერდი ხოლო ქაძირუ. მასწავლებელქ მოწაფეეფს ქუდავალ, ჸუდეს ქუჯინესკო ანიმაციურ ვიდეოს („მოიგერიე ჩხუბისთავი მუშტი-კრივის გარეშე“). ლუკას მანგარო ახიოლ, ნამდა დამოწმებაშ საშვალებაქ ქიმიაჩ.

13. მუშენ ოკო ვეგიპტახათ გურ სურთულეეფიშ დროს?

¹³ გურ ვეგიტახათ, თიმწკუმა ხოლო, მუჟამსით მინშა სირთულეეფს შეხვადუთ (2 ტიმ. 4:2). თეცალ დროს ხოლო ვარია ვათქუათ თქვან მიზნეფშე. კატარინა 17 წანერ რდუ, მუჟამსით გინოჭყვიდ, არძა მუშ თანამშრომელშა ქუქადაქებუდკო. ართ თანამშრომელ თის უხეშო ოქცუდ, მარა კატარინას გურ ვეჸუოთამ ქადაქებაშა. თიშ ჯგირ საქციელქ მანგარო იმოქმედ შხვა თანამშრომელწკუმა, ნამუსით ჰანს ჯოხოდ. შედეგო, თიქ პუბლიკაციეფიშ კითხირ დო ბიბლიაშ გურაფა ქიდიჭყჷ; ჭიჭე ხანშა ჰანსიქ დინათ. კატარინაქ შხვა ქალაქშა გეგნორთჷ ოცხოვრეფშა, ათეშენ თე ამბე ვაგუგებ. წერმიდგინით თიშ ხიოლ, მუჟამსით 13 წანაშ უკულ სამეფო დარბაზის მუშ ოჯახწკუმა ართო მოხსენებას ურჩქილედ, ნამუთ ჰანსის უღუდ. დასურო, მუ ჯგირქ იჸუ, ნამდა კატარინაქ ბოლოშა ქიმიაჸუნ მუშ მიზანს დო ქუქადაქ თანამშრომლეფს.

14, 15. ა) მუ ოკო შუდან ახალგაზრდეფს, მუჟამსით მუნეფიშ მახანეფშე ზეწოლას შეხვადუნა? ბ) მუჭო შეულებნა ახალგაზრდეფს მერუან მუნეფიშ მახანეფიშ გავლენას?

¹⁴ თე სტატიაშ მიზან რე, პირველ ადგილს სულიერ მიზნეფ ქიგიორინუათ დო თეთ იეჰოვას გურ გუხარათ. ამდღა ბრელ ახალგაზრდაშო შილებე მთავარ რდას დროშ ტარება დო თქვა ხოლო თეს ელაიჩანდან. მარა მუ ამდღა, მუ ჭუმან, თქვან საქციელით ოკო ქაძირუათ, ნამდა გინოჭყვიდილ გაფნა, ბოლოშა მიაჸუნათ თქვან მიზნეფს. ვემეჩათ თქვან მახანეფს თიშ საშვალება, ყურადღება შხვა მუდგარენშა გენგოღალაფუან. მუჭოთ სტატიაშ დაჭყაფუს მოშინაფილ მაგალითშე ბძირითინ, ალბათ ვეშურთ თიცალ ავტობუსშა, ნამუთ შხვა მიმართულებათ მეურს, ხვალე თიშ გურშენ, ნამდა თექ მგზავრეფ ჯგირ დროს ატარენა.

 ¹⁵ არსებენს ბრელ საშვალება, მერუათ თქვან მახანეფიშ გავლენას. მაგალთო, დუდ ეუჩილითეთ თიცალ სიტუაციეფს, სოდეთ შილებე ადვილო გემშართათ შეცთომაშა (იგავ. 22:3). ქუგაშინით თქვან დუც, მუქ შილებე მაჸუნას, მუჟამსით შხვეფიშ გლახა საქციელს გეიაჸუნუთ (გალ. 6:7). გეგმირჩქინით თანდაბლობა დო აღიარით, ნამდა რჩევეფ გოსაჭირნა. თანდაბლობა მიგეხვარებნა მიღათ მშობლეფიშ დო სულიერო მოწიფულ ქრისტიანეფიშ რჩევეფი (წეკითხით 1 პეტრე 5:5, 6). *

16. ქიმიჸონით მაგალით, სოვრეშეთ იძირე, მუ ჯგირობუა მოჸუნს თანდაბლობაშ გიმორჩქინას?

¹⁶ თანდაბლობაქ მეხვარ ართ ჯიმა ქრისტოფის რჩევაშ მეღებას. ნათუაშ უკულ ჭიჭე ხანშა თიქ ფიტნეს ცენტრშა ქიდიჭყჷ გილულა. თექ ახალგაზრდეფქ ქუდუჩემეს სპორტ კლუბშა მიშულა. თიქ უხუცესის ქუდურაგადუ თე საკითხიშ გურშენ. უხუცესიქ ქრისტოფის უწუ, ნამდა გადაწყვეტილებაშ მეღებაშახ დაფიქრებედკო თი საფრთხეეფშე, ნამუთ სპორტულ კლუბშა მიშულას მაჸუნუდ. მაგალთო, შილებედ მეტოქეობაშ შურქ გურჩქინდუკო. ქრისტოფიქ იშენით ქიდიჭყჷ სპორტ კლუბშა გილულა. მარა დრო ხანიშ უკულ, ქიმეხვად, ნამდა თექ საშიშ დო ძალადობათ ეფშა სპორტიშ სახეობეფ რდუ. თიქ კინ ქუდურაგადუ მუსხირენ უხუცესის. თინეფქ ბიბლიურ რჩევეფ ქიმეჩეს. „იეჰოვაქ ჯგირ ელმაჩამალეფ ქუმომიშკვჷ. მართალ რე, დროქ დემასაჭირ, მარა მა იშენით ქურჩქილ თინეფს“,— იჩიებ ქრისტოფი.

17, 18. ა) მუს ელჷ იეჰოვა ამდღა ახალგაზრდეფშე? ბ) მუქ შილებე მაჸუან ონარღებელქ დო მუჭო ევუჩილითუათ თეს დუდი? ქიმიჸონით მაგალითი.

¹⁷ ბიბლიას ჭარ: „გეხარ ახალგაზრდა სქან ახალგაზრდობაშ წანეფით დო ჯგირ გიკეთას სქან გურქ სქან ახალგაზრდობას“ (ეკლ. 11:9). დასურო, იეჰოვას ოკო ხიოლით ეფშა გურ გიღდან. თე სტატიაშე იძირე, ნამდა სულიერ მიზნეფშე ფიქრი დო თინეფიშ მეჸუნა ხიოლ დო ბედნერობას მოიღანა. მუთ უმოს ადრე დიჭყანთ თეშენ ფიქრის, თით უმოს მალას ქიგინანთ იეჰოვაშ ხემძღვანელობას, დაცვას დო კურთხევეფს. დეფიქრით ღორონთიშ სიტყვას მოჩამილ არძა რჩევაშე დო ვაგგოჭყორდან ეკლესიასტეშ 12:1-ს ინოჭარილ სიტყვეფქ: „რშუდას სქან დიდებულ გუმაჭყაფალ სქან ახალგაზრდობას“.

¹⁸ მითინ ვა სქიდუ მარადიულო ახალგაზრდა, მუშენდა ახალგაზრდეფ მალას ირდუნა. ბრელს ონარღებელქ აჸუ თი არასწორ მიზნეფქ, ნამუშ მეჭირნაფას ახალგაზრდობას ოცადუდეს. ნამთინეს თიშ გურშენ აფჷ გურ გოტახილ, ნამდა დღას ვაუცადებ მუთთუნნერ მიზანიშ მეჭირნაფა. მარა მუჟამსით სულიერ მიზნეფიშ მეჭირნაფას ახალგაზრდობაშე ვეცადებუთინ, თენა ცხოვრებას დიდ ბედნერობას მომღანა. თეს ოძირანს მირიანაშ შემთხვევა, ნამუთ ახალგაზრდობას ჯგირ სპორტსმენ რდუ. თის შეულებუდ მონაწილება მიღკო ზოთონჯიშ ოლიმპიადას, მარა სრულ დროთ მსახურება ისხუნუ. თინა ქომონჯიწკუმა ართო 30 წანაშ უმოს რე, მუთ სრულ დროთ მსახურენს. მირიანა იჩიებ: „სახელი, პატი, ძალიერება დო ქონება ვა რე ცხოვრებას მნიშვნელოვან. მარადიულ ბედნერობას მომღანა ღორონთიშ მსახურება დო ხალხიშ სულიერო მოხვარაშა მონაწილებაშ მეღება“.

19. მუ ჯგირობუა მოჸუნს სულიერ მიზნეფიშ მეჭირნაფას?

¹⁹ ახალგაზრდეფ ცქვაფას იმსახურენა, მუშენდა ურზუნა განსაცდელეფს დო გინოჭყვიდილ აფნა იეჰოვაშ მსახურება ცხოვრებას პირველ ადგილს გიორინუან. თინეფ სულიერ მიზნეფს მიოჭირნუანა დო ქადაქებაშ საქმე პირველ ადგილშა გეურენა. თეს გეძინელ, ვარზენა ქვეყნიერებას თიშ საშვალებას, შხვა მუდგარენშა გეგნაღალაფუას ყურადღება. თინეფს შეულებნა ჯერდან, ნამდა ტყურათ ვაშრომენა. ახალგაზრდეფს და დო ჯიმალეფ ელურენა, დო მუჟამსით იეჰოვაშ ნდობას გეგმირჩქინანან, თინეფიშ გეგმეფს წარმატება აღვენუ.