1, 2. ა) მუშენ რდუ მონობა დო თავისუფლება მნიშვნელოვან საკითხ ქრისტიანეფშო? ბ) მუჭოთ პავლექ თქუნ, მიშე მიშჷ ნამდვილ თავისუფლება?

პირველ საუკუნეშ ქრისტიანეფ რომიშ იმპერიას ცხოვრენდეს, სოდეთ ხალხი ამაყენდჷ მუნეფიშ კანონეფით, სამართალით დო თავისუფლებათ. მარა თექ მახორუეფიშ 30 პროცენტ მონეფ რდეს, ნამდგაშა რომიშ იმპერიაშ ძალიერება რდუ გერსხილი. ათეშენ, მონობა დო თავისუფლება უბრალო ხალხშო დო თინეფწკუმა ართო ქრისტიანეფშო ხოლო მნიშვნელოვან საკითხ რდუ.

² მოციქულ პავლეშ წერილეფშე ბრელს ბგებულენთ თავისუფლებაშ გურშენ. მარა თიშ მსახურებაშ მთავარ მიზან სოციალურ დო პოლიტიკურ რეფორმეფ ვა რდუ, ნამუთ თი დროს მახორუ კათას აწუხენდჷ. პავლე დო შხვა ქრისტიანეფ თავისუფლებას ნამთინ ქვეყნიურ მართველწკუმა ვა გორუნდეს. თინეფ ხალხის ღორონთიშ სამეფოშ დო იესოშ გიშაჸიდირალიშ გურშენ უქადაქდეს. პავლექ თანაქრისტიანეფს მეჭარ მიშე მიშჷ ნამდვილ თავისუფლება. კორინთელეფშა მეჭარილ მაჟია წერილს თიქ გასაგებო თქუ: „იეჰოვა შურ რე, დო სოდეთ იეჰოვაშ შურ რენ თექ თავისუფლება რე“ (2 კორ. 3:17).

3, 4. ა) მუს მიშინუანს პავლე მოციქულ 2 კორინთელეფიშ 3:17-ის ინოჭარილ სიტყვეფიშ რაგადშახ? ბ) მუ ოკო ვაკეთათ, ნამდა იეჰოვაშ მოჩამილ თავისუფლებაქ ჯგირობუა ქუმომღან?

 ³ კორინთელეფშა მეჭარილ მაჟია წერილს მოციქულ პავლექ მიშინუ მოსეშ შემთხვევა, მუჟამსით თის სინაშ გვალას იეჰოვაშ ანგელოზიქ გიმეცხად. გვალაშე გიმულაშ უკულ ხალხის თიშ ინოჯინაშა ოშკურუდ, მუშენდა სახე ურწკინუნდ დო ათეშენ სახეშა რიდე ქეიფორუ (გამ. 34:29, 30, 33; 2 კორ. 3:7, 13). უკულ პავლექ ჭარ: „მარა მუჟამსით იეჰოვას ართუნან, სახეშე რიდე ეთხიებნა“ (2 კორ. 3:16). მუს გულისხმენდჷ თინა?

⁴ მუჭოთ წოხლენ სტატიაშე გებგითინ, იეჰოვა სამყაროშ გუმაჭყაფალ ღორონთ რე დო ხვალე თის უღჷ აბსოლიტურ დო უსაზღვრო თავისუფლება. თაშ ნამდა, სოდეთ იეჰოვა დო თიშ „შურ რენ, თექ თავისუფლება რე“. ქუმოკონა თეცალ თავისუფლებათ სრულაშე ქიფსარგებლათ დო თე ირფელქ ჯგირობუა ქუმომღან-და, საჭირო რე იეჰოვაწკუმა პირად ურთიერთობაშ გავითარება. მუჟამსით უდაბნოს რდესინ, ისრაელეფ იეჰოვაშ საქმეეფს სულიერ თოლით ვა უჯინედეს. შხვა სიტყვეფით ქოფთქუათინ თინეფს რიდე აფდეს ეფორაფილ გურშა დო გონებაშა, მუშენდა ეგვიპტეშე გიშულაშ უკულ მუნეფიშ თავისუფლებას ხვალე ხორციელ მიზნეფიშ მიოჭირნაფალო გიმირინუანდეს (ებრ. 3:8—10).

5. ა) მუნერ თავისუფლებას მარზენა ღორონთიშ შური? ბ) სოვრეშე მიჩქუნა, ნამდა პატიმრობაშ ვარდა მონობაშ უმკუჯინუო, პიროვნებას შეულებ უღდას თავისუფლება, ნამუსით ღორონთ არზენს? გ) ნამ კითხვეფს გუვარჩიენთ?

⁵ თავისუფლება, ნამუსით ღორონთიშ შურ მარზენან, უმოს მეტ რე, ვინემ ფიზიკურ მონობაშე გათავისუფლება. წმინდა შურს შეულებ გუმათავისუფლან ცოდაშ, ღურაშ, ტყურა რელიგიაშ დო თიშ ტრადიციეფიშ გავლენაშე (რომ. 6:23; 8:2). თენა დასურო დიდებულ თავისუფლება რე! პიროვნება შილებე მონობას ვარდა პატიმრობას რდას, მარა თეშ უმკუჯინუო, იშენით უღდას თეცალ თავისუფლება (დაბ. 39:20—23). თეს ამტკიცენს და ნენსი იუენიშ დო ჯიმა ჰაროლდ კინგიშ მაგალითეფ, ნამუთ რწმენაშ გურშენ მუსხირენ წანას ციხეს ხედეს. თქვა შეილებნა თინეფიშ ისტორიაშ მორჩქილაფა JW მაუწყებლობას (ქოძირით ინტერვიუები და შემთხვევები > განსაცდელების პირისპირ). მორთ, გუვარჩუათ ჟირ კითხვა: მუჭო ვოძირათ, ნამდა ვაფასენთ ჩქინ თავისუფლებას? მუჭო გიმიბრინუათ თავისუფლება გონივრულო?

6. მუჭო ოძირეს ისრაელეფქ, ნამდა ვაფასენდეს ღორონთშე მოჩამილ თავისუფლებას?

⁶ მუჟამსით მარჩქილენა მუსხით ძვირფას რე საჩუქარი, უმოსო დუვაფასენთ თი პიროვნებას, მიდგაქ თინა მუჩეს. ისრაელეფქ ვა დაფასეს თი თავისუფლება, ნამუთ იეჰოვაქ მეჩჷ, მუჟამსით ეგვიპტეშ მონობაშე დერსხჷ თინეფ. გათავისუფლებაშე მუსხირენ თუთაშ უკულ თინეფ ნატრენდეს თი ოჭკუმალ დო ოშუმალს, ნამუთ ეგვიპტეს უღდეს. ისრაელეფს ვა მოწონდეს თი ოჭკუმალ დო ოშუმალ, ნამუსით იეჰოვა არზენდ დო ეგვიპტეშა ოკოდეს დორთა. უბრალოთ წერმიგდგინით, თინეფქ იეჰოვაშე მოჩამილ თავისუფლებაშა ისხუნეს ჩხომი, კინტირი, ხაბურძაკი, პურასკია, ხვარხვი დო ნიორი. მუ გასაკვირ რე, ნამდა თეშ უკულ იეჰოვაქ გერისხუკო მუშ ხალხშე? (რიცხ. 11:5, 6, 10; 14:3, 4). დასურო, მუშმაჯგირა მაგალით რე თენა ჩქინო.

7. მუჭო მეჸუნდჷ პავლე 2 კორინთელეფიშ 6:1-ის ინოჭარილ რჩევას დო ჩქი მუჭო შემლებნა თეშ კეთება?

⁷ პავლექ არძა ქრისტიანს ელუჩ, ირიათო დუფასებდესკო თავისუფლება, ნამუთ იეჰოვაქ მუშ სქუაშ, იესოშ საშვალებათ მუჩეს (წეკითხით 2 კორინთელები 6:1). *  ქიგიშინით, მუჭო აწუხენდჷ პავლეს თინა, ნამდა ცოდაშ დო ღურაშ მონა რდუ. მარა თიქ მარდულ გურით თქუ: „მადლობა ღორონც ჩქინ უფალ იესო ქრისტეშ ჭყოლოფათ!“. მუშენ თქუ პავლექ თე სიტყვეფი? თიქ თანაქრისტიანეფს ეუნწყჷ: „მუშენდა შურიშ კანონქ, ნამუთ ქრისტე იესოწკუმა ართობას სიცოცხლეს ირზენსინ, ცოდაშ დო ღურაშ კანონშე გუმათავისუფლეს“ (რომ. 7:24, 25; 8:2). ჩქი ოკო მივაჸუნათ პავლეშ მაგალითის დო დუვაფასათ თინა, ნამდა იეჰოვაქ გუმათავისუფლეს ცოდა დო ღურაშ მონობაშე. გიშაჸიდირალიშ ჭყოლოფათ შემლებნა ჩქინ ღორონც სუფთა სინდისით ვემსახურათ დო თე ირფელქ ნამდვილ ხიოლ მომღან (ფსალმ. 40:8).

8, 9. ა) მუ გაფრთხილება მუჩეს მოციქულ პეტრექ თავისუფლებაშ გიმორნაფაშ გურშენ? ბ) მუ საფრთხეეფიშ წოხოლე გივორეთ ამდღა?

⁸ მართალ რე, იეჰოვაშ მარდულეფ ოკო ვორდათ, ნამდა თავისუფლება მუჩეს, მარა თინა არასწორას დღას ოკო ვეგმიბრინუათ. მოციქულ პეტრექ გუმაფრთხილეს, ნამდა თავისუფლება ხორციელ სურვილეფიშ მიოჭირნაფალო ვეგმომრინუაფდესკო (წეკითხით 1 პეტრე 2:16). * თე გაფრთხილება გუმოშინანა, მუქ აღოლეს ისრაელეფს უდაბნოს. ამდღა, ხოლო უმოსო მოსაჭირნა თე რჩევაშ გათვალისწინება. სატანა დო თიშ ქვეყნიერება ბრელ მუთუნით ოცად ჩქინ მიკოჭოფუას, მაგალთო თიცალ საკითხეფს მუნერით რე, მიკოქუნა დო მოდვალა, შუმა-ჭკუმუა, დასვენება, დროშ ტარება დო შხვა. რეკლამეფს ხშირას ჯგირ გარეგნობაშ ხალხის გიმირინუანა, მუშენდა ქუმოჸიდრაფუან თიცალ მუდგარენეფ, ნამუთ სინამდვილეს ვა მოსაჭირნა. თე ირფელქ შილებე ადვილო მიმოჩილითუან დო თავისუფლება არასწორას გეგმიბრინუათ.

⁹ მოციქულ პეტრეშ რჩევა ცხოვრებაშ თიცალ მნიშვნელოვან მხარეეფს ხოლო ოხუ მუნერით რე, განათლება, კარიერა დო სამუშა. მაგალთო, სკოლას ახალგაზრდეფს ირიათო ელუჩანა, ბრელ იგურუან დო უმაღლესის ჩაბარან. თინეფს აჯერენა, ნამდა უმაღლეს განათლებაშ მეღება მეხვარებ, პრესტიჟულ დო მაღალხელფასიან სამუშაშ გორუას. თეს გეძინელ, ახალგაზრდეფს შილებე შხვადოშხვა სტატისტიკურ ინფორმაცია ქაძირან, თიშ დასამტკიცებელო, ნამდა უმაღლესთებულეფ უმოს მეტ ფარას შიბულენა, ვინემ თინეფ მისით ხვალე სკოლა აფჷ თებულ. ახალგაზრდეფს თიცალ გადაწყვეტილებეფ აფნა მიოღებელ, ნამუთ თინეფს მთელ ცხოვრებას აჸუნუ. თე დროს უმაღლეს განათლებაშ მეღება შილებე გონივრულ გადაწყვეტილებათ იძირედას, მარა მუ ოკო შუდან ახალგაზრდეფს დო თინეფიშ მშობლეფს?

10. მუ ოკო ფშუდან, მუჟამსით საქმე პირად გადაწყვეტილებეფიშ მეღებას ოხუ?

¹⁰ ნამთინე შილებე ფიქრენდას, ნამდა რახანს თეცალ საკითხეფ პირად გინაჭყვიდირალ რე დო სინდის ნებას ქარძენს-და, შეულებნა მუთ ოკონან თინა აკეთან. შილებე თინეფს გაშინედან მოციქულ პავლეშ სიტყვეფ, ნამუთ თიქ ოჭკომალიშ გურშენ თქუ: „მუშენ ოკო გესამართლას ჩქიმ თავისუფლებაქ შხვაშ სინდისით?“ (1 კორ. 10:29). ჩქი მიღნა თიშ თავისუფლება ჩქინით გინოპჭყვიდათ, მუნერ გურაფა დო სამუშა გიშებგორათ. მარა ირიათო ოკო ფშუდან, ნამდა თავისუფლებას საზღვრეფ უღჷ დო თის შედეგეფ ხოლო მაჸუნუ. ზუსტას თე მიზეზიშ გურშენ პავლექ მუშ ნარაგადის თეცალ სიტყვეფ ეწუჸუნუ: „ირფელიშ უფლება მიღჷ, მარა ირფელს სარგებელ ვა მოუღჷ. ირფელიშ უფლება მიღჷ, მარა ირფელს ჯგირობუა ვა მოუღჷ“ (1 კორ. 10:23). თაშ ნამდა, მიღნა თიშ უფლება ჩქინით გინობჭყვიდათ, მარა რე უმოს მნიშვნელოვან საკითხეფ, ვინემ ხვალე ჩქინ სურვილეფიშ დაკმაყოფილება.

11. მუშენ გუმათავისუფლეს იეჰოვაქ?

¹¹ მოციქულ პეტრექ გუმაფრთხილეს, თავისუფლება არასწორო ვეგმომრინუაფდესკო. თეს გეძინელ, თინა ხოლო თქუ, ნამდა თავისუფლება სწორას გეგმომრინუაფდესკო, მუჭოთ „ღორონთიშ მონეფს“. იეჰოვაქ იესოშ საშვალებათ გუმათავისუფლეს ცოდა დო ღურაშ მონობაშე თიშენ, ნამდა დუდ მემძღვინეფდესკო თიშა.

12. მუ მაგალით დომტუეს ნოექ დო მუშ ოჯახიქ?

¹² ქუმოკონა თავისუფლება არასწორას ვეგმიბრინუათ დო ქვეყნიურ სურვილეფს ვევაჸუნათ-და, სულიერ მიზნეფ ჩქინ ცხოვრებას არძაშ უმოს მნიშვნელოვან ოკო რდას (გალ. 5:16). მორთ გუვარჩუათ პატრიარქ ნოეშ დო თიშ ოჯახიშ მაგალით. თინეფ უზნეო დო ძალადობათ ეფშა ქიანას ცხოვრენდეს, მარა, ვეიაჸუნეს თი სურვილეფს დო მიზნეფს, ნამუთ თექ მახორუ ხალხის უღუდ. მუქ მეხვარ თინეფს თეშ კეთებას? ნოე დო თიშ ოჯახიშ წევრეფ იეჰოვაშ დავალებაშ შესრულებათ რდეს დაკავებულ, აშენენდეს კიდობანს, იხაზირენდეს ოჭკომალს, მუჭოთ მუნეფშო თეშ ცხოველეფშო ხოლო დო აფრთილენდეს შხვეფს. ბიბლიას ჭარ: „ნოექ თეშ გაკეთ ირფელ, მუჭოთ იეჰოვაქ დავალ. ზუსტას თეშ გაკეთ“ (დაბ. 6:22). მუ რდუ თეშ შედეგ? ნოექ დო მუშ ოჯახიქ გეგნასკიდეს თი უბადო ქიანაშ განადგურებას (ებრ. 11:7).

13. მუ დავალება მიღჷ იესოქ დო მუშ კეთება დავალ მუშ მიმაჸუნალეფს?

¹³ მუ მითითებას მარძენა ღორონთ ამდღა? მუჭოთ იესოშ მოწაფეეფს, ჩქი ჯგირო მიჩქნა მუ დავალებას მარძენა ღორონთ (წეკითხით ლუკა 4:18, 19). * ამდღა ხალხიშ უმენტაშშა თე ქიანაშ ღორონც თოლ აფჷ ეკირილ დო თინეფ რელიგიაშ, მატერიალიზმიშ დო პოლიტიკაშ მონეფ რენა (2 კორ. 4:4). ჩქინო დიდ პატი რე, მივაჸუნათ იესოშ მაგალითის დო ქიმვეხვარათ ხალხის გეჩინებაფუან დო ემსახურან იეჰოვას, ნამუთ თავისუფლებას მარძენა  (მათ. 28:19, 20). თენა ადვილ ვა რე დო ბრელ სირთულეეფ მოჸუნს. ნამთინე ქიანას ხალხის შუროთ ვაინტერეს ჭეშმარიტება დო ქადაქებაშ დროს შილებე გერისხან. მორთ, ქოპკითხათ ჩქინ დუც: შემლბნო ჩქიმ თავისუფლება თეშ გეგმიბრინუე, ნამდა უმოსო ქუდვუკინე ხუჯ სამეფოშ საქმეს?

14, 15. მუ აკეთ ბრელ იეჰოვაშ მოწმექ? (ქოძირით სურათ მა-8 გვერდის).

¹⁴ გურშა ემაკინალ რე თიშ ძირაფა, ნამდა ბრელს უჩქჷ მუ დროს ფცხოვრენთ დო იმარტივენა ცხოვრებას, მუშენდა, ნამდა სრულ დროთ მსახურებას მიაჸუნან (1 კორ. 9:19, 23). ნამთინე მსახურენს ადგილობრივ ტერიტორიას, შხვეფ გინულა თექ, სოდეთ მაქადაქებელეფიშ საჭიროება რე. ხუთ წანაშ დინახალე პიონერეფიშ რიცხვიქ 1 100 000-ის გინაჩირთჷ დო 250 000-შე უმოს პიროვნებაქ ქიდიჭყჷ სრულ დროთ მსახურება. მუნერ სახიოლო რე თიშ ძირაფა, ნამდა ბრელ გონივრულო გიმირინუანს თავისუფლებას დო ომსახურ იეჰოვას (ფსალმ. 110:3).

¹⁵ მუქ მეხვარ თინეფს გონივრულო გეგმურინუაფდესკო თავისუფლება? ქობძირათ ჯონი დო ჯუდიტიშ მაგალით, მით 30 წანას შხვადოშხვა ქიანას მსახურენდეს. თინეფ იშინანა, ნამდა 1977 წანას, მუჟამსით პიონერულ მსახურებაშ სკოლაქ პირველო ჩეტარუნ, და დო ჯიმალეფს ელუჩეს, უმსახურებდესკო თიცალ ადგილეფს, სოდეთ მაქადაქებელეფიშ საჭიროება რდუ. ჯონიქ მუსხირენ სამუშა გეგმითირუ დო გემარტივ ცხოვრება, ნამდა თე მიზანშა ქიმუჭირნუაფუდკო. დრო ხანიშ უკულ, მუჟამსით შხვა ქიანაშა მიდართესინ, ქიმეხვადეს, ნამდა ლოცვაქ დო იეჰოვაშა მენდებაქ მეხვარ თინეფს გიორჯგინესკო თიცალ სითულეეფს, მუნერით რე ახალ ნინაშ დოგურაფა, განსხვავებულ კულტურაშ დო კლიმატშა მერჩქვანა. მუ გავლენა უღუდ თეცალ მსახურებას თინეფწკუმა? «თენა რდუ არძაშ უჯგუშ საქმე, მუთ ჩქიმ ცხოვრებას მიკეთებ. მოჸოროფე მუმაცალო, იეჰოვაქ უმოს რეალურო გინირთ ჩქიმო. ასე უმოს უჯგუშო მარჩქილე იაკობიშ 4:8-ს ინოჭარილ სიტყვეფ: „დეახლოვით ღორონც დო თინა ხოლო დეგეახლოებნა“. მიჩქუდ, ნამდა ქობძირ თინა, მუდგას ბგორუნდჷ, აზრიან დო კმაყოფილებათ ეფშა ცხოვრება», — იჩიებ ჯონი.

16. მუჭო გიმირინუ ბრელ და დო ჯიმაქ გონივრულო თავისუფლება შეზღუდულ მდგომარეობაშ უმკუჯინუო?

¹⁶ ჯონი დო ჯუდიტიშ გინაწონს, ნამთინეს თიცალ მდგომარეობა უღჷ, ნამდა ხვალე ჭიჭე ხანით შეულებ იმსახურას სრულ დროთ. თეშ უმკუჯინუო, ბრელ და დო ჯიმა მთელ მსოფლიოს მონაწილებას ღებულენს სამშენებლო პროექტეფს. მაგალთო, უორიკის (ნიუ-იორკი) მსოფლიო მთავარ სამმართველოშ შენებას 27 000 იეჰოვაშ მოწმე ღებულენდჷ მონაწილებას — ნამთინე ჟირ მარათ, შხვეფ მუსხირენ თუთათ ვარდა ართ წანაშე მეტ ხანს რდეს თექ. უორიკის ქუმსახურებდესკონ, ბრელქ პირად ინტერესეფშე თქუ ვარია. თინეფქ თეთ ჯგირ მაგალითი მუჩეს, მუჭო გიმიბრინუათ თავისუფლება იეჰოვა ღორონთიშ განსადიდებელო.

17. მუ მომავალ ელჷ თინეფს, მით მუნეფიშ თავისუფლებას გონივრულო გიმირინუანა?

¹⁷ მარდულეფ ვორეთ, ნამდა გეფჩინებაფეთ იეჰოვა დო მიღნა თავისუფლება, ნამუთ ჭეშმარიტ თაყვანიშმცელობას მოუღჷ. მორთ, ჩქინ გადაწყვეტილებეფით ირიათო ქუვოძირათ, ნამდა ვაფასენთ ღორონთშე მოჩამილ თავისუფლებას. ჩქი გინოჭყვიდილ ოკო მაფდან, ვეგმიბრინუათ თინა არასწორო დო ირნერო ქივეცადათ თეშ გეგმიბრიუნათ ჩქინ თავისუფლება, ნამდა ბოლოშა დეფხარჯათ იეჰოვაშ მსახურებას. თაშ ქიმიფქციებუთ-და, მიბღენთ იეჰოვაშ კურთხევეფს, მუჟამსით თინა შეასრულენს მუშ დაპირებას: „გუნაჭყეფ გეთავისუფლებ ჸორადუაშ მონობაშე დო მიღენს ღორონთიშ სქუალეფიშ დიდებულ თავისუფლებას“ (რომ. 8:21).