1, 2. ა) სოვრეშე იძირე, ნამდა ხალხ ოცად თავისუფლებაშ მეღებას? ბ) მუ შედეგ მოჸუნს თავისუფლებაშე ბრძოლას?

ამდღა ბრელს იჩიებნა თანასწორობა დო თავისუფლებაშ გურშენ. მსოფლიოშ ბრელ ქიანას ხალხის ოკო გეთავისუფლას ჩაგრება, დისკრიმინაცია დო სიღარიბეშე. შხვეფ სიტყვაშ დო არჩევანიშ თავისუფლებას ითხინა. ხალხიშ უმენტაშის მუშ გემოშა ოკო ცხოვრება დო მუთ მოწონსინ თიშ კეთება.

² მარა გვალო შხვა საკითხ რე, მუჭო ოცადნა თე სურვილეფიშ დაკმაყოფილებას. მაგალთო, თეს ქიმიოჭირნუანინ, ბრელ მონაწილებას ღებულენს საპროტესტო აქციეფს, მიტინგეფს დო რევოლუციეფს. მარა თეცალ მოქმედებას საპირისპირო შედეგ მოუღჷ — ხშირ შემთხვევას თენა ტრაგედიებით დო ღურათ ითებ. თე ირფელ ხოლო არჩა ამტკიცენს მეფე სოლომონიშ სიტყვეფიშ ჭეშმარიტებას: „კოჩ კოჩიშ ონძალ თიშ საზიანოთ“ (ეკლ. 8:9).

3. მუჭო შემლებნა ნამდვილ ბედნერობაშ დო კმაყოფილებაშ გორუა?

³ მოციქულ იაკობიქ თქუ, მუს მოუღჷ ნამდვილ ბედნერობა დო კმაყოფილება. თიქ ჭარ: „მით ოკვირ თავისუფლებაშ სრულყოფილ კანონს დო თაშ აგრძელენსინ, ბედნერ იჸუაფ“ (იაკ. 1:25).  იეჰოვაქ მუჩეს თე სრულყოფილ კანონ, ათეშენ თის არძაშ უჯგუშო უჩქჷ, მუ ოსაჭირ ხალხის ქიჸუან ბედნერეფქ დო კმაყოფილეფქ. თიქ პირველ ოსურ დო კოჩის ქიმეჩ ირფელ, მუთ ბედნერობაშო ოსაჭირდეს, დო თეწკუმა ართო თავისუფლება ხოლო.

4. მუნერ თავისუფლება უღდეს ადამ დო ევას? (ქოძირით სურათ მა-3 გვერდის).

⁴ დაბადებაშ პირველ ჟირ დუდიშ კითხირიშ დროს, ვორწყეთ ნამდა ადამ დო ევას უღდეს თიცალ თავისუფლება, ნამდგაშენ ხალხი ამდღა ოცნებენს. თინეფ თავისუფალ რდეს ირნერ გაჭირებაშე, შიშშე დო დაჩაგრებაშე. თეს გეძინელ ადამ დო ევა თავისუფალ რდეს თიცალ ოწუხებელშე, მუნერით რე ოჭკომალ, სამუშა, ლახალა დო ღურა. (დაბ. 1:27—29; 2:8, 9, 15). ნიშნენსო თენა თის, ნამდა თინეფს აბსოლიტურ თავისუფლება უღდეს? მორთ, ქობძირათ.

5. მუს ფიქრენს ბრელ ნამდვილ თავისუფლებაშ გურშენ?

⁵ ამდღა ბრელ ფიქრენს, ნამდა ნამდვილ თავისუფლება ნიშნენს ირფელიშ კეთებას, მუთ გოკონ, ვა უღჷ მნიშვნელობა თეს მუ შედეგეფ მაჸუნუ. ენციკლოპედია „უორლდ ბუკი“ იჩიებ, ნამდა თავისუფლება ნიშნენს, „გაკეთე არჩევანი დო შეასრულე თინა“. თინა გეუძინანს: „იურიდიულ თვალსაზრისით, ხალხი თავისფალ რე, მუჟამსით საზოგადოება ვა უდგინენს უსამართლო, საჭირო ვარენ ფერ დო უაზრო საზღვრეფს“. თენა თის ნიშნენს, ნამდა სინამდვილეს, გარკვეულ საზღვრეფ საჭირო რე, ნამდა არძაქ მიღას სარგებელ თავისუფლებაშე. მარა წიმიჭკირუ კითხვა: მის უღჷ უფლება დადგინას სამართლიან, საჭირო დო აზრიან საზღვრეფ?

6. ა) მუშენ უღჷ ხვალე იეჰოვას აბსოლიტურ თავისუფლება? ბ) მუნერ თავისუფლება შილებე უღდას ხალხის დო მუშენ?

⁶ მუჟამსით საქმე თავისუფლებას ოხუნ, მთავარ რე ირიათო ფშუდან, ნამდა ხვალე იეჰოვა ღორონც უღჷ აბსოლიტურ დო უსაზღვრო თავისუფლება, მუშენდა თინა რე ირფელიშ გუმაჭყაფალ დო ირფელიშ შემალებე უზენაეს მართველი (1 ტიმ. 1:17; გამოცხ. 4:11). მეფე დავითიქ დიდებულო ეჭარ იეჰოვაშ მაღალ მდგომარეობა, ნამუთ ხვალე თის უკინებუდ (წეკითხით 1 მატიანე 29:11, 12). * თაშ ნამდა, არძა გუნაჭყეფუს ზეცას დო დედამიწას ხვალე პირობით თავისუფლება უღჷ. თინეფქ ოკო აღიარან, ნამდა ხვალე იეჰოვა ღორონთის უღჷ აბსოლიტურ ძალაუფლება დადგინას სამართლიან, საჭირო დო გონივრულ საზღვრეფი. ზუსტას თაშ მიქცუ იეჰოვაქ, მუჟამსით პირველ კოჩ დო ოსურ გაჭყჷ.

7. ნამ მოქმედებეფ უნწყუნს ხეს ჩქინ ბედნერობას?

⁷ მართალ რე, ადამ დო ევას დიდ თავისუფლება უღდეს, მარა თინეფშა შეზღუდვეფ ხოლო რდუ დოდგინელ. ნამთინე შეზღუდვა ბუნებრივ რდუ თინეფშო. მაგალთო, ცოცხალეფქ ქუდოსკიდესკონ, თეშო აუცილებერ რდუ, ისუნთქესკო, ჭკუმესკო, დირულესკო დო შხვა. მარა ხომ ვა უფიქრებნა, ნამდა თე ირფელქ თინეფს თავისუფლება მიდუღ? მუშო ოკო რაგად, ვარ. იეჰოვას უჩქუდ, ნამდა თეცალ მოქმედებეფ კმაყოფილება დო ხიოლს მუღანდ პირველ წყვილს (ფსალმ. 104:14, 15; ეკლ. 3:12, 13). მი ვა რე კმაყოფილ დო ბედნერ, მუჟამსით სუნთქენს სუფთა ჰაერს, ჭკუმუნს უჸორსინ ფერ ოჭკუმალს ვარდა ჯგირო გიმორულაფირ კურცხუ? ჩქინო ტვირთ ვა რე თე აუცილებერ საქმეეფიშ კეთება, პირიქით ხიოლით ვორთუთ თის. მუშო ოკო რაგად, ადამ დო ევა ხოლო დუც თაშ გინაფლენდესკონ იჸიდ.

8. მუ კონკრეტულ დავალება მეჩ ღორონთიქ პირველ წყვილს დო მუ რდუ თეშ მიზანი?

 ⁸ იეჰოვაქ ადამ დო ევას კონკრეტულო დავალ, გამრავლებედესკო, ეუფშაფდესკო დედამიწა დო უზრუნებდესკო თიშე (დაბ. 1:28). ხომ ვეშიზღუდ თინეფიშ თავისუფლებაქ თე დავალებაშ მეჩამათ? მუშო ოკო რაგად, ვარ! თე დავალებაშ შესრულებათ თინეფ ხეს ქეშუნწყუნდეს ღორონთიშ განზრახვას დო აღვენუდეს საშვალება დედამიწა სამოთხეთ გინურთინუაფდესკო, სოდეთ სრულყოფილ ხალხი მარადიულო იცხოვრენდჷ (ეს. 45:18). ამდღა ღორონთ ვეთხინს ხალხშე აუცილებერო დექორწინან დო ჸუნდან სქუალეფი. თე საკითხ არძას მუშით შეულებ გინოჭყვიდას. სირთულეეფიშ უმკუჯინუო, ხალხიშ უმენტაშ იქორწინებ დო ეიორჩქინანს სქუალეფს (1 კორ. 7:36—38). თინეფს იმენდი უღნა, ნამდა ბედნერეფ დო კმაყოფილეფ იჸუაფნა (ფსალმ. 127:3). ადამ დო ევას იეჰოვაშა ქუდუჯერებდესკონ, ირიათო ბედნერ ქორწინება დო ოჯახ აღვენდეს.

9. მუშენ ვარდჷ დაბადებაშ 2:17-ის მოჩამილ მითითება უსამართლო, საჭირო ვარდუნ ფერ დო უაზრო?

⁹ იეჰოვაქ ადამ დო ევას შხვა მითითება ხოლო მეჩჷ. თიქ გასაგებო უწუ თინეფს, მუ აღოლედეს, მუჟამსით ვედემორჩილებდეს თე მითითებას: „მარა ჯგირ დო ფურიშ ჩინებაშ ჯაშე ვაჭკომა, მუშენდა მუ დღას ოჭკომუნქინ, თიმ დღას დოღურუქ“ (დაბ. 2:17). ხომ ვარდჷ თე მითითება უსამართლო, საჭირო ვარდუნ ფერ ვარდა უაზრო? შეზღუდუო ადამ დო ევაშ თავისუფლება თე მითითებაქ? მუშო ოკო რაგად, ვარ! ნამთინე ბიბლეისტ ფიქრენს, ნამდა თე მითითება გონივრულ დო აზრიან რდუ. მაგალთო, ართ ბიბლეისტ იჩიებ: „ხვალე ღორონთის უჩქჷ, ხალხშო მუ რე ჯგირ დო მუ — გლახა. ჯგირით ქისარგებლანინ, ღორონთის ოკო მიენდან დო დემორჩილან. ვედემორჩილეს-და, მუნეფიშით აიჸინა გინაჭყვიდირალ, მუ რე ჯგირ დო მუ ვარ“. თენა დიდ ტვირთ რე, ნამუშ გილაღალა ადამიანეფს მუნეფიშ ძალეფით ვეშიალებენა.

10. მუშენ ოკო ვეშმოჩირთან ართიანშა ნებაშ თავისუფლებაქ დო ჯგირ დო ფურიშ გინოჭყვიდუაშ უფლებაქ?

¹⁰ ნამთინე ფიქრენს, ნამდა თე მითითებაშ მეჩამათ იეჰოვაქ მიდუღ ადამს თავისუფლება, უკეთებუდკო მუთ ოკოდუნ თინა. მარა თინეფს ართიანშა ეშაჩირთუნა ნებაშ თავისუფლებაშ გიმორნაფა დო თიშ გინოჭყვიდუაშ უფლება, მუ რე ჯგირ დო ფურ. ადამ დო ევას უღდეს უფლება გეგნუჭყვიდირდესკო, დემორჩილებდეს დო ვარ ღორონც. მარა, ხვალე იეჰოვას უღჷ სრულ უფლება, გეგნოჭყვიდას, მუ რე ჯგირ დო ფურ, მუდგას ედემიშ ბაღიშ „ჯგირ დო ფურიშ ჩინებაშ ჯა“ ასიმბოლოენდჷ (დაბ. 2:9). ოკო ვაღიარათ ნამდა, ირიათო ვამჩქუნა მუ შედეგეფ მაჸუნუ ჩქინ გადაწყვეტილებეფს დო ვართ თინა, ირიათო ჯგირ შედეგეფს მიბღენთ დო ვარ. ალბათ ხშირას ვორწყეთ თიცალ ხალხის, მით ჯგირ განზრახვეფით ღებულენს გადაწყვეტილებეფს, მარა თინეფიშ არჩევანს შედეგო ტანჯება დო უბედრობეფ მოჸუნს (იგავ. 14:12). თავრეშე არგამა რე, ნამდა ხალხიშ შესაძლებლობეფ შეზღუდულ რე. მითითებაშ მეჩამათ იეჰოვაქ ადამ დო ევას ქუგაგებაფუ, ნამდა ნამდვილ თავისუფლება ხვალე თი შემთხვევას აღვენდეს, მუჟამსით დემორჩილებდეს თის. მუ გინოჭყვიდეს ადამ დო ევაქ?

11, 12. მუშენ მაჸუნ ადამ დო ევაშ არჩევანს გლახა შედეგიქ? (ქიმიჸონით მაგალით).

¹¹ ჩქინ პირველ მშობლეფქ ღორონთიშ დაუმორჩილებლობა გეგშეგორეს. ევაქ ქიდეჯერ სატანაშ სიტყვეფ, ნამუთიქ უწუ: „თოლ გუგანჯამუნა დო ღორონთცალო ჯგირ დო ფურ გარჩქვენუდან იჸი“ (დაბ. 3:5). ხომ ვამუღალ მეტ თავისუფლება ადამ დო ევაშა მუნეფიშ არჩევანს? მუშო ოკო რაგად, ვარ, მუშენდა სატანაშ სიტყვეფქ დუნაპირებუქ ვეშესრულ. ადამ დო ევაქ  ქოძირეს, ნამდა იეჰოვაშ მითითებაშ დაუმორჩილებლობას უბედრობაქ მაჸუნ (დაბ. 3:16—19). თეშ მიზეზ თინა რდუ, ნამდა ღორონც თინეფშა ვემუჩამ ჯგირ დო ფურიშ გინოჭყვიდირუაშ უფლება (წეკითხით იგავები 20:24; იერემია 10:23). *

¹² მორთ, ქიმიპჸონათ პილოტიშ მაგალით. დანიშნულებაშ ადგილს უსაფრთხოთ ქუდაფურინასინ, თიქ წინასწარ შედგენილ გეგმას ოკო მიაჸუნას. თანამედროვე საავიაციო ტექნიკა საშვალებას არზენს პილოტის გეგმირინაუას სანავიგაციო მოწყობილობეფი დო კავშირ უღდას დისპიჩერეფწკუმა, ნამდა ქიმერთას დანიშნულებაშ ადგილშა. პილოტიქ თე მითითებას ვედემორჩილ დო მუს ოკონ თი მიმართელუბათ მიდაფურინ-და, თეს კატასტროფულ შედეგ მაჸუნუ. თე პილოტცალო, ადამ დო ევას ხოლო მუნეფიშ გიშაგორილ შარათ ოკოდეს ცხოვრება. თინეფქ ვარია ქოთქუეს ღორონთიშ ხემძღვანელობაშ გურშენ. შედეგო, თინეფიშ არჩევანქ ხვალე მუნეფს ვარინ, მუნეფიშ გამნარყის ხოლო ცოდა დო ღურა მოუღჷ (რომ. 5:12). თინეფ ოცადუდეს ღორონთშე დამოუკიდებელო იცხოვრესკო, მარა შედეგო თავისუფლება მიოდინუეს.

13, 14. მუჭო შემლებნა ნამდვილ თავისუფლებაშ მეღება?

¹³ ხალხი ფიქრენს, ნამდა მუთ უმოს თავისუფლება აღვენუნან, თით უჯგუშო იცხოვრებნა, მარა სინამდვილეს თეს გლახა შედეგეფ მოჸუნს. მართალ რე, თავისუფლებას ბრელ სარგებელ მოუღჷ, მარა წერმიდგინით მუნერ იჸუაფუდ მსოფლიო, სოდეთ მუთუნნერ შეზღუდვეფ ვეჸუაფუდ. ენციკლოპედია „უორლდ ბუკი“ იჩიებ, ნამდა არძა ნორმალურ საზოგადოებას რთულ კანონეფ რე, მუშენდა თიქ ოკო დეცვას დო თეწკუმა ართო შეუზღუდას ხალხის თავისუფლება. ათეშენ ამდღა ბრელ კანონ არსებენს, ნამუშ ენწყუმას დო გიმორნაფას ადვოკატეფ დო მოსამართლეეფ ოცადნა.

¹⁴ იესო ქრისტექ მიშინუ, მუჭო შემლებნა ნამდვილ თავისუფლებაშ მეღება. თიქ თქუ: „ჩქიმ სიტყვას ქიმეჸუნთ-და, ნამდვილო ჩქიმ მოწააფეეფ რეთ, ქიგეგენთ ჭეშმარიტებას  დო ჭეშმარიტება გუგათავისუფლენა თქვა“ (იოან. 8:31, 32). ნამდვილ თავისუფლებაშო ჟირ მოთხოვნაშ შესრულება რე საჭირო: პირველ, ჩქი ოკო მიბღათ ჭეშმარიტება, ნამუსით იესო ოგურუანდჷ დო მაჟია, გინიფრთათ თიშ მოწაფეთ. თენა ნამდვილ თავისუფლებაშა მემიჸონანა დო გუმათავისუფლენა ართ მუდგარენშე, მუთ იესოქ მიშინუ: „არძა, მით ცოდენსინ, ცოდაშ მონა რე . . . ღორონთიშ სქუა გუგათავისუფლენან-და, ნამდვილო თავისფალეფ იჸუაფუთ“ (იოან. 8:34, 36).

15. მუშენ შეულებ იესოშ დაპირებულ თავისუფლებას დასურო გუმათავისუფლან?

¹⁵ ნამდვილო, თავისუფლება, ნამუთ იესოქ მუშ მოციქულეფს დეპირუნ, ბრელით უმოს რე თი თავისუფლებაშე, ნამდგაშო ამდღა ხალხ ბრძოლენს. ქრისტექ თქუ: „ღორონთიშ სქუა გუგათავისუფლენან-და, ნამდვილო თავისფალეფ იჸუაფუთ“. თე დროს თინა გულისხმენდჷ „ცოდაშ მონობაშე“ გათავისუფლებას, მუთ არძაშ უმოსო მაჩაგრენა. ცოდა გლახას მოკეთებაფუანა, თეს გეძინელ, ვა მარზენა საშვალებას გუვაკეთათ თინა, მუთ მიჩქნა, ნამდა ჯგირ რე (რომ. 6:23). პავლე მოციქულქ თენა მუშ დუდშა გიმოცად (წეკითხით რომაელები 7:21—25). * ნამდვილ თავისუფლება, ნამუთ ადამ დო ევას უღდესინ, თიმ დროს მაღვენუნა, მუჟამსით ცოდა სრულაშე მისპუ.

16. მუჭო გუმათავისუფლენა იესო?

¹⁶ იესოშ სიტყვეფ „ჩქიმ სიტყვას ქიმიაჸუნუთ-და“, ნიშნენს თიშ მოთხოვნეფიშ შესრულებას, ნამდა თავისუფალეფქ ქიპჸუათ. ჩქი ღორონთშა მეძღვინელ ქრისტინანეფ ვორეთ, ათეშენ ვარია ოკო ფთქუათ ჩქინ დუდშე დო ვეგნურთათ თი საზღვრეფს, ნამუთ იესოქ დუდგინ მუშ მოწაფეეფს (მათ. 16:24). მუჭოთ იესოქ დემეპირესინ, თინა გუმათავისუფლენა, მუჟამსით გიშაჸიდირალიშ მსხვერპლით სრულას ქიფსარგებლენთ.

17. ა) მუ მომღანა ბედნერ დო კმაყოფილ ცხოვრებას? ბ) მუს გუვარჩიენთ თეშ უკულიან სტატიას?

¹⁷ მუჟამსით იესოშ გურაფეფს დევემორჩილებუთინ, კმაყოფილეფ იპჸუაფუთ დო ცხოვრებას დასურო აღვენუ აზრი. თაშ ქიფქციებუთ-და, საბოლათ გეფთავისუფლებუთ ცოდაშ დო ღურაშ მონობაშე (წეკითხით რომაელები 8:1, 2, 20, 21). * თეშ უკულიან სტატიას გუვარჩიენთ, მუჭო შემლებნა თავისუფლებაშ გონივრულო გიმორნაფა დო თეთ მარადიულო განვადიდათ ნამდვილ თავისუფლებაშ ღორონთ იეჰოვა.