მთელ მსოფლიოს ულირ წანას, ანთასობით ჯიმაქ დენიშნჷ უხუცესო დო მომსახურეთ. თინეფ შკას ქორეთ-და, მუშო ოკო რაგად გახიოლედეს ახალ პასუხიშმგებლობაშ მეღება.

გასაგებ რე, ნამდა შილებე თე პასუხიშმგებლობაშ გურშენ ჭიჭეს ნერვიანენდათ. ართ ახალგაზრდა უხუცეს, ჯეისონ იჩიებ: „მუჟამსით თე პასუხიშმგებლობა მუჩესინ, მანგარო მნერვიანენდჷ“. მოსე დო იერემია ხოლო თეცალო გინაფლენდეს დუც, მუჟამსით თინეფქ იეჰოვაშე ახალ დავალება მიღეს (გამ. 4:10; იერ. 1:6). თქვა ხოლო თაშ ქორეთ-და, მუ მიგეხვარებნა გიორჯგინათ თე გრძნობეფს დო გაგრძელათ სულიერო წიმიულა? მორთ, გუვარჩუათ ტიმოთეშ მაგალით (საქ. 16:1—3).

ტიმოთე სოდგარენ 20 წანერ იუჸაფუდ, მუჟამსით პავლეწკუმა ართო გილმალ მსახურება ქიდიჭყჷ. თინა ახალგაზრდა რდუ დო ათეშენ, შილებე დუდიშ იმენდ ვა უღუდკო დო მუშ ახალ პასუხიშმგებლობას ბოლოშა ვეგმირინუანდკო (1 ტიმ. 4:11, 12; 2 ტიმ. 1:1, 2, 7). მარა, წანეფიშ უკულ, პავლე მოციქულქ ფილიპელებს მეჭარ: „იმენდ მიღჷ უფალ იესოშ, ნამდა მალას ქიმეიშკვანთ ტიმოთეს ... მითინ ვაპჸუნს თეფერ, ნამუთ თიცალო შურდოგურით ისოფუდას თქვან გურშენ“ (ფილ. 2:19, 20).

მუქ მეხვარ ტიმოთეს ჸოფედკო თეცალ ჯგირ უხუცესი? მორთ, გუვარჩუათ ამშვ საკითხ, მუსით თიშ მაგალითშე ბგურაფლენთ.

1. თინა მთელ გურით ზრუნენდჷ ხალხშო. პავლექ ფილიპელ ჯიმალეფს ტიმოთეშ გურშენ უწუ, ნამდა თინა შურ დო გურით ზრუნენდჷ თინეფშო (ფილ. 2:20). დასურო, ტიმოთე დაინტერესებულ რდუ თე ჯიმალეფიშ სულიერ ჯგირობუათ დო ოხვარუდ თინეფს.

ვაგურათ ავტობუსიშ თიცალ შოფერს მიდგაშო მგზავრეფშე უმოს მნიშვნელოვან თინა რე, ნამდა დანიშნულებაშ ადგილშა მალას ქიმერთას. უილიამ, ნამუთ 20 წანაშ მეტ რე უხუცესო მსახურენსინ, თეცალ რჩევას არზენს ახალ დანიშნულ ჯიმალეფს: „გიჸორდან საჯიმალო. ორგანიზაციულ საკითხეფიშ უმოსო და დო ჯიმალეფიშ საჭიროებეფით დეინტერესით“.

2. თის სულიერ საქმეეფ პირველ ადგილს გეურდჷ. პავლექ ტიმოთეშ გურშენ თქუ: „შხვა არძა მუშ დუდშე ფიქრენს დო ვართ ხოლო თიშე, მუთ ქრისტე იესოშ რე“ (ფილ. 2:21). პავლე თე წერილს რომშე ჭარუნდჷ. თიქ რომაელ ჯიმალეფშე თქუ, ნამდა მუნეფიშ საქმეეფს რდეს გინოჸუნელ დო სულიერ საქმეეფშე დუც ვეწუხენდეს. მარა ტიმოთე თინეფს ვაგუდ! მუჟამსით, საქმე სახიოლო ამბეშ ქადაქებას ოხუდუნ, თის ესაიაცალ დამოკიდებულება უღუდ, ნამუთიქ თქუ: „მა ულჷ! მა გომტე!“ (ეს. 6:8).

მუჭო შეილებნა ართიანწკუმა გაწონასწორათ პირად მოთხოვნილებეფ დო სულიერ პასუხიშმგებლობეფ? პირველ, დადგინით პრიორიტეტეფი. პავლექ ელამჩეს: „ნამდა დერწმუნათ, მუ რე უმოს მნიშვნელოვან“ (ფილ. 1:10). დერწმუნით, ნამდა მუთ ღორონთშო მნიშვნელოვან რენ, თინა თქვანო ხოლო რე მნიშვნელოვან. მაჟია, იცხოვრით უბრალო ცხოვრებათ. დეფიქრით, მუ მიდმაიღანა დროს დო ენერგიას. პავლექ ტიმოთეს უწუ: „ენტი ახალგაზრდულ სურვილეფს დო ეცად ინჭუე  სიმართლე, რწმენა, ჸოროფა დო მშვიდობაჸურე“ (2 ტიმ. 2:22).

3. თინა ბოლოშა იხარჯებუდ მსახურებას. პავლე ფილიპელ ქრისტიანეფს გაშინანდჷ: „მარა თქვა გიჩქუნა, მუჭო ოძირუ თიქ მუშ დუდ, მუჭოთ სქუა მუმაწკუმან თეშ მსახურენდ მონაცალო ჩქინწკუმა ართო სახიოლო ამბეშ გაცხადებელო“ (ფილ. 2:22). ტიმოთე ზარმაც პიროვნება ვა რდუ. თინა პავლეწკუმა ართო ბოლოშა იხარჯებუდ მსახურებას, ათეშენ თინეფს ხოლოშიან ურთიერთობა უღდეს ართიანწკუმა.

ამდღა ღორონთიშ ორგანიზაციას ბრელ საქმე რე, ნამდგაშ კეთება დიდ კმაყოფილებას მომღანა დო მუჩანა საშვალებას, და დო ჯიმალეფწკუმა ხოლოს ვორდათ. თაშ ნამდა, „ირო ბრელ იხანდით უფალიშ საქმეს“ (1 კორ. 15:58).

4. თინა გიმირინუანდჷ ნაგურეფუს. პავლე ტიმოთეშ გურშენ იჩიებუდ: „სი ზუსტას მეჸუნქ ჩქიმ მაგალითის გურაფაშ, ცხოვრებაშ წესიშ, გეგმეფიშ, რწმენაშ, სულგრძელობაშ, ჸოროფაშ დო მოთვინებაშ საქმეს“ (2 ტიმ. 3:10). ტიმოთე გიმირინუანდჷ ნაგურეფუს დო ათეშენ დიდ პასუხიშმგებლობაქ ქიმიენდჷ (1 კორ. 4:17).

ქორჸუნანო თიშნერ უხუცეს ვარდა გამოცდილ მეგობარ, მიდგაშ მაგალითის შეილებნა მიაჸუნათ? თეშნერ მითინს ვეჩინენთ-და, ჯგირ იჸუაფ დოიგორდესკო თინეფ. ტომ, ნამუთ ბრელ წანა რე უხუცესო მსახურენსინ, იშინანს: „ართ გამოცდილ უხუცეს, ყურადღებას მაქციენდჷ დო ბრელ მუდგარენს მოგურუანდჷ. მა ირიათო რჩევას ვოკითხუდ თის დო გიმიბრინუანდჷ თიშ ნარაგადის. თე ირფელიშ უკულ, უმოსო ქუმმაჩ ჩქიმ დუდიშ რწმენაქ“.

5. ტიმოთე მუშ დუდშე მუშენდჷ. პავლე მოციქულ ტიმოთეშ გურშენ იჩიებუდ: „ქეცად ინჭუე ღორონთიშ ართგურობაშენ დო თე საქმეს ორდა გაწაფული“ (1 ტიმ. 4:7). არძა სპორცმენს ჸუნს მუშ მწვრთნელი, მარა თინეფქ იშენით ოკო იმუშუან მუშ დუდშე. პავლე ტიმოთეს ელუჩანდჷ: „მთელ გურით უკითხჷ ხალხის, რჩევა ქიმეჩ დო ქაგურე ... თეშე იფიქრი დო თენა აკეთი, ნამდა ირ კოჩიქ ქოძირას სქან წიმიულა“ (1 ტიმ. 4:13—15).

საჭირო რე ხოლო უმოსო გავითარათ თქვან უნარეფი. ირიათო ეცადით, სულიერო კურცხას რდათ დო ორგანიზაციულ საკითხეფიშ გურშენ ირო ახალ ინფორმაცია გიღდან. თეს გეძინელ, ზედმეტო ვა რდათ დუდშა დარწმუნებულ; ვეფიქრათ, ნამდა დიდ გამოცდილება გიღნა დო საკითხეფიშ გიმორკვიებაშ უმშო შეილებნა ირნერ სიტუაციაშ მოგვარება. გეთვალისწინით პავლეშ რჩევა, ნამუთ ტიმოთეს მეჩჷ: „ქიდეკვირ სქან დუც დო თის ხოლო, მუს დო მუჭო ოგურუანქ“ (1 ტიმ. 4:16).

6. ტიმოთე იეჰოვაშ შურშა რდუ მენდებული. პავლექ მსახურებაშ გურშენ ტიმოთეს უწუ: „ჩქინწკუმა მკვირდენსინ თი წმინდა შურით დეცვჷ თი დიდებულ მუდგარენ, ნამუთ სი ჩუგაბარეს“ (2 ტიმ. 1:14). მსახურება გუგრძელებუდკონ, ტიმოთექ ღორონთიშ შურს ოკო მიენდკო.

დონალდი, ნამუთ ბრელ წანა რე უხუცესო მსახურენსინ, იჩიებ: «პასუხიშმგებელ ჯიმალეფ ოკო აფასენდან ღორონთწკუმა ურთიერთობას. თაშ იქციებნან თინეფს „მაძინუნა სიცოცხლეშ მუმაჩამალ ძალა“. მუჟამსით ღორონთიშ შურიშ მეღებაშენ ლოცულენა დო შურიშ ნაყოფებს ავითარენან, თინეფ დასურო კურთხევა იჸუაფნა ჯიმალეფშო» (ფსალმ. 84:7; 1 პეტ. 4:11).

მანგარ გურიშ ემაკინალ რე თიშ ძირაფა, მუჭო მეურს ბრელ ახალ დანიშნულ ჯიმა სულიერო წოხოლე. სტატიაშ დაჭყაფუს მოშინაფილ ჯეისონი იჩიებ: „თიშ უკულ მუთ უხუცესო ვმსახურენქინ, ბრელ მუთუნ დიბგურე დო უმოსო მიღჷ დუდიშ იმენდ. ასე უმოსო ვაფასენქ ჩქიმ პასუხიშმგებლობას დო თინა დიდ უპირატესობათ მიმორჩქუ“.

გაგრძელენთო სულიერო წიმი ულას? მიზანო გიღდან, ნამდა დიგურუათ ტიმოთეშე დო თქვა დასურო კურთხევა იჸუაფუთ ღორონთიშ ხალხშო.