1, 2. მუშენ რდუ იესო დამწუხრებულ?

ღურაშ წოხოლენ დღას იესო მანგარო რდუ დამწუხრებულ. მალას თის უბადო კათა აწამენდჷ დო დოჸვილუნდჷ. მარა იესოშ მთავარ ოწუხებელ თენა ვარდჷ. თის მანგარო უჸორდჷ მუშ ზეციერ მუმა დო ოკოდ განადიდკო თინა. იესოს უჩქუდ, ნამდა რთულ გამოცდაშ დროს ართგურ ქუდოსკიდუდ-და, თეთ იეჰოვაშ სახელს განადიდენდჷ. თეს გეძინელ, უჸორდჷ ადამიანეფ დო ჯგირო არჩქილედ, ნამდა ბოლოშა იეჰოვაშ ართგურ ქუდოსკიდუდ-და, მარადიულ ცხოვრებაშ იმენდ მაღვენუდეს.

² მართალ რე, იესო მანგარ დამწუხრებულ რდუ, მარა თის სიმშვიდე ვაუდინუაფ. თიქ მუშ მოციქულეფს თეცალ სიტყვეფ უწუ: „ჩქიმ მშვიდობას გარზენთ“ (იოან. 14:27). იესოს უღუდ „ღორონთიშ მშვიდობა“, მუშენდა ხოლოშიან ურთიერთობა უღუდ იეჰოვაწკუმა დო თენა ოხვარუდ, ვადინუკო სიმშვიდე (ფილ. 4:6, 7).

3. მუს გუვარჩიენთ თე სტატიას?

³ შილებე თიცალ პრობლემაშ წოხოლე ვეგებდირთათ, მუნერით იესოს უღუდ, მარა არძა შეფხვადუთ სირთულეეფს (მათ. 16:24, 25; იოან. 15:20). თე დროს შილებე იესოცალო დემწუხრათ. მუ მიმეხვარებნა, ვეგნვუაჸუნათ წუხებას დო ვა ვოდინუათ სიმშვიდე? მორთ, გუვარჩუათ მუქ მეხვარ იესოს, ვადინუკო სიმშვიდე დედამიწას მსახურებაშ დროს დო მუჭო შემლებნა მივაჸუნათ თიშ მაგალითის პრობლემეფიშ დროს.

4. ქიმიჸონით მაგალითეფ, სოვრეშეთ იძირე, ნამდა ღურაშ წოხოლენ დღას იესოქ 1 თესალონიკელეფიშ 5:17 თანახმათ მიქცუ დო ბრელშა ილოც.

⁴ წეკითხით 1 თესალონიკელები 5:17. იესოქ ღურაშ წოხოლენ დღას ბრელშა ილოც. მუჟამსით მუშ გოშინაშ ონჯუა დაწეს, თიქ ქობალ დო ღვინ გეჭოფ დო ქილოც (1 კორ. 11:23—25). უმოს გვიანო, იესოქ მოწაფეეფწკუმა ართო ქილოც, სოიშახ დიტენდკო თი ადგილს, სოდეთ პასექ აღნიშნეს (იოან. 17:1—26). თიქ მოციქულეფწკუმა ართო კინ ქილოც, მუჟამსით თიმ სერს ზეთიშხილიშ გვალაშა გეკორთეს (მათ. 26:36—39, 42, 44). იესოქ სიცოცხლეშ ბოლო წუთეფს ხოლო ლოცვათ მიმართ იეჰოვას (ლუკ. 23:46). ლოცვაშ დროს ღორონც ქეჩუ ირფელ, მუდგაქ თიშ სიცოცხლეშ ბოლო დღას მოხვად. (იოან. 16:33).

5. მუშენ ვეშიალებუეს მოციქულეფს გაბედულებაშ გიმორჩქინაქ?

⁵ ართ-ართ მიზეზ, მუდგაქ მეხვარ იესოს გაურზუკო თე განსაცდელს თინა რდუ, ნამდა ონდუდ მუშ ზეციერ მუმას დო ლოცვას თხუ ქიმეხვარკო თის. იესოშ გინაწონს, თიშ მოციქულეფქ ველოცეს თიმ სერს. შედეგო, მუჟამსით გამოცდაშ დროქ ქუდოდირთჷ, თინეფს გაბედულებაშ გიმორჩქინაქ ვეშიალებუეს (მათ. 26:40, 41, 43, 45, 56). თაშ ნამდა, განსაცდელეფიშ დროს ართგურეფ ხვალე თი შემთხვევას დოფსკიდუთ, მუჟამსით მივაჸუნუთ იესოშ მაგალითის დო ვემვოტენთ ლოცვას. მუ ოკო ფთხუათ ღორონც ლოცვას?

6. მუჭო მიმეხვარებნა რწმენა ვა ვოდინუათ სიმშვიდე?

⁶ შემლებნა იეჰოვას ქოფთხუათ ქომჩან უმოს რწმენა (ლუკ. 17:5; იოან. 14:1). სატანა იესოშ არძა მიმაჸუნალს გიმოცადუნს,  ათეშენ რწმენა მოსაჭირნა (ლუკ. 22:31). მუჭო მიმეხვარებნა რწმენა ვა ვოდინაუთ სიმშვიდე პრობლემეფიშ დროს? მინშა შილებე ირფელს ვორთუდათ პრობლემაშ მაგვარებელო, მარა სიტუაცია ვეთირუდას. თე დროს რწმენა მიმეხვარებნა, იეჰოვას მივანდათ თე პრობლემა დო ბჯერდან, ნამდა მუშ დროს მაგვარენს თის. მუჟამსით იეჰოვას მივენდებუთ, შინაგან სიმშვიდე მაღვენუნა (1 პეტ. 5:6, 7).

7. მუ დიგურეთ რობერტიშ მაგალითშე?

⁷ არძაშ უმოს რთულ სიტუაციეფიშ დროს ხოლო, ლოცვა მოხვარნა ვა ვოდინუათ შინაგან სიმშვიდე. ქობძირათ ართ უხუცესიშ, რობერტიშ მაგალით, ნამუთ 80 წანას რე მენჭაფილ. თინა იჩიებ: „ფილიპელეფიშ 4:6, 7-ის მოჩამილ რჩევაქ ჩქიმ ცხოვრებას ბრელ სირთულე გინმოღალაფუ. ფინანსურ პრობლემეფ მიღუდ დო გარკვეულ პერიოდის უხუცესო ვა ვმსახურენდჷ“. მუქ მეხვარ რობერტის ვადინუკო სიმშვიდე? „ოწუხებელიშ დროს ხეთეშე ლოცვას იბჭყანდჷ. მუთ უმოსის ბლოცულენდჷ, თით უმოსო ბგინაფლენდჷ სიმშვიდეს“,— თქუ თიქ.

8. მუჭოთ იოანეშ 8:29-ს ჭარჷ, მუშენ უღუდ იესოს შინაგან სიმშვიდე?

⁸ წეკითხით იოანე 8:29. სასტიკ წინააღმდეგობაშ დროს ხოლო იესო მშვიდას რდუ, მუშენდა უჩქუდ, ნამდა მუშ საქციელით ზეციერ მუმას გურს უხარენდჷ. თინა ომორჩილუდ ღორონც თიმწკუმა ხოლო, მუჟამსით თეშ კეთება მანგარ რთულ რდუ თიშო. თის უჸორდჷ იეჰოვა, ათეშენ მსახურება პირველ ადგილშა გეურდჷ. დედამიწაშა მოულაშახ, იესო ოხვარუდ მუშ მუმას ირფელიშ გოჭყაფას (იგავ. 8:30). დედამიწაშა ქუმორთუნ,  თინა გურგედვალირო ოგურუანდჷ მუშ მუმაშ გურშენ შხვეფს (მათ. 6:9; იოან. 5:17). თეშ კეთებას იესოშა დიდ ხიოლ მოუღუდ (იოან. 4:34—36).

9. მუჭო მოხვარნა მსახურება მიღდან შინაგან სიმშვიდე?

⁹ ჩქი იესოშ მაგალითის მეპჸუნთ, მუჟამსით ვომორჩილუთ იეჰოვას დო ირო ბრელს ფხანდეთ „უფალიშ საქმეს“ (1 კორ. 15:58). ქადაგებაშ საქმეს მონაწილებას სრულაშე ქობღებულენთ-და, ჩქინ პრობლემეფშე სწორ თვალსაზრის მაღვენუნა (საქ. 18:5). მაგალთო, ნამთინეს, მიდგას მსახურებას შეფხვადუთ, უმოს რთულ პრობლემეფ უღნა ვინემ ჩქი. მუჟამსით ქიჸოროფუანა იეჰოვას დო გეგმირინუანა თიშ რჩევას, თინეფიშ ცხოვრება გეუჯგუშებ დო ბედნერეფ იჸუაფნა. თეშ ძირაფა უმოსო მარწმუნენა, ნამდა იეჰოვა ზრუნენს ჩქინდე, მუთ შინაგან სიმშვიდეს მარზენა. ართ დაქ, ნამდგას უღირსობაშ გრძნობა დო დეპრესია უღუდ, დერწმუნ, ნამდა თენა მართალო თაშ რე. თინა იჩიებ: „მუჟამსით მსახურებათ ვორექ დაკავებულ, უმოსო შემლებ ვაკონტროლე ჩქიმ გრძნობეფ დო დუც ბედნერო ბგინაფლენქ. ჩქიმ აზრით, თეშ მიზეზ თინა რე, ნამდა მსახურებაშ დროს უმოს ხოლოს ვორექ იეჰოვაწკუმა“.

10. მუს გურაფლენთ ბრენდაშ სიტყვეფშე?

¹⁰ გუვარჩუათ ართ დაშ, ბრენდაშ მაგალით. თის დო მუშ სქუას გაფანტულ სკლეროზ უღნა. ბრენდას ინვალიდიშ კალიასკაშ უმშო ვეგლართე. მუჟამს შეიალებენ, კარდოკარ მსახურენს, მარა უმოსო წერილეფით ქადაგენს. ბრენდა იჩიებ: „მუჟამსით ქიმეფხვად, ნამდა თე სისტემას ჩქიმ მდგომარეობა ვეგეუჯგუშებუდ, მთელ ყურადღება მსახურებაშა გეგნიბღჷ. ქადაგება მოხვარ, ვეფიფქრე ჩქიმ პრობლემეფშე დო ძალეფს მარზენს, ქიმვეხვარე თი კათას, მიდგას მსახურებას შეფხვადუქ. თეს გეძინელ, ქადაგება მოხვარ ირიათო მომავალიშ იმენდშე იფიფქრე“.

11—13. ა) მუჭო ოძირანდეს მოციქულეფ დო შხვეფ, ნამდა იესოშ მეგობრეფ რდეს? ბ) მუჭო ოხვარდეს მეგობრეფ იესოს?

¹¹ იესოშ მსახურებაშ დროს, ართგურ მოციქულეფ ირიათო თიშ გვერდით რდეს. თინეფ ცოცხალ მაგალით რდეს თი სიტყვეფიშ, ნამუთ იგავეფს ინოჭარ: „ნამთინე მეგობარ ჯიმაშე უმოს ხოლოშიან რე“ (იგავ. 18:24). იესო მანგარო აფასენდჷ თეცალ მეგობრეფს. მუშ მსახურებაშ განმავლობას იესოშ ნამთინ ხორციელ ჯიმას ვემუღებ ჭეშმარიტება (იოან. 7:3—5). ართშა თიშ ნათესეფქ თქუეს, ჭკუაშე გინილუა (მარ. 3:21). მარა თეშ გინაწონს, იესოს თამამას შეულებუდ ღურაშ წოხოლენ სერს მუშ ართგურ მოციქულეფს უწუკო: „თქვა ჩქიმწკუმა ართო ქუდოსქიდით განსაცდელს“ (ლუკ. 22:28).

¹² მინშა მოციქულეფ მუნეფიშ საქციელით გურს უტახუნდეს იესოს, მარა თინა ვაქციენდჷ ყურადღებას თინეფიშ შეცდომეფს დო ორწყედ, ნამდა რწმენა უღდეს (მათ. 26:40; მარ. 10:13, 14; იოან. 6:66—69). ღურაშ წოხოლენ სერს იესოქ მუშ ართგურ მოციქულეფს თეცალ სიტყვეფ უწუ: „მეგობრეფ დოიძახით, მუშენდა მუთ მუაჩქიმშე მომრჩქილუაფუნ, ირფელ ქოიწით“ (იოან. 15:15). მუშო ოკო რაგად, იესოს მუშ მეგობრეფ გურშა ელუკინანდეს. თიშო დიდ ხიოლ მოუღუდ, მუჟამსით შხვეფ ოხვარდეს (ლუკ. 10:17, 21).

¹³ მოციქულეფიშ გარდა იესოს შხვა მეგობრეფ ხოლო ჸუნდჷ. თინეფ მუჭოთ ქადაგებაშ, თეშ შხვა საქმეეფს ხოლო ოხვარდეს. ნამთინე მეგობარ თის ჸუდეშა აპეჯენდჷ (ლუკ. 10:38—42; იოან. 12:1, 2). შხვეფ თიწკუმა ართო მოგზაურენდეს დო მუნეფიშ  ქონებას უნაწილენდეს (ლუკ. 8:3). იესოს ჯგირ მეგობრეფ ჸუნდჷ, მუშენდა მუ ხოლო ჯგირ მეგობარ რდუ თინეფშო. თინა ჯგირ საქმეეფს ურთუდ მუშ მეგობრეფს დო თიშე უმოსის ველუდ თინეფშე, ვინემ შეულებდეს. მართალ რე, იესო სრულყოფილ რდუ, მარა აფასენდჷ თი ირფელს, მუდგას მუშ არასრულყოფილ მეგობრეფ ორთუდეს თიშო. მუშო ოკო რაგად, შემლებნა დარწმუნებულ ვორდათ, ნამდა თინეფ ოხვარდეს იესოს უღუდკო შინაგან სიმშვიდე.

14, 15. მუჭო შემლებნა გიფრჩქინათ ჯგირ მეგობრეფ დო მუჭო შეულებნა თინეფს ჩქინ მოხვარა?

¹⁴ ჯგირ მეგობრეფ მიმეხვარებნა იეჰოვაშ ართგურეფქ ქუდოფსკიდათ. ართ-ართ საშვალება, პჸუნდან ჯგირ მეგობრეფ თინა რე, ნამდა ჩქი ხოლო ჯგირ მეგობრეფ ვორდათ შხვეფშო (მათ. 7:12). მაგალთო, ბიბლია ელამჩანა ჩქინ დრო დო ენერგია შხვეფიშ, განსაკუთრებულო გაჭირებულეფიშ მახვარებელო გეგმიბრინუათ (ეფეს. 4:28). ქორენო თქვან კრებას თიცალ პიროვნება, მიდგას მოხვარა ოსაჭირ? ქეშეილებნანო საჭირო ნივთეფიშ ჸიდირს ქიმეხვარათ თანაქრისტიანს, ნამუთ ლეხ ვარდა ხანშა მიშულირ რე? ვარდა ხომ ვეშეილებნა ოჭკუმალ გუკეთათ ოჯახის, მიდგას ფინანსურო უჭირს? ვებ-გვერდიშ jw.org^® ვარდა JW ბიბლიოთეკაშ^® გიმორნაფა ჯგირო ქოიჩქუნან-და, შეილებნანო ქუდაგურუათ კრებაშ წევრის თიშ გიმორნაფა? ნამდვილო, შხვეფიშ მოხვარა ბედნერობას მომღანა (საქ. 20:35).

¹⁵ სირთულეეფიშ დროს მეგობრეფ მიმეხვარებნა ვა ვოდინუათ შინაგან სიმშვიდე. მუჟამსით იობი მუშ პრობლემეფიშ გურშენ ეჩიებუდ ელიჰუს, თინა მთელ გურით ურჩქილედ. თეგვარო, ჩქინ მეგობრეფ ხოლო მოთვინებათ მირჩქილენა, მუჟამსით  ჩქინ ოწუხებელიშ გურშენ ვეჩიებუთ (იობ. 32:4). ჩქი ოკო ვეველდათ, ნამდა თინეფ ჩქინ მანგიორო მიღენა გადაწყვეტილებეფს, მარა გონივრულ იჸუაფ მიბღათ თი რჩევეფ, მუდგას ბიბლიაშე მუჩანა (იგავ. 15:22). მეფე დავითცალო, ჩქი ხოლო ვარია ოკო ვა ფთქუათ თი მოხვარაშე, ნამუსით მეგობრეფ პრობლემეფიშ დროს ფთავაზენა (2 სამ. 17:27—29). ნამდვილო, ჯგირ მეგობრეფ ღორონთშე საჩუქარ რენა (იაკ. 1:17).

16. მუჭოთ ფილიპელეფიშ 4:6, 7-შე იძირე, ნამ რე ხვალე ართ საშვალება, მუდგათ მშვიდობას ბღებულენთ? გენწყით.

¹⁶ წეკითხით ფილიპელები 4:6, 7. მუშენ მირაგადნა იეჰოვა, ნამდა მშვიდობაშ მეღება ხვალე იესოს საშვალებათ შემალებენა? ჩქინ გურ დო გონებას მშვიდობა შემანარჩუნებენა, მუჟამსით ქინვანჭუთ მუ როლ უღჷ იესოს იეჰოვაშ განზრახვაშ შესრულებას დო მაღვენუნა თიშ რწმენა. მაგალთო, იესოშ გიშაჸიდირალიშ საშვალებათ, ცოდეფიშ პატიებაქ იჸუ შეიოლებერქ (1 იოან. 2:12). თეშ რჩქინა მანგარო ელამკინანა გურშა. იესო მუჭოთ ღორონთიშ სამეფოშ მეფე, ანაზღაურენს არძა ზარალს, ნამუთ სატანაქ დო თიშ ქვეყნიერებაქ მიმორინუეს (ეს. 65:17; 1 იოან. 3:8; გამოცხ. 21:3, 4). მუშმადიდა იმენდ რე თენა ჩქინო! მართალ რე, დავალება ნამუთ იესოქ მუჩეს ადვილ ვა რე, მარა თე სისტემაშ ბოლო დღალეფს თინა ჩქინ გვერდით რე (მათ. 28:19, 20). თენა დიდ გაბედულებას მარზენა. გურიშ ელაკინა, იმენდ დო გაბედულება თი ძირითად საშვალებეფ რე, ნამუთ მოსაჭირნა, მიღდან მშვიდობა.

17. ა) მუჭო შეულებ ქრისტიანს ვადინუას მშვიდობა? ბ) მუჭოთ იოანეშ 16:33-ს ჭარჷ, მუშ კეთება შემალებენა?

¹⁷ მარა, მუჭო შეილებნა ვადინუათ მშვიდობა თიმწკუმა ხოლო, მუჟამსით სერიოზულ სირთულეეფს შეხვადუთ? შეილებნა მიაჸუნათ იესოშ მაგალითის: პირველ, ვემიოტუათ ლოცვა; მაჟია, დემორჩილით იეჰოვას დო გურგედვალირო იქადაგით თიმწკუმა ხოლო, მუჟამსით თეშ კეთება რთულ რე დო მასმა, მიღით მეგობრეფშე მოხვარა. შედეგო, „ღორონთიშ მშვიდობა დოთხილანს თქვან გურეფს დო გონებას“. თეგვარო, იესოცალო თქვა ხოლო გიორჯგინანთ ირნერ განსაცდელს (წეკითხით იოანე 16:33).