1. მუშ სურვილ უღჷ ღორონთიშ არძა მსახურს დო მუშენ? (ქოძირით სურათ პირველ გვერდის).

იესო ქრისტექ მუშ მიმაჸუნალეფს თეცალ მითითება მეჩჷ: „მეუთ დო მოწაფეეფო მამზადით ხალხი არძა ერშე“ (მათ. 28:19). მუშო ოკო რაგად, ღორონთიშ არძა ართგურ მსახურს ოკო ქიდიგურუას, მუჭო მიღას თე საქმეს სრულას მონაწილება (2 ტიმ. 4:5). ქადაგება დო მოწაფეეფიშ მომზადება ცხოვრებას არძაშ უმოს მნიშვნელოვან, ღირსეულ დო სასწრაფო საქმე რე. მარა შილებე მინშა რთულ რდას, ბრელ დრო დუთმათ მსახურებას.

2. მუქ შილებე მეცილან, ნამდა სრულაშე მიბღათ მონაწილება მსახურებას?

² არსებენს შხვა მნიშვნელოვან საქმეეფ ხოლო, ნამუთ ბრელ დროს დო ენერგიას ითხინს. შილებე ბრელს მუფშენდათ, ნამდა ჩქინ დუდ დო ოჯახ გეიბჯუმუათ. თეს გეძინელ, რთულ მაფდან ოჯახურ პასუხიშმგებლობეფიშ შესრულება, მიღდან დეპრესია ვარდა ჯამრთელობაშ პრობლემეფ, ნამუთ ასაკშა მიშულას მოჸუნს. მუჭო შემლებნა შხვადოშხვა სირთულეეფიშ უმკუჯინუო სრულას მიბღათ მონაწილება მსახურებას?

3. მუს ბგებულენთ მათეშ 13:23-ს ინოჭარილ იესოშ სიტყვეფშე?

³ გურ ოკო ვეგიბტახათ, მუჟამსით სიტუაცია ვა მარზენა თიშ საშვალებას, ბრელ დრო დუთმათ იეჰოვაშ მსახურებას. იესოს უჩქუდ, ნამდა არძას ართნერო ვეშმალებედეს სამეფოშ ნაყოფიშ მიკოღალა (წეკითხით მათე 13:23). იეჰოვა აფასენს ირფელს, მუდგას თიშ მსახურებას ვორთუთ (ებრ. 6:10—12). მარა შილებე ფიფქრენდათ, ნამდა მდგომარეობა საშვალებას მარზენა უმოს მეტ გავაკეთათ. თე სტატიას გუვარჩუათ, მუჭო შემლებნა მსახურება პირველ ადგილს გივორნუათ, გემაბრტივათ ცხოვრება დო გუვაუჯგუშათ ქადაგებაშ დო გურაფაშ უნარი.  პირველო ქიგებგათ, მუს ნიშნენს სრულაშო ვემსახურათ იეჰოვას.

4. მუს ნიშნენს სრულაშო ვემსახურათ იეჰოვას?

⁴ მარტივო ქოფთქუათინ, სრულაშო მსახურება ნიშნენს, მუთ შემლებნან ირნერო მიბღათ მონაწილება ქადაგებაშ დო გურაფაშ საქმეს. მარა თეს ქადაგებაშა ბრელ დროშ დათმებაშე უმოს იგულისხმებ. იეჰოვაშო დიდი მნიშვნელობა უღჷ ჩქინ მოტივეფს. ჩქი მიჸორა იეჰოვა დო მოყვას, ათეშენ შურ დო გურით ბღებულენთ მონაწილებას მსახურებას * (მარ. 12:30, 31; კოლ. 3:23). თენა ნიშნენს, მთელ ჩქინ ძალეფ დო ენერგია იეჰოვაშ მსახურებაშო გიმიბრინუათ. მუჟამსით ჯგირო მარჩქილენა მუშმადიდა პატი რე ქადაგებაშ საქმეს მონაწილებაშ მეღება, ირნერო ქივეცადებუთ, მუთ შემლებნან, მეტ ხალხის ქუგვოგებაფუათ სახიოლო ამბე.

5, 6. ქიმიჸონით მაგალით, შეზღუდულ დროშ უმკუჯინუო, მუჭო შეულებ პიროვნებას, მსახურება პირველ ადგილს ქიგიორინუას.

⁵ მორთ, ქიმიპჸონათ თეცალ მაგალით. წერმიდგინით კოჩ, მიდგას გიტარაშ მეგამა უჸორს. თის ოსიამოვნ, მუჟამსით თე საქმეთ რე დაკავებულ. თინა საბატონ დო ჟეშხას ართ-ართ კაფეს მიოგანს გიტარას. მარა თე საქმეთ დასაბაღ ფარას ვართჷ. ათეშენ, ართ-ართ მაღაზიას, თუთაშხაშე ობიშხაშახ გუმმაჩამალო ხოლო მუშენს. მართალ რე, დროშ უმენტაშის მაღაზიას ატარენს, მარა გიტარაშ მეგამას უმოს სიამოვნება მოუღ თიშო. თის მანგარო ოკო უჯგუშო ქიდიგურუას გიტარაშ მეგამა დო მუსიკოსო გინირთას. მართალ რე, ბრელ დრო ვა უღჷ გიტარაშ მიოგამალო, მარა ირნერ საშვალებას გიმირინუანს, ქისიამოვნას მუსიკათ.

⁶ თეგვარო, თქვა ხოლო შილებე დროს შეზღუდულეფ რეთ დო გოკონან თისხი დრო ვადგათმებენა მსახურებაშა. მარა თენა თი საქმე რე, ნამდგაშ კეთება გიჸორა. ათეშენ ოცადუთ გეგმირინუათ ირნერ საშვალება, გაუჯგუშათ გურაფაშ უნარ, ნამდა სახიოლო ამბეშ მორჩქილაფაქ ხალხიშ გურს ქეშეხუას. შილებე შხვადოშხვა ოზრუნებელ გიღდან, ნამდგას ბრელ დრო მეუღ, ათეშენ ფიქრენდათ, მუჭო გიორინუათ მსახურება პირველ ადგილს.

7, 8. მუჭო შემლებნა მივაჸუნათ იესოშ მაგალითის დო პირველ ადგილს გივორინუათ მსახურება?

⁷ იესოქ ჯგირ მაგალით დომტუეს თიშ ოძირაფალო, მუნერ დამოკიდებულება ოკო მიღდან მსახურებაშე. თიქ საქმეეფით ქაძირუ, ნამდა მუშ ცხოვრებას არძაშ უმოს მნიშვნელოვან ღორონთიშ სამეფოშ გურშენ ქადაგება რდუ (იოან. 4:34, 35). თინა ოშობით კილომეტრის გილეშ კუჩხით, ნამდა ქუქადაგკო ხალხის. თეს გეძინელ, ირნერ საშვალებას გიმირინუანდჷ, სახალხოთ ვარდა ჸუდეეფს, სახიოლო ამბე გეგნოჩკო თინეფს. იესოს მთელ მუშ ცხოვრებას პირველ ადგილშა გეურდჷ მსახურება.

⁸ ჩქი ხოლო, მოკონა მივაჸუნათ იესოშ მაგალითის დო მუთ შემლებნან, ირნერ საშვალება გიმიბრინუათ, ნამდა იფქადაგათ სახიოლო ამბე სამეფოშ გურშენ. ჩქი მზათ ვორეთ დაფთმათ პირად კომფორტ, ნამდა სრულაშო მიბღათ მონაწილება მსახურებას (მარ. 6:31—34; 1 პეტ. 2:21). ნამთინე იეჰოვაშ მოწმე სპეციალურ სრულ დროთ ვარდა დამხმარე პიონერო მსახურენს. შხვეფ შხვა ნინას გურაფლენა ვარდა გინულა თიცალ ტერიტორიაშა, სოდეთ მაქადაგებელეფიშ საჭიროება რე. მარა ქადაგებაშ საქმეშ დიდ ნაწილს თი მაუწყებელეფ ორთნა, მიდგას ვეშულებ თეშ კეთება, მარა ირნერო ოცადნა იქადაგან. მუდგას ვა ვორთუდათინ, იეჰოვა დღას ვა მოფთხინა თიშე უმოსის, ვინემ შემლებნა. თის ოკო, ნამდა თითოულს ხიოლ მიღდან მსახურებას, მუჭოთ „ბედნერ ღორონთიშ“ დიდებულ სახიოლო ამბეშ გუმაცხადებელეფს (1 ტიმ. 1:11; კან. 30:11).

9. ა) სამუშაშ უმკუჯინუო, მუჭო ოცადუდ პავლე, პირველ ადგილს მსახურება გიორინუკო? ბ) მუჭო იძირე საქმეეფიშ 28:16, 30, 31-შე, პავლეშ დამოკიდებულება მსახურებაწკუმა?

⁹ მოციქულ პავლე ხოლო პირველ ადგილს გიორინუანდჷ მსახურებას, მუდგათ ჯგირ მაგალით დომტუეს. კორინთის მაჟია მისიონერულ მოგზაურობაშ დროს თის დასაბაღ ფარა ვა უღუდ, ათეშენ დუდიშ ეიოჯუმალარო კარვეფს ჭანდჷ. მარა პავლეშო თე საქმიანობა არძაშ უმოს მნიშვნელოვან ვარდჷ. თინა თიშენ შრომენდჷ, ნამდა დუდ გეიჯუმუკო დო სახიოლო ამბე ქუქადაგკო კორინთელეფს (2 კორ. 11:7). მართალ რე, პავლე ქვეყნიურ სამუშას ხოლო მუშენდჷ, მარა მსახურება თიშო არძაშ უმოს მნიშვნელოვან რდუ, მუთ თევრეშე იძირე, ნამდა ირ საბატონს სიტყვათ გიშეშ სინაგოგას დო ქადაგენდჷ. პავლე „მთელ მუშ დროს ღორონთიშ სიტყვაშ ქადაგებას უთმენდჷ. თინა უმოწმენდჷ დო უმტკიცენდჷ იუდეველეფს, ნამდა იესო რე ქრისტე“ (საქ. 18:3—5; 2 კორ. 11:9). უმოს გვიანო, მუჟამსით რომს 2 წანას შინაპატიმრობას რდუ, პავლე მოციქულ მუშ მაძირაფალეფს უქადაგუდ დო თანაქრისტიანეფს წერილეფს მეჭარუნდჷ (წეკითხით საქმეები 28:16, 30, 31). თის გინოჭყვიდილ აფუდ, მუთუნს ვემეჩკო უფლება, ქეცილკო მსახურებას. თიქ თქუ: „ჩქი მიბღით თე მსახურება [დო] ხელეფს ვაგმვუკინანთ“ (2 კორ. 4:1). პავლეცალო, ჩქი ხოლო ქომუფშენთ-და, იშენით შემლებნა მსახურება პირველ ადგილს გივორინუათ.

10, 11. მუჭო შემლებნა სრულას მიბღათ მონაწილება მსახურებას ჯამრთელობაშ პრობლემეფიშ უმკუჯინუო?

¹⁰ მუჟამსით ასაკიშ ვარდა ჯამრთელობაშ პრობლემეფიშ გურშენ ვეშმალებენა კარდოკარ მსახურება, შემლებნა მსახურებაშ შხვა სფეროს მიბღათ მონაწილება. პირველ საუკუნეშ ქრისტიანეფ სოდგა ვა რდესკონ, ირდიხას ქადაგენდეს. თინეფ ირნერ საშვალებას გიმირინუანდეს, ქუქადაგესკო ხალხის, მაგალთო კარდოკარ, სახალხოთ დო არაფორმალურო (საქ. 17:17; 20:20). თი დროს, მუჟამსით ვეგლმართინენა, შემლებნა თიცალ ადგილს ქუდობზოჯათ, სოდეთ ბრელ ხალხ მიკურს დო თინეფს ვუქადაგათ. თეს გეძინელ, შემლებნა იფქადაგათ არაფორმალურო, წერილეფით ვარდა ტელეფონით. ბრელ მაქადაგებელშა, მიდგას ვეშულებ კარდოკარ მსახურება,  ხიოლ დო კმაყოფილება მოუღ შხვადოშხვა მეთოდეფით ქადაგებას.

¹¹ ჯამრთელობაშ პრობლემეფიშ უმკუჯინუო, თქვა შეილებნა სრულას მიღათ მონაწილება მსახურებას. მორთ, ხოლო ართშა ქიგიფშინათ მოციქულ პავლეშ მაგალით. თიქ თქუ: „ირფელიშ კეთებაშ ძალა მიღჷ ჩქიმ გუმამანგარებელიშ მოხვარათ“ (ფილ. 4:13). პავლეს ძალა ოსაჭირუდ, მუჟამსით მისიონერულ მოგზაურობაშ დროს დელახ. თიქ გალატელეფს თეცალ სიტყვეფ მეჭარ: „თქვა გიჩქნა, ნამდა პირველო ჩქიმ ლახალაშ დროს მაშუ შესაძლებლობაქ, ქოიქადაგითკო სახიოლო ამბე“ (გალ. 4:13). თეგვარო, ჯამრთელობაშ პრობლემეფქ შილებე საშვალება ქომჩან, სახიოლო ამბე ვუქადაგათ შხვეფს, მაგალთო ექიმეფს, ექთანეფს ვარდა თინეფს, მით ჩქინო ზრუნენს. თე ხალხიშ უმენტაშ სამუშას რე, მუჟამსით მოწმეეფ ჸუდეშა მიაკითხანა.

12. მუს ნიშნენს მიღდან „თოლ სუფთას“?

¹² იესოქ თქუ: „სხეულიშ ლამპა თოლ რე. ათეშენ, თოლ სუფთას ქოიღ-და, მთელ სხეულ სუფთა გაღვენუ“ (მათ. 6:22). მუს გულისხმენდჷ იესო თე სიტყვეფს? თენა ნიშნენს მიღდან უბრალო ცხოვრება, შხვა სიტყვეფით ქოფთქუათინ, ართ მუდგარენშა ვორდათ კონცენტრირებულ დო შხვაშა ვეგნიბღათ ყურადღება. თეშ არძაშ უჯგუშ მაგალით იესოქ დომტუეს. თის მსახურება პირველ ადგილშა გეურდჷ დო მუშ მოწაფეეფს ხოლო ელუჩანდჷ, იეჰოვაშ მსახურება დო თიშ სამეფოშ ინტერესეფ პირველ ადგილ გიორინესკო. იესოშ მაგალითის მეპჸუნთ დო პირველ რიგის სამეფოს დო ღორონთიშ სიმართლეს ბგორუნთ, მუჟამსით მსახურება ჩქინ ცხოვრებას არძაშ უმოს მნიშვნელოვან საქმე რე (მათ. 6:33).

13. მუ მიმეხვარებნა, ნამდა მსახურება პირველ ადგილს ქიგვორინუათ?

 ¹³ მსახურებაშ პირველ ადგილს გერნაფაშ ართ-ართ საშვალება ცხოვრებაშ გამარტივება რე. თენა საშვალებას მარზენა უმოს დრო დუთმათ შხვეფიშ მოხვარას, ნამდა გეჩინებაფუან დო ქიჸოროფუან იეჰოვა. * მაგალთო, ქეშეილებნანო სამუშაშ გრაფიკ თეშ ქიგიონწყუათ, ნამდა მარაშ დინახალე უმოს დრო დუთმათ მსახურებას? შეილებნანო ვარია ქოთქუათ თიცალ გართობაშე, ნამუთ ბრელ დროს მიდაიღანა?

14. მუქ აჸუ ოთირალქ მუნეფიშ ცხოვრებას ართ წყვილს, ნამდა უმოს დრო დუთმესკო მსახურებას?

¹⁴ მორთ, ქობძირათ ართ უხუცეს ჯიმა ელიასიშ დო მუშ ოსურიშ შემთხვევა. ელიას იჩიებ: „ჩქი ვეშემლებნა პიონერო მსახურება, მარა ირნერო ვოცადუთ უმოს დრო გეგმვურთათ ქადაგებაშ საქმეს. ათეშენ ჩქინ ცხოვრებას მუსხირენ მუდგარენქ მაჸუეს ოთირალქ. მაგალთო, გეგნობჭყვიდით დაბზოგითკო ფარა. თეწკუმა ართო, ქიმეფხვადით, ნამდა გართობას ბრელ დროს ვუთმენდით, ათეშენ უმოს ნაკლებ დრო დუთმით თის. თეს გეძინელ, ქოფთხით დამსაქმებელეფს, ჩქინ სამუშა განრიგ ჭიჭე დუთირუდესკო, ნამდა უმოს დროქ ქუდმოსკიდესკო მუჭოთ მსახურებაშო, თეშ შხვა მნიშვნელოვან საქმეეფშო ხოლო. თექ საშვალება ქომჩეს, ვიმსახურათ ონჯუას, მიღდან უმოს მეტ ბიბლიაშ გურაფა დო თუთაშე ჟირშა, სამუშა დღალეფს ქადაგებას მიბღათ მონაწილება. თე ირფელქ მა დო ჩქიმ ოსურს დიდ ხიოლ მომღეს“.

15, 16. მუჭოთ 1 ტიმოთეშ 4:13,15-ის ჭარჷ, მუჭო შემლებნა გუვაუჯგუშათ მსახურებაშ უნარეფ? (ქოძირით ჩარჩო „ მიზნეფ, ნამუთ მიმეხვარებ მსახურებაშ გაუჯგუშებას“).

¹⁵ ხოლო ართ-ართ საშვალება, სრულაშო ვემსახურათ იეჰოვას, ქადაგებაშ დო გურაფაშ  უნარეფიშ გაუჯგუშება რე. ნამთინე პროფესია ითხინს, ნამდა ირიათო მიღე რჩქინა დო გაუჯგუშე უნარეფ. თენა თაშ რე სამეფოშ მაქადაგებელეფიშ შემთხვევას ხოლო. საჭირო რე გუვაგრძელათ გურაფა, ნამდა გუვაუჯგუშათ ქადაგებაშ საქმეშ უნარეფ (იგავ. 1:5; წეკითხით 1 ტიმოთე 4:13, 15).

¹⁶ მუჭო შემლებნა უმოსო გუვაუჯგუშათ მსახურება? თეს მიმეხვარებნა თი მითითებეფიშ გათვალისწინება, მუდგას შკამარაშ შეხვალამას ბღებულენთ. თე შეხვალამა მარზენა პრაქტიკულ რჩევეფს, ნამუთ მოხვარნა გუვაუჯგუშათ მსახურებაშ უნარეფ. მაგალთო, მუჟამსით თავმჯდომარე ჯიმა რჩევას არზენს თი მაუწყებელს, მიდგაქ დავალებათ გიშართჷ, თე დროს ჩქი ხოლო შემლებნა გეფთვალისწინათ თიშა მეჩამილ რჩევეფ, ნამდა გუვაუჯგუშათ მსახურება. თე რჩევეფიშ პრაქტიკულო გიმორნაფა შემლებნა თიმწკუმა, მუჟამსით ხალხის სახიოლო ამბეს გინოფჩანთ. თეს გეძინელ, ჩქინ სამქადაგებლო ჯგუფიშ ზედამხედველს ქოფთხუათ რჩევა დო თიწკუმა ართო მიდაფრთათ მსახურებაშა. ჯგირ იჸუაფ იფთანამშრომლათ გამოცდილ მაუწყებელ, პიონერ ვარდა რაიონულ ზედამხედველწკუმა. ქადაგება დო შხვეფიშ გურაფა უმოს ხიოლს მომღანა, მუჟამსით უმოსო გუვაუჯგუშენთ გურაფას მოხვარნან ფერ საშვალებეფიშ გიმორნაფას.

17. მუ შედეგ გაღვენუნა, მუჟამსით სრულაშო მიღენთ მონაწილებას მსახურებას?

¹⁷ მუშმადიდა პატი რე, ნამდა იეჰოვა მუშ თანამშრომელო ბღებულენა (1 კორ. 3:9). მუჟამსით ქიგეგენთ, „მუ რე უმოს მნიშვნელოვან“ დო ყურადღებას მსახურებაშა გეგნიღანთ, იეჰოვაშ მსახურება ხიოლს მოიღანა (ფილ. 1:10; ფსალმ. 100:2). შეილებნა დარწმუნებულ რდათ, ნამდა მუდგა პრობლემა ვარდა შეზღუდულ შესაძლებლობეფ ვაიღდან, ღორონთ მერჩანა ძალას, სრულაშო მიღათ მონაწილება მსახურებას (2 კორ. 4:1, 7; 6:4). თქვან შესაძლებლობეფშე გამომდინარე, ჭიჭეს ორთუთ დო ვარ ბრელს, შეილებნა გიღდან ხიოლიშ მიზეზ, მუჟამსით შურ დო გურით ომსახურუთ ღორონც (გალ. 6:4). ქადაგებაშ საქმეს სრულაშო მონაწილებათ ოძირანთ, ნამდა გიჸორა იეჰოვა დო მოყვას. ღორონთიშ სიტყვას ჭარჷ: „ირიათო თაშ ქიმიქცი დო ირსხენქ მუჭოთ სქან დუც, თეშ მარჩქილეეფს ხოლო“ (1 ტიმ. 4:16).