1. მუ რე თი ართ-ართ საშვალება, მუდგათ იეჰოვა მზურნველობას გიმირჩქინანს, მუჭოთ თენა ეფესოელეფიშ 6:10—13-ს რე ეჭარილ? გენწყით.

ართ-ართ საშვალება მუდგათ იეჰოვა ზრუნენს მუშ მსახურეფშე, თინა რე, ნამდა მოხვარნა ქივეწინააღმდეგათ ნტერეფს. ჩქინ მთავარ ნტერეფ სატანა დო დემონეფ რენა. იეჰოვა მაფრთხილენა თინეფიშ გურშენ დო მოხვარნა ქივეწინააღმდეგათ (წეკითხით ეფესოელები 6:10—13). იეჰოვას ქიმვენდებუთ დო თიშ მოხვარას მიბღენთ-და, შემალებენა ქივეწინააღმდეგათ ეშმაკის. თეს გეძინელ, შემლებნა პავლეცალ რწმენა მიღდან, ნამუქით თქუ: „ღორონთ ჩქინწკუმა ქორენ-და, მი გიშურს ჩქინ წინააღმდეგ?“ (რომ. 8:31).

2. მუს გუვარჩიენთ თე სტატიას?

² ჭეშმარიტ ქრისტიანეფს მთელ ყურადღება იეჰოვაშ მსახურებაშა მაფნა გინოღალირ დო ნაკლებ ყურადღებას ვაქციენთ სატანას დო თიშ დემონეფს (ფსალმ. 25:5). მარა, საჭირო რე მიჩქდან თი ძირითად საშვალებეფ, მუდგათ სატანა ოცად მიმოჩილითუან. თენა მიმეხვარებნა, გივორჯგინათ ეშმაკის (2 კორ. 2:11). თე სტატიას გუვარჩიენთ მთავარ საშვალებას, მუდგას სატანა დო თიშ დემონეფ გიმირინუანა, ნამდა მიოჩილითუან ხალხი. თეს გეძინელ, ქიგებგენთ, მუჭო შემლებნა ქივეწინააღმდეგათ თინეფს.

3, 4. ა) მუს ნიშნეს სპირიტიზმი? ბ) მუსხით გავრცელებურ რე სპირიტიზმი?

³ ართ-ართ მთავარ საშვალება, მუდგათ სატანა დო თიშ დემონეფ ოცადნა ხალხიშ მეჩილითაფას, სპირიტიზმი რე. თინეფ, მით სპირიტიზმის რენა ჩართულ, იჩიებნა, ნამდა უჩქნა ვარდა შეულებნა აკონტროლან თიცალ მუდგარენეფ, მუთ ჩვეულებრივ  ადამიანეფშო შეიოლებერ ვა რე. მაგალთო, ნამთინე იჩიებ, ნამდა ხილუეფიშ ვარდა ასტროლოგიაშ საშვალებათ, მომავალიშ წინასწარმეტყველება შეულებ. შხვეფ აცხადენა, ნამდა ღურელეფწკუმა რაგად შეულებნა. ნამთინე ჯადოქრობას დო მაგიას რე ჩართულ დო ოცად ჯადო გუკეთას შხვეფს. *

⁴ მუსხით გავრცელებურ რე სპირიტიზმი? ლათინო-ამერიკას დო კარიბიშ ზღვაშ კუნძულეფიშ 18 ქიანას ჩატარებულ კვლევაშ შედეგო, თე კვლევაშ მონაწილე ირ მასმა პიროვნებას ჯერსჷ მაგიაშ დო ჯადოქრობაშ. სოდგარენ თესხი რაოდენობაშ ხალხის ჯერსჷ, ნამდა შეიოლებერ რე ღურელიშ შურეფწკუმა ურთიერთობა. ხოლო ართ კვლევა აფრიკაშ 18 ქიანას ჩატარეს. თექ ირ მაჟია პიროვნებას წანსჷ ჯადოქრობაშ. მუშო ოკო რაგად, სოდგა ვა ფცხოვრენდათინ, ფრთხილას ოკო ვორდათ, ნამდა დუდ ევუჩილითუათ სპირიტიზმიშ მახეს. სატანა ირნერო ოცად მიოჩილითუას ადამიანეფ (გამოცხ. 12:9).

5. მუნერ დამოკიდებულება უღჷ იეჰოვას სპირიტიზმშენ?

⁵ იეჰოვა „ჭეშმარიტებაშ ღორონთ“ რე (ფსალმ. 31:5). მუნერ დამოკიდებულება უღჷ თის სპირიტიზმშენ? იეჰოვას ჯოგჷ თინა! თიქ ისრაელეფს უწუ: „ვა რდას თქვან შქას თიცალ, მით ქომოლსქუას ვარდა ოსურსქუას დაჩხირს შეწირენს, ვართ მაკითხე, ვართ ჯადოქარი, მისანი, ვართ გრძნეული, ვართ ჯადოშ მაკეთებელი, ვართ თინა, მით რჩევას თხულენს შურეფიშ გიმმაძახებელს ვარდა მაკითხეს, დო ვართ თინეფ, მით ღურელეფს გიმოკითხენა. თეშ მაკეთებელ ჯოგჷ იეჰოვას“ (კან. 18:10—12). ამდღა ქრისტიანეფ ვეცვენა მოსეშ კანონს, ნამუთ იეჰოვაქ ისრაელეფს მეჩჷ, მარა მიჩქნა, ნამდა იეჰოვაშ დამოკიდებულება სპირიტიზმიშ გურშენ ვა თირე (მალ. 3:6).

6. ა) მუჭო გიმირინუანს სატანა სპირიტიზმის, ნამდა ხალხის ზიან ქიმიორინუას? ბ) ეკლესიასტეშ 9:5-იშ თანახმათ, მუ მდგომარეობას რენა ღურელეფ?

⁶ იეჰოვა მაფრთხილენა, დუდ ევუჩილითუათ სპირიტიზმის, მუშენდა უჩქჷ, ნამდა სატანა თის ხალხშო ზიანიშ მიორნაფალო გიმირინუანს. სატანა სპირიტიზმიშ საშვალებათ ხალხის ოჯერუანს, ნამდა ღურაშ უკულ სიცოცხლეს შხვადო აგრძელენა (წეკითხით ეკლესიასტე 9:5). თეს გეძინელ, თის ოკო სპირიტიზმიშ საშვალებათ დაშკურინუას დო ჭეშმარიტებაშე გემკაჸათას ადამიანეფ. სატანაშ მიზან რე, ხალხიქ იეჰოვაშ მანგიორო დემონეფს მიენდან.

7. მუს მოგურუანა იეჰოვა?

⁷ მუჭოთ მიფშინეთ, იეჰოვა მოგურუანა მუ მოსაჭირნა, ნამდა სატანა დო თიშ დემონეფქ ვემმოჩილითუან. მორთ, გუვარჩუათ ნამთინე საშვალება, ნამუთ მიმეხვარებნა ქივეწინააღმდეგათ თინეფს.

8. ა) მუ რე თი ძირითად საშვალება, ნამუთ მიმეხვარებნა ქივეწინააღმდეგათ დემონეფს? ბ) მუჭო აარგამენს ფსალმუნიშ 146:4 სატანაშ ტყურას ღურელეფიშ მდგომარეობაშ გურშენ?

⁸ წეკითხით ღორონთიშ სიტყვა დო დეფიქრით თიშე. თენა ართ-ართ მთავარ საშვალება რე, მუთ მიმეხვარებნა, ვედებჯერათ დემონეფიშ ტყურეფ. ღორონთიშ სიტყვას შეულებ გეგმაარგამას სატანაშ ტყურეფ (ეფეს. 6:17). მაგალთო, თინა აარგამენს ტყურას, ნამდა ღურელეფს შეულებნა ურთიერთობა უღდან ცოცხალ კათაწკუმა (წეკითხით ფსალმუნი 146:4). თეს გეძინელ, მარწმუნენა, ნამდა ხვალე იეჰოვას შეულებ იწინასწარმეტყველას  მომავალი (ეს. 45:21; 46:10). ბიბლიას რეგულარულო ქოპკითხულენთ დო ნაკითხირშე ქოფიფქრენთ-და, მზათ იპჸუაფუთ ქივეწინააღმდეგათ დო გიბჯოგუათ თი ტყურეფ, ნამდგას სატანა დო დემონეფ ოცადნა ქუდმოჯერუან.

9. სპირიტიზმიშ ნამ სახეობეფს ოკო ევუჩილითუათ დუდ?

⁹ ჩეთხინეთ ირფელ, მუთ სპირიტიზმწკუმა რე დაკავშირებულ. ჩქი, ჭეშმარიტ ქრისტიანეფ დღას ვემიბღენთ მონაწილებას სპირიტიზმიშ ნამთინ სახეობას. მაგალთო, დღას ვემურთ მედიუმშა დო ვართ შხვა საშვალებეფს გიმიბრინუანთ, ნამდა ურთიერთობა მიღდან ღურელეფწკუმა. მუჭოთ წოხოლენ სტატიას გუვარჩით, ვა ბღებულენთ მონაწილებას ღურელეფიშ დასაფლებაშ თიცალ რიტუალეფს, მუდგას საფუძველო თიშ რწმენა უღჷ, ნამდა ღურელიშ შურ შხვადო აგრძელენს სიცოცხლეს. თეს გეძინელ, ვეგმიბრინუანთ ასტროლოგიას დო ვართ მაკითხეს, ნამდა ქიგებგათ მომავალ (ეს. 8:19). ჩქი მიჩქნა, ნამდა არძა თე საშვალება ოშკურანჯ რე დო შეულებ დუმაკავშირან სატანა დო დემონეფკუმა.

10, 11. ა) მუ აკეთ ნამთინექ პირველ საუკუნეს ჭეშმარიტებაშ გაგებაშ უკულ? ბ) 1 კორინთელეფიშ 10:21-იშ თანახმათ, მუშენ ოკო მივაჸუნათ პირველ საუკუნეშ ქრისტიანეფიშ მაგალითის დო მუჭო შემლებნა თეშ კეთება?

¹⁰ დუდ ეუჩილითეთ ირფელს, მუთ ზებუნებრივ ძალეფწკუმა რე დაკავშირებულ. პირველ საუკუნეს, ეფესოს მახორუ ნამთინე პიროვნება მონაწილებას ღებულენდჷ სპირიტიზმიშ სახეობეფს. ჭეშმარიტებაშ გაგებაშ უკულ თინეფქ ხეთეშე ქიდიჭყეს მოქმედება. მუჭოთ ბიბლიას ჭარჷ: „ბრელქ, მით ჯადოქრობას მეჸუნდჷ, ქიმიღ მუშ წიგნეფ დო ირკოჩიშ წოხოლე დოჭვჷ“ (საქ. 19:19). თინეფქ ირფელ გაკეთეს, ნამდა ქეწინააღმდეგესკო დემონეფს. მაგალთო, დოჭვეს ძვირიან წიგნეფ, ნამუთ შეულებდეს გეგმოჩესკო ვარდა შხვას ქაჩუქესკო. თინეფშო იეჰოვაშ განდიდება უმოს მნიშვნელოვან რდუ, ვინემ წიგნეფიშ ფასი.

 ¹¹ მუჭო შემლებნა მივაჸუნათ პირველ საუკუნეს მახორუ ქრისტიანეფიშ მაგალითის? გონივრულ იჸუაფ დუდ ევუჩილითუათ ირფელს, მუთ ზებუნებრივ ძალეფწკუმა რე დაკავშირებულ. თეშა მიშურს ამულეტი, თილისმა ვარდა შხვა მუდგარენ, მუდგათ შხვეფს ზიანს მიორინუანა ვარდა ოცადნა დეცვან მუნეფიშ დუდ დემონეფშე (წეკითხით 1 კორინთელები 10:21).

12. მუ ოკო ბკითხათ ჩქინ დუც გართობაშ გიშაგორუაშ დროს?

¹² გონივრულო გეგშეგორით გართობა. ქოკითხით თქვან დუც: ხომ ვა ბკითხულენქ თიცალ წიგნის, ჟურნალს ვარდა ვებ-მასალეფს, ნამუთ ოკულტიზმის ოხუ? მუნერ მუსიკას, ფილმის, სატელევიზიო გადაცემას ვარდა კომპიუტერულ ლაჸაფეფს გიშებგორუნქ? ჩქიმ გართობაშ ნამდგაინ საშვალებას კავშირ ხომ ვა უღჷ სპირიტიზმწკუმა? ხომ ვა რე თექ ვამპირეფ, ზომბეფ ვარდა ზებუნებრივ ძალეფ გიმორნაფილ? უწყინარ გართობათ ხომ ვარ რე თექ ეჭარილ მაგია, ჯადოქრობა ვარდა ჭყალა? მუშო ოკო რაგად, არძა გართობა, სოდეთ ფანტასტიკურ მონაკვეთეფ ვარდა თიცალ მომენტეფ რე, ნამუთ რეალურ ვა რე, ვემშურს სპირიტიზმშა. გართობაშ გიშაგორუაშ დროს, გინოჭყვიდილ გაფდან, ნამდა თიცალ გართობა გიშაგორათ, ნამუთ მიგეხვარებნა, შორს დეკინათ დუდ თი ირფელშე, მუთ იეჰოვას ჯოგჷ. ირიათო ოკო ვეცადათ, ღორონთიშ წოხოლე სუფთა სინდის მიღდან (საქ. 24:16). *

13. მუს ოკო ევუჩილითუათ დუდ?

¹³ დუდ არიდით დემონეფიშ გურშენ ჩიებას. თე საკითხის მოკონა მივაჸუნათ იესოშ  მაგალითის (1 პეტ. 2:21). თის დედამიწაშა მოულაშახ ბრელ მუდგარენ უჩქუდ სატანაშ დო დემონეფიშ გურშენ. მარა, მუჟამსით დედამიწაშა ქუმორთჷ, ირიათო თინეფიშ გურშენ ვეჩიებუდ. იესოს ოკოდ ხალხის იეჰოვაშ გურშენ ოგურუკო დო ვართ ხოლო სატანაშა გუმახვილკო მთელ ყურადღება. იესოცალო, ჩქი ხოლო შემლებნა დუდ ევუჩილითუათ დემონეფშე რაგადის. თეშ მანგიორო, მორთ, საქმეეფით ქუვოძირათ, ნამდა ჩქინ „გურ ჯგირ საქმეეფშა მინჭუაფ“, შხვა სიტყვეფით ქოფთქუათინ, თიშა მუთ ჭეშმარიტება რე (ფსალმ. 45:1).

14, 15. ა) მუშენ ოკო ვა მოშკურდან დემონეფშა? ბ) მუშენ შემლებნა ბჯერდან, ნამდა იეჰოვა იცვენს მუშ ხალხის?

¹⁴ ვა გაშკურნან დემონეფშა. ამდღარ ქიანას შილებე მუდგარენ გლახაქ ქუმაღოლან, მაგალთო ავარიაქ, ლახალაქ ვარდა ვეველუთინ თეშ დობღურათ. მარა ვეფიფქრათ ოკო, ნამდა თეშ უკახალე დემონეფ გერენა. ბიბლია იჩიებ, ნამდა „დრო დო შემთხვევაქ“ შილებე არძაწკუმა იმოქმედას (ეკლ. 9:11). იეჰოვა დემონეფშე ბრელით უმოს ძალიერ რე. მაგალთო თიქ სატანას ვემეჩ საშვალება, დოჸვილკო იობი (იობ. 2:6). მოსეშ დროს იეჰოვაქ ქაძირუ, ნამდა თის ბრელით უმოს ძალა უღუდ, ვინემ ეგვიპტეშ მღვდელმთავრეფს, მით მაგიას მეჸუნდჷ (გამ. 8:18; 9:11). იეჰოვაშ ძალათ განდიდებულ იესოქ ქაძირუ მუშ ძალიერება, მუჟამსით სატანა დო დემონეფ ზეცაშე გექთარღვჷ. მალას იესო თინეფს უფსკრულს ქინარღვანს დო მეტო ვეშიალებენა ქეცილან ხალხის (გამოცხ. 12:9; 20:2, 3).

¹⁵ ამდღა თიშ ბრელ მტკიცებულება მიღნა, ნამდა იეჰოვა იცვენს მუშ ხალხის. დეფიფქრათ: ჩქი ფქადაგენთ დო ვოგურუანთ ჭეშმარიტებას დედამიწაშ არძა კუნთხუს (მათ. 28:19, 20). შედეგო, სატანაშ უბადო საქმეეფს ვაარგამენთ. მუშო ოკო რაგად, ძალა ქოუღდასინ, თინა შეაჩერენდ ჩქინ საქმეს, მარა თეშ კეთება ვეშულებ. თაშ ნამდა, მუთუნნერ მიზეზ ვამღუნა, მოშკურდან დემონეფიშ. მუჭოთ მიჩქნა „იეჰოვაშ თოლეფ ოკვირ მთელ დედამიწას, ნამდა მუშ ძალათ ქიმეხვარას თინეფს, მით მთელ გურით რენა თიწკუმა“ (2 მატ. 16:9). იეჰოვაშ ართგურეფ ქუვორეთ-და, დემონეფს ვეშიალებენა თიცალ ზიან ქუმმორინუან, ნამუშ გიშასწორება ვეშიალებე ღორონც.

16, 17. მუშენ რე საჭირო გაბედულება, ნამდა ქივეწინააღმდეგათ დემონეფს? ქიმიჸონით მაგალით.

¹⁶ გაბედულება მოსაჭირნა, ქივეწინააღმდეგათ დემონეფს, განსაკუთრებულო თიმწკუმა, მუჟამსით ნათესეფ ვარდა მეგობრეფ მოწინააღმდეგნა. თე დროს თინეფ ფიქრენა, ნამდა თინეფცალო ვემიფქცით-და, მუდგარენ გლახა ქუმაღოლენა. მარა იეჰოვა აკურთხენს თინეფს, მით გაბედულებას გიმირჩქინანს. ქობძირათ ართ დაშ, ერიკაშ მაგალით, ნამუთ განას ცხოვრენს. თინა 21 წანერ რდუ, მუჟამსით ბიბლიაშ გურაფა დიჭყჷ. თიშ მუმა მღვდელ რდუ დო მაგიაწკუმა უღუდ კავშირ. ათეშენ ერიკას თხინდეს მონაწილება მიღკო თიცალ წეს-ჩვეულებას, ნამდგაშა ღორონთეფშა შეწირულ ხორციშ ჭკუმუა მიშეშ. მუჟამსით ერიკაქ ვარია ქოთქუ თეშ კეთებაშე, თიშ ოჯახიქ იფიქრჷ, ნამდა თეთ ღორონთეფს ოწყინებაფეს. ერიკაშ ოჯახიშ წევრეფს ჯერდეს, ნამდა ღორონთეფ დასაჯენდეს დო მუდგაინ ლახალა ქაღოლედეს.

¹⁷ თინეფ ოცადდეს ძალით მიოღებაფესკო თე წეს-ჩვეულებაშა მონაწილება. მართალ რე, ერიკას უჩქუდ, ნამდა ჸუდეშე აჸიდ გინაულარ, მარა მტკიცაშო აფუდ გინოჭყვიდილ, მიქცუკო ღორონთიშ მოსაწონო. ერიკა მუსხირენ მოწმექ მუშ ჸუჩა მიღჷ. თაშ ნამდა, იეჰოვაქ აკურთხჷ თინა ახალ ოჯახით — თანამორწმუნეეფით, მით თის და დო ჯიმალეფცალო ოქცუდეს (მარ. 10:29, 30). მართალ რე, ნათესეფქ ჸუდეშე გეგნაჸათეს ერიკა დო თიშ არძა ნივთი დოჭვეს, მარა თიქ ვა უღალატ იეჰოვას, დინათ დო ამდღა პიონერო მსახურენს. ერიკას ვაშკურ დემონეფშა. მუშ ოჯახიშ წევრეფშენ თინა იჩიებ: „ირ დღას ბლოცულენქ, ნამდა გეჩინებაფუან იეჰოვა დო გეხარან თავისუფლებათ, ნამუთ ჩქინ მოჸოროფე ღორონთიშ მსახურებას მოჸუნს“.

18. მუ კურთხევეფს მომღანა იეჰოვაშა მენდება?

¹⁸ შილებე არძას ვა მაჸუან გიორინალ თეცალ გამოცდაშ წოხოლე. მარა არძას მოსაჭირნა ქივეწინააღმდეგათ დემონეფს დო მივენდათ იეჰოვას. თეცალ საქციელით ბრელ კურთხევას მიბღენთ დო სატანას საშვალებას ვემეფჩანთ შეცდომაშა გემშამიჸონან. თეს გეძინელ, ვამაღვენუნა დემონეფიშ შიშ დო ვემვოტალენთ მსახურებას. თე ირფელწკუმა ართო, იეჰოვაწკუმა ჩქინ მეგობრობა ხოლო გემანგარებ. მოციქულ იაკობიქ ჭარჷ: „დემორჩილით ღორონც, ქეწინააღმდეგით ეშმაკის დო თინა ინტებ თქვანდე. დეახლოვით ღორონც დო თინა ხოლო დეგეახლოვებნა“ (იაკ. 4:7, 8).