1, 2. ა) მუჭო ოჩილითუანს სატანა ხალხის? ბ) მუს გუვარჩიენთ თე სტატიას?

სატანას, ნამუთ „ტყურაშ მუმა რე“, ირიათო შეცდომაშა მიშაჸუნდჷ კაცობრიობა (იოან. 8:44). მაგალთო თინა, ტყურა გურაფეფს ავრცელენს ღურა დო ღურაშ უკულიან მდგომარეობაშე. შედეგო, თე გურაფეფშა რე გერსხილ ბრელ წეს-ჩვეულება. ათეშენ და დო ჯიმალეფს უხვადუნა ბრძოლა, ნამდა დეცვან რწმენა, მუჟამსით ოჯახიშ წევრ ვარდა ხოლოშიან პიროვნება უღურნა (იუდ. 3).

² მუ მიგეხვარებნა, მიქცუათ სწორაშო, მუჟამსით თეცალ სიტუაციას შეხვადუთ? (ეფეს. 6:11). მუჭო შეილებნა გურშა ელუკინათ თანაქრისტიანს, მიდგას თეცალ პრობლემა უღჷ? თე სტატიას გუვარჩიენთ მითითებეფს, ნამუთ მიმეხვარებნა თეცალ სიტუაციეფიშ დროს. მორთ, პირველ რიგის გუვარჩუათ, მუს იჩიებ ბიბლია ღურაშე.

3. მუ შედეგიქ მაჸუნ პირველ ტყურას?

³ ღორონთის ვაკოდ ადამიანეფქ დოღურესკო. მარადიულო ქიცხოვრესკონ, ადამ დო ევაქ ოკო დემორჩილესკო იეჰოვაშ მარტივ მითითებას: „ჯგირ დო ფურიშ ჩინებაშ ჯაშე ვაჭკუმა, მუშენდა მუ დღას ოჭკუმუნქინ, თიმ დღას დოღურუქ“ (დაბ. 2:16, 17). მარა სატანაქ გვერიშ საშვალებათ ევას უწუ: „ვარ, ვა ღურუთ“. სანარღოთ, ევაქ ქიდეჯერ თე ტყურა დო ოჭკუმ აკრძალულ ნაყოფ. უმოს გვიანო ადამქ ხოლო თაშ მიქცუ (დაბ. 3:4, 6). თეგვარო, ცოდა დო ღურაქ გეგნადვჷ (რომ. 5:12).

4, 5. მუჭო აგრძელენს სატანა ხალხიშ ღორებას?

⁴ საბოლათ ადამ დო ევაქ დოღურეს, მუჭოთ თენა ღორონც აფუდ რაგადებულ. მარა სატანას თეთ ვემუტებ ტყურაშ რაგად.  უმოს გვიანო, თიქ შხვა ტყურეფ ხოლო გავრცელ. ართ-ართ თეცალ ტყურა რე, ნამდა ითამ ღურაშ უკულ შურ აგრძელენს სიცოცხლეს. თეცალ ტყურეფს მილიარდობით კოჩ იჯერენს (1 ტიმ. 4:1).

⁵ მუშენ იჯერენს ბრელ სატანაშ ტყურას? სატანას უჩქჷ, მუჭო გენიფცადენთ ღურას, ათეშენ თეს ჩქინ მიოჩილითაფარო გიმირინუანს. მითინს ვამკონა ღურა, მუშენდა მარადიულ სიცოცხლეშო ვორდით გოჭყაფილ (ეკლ. 3:11). მარა ღურაქ ჩქინ ნტერო გინირთჷ (1 კორ. 15:26).

6, 7. ა) ქეშიალებუო სატანას დოფულკო სიმართლე ღურელეფიშ მდგომარეობაშ გურშენ? გენწყით. ბ) მუჭო მოხვარნა ბიბლიურ ჭეშმარიტება, ვამღუდან ღურელეფიშ შიშ?

⁶ სატანაშ მონდომაშ უმკუჯინუო, სიმართლექ ღურელეფიშ მდგომარეობაშ გურშენ იშენით ვეფულ. სინამდვილეს ამდღა ბრელ გებულენს დო შხვეფს ხოლო გინოჩანს, მუს ოგურუანს ბიბლია ღურელეფიშ მდგომარეობაშ გურშენ დო თი იმენდშენ, ნამუთ თინეფშო არსებენს (ეკლ. 9:5, 10; საქ. 24:15). თეშ გაგება გურშა ელამკინანა დო მანთავისუფლენა შიშშე დო გაურკვევლობაშე. მაგალთო, მიჩქნა, ნამდა ღურაშ უკულ ჩქინ საჸოროფო კათას მუთუნ საფრთხე ველჷ; ვართ თიშ შიშ მიღნა, ნამდა ქიმეცილებნა, მუშენდა თინეფ ცოცხალ ვა რენა დო ლურიშ მდგომარეობას რენა (იოან. 11:11—14). ჩქი თინა ხოლო მიჩქნა, ნამდა ღურელეფ დროშ მიკულას ვა გინაფლენა. ათეშენ გათელებაშ დროს, თინეფს ხოლო, მით საუკუნეეფიშ ნაღურა რენა, მიორჩქუდან იჸი, ნამდა მუნეფიშ ღურაშ უკულ ჭიჭე დროქ მიკორთ.

⁷ მუშო ოკო რაგად, არგამა რე, ნამდა ჭეშმარიტება ღურელეფიშ მდგომარეობაშ გურშენ გასაგებ, უბრალო დო ლოგიკურ რე. თინა მანგარო გენესხვავებ სატანაშ ტყურეფშე, ნამდგას ხალხი ხვალე შეცდომაშა ვამშაჸუნსინ, ჩქინ გუმაჭყაფალ ღორონც ხოლო შეურაცხყოფას მიორინუანს. თე სტატიას გუვარჩიენთ სუმ კითხვას, ნამუთ მიმეხვარებნა უჯგუშო ქიგებგათ, მუ ზიან მოუღ სატანაშ ტყურეფს. თე კითხვეფ რე: მუჭო გედვანს ბრალს იეჰოვას სატანაშ ტყურეფ? მუჭო ოფიქრებაფუანს თიშ ტყურეფ ხალხის, ნამდა იესოშ გიშაჸიდირალ მნიშვნელოვან ვა რე? მუჭო უნწყუნს ხეს თე ტყურეფ, ხოლო უმოსო იტანჯას კაცობრიობაქ?

8. მუჭოთ იერემიაშ 19:5-შე იძირე, მუჭო მიორინუანს შეურაცხყოფას სატანაშ ტყურეფ იეჰოვას?

⁸ სატანაშ ტყურეფ ღურელეფიშ მდგომარეობაშ გურშენ შეურაცხყოფას მიორინუანს იეჰოვას. თეშა მიშურს ტყურა გურაფა, ნამდა ღურაშ უკულ კოჩ დაჩხირს მარადიულო  იტანჯებ. თეცალ გურაფეფ შეურაცხყოფას მიორინუანს ღორონც, მუშენდა ხალხის ოჯერუანს, ნამდა მოჸოროფე ღორონთ სატანაცალ უბადო რე (1 იოან. 4:8). თქვა მუს ფიქრენთ? დო მუთ არძაშ უმოს მნიშვნელოვან რე, იეჰოვა მუჭო უჯინე თე საკითხის? მუშო ოკო რაგად, თის ჯოგჷ ირნერ უბადობა (წეკითხით იერემია 19:5).

9. მუჭო უდინუანს ძალას სატანაშ ტყურეფ ქრისტეშ გიშაჸიდირალს, ნამუთ ეჭარილ რე იოანეშ 3:16-ს დო 15:13-ს?

⁹ ღურელეფიშ მდგომარეობაშ გურშენ სატანაშ ტყურეფ, ხალხის ოფიქრებაფუანს, ნამდა იესოშ გიშაჸიდირალ ვა რე მნიშვნელოვან (მათ. 20:28). სატანაშ ხოლო ართ ტყურა თინა რე, ნამდა კოჩის უღურალ შურ უღჷ. მარა თენა თაშ ქორენ-და, არძას მარადიულ სიცოცხლე აღვენუდ დო იესოშ ღურა ხოლო ვეჸუაფუდ საჭირო, ნამუქით მუშ სიცოცხლე გაწირ, ნამდა მარადიულო იფცხოვრითკო. ვაგგოჭყორდან, ნამდა იესოშ შეწირუათ, იეჰოვაქ არძაშ უდიდაშ ჸოროფა გიმირჩქინ კაცობრიობაშა (წეკითხით იოანე 3:16; 15:13). წერმიდგინით, მუჭო გინაფლენა დუც იეჰოვა დო მუშ სქუა თი გურაფეფიშ გურშენ, ნამუთ თე ძვირფას საჩუქარს ძალას უდინუანს.

10. მუჭო გეუძინანს სატანაშ ტყურეფ ხალხის ოწუხებელს?

¹⁰ სატანაშ ტყურეფს ხოლო უმოს ტანჯება მოუღ კაცობრიობაშო. მშობლეფს, მიდგას ჭიჭე ბაღანა აფნა ღურელ, შილებე ურაგადუდან, ნამდა თინეფიშ ბაღანა ღორონთიქ მიდეჸონ დო ასე ზეცას ანგელოზ რე. გურშა ეუქექუანსო თინეფს თეცალ ტყურა დო ვარ ხოლო უმოსო ქელაჭუნას გურს? ჯოჯოხეთიშ გურშენ ტყურა გურაფა ამართლენს წამებაშ მეთოდეფს, თეწკუმა ართო თი ხალხიშ ბოძის ჭუალას, მით ოწინააღმდეგუდ ეკლესიურ გურაფეფს. ართ წიგნიშ მიხედვით, ნამუთ ესპანეთიშ ინკვიზიციას ოხუ, ნამთინე პიროვნება, ნამუთ პასუხიშმგებელ რდუ თე უბადობაშე, შილებე ფიქრენდკო, ნამდა თეცალ საქციელით ერეტიკოსეფს ოძირანდეს, „მუნერ წამება ელდეს ჯოჯოხეთის“; თინეფიშ აზრით, თეს თიშ გურშენ ორთუდეს, ნამდა ღურაშახ მინანისკო დო ჯოჯოხეთის ვა მოხვადესკო. ბრელ ქიანას ხალხი მუნეფიშ ღურელ წინაპრეფს პატის დო თაყვანს ცენს დო იმენდ უღჷ, ნამდა ქიმეხვარებნა. ნამთინე მუშ ღურელ წინაპრეფს თიშენ ცენს თაყვანს, ნამდა დუდ ეუჩილითუას დასაჯებას. სანარღოთ, სატანაშ გურაფეფ გურშა ვეუქექუანს ხალხის. პირიქით, უმოს ოწუხებელს ურჩქინანს დო შიშის ინაჸათანს თინეფს.

11. მუჭო შილებე ეცადან ნათესეფქ ვარდა მეგობრეფქ, გინმორთაფუან ღორონთიშ სიტყვაშა?

¹¹ ღორონთიშ დო თიშ სიტყვაშ ჸოროფა მიმეხვარებნა დევემორჩილათ იეჰოვას, მუჟამსით ნათესეფ ვარდა მეგობრეფ ოცადნა მონაწილება მიმოღებაფუან ღურელეფიშ პატიშოცემებელ თიცალ წეს-ჩვეულებეფშა, ნამუთ ოწინააღმდეგ ბიბლიურ გურაფეფს. შილებე მირაგადდან, ნამდა ვა მიოჸორა ვარდა პატის ვა ფცენთჷ ღურელეფს დო თეთ ონჯღორე დომგურინუან. ვარდა დუმოშკურინუან თიცალ რაგადით, ითამ ჩქინ საქციელიშ გურშენ, ღურელ ზიანს ქიმმორინუანა. მუჭო შემლებნა თეცალ დროს ხუჯ დუკინათ ბიბლიურ ჭეშმარიტებას? მორთ, გუვარჩუათ, მუჭო შემლებნა თუდო მოჩამილ ბიბლიურ პრინციპეფიშ გიმორნაფა.

12. ნამ წეს-ჩვეულებეფ ოწინააღმდეგ ბიბლიას?

¹² გინოჭყვიდილ გაფდან დუდ ეუჩილითუათ ბიბლიურ ვა რენ ფერ წეს-ჩვეულებეფს (2 კორ. 6:17). კარიბიშ ზღვაშ კუნძულეფს მახორუ ხალხიშ უმენტაშის ჯერსჷ, ნამდა ღურაშ უკულ, თიშ შურქ შილებე ქიდოსკიდას დო დასაჯას თინეფ, მით ჯგირო ვაქცუდ თის. ართ-ართ წყარო იჩიებ, ნამდა ღურელიშ შურქ შილებე საზოგადოებას ხოლო ქუმუღას პრობლემეფ. აფრიკას გავრცელებურ რე თიცალ წეს-ჩვეულება, ნამდა  ღურელიშ ჸუდეს სარკეეფი ოკო დოფორან დო სურათეფ კიდალაჸურე მიკართინუან, მუშენდა ნამთინეშ აზრით, ღურელქ მუშ დუდ ოკო ვა ძირას. ჩქი იეჰოვაშ მსახურეფ ვორეთ, ათეშენ ვართ ბწანა დო ვართ მუთუნნერ მონაწილებას ბღებულენთ თიცალ წეს-ჩვეულებეფს, ნამუთ ხუც უკინენს სატანაშ ტყურეფს (1 კორ. 10:21, 22).

13. იაკობიშ 1:5-ის ინოჭარილ სიტყვეფიშ თანახმათ, მუჭო ოკო მიქცუათ, მუჟამსით ვა რეთ დარწმუნებულ, ნამთინე წეს-ჩვეულება ოწინააღმდეგ დო ვარ ბიბლიას?

¹³ მუჟამსით ვა რეთ დარწმუნებულ, ოწინააღმდეგ დო ვარ ნამთინე წეს-ჩვეულება ბიბლიურ გურაფას, ქოთხით იეჰოვას ლოცვას, ქიმერჩან სიბრძნე (წეკითხით იაკობი 1:5). თეშ უკულ გეგმირკვით თე საკითხ ჩქინ პუბლიკაციეფს. აუცილებერ ქორენ-და, ქელაკითხეთ რჩევა თქვან კრებაშ უხუცესეფს. თინეფ თქვან მანგიორო ვემიღენა გადაწყვეტილებას, მუჭო ოკო მიქცუათ, მარა ქუგოძირანა ბიბლიურ პრინციპეფს, ნამუთ თე სტატიას რე გარჩიებულ. თე ირფელიშ გათვალისწინება მიგეხვარებნა გაწაფათ აღქმაშ უნარ დო გეგშაგორათ ართიანშე ჯგირ დო ფურ (ებრ. 5:14).

14. მუჭო ოკო მიფქცუათ, ნამდა ვადვაბრკოლათ შხვეფ?

¹⁴ ირფელ ღორონთიშ ოდიდებელო აკეთით. ვა დაბრკოლათ მითინ (1 კორ. 10:31, 32). მუჟამსით ფიქრენთ, მიღათ დო ვარ მონაწილება ნამდგაინ წეს-ჩვეულებას, მნიშვნელოვან რე გეთვალისწინათ შხვეფიშ სინდის, განსაკუთრებულო თანაქრისტიანეფიშ. ჩქი ვა მოკონა დუვაბრკოლათ თინეფ (მარ. 9:42). თეწკუმა ართო ვა მოკონა ჩქინ საქციელით ვოწყინებაფუათ თინეფ, მით ვა რენა იეჰოვაშ მოწმეეფ. ჸოროფა მიმეხვარებნა პატიცემათ დურაგადუათ თინეფს, მუთ განადიდენს იეჰოვას. ჩქი დღას ოკო ვევეჩხუპათ შხვეფს დო ვაგვაძიცუათ თინეფიშ ტრადიციეფს. რშუდან, ჸოროფას დიდ ძალა უღჷ. თიშ გიმორჩქინათ დო პატიცემათ შემლებნა თინეფიშ გურ მიბგათ, მით მოწინააღმდეგნა.

15, 16. ა) მუშენ რე გონივრულ უჩქდან შხვეფს ჩქინ რწმენაშ გურშენ? ქიმიჸონით მაგალით. ბ) მუჭო შემლებნა რომაელეფიშ 1:16-ის ინოჭარილ პავლე მოციქულიშ სიტყვეფიშ გათვალისწინება?

¹⁵ ქუგაგებაფეთ შხვეფს, ნამდა იეჰოვაშ მოწმე რეთ (ეს. 43:10). რთულ სიტუაციეფს უჯგუშო მერიებუთ, მუჟამსით თქვან ნათესეფს დო მშობლეფს არჩქვენუნა, იეჰოვაშ მოწმე რეთ. ფრანცისკო, ნამუთ მოზამბიკის ცხოვრენს, იჩიებ: „მუჟამსით მა დო ჩქიმ მეუღლექ, კაროლინაქ ჭეშმარიტება ქიგებგით, ოჯახიშ წევრეფს ვუწით, ნამდა ღურელეფს ვა ფცენდით თაყვანს. კაროლინას  დაქ დუღურუნ, გამოცდაშ წოხოლე ქიგებდირთით. ადგილობრივ ტრადიციათ, ღურელს ბონნა; თეშ უკულ არძაშ უხოლაშ ნათესექ სუმ სერს ოკო დირულუას თი ადგილს, სოდეთ ღურელიშ ნაბონა წყარ დაბეს. თე წეს-ჩვეულებეფით ღურელიშ შურს ცენა პატის. ოჯახიშ წევრეფ კაროლინაშე ითხინდეს, მონაწილება მიღკო თე წეს-ჩვეულებას“.

¹⁶ მუჭო მიქცუეს ფრანცისკო დო თიშ მეუღლექ? ფრანცისკო იჩიებ: „ჩქი მიჸორა იეჰოვა დო მოკონა ვასიამოვნათ თის, ათეშენ თე ტრადიციას ვემიბღით მონაწილება. კაროლინაშ ოჯახიშ წევრეფს მანგარო მოურთეს გურქ. თინეფ ღურელიშ უპატიცემულობას მაბრალენდეს დო მიწუეს, ნამდა დღას ვამძირუანდეს დო ვართ მიმეხვარებდეს. დუდშე ნარაგად მაფდეს თინეფწკუმა ჩქინ რწმენაშ გურშენ, მარა სოიშახ გურ აფდეს მოულირ, თე საკითხიშ გურშენ ვამჩიებინნა. ნამთინე ნათესექ ქიგნმოდირთეს დო თქუეს, ნამდა თე საკითხიშ გურშენ ჩქინ პოზიცია თეიშახ მაფდეს ენწყუმილ. დრო ხანიშ უკულ, კაროლინაშ ნათესეფქ დემშვიდეს დო ჩქი კინ გებრიგით. მუსხირენ ნათესექ ქუმმაკითხუეს დო ბიბლიურ ლიტერატურა ხოლო ქოფთხუეს“. თაშ ნამდა, მორთ, დღას ვადმაგურან ონჯღორექ, ქიდებკინათ ჭეშმარიტებაშ მხარე (წეკითხით რომაელები 1:16).

17. მუ მიმეხვარებნა ირნერო ქელუდირათ თანაქრისტიანს, მიდგას საჸოროფო პიროვნება აფჷ ღურელ?

¹⁷ მუჟამსით თანაქრისტიანს საჸოროფო პიროვნება უღურუ, ჩქი ოკო ვეცადათ თიშო ნამდვილ მეგობარ ვორდათ, მუნერით მოშინაფილ რე იგავეფიშ 17:17-ის. მუჭო შემლებნა ირნერო ქელუდირთათ თანაქრისტიანს, ნამდგაშ ნათესეფ ოცადნა მონაწილება მიოღებაფუან თიცალ წეს-ჩვეულებეფშა, ნამუთ ოწინააღმდეგ ბიბლიას? გუვარჩუათ ჟირ ბიბლიურ პრინციპ, ნამუთ მიმეხვარებნა გურშა ეუქექუათ თეცალ პიროვნებეფს.

18. მუშენ ელაუნ ჩილამურქ იესოს დო მუს ბგურაფლენთ თიშ მაგალითშე?

¹⁸ „მანგარალეფწკუმა ინგარით“  (რომ. 12:15). შილებე გამჭირდან ორაგადე სიტყვეფიშ გორუაქ დო მუთუნქ ვამათქუან თიშა, მიდგას საჸოროფო პიროვნება აფჷ ღურელ. მინშა ჩილამურეფს უმოსიშ რაგად შეულებ, ვინემ სიტყვეფს. მუჟამსით იესოშ მგეობარქ  ლაზარექ დოღურ, მარიამ, მართა დო შხვეფ ინგარდეს მუნეფიშ ჯიმაშ დო მეგობარიშ ღურაშენ. ოთხ დღაშ უკულ, მუჟამსით იესოქ ქიმერთჷ თინეფშა, თის ხოლო ჩილამურქ ქელაჸუნ, თიშ უმკუჯინუო, ნამდა ლაზარეშ გათელება ულამუდ (იოან. 11:17, 33—35). იესოშ ჩილამურეფშე იძირედ, მუს გინაფლენდჷ იეჰოვა ლაზარეშ ღურაშ გურშენ. თავრეშე თინა ხოლო იძირედ, ნამდა იესოს უჸორდჷ თინეფიშ ოჯახ, მუთ გურშა ეუქექუანდჷ მარიამ დო მართას. თეგვარო, მუჟამსით ჩქინ და დო ჯიმალეფ ორწყენა ჸოროფას დო ელარნას, თინეფ ხვალახეთ ვა გინაფლენა დუც დო უჩქნა, ნამდა თინეფიშ გვერდით ნამდვილ მეგობრეფ რენა.

19. მუჭო შეილებნა ეკლესიასტეშ 3:7-იშ გიმორნაფა, მუჟამსით გოკონა გურშა ელუკინათ თანაქრისტიანს?

¹⁹ „რაგადიშ დრო დო ხონარ ვეკიღენ თიშ დრო“ (ეკლ. 3:7). ხოლო ართ საშვალება გურშა ევუქექუათ თანაქრისტიანს თინა რე, ნამდა ვორდათ ჯგირ მარჩქილე. საშვალება ქიმეჩით და დო ჯიმალეფს ქიგეჩუან ირფელ, მუთ გურს უღნა დო ვეგეწყინან თინეფიშ უდუფქრებუო ნარაგადიქ (იობ. 6:2, 3). თინეფს შილებე იეჰოვაშ მოწმე ვა რენან ფერ ნათესეფშე ზეწოლა უღდან, ათეშენ ემოციურ სტრესიშ თუდო რდან. ქილოცით თინეფწკუმა ართო. ქეხვეწით „ლოცვეფიშ მარჩქილეს“, ქიმეჩას ძალა დო საღ აზროვნებაშ უნარ (ფსალმ. 65:2). მდგომარეობა საშვალებას ქირზენს-და, წეკითხით ართო ბიბლია ვარდა შესაფერის სტატია ჩქინ პუბლიკაციეფშე, მაგალთო გურიშ ემაკინალ ბიოგრაფია.

20. მუს გუვარჩიენთ თეშ უკულიან სტატიას?

²⁰ მუშმადიდა პატი რე სიმართლეშ რჩქინა დიდებულ მომავალიშ გურშენ, ნამუთ ღურელეფს ელჷ (იოან. 5:28, 29). თაშ ნამდა, მორთ, სიტყვათ დო საქმეთ, გაბედულო ქიგებდირთათ ბიბლიურ ჭეშმარიტებაშ მხარეს დო გეგმიბრინუათ არძანერ საშვალება, შხვეფს ხოლო გეგნოფჩათ თინა. თეშ უკულიან სტატიას გარჩიებულ იჸუაფ, მუჭო ოცად სატანა შეცდომაშა გემშიჸონას ხალხი სპირიტიზმიშ საშვალებათ. ქობძირუნთ, მუშენ ოკო ევუჩილითუათ დუდ თიცალ საქმეეფს დო გართობას, ნამუთ სატანაშ მახე რე.