1. გიმორკვიებაშ მუნერ მეთოდ უღდეს ჯიმა რასელ დო თიშ თანამოაზრეეფს დო მუშენ რდუ თე მეთოდ ჯგირ?

საუკუნეშე მეტ ხანიშ წოხოლე, ჯიმა რასელ დო თიშ თანამოაზრეეფქ, ბიბლიაშ მარკვიებელეფიშ ჭიჭე ჯგუფიქ, ართო შეხვალამა ქიდიჭყეს. თინეფს ოკოდეს ქოძირესკო, ქიგეგენდეს დო ვარ მუს ოგურუანს ბიბლია სინამდვილეს იეჰოვა ღორონთიშ, იესო ქრისტეშ, ღურელეფიშ მდგომარეობაშ დო გიშაჸიდირალიშ გურშენ. თინეფს გიმორკვიებაშ მარტივ მეთოდ უღდეს. მაგალთო, ნამდგაინ ქუდასვენდჷ კითხვას დო უკულ თე ჯგუფ გიმირკვიენდჷ თე საკითხწკუმა დაკავშირებულ არძა ბიბლიურ მუხლის. ბოლოს თინეფ ჭარუნდეს თის, მუდგას გიმორკვიებაშ შედეგო გებულენდეს. იეჰოვაშ მოხვარათ თე ქომოლკოჩეფქ ბიბლიაშე ბრელ ძირითად ჭეშმარიტება გეგეს, ნამუთ ამდღა ხოლო მნიშვნელოვან რე ჩქინო.

2. მუშენ შილებე მინშა არასწორ დასკვნა გეგშებღათ ბიბლიურ წინასწარმეტყველებაშ გიმორკვიებაშ დროს?

² მარა, მალას ბიბლიაშ მარკვიებელეფქ ქიმეხვადეს, ნამდა ბრელით უმოს რთულ რე, სწორას ქიმეხვადე ბიბლიურ წინასწარმეტყველებაშ მნიშვნელობას, ვინემ ქინანჭე ძირითად ბიბლიურ გურაფეფს. მუშენ რე თენა თაშ? ართ მიზეზ თინა რე, ნამდა ხშირას ბიბლიურ წინასწარმეტყველებაშ მნიშვნელობას თიშ შესრულებაშ პროცესის ვარდა შესრულებაშ უკულ ინვანჭუთ ბოლოშახ. არსებენს ხოლო შხვა მიზეზ. წინასწარმეტყველებაშ მნიშვნელობა სწორაშე ქიგებგათინ, კონტექსტ ოკო გეფთვალისწინათ. მუჟამსით წინასწარმეტყველებაშ ხვალე ართ მხარეს ვაქციენთ ყურადღებას დო დანარჩენეფს ვეფთვალისწინენთ, შილებე არასწორ დასკვნა გეგშებღათ. მუჭოთ იძირენ, ზუსტას თაშ მოხვად იოელიშ წიგნის ენოჭარილ წინასწარმეტყველებაშ შემთხვევას ხოლო. მორთ ხოლო ართშა ქიგნვოჯინათ თის დო გუვარჩუათ, მუშენ იჸუ საჭიროქ თე წინასწარმეტყველებაშ ჯვეშობურ გაგებაშ თირუაქ.

3, 4. მუჭო მარჩქილედეს ამდღარშახ იოელიშ 2:7—9-ს ენოჭარილ წინასწარმეტყველება?

 ³ წეკითხით იოელი 2:7—9. იოელ წინასწარმეტყველენს, ნამდა კოლეფ განადგურენა ისრაელიშ დიხას. თე მწერეფ, ლომს უღუნ ფერ კიბირეფით დო მარჭვათ, გეგნოჭკუმნა ირფელს! (იოელ. 1:4, 6). ბრელ წანას მიმორჩქუდეს, ნამდა თე წინასწარმეტყველება სიმბოლურო ეჭარუნდჷ იეჰოვაშ ხალხის, მით ვეგიჩერებენ ფერ კოლეფიშ ჯარცალო, შეასრულენდეს ქადაგებაშ საქმეს. ჩქი მიმორჩქუდეს, ნამდა თე საქმე გუმანადგურებელ ­შედეგეფს მოუღანდჷ „დიხას“, შხვა სიტყვეფით ქოფთქუათინ თი ხალხის, მით რე­ლიგიურ წინამძღოლეფიშ გავლენაშ თუდო რენა. *

⁴ თენა წინასწარმეტყველებაშ სწორ ენწყუმა იჸუაფუდ, ხვალე იოელიშ 2:7—9-ს წებკითხენდით-და. მარა, კონტექსტის სრულას გეფთვალისწინენთ-და, ქობძირუნთ, ნამდა თის გვალო შხვანერ ენწყუმა უღჷ. მორთ თეშ ოთხ მიზეზ გუვარჩუათ.

5, 6. მუ კითხვა წიმიჭკირუ, მუჟამსით ბკითხულენთ ა) იოელიშ 2:20-ის? ბ) იოელიშ 2:25-ის?

⁵ პირველ რიგის, ქიდვეკვირათ მუს იჩიებ იეჰოვა კოლეფიშ გურშენ: „ჩაითხინუანთ ჩრდილოელს [კოლეფს]“ (იოელ. 2:20). იეჰოვაშ მოწმეეფ, მით იესოშ მითითებას ომორჩილნა ქადაგება დო მოწაფეეფიშ მომზადებაშ გურშენ, თე კოლეფ ქორენან-და, მუშენ თქუანდჷ იეჰოვა, ნამდა მაშორენდჷ თინეფს? (ეზეკ. 33:7—9; მათ. 28:19, 20). არგამა რე, იეჰოვა მუშ ართგურ მსახურეფს ვარინ, თი მუდგარენს ვარდა მიდგარენს ჩაუთხინუანს მუშ ხალხის, მით ონტერ თინეფს.

⁶ მაჟია მიზეზ ენოჭარ იოელიშ 2:25-ის, სოდეთ იეჰოვა იჩიებ: „კინ დოირთინუანთ თი წანეფიშ მოსავალს, მუთ ჩქიმ მოშქუმალირ დიდ ჯარქ, გუნდ-გუნდო მოულირ, ფსუა ვა უღუნ ფერ, ურძღაფელა დო ირფელს გინოჭკუმუნსინ ფერ კოლეფქ გაიჩანაგეს“. ქიდვეკვირათ, იეჰოვა იჩიებ, ნამდა კინ დურთინუანს თი ზარალს, ნამუთ კოლეფქ მიღეს. თე კოლეფ იეჰოვაშ ხალხიშ სიმბოლო ქორენან-და, მუშენ მოუღ თინეფიშ გაცხადებულ ცნობას ზარალ? სინამდვილეს, თე ცნობა სიცოცხლეშ მუმაღალარ რე, ნამდგას შეულებ მონანიებაშა აღძრას ნამთინე უბადო პიროვნება (ეზეკ. 33:8, 19). თენა დიდ კურთხევა რე თინეფშო!

7. მუშ გაგებას მოხვარნა იოელიშ 2:28, 29-ს ინოჭარილ სიტყვეფ „თეშ უკულ“?

⁷ წეკითხით იოელი 2:28, 29. გუვარჩუათ მასმა მიზეზ — მუჭო ივითარებ თე წინასწარმეტყველებას მოჩამილ მოვლენეფ. ქიდეკვირით მუს იჩიებ იეჰოვა: „თეშ უკულ ქიმეფჩანქ ჩქიმ შურს“; თე მოვლენა თიშ უკულ ხვადუ, მუთ კოლეფ ბოლოშა ქიმიჸუნანა მუნეფიშ საქმეს. თე კოლეფ ღორონთიშ სამეფოშ მაქადაგებელეფ ქორენან-და, მუშენ მეჩანდჷ იეჰოვა თინეფს მუშ შურს თიშ უკულ, მუთ გათენდეს ქადაგებაშ საქმეს? სინამდვილეს, იეჰოვაშ წმინდა შურიშ მოხვარაშ უმშო, თინეფს დღას ვეშიალებედეს თესხი წანას წინააღმდეგობაშ დო თხოზინიშ უმკუჯინუო გაგრძელესკო ქადაგებაშ საქმე.

8. მის ასიმბოლოენა გამოცხადებაშ 9:1—11 ეჭარილ კოლეფ? (ქოძირით სურათ გალენ გვერდის).

⁸ წეკითხით გამოცხადება 9:1—11. მორთ ასე მანთხა მიზეზ გუვარჩუათ. წოხლე ფთქვით, ნამდა კოლეფიშ ჯარ, ნამუთ იოელქ ეჭარ, ჩქინ სამქადაგებლო საქმეს ასიმბოლოენდჷ, მუშენდა თეშნერ წინასწარმეტყველებას წიგნ გამოცხადებას ხოლო შეფხვადუთ. თე წინასწარმეტყველებას ეჭარილ რე კოლეფ, ნამდგას კოჩიშ სახეეფ უღნა დო „ითამ დუდეფს ოქროშ გვირგვინეფ“ გედგუნა (გამოცხ. 9:7). თინეფ ატანჯენა „თი ხალხის, [ღორონთიშ ნტერეფს] მიდგას ჸვას ღორონთიშ  ბეჭედ“ ვა უღნა; თინეფ ხალხის ატანჯენა ხუთ თუთას, მუთ ოძირანს, საშვალოთ მუსხი ხანს ცოცხლენა კოლეფ (გამოცხ. 9:4, 5). მუჭოთ იძირენ, თე კოლეფ იეჰოვაშ ცხებულ მსახურეფს ასიმბოლოენა. თინეფ გაბედულო აცხადენა ღორონთიშ განაჩენს თე უბადო ქიანაშ წინააღმდეგ დო თინეფს, მიდგა თე ქიანაშ მხარეს რენა თენა შუროთ ვახუჯნა.

9. მუ მნიშვნელოვან განსხვავებეფ რე იოელ დო იოანეშ ეჭარილ კოლეფ შქას?

⁹ მართალ რე, გამოცხადებას დო იოელს ენოჭარილ წინასწარმეტყველებეფ ართიანს მოგენს, მარა თინეფ შქას მნიშვნელოვან განსხვავებეფ ხოლო რე. მაგალთო, იოელიშ წინასწარმეტყველებას, კოლეფ ანადგურენა მცენარეეფს (იოელ. 1:4, 6, 7). მარა იოანეშ ხილუას კოლეფს „მითითებაქ ქიმიაჩეს, ნამდა ვა უცილებდესკო . . . დედამიწაშ მცენარეეფშა“ (გამოცხ. 9:4). კოლეფქ, ნამუთ იოელქ ძირჷ, ჩრდილოეთშე მორთეს (იოელ. 2:20). მარა, იოანექ ძირუნ თი კოლეფქ, უფსკრულშე ეშართეს (გამოცხ. 9:2, 3). იოელქ ეჭარუნ თი კოლეფს იეჰოვა მაშორენს. მარა გამოცხადებას ეჭარილ კოლეფს ვა მაშორენს, თინეფს უფლებას არზენს, ბოლოშა ქიმიჸუნან მუნეფიშ საქმე. ბიბლიას მუთუნნერ მინიშნება ვა რე, ნამუთ ოძირანს, ნამდა იეჰოვაქ ვემიწონუ თინეფ (ქოძირით ჩარჩო „კოლეფიშ გურშენ წინასწარმეტყველებეფ — მნიშვნელოვან განსხვავებეფ“).

10. ქიმიჸუნით შხვა ბიბლიურ მაგალით, სოვრეშეთ იძირე, ნამდა იოელიშ დო იოანეშ ეჭარილ კოლეფ შხვადოშხვა მუდგარენს ასიმბოლოენა?

 ¹⁰ თე წინასწარმეტყველებეფ შქას მნიშვნელოვან განსხვავებეფქ თი დასკვნაშა მემჸუნეს, ნამდა თინეფს კავშირ ვა უღჷ ართიანწკუმა. თენა თის ნიშნენს, ნამდა იოელქ ეჭარუნ თი კოლეფ დო წიგნ გამოცხადებას მოჩამილ კოლეფ შხვადოშხვა მუდგარენს ასიმბოლოენა. მუჟამსით ბიბლიას სიმბოლოეფ შხვადოშხვა სიტუაციას რე გიმორნაფილ, მინშა თინეფს შხვადოშხვა მნიშვნელობა უღჷ. მაგალთო, გამოცხადებაშ 5:5-ის იესო მოშინაფილ რე, მუჭოთ: „ლომი იუდაშ ტომშე“, მარა 1 პეტრეშ 5:8-ს სატანა ეჭარილ რე, მუჭოთ: „მაღირთალ ლომი“. თი ოთხ მიზეზ, ნამუთ გუვარჩით ოძირანს, ნამდა იოელიშ წინასწარმეტყველება უმოს შხვანერო ოკო ემწყათ. მუჭო შილებე თიქ ეინწყას?

11. მუჭო მოხვარნა იოელიშ 1:6 დო 2:1, 8 დო 11, თიშ გაგებას მის ასიმბოლოენს კოლეფ?

¹¹ მუჟამსით ჯგირო გეგმიბრკვიენთ იოელიშ თე წინასწარმეტყველებაშ კონტექსტის, ქობძირუნთ, ნამდა წინასწარმეტყველ გულისხმენდჷ სამხედრო თავდასხმას (იოელ. 1:6; 2:1, 8, 11). იეჰოვაქ თქუ, ნამდა თინა გეგმირინუანდჷ მუშ „დიდ ჯარს“ (ბაბილონელ ჯარიშკოჩეფს), ნამდა დასაჯკო ისრაელეფ ურჩობაშ გურშენ (იოელ. 2:25). თე ჯარს სამართლიანო ჯოხო „ჩრდილოელ“, მუშენდა ბაბილონელეფ ჩრდილოეთშე ქიგიანთხუდეს ისრაელეფს (იოელ. 2:20). თე ჯარ შედარებულ რე ჯგირო ორგანიზებულ კოლეფიშ გუნდშა. თინეფიშ გურშენ იოელ იჩიებ: „არძა [ჯარიშკოჩ] მუშ შარათ მეურს . . . ქალაქშა მიშეჭკირუნა, ქალაქიშ კიდალას გინმირულენა, ჸუდეეფშა ეშმულა, მახირალეფცალო ოსინთურშე მინოტყობნა“ (იოელ. 2:8, 9). შეილებნანო წერმიდგინათ თე ირფელ? ირდიხას ჯარიშკოჩეფ რენა დო ოტყობინალ ადგილ სოთინ ვა რე. მითინს ვეშულებ ენტას ბაბილონელეფიშ ჯარს!

12. მუჭო შესრულ კოლეფიშ გურშენ იოელიშ წინასწარმეტყველებაქ?

¹² კოლეფცალო, ბაბილონელეფქ (ქალდეველეფქ) ჯვ. წ. 607 წანას ქიგიანთხეს იერუსალიმს. ბიბლია იჩიებ: „ქალდეველეფიშ მეფე, მიდგაქ ყამათ უჸვილ თის ქომოლსქუალეფ . . . ვა დენდჷ თიქ ვართ ბაღანაბოშ დო ვართ ცირასქუა, ვართ მოხუცებულ დო ვართ ძალაგიშალიებურ. ღორონთიქ ირფელ ხეშა ქაშუჸოთ თის. თიქ გეგნოჭვჷ ღორონთიშ ტაძარ დო აკარღვჷ იერუსალიმიშ კიდალა; დაჩხირს ქიმეჩ თიშ გამანგარებულ კოშკეფ დო განადგურ ირფელ ძვირფას“ (2 მატ. 36:17, 19). მუჟამსით ბაბილონელეფქ განადგურეს ირფელ, თეშ მიმაჯინუ ხალხ თქუანდჷ: „თე აკოპარტახელ დიხას, ნამუთ ხეშა ქეშეჸოთეს ქალდეველეფქ, კოჩიშ დო საქონელიშ სისანდობა ვა რე“ (იერ. 32:43).

13. გენწყით, მუს ნიშნენს იერემიაშ 16:16 დო 18-ს ინოჭარილ სიტყვეფ.

¹³ იოელიშ წინასწარმეტყველებაშე სოდგარენ 200 წანაშ უკულ იეჰოვაქ იერემია გეგმირინუ, ნამდა ხოლო მუდგარენ ქიწინასწარმეტყველკო იერუსალიმიშ განადგურებაშ გურშენ. თიქ თქუ, ნამდა ნტერეფ ირდიხას დოგორუნდეს თი ისრაელეფს, ნამუთ უბადობას ორთუდეს დო ტყვეთ მიდეჸონანდეს თინეფს. „ქიმუშქვანქ ბრელ მეჩხომეს — იჩიებ იეჰოვა, — დო თინეფ ჩხომცალო ოჭოფნა თე კათას; თეშ უკულ, ქიმუშქვანქ ბრელ მონადირეს დო თე კათაშე ინადირენა ირდიხას, გვალეფს, ემაღალია ადგილეფს დო კირდეეფს ხოლო . . . თინეფიშ დანაშაულიშ დო ცოდვაშ გურშენ სრულაშე გეგნვუგანქ თინეფს“. ვენანიენდესინ ფერ ისრაელეფს, ბაბილონელეფშე სოთინ ვანტებედეს (იერ. 16:16, 18).

14. მუჟამ შესრულ იოელიშ 2:28, 29-ს ინოჭარილ სიტყვეფქ?

¹⁴ იოელ ჯგირ ამბეს იჩიებ აღდგენაშ გურშენ.  თე მხარეშ დიხა კინ ნაყოფიერ იჸუაფ (იოელ. 2:23—26). უმოს გვიანო, სულიერ საზრდო ხოლო ხვეიანო იჸუაფუდ. იეჰოვა იჩიებ: „ქიმეფჩანქ ჩქიმ შურს არძა ხორციელს დო თქვან ქომოლსქუალეფ დო ოსურსქუალეფ ქიწინასწარმეტყველენა . . . თიმ დროს მოინალე კოჩეფს დო ოსურეფს ხოლო ქიმეფჩანქ ჩქიმ შურს“ (იოელ. 2:28, 29). მარა თენა ბაბილონელეფიშ ტყვეობაშე გათავისუფლებაშ უკულ ხეთეშე ვა მოხვალამე. თე მოვლენაქ საუკუნეეფიშ უკულ, ახ. წ. 33 წანაშ ჟარნეჩდომავითა დღაშ დღახუს მოხვად. სოვრეშე მიჩქნა თენა?

15. მუჭოთ საქმეეფიშ 2:16, 17-ის ჭარჷ, მუ თირუ პეტრექ, მუჟამსით იოელიშ 2:28-ს ციტირენდჷ დო მუშა მეუთითენს თენა?

¹⁵ ღორონთიშ შთაგონებათ, მოციქულ პეტრექ იოელიშ 2:28, 29-ს ინოჭარილ წინასწარმეტყველება თი სარკო მოვლენას დუკავშირ, ნამდგაქ ჟარნეჩდომავითა დღაშ დღახუს მოხვად. სოდგარენ ოჭმარეშ ჩხორო საათის, წმინდა შურქ სასწაულებრივო გეგნორთჷ ღორონთიშ მსახურეფშა, მუდგაქ აღძრჷ თინეფ, შხვადოშხვა ნინაშა ქიდიჭყესკო რაგად „ღორონთიშ დიდებულ საქმეეფიშ გურშენ“ (საქ. 2:11). მუჟამსით პეტრე ღორონთიშ შთაგონებათ იოელიშ წინასწარმეტყველებაშე ციტირენდჷ, თიქ ჭიჭეთ შხვანერ სიტყვეფ გიმირინუ. ქიდეკვირითო მუ თირუ თიქ? (წეკითხით საქმეები 2:16, 17). პეტრეს ციტირება ვა დუჭყაფ სიტყვეფით „თეშ უკულ“, თიქ თქუ: „ბოლო დღალეფს“. თე კონტექსტის ბოლო დღალეფ მეუთითენს დროშ თი პერიოდშა, სოიშახ იერუსალიმ დო თიშ ტაძარ გენადგურებუდ. თე დროს ღორონთ მუშ შურს ქიმეჩანდჷ „არძა ხორციელს“. თენა მეუთითენს, ნამდა კოლეფიშ გურშენ წინასწარმეტყველებაშ შესრულებაშ უკულ გარკვეულ დროქ გემკორთჷ, იოელიშ წინასწარმეტყველებაშ თე ნაწილიშ შესრულებაშახ.

16. მუჭო იმოქმედ ღორონთიშ წმინდა შურქ ქადაგებაშ საქმეწკუმა პირველ საუკუნეს დო მუჭო მოქმედენს ამდღა?

 ¹⁶ თიშ უკულ, მუთ პირველ საუკუნეს ღორონთიშ წმინდა შურქ სასწაულებრივო გეგნორთჷ ქრისტიანეფშა, სახიოლო ამბეშ ქადაგებაშ საქმექ ფართო მაშტაბეფს ქიმიოჭირინუ. თე დროს, სოდგარენ ახ. წ. 61 წანას, მუჟამსით პავლექ წერილ მეჭარ კოლოსელეფს, თის შეულებუდ თქუკო, ნამდა თიმწკუმა სახიოლო ამბე „ცაშ თუდო არძა გუნაჭყეფუს“ ექადაგებუდ (კოლ. 1:23). პავლეშ დროს, „არძა გუნაჭყეფ“ მეუთითენდჷ თი ხალხშა, მით თიმწკუმაიან მსოფლიოშ თი ადგილეფს ცხოვრენდეს, სოდეთ პავლეს დო შხვეფს შეულებდეს იდესკო. ამდღა, იეჰოვაშ წმინდა შურიშ მოხვარათ, ქადაგებაშ საქმე ბრელით უმოს დიდ მაშტაბით — „დედამიწაშ ძგაშე-ძგაშა“ ისრულებ (საქ. 13:47; ქოძირით ჩარჩო: «„ქიმეფჩანქ ჩქიმ შურს“ ჩქიმ მსახურეფს»).

17. მუჭო ითირ კოლეფიშ გურშენ იოელიშ წინასწარმეტყველებაშ მნიშვნელობაშ გაგებაქ?

¹⁷ მუქ ითირ? ასე უმოს ზუსტას მიჩქნა, იოელიშ 2:7—9-ს ენოჭარილ წინასწარმეტყველებაშ მნიშვნელობა. არგამა რე, თე მუხლეფ, ჩქინ დუდგინოდვალირ ქადაგებაშა ვარინ, ბაბილონელეფიშ ხეთ იერუსალიმიშ განადგურებაშა მეუთითენს, ნამდგაქ ჯვ. წ. 607 წანას მოხვად.

18. მუ ვათირე იეჰოვაშ ხალხწკუმა დაკავშირებით?

¹⁸ მუ ვათირე? იეჰოვაშ ხალხ აგრძელენს სახიოლო ამბეშ ქადაგებას ირდიხას დო ირნერ ხეშამალაფარ საშვალებათ (მათ. 24:14). ხელისუფლებაშე მუთუნნერ აკრძალვას ვეშულებ მეცილან, შევასრულათ მითითება ქადაგებაშ გურშენ. იეჰოვაშ მოხვარათ ამდღა უმოს მეტის ვორთუთ დო გაბედულო ფქადაგენთ სახიოლო ამბეს ღორონთიშ სამეფოშ გურშენ! ჩქი თანდაბლობას გიმიფრჩქინანთ დო იეჰოვას ვონდუთ, ნამდა თინა ქიმმეხვარებნა, ქინვანჭათ ბიბლიურ ჭეშმარიტებას, მუშენდა დარწმუნებულ ვორეთ, ნამდა საჭირო დროს ქუგმოგებაფუანა „ირფელს, მუთ ჭეშმარიტ რე“! (იოან. 16:13).