1. მუ რე საჭირო მეგობრულ ურთიერთობაშ გავითარებელო?

მიდგაინწკუმა მეგობრულ ურთიერთობაშ გავითარებელო მუჭოთ წესინ, საჭირო რე, თიწკუმა ხშირ ურთიერთობა გიღდან. მუჟამსით, ეჩიებუთ ართიანს, უზიარენთ ფიქრეფს დო გრძნობეფს, თქვან შქას მეგობრულ ურთიერთობა ივითარებ. მარა, მუჟამსით საქმე იესოწკუმა ჩქინ მეგობრობას ოხუ, მუსხირენ სირთულეს შეფხვადუთ. მუ რე თე სირთულეეფ?

2. მუ რე პირველ სირთულე, ნამდგას შეფხვადუთ?

² პირველ სირთულე თინა რე, ნამდა ჩქი დღას ვა შეფხვალამუთ იესოს. ბრელ ქრისტიან ხოლო, მით პირველ საუკუნეს ცხოვრენდჷ, დღას ვეშეხვალამ იესოს. თეშ უმკუჯინუო, პეტრე მოციქულქ ჭარჷ: „მართალ რე, დღას ვაიძირნა თინა, მარა იშენ გიჸორა. ვართ ასე ორწყეთ, მარა რწანა“ (1 პეტ. 1:8). თაშ ნამდა, იესოწკუმა შეხვალამაშ უმშო ხოლო შეიოლებერ რე თიწკუმა დამეგობრება.

3. მუ რე მაჟია სირთულე, ნამდგას შეფხვადუთ?

³ მაჟია სირთულე თინა რე, ნამდა ჩქი ვეშემლებნა დურაგადუათ იესოს. მუჟამსით ბლოცულენთ, პირდაპირ იეჰოვას ვეჩიებუთ. მართალ რე, ჩქი ბლოცულენთ იესოშ სახელით, მარა ლოცვაშ დროს პირადო იესოს ვა ვურაგადუთ. იესოს ხოლო ვაკო, ლოცვაშ დროს თის დურაგადუათ. მუშენ იფჩიებუთ თეს? თიშენ, ნამდა ლოცვა თაყვანიშცემაშ ართ-ართ ფორმა რე,  მუდგასით ხვალე იეჰოვა იმსახურენს (მათ. 4:10). თეშ უმკუჯინუო, ჩქი შემლებნა გიმოფხანტათ ჸოროფა იესოშ მიმართ.

4. მუ რე მასმა სირთულე დო მუს გუვარჩიენთ თე სტატიას?

⁴ მასმა სირთულე თინა რე, ნამდა იესო ზეცას რე, ათეშენ, ვეშემლებნა, თიწკუმა ართო ვორდათ. მარა შემლებნა იესოშ ჯგირო გაჩინებაფა თიშ უმკუჯინუო, ნამდა თიწკუმა ფიზიკურო ხოლოს ვა ვორეთ. თუდო გუვარჩიენთ ოთხ საშვალებას, მუთ მიმეხვარებნა იესოწკუმა მეგობრობაშ გამანგარებას. დუდშე გუვარჩუათ, მუშენ რე ჩქინო სასიცოცხლოთ მნიშვნელოვან, იესოწკუმა ხოლოშიან ურთიერთობაშ გავითარება.

5. მუშენ ოკო გუვავითარათ მეგობრობა იესოწკუმა? ქოძირით ჩარჩოეფ ( „იესოწკუმა მეგობრობა მოხვარნა, ვორდათ იეჰოვაშ მეგობრეფ“ დო  „მიღდან გაწონასწორებულ შეხედულება იესოშე“).

⁵ იესოწკუმა მეგობრობა აუცილებერ რე, იეჰოვაწკუმა ჯგირ ურთიერთობაშ გავითარებელო. გუვარჩუათ თეშ ჟირ მიზეზ. პირველ, იესოქ მუშ მოწაფეეფს უწუ: „მუაჩქიმს უჸორთ, მუშენდა მა მიჸოროფეთ“ (იოან. 16:27). თეს გეძინელ, იესოქ თქუ: „მუმაშა ჩქიმ უმშო მითინს ვემიართე“ (იოან. 14:6). ეცადე იეჰოვაწკუმა დამეგობრებას, იესოწკუმა მეგობრობაშ გავითარებაშ უმშო, თიცალ რე, ეცადე შენობაშა მინულას კარიშ უმშო. ზუსტას თეცალ შედარება გიმირინუ იესოქ, მუჟამსით მუშ დუდშე თქუ: „მა კარ ვორექ შხურშო“ (იოან. 10:7). მაჟია მიზეზ თინა რე, ნამდა იესო სრულყოფილო გიმირჩქინანდჷ მუმაშ თვისებეფს. თიქ უწუ მუშ მოწაფეეფს: „მა ბძირუნ თიქ, მუმა ხოლო ძირჷ“ (იოან. 14:9). თაშ ნამდა, მთავარ საშვალება იეჰოვაშ გურშენ მეტიშ გაგებელო, იესოშ ცხოვრებაშე დაკვირება რე. იესოშ გურშენ მეტის ქიდიბგურუანთ-და, უმოსო ქიმეჸოროფებნა  თინა. შედეგო უმოს ხოლოშიან ურთიერთობას გუვავითარენთ თიწკუმა დო უმოსო ქიმეჸოროფებნა თიშ ზეციერ მუმა.

6. ხოლო მუ მიზეზიშ გურშენ რე აუცილებერ იესოწკუმა ურთიერთობა? გენწყით.

⁶ იესოწკუმა ურთიერთობა აუცილებერ რე, ჩქინ ლოცვეფშე პასუხიშ მიოღებელო. თენა უმოს მეტის ნიშნენს, ვინემ ლოცვაშ ბოლოს გიმიბრინუათ ფრაზა „იესოშ სახელით“. ჩქი ოკო მარჩქილედან, მუჭო პასუხენს იეჰოვა ჩქინ ლოცვეფს, იესოშ საშვალებათ. იესოქ მოციქულეფს უწუ: „მუდგა ვეთხუათ ჩქიმ სახელით, გუვაკეთენქ“ (იოან. 14:13). მართალ რე, ხვალე იეჰოვა ირჩქილე დო პასუხენს ჩქინ ლოცვეფს, მარა თიქ იესოს მეჩჷ ძალაუფლება აღასრულას თიშ გადაწყვეტილებეფ (მათ. 28:18). თაშ ნამდა, სოიშახ იეჰოვა უპასუხენდას ჩქინ ლოცვეფს, თინა ოკვირ, ქიგმიბრინუანქ დო ვარ იესოშ მოჩამილ რჩევას. მაგალთო, იესოქ თქუ: „თქვა შხვეფს ქაპატიენთ-და, თქვა ხოლო ქუგაპატიენა ცოდვეფს ზეციერ მუმა, მარა თქვა შხვეფს ვაპატიენთ-და, ვართ თქვა გაპატიენა ცოდვეფს ზეციერ მუმა“ (მათ. 6:14, 15). თაშ ნამდა, მნიშვნელოვან რე, თეშ მივექცუათ შხვეფს, მუჭოთ იეჰოვა დო იესო მოქცუნა!

7. მის მუღანს ჯგირობუას იესოშ გიშაჸიდირალიშ მსხვერპლ?

⁷ იესოშ გიშაჸიდირალიშ მსხვერპლ ჯგირობუას ხვალე თინეფს მოუღანს, მიდგას ხოლოშიან ურთიერთობა უღჷ თიწკუმა. მუშენ იფჩიებუთ თეს? იესოქ თქუ, ნამდა თინა მუშ სიცოცხლეს დათმენდჷ, მუშ მეგობრეფშო (იოან. 15:13). ღორონთიშ თი ართგურ მსახურეფ, მით იესოშ დედამიწაშა მულაშახ ცხოვრენდეს, გეჩინებაფუანა იესოს დო ქიჸოროფუანა თის. მართალ რე, თიცალ ართგურ ქომოლკათა დო ოსურკათა, მუნერით რენა აბრაამ, სარა, მოსე დო რახაბ, გეთელებნა, მარა თინეფქ ხოლო ოკო გავითარან მეგობრობა იესოწკუმა, ნამდა მიღან მარადიულ სიცოცხლე (იოან. 17:3; საქ. 24:15; ებრ. 11:8—12, 24—26, 31).

8, 9. მუჭოთ იოანეშ 15:4, 5-ის ჭარჷ, მუს მიმეხვარებნა იესოწკუმა ურთიერთობა დო მუშენ რე მნიშვნელოვან იესოწკუმა ართობას ვორდათ?

⁸ ჩქი მოხიოლნა იესოწკუმა თანამშრომლობა, ღორონთიშ სამეფოშ გურშენ სახიოლო ამბეშ ქადაგებაშ დო გურაფაშ საქმეს. დედამიწას ცხოვრენდუნ, იესო მასწავლებერ რდუ. ზეცაშა დორთაშ უკულ თინა, მუჭოთ კრებაშ დუდ, ხემძღვანელენს, ქადაგებაშ დო გურაფაშ საქმეს. იესო ორწყე დო აფასენს თქვან მონდომას, მუთ შილებენ ბრელს ქიმეხვარათ, გეჩინებაფუან იესო დო იეჰოვა. ზუსტას იეჰოვაშ დო იესოშ მოხვარათ შემლებნა თე საქმეშ შესრულება (წეკითხით იოანე 15:4, 5).

⁹ ღორონთიშ სიტყვაშე არგამათ იძირე, ნამდა იეჰოვას ქუვასიამოვნათინ, იესო ოკო მიჸორდან. მორთ, გუვარჩუათ ოთხ მუდგარენ, მუთ მიმეხვარებნა იესოშ მეგობრეფო გინიფრთათ.

10. მუ რე პირველ ნაბიჯ, ნამუთ იესოწკუმა დამეგობრებას მიმეხვარებნა?

¹⁰ 1) გეჩინებაფეთ იესო. თეშ კეთება შემლებნა ბიბლიაშ წიგნეფ მათე, მარკოზ, ლუკა დო იოანეშ კითხირით. მუჟამსით იესოშ ცხოვრებაშე ფიფქრენთ, ნამუთ ბიბლიას რე ინოჭარილ, ვორწყეთ, ნამდა იესო ჯგირო ოქცუდ ხალხის, ათეშენ თიშ მიმართ ჩქინ ჸოროფა დო პატიცემა უმოსო იმანგარებ. მაგალთო, მართალ რე, იესო მოწაფეეფიშ ბატონ რდუ, მარა თინა დღას ვაქცუდ თინეფს, მუჭოთ მონეფს. თეშ გინაწონს, მუშ გრძნობეფ დო ფიქრეფშენ ურაგადუდ თინეფს (იოან. 15:15). იესოს გურშა მეუღუდ თინეფიშ გაჭირება დო თინეფწკუმა ართო ინგარდჷ (იოან. 11:32—36). ხვალე თენა ვარინ,  მუშ მოწინააღმდეგეეფს ხოლო უჩქუდეს, ნამდა იესო თინეფიშ მეგობარ რდუ, მით ღებულენდჷ თიშ ცნობას (მათ. 11:19). მუჟამსით იესოშ მაგალითის მეპჸუნთ, შხვეფწკუმა ჩქინ ურთიერთობა იუჯგუშებ, უმოს კმაყოფილეფ დო ბედნერეფ ვორეთ დო უმოსო მეჸოროფებნა იესო.

11. მუ რე მაჟია ნაბიჯ, ნამუთ იესოწკუმა დამეგობრებას მიმეხვარებნა დო მუშენ რე თე ნაბიჯ მნიშვნელოვან?

¹¹ 2) იფიქრით დო მიქცით იესოცალო. მუთ უმოსის გებგენთ იესოშ აზროვნებაშე დო მივაჸუნუთ თიშ მაგალითის, უმოსო დევეახლოვებუთ თის (1 კორ. 2:16). მუჭო შემლებნა მივაჸუნათ იესოშ მაგალითის? დეფიქრით, იესო მუშ დუდიშ სიამოვნებაშე, ვარინ შხვეფიშ მოხვარაშენ ფიქრენდჷ (მათ. 20:28; რომ. 15:1—3). თეცალ აზროვნება ოხვარუდ, ჸოფედკო დუდგინოდვალირ დო აპატუკო შხვეფს. თის ხეთეშე ვა მალედ გურ ხალხიშ ნარაგადშე (იოან. 1:46, 47). თეს გეძინელ, იესო გურშა ველეტალენდჷ თი შეცდომეფს, ნამუთ ხალხის ულირს აფუდ დაშვებულ დო თეს ვარზენდჷ საშვალებას, თინეფიშ გურშენ გლახა იფიქრუკო (1 ტიმ. 1:12—14). იესოქ თქუ: „ჩქიმ მოწაფეეფ რეთინ, თით გეგენა, ნამდა ართიანიშ ჸოროფა გაღვენუნა“ (იოან. 13:35). ქოკითხით თქვან დუდის: „მეპჸუნქო იესოშ მაგალითის დო მუთ შემლებუნ ირფელს ქუვორთუქო, ნამდა და დო ჯიმალეფწკუმა მშვიდობა მიღდას?“.

12. მუ რე მასმა ნაბიჯ, ნამუთ იესოწკუმა დამეგობრებას მიმეხვარებნა დო მუჭო შემლებნა თე ნაბიჯიშ გინოდგუმა?

¹² 3) ხუჯ ქუდუკინით ქრისტეშ ჯიმალეფს. ირფელს, მუდგას იესოშ ცხებულ ჯიმალეფშო ვორთუთ, იესო უჯინე, მუჭოთ მუშო კეთებულ საქმეს (მათ. 25:34—40). მთავარ საშვალება, მუდგათ ვოხვარუთ ცხებულეფს, ქადაგება დო მოწაფეეფიშ მომზადებაშ საქმეს სრულას მონაწილება რე, მუთ იესოქ დუმავალეს (მათ. 28:19, 20; საქ. 10:42). ქრისტეშ ცხებულ ჯიმალეფს, „შხვა შხურიშ“ მოხვარათ შეულებნა, შეასრულან ქადაგებაშ საქმე, ნამუთ ამდღა მთელ მსოფლიოს მეურს (იოან. 10:16). შხვა შხურიშ წარმომადგენელ ქორეთ-და, ირო, მუჟამსით თე საქმეს ღებულენთ მონაწილებას, ჸოროფას გიმოხანტუნთ ქრისტეშ ცხებულ ჯიმალეფიშ დო იესოშ მიმართ.

13. მუჭო შემლებნა გიმიბრინუათ იესოშ რჩევა, ნამუთ ლუკაშ 16:9-ს ინოჭარ?

¹³ თეს გეძინელ, მუჟამსით შესაწირავეფით ხუჯის ვუკინენთ თი საქმეს, ნამდგას იეჰოვა დო იესო ხემძღვანელენა, თინეფიშ მეგობრეფო გინიფრთუთ (წეკითხით ლუკა 16:9). მაგალთო, შემლებნა შესაწირავეფ ვაკეთათ მსოფლიო სამქადაგებლო საქმეშო, ნამდგათ იფინანსებ დაშორებულ ტერიტორიეფს ქადაგება, თაყვანიშცემაშ შენობეფიშ შენება დო რემონტ დო სტიქიურ უბედრობეფით დაზარალებურეფიშ მოხვარა. თეს გეძინელ, შემლებნა ჩქინ კრებაშო ვაკეთათ შესაწირავეფ დო მივეხვარათ თინეფს, მიდგას უჭირს (იგავ. 19:17). თე ირფელით შემლებნა ხუჯ ქუდუკინათ ქრისტეშ ჯიმალეფს.

14. მუჭოთ ეფესოელეფიშ 4:14, 15-ის ჭარჷ, მუ რე მანთხა ნაბიჯ, ნამუთ იესოწკუმა დამეგობრებას მოხვარნა?

¹⁴ 4) ხუჯ ქუდუკინით ორგანიზაციას მოხვალამირ ცვლილებეფს. მუჟამსით ფთანამშრომლენთ დანიშნულ ჯიმალეფწკუმა, მით ჸოროფათ ფხემძღვანელენა, თეშნერო უმოსო ვეახლოებუთ იესოს, კრებაშ დუდის (წეკითხით ეფესოელები 4:15, 16). მაგალთო, ბოლო დროს ვოცადუთ, სამეფო დარბაზეფ მაქსიმალურო გეგმიბრინუათ. ათეშენ, ნამთინე კრებაქ გეერთიან დო სამქადაგებლო ტერიტორიაქ ხოლო დათირეს. თე ცვლილებაშ ჭყოლოფათ დეზოგ შემოწირულ თანხეფქ. მარა, თეწკუმა ართო, ნამთინე მაუწყებელქ ოკო ქიმიარჩქვანკო ახალ კრებას. შილებე თე ართგურ მაუწყებელეფ ბრელ წანას  რდეს ართ კრებას დო ხოლოშიან მეგობრეფ ხოლო ჸუნდეს. მარა ასე თინეფს შხვა კრებაშა აჸუეს გინაულარქ. იესოს მანგარო ოხიოლ, მუჟამსით ორწყე, ნამდა მუშ ართგურ მოწაფეეფ ხუჯის უკინენა თეცალ ცვლილებეფს!

15. მუჭო გეუჯგუშებ იესოწკუმა ჩქინ მეგობრობა მომავალს?

¹⁵ წმინდა შურით ცხებულეფ იესოწკუმა ართო იმართველენა ზეციურ სამეფოს. თინეფს უღნა იმენდ, ნამდა იჸუაფნა იესოწკუმა — ქოძირნა თის, პირადო ქუდურაგადუანა დო თიწკუმა ართო იჸუაფნა მარადიულო (იოან. 14:2, 3). იესო თინეფშე ხოლო იზრუნენს, მიდგას დედამიწას მარადიულ ცხოვრებაშ იმენდ უღნა. მართალ რე, თინეფ იესოს ვა ძირნა, მარა თიშ უმოს ხოლოშიან მეგობრეფო გინირთუნა მარადიულ ცხოვრებაშ დროს, ნამუთ იეჰოვა დო იესოქ გინაშქვეს შეიოლებერო (ეს. 9:6, 7).

16. მუ კურთხევეფ მოუღ ჩქინო იესოწკუმა მეგობრობას?

¹⁶ მუჟამსით ჩქი ბღებულენთ იესოშ მოწვევას, გინიფრთათ თიშ მეგობრეფო, ბრელ კურთხევა მიღნა. მაგალთო, ამდღა ხოლო ბგინაფლენთ თიშ ჸოროფას დო ელარნას. მიღნა მარადიულ ცხოვრებაშ საშვალება დო მუთ არძაშ უმოს მნიშვნელოვან რე, იესოწკუმა მეგობრობა მოხვარნა ქიმვოჭირინუათ არძაშე უმოს ძვირფასის — ხოლოშიან, პირად ურთიერთობას იესოშ მუმა იეჰოვაწკუმა. მართალო დიდ პატი რე, ბჯოხოდან იესოშ მეგობრეფ!