1. მუ რე სულიერ სამოთხე დო მუ ოკო ვა ფქიმინათ დღას?

 ᲐᲛᲓᲦᲐ დედამიწას რე სიმბოლურ სამოთხე, სოდეთ მილიონობით ღორონთიშ მსახურ ნამდვილ მშვიდობათ ხარენს დო ქიანაშ დიდებულ საქმეს მონაწილენს. მუშო ოკო რაგად, თე სამოთხეს რენან თინეფს ვაკონა, დღას მიდართან თევრეშე. ულა ვარ, ოკონა, მუთ შილებე მეტ ადამიან ქიმიჸუნან თე სარკო ადგილშა. თე ადგილს სულიერ სამოთხე ჯოხო. a

2. მუშენ რე სასწაულ სულიერ სამოთხე?

² სატანაშ ქიანას კოჩ მშვიდას სოთინ ვა რე; თინა ეფშა რე ართიანიშ გოჯოგათ დო უბადობათ. სასწაულ რე, ნამდა თეცალ ქიანას იეჰოვას მუშ ხალხ ჸუნსჷ სულიერ სამოთხეს — სიმბოლურ ადგილს, ნამუთ მშვიდობათ დო ჸოროფათ რე ეფშა (1 იოან. 5:19; გამოცხ. 12:12). ღორონთიშ სიტყვა სულიერ სამოთხეს ეჭარუნს, მუჭოთ „დუდიშგითაფორაფალს“ დო ბაღის, „ნამდგას წყარუა ვარკჷ“ (ეს. 4:6; 58:11). მოჸოროფე ზეციერ მუმა ორწყე, მუ მდგომარეობას რენა ადამიანეფ ქვეყნიერებას დო ფთხილანა, ნამდა, თაშ ქოფთქუათინ, სულიერო გოფალირ ვორდათ. იეჰოვაშ კურთხევათ, თინეფ, მით სულიერ სამოთხეს რენა, ხიოლით აგრძელენა ღორონთიშ მსახურებას თე ძნელ გარზებელ ბოლო დღალეფს (ეს. 54:14; 2 ტიმ. 3:1).

3. მუჭო შისრულ ულირს ესაიაშ 65-ა დუდის ინოჭარილქ?

³ ესაიაშ 65-ა დუდის იეჰოვა წინასწარმეტყველიშ პიჯით ეჭარუნს, მუნერ იჸუაფუდ ცხოვრება სულიერ სამოთხეს. თე სიტყვეფქ პირველო ჯვ.წ. 537 წანას შისრულ, მუჟამსით იუდეველეფქ, მიდგაქ მიკირთეს იეჰოვაჸურე, გეთავისფალეს  ბაბილონიშ ტყვეობაშე დო დირთეს მუნეფიშ დიხაშა. იეჰოვაშ კურთხევათ დო მოხვარათ, თინეფქ განადგურებულ იერუსალიმს ჯვეშობურ სისქვამე დურთინუეს დო აღადგინეს ტაძარ — წმინდა თაყვანიშმცემლობაშ ცენტრ ისრაელს (ეს. 51:11; ზაქ. 8:3).

4. მუჭო ისრულებ ამდღარ დროს ესაიაშ 65-ა დუდის ინოჭარილ?

⁴ თე წინასწარმეტყველებაშ მაჟია შესრულებაქ ახ.წ. 1919 წანას დიჭყჷ, მუჟამსით იეჰოვაშ თაყვანიშმცემელეფქ გეთავისფალეს „დიდ ბაბილონიშ“ ტყვეობაშე. თე დროშე მოჸუნაფილ, სულიერ სამოთხეშ „ტერიტორიას“ ჭიე-ჭიეთ აძინუ. სამეფოშ გურგედვალირ მაქადაგებელეფქ ქიდიჭყეს კრებეფიშ ჩამოყალიბება დო სულიერ ნაყოფიშ მიკოღალა. თინეფქ, მით ართ დროს უდუნდებელეფ რდესჷ დო გლახა ცხოვრებათ ცხოვრენდეს, გინირთეს „ახალ პიროვნებათ, ნამუთ ღორონთიშ ნებას მეურე“ (ეფეს. 4:24). მართალ რე, ესაიაშ წიგნის ინოჭარილ თე წინასწარმეტყველებაშ ბრელ დეტალ პირდაპირ გაგებათ ახალ ქვეყნიერებას შისრულებ, მარა სულიერ სამოთხეს უკვე ამდღარშე მიღუნა ქიანაშ კურთხევა. ათეშენ, მორთჷ გუვარჩუათ, მუ ჯგირობუა მოუღ თის ჩქინდა დო მუშენ ოკო ვებდათ დღას სულიერ სამოთხეშე.

ᲛᲣᲜᲔᲠ ᲠᲔ ᲪᲮᲝᲕᲠᲔᲑᲐ ᲡᲣᲚᲘᲔᲠ ᲡᲐᲛᲝᲗᲮᲔᲡ

5. მუჭოთ ესაიაშ 65:13-შე იძირე, მუნერ რე ცხოვრება სულიერ სამოთხეს?

⁵ სულიერო რძღელ დო ძალეფით ეფშა ხალხ. მუჭოთ ესაიაშ წინასწარმეტყველებაშე ვორწყეთ, ზღვა დო გვალა რე სულიერ სამოთხეს ცხოვრება დო ქვეყნიერებას ცხოვრებაშ შქას (წეკითხით ესაიაშ 65:13). იეჰოვას მუშ ხალხშა სულიერო მუთუნ ვა ურკჷ, მაგალთო, მარზენა მუშ წმინდა შურს, მიღუნა თიშ სიტყვა ბიბლია დო ეფშა სულიერ საზრდო. თე გაგებათ ჩქი ბჭკუმუნთ, ფშუნთჷ დო ფხარენთ (ქეშუდარით გამოცხადებაშ 22:17). თეცალ ცხოვრებაწკუმა სარხოს ხოლო ვა რე თი ხალხ, მით სულიერ სამოთხეშ გალე რე. თინეფ „შქირენს ჭყორდუნა . . . ჸუმენიშ ღურელ რენა . . . დო ონჯღორეს ორწყენა“. თე ხალხ, თაშ ქოფთქუათინ, უმინჯურო რე დო მითინ ვა ზრუნენს თინეფიშ სულიერ საჭიროებეფშე (ამოს. 8:11).

6. მუჭო ეჭარუნს იოელიშ 2:21—24 სულიერ საზრდოს დო მუ ოკო ვაკეთათ, ნამდა თიქ ჯგირობუა მომიღან?

⁶ იოელ მუშ წინასწარმეტყველებას მიშინუანს სიცოცხლეშო აუცილებერ თიცალ პროდუქტეფს, მუნერით რე მარცვლეულ, ღვინ დო ზეთ. თეშნერო მოძირანა, ნამდა იეჰოვა მუშ ხალხის მუთუნს ვარკენს დო გურხვეთ არზენს სულიერ საზრდოს (იოელ. 2:21—24). იეჰოვა თეს ორთჷ ბიბლიაშ, ბიბლიაშა გერსხილ პუბლიკაციეფიშ, ჩქინ ვებგვერდიშ, შეხვალამეფიშ დო კონგრესეფიშ საშვალებათ. ჩქი ირდღას შემლებუნა მიკუზოჯათ იეჰოვაშ გონწყილ სუფრას. შედეგო, სულიერ გაგებათ დიბრძღათ დო ძალეფით ეიფშათ.

7. მუშენ ვორეთ „გურგახარებულეფ“? (ეს. 65:14).

⁷ ბედნერეფ დო კმაყოფილეფ. ღორონთიშ ხალხ „ხიოლით მიოძახანს“, მუშენდა თინეფიშ გურ ეფშა რე იეჰოვაშ მიმართ მარდულობათ (წეკითხით ესაიაშ 65:14). ჩქი გურგახარებულეფ ვორეთ, მუშენდა მიჩქუნა ჭეშმარიტება, მუთ რწმენას მიმანგარენა, ღორონთიშ სიტყვაშე გურიშ ემაქექაფალ დუნაპირებუეფს ბკითხულენთ დო, ქრისტეშ გიშაჸიდირალიშ ჭყოლოფათ, მომავალიშ დიდებულ იმენდ მიღუნა. და დო ჯიმალეფწკუმა ურთიერთობაშ დროს თე ირფელშენ ჩიება ჟირ თისხი ხიოლს მარზენა (ფსალმ. 34:8; 133:1—3).

8. მუ გიშეძირე არძაშ უმოსო სულიერ სამოთხეს?

⁸ სულიერ სამოთხეს არძაშ უმოსო ღორონთიშ ხალხიშ ართობა დო ჸოროფა  გიშეძირე (კოლ. 3:14). თენა მოხვარუნა, წერმიბდგინათ, მუნერ იჸუაფ ცხოვრება ახალ ქვეყნიერებას, სოდეთ ღორონთიშ ხალხის ხოლო უმოს ძალიერ ჸოროფა დო ართობა აღვენუ ართიან შქას. ართ და იშინანს, მუქ მოუოლ თოლშა, მუჟამსით პირველო მოხვად იეჰოვაშ მოწმეეფწკუმა. თინა იჩიებ: „ხალხის ართიან ათაშ ქოუჸორდუნ, პირველო ბძირჷ. თეცალ ხიოლ დო ბედნერობა ჩქიმ ოჯახის ხოლო ვამგინაფ“. ხვალე სულიერ სამოთხეს შილებე იგინას კოჩიქ თეცალ ხიოლ დო კმაყოფილება. ქვეყნიერებას იეჰოვაშ მსახურეფიშ გურშენ ოშნერს ფიქრენა, მარა თეს ვა უღჷ მნიშვნელობა, მთავარ რე, იეჰოვაშ დო თიშ ხალხიშ წოხოლე მიღუნა ჯგირ სახელ (ეს. 65:15).

9. მუ იმენდის მარზენა ესაიაშ 65:16, 17-ის ინოჭარილ?

⁹ მშვიდეფ დო მოსვანჯელეფ. ესაიაშ 65:14-ის ჭარჷ, ნამდა თინეფ, მით ვა რენა სულიერ სამოთხეს, „კიჟინუნა გურჭუაშ გურშენ დო ღვარანა შურგანწარებულეფ!“. მუშო ოკო რაგად, ღორონთიშ ხალხის ხოლო უღჷ პრობლემეფ დო ოწუხებელ, მარა წინასწარმეტყველებაშე ვორწყეთ, ნამდა საბოლათ „გოჭყოლიდაფირ იჸუაფ ულირს რდუნჷ თი გაჭირება დო ფორილ იჸუაფ თინა [ღორონთიშ] თოლეფშე“ (წეკითხით ესაიაშ 65:16, 17). იეჰოვა არძა ოწუხებელს ჩამთხინუანა დო დროშ ულაწკუმა ართო, თეშით ხოლო ვა ფშუდან იჸი თინეფ.

10. მუშენ ოკო ვორდათ მარდულეფ, ნამდა ღორონთიშ ორგანიზაციას ვორეთ? (ქოძირით სურათ).

¹⁰ მართალ რე, თე დუნაპირებ სრულას ახალ ქვეყნიერებას შისრულებ, მარა ჩქი უკვე ამდღარშე ბგინაფლენთ სიმშვიდეს ქრისტიანულ შეხვალამეფს, სოდეთ იფსვანჯუთ თე ქვეყნიერებაშე დო იბჭყოლიდუანთ ჩქინ ოწუხებელს. ვოცადუთ, ხე შეუნწყუათ მშვიდ გარემოს, ათეშენ გიმიფრჩქინანთ წმინდა შურიშ ნაყოფიშ თვისებეფს, მუნერით რე ჸოროფა, ხიოლ, მშვიდობა, სიკეთე დო ლიბ ხასიათ (გალ. 5:22, 23). მართალო, მუშმაჯგირა რე, ნამდა ღორონთიშ ორგანიზაციას ვორეთ! მოკონა, დღას ვებდათ სულიერ სამოთხეშე, ნამდა ჩქინ თოლო ქობძირათ, მუჭო შეასრულენს ღორონთ სრულას მუშ დუნაპირებუს დო მუჭო გაჭყანს „ახალ ცას დო ახალ დედამიწას“.

11. ესაიაშ 65:18, 19-შ თანახმას, მუჭო მოქმედენს ჩქინდა, სულიერ სამოთხეს ვორეთინ?

¹¹ მარდულეფ დო გახარებულეფ. ესაიაშ უკულიან სიტყვეფშე ვორწყეთ, ნამდა იეჰოვაშ გოჭყაფილ სულიერ სამოთხეს ღორონთიშ მსახურეფს მხიარულება უღუნა დო ხარენა (წეკითხით ესაიაშ 65:18, 19). ჩქი ფხარენთ თი კურთხევეფით, მუთ ჭეშმარიტებაშ რჩქინაქ  მომიღეს დო მოკონა, შხვეფს ხოლო ქუგვოგებაფუათ თინა (იერ. 31:12). მუ გასაკვირ რე, ნამდა იეჰოვას მთელ გურით ოკო, გეგშეჸუნას ხალხ ქვეყნიერებაშე დო ქიმიჸუნას თე დიდებულ ადგილშა.

12. მუჭო მოქმედენს თქვანდა ესაიაშ 65:20—24-ის ეჭარილ დო მუშენ?

¹² ჩქი მარდულეფ ვორეთ დო ხიოლ მიღუნა თი დიდებულ იმენდშენ ხოლო, ნამუთ თე სულიერ სამოთხეშ მოქალაქეობაქ მომიღეს. წერმიდგინით, მუსხი სარკო მუდგარენს ქობძირუნთ ჩქინ თოლო ახალ ქვეყნიერებას დო მუსხი დიდებულ საქმეს მიბღენთ მონაწილებას. ბიბლია მოპირუნა: „თექ მეტო ვეჸუაფ თოთო ბაღანა, ნამდგას ხვალე მუსხირენ დღას უდგუდას იჸი შურ, ვართ მოხუცებულ, ნამუთ დროშე ადრე დოღურუ . . . ქიგედგუნა ჸუდეეფს დო იცხოვრენა თექ, ქუდარგუანა ბინეხის დო ოჭკუმუნა თიშ მიკნაღელს . . . ტყურელო ვეხანდენა . . . მუშენდა იეჰოვაშე კურთხეულ“ იჸუაფუნა. იეჰოვა მშვიდ, კმაყოფილებათ დო აზრით ეფშა ცხოვრებას მოპირუნა. თინა მირაგადუნა, ნამდა „სოიშახ დუძახუთ“, არჩქვენუ, მუ ოსაჭირ თითოულ ადამიანს დო „დაკმაყოფილენს არძა ცოცხალ არსებაშ სურვილს“ (ეს. 65:20—24; ფს. 145:16).

13. მუჭოთ ესაიაშ 65:25-შე იძირე, მუჭო ითირუნა ადამიანეფ თიშ უკულ, მუთ იეჰოვაშ მსახურეფო გინირთუნა?

¹³ მშვიდობიანეფ დო თხილერეფ. ბრელქ, მით ულირს უბადოშ მაკეთებელ რდჷ, დუდშე ბოლოშა დითირუ ცხოვრება (წეკითხით ესაიაშ 65:25). თინეფქ ირფელ გაკეთეს, ნამდა ჩეთხინუესკო გლახა თვისებეფ (რომ. 12:2; ეფეს. 4:22—24). მუშო ოკო რაგად, სრულყოფილეფო ვეგნორთენა, ათეშენ, მინშა კინ ჩირთუნა. მარა, თეშ უმკუჯინუო, იეჰოვაშ ორგანიზაციას, სოდეთ „არძანერ ადამიან“ რე გაერთიანებულ, სასწაულ ჸოროფა დო მშვიდობა მიღუნა (ტიტ. 2:11). თეშმაშხვა ამბე ირფელიშშემალებე ღორონთიშ მეტ მის აკეთებედ?!

14. მუჭო გიმოცად ართ ჯიმაქ მუშ დუდშა ესაიაშ 65:25-ის ინოჭარილ სიტყვეფ?

¹⁴ ქობძირათ ართ შემთხვევა დო ქიგებგათ, მუჭო ითირუნა ადამიანეფ დუდშე ბოლოშა. ართ ჩქინ ჯიმა ჭეშმარიტებაშ გაგებაშახ უზნეო ცხოვრებას მეჸუნდჷ დო უბადო საქმეეფს ორთუდ. 20 წანერ რდუნ თეშ უკვე მუსხირენშა აფუდ ჭიშაფილ ციხეს დოხუნა დო გითულა. თინა ხირულენდჷ მანქანეფს, ხირუნდჷ ჸუდეეფს დო შხვა საციხო საქმეეფს ორთუდ. თე პიროვნებას თიცალ ხასიათ უღუდ, ნამდა აკაბცხა ხოლო უბაღუდ ჩხუპიშ წუმაჭყაფალო. მარა, მუჟამსით ჭეშმარიტება ქიგეგ დო შეხვალამეფშა დასწრება ქიდიჭყჷ, სულიერ სამოთხეშა ქუმორთჷ დო თიშ ცხოვრებას აზრიქ ქიმიაჩ. ნათუაშ უკულ თინა ხშირას ფიქრენდჷ, მუჭო გიმოცად მუშ დუდშა ესაიაშ 65:25-ის ინოჭარილ სიტყვეფ. ართ დროს ლომცალ უდუნდებელ კოჩიქ, შხურცალ, ბაჩაჩია პიროვნებათ გინირთჷ.

15. მუშენ მოკონა, შხვეფქ ხოლო ქუმორთან სულიერ სამოთხეშა დო მუს ვორთუთ თეშო?

¹⁵ ესაიაშ 65:13 თეცალ სიტყვეფით იჭყაფ: „უზენაეს უფალ, იეჰოვა იჩიებ“ დო 25-ა მუხლ ითებ სიტყვეფით „იჩიებ იეჰოვა“. იეჰოვა ირიათო ასრულენს დოდვალირ სიტყვას (ეს. 55:10, 11). ჩქი უკვე ვორეთ სულიერ სამოთხეს. ღორონთიქ მუშ დიდ ოჯახშა მომიჸონეს, სოდეთ ნამდვილ ართობათ დო მშვიდობათ ფხარენთ. ჩქინ საჯიმალო, თე უბადო ქვეყნიერებას, დუდიშგითაფორაფალცალ რე, სოდეთ თხილერ ვორეთ (ფსალმ. 72:7). ზუსტას ათეშენ, მთელ ყურადღება მოწაფეეფიშ მომზადებაშა მაფუნა გინოღალირ, მუშენდა მოკონა, მუთ შილებე მეტ ადამიანქ ქუმორთას სულიერ სამოთხეშა დო ქაკათას ჩქინ ჸოროფათ ეფშა საჯიმალოს (მათ. 28:19, 20).

 ᲛᲣᲭᲝ ᲒᲣᲠᲩᲥᲘᲜᲐᲗ ᲡᲣᲠᲕᲘᲚ ᲨᲮᲕᲔᲤᲡ, ᲛᲝᲠᲗᲐᲜ ᲡᲣᲚᲘᲔᲠ ᲡᲐᲛᲝᲗᲮᲔᲨᲐ?

16. მუჭო მოურს ხალხ სულიერ სამოთხეშა?

¹⁶ ჩქინ მხარეშე არძას შემლებუნა მუდგაინიშ კეთება, ნამდა შხვეფს მაკორინან სულიერ სამოთხეშა მოულაქ. თეშო იეჰოვაშ მაგალითის ოკო მივაჸუნათ. თის ხალხ ნანძალუო ვარინ, ჸოროფათ მოჸუნს მუშ ხოლოშა (იოან. 6:44; იერ. 31:3). მუჟამსით ალალგურიშ ადამიანეფ გებულენა, მუნერ მოჸოროფე ღორონთ რე იეჰოვა დო იჩინებაფუანა თიშ თვისებეფს, სურვილ ურჩქინდუნა, დეახლოვან თის. ჩქინ ჯგირ თვისებეფქ დო საქციელქ ხოლო შილებე პიროვნებას სურვილ გურჩქინას, ქუმორთას სულიერ სამოთხეშა. ქიგებგათ, მუჭო შემლებუნა თეშ კეთება.

17. მუჭო შემლებუნა შხვეფს სურვილ გურჩქინათ, მორთან სულიერ სამოთხეშა?

¹⁷ ართ-ართ საშვალება, მუდგათ შემლებუნა შხვეფს სურვილ გურჩქინათ, ქუმორთან სულიერ სამოთხეშა, რე თი ჸოროფა დო ართობა, ნამუთ ართიან შქას მიღუნა. პავლექ კორინთელ ქრისტიანეფს უწუ, ნამდა კორინთიშ კრებაშა მოულირ ურწმუნოეფ ქოთქუანდეს, „თქვანწკუმა რენია ღორონთ“. მოკონა, ამდღა ჩქინდე ხოლო არაგადედან თე სიტყვეფ კრებაშა ახალმოულირეფს (1 კორ. 14:24, 25; ზაქ. 8:23). თექ შემალებუანინ, ოკო მივაჸუნათ 1 თესალონიკელეფს ინოჭარილ რჩევას: „მშვიდობიანო რდათჷ ართიანწკუმა“ (1 თეს. 5:13).

18. მუქ შილებე ხალხის სულიერ სამოთხეშა მოულა მუკორინუას?

¹⁸ ჩქი და დო ჯიმალეფს იეჰოვაშ თოლით ოკო უჯინათ, მუთ თის ნიშნენს, ნამდა მთელ ყურადღება თინეფიშ დადებით მხარეეფშა ოკო გინიბღათ დო ვართ ხოლო არასრულყოფილებაშა, ნამუთ მალას სადღამუშოთ მისპუ. შხვეფიშ გაჭირებას გურშა მიბღენთ, ართიანს ჯგირს გუკეთენთ დო მთელ გურით ქუვაპატიენთ-და, შემალებენა ჸოროფათ მუვაგვარათ  ირნერ უთანხმოება, ნამუთ ართიან შქას მუმალენა (ეფეს. 4:32). შედეგო, უმოს ხალხ მიშას იჸი სულიერ სამოთხეშა, მუშენდა მუნეფს ხოლო მაკორინენა, შხვეფქ თაშ მექცუან. b

ᲕᲔᲓᲐᲗ ᲡᲣᲚᲘᲔᲠ ᲡᲐᲛᲝᲗᲮᲔᲨᲔ

19. ა) მუს იჩიებუნა თინეფ, მიდგაქ დირთეს სულიერ სამოთხეშა? (ქოძირით ჩარჩო  „თინეფქ მიდართეს სულიერ სამოთხეშე, მარა კინ დირთეს“) ბ) მუ ოკო მაფუდან გინოჭყვიდილ? (ქოძირით სურათ).

¹⁹ მანგარო ვაფასენთ სულიერ სამოთხეს! თე სამოთხე ასე რენ თიცალ სქვამ დღას ვა ჸოფე. თინა ეფშა რე ღორონთიშ ართგურ თაყვანიშმცემელეფით. მორთჷ, ირიათო უმარდუდათ იეჰოვას თე სულიერ სამოთხეშენ. არძაქ, მიდგას ოკო, რდასჷ ძალეფით ეფშა, კმაყოფილ, მშვიდ დო თხილერ, ოკო მორთას თე სულიერ სამოთხეშა დო დღას ვედას თევრეშე. სატანა ირნერო ოცად, გეგშამიჸონან თე სულიერ სამოთხეშე, მარა მუთუნით ოკო ვემეფჩათ უფლება, ქიმიოჭირინუას თე მიზანს (1 პეტ. 5:8; გამოცხ. 12:9). მორთჷ ბრელ იფხანდათ, ნამდა დოფთხილუათ ჩქინ სულიერ სამოთხეშ სისქვამე, სიწმინდე დო მშვიდობა!