„სი ქუაშ გურ გიღ. ორსულ ოსურ დო ჭიჭე ბაღანა ქიდიტე. მი ჩანს ოჭკომალს დო მი მიკაჯინე თინეფს? მიოტე სქან რწმენა დო დართ ოჯახის!“ — მიღვარანდ კა-გე-ბეშ ოფიცერი. * მა ვუწი: „მა ვა დომტებ ჩქიმ ოჯახი. თქვა დუმოხუნეთ ციხეს დო მუშ გურშენ?“. ოფიცერქ მიპასუხ: „იეჰოვაშ მოწმე რდენ თის უჯგ, შხვა მუდგაინშა მეიძდას ბრალი“.

თე ამბექ 1959 წანას ირკუტსკიშ (რუსეთი) ციხეს მოხვად. მოკო გეჩუათ, მუშენ ვორდით მზათ მა დო ჩქიმ ოჯახობა მარია, იბტანჯითკო სიმართლეშ გურშენ დო მუ კურთხევაქ მაჸუნ ჩქინ ართგურობას (1 პეტ. 3:13, 14).

მა 1933 წანას უკრაინას, სოფელ ზოლოტნიკის დებაბდი. 1937 წანას ჩქიმ დეი დო თიშ ქომონჯიქ, ნამუთ იეჰოვაშ მოწმეეფ რდესინ, ჩქინ ოძირაფშა საფრანგეთშე ქუმორთეს დო ქუმომღეს საზოგადოება „გინაჯინალ კოშკიშ“ გიშნაშკუმელ წიგნეფ „მთავრობა“ დო „რსხება“. მუჟამსით ჩქიმ მუმაქ თე წიგნეფ წეკითხუნ, თის ღორონთიშ რწმენაქ კინ დართ. სანარღოთ, 1939 წანას თიქ მანგარო დელახ დო ღურაშახ, დიაჩქიმს უწუ: „თენა ჭეშმარიტება რე. ქუდაგურე თინა ბაღანეფს“.

1951 წანაშ აპრილს მთავრობაქ ქიდიჭყ მოწმეეფიშ გინოხორაფა დასავლეთ საბჭოთა კავშირიშ ქიანეფშე ციმბირშა. მა, დიაჩქიმ დო ჩქიმ უკლაშ ჯიმა, გრიგორი დასავლეთ უკრაინაშე ციმბირიშ ქალაქ ტულუნშა გეგნმოხორეს. თე ადგილშა მატარებელით 6 000 კმ. იბდით. ჟირ მარაშ უკულ ჩქიმ უკლაშ ჯიმა ბოგდან ქიმიჸონეს შრომა-გასწორებაშ კოლონიაშა, ნამუთ ჩქინ გოხოლუას ქალაქ ანგარსკის რდუ. თის 25 წანა ქიმეჩეს, სოდეთ კატორღა დღაშა გეურდეს.

მა, დიაჩქიმ დო გრიგორი ტულუნიშ გოხოლუას მოხუჯურო ფქადაქენდით. მაგალთო, ხალხის ვოკითხუდით: „ჩხოუს ხომ ვეგმოჩანს თაქ მითინ?“. ჩხოუს გიმოჩანდუნ ფერ მითინს ქეშეფხვადუდით-და, ვურაგადუდით, მუ სარკოთ რე თე ჩხოულეფ გოჭყაფილ. თეშ უკულ გუმაჭყაფალშენ დიბჭყანდით რაგადის. გაზეთის ჭარუნდეს, ნამდა იეჰოვაშ მოწმეეფ გილეშეს დო ჩხოულეფს გორუნდეს ოჸიდეთ, მარა სინამდვილეს თინეფ „შხურეფს“ გორუნდეს. დასურო, ჩქი შხურცალ ხალხის შეფხვადუდით! დიდ ხიოლ მოუღუდ ბიბლიაშ გურაფას თანდაბალ დო სტუმარიშ მოჸოროფე კათაწკუმა თიცალ ადგილეფს, სოდეთ დღას ვარდ ნაქადაქებ. ამდღა ტულუნს ართ კრება რე, სოდეთ 100 კოჩშე მეტ მსახურენს.

ჩქიმ ოჯახობა მარიაქ ჭეშმარიტება უკრაინას მაჟია მსოფლიო ჩხუპიშ დროს გეგ. თინა 18 წანერ რდუ, მუჟამსით კა-გე-ბეშ ოფიცერ აწუხენდ დო ანძალენდ, მუწკუმა სექსუალურ ურთიერთობას, მარა გინოჭკირილ ვარია მიღუ. ართშა მარიაქ მუშ ჸუჩა დირთუნ, თე კოჩიქ ნორჩალს ჯანუდუნ თეშ ქუდოხვად. მარიაქ ინტ თევრეშე. გახანგებულ ოფიცერქ დარცქინ, ნამდა იეჰოვაშ მოწმე რდუნ თიშენ ოჭოფუნდ. თექ თაშ ქუმოხვად; 1952 წანას მარია 10 წანათ ციხეს ქუდახუნეს. თინა დუც იოსებცალო გინაფლენდ, ნამუთ ღოროთნიშ ართგურობაშ გურშენ ციხეს ხედ (დაბ. 39:12, 20). მძღოლქ, ნამუთ მარია სასამართლოშე ციხეშა იჸონუნ, თეცალ სიტყვეფ უწუ: „ვა გაშკურნას. ციხეს ბრელ მოხვადუ, მარა თევრეშე ღირსუანო გითურს“. თე სიტყვეფქ გურშა ელუკინ თის.

1952—1956 წანეფს მარია ქალაქ გორკიშ ხოლოს (ასე ნიჟნი ნოვგორდ, რუსეთი) შრომა-გასწორებაშ კოლონიას რდუ. თის ჯალეფიშ ეჸოთამა ქუდავალეს, ჸინუნდუნ ფერ ამინდის ხოლო. თე ირფელიშ გურშენ მარიას ჯანმრთელობაქ მეუდინ, მარა 1956 წანას ციხეშე გექთაშკვეს დო თიქ ტულუნშა დირთ.

ართ ჯიმაქ მიწუ, ნამდა ტულუნშა მიშ და, ნამუსით ოკო დოფხვადიკო. ავტობუსეფიშ გაჩერებაშა ველისპეტით მიდაფრთ, ნამდა ქიმვეხარკო თის ბარგიშ ღალას. მარიაქ ართ ძირაფათ გურშა ქენმახანტ. თის დუდ ქუმუწონეკონ, ეფი ვა რდუ, მარა მა იშენით ქიმვოჭირნე თეს დო 1957 წანას დებქორწინით. ართ წანაშ უკულ ძღაბიქ, ირინაქ ქეშმეძინეს. 1959 წანას ბიბლიურ ლიტერატურაშ ბეშტუაშ გურშენ ციხეს ქუდმოხუნეს. გვერდ წანას კამერას ხვალე ვოხედ. სიმშვიდე ვა ვოდინეკონ თიშენ, ირიათო ბლოცულენდ, სამეფოშ ობირეშეფს იბიბრდი დო წერმებდგინენდ, მუჭო იფქადაქენდი, ციხეშე გითულაშ უკულ.

ციხეს დაკითხვაშა გეურდითინ თი დროს, ოფიცერქ დომღვარუ: „მალას თქვან ხალხის ჭუკეფცალო გეშაბჭყვიდუნთ!“. მა ვუპასუხ: „იესოქ თქუ, სახიოლო ამბეს სამეფოშენ არძა ხალხის ქუქადაქენდეს დო თენა მითინს ვეშიაჩერებედ“. თეშ უკულ ოფიცერქ დოთირუ ტაქტიკა დო ოცადუდ, დუმაჯერკო, ნამდა ჩქიმ რწმენა ქუდომტებუდკო, მუჭოთ თენა სტატიაშ დაჭყაფუს მიფშინე. მუჟამსით მუთუნქ ვაგურთესინ, 7 წანათ ქალაქ სარანსკიშ ხოლოს შრომა-გასწორებაშ კოლონიაშა გომტუეს. თევრე გინოპჸუნდითინ თეშ, ქიგებგ, ნამდა მაჟია ძღაბიქ ოლგაქ ქიშმეძინეს. მართალ რე, ჩქიმ ჩილ დო სქუაშე შორს ვორდ, მარა გურშა ელამკინანდ თინა, ნამდა მა დო მარია იეჰოვაშ ართგურეფ ფსკიდუდით.

მარია ჩქიმ ოძირაფშა სარანსკშა წანაშე ართშა მიშ, თიშ უმკუჯინუო, ნამდა ტულუნშე მატარებელით იშო-აშო 12 დღას აფუდ ოულარ. თის ირ წანას ახალ ჩექმა მოუღუდ ჩქიმდა, სოდეთ „გინაჯინალ კოშკიშ“ ახალ ნომერეფს ოტყობინუანდ. ართშა მარიაშ მოულა განსაკუთრებულ რდუ, მუშენდა ჩქიმ ოძირაფშა ჟირხოლო ბაღანა მიჸონ. წერმიდგინით ჩქიმ ხიოლ, მუჟამსით თინეფ ქობძირ!

1966 წანას შრომა-გასწორებაშ კოლონიაშე გომტუეს დო ოჯახწკუმა ართო უჩა ზღვაშ ხოლოს, ქალაქ არმავირშა გეგნოფრთით ოცხოვრებშა. თაქ ჩქინ ჟირ ქომოლსქუაქ, იაროსლავ დო პავლექ დებად.

 ჭიჭე ხანშა კა-გე-ბეშ თანამშრომელეფქ ბიბლიურ ლიტერატურაშა ქიმუგორუაფდესკონ თიშენ, ჩქინ ჸუდეშ გოლება ქიდიჭყეს. ლიტერატურას ირდიხას გორუნდეს, ჩხოულეფიშ ოჭკუმალს ხოლო ინიგორუდეს. ართ-ართ თეცალ გოლებაშ დროს, მანგარო გეუფეს დო ბარგიქ დეწიმდარეს. მარიას ეცოდ თინეფქ, მუშენდა უჩქუდ, მუთუნ შკას ვა რდეს, უბრალოთ უნჩაშიშ დავალებას ასრულენდეს. მარიაქ წვენ გემკუღ; თეშ უკულ ბარგიშ ჩქოთ, წყარი დო ხეშქოსალეფ ხოლო ქიმეუღ. მუჟამსით კა-გე-ბეშ უნჩაშიქ ქუმორთუნ, ოფიცერეფქ ქუწუეს, მუნერ ჯგირო მექცუ მარიაქ თინეფს. ულა დროს უნჩაშიქ გომძიცუეს დო ხე ქუდომვალუეს. ბედნერეფ ვორდით თიშ ძირაფათ, მუ ჯგირობუაქ მაჸუნ ბიბლიას ინოჭარილ სიტყვეფიშ მეჸუნას: „დარჯგინ უბადობას ჯგირით“ (რომ. 12:21).

თეცალ რეიდეფიშ უმკუჯინუო, არმავირს იშენით ვაგრძელენდით ქადაქებას. ვოხვარუდით დო ვამანგარენდით მაქადაქებელეფიშ ჭიჭე ჯგუფის მეზობელ ქალაქ კურგანინსკის. ბედნერ ვორექ, მუშენდა ამდღა არმავირს 6 დო კურგანინკის 4 კრება რე.

მიღდეს თიცალ დრო, მუჟამსით სულიერო ვეგვორდით მანგარო. მარა იეჰოვაშ მარდულ ვორეთ, მუშენდა ართგურ ჯიმალეფიშ ჭყოლოფათ გიმოწურუანდეს დო სულიერო მამანგარენდეს (ფსალმ. 130:3). თეწკუმა ართო ჩქინო დიდ გამოცდა რდუ, მუჟამსით კა-გე-ბეშ აგენტეფქ დუდ გემშიტყურუეს კრებეფშა დო შურო ვა გოგოფხვალემეთინ თეშ, თინეფწკუმა ართო ვმსახურენდით. თინეფ თეშ ოძირანდეს დუც, ითამ მთელ გურით დო მონდომათ ომსახურდეს ღორონც. ნამთინექ პასუხიშმგებლობა ხოლო მიღ ორგანიზაციას. მარა დრო ხანიშ უკულ ქუგოფხვადით მი რდეს თინეფ სინამდვილეს.

1978 წანას, 45 წანერ რდუნ თეშ, მარიაქ კინ დეორსულ. თის გურიშ პრობლემეფ უღუდ, ათეშენ ექიმეფს ოშკურდეს მუთუნქ ვაღოლკო დო ბაღანაშ მოშორებას ელუჩანდეს. მარიაქ მუთუნით ვაქიმინ თენა. საავადმყოფოს ექიმეფ თის ირდიხას ეკოჸუნდეს, ნამდა ბაღანაშ მაშორებელო ლიში გუკეთესკო. ათეშგურშენ, მარიაქ ინტ საავადმყოფოშე.

კა-გე-ბეშ თანამშრომელეფქ ქალაქიშ დოტება მოფთხუეს. ჩქი გეგნოფრთით ესტონეთიშ დედაქალაქ ტალინიშ ხოლოს ართ სოფელშა, ნამუთ საბჭოთა კავშირშა მიშეშ. ექიმეფიშ ნარაგადაშ უმკუჯინუო, ტალინს მარიას ჯანმრთელ ბაღანაქ შეძინ, ნამუსით ვიტალი ქიგვოდვით.

უმოს გვიანო ესტონეთშე ნეზლობნაიაშა (სამხრეთ რუსეთი) გეგნოფრთით ოცხოვრებშა. ჩქინ გოხოლუას საკურორტო ქალაქეფშა გილეფშით, სოდეთ შხვადოშხვა ქიანაშე მოულირ ხალხწკუმა მოხუჯურო ფქადაქენდით. ხალხი თაქ ომკურნალებშა მიშ, მარა ნამთინე თავრეშე მარადიულ სიცოცხლეშ იმენდით ირთუდ.

ირნერო ვოცადუდით, ჩქინ სქუალეფქ ქიჸოროფესკო იეჰოვა დო ემსახურესკო თის. ხშირას ვაპეჯენდით ჸუდეშა თიცალ ჯიმალეფს, მით ჯგირო იმოქმედენდეს ჩქინ ბაღანაფიშ სულიერობაშა. თინეფ შქას ართ-ართ რდუ ჩქიმ ჯიმა, გრიგორი, ნამუთ 1970—1995 წანეფს გილმალ ზედამხედველო მსახურენდ. არძას მოხიოლდეს თიშ მოულა, მუშენდა მანგარ მხიარულ რდუ დო ციგანობა უჸორდ. სტუმარეფწკუმა ართო ხშირას ბლაჸაფენდით ბიბლიურ ლაჸაფეფს დო თექ ჩქინ ბაღანეფს ბიბლიურ ისტორიეფ ქუჸოროფუ.

 1987 წანას ჩქინ ბოშიქ, იაროსლავქ ქალაქ რიგაშა (ლატვია) გეგნორთ, სოდეთ უმოს თავისფალო შეულებუდ ქადაქება. მარა მუჟამსით თიქ ჯარშა ვედუნ, წარმოწანა დო გვერდ ქიმეჩეს დო ჩხორო შხვადოშხვა ციხეს ხედ. თის მანგარო მეხვარ ჩქიმ ისტორიაქ, მუშ გურშენით ხშირას იფჩიებუდით. ციხეშე გითულაშ უკულ, ჭიჭე ხანშა იაროსლავქ პიონერო ქიდიჭყ მსახურება. 1990 წანას ჩქინ ბოშის, პავლეს, ნამუთ 19 წანერ რდუნ, ოკოდ პიონერო მსახურება იაპონიაშ ჩრდილოეთით, კუნძულ სახალინს. დუდშე ვა მოკოდეს თიშ გოტება, მუშენდა თექ ხვალე 20 მაქადაქებელ რდუ დო 9 000 კმ. მაშორენდეს თე კუნძულშე. მარა საბოლათ ულაშ ნება ქიმეფჩით დო თეს სარკო შედეგიქ ქუმაჸუნ. თექ ხალხი ჯგირო ირჩქილუანდ სამეფოშ გურშენ სახიოლო ამბეს დო ხუთ წანაშ დინახალე ამშვ კრებაქ გინწყ. პავლე თექ 1995 წანაშახ მსახურენდ. თიმ დროს ხვალე ვიტალი ცხოვრენდ ჩქინწკუმა, ნამუთ არძაშ უკლაშ სქუა რდუ. თის ბაღანობაშე უჸორდ ბიბლიაშ კითხირი. 14 წანერ რდუნ თეშ პიონერო მსახურება ქიდიჭყ დო თიწკუმა ართო ჟირ წანას მა ხოლო ვმსახურენდ პიონერო. თენა მანგარ ჯგირ დრო რდუ. მუჟამსით 19 წანერო გინირთუნ, ვიტალიქ სპეციალურ პიონერო ქიდიჭყ მსახურება.

წანეფიშ წოხოლე 1952 წანას კა-გე-ბეშ ოფიცერს მარიაშა ნარაგადა აფუდ: „ქიდიტე სქან რწმენა ვარდა ვით წანას ციხეს გაჸი დახუნალ. თევრეშე გითულირ, მოხუცებულ დო ხვალახე იჸიქ“. მარა ირფელქ შხვანერო ქუმოხვად. მა დო მარია ბგინაფლენდით, მუჭო უჸორდით ჩქინ ართგურ ღორონთ იეჰოვას, ჩქინ სქუალეფს დო თინეფს, მიდგას ჭეშმარიტებას ვოგურუანდით. მოხიოლდეს თი ადგილეფშა მეულა, სოდეთ ჩქინ სქუალეფ მსახურენდეს. ვორწყედით, მუნერ მარდულეფ რდეს თინეფ, მიდგას ჩქინ სქუალეფ ოხვარდეს იეჰოვაშ გაჩინებაფას.

1991 წანას იეჰოვაშ მოწმეეფიშ საქმიანობა კანონით აღიარეს დო თეს სამქადაქებლო საქმეშ წიმი ულაქ ქუმაჸუნ. ჩქინ კრებაქ ავტობუს ხოლო ქიჸიდ, ნამდა საბატონ დო ჟეშხას გოხოლუა ქალაქეფშა დო სოფელეფშა მიდაფრთითკო ოქადაქეფშა.

ბედნერ ვორექ, ნამდა იაროსლავი დო პავლე მუნეფიშ მეუღლეეფ, ალიონა დო რაიაწკუმა ართო ბეთელს მსახურენა; ვიტალი დო მუშ მეუღლე სვეტლანა სარაიონო მსახურებას რენა. ჩქინ უნჩაშ ოსურსქუა ირინა ოჯახწკუმა ართო გერმანიას ცხოვრენს. თიშ ქომონჯ დო სუმ ქომოლსქუა უხუცესეფო მსახურენა. ჩქიმ ოსურსქუა ოლგა ესტონეთის ცხოვრენს; თინა ხშირას მირეკუნს. სანარღოთ, ჩქიმ ძვირფას მეუღლე მარიაქ 2014 წანას დოღურ. ართ შურ მიღ თი დროშ მოულაშ, მუჟამსით ღორონთი გათელენს დო კინ ქობძირუნქ ჩქიმ ძვირფას მეუღლეს. ასე ქალაქ ბელგოროდის ფცხოვრენქ დო ჯიმალეფ მანგარო ელამრენა.

იეჰოვაშ მსახურებაქ ქუდმოგურუ, ნამდა ართგურო დოსკილადა ვა რე ეფი, მარა სიმშვიდე, ნამუსით იეჰოვა მარზენან, არძაშ უმოს ძვირფას რე. ხვამა, ნამუთ მა დო მარიაქ ართგურობაშ გურშენ მიბღითინ, თიშე ბრელით მეტ რდუ, ვინემ თეს ველუდი. 1991 წანას საბჭოთა კავშირიშ აკოცუმაშახ, 40 000-შე მეტ მაქადაქებელ რდუ, მარა ამდღა 400 000-შე მეტ მაქადაქებელ რე თი ქიანეფს, ნამუთ ართ დროს საბჭოთა კავშირშა მიშეშ! მა 83 წანერ ვორექ დო უხუცესო ვმსახურენქ. იეჰოვა ირიათო მარზენდ მოთვინებაშ ძალას. ნამდვილო, იეჰოვას კურთხევა ვემურკებ ჩქიმდა (ფსალმ. 13:5, 6).