1, 2. ა) მუშენ რე შეიოლებერ ახალ პიროვნებათ თირუა? ბ) ახალ პიროვნებაშ ნამ თვისებეფ რე მოშინაფილ კოლოსელებიშ 3:10—14-ის?

„ახალ პიროვნებათ თირუა“. თე სიტყვეფ „ახალ ქიანაშ თარგმანს“ ჟირშა რე მოშინაფილ დო ოხუ პიროვნებას, ნამუთ ღორონთიშ ნებათ რე გოჭყაფილი (ეფეს. 4:24; კოლ. 3:10). ჩქინო თეცალ პიროვნებაშ გავითარება დო იეჰოვაშ ძვირფას თვისებეფიშ გიმორჩქინა შეიოლებერ რე, მუშენდა თიშ ამნახანტო ვორეთ გოჭყაფილი (დაბ. 1:26, 27; ეფეს. 5:1).

² პირველ მშობლეფშე არძაქ არასრულყოფილება მიბღით, ათეშენ მინშა სწორ ვარენ ფერ კორნებეფ მირჩქინდუნა. თეწკუმა ართო ამდღარ ქიანა ხოლო მოქმედენს ჩქინწკუმა. მარა იეჰოვაშ მოხვარათ შემლებნა თიშ მოსაწონეფქ ქიპჸუათ. თეს ქიმვოჭირინუათინ, გუვარჩუათ ახალ პიროვნებას უღუნ ფერ მუსხირენ თვისება, ნამუთ მოციქულ პავლექ ღორონთიშ შურით ჭარ (წეკითხით კოლოსელები 3:10—14). * თეს გეძინელ გუვარჩიენთ,  მუჭო შემლებნა თე თვისებეფიშ გიმორნაფა მსახურებას.

3. მუ რე ახალ პიროვნებაშ მაძირაფალ თვისება?

³ მუჭოთ პავლე იჩიებუნ, ახალ პიროვნება მითინს ვეგშაკერძანს ართიანშე. თიქ თქუ: „ვა რე ვართ ბერძენი დო ვართ იუდეველი, ვართ წინადაცვეთა დო ვართ წინადაუცვეთელობა, ვართ უცხოელი, ვართ სკვითი, ვართ მონა დო ვართ თავისფალი“. * მუშენ ოკო ვეგშაბგორათ კრებას ართიან რჯულით, რასათ დო სოციალურ მდგომარეობათ? თიშენ, ნამდა იესოშ ჭეშმარიტ მიმაჸუნალეფ გორთილ ვა რენა (კოლ. 3:11; გალ. 3:28).

4. ა) მუჭო ოკო მექცუან შხვეფს იეჰოვაშ მსახურეფქ? ბ) მუქ შილებე ეცილას ქრისტიანულ ართობას?

⁴ მით ახალ პიროვნებათ ითირუნ, სოციალურ მდგომარეობაშ დო რჯულიშ უმკუჯინუო, ღირსუანო ოქცუ, მუჭოთ თანაქრისტიანეფსინ თეშ შხვეფს ხოლო (რომ. 2:11). მსოფლიოს ნამთინე კუნთხუს თენა ამდღარშახ პრობლემა რე. მაგალთო, სამხრეთ აფრიკას მოწმეეფიშ უმენტაშ თიცალ ადგილს ცხოვრენს, ნამუთ ადრე მთავრობას შხვადოშხვა რჯულიშ ხალხშო აფუდ გიშართილ. ათეშენ, 2013 წანას ხემძღვანელ საბჭოქ მანწყუ სპეციალურ პროგრამა თიშო, ნამდა შხვადოშხვა რჯულიშ ჯიმალეფქ ართმაჟია უჯგუშო გეჩინებაფესკო (2 კორ. 6:13). მუ პროგრამა რდუ თენა?

5, 6. ა) მუ პროგრამა წიმიჭყეს ართ ქიანას, ნამდა და დო ჯიმალეფ შქას ართობა ქოჸოფედკო? (ქოძირით სურათ 22-ა გვერდის). ბ) მუ შედეგიქ მაჸუნ თეს?

⁵ ჯიმალეფქ გინოჭყვიდეს, ნამდა ნამთინე საბატონ დო ჟეშხას შხვადოშხვა რჯულიშ დო ნინაშა მორაგადე ჟირ კრებაშ წევრეფქ ართო აკიშაყარესკო. თინეფ ართო მონაწილენდეს ქადაქებაშ საქმეს, ართო ოსწრუდეს შეხვალამეფს დო ართმაჟიას ჸუდეშა აპეჯენდეს. თე პროგრამას ოშობით კრებაქ მიღ მონაწილება, მუსით ჯგირ შედეგეფქ მაჸუნ. თე შედეგეფიშ გურშენ ფილიალს ბრელ წერილ მეჭარეს მუჭოთ მოწმეეფქ თეშ, შხვეფქ ხოლო. მაგალთო, ართ რელიგიურ მსახურქ თქუ: „მა იეჰოვაშ მოწმე ვა ვორექ, მარა ვორწყექ, ნამდა თქვა ორგანიზებულო ქადაქენთ დო შხვადოშხვა რჯულიშ კათა რეთინ თიშ უმკუჯინუო, ართობა გიღნა“. მუჭო მიოჭირინეს თეს იეჰოვაშ მოწმეეფქ?

⁶ დუდშე კოსა ნინაშა მორაგადე ართ და ნომა დუც არიდანდ ინგლისურ კრებაშე ჩეკანიან ჯიმალეფიშ დაპეჯებას მუშ უბრალო ჸუდეშა. მარა მუჟამსით ჩეკანიან მოწმეეფწკუმა ქიქადაქ დო თინეფიშ ჸუდეშა სტუმარო ქიმერთუნ, თქუ: „თინეფ ხოლო ჩქინობრა კათა ჸოფენა!“. მუჟამსით კოსა ნინაშა მორაგადე და დო ჯიმალეფს ქიმიაჩეს საშვალებაქ, ნამდა სტუმარიშ პატიცემა გეგმირჩქინესკონ, ნომაქ ოჭკუმალ გაგმანწყუ დო მუშ ჸუჩა ქუდაპეჯ ინგლისურ კრებაშე მუსხირენ და დო ჯიმა. თინეფ შქას რდუ ართ ჩეკანიან უხუცესი. ნომა იჩიებ: „მანგარო იმოქმედ თიშ ძირაფაქ, ნამდა თინა მზათ რდუ ქუდოზოჯკო პლასმასიშ ყუთის“. თე სპეციალურ პროგრამაშ შედეგო ბრელქ ახალ მეგობრეფ გირჩქინ დო გინოჭყვიდილ აფნა, ხოლო მეტ და დო ჯიმა გეჩინებეფუან.

7. მუშენ ოკო მიბღათ ირიათო გურშა შხვეფიშ გაჭირება?

⁷ პრობლემეფ ირო იჸუაფ, სოიშახ სატანაშ ქიანა ვემისპუ. თენა შილებე რდას სერიოზულ ლახალა, თხოზინ, სტიქიურ უბედრობეფ, სამუშაშ ვარდა ქონებაშ დინაფა დო შხვა. თე დროს ართიანს ქელუდირთათინ, შხვეფიშ გაჭირება გურშა ოკო მიბღათ, მუთ მიმეხვარებნა ჯგირ საქმეეფ ვაკეთათ  (ეფეს. 4:32). თე თვისებეფ, ნამუთ ახალ პიროვნებას უღუნ, მიმეხვარებნა ღორონთიშ მაგალითის მივაჸუნათ დო შხვეფს გურშა ეუქექუათ (2 კორ. 1:3, 4).

8. მუ შედეგეფ მოჸუნს შხვეფიშ გაჭირებაშ გურშა მეღალას დო ჯგირიშ კეთებას? ქიმიჸონით მაგალითი.

⁸ მუჭო შემლებნა კრებას უმოს ყურადღება გეგმიფრჩქინათ შხვა ქიანაშე მოულირეფშა დო თინეფშა, მით გაჭირებას რენა? თეშო საჭირო რე ხოლოშიან ურთიერთობა მიღდან თინეფწკუმა დო კრებაშ ღირსუან წევრეფო ვოგინაფუათ დუდ (1 კორ. 12:22, 25). მორთ გუვარჩუათ დანიკარლიშ მაგალით, ნამუქით ფილიპინეფშე იაპონიაშა გეგნორთ ოცხოვრებშა. სამუშას თის თექიანეფიშ გინაწონს გლახათ ოქცუდეს. ართშა თიქ იეჰოვაშ მოწმეეფიშ კრებაშ შეხვალამაშა ქიმერთ. დანიკარლი იჩიებ: „კრებას უმენტაშ იაპონელეფ რდეს, მარა თინეფქ ჯვეშ ნაჩინებუეფცალო ჯგირო შეფხვადეს“. ჯიმალეფიშ ელარნათ თიქ სულიერო წიმი მიდართ, დინათ დო ამდღა უხუცესო მსახურენს. კრებაშ უხუცესეფ მუნეფიშ კრებას კურთხევათ მირჩქინანა დანიკარლის დო მუშ ოსურ ჯენიფერს. უხუცესეფ იჩიებნა: „თინეფ პიონერო მსახურებაწკუმა ართო უბრალოთ ცხოვრენა დო თეთ სამეფოშ პირველ ადგილშა გერნაფაშ ჯგირ მაგალითის ირზენა“ (ლუკ. 12:31).

9, 10. მუ კურთხევეფ მოუღ შხვეფიშ გაჭირებაშ გურშა მეღალას მსახურებას? (ქიმიჸონით მაგალით).

⁹ სახიოლო ამბეშ ქადაქებათ შემლებნა „არძას ჯგირ ვუკეთათ“ (გალ. 6:10). ბრელ მოწმე ოცად ახალ ნინაშ დოგურაფას, ნამდა შხვა ქიანაშე მოულირეფს ქუქადაქას (1 კორ. 9:23). თეს დიდ კურთხევეფ მოუღ. მაგალთო, ართ ავსტრალიელ პიონერ დაქ ტიფანიქ ქიდიგურუ სუაჰილურ ნინა, ნამდა ქიმეხვარკო სუაჰილურ კრებას, ქალაქ ბრიზბენს. მართალ რე, ახალ ნინაშ დოგურაფა ადვილ ვა რდუ, მარა თექ ტიფანის მანგარ ხიოლ მოუღ. თინა იჩიებ: „საინტერესო მსახურება ქუგოკონან-და, შხვა ნინაშა მორაგადე კრებას ოკო იმსახურათ. თენა გუ მოგზაურობას სქან ქალაქ ვედიტუენ თეშ, სოდეთ ქოძირუნთ მსოფლიო საჯიმალოს დო ქიგინანთ სარკო ართობას“.

¹⁰ მორთ ქობძირათ ხოლო ართ იაპონელ ოჯახიშ მაგალით. თინეფიშ ოსურსქუა საკიკო იჩიებ: „1990-იან წანეფს მსახურებას ხშირას შეფხვადუდით ბრაზილიაშე მოულირ კათას. მუჟამსით ბიბლიურ მუხლეფს, მაგალთო გამოცხადებაშ 21:3, 4-ის ვარდა ფსალმუნიშ 37:10, 11, 29-ს მუნეფიშ ნინაშა, პორტუგალიურო ეშუკითხანდითინ, დიდ ინტერესით მირჩქილედეს დო მინშა ჩილამურეფ ხოლო ელაჸუნუდეს“. მარა ირფელ თეთ ვა თებე. საკიკო აგრძელენს: „მუჟამსით ქობძირით, ნამდა თინეფ სულიერს რდეს მოჸუმენაფილინ, მთელ ოჯახიქ ქიდიბჭყით  პორტუგალიურ ნინაშ გურაფა“. უმოს გვიანო, თე ოჯახიქ ხე შეუნწყუ პორტუგალიურ ნინაშა კრებაშ გონწყუმას. წანეფიშ დინახალე თინეფქ შხვა ქიანაშე მოულირ ბრელ კათას მეხვარეს იეჰოვაშ გაჩინებაფას. საკიკო გეუძინანს: „პორტუგალიურ ნინაშ დაგურაფალო ბრელ იფხანდით, მარა ირფელს გინმოწონუნს კურთხევეფ, მუდგაქ თეს მაჸუნ. ჩქი იეჰოვაშ მანგარ მარდულეფ ვორეთ“ (წეკითხით საქმეები 10:34, 35). *

11, 12. ა) მუშენ ოკო მოკოდან ახალ პიროვნებათ თირუა? ბ) მუ მიმეხვარებნა ქუდოფსკიდათ თანდაბალეფქ?

¹¹ ახალ პიროვნებათ თირუა იეჰოვაშ განსადიდებელო ოკო მოკოდან დო ვართ ხოლო შხვეფშე ცქვაფაშ მიოღებელო. ქიგიფშინათ, ნამდა სრულჸოფილ ანგელოზიქ ხოლო გეამაყ დო შეცოდ (ქეშუდარით ეზეკიელი 28:17). მუსხით უმოს ძნელ რე არასრულყოფილ კათაშო, დუდ ეუჩილითუან სიამაყეს! მარა, თეშ უმკუჯინუო შეიოლებერ რე თანდაბლობაშ გავითარება. მუ მიმეხვარებნა თეს?

¹² თანდაბალეფ ქუდოფსკიდათინ, ირ დღას დრო ოკო გეგმურთათ თიშე ფიქრის, მუდგასით ბიბლიას პკითხულენთ (კან. 17:18—20). არძაშ უმოსო, იესოშ გურაფეფშე დო თიშ თანდაბლობაშ მაგალითშე ოკო იფიფქრათ (მათ. 20:28). მაგალთო, იესოქ მუშ მოწაფეეფს კუჩხეფ უბონ (იოან. 13:12—17). თეწკუმა ართო ირიათო ოკო იბლოცათ ღორონთიქ ქომჩან წმინდა შურ, ნამდა ქიმმეხვარან შხვეფშე უმოსო ვემიფრჩქინათ ჩქინ დუდი (გალ. 6:3, 4; ფილ. 2:3).

13. მუ კურთხევეფს მომღანა თანდაბლობა?

¹³ წეკითხით იგავები 22:4. * იეჰოვა მუშ არძა მსახურშე ითხინს თანდაბლობას. თეს დიდ კურთხევეფ მოჸუნს. თანდაბლობა მიმეხვარებნა მშვიდობა დო ართობა მიღდან კრებას დო ჯგირობუა მიბღათ იეჰოვაშე. მოციქულ პავლექ თქუ: „არძაქ თანდაბალო მექცით ართიანს, მუშენდა ღორონთ ამაყეფს ოწინააღმდეგ, მარა თანდაბალეფშო ჭყოლოფას გიმირჩქინანს“ (1 პეტ. 5:5).

14. მი მარზენა ლიბ ხასიათიშ დო მოთვინებაშ არძაშ უჯგუშ მაგალითის?

¹⁴ ამდღარ ქიანას სუსტ პიროვნებეფო მიორჩქნა თინეფ, მით ლიბ ხასიათის დო მოთვინებას გიმირჩქინანს. მარა თენა თაშ ვა რე! თე ძვირფას თვისებეფს სამყაროს არძაშე უმოს ძალიერ პიროვნება, იეჰოვა ღორონთ, გიმირჩქინანს დო თინა ლიბ ხასიათიშ დო მოთვინებაშ არძაშ უჯგუშ მაგალითის მარზენა (2 პეტ. 3:9). თენა ჯგირო იძირე თევრეშე, მუჭო უპასუხ იეჰოვაქ აბრაამიშ დო ლოტიშ ოთხუალს ანგელოზეფიშ საშვალებათ (დაბ. 18:22—33; 19:18—21). თეწკუმა ართო, იეჰოვა 1 500 წანაშე მეტ ხანს უთვინენდ ისრაელიშ უკეკ ხალხის (ეზეკ. 33:11).

15. მუ მაგალით დომტუეს იესოქ ლიბ ხასიათ დო მოთვინებაშ გიმორჩქინაშ?

¹⁵ იესოს ლიბ ხასიათ უღუდ (მათ. 11:29). თინა დიდ მოთვინებას გიმირჩქინანდ, მუჟამსით მუშ მიმაჸუნალეფიშ სისუსტეეფს ორწყედ. დედამიწას მსახურებაშ დროს იესო ითვინენდ უსამართო კრიტიკას რელიგიურ უნჩაშეფშე დო ლიბ ხასიათის დო მოთვინებას სიცოცხლეშ ბოლოშა გიმირჩქინანდ. თინა მანგარ ჭუათ იტანჯებუდ, მუჟამსით წამებაშ ბოძის მიკოჭკადუდ, მარა თე დროს ხოლო იეჰოვას თხინდ: „მუმა, ქაპატი თინეფს, მუშენდა ვა უჩქუნა, მუს ორთნან“ (ლუკ. 23:34). მართალო, მუ დიდებულ მაგალით დომტეს იესოქ ლიბ ხასიათიშ დო მოთვინებაშ გიმორჩქინაშ, თი  დროს ხოლო, მუჟამსით მანგარ რთულ სიტუაციას ვორეთ! (წეკითხით 1 პეტრე 2:21—23). *

16. მუჭო შემლებნა გიმიფრჩქინათ ლიბ ხასიათ დო მოთვინება?

¹⁶ ჩქი მუჭო შემლებნა გიმიფრჩქინათ ლიბ ხასიათ დო მოთვინება? პავლექ თეშ ართ საშვალება მიშინუ, მუჟამსით თანაქრისტიანეფს წერილ მეჭარ: „მუთვინით დო მთელ გურით ქაპატით ართიანს, მითინშა ჩიულიშ მიზეზ გიღუნა-და. მუჭოთ იეჰოვაქ გაპატის მთელ გურითინ, თეშ თქვა ხოლო ქაპატით ართიანს“ (კოლ. 3:13). თე ზუკოლს ქიმვაჸუნათინ, ლიბ ხასიათ დო მოთვინება ოკო გეგმიფრჩქინათ, ნამუთ ხეს შეუნწყუნს კრებაშ ართობას.

17. მუშენ რე მნიშვნელოვან ლიბ ხასიათ დო მოთვინება?

¹⁷ იეჰოვა ითხინს, ვორდათ ლიბ ხასიათიშ დო გიმიფრჩქინათ მოთვინება. თე თვისებეფ აუცილებერ რე გინასკილიდარო დო ახალ ქიანას ოცხოვრებელო (მათ. 5:5; იაკ. 1:21). მარა არძაშ უმოს მნიშვნელოვან თინა რე, ნამდა თე თვისებეფიშ გიმორჩქინათ ვადიდენთ იეჰოვას დო შხვეფს ხოლო ვოხვარუთ თაშ მიქცუან (გალ. 6:1; 2 ტიმ. 2:24, 25).

18. მუჭო მიგეხვარებნა ჸოროფა ვეგშაკერძათ ართიან?

¹⁸ არძა თვისება, ნამუთ გუვარჩითინ, ჸოროფას ოკავშირ. მაგალთო, მოციქულ იოანექ დუზუკოლ ჯიმალეფს, მით ქონებიერეფს ღარიბეფშე უჯგუშო ოქცუდ. თიქ ქაძირუ, ნამდა თეცალ საქციელით ღორონთიშ კანონს გინმურთანდეს: „სქან დუდცალო გიჸორდას არძა“. უკულ გეუძინ: „თქვან შქას გიშაკერძაფას ადგილ კინ ქოუღუნ-და, ცოდენთ“ (იაკ. 2:8, 9). მარა, ჸოროფა მიმეხვარებნა, ვეგშაბგორათ მითინ რჩქინათ, რჯულით ვარდა სოციალურ მდგომარეობათ. თაშ ნამდა, თეს შხვეფიშ ოძირაფალო ვა ვორთუთ. თე თვისება ჩქინ პიროვნებაშ ნაწილ ოკო რდას.

19. მუშენ რე მნიშვნელოვან ჸოროფაშ გავითარება?

¹⁹ თეს გეძინელ, ჸოროფა მოხვარნა „მიფთვინათ . . . ჯგირ ვაკეთათ“ დო „ვებყოყოჩათ“ (1 კორ. 13:4). ნამდვილო, მოთვინება, ჯგირიშ კეთება დო თანდაბლობა მოსაჭირნა, ნამდა სამეფოშ გურშენ სახიოლო ამბე არძას ქუქადაქათ (მათ. 28:19). თე თვისებეფ მიმეხვარებნა ადვილო ქუგუგათ არძა და დო ჯიმას კრებას. მუ მაჸუნუ თეცალ ჸოროფაშ გიმორჩქინას? თენა ხეს უნწყუნს კრებაშ ართობას, განადიდენს ღორონც დო შხვეფს ხოლო მეხვარებ ჭეშმარიტებაშ მეღებას. ბიბლია ახალ პიროვნებაშ თვისებეფიშ ეჭარუას თეცალ მნიშვნელოვან სიტყვეფით ათენს: „თეს გეძინელ, გავითარით ჸოროფა, მუშენდა თინა ართიანიშ გუმაართებელ სრულყოფილ კავშირ რე“ (კოლ. 3:14).

20. ა) მუ ოკო ბკითხათ ჩქინ დუც დო მუშენ? ბ) მუ დროშ მულას მივახიოლანთ არძაშ უმოსო?

²⁰ თითოულქ ოკო ქობკითხათ ჩქინ დუც: „ხოლო მუშ კეთება შემლებ, ჯვეშ პიროვნებაშ დატებელო“? შურ დო გურით ოკო იბლოცათ დო მანგარო ოკო იფხანდათ, ნამდა მიფშორათ ირფელ მუთ მეცილებნა დევკვირდათ „ღორონთიშ სამეფო“ (გალ. 5:19—21). თეს გეძინელ, ხოლო ართ კითხვაშე ოკო დეფიფქრათ: „ქუვაგრძელენქო ჩქიმ პიროვნებაშ გაახალებას“? (ეფეს. 4:23, 24). არასრულჸოფილებაშ გურშენ ირიათო მოსაჭირნა ხანდება, ნამდა ახალ პიროვნებათ დიფთირათ დო ჯვეშ პიროვნებას ვადვართათ. მარა წერმიდგინით, მუშ მაჯგირა იჸუაფ ცხოვრება, მუჟამსით არძა სრულყოფილო დითირუ ახალ პიროვნებათ!