1, 2. ა) მუშენ შილებე გომრჩქინდან კითხვაქ: „მუჟამშა“? ბ) მუშენ შილებე გურშა ელამკინან ჯვეშ დროშ ართგურ მსახურეფიშ მაგალითეფქ?

„მუჟამშა?“. თე კითხვა ართგურ წინასწარმეტყველეფქ ესაიაქ დო აბაკუმქ წიმოჭკირეს (ეს. 6:11; აბაკ. 1:2). მეფე დავითიქ მა-13 ფსალმუნს ხუთშა მიშინუ თე კითხვა: „მუჟამშა?“ (ფსალმ. 13:1, 2). იესო ქრისტეს ხოლო გურჩქინდ თე კითხვაქ, მუშენდა თიცალ ხალხწკუმა ცხოვრენდ, მიდგას ვა უღუდ რწმენა (მათ. 17:17). თაშ ნამდა, თე კითხვაქ მინშა ჩქი ხოლო გომრჩქინდეს-და, ვეგიბკვირუათ ოკო.

² მუშენ შილებე გომრჩქინდან თე კითხვაქ? თეშ მიზეზ შილებე რდას უსამართობა, ხანშა მიშულა, ლახალა ვარდა თი პრობლემეფ, ნამუთ „ბოლო დღალეფს მანგარ ძნელ გინაღალარ“ რე (2 ტიმ. 3:1). ხოლო ართ მიზეზ შილებე რდას შხვეფიშ გლახა დამოკიდებულება, ნამუთ ძალეფს მიდმამღანა. მუდგა ვარდასინ, გურშა ელამკინანა თიშ რჩქინა, ნამდა იეჰოვა თე კითხვაშ გურშენ ვა გადღანებ მუშ ართგურ მსახურეფს ჯვეშო.

3. მუ მიმეხვარებნა მივერუათ ძნელო გინაღალარ პრობლემეფს?

³ მუ მიმეხვარებნა მივერუათ ძნელო გინაღალარ პრობლემეფს? მოწაფე იაკობიქ, იესოშ ჯიმაჸონერქ, ღორონთიშ შურით ჭარ: „ჯიმალეფ, მითვინით უფალიშ მოულაშა“ (იაკ. 5:7). დასურო, ჩქი  არძას მოსაჭირნა მოთვინება. მუს ნიშნენს მოთვინება დო მუჭო შემლებნა თიშ გიმორჩქინა?

4, 5. ა) მუს ნიშნენს მოთვინება? ბ) მუჭო ეჭარუნს მოწაფე იაკობ მოთვინებას? (ქოძირით სურათ მა-3 გვერდის).

⁴ ბიბლიაშე ბგებულენთ, ნამდა მოთვინება წმინდა შურიშ ნაყოფ რე; ღორონთიშ მოხვარაშ უმშო არასრულყოფილ კათას ვეშიალებე თე თვისებაშ გიმორჩქინა არძაშ უმოსო, ძნელ სიტუაციეფიშ დროს. მოთვინება იეჰოვაშ საჩუქარ რე დო თიშ გიმორჩქინათ ღორონთიშ ჸოროფას ვოძირანთ. მოთვინებათ შხვეფიშ ჸოროფას ხოლო გიმოფხანტუნთ. მუჟამსით ვეფთვინენთინ, ჸოროფა ჭიჭე-ჭიჭეთ დინუ, მარა მოთვინებაშ გიმორჩქინათ უმოსო ვამანგარენთ თის (1 კორ. 13:4; გალ. 5:22). მოთვინებაშ გიმოხანტუას შხვა მნიშვნელოვან ქრისტიანულ თვისებეფ ხოლო მოხვარნა. მაგალთო, თინა მანგარო რე დაკავშირებულ გარზებაწკუმა, ნამუთ მოხვარნა ძნელ სიტუაციეფიშ დროს ვა ვოდინუათ ხიოლი (კოლ. 1:11; იაკ. 1:3, 4). მოთვინებაშა თინა ხოლო მიშურს, მანგიორ მითინს ვეგნუგათინ თეშ გეგნიბღათ ირნერ ტანჯება დო იეჰოვაშ ართგურეფქ ქიდოფსკიდათ. ბიბლიას ჯგირო რე ეჭარილ, ნამდა მოთვინებათ ოკო იბჯინათ (წეკითხით იაკობი 5:7, 8). *

⁵ ოკო ვუჯინათ იეჰოვას მოთვინებათ? ჩქინ სიტუაციაშ ეიოჭარალო იაკობის დიხაშმოხანდეშ მაგალით მოჸუნს. მართალ რე, თინა მოსავალიშ მაჸონაფალო ბრელს მუშენს, მარა თიშა ვა რე დამოკიდებულ ვართ ამინდი დო ვართ ნათასაშ რდუალა. თის თინა ხოლო ვეშულებ, დაჩქარას დრო. დიხაშმოხანდეს უჩქ, ნამდა მოთვინებათ ოკო უჯინას მოსავალიშ მოულას. თეგვარო, ამდღა ჩქი ხოლო ვეშემლებნა ბრელ მუთუნიშ თირუა, სოიშა იეჰოვა მუშ დუნაპირებუს ვეშიასრულენს (მარ. 13:32, 33; საქ. 1:7). ათეშენ, დიხაშ მოხანდეცალო, ჩქი ხოლო მოთვინებათ ოკო ვუჯინათ იეჰოვას.

6. მუს ბგურაფლენთ წინასწარმეტყველ მიქაშ მაგალითშე?

⁶ ამდღარ ჩქინ მდგომარეობა წინასწარმეტყველ მიქაშ დროს მოგენს. თინა უდუნდებელ მეფე ახაზიშ დროს ცხოვრენდ, მუჟამსით ირნერ უბადობა რდუ გავრცელებულ. თიმ დროს ხალხის უბადობაშ კეთებაშა აფუდ ხე მენწყილი (წეკითხით მიქა 7:1—3). * მიქას არჩქილედ, ნამდა ვათირედ თე მდგომარეობა. მუჭო მიქცუ თიქ? მიქა იჩიებ: „მა კინ იეჰოვაშ მენდ მაღვენუ. მოთვინებათ ვუჯინექ ჩქიმ მარსხებელ ღორონც. ქუმომრჩქილუანს ჩქიმ ღორონთი“ (მიქ. 7:7). მიქაცალო, ჩქი ხოლო მოთვინებათ ოკო ვუჯინათ ღორონც.

7. მუშენ ოკო ვუჯინათ იეჰოვას მოთვინებათ?

⁷ მიქაცალ რწმენა ქომღუნან-და, მზათ იპჸით მოთვინებათ ქუჯინათ იეჰოვას. ჩქინ სიტუაცია ვა გუ თი პატიმარს, ნამუთ ელუ, მუჟამ გიშუღანა განაჩენს. თინა თე დღაშ მოულას შურმალაფუო ვა უჯინე, უბრალოთ ვეჯინასინ, შხვა შარა ვა უღუ. მარა ჩქი გვალო შხვანერ სიტუაციას ვორეთ. მოთვინებათ ვუჯინეთ იეჰოვას, მუშენდა მიჩქნა, თინა მუშ დროს შეასრულენს დუნაპირებუს დო მარადიულ სიცოცხლეთ მაკურთხენა. თაშ ნამდა, ქუგურზათ „ირფელს მოთვინებათ დო ხიოლით“ (კოლ. 1:11, 12). მარა თის ქოფიქრენთ, ნამდა იეჰოვა ვა ჩქარენს  დო თეშენ ქიჭირებუთ-და, ღორონც ოწყინებაფუანთ (კოლ. 3:12).

8. მუქ ოკო ვაგმოჭყორდან, მუჟამსით ფიფქრენთ ჯვეშ დროშ ართგურ მსახურეფიშ მაგალითეფშე?

⁸ ჯვეშ დროშ ართგურ მსახურეფ მოთვინებათ უჯინედეს იეჰოვაშ დუნაპირებუშ შესრულებას. თინეფიშ მაგალითეფ მიმეხვარებნა, ჩქი ხოლო მოთვინებათ ვუჯინათ იეჰოვას (რომ. 15:4). მუჟამსით თე ართგურ მსახურეფიშ მაგალითეფშე ფიფქრენთინ, ჯგირ იჸუაფ ვაგმოჭყორდან მუსხი ხანს იჯინედეს, მუშენ რდეს მზათ იჯინესკო დო მუ კურთხევეფ მიღეს მოთვინებაშ გურშენ.

9, 10. მუსხი ხანს უჯინედეს აბრაამი დო სარა იეჰოვას?

⁹ გუვარჩუათ აბრაამიშ დო სარაშ მაგალითი. თინეფ მოშინაფილ რენა თი კათა შქას, „მით რწმენათ დო მოთვინებათ ღებულენა არძა დუნაპირებუს“. ბიბლიაშე იძირე, მუჭო გიმირჩქინ აბრაამქ მოთვინება დო მიღ დუნაპირებ, ნამდა იეჰოვა აკურთხენდ დო გამრავლენდ მუშ გამნარყის (ებრ. 6:12, 15). მუშენ ოკო გიმირჩქინკო აბრაამქ მოთვინება? მუშენდა დუნაპირებუშ შესრულებას დრო ოსაჭირუდ. შეთანხმებაქ, ნამუთ იეჰოვაქ აბრაამწკუმა დოდვუნ, ძალაშა გემშართ ჯვ. წ. 1943 წანაშ 14 ნისანს, მუჟამსით აბრაამქ დო სარაქ მუნეფიშ ჸუდეშარეფწკუმა ართო, მალწყარ ევფრატ გეგნოკვათეს დო გენორთეს დუნაპირებ ქიანაშა. აბრაამს 25 წანაქ აჸუ ოჯინექ, სოიშახ ჯვ. წ. 1918 წანას ისაკი დებადებუდუნ. თის 60 წანაქ ხოლო აჸუ ოჯინექ, სოიშახ მუშ მოთალეფ, ესავი დო იაკობი, ჯვ. წ. 1858 წანას დებადებდეს (ებრ. 11:9).

¹⁰ მიაჩუო აბრაამს დუნაპირებ დიხაშე მუთუნ ნაწილქ? ბიბლიას ჭარ: „ღორონც თე ქიანაშე ნარჩაკუჩხიშ მადიდა დიხა  ხოლო ვემუჩამ აბრაამშა, მარა დეპირ, ნამდა თე ქიანა მუშ კუთნეულ იჸიდ დო თიშ უკულ მუშ გამნარყის ქიმიაჩამუდ, თიშ უმკუჯინუო, ნამდა თე დროს სქუა ვა ჸუნდ“ (საქ. 7:5). ევფრატიშ გინოჭკირუაშე, 430 წანაქ გემკორთუნ თიშ უკულ, აბრაამიშ გამნარყიქ ერო გინირთ დო დეკვირდ დუნაპირებ ქიანა (გამ. 12:40—42; გალ. 3:17).

11. მუქ მეხვარ აბრაამს მოთვინებათ იჯინკო დო მუ კურთხევეფს მიღენს თინა?

¹¹ აბრაამი მზათ რდუ იჯინკო, მუშენდა თიშ მოთვინება იეჰოვაშ რწმენაშა რდუ გერსხილი (წეკითხით ებრაელები 11:8—12). * თინა ხიოლით იჯინედ თიშ უმკუჯინჯუო, ნამდა ბოლოშა ვა უძირ თე დუნაპირებუშ შესრულება. მარა წერმიდგინით აბრაამიშ ხიოლ, მუჟამსით ღორონთ გათელენს თის სამოთხეს დედამიწას. თის უკვედას იჸი, მუჟამსით ბიბლიაშ ბრელ ადგილს წეკითხენს მუშ დო მუშ გამნარყიშ ისტორიას. * მუ ბედნერ იჸუაფ აბრაამი, მუჟამსით ქიგეგენს, მუშმადიდა როლ ილაჸაფ იეჰოვაშ განზრახვაშ შესრულებას, ნამუთ დუნაპირებ შთამომავალს ოხუდ. მუშო ოკო რაგად, თინა მუშ თოლო ქოძირუნს, ნამდა თე კურთხევეფ დასურო ღირუდ ჯინაშა.

12, 13. მუშენ ოსაჭირუდ იოსების მოთვინება დო მუნერ განწყობა უღუდ თის?

¹² აბრაამიშ მოთაშსქუაქ, იოსებიქ, ხოლო ოძირუ, ნამდა მზათ რდუ მოთვინებათ იჯინკო. თიქ მანგარ უსამართობას შეხვად. დიო ხოლო 17 წანერ რდუნ თეშ ჯიმალეფქ გეგმოჩეს. თეშ უკულ, ქეკაბრალეს მუშ უნჩაშიშ ოსურიშ გაუპატიურებაშ მონდომა დო ციხეს ქიმთახუნეს (დაბ. 39:11—20; ფსალმ. 105:17, 18). სწორ საქციელიშ გურშენ კურთხევა მიღკონ თიშ მანგიორ, თიქ დესაჯ. მარა 13 წანაშ უკულ ირფელქ დითირ. თინა ციხეშე გოუტუეს დო ფარაონიშ უკულ მაჟია კოჩ რდუ ეგვიპტეს (დაბ. 41:14, 37—43; საქ. 7:9, 10).

¹³ გაჟღამუო იოსები თესხი უსამართობაქ? მიოდინუო თიქ მუშ ღორონთიშ, იეჰოვაშ ნდობა? ვარ. მუქ მეხვარ იოსების მოთვინებათ იჯინკო? თის იეჰოვაშ რწმენა უღუდ დო ორწყედ თიშ ხეს. თენა ჯგირო იძირე თი სიტყვეფშე, ნამუთ მუშ ჯიმალეფს უწუ: „ვა გაშკურნან! ღორონთი ხომ ვა ვორექ?! თქვა გლახაშ კეთება გილამდეს ჩქიმო, მარა ღორონც საჯგიროთ აფუდ გინოჭყვიდილ თეშ ქუმოხვადკო ირფელქ, მუჭოთ ამდღა რენ, ბრელიშ ორსხებელო“ (დაბ. 50:19, 20). საბოლათ, იოსებიქ ქიმეხვად, ნამდა თე ირფელ ღირუდ ჯინაშა.

14, 15. ა) მუშენ რე დავითიშ მოთვინება სამაგალითო? ბ) მუქ მეხვარ დავითის მოთვინებათ ჯინას?

¹⁴ მეფე დავითიქ ხოლო ბრელ უსამართობას შეხვად. მართალ რე იეჰოვაქ თინა ახალგაზრდა რდუნ თეშ გიშეგორ ისრაელიშ მეფეთ, მარა სოდგარენ 15 წანაქ აჸუ ოჯინექ, ონდო მეფობას დიჭყანდუნ (2 სამ. 2:3, 4). თე დროშ დინახალე ისრაელიშ მეფე, საული დავითის ოჸვილარო მოთხოზუდ. * ათეშენ დავითის ჸუდეშე აჸუ ონტებელქ; თინა მინშა შხვა ქიანას ცხოვრენდ  დო მინშა ხოლო ფოთქვის მითოხედ. მუჟამსით საული ჩხუპის დოჸვილესინ, თიშ უკულ ხოლო დავითის სოდგარეშ 7 წანაშე მეტიქ აჸუ ოჯინექ სოიშახ მთელ ისრაელიშ მეფეთ გინირთუდ (2 სამ. 5:4, 5).

¹⁵ მუშენ ოსაჭირუდ დავითის მოთვინებათ ჯინა? თეშ პასუხ მოჩამილ რე თი ფსალმუნს, სოდეთ დავითიქ ხუთშა წიმოჭკირ კითხვა: „მუჟამშა?“. თინა იჩიებ: „მა სკან ჯგირობუას ვორექ მენდებული. გეხარას ჩქიმ გურქ სკანდე რსხებათ. ვუბირქ იეჰოვას, მუშენდა ჯგირ მიკეთ თიქ“ (ფსალმ. 13:5, 6). დავითის წანდ იეჰოვაშ ართგურ ჸოროფაშ. თინა ფიქრენდ, მუჭო მეხვარ იეჰოვაქ ულირს დო ხიოლით ელუდ თიშე რსხებას. დასურო, დავითიქ ქოძირ, ნამდა თე ირფელ ღირუდ ჯინაშა.

16, 17. მუჭო დომტეს იეჰოვა ღორონთიქ დო იესო ქრისტექ მოთვინებათ ჯინაშ არძაშ უჯგუშ მაგალითი?

¹⁶ იეჰოვა ვა ფთხინა თიშ კეთებას, მუდგასით მუ ვართ. თიქ მოთვინებათ ჯინაშ არძაშ უჯგუშ მაგალით მუჩეს (წეკითხით 2 პეტრე 3:9). * მაგალთო, ანთასობით წანაშ წოხოლე, სატანაქ ქეკაბრალ იეჰოვას, ნამდა თინა ვარდ სამართლიან მართველი. მარა იეჰოვა მოთვინებათ უჯინე თი დროს, მუჟამსით მუშ სახელ ბოლოშა გემართლებ. საბოლათ, თენა მუღანს თოლით უძირაფ კურთხევას თინეფს, „მიდგა თის უჯინე“ (ეს. 30:18).

¹⁷ იესო ქრისტე ხოლო მზათ რდუ იჯინკო. თიქ ღურაშახ ართგურო ქუდოსკიდ დო ახალ წანაკოროცხუათ 33 წანას ღორონც გიშაჸიდირალ მსხვერპლიშ ფასი ქეწურინუ. მარა იესოს 1914 წანაშა აჸუ ოჯინექ, სოიშახ მეფობას დიჭყანდუნ (საქ. 2:33—35; ებრ. 10:12, 13). ანთასწანიან მართველობაშ ბოლოს იესოშ არძა ნტერ გენადგურებ (1 კორ. 15:25). მართალ რე, ბრელ ხანს მაჸინა ოჯინე, მარა შემლებნა დარწმუნებულ ვორდათ, ნამდა თენა ღირ ჯინაშა.

18, 19. მუ მიმეხვარებნა მოთვინებათ იბჯინათ?

¹⁸ მუშო ოკო რაგადი, არძაქ მოთვინება ოკო გიმიფრჩქინათ. მარა მუ მიმეხვარებნა თეს? ქოთხით ღორონც წმინდა შური. ვაგგოჭყორდან, ნამდა მოთვინება წმინდა შურიშ ნაყოფ რე (ეფეს. 3:16; 6:18; 1 თეს. 5:17—19). თაშ ნამდა, შურ დო გურით ქოთხით იეჰოვას ქიმერჩან გარზება დო მოთვინება.

¹⁹ აბრაამს, იოსების დო დავითის იეჰოვაშ რწმენაქ დო ნდობაქ მეხვარ, მოთვინებათ უჯინესკო ღორონთიშ დუნაპირებუშ შესრულებას. თინეფ ხვალე მუნეფიშ დუდშე დო ჯგირ ცხოვრებაშ მონწყუალაშე ვა ფიქრენდეს. თე ართგურ მსახურეფიშ მაგალითეფ დო თიშე დაფიქრება მუნერო აკურთხ იეჰოვაქ თინეფ, ჩქი ხოლო მიმეხვარებნა მოთვინებათ იბჯინათ.

20. მუ ოკო მაფდან გინოჭყვიდილი?

²⁰ თიმწკუმა ხოლო, მუჟამსით ართგურობაშ გამოცდეფს შეფხვადუთინ, გინოჭყვიდილ ოკო მაფდან მოთვინებაშ გიმორჩქინა. მართალ რე, მინშა შილებე ქიმვოძახათ „მუჟამშა იეჰოვა?“ (ეს. 6:11). მარა ღორონთიშ წმინდა შურ გუმამანგარენა დო ჩქი ხოლო იერემიაცალო ქოფთქუანთ: „იეჰოვა რე ჩქიმ წილი . . . ათეშგურშენ ქუჯინექ თის“ (გოდ. 3:21, 24).