1. მუჭო შემლებნა იეჰოვაწკუმა თანამშრომლობა?

მუჟამსით იეჰოვაქ ადამიანეფ გაჭყუნ, თის ოკოდ თინეფწკუმა ითანამშრომლუკო. მართალ რე, ამდღა არასრულყოფილეფ ვორეთ, მარა ართგურ კათას შეულებ ღორონთწკუმა თანამშრომლობა. თეს ვორთუთ, მუჟამსით ფქადაქენთ სახიოლო ამბეს სამეფოშ გურშენ დო მოწაფეეფო ვამზადენთ ხალხის (1 კორ. 3:5—9). უბრალოთ წერმიდგინით, მუშმადიდა პატი რე ირფელიშ შემალებე ღორონთწკუმა, თეცალ დიდებულ საქმეს თანამშრომლობა. მარა ღორონთწკუმა თანამშრომლობა, ხვალე ქადაქებას დო მოწაფეეფიშ მომზადებას ვა ნიშნენს. თე სტატიას გუვარჩიენთ შხვა საკითხეფს ხოლო, ნამუთ ღორონთწკუმა თანამშრომლობაშა მიშურს: ოჯახიშ წევრეფიშ დო თანამორწმუნეეფიშ მოხვარა, სტუმარიშ პატიცემა, შხვადოშხვა თეოკრატიულ პროექტეფს მოხალისეთ მსახურება დო მსახურებაშ გაფართოება (კოლ. 3:23).

2. მუშენ იჸუაფ არაგონივრულ ჩქინ დუდიშ შხვაწკუმა შედარება?

² თე საკითხიშ გარჩიებაშ დროს, თქვან დუდ შხვეფს ვეშუდარათ. ირიათო რშუდან, ნამდა არძას შხვადოშხვანერ ასაკ, ჯანმთელობა, მდგომარეობა დო შესაძლებლობეფ უღჷ. პავლე მოციქულქ თქუ: „თითოულქ მუშ საქმე გეგმოცადას დო ხვალე თიმწკუმა აღვენუ დიდ ხიოლიშ მიზეზი მუშით დო ვართ ხოლო მუშ დუდიშ შხვაწკუმა შედარებათ“ (გალ. 6:4).

3. მუშენ შემლებნა ფთქუათ, ნამდა არძა მით ზრუნენს მუშ ოჯახშე, იეჰოვაწკუმა თანამშრომლენს?

³ იეჰოვა ელჷ მუშ მსახურეფშე, ნამდა იზრუნენა მუნეფიშ ოჯახეფშო. ოჯახის ფინანსურო ქიმკაჯინათინ თიშენ, შილებე ომუშებელ გაფდან. ბრელ დიდალეფ ჸუდეს სკიდუნა, ნამდა მუნეფიშ ჭიჭელეფს ქიმკაჯინან. ნამთინე სკუაქ ოკო იზრუნას მუშ მშობლეფშე, მიდგას ჯანმრთელობაშ პრობლემა უღჷ. თე ირფელ აუცილებერო ოკეთებელ რე. ღორონთიშ სიტყვას ჭარ: „მიდგა მუშიანეფშე, განსაკუთრებულო ოჯახიშ წევრეფშო ვაზრუნენსინ, რწმენას ოჭიშ ქურთინუ დო ურწმუნოშე უფრაშ რე“ (1 ტიმ. 5:8). თეცალ პასუხიშმგებლობეფ ქოიღნან-და, მუშო ოკო რაგად, თეოკრატიულ საქმეეფშა თისხი დრო ვადგათმებენა, მუსხით გოკონა. მარა, თეშ გურშენ გურ ვეგიტახათ! იეჰოვა კმაყოფილ რე, მუჟამსით თქვან ოჯახიშ საჭიროებეფშე ზრუნენთ (1 კორ. 10:31).

4. მუჭო შეულებნა მშობლეფს, მუნეფიშ დუდიშ წოხოლე სამეფოშ ინტერესეფ გიორინუან დო მუ შედეგეფ მოჸუნს თეს?

⁴ ქრისტიან მშობლეფ თანამშრომლენა იეჰოვაწკუმა, მუჟამსით ოხვარნა მუნეფიშ სკუალეფს, სულიერ მიზნეფიშ მეჭირნაფას. ბრელ სკუალეფქ, მიდგაშ მშობლეფ თაშ იქციებდესინ, ჸუდეშე შორს ქიდიჭყეს სრულ დროთ მსახურება. ნამთინე მისიონერო მსახურენს, შხვეფ თექ ქადაქენა, სოდეთ მაქადაქებელეფიშ საჭიროება რე დო ნამთინე ხოლო ბეთელს მსახურენს. მუნეფიშ ოჯახშე შორს რენან თიშენ, შილებე ხშირას ვეკახუნედან ართო. თეშ უმკუჯინუო, ქადაქებაშ საქმეშო დუდგინოდვალირ ფერ მშობლეფ ელუჩანა სქუალეფს, გაგრძელან მსახურება. მშობლეფ თიშენ ორთნა თეს, ნამდა თინეფშო დიდ ხიოლ დო კმაყოფილება მოუღ, მუჟამსით სქუალეფ სამეფოშ ინტერესეფს პირველ ადგილს გიორინუანა (3 იოან. 4). შილებე ბრელ მშობელ ხანაცალო გინაფლენდას დუც, ნამუთიქ სამუელიშ გურშენ თქუ, ნამდა იეჰოვაშა აფუდ მებარებულ. მშობლეფს იეჰოვაწკუმა თეგვარო თანამშრომლობა, დიდ პატივო მიორჩქუნა (1 სამ. 1:28).

5. მუჭო შეილებდეს თქვან კრებაშ წევრეფიშ პრაქტიკულო მოხვარა? (ქოძირით სურათ 23-ა გვერდის).

⁵ თეცალ ოჯახურ პასუხიშმგებლობეფ ვაიღნან-და, შეილებნა თი თანაქრისტიანეფს ქიმეხვარათ, მიდგას შხვეფშა აფჷ მიკალუაფარ. თეს გეძინელ, ქელუდირთით თინეფს ხოლო, მისით ჯანმრთელობაშ პრობლემა უღჷ, ხანშა რე მიშულირ ვარდა შხვეფს ოხვარ. შეილებნანო თქვან კრებას დოგორათ თიცალეფ, მიდგას მოხვარა ოსაჭირ დო ქელუდირთათ თინეფს? მაგალთო, შილებე ქრისტიან და ულუანდას ხანშა მიშულირ მშობლეფს. შეილებდესო დრო გეგმურთითკო თიშ მშობლეფს დო თე და კრებაშ შეხვალამაშა გოიტებდესკო? შეილებდეს თეცალ ქრისტიანეფ კრებაშ შეხვალამეფშა მიდაიჸონაფდესკო, ქიმეხვარითკო ოჸიდირეფიშ ჸიდირს დო თინეფიშ ოძირაფშა მიდართითკო, მით საავადმყოფოს ჯანჷ. თე ირფელიშ კეთებათ თქვა ითანამშომლენთ იეჰოვაწკუმა დო თქვან საშვალებათ ღორონთ თინეფიშ ლოცვეფს ქუპასუხენს (წეკითხით 1 კორინთელები 10:24). *

6. მუ მიშურს სტუმარიშ პატიცემაშ გიმორჩქინაშა?

⁶ ღორონთიშ თანამშრომლეფ ჩინებულ რენა თით, ნამდა სტუმარიშ პატიცემას გიმირჩქინანა. ქრისტიანულ ბერძნულ წერილეფს მოშინაფილ თე სიტყვა „სტუმარიშ პატიცემა“, ნიშნენს უჩინებშა ჯგირიშ კეთებას (ებრ. 13:2). ღორონთიშ სიტყვას მოჩამილ რე თიცალ შემთხვევეფ, სოვრეშეთ ბგურაფლენთ, მუჭო გიმიფრჩქინათ თეცალ ჸოროფა (დაბ. 18:1—5). ჩქი შემლებნა დო ოკო გიმიბრინუათ ირნერ საშვალება, ნამდა ირიათო მივეხვარათ შხვეფს; ვა უღჷ მნიშვნელობა თინეფ ჩქინ ნათესეფ რენან დო ვარ (გალ. 6:10).

7. მუ კურთხევეფ მოჸუნს, მუჟამსით სრულ დროთ მსახურეფწკუმა სტუმარიშ პატიცემას გიმიფრჩქინანთ?

⁷ შეილებნანო ღორონთწკუმა ითანამრომლათ თით, ნამდა სტუმარო ქუდაპეჯათ სრულ  დროთ მსახურენან თინეფ? (წეკითხით 3 იოანე 5, 8). * თე დროს მიღნა თიშ საშვალება, ნამდა „გურშა ელვუკინათ ართიანს“ (რომ. 1:11, 12). მორთ, გუვარჩუათ ათრ ჯიმაშ ოლაფიშ შემთხვევა. თინა იშინანს ართ შემთხვევას, მუჟამსით წანეფიშ წოხოლე, თიშ კრებას მითინს ვეშიალებუ სტუმარო მეუღებუდკო სარაიონო ზედამხედველ, ნამუსით ოსურ ვა ჸუნდჷ. ახალგაზრდა ოლაფიქ, მუშ მშობლეფს, ნამუთ იეჰოვაშ მოწმეეფ ვარდესინ კითხჷ, შილებედ დო ვარ, სარაიონო ზედამხედველქ თინეფიშ ჸუდეს გაჩენდკო. თინეფქ დეთანხმეს ოლაფის, მარა უწის, ნამდა მუქ დივანს ოკო დინჯირკო. თე ირფელ დასურო ღირუდ თეშა. ოლაფ იშინანს: „მუ ჯგირ მარა რდუ! მა დო თე ჯიმა ირ ოჭმარეს ადრე ებდირთუდით დო ოჭკუმალიშ ჭკუმუაშ დროს ბრელ საინტერესო საკითხეფშე იფჩიებუდით. თე ჯიმაქ თეშ ელამკინ გურშა, ნამდა სრულ დროთ მსახურება გინოპჭყვიდ“. ბოლო 40 წანას ოლაფ მუსხირენ ქიანას მსახურენდჷ მისიონერო.

8. მუშენ ოკო ვემვოტუათ ჯგირიშ კეთება, თიშ უმკუჯინუო ნამდა, შილებე დუდშე ვა დამფასან? ქიმიჸონით მაგალითი.

⁸ შეილებნა შხვეფწკუმა ჸოროფა შხვადოშხვა საშვალებათ გეგმირჩქინათ, თიშ უმკუჯინუო, ნამდა თქვან შრომა შილებე უცბას ვა დაფასან. მორთ, გუვარჩუათ ართ დაშ მაგალით. თინა ესპანეთის ართ პიროვნებას, ჯესიკას, ნამუთ ეკვადორშე რდუნ ბიბლიას ოგურუანდჷ. გურაფაშ დროს ჯესიკას ნგარაქ გეუოლ, თე დაქ კითხ მუშენ ინგარდჷ. ჯესიკაქ უწუ, ნამდა ესპანეთშა გინულაშახ, თინა თიცალ ღარიბ რდუ, ნამდა ართ დღას ოჭკუმალ ვა უღუდ. თის მუშ ჭიჭე ძღაბშო, ხვალე წყარ უღუდ. ჯესიკა ოცადუდ თინა ქუდარულუკო დო თეწკუმა ართო გურს ლოცულენდჷ. თეშ უკულ, ხეთეშე ჟირ იეჰოვაშ მოწმექ ქიმაკითხუ თის, მარა ჯესიკაქ გლახათ მექცუ თინეფს, ჟურნალეფ დოუსოფ დო გურმულირო კითხჷ: „თენა ფჩაო ჩქიმ ჭიჭე ძღაბის?“. დალეფ ოცადდეს თიშ დამშვიდებას, მარა მუთუნქ ვეგშურთეს. უმოს გვიანო, თინეფქ ოჭკუმალით მოფშა კარაჩხა კარწკუმა ქიგუდვეს. ჯესიკაწკუმა თინეფიშ ჯგირ საქციელქ მანგარო იმოქმედ დო დენარღ, ნამდა ღორონთიქ ქუპასუხ თიშ ლოცვას, მარა ჯესიკაქ ვემიღ თე პასუხ. მარა ასე გინოჭყვიდილ აფუდ ემსახურკო იეჰოვას. მუ ჯგირ შედეგიქ მაჸუნ დალეფიშ ხეგოფაჩილობას! (ეკლ. 11:1, 6).

9, 10. ა) მოხალისეთ მსახურებაშ მუ საშვალებეფ რდუ ჯვეშ ისრაელს? ბ) მუ საშვალებეფით შეულებნა ამდღა ჯიმალეფს კრებაშ წევრეფიშ ელარნა?

⁹ ჯვეშ ისრაელს მოხალისეთ მსახურებაშ ბრელ საშვალებეფ რდუ (გამ. 36:2; 1 მატ. 29:5; ნეემ. 11:2). ამდღა ხოლო შეილებნა მეხვარათ და დო ჯიმალეფს დო თეშო გეგმირინუათ დრო, მატერიალურ სახსრეფ დო თქვან უნარეფი. შედეგო, დიდ ხიოლს დო ბრელ კურთხევეფს მიღენთ, მუჟამსით თაშ ქიმიქციებუთ.

¹⁰ ღორონთიშ სიტყვა ელუჩანს ჯიმალეფს, ნამდა მომსახურეეფო დო უხუცესეფო ქიმსახურან დო თეგვარო ითანამშრომლან იეჰოვაწკუმა (1 ტიმ. 3:1, 8, 9; 1 პეტ. 5:2, 3). თი ჯიმალეფს, მით თაშ იქციებნან, ოკონა, ნამდა შხვეფს პრაქტიკულო დო სულიერო ქელუდირთან (საქ. 6:1—4). დღას ქუთხუნანო სქანდა უხუცესეფს, ნამდა ქოიმსახურებუდკო მომწესრიგებელო, ლიტერატურაშ დო უბანეფიშ განაწილებაშ საქმეშა ქუმოიხვარებუდკო, სამეფო დარბაზიშ დასუფთებაშა მეიღებუდკო მონაწილება ვარდა მუდგაინ თეცალ საქმე გიკეთებუდკო? მით თეგვარ საქმეეფს ორთუნ, გიწინა, ნამდა შხვეფიშ ელარნას დასურო დიდ ხიოლ მოუღ.

11. მუჭო ელუკინეს გურშა ართ დას თი თანაქრისტიანეფქ, მით სამეფო დარბაზეფიშ შენებაშ დროს გეჩინებაფუ?

¹¹ თინეფს, მით თეოკრატიულ პროექტეფს მოხალისეთ მსახურენან, ბრელ მეგობარ ჸუნა. ქობძირათ ართ დაშ, მარჯიშ მაგალით, ნამუთ 18 წანას სამეფო დარბაზეფიშ შენებას  ღებულენდჷ მონაწილებას. წანეფიშ დინახალე, თიქ მუსხირენ ახალგაზრდა დას დაგურუ მუშ საქმე. თიქ ქოძირ, ნამდა თე ირფელ ხეს უნწყუნდჷ ართიანიშ სულიერო გამანგარებას (რომ. 1:12). მუჟამსით სირთულეეფიშ წოხოლე გერდუნ, მარჯის გურშა ელუკინეს თი მეგობარეფქ, ნამუთ სამშენებლო პროექტიშ დროს გეჩინებაფუ. დღას ქუგაფუნო მონაწილება მინაღებ თეგვარ სამშენებლო პროექტის? ვა უღჷ მნიშვნელობა გიღნან დო ვარ გამოცდილება თე საქმეს, თქვა შეილებნა მონაწილება მიღათ თეგვარ მსახურებას.

12. მუჭო შეილებნა ელუდირთათ სტიქიურ უბედრობეფით დაზარალებურეფს?

¹² სტიქიურ უბედრობეფიშ დროს, შემლებნა პრაქტიკულო ქელუდირთათ თანამორწმუნეეფს დო თეგვარო იფთანამშრომლათ ღორონთწკუმა. მაგალთო, შემლებნა დაზარალებურეფს ფინანსურო ქიმვეხვარათ (იოან. 13:34, 35; საქ. 11:27—30). ელარნაშ შხვა პრაქტიკულ საშვალება რე, სტიქიურ უბედრობაშ უკულ დასუფთება დო გარემონტებაშა მონაწილებაშ მეღება. გაბრიელას, ნამუთ პოლონეთშე რენ, დიდწყარალაშ დროს ჸუდექ ეკუცუ. თინა იშინანს, მუჭო ელუკინ გურშა ჯიმალეფიშ ძირაფაქ, ნამუთ მეზობელ კრებაშე თიშ მახვარებშა რდეს მულირ: „ვა მოკო თიშე ჩიება, მუთ ვოდინე. თენა ხვალე მატერიალურ ნივთეფ რდუ. მოკო თიშე იფჩუე, მუსხი კურთხევაქ მაშუ. თე შემთხვევაქ დუმარწმუნ, ნამდა დიდ პატი რე ქრისტიანულ კრებაშ ნაწილ ვორექინ დო თეს ხიოლ დო ბედნერობა მოუღ ჩქიმო“. ბრელ, ნამუთიქ სტიქიურ უბედრობაშ უკულ მოხვარა მიღუნ, გაბრიელაცალო გინაფლენს დუც. თინეფ, მით ჯიმალეფს ელურენა დო თეგვარო იეჰოვაწკუმა თანამრშრომლენან, დიდ ხიოლ დო კმაყოფილებას ღებულენა (წეკთიხით საქმეები 20:35; 2 კორინთელები 9:6, 7). *

13. მუჭო გამანგარენს იეჰოვაწკუმა ჩქინ ურთიერთობას მოხალისეთ მსახურება? ქიმიჸონით მაგალითი.

¹³ სტეფანის დო შხვა მაქადაქებელეფს, უღდეს თიშ უპირატესობა ითანამშრომლესკო ღორონთწკუმა. თინეფქ თანამორწმუნეეფს ქელუდირთეს,  მიდგას ჩხუპიშ გურშენ შეერთებულ შტატეფშა აჸუეს გინაულარქ. სტეფანი და დო ჯიმალეფს ოხვარუდ ჸუდეშ დო ავეჯიშ გორუას. თინა იჩიებ: „ჩქინწკუმა მანგარო იმოქმედ თიშ ძირაფაქ, ნამდა თინეფ გახარებულეფ რდეს დო აფასენდეს მსოფლიო საჯიმალოშ გიმორჩქინელ ჸოროფას. თე და დო ჯიმალეფ ფიქრენდეს, ნამდა ჩქი მივეხვარით, მარა სინამდვილეს თინეფქ აშო მიმეხვარეს ბრელ მუთუნს. ჩქი ბძირით ჸოროფა, ართობა, რწმენა დო ღორონთშა მენდება, ნამუთ თინეფქ გიმირქჩინეს დო თე ირფელქ უმოსო ქომჸოროფეს იეჰოვა. თეს გეძინელ, უმოსო ვაფასენთ ირფელს, მუდგას ღორონთ ორგანიზაციაშ საშვალებათ მარზენა“.

14, 15. ა) მუჭო მიქცუ წინასწარმეტყველ ესაიაქ? ბ) მუჭო შემლებნა მივაჸუნათ ესაიაშ მაგალითის?

¹⁴ ქუგოკონანო იეჰოვაწკუმა უმოს სრულაშე ქითანამშრომლათ? გინილენთო ოქადაქეფშა თიცალ ადგილშა, სოდეთ მაქადაქებელეფიშ საჭიროება რე? მუშო ოკო რაგად, ხეგოფაჩილობა გეგმირჩქინანინ თიშენ, ღორონთიშ მსახურეფს ვასაჭირნა ჸუდეშე შორს გინულა. მარა ნამთინე და დო ჯიმას სიტუაცია არზენს თიშ საშვალებას, ნამდა შხვადო გეგნორთას. თინეფ წინასწარმეტყველ ესაიაცალო იქციებნა, ნამუშ გასაგონეთ იეჰოვაქ იკითხჷ: „მი გუტუა? მი ურს?“. ესაიაქ უპასუხ: „მა ულჷ, მა გომტე!“ (ეს. 6:8). ქოიღნანო თიშ სურვილ დო ქუგარზენანო სიტუაცია თიშ საშვალებას, ნამდა თეგვარო გაფართოვათ მსახურება? მუ მიშურს თეშა?

¹⁵ ქადაქებაშ დო მოწაფეეფიშ მომზადებაშ საქმეშ გურშენ იესოქ თქუ: „ბრელ მოსავალ რე ეიოჭოფალ, მარა ემაჭოფალეფ ჭიჭე რენა. ათეშენ ქოთხით მოსავალიშ ბატონს, ნამდა ემაჭოფალეფ ქუმაშქვას მუშ მოსავალშა“ (მათ. 9:37, 38). ქეშეილებნანო პიონერო იმსახურათ თექ, სოდეთ მაქადაქებელეფიშ საჭიროება რე ვარდა შხვეფს ქიმეხვარათ თეშ კეთებას? ბრელ და დო ჯიმაშ აზრით, იეჰოვაშ დო მოყვასიშ ჸოროფაშ გიმორჩქინაშ არძაშ უჯგუშ საშვალება რე პიონერო მსახურება თექ, სოდეთ მაქადაქებელეფიშ საჭიროება რე. დეფიქრით, ხოლო მუჭო შეილებნა მსახურებაშ გაფართოება? თეშ კეთებას დიდ ხიოლ მოჸუნს.

16, 17. მსახურებაშ გაფართოებაშ მუ საშვალებეფ გიღნა?

¹⁶ ქუგოკონანო იმსახურათ ბეთელს ვარდა მშენებლობას, მუჭოთ სრულ დროთინ თეშ შტატგარეშე თანამშრომელო? ორგანიზაციას ირიათო რე თი და დო ჯიმალეფიშ საჭიროება, მით მზათ რენა იმსახურან თექ, სოდეთ საჭირო რე დო შეასრულან არძანერ დავალება. შილებე თინეფ გვალო შხვა საქმეს რდან გამოცდილეფ, მარა თექ რდას მსახურება საჭირო, სოდეთ განსაკუთრებულ საჭიროება რე. მუშო ოკო რაგად, იეჰოვა აფასენს დუდ გინოდვალირ ხალხის, მით მზათ რე თექ იმსახურას, სოდეთ საჭირო რე (ფსალმ. 110:3).

¹⁷ ქუგოკონანო უმოს მეტ ქიდიგურუათ, ნამდა უჯგუშო შეასრულათ დავალებურ საქმე? თაშ ქორენ-და, შეილებნა გემკორთათ სამეფოშ მახარობელეფიშ სკოლა. თექ სრულ დროთ მსახურენან ფერ სულიერო მოწიფულ და დო ჯიმალეფ გურაფლენა, ნამუთ ხეს უნწყუნა სამეფოშ საქმეშ წიმი ულას. თე სკოლას მიკულან თი პიროვნებეფ მზათ ოკო რდან, შეასრულან არძანერ დავალება მუდგას მიღენა. ქორეთო მზათ თეცალ საშვალებეფ გეგმირინუათ დო იეჰოვაშ მსახურებას უმოს მეტ გაკეთათ? (1 კორ. 9:23).

18. მუ კურთხევეფ მოჸუნს იეჰოვაწკუმა თანამშრომლობას?

¹⁸ ჩქი იეჰოვაშ ხალხ ვორეთ დო ათეშენ შხვეფწკუმა გიმიფრჩქინანთ ხეგოფაჩილობას, სიჯგირას დო ჸოროფას. თეს გეძინელ, ირ დღას ბზრუნენთ შხვეფიშ საჭიროებეფშე დო თე ირფელიშ კეთება მშვიდობა დო ბედნერობას მომღანა (გალ. 5:22, 23). მუდგანერ სიტუაცია ვაიღუდანინ, შეილებნა მიაჸუნათ იეჰოვაშ ხეგოფაჩილობაშ მაგალითის დო ითანამშრომლათ თიწკუმა, მუთ ხიოლს მოიღანა (იგავ. 3:9, 10).