1. მუ პატი მიღნა?

მართალო დიდ პატი რე, ქრისტიანულ კრებას ვორდათ! ჩქი სულიერ სამოთხეს ვორეთ, მშვიდობიან დო ბედნერ ხალხ შქას. პირადო თქვა, მუ ადგილ გიღნა კრებას?

2. ნამ მაგალით მიშინუ მუსხირენშა პავლექ მუშ წერილეფს?

² თე საკითხშენ ბრელ მუდგარენს ბგურაფლენთ მოციქულ პავლეშ მოჸუნაფილ მაგალითშე, ნამუთ მუსხირენშა მიშინუ მუშ წერილეფს. პავლექ კრება ადამიანიშ სხეულს შეადარ დო კრებას რენან თინეფ სხეულიშ ნაწილეფს (რომ. 12:4—8; 1 კორ. 12:12—27; ეფეს. 4:16).

3. ნამ სუმ მხარეს გუვარჩიენთ თე სტატიას?

³ თე სტატიას გუვარჩიენთ სუმ მნიშვნელოვან მხარეს, ნამდგას პავლეშ მოჸუნაფილ მაგალითშე ბგურაფლენთ. პირველ, ქიგებგენთ, ნამდა კრებას თითოულს მნიშვნელოვან ადგილ * მიღნა. მაჟია, გუვარჩიენთ მუშ კეთება შემლებნა, მუჟამსით მიჭირა ქობძირათ, მუ ადგილ მიღნა კრებას. დო მასმა, ქიგებგენთ, მუშენ რე საჭირო, ნამდა შურდოგურით ვასრულენდათ ღორონთშე დავალებურ თითოულ საქმეს კრებას.

4. მუს ბგურაფლენთ რომაელეფიშ 12:4, 5-შე?

⁴ პირველ, მუდგას პავლეშ მოჸუნაფილ მაგალითშე ბგურაფლენთ  თინა რე, ნამდა თითოულს მნიშვნელოვან ადგილ მიღნა იეჰოვაშ დიდ ოჯახის. პავლე მუშ მაგალითის თეცალ სიტყვეფით იჭყანს: „ართ სხეულს სხეულიშ ბრელ ნაწილ მიღნა, მარა არძა ნაწილს ართ დანიშნულება ვა უღჷ. თიშ უმკუჯინუო, ნამდა ბრელ ვორეთ, ჩქი ხოლო ართ სხეულ ვორეთ ქრისტეწკუმა ართობას, მარა ცალ-ცალკე სხეულიშ ნაწილეფ ვორეთ დო ართიანს ვოკუთვნუთ“ (რომ. 12:4, 5). მუშ რაგად ოკოდ პავლეს? თითოულს შხვადოშხვა როლ მიღნა კრებას, მარა თითოულ ძვირფას ვორეთ.

5. მუ „ძღვინ“ მეჩჷ იეჰოვაქ კრებას?

⁵ მუჟამსით კრებას ქრისტიანიშ ადგილშე მეურს ჩიება, შილებე დუდშე ხემძღვანელ ჯიმალეფქ გუმაშინან (1 თეს. 5:12; ებრ. 13:17). იეჰოვაქ იესოშ საშვალებათ კრებას „ძღვინ მუჩეს ადამიანეფო“ (ეფეს. 4:8). თენეფ რენა ხემძღვანელ საბჭოშ წევრეფ, ხემძღვანელ საბჭოშ დამხმარეეფ, ფილიალიშ კომიტეტიშ წევრეფ, რაიონულ ზედამხედველეფ, თეოკრატიულ სკოლეფიშ მასწავლებერეფ, უხუცესეფ დო მომსახურეეფ. თე ჯიმალეფ წმინდა შურით რენა დანიშნულ, ნამდა იზრუნან იეჰოვაშ ძვირფას შხურშო დო გამანგარან კრება (1 პეტ. 5:2, 3).

6. მუჭოთ 1 თესალონიკელეფიშ 2:6—8-ს ჭარჷ, მუს ოცადნა წმინდა შურით დანიშნულ ჯიმალეფ?

⁶ ჯიმალეფ წმინდა შურით რენა დანიშნულეფ, ნამდა შხვადოშხვა პასუხიშმგებლობა შეასრულან. მუჭოთ სხეულიშ შხვადოშხვა ნაწილს, მუნერით რე ხელეფ დო კუჩხეფ, ჯგირობუა მოუღ მთელ სხეულშო, თეშ თი ჯიმალეფ, მით წმინდა შურით რენა დანიშნულეფ, ირფელს ორთნა, ნამდა ჯგირობუა მუღან მთელ კრებას. თინეფს დუდიშ განდიდება ვაკონა. თე ჯიმალეფ ირნერო ოცადნა, აღაშენან დო გამანგარან თანაქრისტიანეფ (წეკითხით 1 თესალონიკელეფიშ 2:6—8). იეჰოვაშ მარდულეფ ვორეთ თეცალ სულიერო მოწიფულ ჯიმალეფშო, მით შხვეფიშ საჭიროებეფს მუნეფიშ წოხლე გიორინუანა!

7. მუ კურთხევეფ უღნა სრულ დროთ მსახურეფს?

⁷ კრებას ნამთინე შილებე დანიშნულ რდას მისიონერო, სპეციალურ პიონერო ვარდა პიონერო. მთელ მსოფლიოს და დო ჯიმალეფქ ქადაგება დო მოწაფეეფიშ მომზადებაშ საქმე მუნეფიშ კარიერათ გინაშქვეს დო შედეგო ბრელს მეხვარეს, ნამდა გინირთესკო ქრისტეშ მოწაფეთ. მართალ რე, თე სრულ დროთ მსახურ და დო ჯიმალეფიშ უმენტაშ ხშირ შემთხვევას მატერიალურო მდიდარეფ ვა რენა, მარა იეჰოვა კურთხევეფს ვარკენს თინეფს (მარ. 10:29, 30). ჩქი მიჸორა თეცალ და დო ჯიმალეფ დო მარდულეფ ვორეთ, ნამდა თინეფ კრებას პჸუნა!

8. მუშენ რე სახიოლო ამბეშ თითოულ მაქადაგებელ იეჰოვაშო ძვირფას?

⁸ ხვალე პასუხიშმგებელ ჯიმალეფს დო სრულ დროთ მსახურეფს უღნანო მნიშვნელოვან ადგილ კრებას? მუშო ოკო რაგად, ვარ! თითოულ, მით სახიოლო ამბეს ქადაგენს, ძვირფას რე იეჰოვაშო დო კრებაშო (რომ. 10:15; 1 კორ. 3:6—9). კრებაშ ართ-ართ არძაშ უმოს მნიშვნელოვან მიზან მოწაფეეფიშ მომზადება რე (მათ. 28:19, 20; 1 ტიმ. 2:4). არძა, მით ქადაგენს, მუჭოთ ნათილ თეშ მოუნათლავ მაუწყებელ, ოცად, ნამდა თე საქმე პირველ ადგილს გიორინუას (მათ. 24:14).

9. მუშენ რენა ძვირფას ჩქინო ქრისტიან დალეფ?

⁹ იეჰოვა ქრისტიან დალეფს მნიშვნელოვან ადგილს არზენს კრებას. თიშო ძვირფას რენა თი მეუღლეეფ, დიდალეფ, ქომონჯღურელ ოსურკათა დო დაუქორწინებელ დალეფ, მით ართგურო ომსახურნა თის. ბიბლიას ბრელ ოსურკათაშ მაგალით ინოჭარ, მით გურს უხარენდჷ იეჰოვას. თინეფ მოშინაფილ რენა, მუჭოთ სიბრძნეშ, რწმენაშ, დუდგინოდვალირობაშ, გაბედულებაშ, ხეგოფაჩილობაშ დო ჯგირ საქმეეფიშ მაგალითეფ (ლუკ. 8:2, 3; საქ. 16:14, 15; რომ. 16:3, 6; ფილ. 4:3;  ებრ. 11:11, 31, 35). იეჰოვაშ მანგარ მარდულეფ ვორეთ, ნამდა კრებას პჸუნა ქრისტიან დალეფ, მით თეცალ სქვამ თვისებეფს გიმირჩქინანა!

10. მუშენ რენა ჩქინო ძვირფასეფ ხანშამიშულირეფ?

¹⁰ მანგარო მოხიოლნა, ნამდა ჩქინ გვერდით ხანშამიშულირეფ ხოლო რენა. ბრელ კრებას რენა თიცალ ხანშამიშულირ და დო ჯიმალეფ, მიდგაქ მთელ ცხოვრება იეჰოვაშ მსახურებას მეუძღვინეს. მარა შილებე, ნამთინე ხანშამიშულირქ ჭეშმარიტება უმოს გვიანო გეგჷ. ჟირხოლო შემთხვევას, თინეფს შილებე ჯამრთელობაშ პრობლემეფ უღდან, ნამუთ ხანშა მიშულას მოჸუნს. თე პრობლემეფიშ გურშენ შილებე ბრელ ვაკეთებედან კრებას დო ქადაგებაშ საქმეს. მარა მსახურებას იშენით მუთ შეულებნან თის ორთნა დო მუნეფიშ ძალეფს შხვეფიშ გურიშ ელაკინალო დო მამზადებელო ირინუანა! ჩქი ბრელ მუდგარენს ბგურაფლენთ თე და დო ჯიმალეფიშ გამოცდილებაშე. თინეფ მანგარ ძვირფასეფ რენა იეჰოვაშო დო ჩქინო (იგავ. 16:31).

11, 12. მუჭო ელაიკინანა გურშა თქვან კრებას რენან თი ახალგაზრდეფ?

¹¹ მუშ რაგად შილებე ახალგაზრდეფშე? თინეფ ბრელ სირთულეს შეხვადნა, მუშენდა ირდუნა სატანაშ ქვეყნიერებას, სოდეთ თიშ უბადო აზროვნება რე გავრცელებურ (1 იოან. 5:19). გურშა ელამკინანა თიშ ძირაფა, ნამდა თე ირფელიშ უმკუჯინუო, ახალგაზრდეფ კომენტარეფს ორთნა კრებას, მსახურებას ღებულენა მონაწილებას დო გაბედულო იცვენა მუნეფიშ რწმენას. ნამდვილო, ახალგაზრდეფს მნიშვნელოვან ადგილ უღნა კრებას! (ფსალმ. 8:2).

¹² მარა ნამთინე ჩქინ და დო ჯიმას იშენით უჭირს თიშ დაჯერება, ნამდა ძვირფას რე კრებაშო. მუ მიმეხვარებნა თიშ ძირაფას, ნამდა პირადო ჩქი მნიშვნელოვან ადგილ მიღნა კრებას? მორთ, ასე თე კითხვა გუვარჩუათ.

13, 14. მუშენ შილებე, ნამთინეს უჭირდას თიშ დაჯერება, ნამდა კრებაშო ძვირფას რე?

¹³ ქობძირათ, ხოლო მუს ბგურაფლენთ პავლეშ მოჸუნაფილ მაგალითშე. თინა ყურადღებას  ამახვილენს პრობლემაშე, ნამუთ ამდღა ბრელ ქრისტიანს უღჷ. თინეფს უჭირა თიშ დაჯერება, ნამდა კრებაშო ძვირფასეფ რენა. პავლე ჭარუნს: „კუჩხიქ ქოთქუას, ხე ვა ვორექ, ათეშენ სხეულს ვა ვოკუთვნუქია, თენა თის ვა ნიშნენს, ნამდა მართალო თაშ რე. ვარდა ჸუჯიქ ქოთქუას, თოლ ვა ვორექ, ათეშენ სხეულს ვა ვოკუთვნუქია, თენა თის ვა ნიშნენს, ნამდა მართალო თაშ რე“ (1 კორ. 12:15, 16). მუშ რაგად ოკოდ პავლეს?

¹⁴ თქვან დუდის კრებას შხვეფს ქუდარენთ-და, შილებე გაიჭირდან თიშ ძირაფაქ, ნამდა კრებას მნიშვნელოვან ადგილ გიღნა. ნამთინე შილებე უნარიან მასწავლებერ, ჯგირ ორგანიზატორ ვარდა თიცალ ჭყიშ რე, ნამდგას შხვეფიშ მდგომარეობაშა მიშულა დო გურშა ელაკინა ჯგირო გიშალე. შილებე ფიქრენდათ, ნამდა თე ირფელ თინეფცალო ვეგშქალენა. თენა ოძირანს, ნამდა თქვა თანდაბალ დო მოკრძალებურ რეთ (ფილ. 2:3). მარა ფრთხილას ოკო რდათ, მუშენდა თქვან დუდის ირიათო განსაკუთრებულ უნარ უღუნ ფერ თანაქრისტიანეფს ქუდარენთ-და, თენა გურს გოიტახნა. ხვალე თენა ვარინ შილებე იფიქრათ, ნამდა კრებაშო მუთუნიშ კეთება ვეშეილებნა. მუ მიგეხვარებნა თეცალ აზროვნებას გიორჯგინათ?

15. მუჭოთ 1 კორინთელეფიშ 12:4—11-ის ჭარჷ, მუჭო ოკო ვუჯინედათ თი ძღვინს, ნამუთ მიღნა?

¹⁵ დეფიფქრათ: იეჰოვაქ პირველ საუკუნეშ ნამთინე ქრისტიანს წმინდა შურიშ სასწაულებრივ ძღვინ მეჩჷ, მარა არძა ქრისტიანს ართნერ ძღვინ ვემუღებ (წეკითხით 1 კორინთელეფიშ 12:4—11). იეჰოვაქ თინეფს შხვადოშხვა ძღვინ დო უნარ მეჩჷ, მარა თითოულ ქრისტიან ძვირფას რდუ თიშო. მართალ რე, ამდღა წმინდა შურიშ სასწაულებრივ ძღვინ ვა მიღნა, მარა თე პრინციპ ჩქი ხოლო მოხუნა. შილებე არძას ართნერ უნარ ვა მიღნა, მარა თითოულ ძვირფას ვორეთ იეჰოვაშო.

16. პავლე მოციქულიშ ნამ რჩევა ოკო გიმიბრინუათ?

¹⁶ ჩქი თანაქრისტიანეფს ოკო ვეშუდარათ დუდ. თეშ გინაწონს, ოკო გეგმიბრინუათ პავლე მოციქულიშ რჩევა, ნამუთ თიქ ღორონთიშ შთაგონებათ ჭარჷ: „თითოულქ მუშ საქმე გეგმოცადას დო ხვალე თიმწკუმა  აღვენუ დიდ ხიოლიშ მიზეზ მუშით დო ვართ ხოლო მუშ დუდიშ შხვაწკუმა შედარებათ“ (გალ. 6:4).

17. მუ ჯგირობუას მომღანა პავლეშ რჩევაშ გიმორნაფა?

¹⁷ პავლეშ რჩევას ქიმვაჸუნუთ დო ჩქინ საქმეს გეგმობცადუნთ-და, ქობძირუნთ, ნამდა ჩქი ხოლო მიღნა განსაკუთრებულ ძღვინ დო უნარ. მაგალთო, შილებე უხუცესის სცენაშე გურაფა ჯგირო ვექშალედას, მარა მოწაფეეფიშ მომზადებაშ საქმეს ეფექტურო ასრულენდას. ვარდა შილებე უხუცეს თიცალ ჯგირ ორგანიზატორ ვა რდას, მუნერით შხვა უხუცესეფ რენა, მარა შილებე თინა მოჸოროფე ჭყიშ რდას, მიდგაწკუმა მაუწყებელეფ დუდის თავისფალო გინაფლენა დო ვა უჭირა თიშა ბიბლიურ რჩევაშ ელაკითხირ. ვარდა შილებე უხუცეს სტუმარიშ ჸოროფათ გიშეგორუდას (ებრ. 13:2, 16). მუჟამსით ქობძირუნთ ჩქინ უნარს, მოხიოლდან იჸი თი ირფელ, მუდგაშ კეთება კრებაშო შემლებნა. თეს გეძინელ, ნაკლებ რე შანს, მენჯარან თი და დო ჯიმალეფიშ, მიდგას ჩქინდე განსხვავებულ ნიჭ ვარდა უნარ უღნა.

18. მუჭო შემლებნა გუვაუჯგუშათ ჩქინ უნარეფ?

¹⁸ ვა უღჷ მნიშვნელობა მუ ადგილ მიღნა კრებას, არძას ოკო მიღდან სურვილ, გუვაუჯგუშათ მსახურება დო გუვავითარათ ჩქინ უნარეფ. იეჰოვა მუშ ორგანიზაციაშ საშვალებათ მოგურუანა, ნამდა თე ირფელს მიმეხვარან. მაგალთო, შქამარაშ შეხვალამეფს ბღებულენთ მითითებეფს, მუჭო შემლებნა ვორდათ ეფექტურ მაქადაგებელეფ. სრულ სარგებელს ქოღებულენთო თე პროგრამაშე?

19. მუშ კეთება შეილებნა, ნამდა გემკორთათ „სამეფოშ მახარობელეფიშ სკოლა“?

¹⁹ ხოლო ართ განსაკუთრებულ ოგურაფალ პროგრამა რე „სამეფოშ მახარობელეფიშ სკოლა“. თე სკოლაშ მიკულა შეულებნა სრულ დროთ მსახურ და დო ჯიმალეფს, მით 23-შე 65 წანაშახ რენა. შილებე ფიქრენთ, ნამდა თქვა დღას ვემგკართინენა თე სკოლა. თიშ მანგიორო, ნამდა იფიქრათ მუშენ ვეშეილებნა თე სკოლაშ მიკულა, იფიქრით თიშე, მუშენ გოკონა თე სკოლაშ მიკულა. თეშ უკულ შეადგინით გეგმა, ნამუთ მიგეხვარებნა, დაკმაყოფილათ მოთხოვნეფ დო გემკორთათ თე სკოლა. იეჰოვაშ მოხვარას დო თქვან მონდომას შეულებ გუგოკეთებაფუან თინა, მუდგაშე ფიქრენდით, ნამდა დღას ვეშქალებედეს.

20. მუს ბგურაფლენთ რომაელეფიშ 12:6—8-შე?

²⁰ მასმა, მუდგას პავლეშ მოჸუნაფილ მაგალითშე ბგურაფლენთ რომაელეფიშ 12:6—8-ს ჭარჷ (წეკითხით). თაქ პავლე ხოლო ართშა მოძირანა, ნამდა კრებას არძას შხვადოშხვა ძღვინ უღჷ. მარა ასე თინა ხაზის უსვანს თის, ნამდა, მუდგა ძღვინ ვა მიღდან თინა კრებაშ საჯგირობუოთ დო გამანგარებელო გიმიბრინუათ.

21, 22. მუშ გურაფა შემლებნა რობერტ დო ფელისიშ მაგალითშე?

²¹ გუვარჩუათ ართ ჯიმაშ რობერტიშ * მაგალით. თინა შხვა ქიანას ქადაგენდჷ, მარა უკულ მუშ ქიანაშ ბეთელს დანიშნეს. მართალ რე ჯიმალეფ თის არწმუნენდეს, ნამდა არასწორო მუთუნ ვა უკეთებ დო თენა ვა რდუ დანიშნულებაშ თირუაშ მიზეზ, მარა თე ჯიმა იჩიებ: „ჩქიმ დუდშე ჯგირ წარმოდგენა ვა მიღუდ, მუშენდა ფიფქრენდჷ, ნამდა ჩქიმ ჯვეშ დანიშნულებაქ ჯგირო ვეშმასრულებუ, ათეშენ ბრელ თუთას გლახათ ბგინაფლენდჷ დუდის. მინშა თეშ ვორდჷ, ნამდა ბეთელს მსახურებაშ მეტება ხოლო მოკოდჷ“. მუჭო დირთინუ თიქ ხიოლ? ართ უხუცესიქ თის ქუგაშინ, ნამდა იეჰოვაქ ულირს მოჩამილ თითოულ დანიშნულებათ თიშო მუმამზადეს, ნამდა უმოს უჯგუშო შევასრულათ თი დანიშნულება, ნამუთ ასე მიღნა. თე ჯიმაქ  ქიმეხვად, ნამდა ოკო მეუტებუდკო ულირ დანიშნულებაშე ფიქრ დო ყურადღება გეგნიღკო თიშა, მუდგაშ კეთება ასე შეულებუდ.

²² თეცალ სირთულეს შეხვად ჯიმა ფელის ეპისკოპოქ ხოლო. თიქ 1956 წანას მეუღლეწკუმა ართო მიკორთჷ სკოლა „გალაად“ დო ბოლივიას რაიონულ ზედამხედველო მსახურენდჷ. მარა 1964 წანას თინეფს ბაღანაქ ქეშეძინეს. ფელისიქ თქუ: „გამჭირდეს ჩქინ დანიშნულებაშ მეტებაქ, მუშენდა მანგარო მიჸორდეს თეცალ მსახურება. ალალას ქოფთქუენ, სოდგარენ ართ წანას გურგოტახილ ვორდჷ. მარა უკულ იეჰოვაშ მოხვარათ დიფთირე დამოკიდებულება დო მუჭოთ მშობელქ, ყურადღება ჩქიმ ახალ პასუხიშმგებლობაშა გეგნიბღჷ“. თქვა ხოლო რობერტ დო ფელისცალო ხომ ვა გინაფლენთ დუდის? გურგოტახილ ხომ ვა რეთ თიშ გურშენ, ნამდა ასე თი პასუხიშმგებლობეფ ვაიღნა, ნამუთ ულირს გიღდეს? თაშ ქორენ-და, უმოს ბედნერეფ იჸუაფუთ, მუჟამსით დამოკიდებულებას დითირანთ დო ყურადღებას თიშა გეგნიღათ, მუდგაშ კეთება ასე შეილებნა იეჰოვაშო დო თანაქრისტიანეფშო. სულიერ საქმეეფით რდათ დაკავებულ, გეგმირინეთ თქვან ნიჭ დო უნარეფ თიშო, ნამდა მეხვარათ შხვეფს. შედეგო ხიოლ გაღვენუნა, მუშენდა თეშნერო კრებაშ აღშენებას შეუნწყუნთ ხეს.

23. მუს ოკო გიმურთათ დრო დო მუს გუვარჩიენთ ანწიან სტატიას?

²³ იეჰოვაშო თითოულ ძვირფას ვორეთ. თის ოკო, ნამდა თიშ დიდ ოჯახიშ წევრეფო იბგინათ დუდ. დეფიფქრებუთ მუშ კეთება შემლებნა თანაქრისტიანეფიშ გამანგარებელო დო უკულ თეშო ირფელს გუვაკეთენთ-და, უმოსო ქიბგინანთ, ნამდა კრებაშო ძვირფასეფ ვორეთ. მარა, მუშ რაგად შილებე თიშე, მუჭო ვუჯინეთ და დო ჯიმალეფს კრებას? მუჭო შემლებნა ვოძირათ, ნამდა ვაფასენთ თინეფს? თე მნიშვნელოვან საკითხეფს ანწიან სტატიას გუვარჩიენთ.