1. მუშენ მეწონეს ბაბილონელეფს წინასწარმეტყველ დანიელქ?

 ᲬᲘᲜᲐᲡᲬᲐᲠᲛᲔᲢᲧᲕᲔᲚ დანიელ გვალო ახალგაზრდა რდჷ, მუჟამსით ბაბილონელეფქ მუშ მშობლიურ დიხაშე, იერუსალიმშე შორს, ტყვეთ მიდეჸონეს. მარა თიქ მანგარო მეწონეს თი კათას, მიდგაქ თინა ტყვეთ იჸონ, მუშენდა თე ახალგაზრდა ბოშის მუთუნ კილ ვა უღუდ, მეჯინელო ჯგირ რდჷ დო თეს გეძინელ, დიდგვაროვან ოჯახშე მიშჷ (1 სამ. 16:7). ზუსტას ათეშენ, ბაბილონელეფქ გეგნოჭყვიდეს, დანიელ მეფეშ სასახლეს მსახურებაშო მამზადესკო (დან. 1:3, 4, 6).

2. მუნერ დამოკიდებულება უღუდ იეჰოვას დანიელიშ მიმართ? (ეზეკ. 14:14).

² იეჰოვას თე ახალგაზრდა ბოშ მუშ ჯგირ თვისებეფიშ გურშენ უჸორდჷ დო ვართ ხოლო თიშენ, ნამდა მეჯინელო ჯგირ რდჷ დო სამეფო კარს მსახურენდჷ. შილებე დანიელ 20 წანერ ვარდა ხოლო უმოს ნაკლებ ჸოფედკო, მუჟამსით იეჰოვაქ თინა მუშ ართგურ მსახურეფიშ, ნოე დო იობ შქას მიშინუ, მით სიცოცხლეშ ბოლოშა ომსახურდეს იეჰოვას (დაბ. 5:32; 6:9, 10; იობ. 42:16, 17; წეკითხით ეზეკიელიშ 14:14). იეჰოვას მანგარო უჸორდჷ დანიელ, მუდგას თე ართგურ კოჩ მთელ ცხოვრება გინაფლენდჷ (დან. 10:11, 19).

3. მუს გუვარჩიენთ თე სტატიას?

³ თე სტატიას გუვარჩიენთ დანიელიშ ჟირ თვისებას, მუდგაშ გურშენ თინა ძვირფას რდჷ იეჰოვაშ თოლს. პირველ რიგის ქობძირუნთ, ნამ სიტუაციეფს გიმირჩქინ დანიელქ თე თვისებეფ. უკულ ქიგებგენთ, მუქ მეხვარ თინეფიშ გავითარებას დო ბოლოს ქობძირუნთ, ჩქი მუჭო შემლებნა მივაჸუნათ თიშ მაგალითის. მართალ რე, თე სტატიაქ ძირითადო ახალგაზრდეფშო იჭარ, მარა დანიელიშ მაგალითშე გურაფა არძას შემლებნა.

4. მუჭო გიმირჩქინ დანიელქ გაბედულება? ქიმიჸონით მაგალით.

⁴ გაბედულ პიროვნებას ხოლო შილებე მუდგარენშა აშქურნას, მარა შიშის დღას ვემეჩანს უფლებას, ეცილას სწორიშ  კეთებას. დანიელ მართალო მანგარ გაბედულ ახალგაზრდა რდჷ. გუვარჩუათ ბიბლიას ენოჭარილ ჟირ შემთხვევა, სოვრეშეთ თექ ჯგირო ქიძირ. პირველქ, საეგებიოთ, იერუსალიმიშ განადგურებაშე სოდგარენ ჟირ წანაშ უკულ მოხვად. ბაბილონიშ მეფე ნაბუქოდონოსორს სიზმარს ქიანაშმადიდა ქანდაკებაქ ქიგიაძირ, თე სიზმარქ მანგარო განერვიან თინა. თიქ არძა მუშ ჭკვერკათას დარცქინ, ნამდა თე სიზმარს დო თიშ ენწყუმას ვა უწინდეს-და, დოჸვილუნდჷ. მეფეშ თე სიტყვეფ დანიელს ხოლო ოხუდ (დან. 2:3—5). თის ოჯინეთ ვა უღუდ საქმე, ხეთეშე ოკო იმოქმედკო, თაშ ვემიქციებუდ-და, ბრელს დოჸვილუნდეს. ათეშენ „მიდართჷ დანიელქ მეფეშა დო თხუ, ნამდა სიზმარიშ ეიონწყუმალო დრო ქიმეჩკო“ (დან. 2:16). თეცალ მოქმედება დანიელიშ მხარეშე გაბედულებას დო რწმენას ითხინდჷ, მუშენდა ბიბლიას სოთინ ვა რე ინოჭარილ, ნამდა აიშახ თის მიდგაინშა სიზმარ აფუდ ენწყუმილ. თიქ მუშ მეგობრეფს — შადრაქის, მეშაქის დო აბედნეგოს b ქოთხუ, „ილოცესკო, ნამდა იეჰოვაქ გუცხადკო თინეფს თე საიდუმლო“ (დან. 2:18). იეჰოვაქ ქუპასუხ თინეფიშ ლოცვეფს. შედეგო, დანიელქ, ღორონთიშ მოხვარათ, გენწყჷ ნაბუქოდონოსორიშ სიზმარ, მუდგაშ ჭყოლოფათ თიქ დო მუშ მეგობრეფქ ღურას გეგნუსქიდეს.

5. ხოლო მუჟამ გიმიცად დანიელიშ გაბედულებაქ?

⁵ თე ამბეშ უკულ მუსხირენ ხანშა, დანიელიშ გაბედულებაქ ხოლო ართშა გეგმიცად. ნაბუქოდონოსორქ კინ გლახა სიზმარ ქოძირ, მარა თე შემთხვევას ქიანაშმადიდა ჯაქ ქიგიაძირ. დანიელქ გაბედულო გეუნწყჷ მეფეს სიზმარიშ მნიშვნელობა. თიქ უწუ, ნამდა მეფე ჭკუაშე გინილენდჷ დო გარკვეულ პერიოდის მეფობა მიდაღალუაფუდ (დან. 4:25). თე სიტყვეფიშ მორჩქილაფაშ უკულ, შილებედ მეფექ დანიელ ნტერო მირჩქინკო დო დოჸვილკო. მარა თე ირფელიშ უმკუჯინუო, დანიელქ გაბედულება გეგმირჩქინ დო მეფეს იშენით გეუნწყჷ მუშ სიზმარიშ მნიშვნელობა.

6. მუშ ჭყოლოფათ შილებე დანიელ რდუკო გაბედულ?

⁶ მუშ ჭყოლოფა შილებე ჸოფედკო თინა, ნამდა დანიელ მთელ ცხოვრებას გიმირჩქინანდჷ გაბედულებას? თინა ბრელ მუდგარენს გურაფლენდკონ იჸიდ მუშ მშობლეფშე. თინეფ ომორჩილდეს ისრაელ მშობლეფშა მეჩამილ იეჰოვაშ მითითებას, ნამდა დაგურუესკო მუნეფიშ სქუალეფს ღორონთიშ კანონ (კან. 6:6—9). დანიელს ხვალე ძირითად კანონეფ ვა უჩქუდ, მაგალთო, მუნერით რდჷ, ვით მცნება. თინა კანონიშ შხვა დეტალეფს ხოლო ინანჭუდ. მაგალთო, ჯგირო უჩქუდ,  მუშ ჭკუმუა შეულებდეს დო ვეშულებდეს ისრაელეფს c (ლევ. 11:4—8; დან. 1:8, 11—13). თიშო ვართ ღორონთიშ ხალხიშ ისტორია რდჷ უჩინებ დო ჯგირო უჩქუდ, მუ გლახა შედეგეფ მიღეს თინეფქ, მიდგაქ ვედემორჩილეს იეჰოვას (დან. 9:10, 11). მთელ ცხოვრებას მეღებულ გამოცდილებაქ დარწმუნ დანიელ, ნამდა, მუდგაქ ვა მოხვადკონ, იეჰოვა დო თიშ ძალიერ ანგელოზეფ ირიათო მეხვარებდეს (დან. 2:19—24; 10:12, 18, 19).

7. ხოლო მუქ მეხვარ დანიელს, რდუკო გაბედულ? (ქოძირით სურათ).

⁷ დანიელ გურგედვალირო ირკვიენდჷ ღორონთიშ წინასწარმეტყველეფიშ ნაჭარეფს, თინეფს შქას იერემიაშ წინასწარმეტყველებეფს ხოლო. თეშ ჭყოლოფათ დანიელქ ქიმეხვად, ნამდა იუდეველეფ მალას საბოლათ გეთავისფალებდეს ბაბილონიშ ტყვეობაშე (დან. 9:2). ბიბლიურ წინასწარმეტყველებეფიშ შესრულება დანიელს იეჰოვაშ მიმართ ნდობას უმანგარენდჷ დო მუშო ოკო რაგად, თი პიროვნება, მით მანგარო ონდჷ ღორონთის, სასწაულ გაბედულებას გიმირჩქინანს (ქეშუდარით რომაელეფიშ 8:31, 32, 37—39). მუთ არძაშ უმოს მნიშვნელოვან რე, დანიელ ხშირას ურაგადუდ იეჰოვას ლოცვათ (დან. 6:10). თინა აღიარენდჷ ცოდეფს იეჰოვაშ წოხოლე, ეჩიებუდ მუშ გრძნობეფიშ გურშენ დო მოხვარას თხინდჷ თის (დან. 9:4, 5, 19). თე ართგურ კოჩ ჩქინცალ ადამიან რდჷ დო გაბედულება ბაღანობაშე ვეთოჸუნდჷ. თიქ გევითარ თე თვისება, მუდგას წმინდა წერილეფიშ გურგედვალირ გიმორკვიებაქ, ლოცვაქ დო იეჰოვაშა მენდებაქ მეხვარ.

8. მუჭო შემლებნა გაბედულებაშ გავითარება?

⁸ ახალგაზრდეფ, მუ ოკო აკეთათ, ნამდა გავითარათ გაბედულება? შილებე თქვან მშობლეფ გაბედულეფ რდან დო თქვა ხოლო ელაიჩანდან, რდათ გაბედულეფ, მარა თე თვისება ოჯახურ მემკვიდრეობა ვა რე, ნამდგას მშობლეფშე მიღენთ. თინა თქვანით ოკო გავითარათ. თე პროცეს ახალ უნარიშ გავითარებას მოგენს. ახალ მუდგარენიშ დაგურაფალო ართ-ართ საშვალება რე, ყურადღებათ დევეკვირათ მასწავლებერს დო ჩქი ხოლო თეშ გუვაკეთათ ირფელ, მუჭოთ თინა ორთჷ. თეშნერო, გაბედულებაშ გავითარებას მიმეხვარებნა, ყურადღებათ დევეკვირათ თინეფს, მით გიმირჩქინანა თე თვისებას დო მივაჸუნათ თინეფიშ მაგალითის. თაშ ნამდა, მუ დიბგურეთ დანიელიშ მაგალითშე? საჭირო რე, ჯგირო ქენვანჭათ ღორონთიშ სიტყვას, ხშირას დო ალალას იბლოცათ, მივენდათ იეჰოვას დო ბჯერდან, ნამდა ირიათო მიმეხვარებნა. თეშ უკულ, მუჟამსით ჩქინ რწმენა გეგმიცადებ, ვა გამჭირდუნა გაბედულებაშ გიმორჩქინა.

9. მუ ჯგირობუა მოუღ გაბედულებაშ გიმორჩქინას?

⁹ გაბედულებაშ გიმორჩქინას ჯგირობუა მოუღ. გუვარჩუათ გერმანიას მახორუ ბენიშ შემთხვევა. თიშ სკოლას არძას ევოლუციაშ ჯერდჷ დო ბიბლიას ინოჭარილ ინფორმაცია გუმაჭყაფალიშ არსებობაშ გურშენ მოგონილ ამბეთ მიორჩქუდეს. ართ დღას ბენს ქიმიაჩ შესაძლებლობაქ, გეგშართკო კლასიშ წოხოლე დო გენწყუკო, ნამდა სიცოცხლე მუშით ვა გორჩქინე დო თის გუმაჭყაფალ ჸუნს. თიქ გაბედულო იჩუ მუშ რწმენაშ გურშენ. მუქ მაჸუნ თეს შედეგო? ბენ იჩიებ: „მასწავლებერ ყურადღებათ მირჩქილედ დო ხვალე თენა ვარინ, თიქ ჩქიმ ჩანაწერეფს, სოდეთ არგუმენტეფ მაფუდ მოჸუნაფილ, ასლეფ გუკეთ დო კლასელეფს დურიგ. კლასელეფიშ უმენტაშ ხოლო ყურადღებათ მირჩქილედ დო ოთანხმუდეს თის, მუდგას იფჩიებუდ“. მუჭოთ ბენიშ შემთხვევაშე იძირ, გაბედულ ადამიანეფს ხშირას შხვეფ ხოლო პატის ცენა. შილებე თეცალ საქციელით ალალ გურიშ კათას ხოლო მეხვარან იეჰოვაშ გაჩინებაფას. თაშ ნამდა, მართალო ჯგირ მიზეზეფ მიღნა, გუვავითარათ გაბედულება.

10. მუ რე ართგურობა?

¹⁰ ბიბლიას გიმორნაფილ ებრაულ სიტყვა, ნამუთ თარგმნილ რე, მუჭოთ „ართგურობა“ დო „ართგურ ჸოროფა“, გინმოჩანს მანგარ ტიბ დამოკიდებულებას დო ემოციურ მიჯაჭვულობას დო ხშირას გიმირინუაფ თი ჸოროფაშ ეიოჭარალო, ნამუთ ღორონთის უღჷ მუშ მსახურეფიშ მიმართ. კინ თე სიტყვა გიმირინუაფ თი ჸოროფაშ ეიოჭარალო ხოლო, ნამუთ ღორონთიშ მსახურეფს ართიანშქას უღნა (2 სამ. 9:6, 7). იეჰოვა ელჷ, ნამდა ჩქი ხოლო გეგმიფრჩქინანთ თეცალ ართგურობას თიშ მიმართ. ჩქინ ართგურობაქ შილებე დროშ მიკულაწკუმა ართო უმოსო გემანგარას, მუდგას ჯგირო ოძირანს დანიელიშ ცხოვრება. მორთ ასე გუვარჩუათ, მუჭო გემანგარ თიშ ართგურობაქ.

11. მუჭო გიმიცად დანიელიშ ართგურობაქ, მუჟამსით თინა ხანშამიშულირ რდჷ? (ქოძირით სურათ გალენ გვერდის).

¹¹ დანიელიშ ართგურობაქ ბრელშა გიმიცად. მარა ართ-ართ არძაშ უმოს დიდ გამოცდაშ წოხოლე თიმწკუმა გედირთჷ, მუჟამსით 90 წანას გინოჩილათირ რდჷ. თე დროს ბაბილონ ეჭოფილ აფუდ მიდია-სპარსეთის დო დარიოს მეფენდჷ. სამეფო კარს დიდ თანამდებობა უკინებდესინ თინეფს, ჯოგდეს დანიელ დო ვართ თიშ ღორონთის ცენდეს პატის. ათეშენ თიშ ოჸვილარო გეგმა ქუდარსხუეს. თინეფქ მეფეს თიცალ კანონშა მაჭარაფუეს ხე, ნამდგათ გიმიცადებუდ მიშ ართგურ იჸუაფუდ დანიელ, ღორონთიშ დოვარ მეფეშ. მეფეშა ართგურობაშ დამტკიცებელო შხვეფცალო დანიელს ხოლო მეთხიებუდ 30 დღაშ დინახალე ლოცვათ ვა დურაგადუკო ღორონთის. მარა მუშო ოკო რაგად, დანიელს თაშ ვა მუქციებ დო იეჰოვაშ ართგურქ ქუდოსქიდ, მუდგაშ გურშენ ლომეფწკუმა ქინაჸათეს. იეჰოვაქ აკურთხჷ დანიელ, მუშ ართგურობაშ გურშენ დო ირსხჷ ლომეფიშ პიჯშე (დან. 6:12—15, 20—22). ჩქი მუჭო შემლებნა, იეჰოვაშ მიმართ თიცალ ართგურობაშ გავითარება, მუნერით დანიელს უღუდ?

12. მუჭო შეიალებუ დანიელს გავითარკო იეჰოვაშ მიმართ თიცალ ართგურობა, ნამდგაშა მუთუნს ვაცილებედ?

¹² მუჭოთ ჟიშე მიფშინეთ, ართგურობა გერსხილ რე ძალიერ ჸოროფაშა. დანიელს მანგარო უჸორდჷ მუშ ზეციერ მუმა, ათეშენ თიშ ართგურობაშა მუთუნს ვაცილებუ. დანიელ ფიქრენდჷ იეჰოვაშ თვისებეფშე დო თიშე, მუჭო გიმირჩქინანდჷ თინეფს, მუდგაშ ჭყოლოფათ თიქ იეჰოვაშ მიმართ ძალიერ ჸოროფა გევითარ (დან. 9:4). თეს გეძინელ, დანიელ ფიქრენდჷ თი ჯგირ საქმეეფშე,  მუთ იეჰოვაქ მუშო დო მუშ ხალხშო აკეთ დო თე ირფელიშ მარდულ რდჷ (დან. 2:20—23; 9:15, 16).

13. ა) მუჭო გიმიცადებ ჩქინ ახალგაზრდეფიშ ართგურობა ამდღა? ქიმიჸონით მაგალით (ქოძირით სურათ). ბ) მუჭოთ ვიდეოშე იძირე, მუჭო შეილებნა უპასუხათ თინეფს, მით გოკითხნა, უკინენან დო ვარ იეჰოვაშ მოწმეეფ ხუჯის ჰომოსექსუალეფიშ ცხოვრებაშ წესის?

¹³ დანიელცალო, ამდღა ახალგაზრდეფს თიცალ ხალხწკუმა უხვადნა ურთიერთობა, მიდგას მუთუნო ვემიორჩქ იეჰოვა დო თიშ ნორმეფ. თეცალ კათას შილებე თოლშა ვამუხედას თინეფ, მიდგას ღორონთ უჸორს. ნამთინე ოცად, დამცირას ჩქინ ახალგაზრდეფ დო თეშნერო მიოდინაფუან ართგურობა იეჰოვაშ მიმართ. მორთ გუვარჩუათ, მუ სირთულეს შეხვად ავსტრალიას მახორუ ართ ახალგაზრდაქ, სახელო გრეიმქ. ართშა მასწავლებერქ მთელ კლასის კითხჷ, მუ რეაქცია აღვენუდეს თინეფიშ მეგობარს ქუთქუალუდკო, ნამდა ჰომოსექსუალ რე. თინა ხოლო თქუ, ნამდა თინეფქ, მით თე პიროვნებას ხუჯის ქუდუკინენდეს ართ მხარეს ქიგედირთესკო დო მით ვა დუკინენდეს — მაჟია მხარეს. გრეიმ იჩიებ: „მთელ კლასშე ხვალე მა დო ხოლო ართ იეჰოვაშ მოწმე თანაკლასელქ ქიგებდირთით თი მხარეს, მით ხუჯის ვა დუკინენდჷ თეცალ ცხოვრებაშ სტილს“. მარა ირფელ თეთ ვათებე. მუდგაქ უკულ მოხვად, თიქ ხოლო ართშა გეგმოცად გრეიმიშ ართგურობა იეჰოვაშ მიმართ. თინა აგრძელენს: „გაკვეთილიშ თებაშახ ჩქიმ კლასელეფ დო მასწავლებერ ხოლო, მა დო ჩქიმ თანაკლასელს გუმაძიცანდეს დო ბლანძღუნდეს. ირნერო ვეცად, მშვიდას დო ტაქტიანო გეუნწყიკო თინეფს ჩქიმ პოზიცია, მარა ართ სიტყვაშ მორჩქილაფა ხოლო ვაკოდეს“. მუჭო იმოქმედ თე ირფელქ გრეიმშა? თინა იჩიებ: „ლანძღუაშ მორჩქილაფა შუროთ ვა მოსიამოვნუდ, მარა მოხიოლუდ, ნამდა შემალებუ იეჰოვაშ ართგურქ ქუდოფსქიდკო დო მტკიცას დეფცვიკო ჩქიმ პოზიცია“. d

14. მუ რე თი ართ-ართ საშვალება, მუდგათ შემლებნა იეჰოვაშ მიმართ თიცალ ართგურობაშ გავითარება, ნამდგაშა მუთუნს ვაცილებე?

¹⁴ დანიელცალო იეჰოვაშ მიმართ ძალიერ ჸოროფა ქუმაღვენუნან-და, შემალებენა თიცალ ართგურობაშ გავითარება, ნამდგაშა მუთუნს ვაცილებე. თეშ კეთებას მიმეხვარებნა ხოლო უმოსიშ გაგება ღორონთიშ სარკო თვისებეფშენ, მუთ არგამათ იძირე თიშ ნახელუანშე (რომ. 1:20). იეჰოვაშ მიმართ ჸოროფაშ გამანგარება დო უმოს პატიცემაშ გიმორჩქინა ქუგოკონან-და, შეილებნა ჩქინ ვებგვერდის წეკითხათ სტატიეფ სერიაშე „მიქ გაჭყჷ?“ ვარდა ქუჯინათ თექ მოჩამილ ვიდეოეფს. თეს გეძინელ, შეილებნა ქოძირათ ბროშურეფ „მუშით გორჩქინდუო სიცოცხლექ?“ [ქორთ.] დო „სიცოცხლეშ გოჭყაფა — ხუთ კითხვა, ნამდგაშე ღირჷ დაფიქრება“ [ქორთ.]. თე პუბლიკაციეფიშ გურშენ დანიას მახორუ ართ ახალგაზრდა და, ესთერ იჩიებ: „თე ბროშურეფს მანგარ საინტერესოთ რე ირფელ ენწყუმილ. თინეფ ვაირაგად, მუშ ოკო რჯერდას, უბრალოთ გირაგად ფაქტეფს დო დასკვნეფიშ გიშაღალაშ საშვალებას სი გარზენს“. ჟიშე მოშინაფილ ბენ ხოლო თეცალ მუდგარენს იჩიებ: „თე პუბლიკაციეფქ რწმენა გამიმანგარ დო ხოლო ართშა დუმარწმუნ, ნამდა სიცოცხლე ღორონთიშ გოჭყაფილ რე“. თე პუბლიკაციეფიშ გიმორკვიებაშ უკულ ალბათ თქვა ხოლო დეთანხმებუთ ბიბლიას ინოჭარილ სიტყვეფს: „იეჰოვა, ჩქინ ღორონთ, სი გოკუთვნ დიდება, პატი დო ძალიერება, მუშენდა ირფელ სი გაჭყჷ“ (გამოცხ. 4:11). e

15. ხოლო მუ საშვალებათ შემლებნა იეჰოვაწკუმა ხოლოშიან ურთიერთობაშ გამანგარება?

¹⁵ ხოლო ართ საშვალება, მუთ იეჰოვაშ მიმართ ძალიერ ჸოროფაშ გავითარებას მიმეხვარებნა რე თიშ სქუაშ, იესოშ, ცხოვრებაშე უმოსიშ გაგება. ზუსტას თენა აკეთ გერმანიას მახორუ ართ ახალგაზრდა და სამირაქ. თინა იჩიებ: „იესოშ ცხოვრებაშ გიმორკვიებათ უჯგუშო  გეფჩინებაფე იეჰოვა“. ბაღანობას სამირას უჭირდჷ თიშ დაჯერება, ნამდა იეჰოვას შეულებუდ ქიჸოროფუკო თინა დო თიშ მეგობარო გინირთკო. მარა იესოშ გურშენ თაშ ვა ფიქრენდჷ. მუჭოთ თინა იჩიებ, მოწონდჷ იესო, მუშენდა თინა მეგობრულ რდჷ დო უჸორდჷ ბაღანეფ. სამირა მუთ უმოსის გებულენდჷ იესოშ გურშენ, თით უმოსო ეახლოებუდ იეჰოვას. თინა იჩიებ: „ჭიე-ჭიეთ ქიმეფხვად, ნამდა იესო სრულყოფილო მეჸუნს მუამუშიშ მაგალითის დო თინეფ მანგარო გუნა ართიანს. თის ხოლო ქინვანჭჷ, ნამდა ართ-ართ მიზეზ, მუდგაშ გურშენ იეჰოვაქ იესო დედამიწაშა მაშქვჷ, თინა რდჷ, ნამდა ადამიანეფქ უჯგუშო გეჩინებაფესკო იეჰოვა“ (იოან. 14:9). იეჰოვაწკუმა ხოლოშიან ურთიერთობაშ გამანგარება ქუგოკონან-და, დრო გეგმურთით იესოშ ცხოვრებაშე უმოსიშ გაგებას. თეს გაკეთენთ-და, იეჰოვა ხოლო უმოსო ქიგეჸოროფებნა დო უმოსო გაჸინა გინოჭყვიდილ, ქუდოსქიდათ თიშ ართგურეფქ.

16. მუ ჯგირობუას მიბღენთ ართგურეფ ქიპჸით-და? (ფსალმ. 18:25; 37:28).

¹⁶ ართგურ ადამიანს, ართგურ მეგობარ ჸუნს (რუთ. 1:14—17). თეშნერო რე იეჰოვა ხოლო. თინა სიტყვას ირზენს, ნამდა ართგურს ართგურობათ უპასუხენს. ზუსტას ათეშენ, ღორონთიშ ართგურეფ კმაყოფილებას დო შინაგან სიმშვიდეს გინაფლენა (წეკითხით ფსალმუნიშ 18:25; 37:28). უბრალოთ დეფიქრით, ირფელიშშემალებე უზენაეს ღორონთ მოპირნა, ნამდა ირიათო ვუჸორდათ იჸი დო ჩქინ მეგობარ იჸუაფ. ათეშენ, დარწმუნებულეფ ვორეთ, ვართ განსაცდელს, ვართ თხოზინს დო ვართ არძაშ უმოს დიდ ნტერს — ღურას ხოლო „ვეშიალებე გემკმოჸოთან ღორონთიშ ჸოროფას“ (დან. 12:13; ლუკ. 20:37, 38; რომ. 8:38, 39). ათეშენ მნიშვნელოვან რე, მივაჸუნათ დანიელიშ მაგალითის დო ბოლოშახ იეჰოვაშ ართგურეფქ ქუდოფსქიდათ.

17, 18. ხოლო მუშ გურაფა შემლებნა დანიელშე?

¹⁷ თე სტატიას დანიელიშ ჟირ თვისებაშ გურშენ ქიფჩით, მარა თიშე ხოლო ბრელ მუდგარენიშ გურაფა შემლებნა. იეჰოვაქ დანიელს ხილუეფ დო სიზმარეფ გიოძირუ დო წინასწარმეტყველურ ცნობეფიშ ენწყუმაშ უნარ ხოლო მეჩჷ. თე წინასწარმეტყველებეფშე ბრელქ უკვე შისრულ. მარა თინეფიშ ნამთინე დეტალ დაკავშირებულ რე თი მოვლენეფწკუმა, ნამდგაქ მომავალს ოკო შისრულას. თე ირფელ თითოულ ადამიანშა იმოქმედენს.

¹⁸ უკულიან სტატიას გუვარჩიენთ დანიელიშ ჟირ წინასწარმეტყველებას. თინეფიშ ინონჭაფა თითოულს, მუჭოთ ახალგაზრდას, თეშ ხანშამიშულირს მიმეხვარებნა, ამდღარშე მიბღათ ბრძნულ გადაწყვეტილებეფ. თეს გეძინელ, თე წინასწარმეტყველებეფ მიმეხვარებნა, ვორდათ უმოს გაბედულეფ დო ვა ვოდინუათ ართგურობა, ნამდა მზათ ვორდათ თი განსაცდელეფშო, ნამუთ მომავალს მელნა.