1. მუ აზრიშ ოკო ვორდათ ქრისტიანულ რწმენაშენ?

ქრისტიანულ რწმენა ძვირფას რე. თინა არძას ვა უღუ (2 თეს. 3:2). მარა იეჰოვა არზენს თის მუშ თაყვანიშმცემელეფს (რომ. 12:3; გალ. 5:22). მიდგას რწმენა უღუნ, თეშ მარდულეფ ოკო რდან.

2, 3. ა) მუ კურთხევეფ ელუ თის, მიდგა რწმენას გიმირჩქინანს? ბ) მუ კითხვეფს გენიფხილენთ?

² იესო ქრისტექ თქუ, ნამდა ზეციურ მუმას ხალხი მუშ სქუაშ მეშვეობით მოჸუნს (იოან. 6:44, 65). იესო ბწანდან თენა ცოდვეფიშ პატიებაშ საშვალებას ირზენს. თენა არზენს ხალხის იმენდის, ნამდა გეხარან იეჰოვაწკუმა მარადიულ ურთიერთობათ (რომ. 6:23). ჩქინ დამსახურება რენო თეცალ კურთხევა? ჩქი ცოდამეფ ვორეთ დო ათეშგურშენ ხვალე ღურა დევმსახურით (ფსალმ. 103:10). მარა იეჰოვაქ მუდგარენ ჯგირ ქოძირ ჩქინწკუმა. თიქ ჯგირობუა მიკეთეს თით, ნამდა მიმეხვარეს, ჩქინ გურს მეუღებუდკო სახიოლო ამბე. თეშ შედეგ თინა რე, ნამდა ქიბრწმუნით  იესო დო მიღუნა მარადიულ ცხოვრებაშ იმენდი (წეკითხით 1 იოანეშ 4:9, 10).

³ მუ რე სინამდვილეს რწმენა? ნიშნენსო თინა ხვალე თი კურთხევეფიშ გურშენ რჩქინას, მუდგას ღორონთი მიმზადენა? დო მუთ, არძაშ უმოს მნიშვნელოვან რე, მუნერო შემლებუნა, გეგმიფრჩქინათ რწმენა?

4. მუშენ ნიშნენს რწმენა ღორონთიშ განზრახვაშენ რჩქინაშე მეტის?

⁴ რწმენა ხვალე ღორონთიშ განზრახვაშენ რჩქინას ვა ნიშნენს. რწმენა დიდ ძალა რე, ნამუთ კოჩის ღორონთიშ მოსაწონ საქმეეფს ოკეთებაფუანს. თიშ რწმენა, ნამდა ღორონთ მირსხენან, მოხვარუნა, იფქადაქათ თე სახიოლო ამბე. თეშ გურშენ პავლე მოციქულ იჩიებუდ: „სიტყვას სახალხოთ ქიჩიებუქ, ნამუთ სქან პიჯის რე, ნამდა იესო უფალ რე, დო გურით ქორწანს-და, ნამდა ღორონთიქ გაცოცხლ თინა, გინასკიდუქ, მუშენდა გურით წანა სიმართლეშ მიოჭირინაფალო, დო პიჯით სახალხოთ იჩიებუნა გინასკილიდარო“ (რომ. 10:9, 10; 2 კორ. 4:13).

5. მუშენ რე რწმენა თეცალ მნიშვნელოვან დო მუ მიმანგარენა თის? ქიმიჸონით მაგალით.

⁵ არგამა რე, ნამდა ღორონთიშ ახალ ქიანას ქიფცხოვრათინ, თენა დამოკიდებულ რე თიშა, მუზმათ მიღუნა რწმენა დო ქუვამანგარენთ-დო ვარ თის. რწმენა შილებე შევადარათ ყვავილშა წყარიშ ელაბუნას. ხელოვნურ ყვავილიშ გინაწონს, ცოცხალ ყვავილ ითირუ დო ირდუ. ცოცხალ ყვავილს წყარ ველუბ-და, დოხუმუ. ყვავილქ გეხარას თიშგურშენ, თის ირიათო წყარიშ ელაბუნა ოსაჭირ. თაშ რე ჩქინ რწმენა ხოლო; თის ვემკვოჯინით-და, ჭიჭე-ჭიჭეთ მემდინუნა (ლუკ. 22:32; ებრ. 3:12). მარა თის ყურადღებას ქიმვაქციენთ-და, ჩქინ რწმენა ცოცხალ იჸუაფ; თინა მირდუ დო იპჸუაფუთ ჯანსაღეფი რწმენას (2 თეს. 1:3; ტიტ. 2:2).

6. მუჭო რე ეჭარილ რწმენა ებრაელეფიშ 11:1?

⁶ ებრაელეფიშ 11:1-ს (წეკითხით) ეჭარილ რე, მუს ნიშნენს რწმენა. რწმენა ჟირ მუდგარენს ნიშნენს, მუთ უძირაფ რე ჩქინო: 1) „მუდგაშ იმენდ მიღუნა“ — თეშა მიშურს ღორონთიშ დუნაპირებ, ნამუქით ანწ ოკო მოხვადას. თენა რე ბოროტებაშ განადგურება დო ახალ ქიანას ცხოვრება; 2) „უძირაფ სინამდვილე“. თე კონტექსტის ბერძნულშე ნათარგმნა სიტყვა „არგამა მტკიცება“ ნიშნენს უძირაფ სინამდვილეშ „დუმაჯერებელ მტკიცებას“, ნამდა იეჰოვა ღორონთი, იესო ქრისტე დო ანგელოზეფი არსებენა დო ზეციერ სამეფო მოქმედენს (ებრ. 11:3). მუჭო ვამტკიცენთ, ნამდა ჩქინ იმენდ ცოცხალ რე დო ბჯერა თი უძირაფ სინამდვილეშ, ნამუშ გურშენ ღორონთიშ სიტყვა იჩიებ? თეს ჩქინ სიტყვეფით დო საქმეეფით ვამტკიცენთ, ნამუშ უმშო ჩქინ რწმენა სრულ ვეჸუაფ.

7. მუჭო მოხვარუნა ნოეშ მაგალით, ქიგებგათ, მუს ნიშნენს რწმენა? (ქოძირით სურათ 26-ა გვერდის).

⁷ ებრაელეფიშ 11:7-ის ეჭარილ რე, მუნერ რწმენა უღუდ ნოეს. მუჟამსით ღორონთიქ ნოე გაფრთხილ თიშ გურშენ, მუთ დიო ძირაფილ ვარდუნ, თიქ ღორონთიშ შიშ გეგმირჩქინ დო მუშ ოჯახიშ ორსხებელო კიდობან აშენ. ნოექ რწმენა გიმოხანტ თით, ნამდა ქვერსემ კიდობან აშენ. ალბათ მუშ მეზობელეფი ოკითხუდეს ნოეს, მუშენ აშენენდ თინა თეშმადიდა კიდობანს. დოუფულუო ნოექ თინეფს ვარდა ხომ ვაუთქუალ, მუ თქვან საქმე რენია? მუშო ოკო რაგად, ვარ! რწმენაქ მეხვარ ნოეს გაბედულო უქადაქებუდკო დო გაუცხადებუდკო ღორონთიშ განაჩენი. ვა რე გამორიცხულ, ნამდა ნოე თე ხალხის  ზუსტას თი სიტყვეფს გუმეორენდ, მუთ იეჰოვაქ უწუ: „ვორწყექ, ქუმორთ არძანერ შურდგუმილიშ განადგურებაშ დროქ, მუშენდა ძალადობათ ეიფშუ ქიანაქ . . . დიდწყარალას ქიმიპჸონანქ ქიანაშა, ნამდა მოფსპე ცაშთუდო არძანერ შურდგუმილ, ნამუსით სიცოცხლეშ ძალა ინუდგუ. ირფელ მისპუ ქიანას“. ნოექ ხალხის თინა ხოლო უწუ, მუჭო შეულებუდეს გინოსკილადა. ალბათ თინა ღორონთიშ მითითებას გუმეორენდ თინეფს: „გემნორთ კიდობანშა“. თეგვარო, ნოექ რწმენა თით ხოლო გიმირჩქინ, ნამდა სიმართლეს ქადაქენდ (დაბ. 6:13, 17, 18; 2 პეტ. 2:5).

8. მუჭო ენწყუნს მოწაფე იაკობ ნამდვილ რწმენაშ მნიშვნელობას?

⁸ პავლექ ღორონთიშ შურით ებრაელეფს რწმენაშ გურშენ მეჭარუნ თიშ უკულ ჭიჭე ხანშა, მოციქულ იაკობიქ დოჭარ წერილ, სოდეთ თინა ხოლო იჩიებ რწმენაშ გურშენ. პავლეცალო, მოციქულ იაკობ იჩიებ, ნამდა ნამდვილ ქრისტიანულ რწმენა ხვალე მუდგარენიშ დაჯერება ვა რე; თიშა საქმეეფიშ კეთება ხოლო მიშურს. „ქუმოძირ სქან რწმენა საქმეეფიშ უმშო დო მა საქმეეფით ქუგოძირანქ ჩქიმ რწმენას“, — იჩიებ იაკობ (იაკ. 2:18). იაკობ არგამა გასხვავებას  ორთუ უბრალოთ მუდგარენიშ დაჯერება დო რწმენაშ გიმორჩქინა შქას. დემონეფს ხოლო ჯერა, ნამდა ღორონთი არსებენს, მარა თინეფს ვა უღუნა ნამდვილ რწმენა დო ღორონთიშ განზრახვეფს ოწინააღმდეგუნა (იაკ. 2:19, 20). განსხვავებაშ ოძირაფალო იაკობის მოჸუნს აბრაამიშ მაგალით: „ჩქინ მუმა აბრაამქ საქმეეფით ვეჸუო მართალ კოჩო აღიარებულქ, მუჟამსით მუშ სქუა, ისაკი, სამსხვერპლოშა მიჸონ შესაწირო? მუჭოთ ორწყეთინ, აბრაამიშ რწმენას საქმეეფ ეკოჸუნდ დო რწმენა საქმეეფქ გინურთინუ სრულყოფილო“. თიშ ოძირაფალო, ნამდა რწმენას საქმეეფი ოკო ეკოჸუნდასინ, იაკობი იჩიებ: „თეგვარო, მუჭოთ სხეულ რე ღურელ შურიშ უმშო, თეშ რწმენა ხოლო ღურელ რე საქმეეფიშ უმშო“ (იაკ. 2:21—23, 26).

9, 10. მუჭო მოხვარუნა მოციქულ იოანე, ქიგებგათ, მუშენ რე მნიშვნელოვან რწმენაშ გიმორჩქინა?

⁹ სოდგარენ 30 წანაშ უკულ, მოციქულ იოანექ სახარება დო სუმ წერილი ჭარ. ქესმებუდუო იოანეს რწმენაშ ნამდვილ მნიშვნელობა თიშნერო, მუჭოთ ბიბლიაშ შხვა მაჭარალეფქ ენწყეს თინა? იოანექ ბიბლიაშ შხვა მაჭარალეფშე მეტშა გიმირინუ ებრაულ სიტყვა, ნამუთ მინშა „რწმენაშ გიმორჩქინათ“ ითარგმნუ.

¹⁰ მაგალთო, იოანე იჩიებ: „მიდგას ღორონთიშ სქუა წანსინ, მარადიულ სიცოცხლე უღუ, მარა მიდგა ღორონთიშ სქუას ვამორჩილუნ, ვა ძირუნს სიცოცხლეს, თის ღორონთიშ რისხვა ქიგიანთხუ დუც“ (იოან. 3:36). ქრისტიანულ რწმენაშა იესოშ მითითებეფიშ მეჸუნა მიშურს. იოანეს ხშირას მოჸუნს იესოშ სიტყვეფი, სოვრეშეთ იძირე, ნამდა ირო ოკო გიმიფრჩქინათ რწმენა (იოან. 3:16; 6:29, 40; 11:25, 26; 14:1, 12).

11. მუჭო შემლებუნა მარდულეფ ვორდათ ჭეშმარიტება გებგითინ თიშ?

¹¹ მარდულეფ ოკო ვორდათ, ნამდა იეჰოვაქ მუშ წმინდა შურით გუმოგებაფუეს ჭეშმარიტება დო გიმმორჩქინაფუეს სახიოლო ამბეშა რწმენა (წეკითხით ლუკაშ 10:21). დღას ოკო ვემვოტოუათ იეჰოვაშა მადლობაშ რაგად თიშენ, ნამდა თიქ მემღეს მუშ სქუაშ მეშვეობით, ნამუთ რე ჩქინ რწმენაშ „მეთაურ დო გამასრულყოფილებელ“ (ებრ. 12:2). მარდულობა გეგმოფხანტათინ თიშენ, ჩქინ რწმენა გუვამანგარათ ოკო ლოცვათ დო ბიბლიაშ კითხირით (ეფეს. 6:18; 1 პეტ. 2:2).

12. მუჭო გიმიფრჩქინათ რწმენა?

¹² ჩქი ირო ოკო გიმიფრჩქინათ იეჰოვაშ დუნაპირებუშ რწმენა. თეს შხვეფი ხოლო ოკო ორწყედან. მაგალთო, ოკო იბქადაქათ ღორონთიშ სამეფოშ გურშენ დო ვოგურუათ ხალხის ბიბლია, არძას ჯგირ უკეთათ, განსაკუთრებულო თინეფს, მით რწმენათ ჩქინიან რენა (გალ. 6:10). ირნერო ვეცადათ, დობთირუათ ჯვეშ პიროვნება დო მიბშორათ ირფელ, მუთ ქეცილებ ჩქინ სულიერობას (კოლ. 3:5, 8—10).

13. მუშენ რე მნიშვნელოვან ღორონთიშ რწმენა, მუჭო რე თინა ეჭარილ ბიბლიას დო მუშენ?

¹³ ბიბლია იჩიებ: „რწმენაშ უმშო ვესიამოვნებე ღორონთშა, მუშენდა მით ღორონთშა მეურსინ, ოკო წანდას, ნამდა თინა არსებენს დო აჯილდოვენს მთელ გურით მუშ მაგორუს“ (ებრ. 11:6). ღორონთიშ სიტყვა იჩიებ, ნამდა „ღორონთიშ რწმენა“ რე თიშ საფუძველ, ნამუთ ოსაჭირ არძას, ქუდოსკიდან ნამდვილ ქრისტიანო (ებრ. 6:1). ქრისტიანეფს რწმენაწკუმა ართო შხვა მნიშვნელოვან თვისებეფ ხოლო ოსაჭირუნა, ქუდოსკიდან ღორონთიშ ჸოროფას (წეკითხით 2 პეტრეშ 1:5—7; იუდ. 20, 21).

14, 15. მუსხით მნიშვნელოვან რე ჸოროფა რწმენაშ გინაწონს?

 ¹⁴ ბიბლიაშ მაჭარალეფს ოშობით ადგილს აფუნა რწმენა მოშინაფილ დო თეთ ოძირანა, მუსხით მნიშვნელოვან რე თინა. ნამთინ შხვა ქრისტიანულ თვისება ვა რე თესხიშა მოშინაფილ ბიბლიას. ნიშნენსო თენა თის, ნამდა რწმენა არძაშ უმოს მნიშვნელოვან ქრისტიანულ თვისება რე?

¹⁵ რწმენა დო ჸოროფაშ ართიანწკუმა შედარებაშ დროს, პავლე ჭარუნს: „თიცალ რწმენა ქომღუდას, ნამდა შემლებუდას გვალეფიშ გინოადგილება, მარა ჸოროფა ვამღუდასინ, მუთუნ ვეპჸიდ“ (1 კორ. 13:2). იესოქ თქუ, ნამდა არძაშ უმოს დიდ მცნება ღორონთიშ ჸოროფა რე (მათ. 22:35—40). ჸოროფა მოხვარუნა, მიღუდან ღორონთიშ მოსაწონ ბრელ თვისება, თეშა რწმენა ხოლო მიშურს. ჸოროფაშენ ბიბლია იჩიებ, ნამდა თის „ირფელ წანს“. ჸოროფა მოხვარუნა მიღუდან ირფელიშ რწმენა, მუდგას ბიბლია იჩიებ (1 კორ. 13:4, 7).

16, 17. მუჭო რე რწმენა დო ჸოროფა ართო მოშინაფილ ბიბლიას, მარა ნამ რე არძაშ უმოს დო მუშენ?

¹⁶ რწმენა დო ჸოროფა ჟირხოლო მნიშვნელოვან რე, ათეშგურშენ ბიბლიაშ მაჭარალეფს ბრელშა აფუნა მოშინაფილ თინეფ ართო ართ წინადადებას ვარდა ფრაზას. პავლე მოციქულ ჯიმალეფს მოუწოდენდ, ნამდა უღუდესკო რწმენა დო ჸოროფა (1 თეს. 5:8). პეტრექ ჭარ: „მართალ რე, დღას ვაიძირუნა თინა [იესო], მარა იშენით გიჸორა. ვართ ასე ორწყეთ, მარა რწანა“ (1 პეტ. 1:8). იაკობიქ მუშ ცხებულ ჯიმალეფს კითხუ: „თე ქიანაშ ღარიბეფი ვეგშაგორუო ღორონთიქ, ნამდა ქოჸოფედესკო რწმენათ მდიდარეფი დო ღორონთიშ სამეფოშ მემკვიდრეეფ, ნამუთ მუშ მოჸოროფეეს დეპირ?“ (იაკ. 2:5). იოანე იჩიებ: „თიშ მცნება თინა რე, ნამდა ბწანდან თიშ სქუაშ, იესო ქრისტეშ სახელი დო მიჸორდან ართიან“ (1 იოან. 3:23).

¹⁷ მართალ რე რწმენა მნიშვნელოვან რე, მარა მუჟამსით ღორონთი მუშ დუნაპირებუს შეასრულენსინ დო დედამიწას სამოთხეთ გინართინუანსინ, საჭირო ვეჸი მიღუდან თეშ რწმენა. მარა ღორონთიშ დო ხალხიშ ჸოროფა ირიათო მოსაჭირუდან იჸი. ათეშგურშენ პავლე იჩიებ: „ასე სქიდუ რწმენა, იმენდი დო ჸოროფა, მარა თე სუმშე ჸოროფა არძაშ უმოს რე“ (1 კორ. 13:13).

18, 19. მუ რე თიშ შედეგ, ნამდა ამდღა ღორონთიშ ხალხი რწმენას გიმირჩქინანს დო მიშ ჭყოლოფუათ რე თენა შეიოლებერ?

¹⁸ ამდღა იეჰოვაშ ხალხი ღორონთშ სამეფოშ რწმენას გიმირჩქინანს. თეშ შედეგ თინა რე, ნამდა ბრუო მილიონ და დო ჯიმა მთელ მსოფლიოს სულიერ სამოთხეს ცხოვრენა დო გაერთიანებულო ცენა ღორონთის თაყვანს. თინეფ ღორონთიშ შურს არზენა საშვალებას, ქიმოქმედას თინეფწკუმა (გალ. 5:22, 23). დასურო, ნამდვილ ქრისტიანულ რწმენა დო ჸოროფა ძვირფას თვისებეფ რე!

¹⁹ თეცალ ართობაშა ხვალე ჩქინ ძალებით ვემმაჭირინენა. თენა ღორონთიშ ჭყოლოფუათ რე შეიოლებერ. თე დიდებულ საქმე „სახელს გოუჸოთანს იეჰოვას დო თენა იჸუაფ მარადიულ ნიშანო, ნამუთ დღას ვემისპუ“ (ეს. 55:13). სინამდვილეს თენა „ღორონთიშ ძღვინ რე“, ნამდა „გეგნოფსკიდათ რწმენათ“ (ეფეს. 2:8). სულიერ სამოთხე გაგრძელენს რდუალას ონდო მთელ ქიანა ვეიფშაფუ სრულყოფილ, სამართლიან დო ბედნერ ხალხით, ნამუთ მარადიულო განადიდენს იეჰოვაშ სახელს. მორთ, ირიათო გეგმიფრჩქინათ ღორონთიშ დუნაპირებუშ რწმენა!