1. მუშენ იმსახურენს იეჰოვა განსაკუთრებულ ართგურობას?

იეჰოვა იმსახურენს, ნამდა განსაკუთრებულ ართგურობა გეგმიფრჩქინათ, მუშენდა თინა რე ჩქინ გუმაჭყაფალ დო სიცოცხლეშ მუმაჩამალ (გამოცხ. 4:11). მარა, შილებე თეშ კეთებას მუდგარენქ მეცილან. მართალ რე, ჩქი მიჸორა იეჰოვა დო პატის ფცენთ თის, მარა შილებე შხვა მუდგარენს უმოს ყურადღება დავუთმათ დო ვეგმიფრჩქინათ თი განსაკუთრებულ ართგურობა, ნამდგას ღორონთ იმსახურენს. ათეშენ, მოკონა ქიგებგათ, მუჭო შილებე თექ მოხვადას. პირველ რიგის, გუვარჩუათ, მუს ნიშნენს იეჰოვაშ მიმართ განსაკუთრებულ ართგურობაშ გიმორჩქინა.

2. მუჭოთ გამოსვლაშ 20:5-ის ჭარჷ, მუჭო მიფქციებუთ, იეჰოვაშ მიმართ განსაკუთრებულ ართგურობას გეგმიფრჩქინანთ-და?

² მუჭოთ ბიბლიაშე იძირე, ღორონთიშ მიმართ განსაკუთრებულ ართგურობა ნიშნენს, მანგარო მიჸორდან თინა. იეჰოვაშ მიმართ განსაკუთრებულ ართგურობას გეგმიფრჩქინანთ-და, ხვალე თიშ თაყვანიშმცემელეფ იპჸუაფუთ. ჩქი მითინს დო მუთუნს ვემეფჩანთ თიშ საშვალებას ჩქინ გურს ღორონთიშ ადგილ ქიდეკინას (წეკითხით გამოსვლა 20:5).

3. მუშენ შემლებნა თიშ რაგად, ნამდა იეჰოვას გაუაზრებელო ვა ვომსახურუთ?

³ ჩქი იეჰოვას გაუაზრებელო ვა ვომსახურუთ. მუშენ შემლებნა თეშ რაგად? ჩქინ რწმენა გერსხილ რე თი ფაქტეფშა, ნამუთ ღორონთიშ გურშენ გებგით. ჩქი მობწონა იეჰოვაშ ჯგირ თვისებეფ. თეს გეძინელ, მიჩქნა მუ მოწონს თის დო მუ ვარ; ჩქი ხოლო იეჰოვაცალო ვუჯინეთ საკითხეფს. ჩქი მიჩქნა, ნამდა ღორონთის  ოკო მარადიულო ვემსახურათ თის დო ვორდათ ბედნერეფ. ათეშენ, ცხოვრებაშ არძა სფეროს იფცვენთ თიშ ნორმეფს. ჩქი დიდ პატით ფთვალუნთ თის, ნამდა იეჰოვა მარზენა საშვალებას, ვორდათ თიშ მეგობრეფ (იგავ. 3:32). ირფელ, მუდგას იეჰოვაშ გურშენ ბგურაფლენთ, თიწკუმა ხოლო უმოსო მაახლოვენა (იაკ. 4:8).

4. ა) მუს გიმირინუანს სატანა თიშო, ნამდა ვეშმალებუან იეჰოვაშ მიმართ განსაკუთრებულ ართგურობაშ გიმორჩქინაქ? ბ) მუს გუვარჩიენთ თე სტატიას?

⁴ სატანა აკონტროლენს თე ქვეყნიერებას დო გიმირინუანს თიშო, ნამდა ჩქინ ბუნებრივ სურვილეფიშ დაკმაყოფილება უმოს მნიშვნელოვანო მიფრჩქინათ დო გამჭირდან არასწორ სურვილეფწკუმა ბრძოლაქ (ეფეს. 2:1—3; 1 იოან. 5:19). თიშ მიზან რე, თეშ ქომიჸოროფუან შხვა მუდგარენეფ, ნამდა ვეშმალებუან იეჰოვაშ მიმართ განსაკუთრებულ ართგურობაშ გიმორჩქინაქ. მორთ გუვარჩუათ ჟირ საშვალება, ნამდგას სატანა თეშო გიმირინუანს. პირველ, თინა ოცად გუვავითარათ ფარაშ ჸოროფა დო მაჟია, გიშებგორათ გართობაშ გლახა სახეობა.

5. მუშენ ოკო ვორდათ კურცხას, ნამდა ვა გუვავითარათ ფარაშ ჸოროფა?

⁵ ჩქინ ბუნებრივ სურვილ რე, მიღდან დასაბაღ ოჭკუმალ, მოსაჭირნან ფერ მიკაქუნალ დო ნორმალურ ოცხოვრებელ ადგილ. მარა ჩქი კურცხას ოკო ვორდათ, ნამდა ვა გუვავითარათ ფარაშ ჸოროფა. სატანაშ ქვეყნიერებას ხალხიშ უმენტაშის უჸორს ფარა დო თი ირფელ, მუდგაშ ჸიდირ ფარათ შილებე (2 ტიმ. 3:2). იესოს უჩქუდ, ნამდა თიშ მიმაჸუნალეფქ შილებე ფარაშ ჸოროფა გავითარესკო. ათეშენ, თიქ თქუ: „მითინს ვეშულებ რდას ჟირ ბატონიშ მონა, მუშენდა, ვარდა ართის გიჯოგუანს დო მაჟიას ქიჸოროფუანს, ვარდა ართის გვალო გეგნაჸუნუ დო მაჟიას მუთუნო ვემირჩქინანს. ვეშქალებენა ღორონთიშ მონათ რდათ დო ქონებაშ ხოლო“ (მათ. 6:24). პიროვნება, მით ომსახურ იეჰოვას დო თეწკუმა ართო, დიდ დრო დო ენერგიას  უთმენს ფარაშ შიბას, ოცად ჟირ ბატონს ემსახურას. თის ვეშიალებე იეჰოვაშ მიმართ განსაკუთრებულ ართგურობაშ გიმორჩქინა.

6. მუშ გურაფა შემლებნა იესოშ სიტყვეფშე, ნამუთ ლაოდიკეაშ კრებაშ წევრეფს უწუ?

⁶ პირველ საუკუნეშ ბოლოშო ლაოდიკეაშ კრებაშ წევრეფ დუდშა იცქვანდეს: „მდიდარ ვორექ, ქონება დოფშაყარე დო მუთუნ ვა მოსაჭირ“. მარა, იეჰოვა დო იესოშ თოლს თინეფ „ცოდეფ, გაჭირებულეფ, ღარიბეფ, მუთუნ ვაპალდეს დო ბარგი ვემკაქუნდესინ თიცალეფ რდეს“. იესოს თინეფშა რჩევა მდიდარეფ რდესინ თიშენ ვემუჩამ. თინეფს თეშ უჸორდეს ფარა, ნამდა იეჰოვაწკუმა ურთიერთობას აფუჭენდეს დო ზუსტას თენა რდუ რჩევაშ მიზეზ (გამოცხ. 3:17). მუჟამსით ქეშვამჩნიენთ, ნამდა ჩქინ გურს ფარაშ ჸოროფა ივითარებ, ხეთეშე ოკო იმოფქმედათ დო გეგშვასწორათ აზროვნება (1 ტიმ. 6:7, 8). თაშ ვემიფქციებუთ-და, შხვა მუდგარენეფ უმოსო ქიმეჸოროფებნა დო იეჰოვა ვემიწონუანს ჩქინ მსახურებას. თინა „განსაკუთრებულ ართგურობას“ ითხინს (კან. 4:24). თაშ ნამდა, მუჭო შილებე ფარაქ მნიშვნელოვან ადგილ დეკინას ჩქინ ცხოვრებას?

7—9 მუ დიგურეთ ართ უხუცეს ჯიმა დეივიდიშ მაგალითშე?

⁷ გუვარჩუათ ართ უხუცეს ჯიმაშ, დეივიდიშ მაგალით, ნამუთ ამერიკაშ შეერთებულ შტატეფს ცხოვრენს. თინა იჩიებ, ნამდა ბრელს მუშენდჷ დო მუშ კომპანიაქ შხვა სამუშა ქუდავალ, სოდეთ უჯგუშ ხელფას აღვენუდ. თე ჯიმა მუშ ქიანას ართ-ართ არძაშ უჯგუშ სპეციალისტ რდუ თე დარგის. დეივიდ იჩიებ: „მინშა ფიფქრენდჷ, ნამდა თე ირფელ იეჰოვაშ კურთხევა რდუ“. მარა, ნამდვილო თაშ რდუო თენა?

⁸ დეივიდიქ ჭიე-ჭიეთ ქეშეამჩნუ, ნამდა მუშ სამუშა გლახათ მოქმედენდჷ იეჰოვაწკუმა თიშ მეგობრობაშა. თინა იჩიებ: „ჩქიმ დუდის ვამჩნიენდჷ, ნამდა კრებაშ შეხვალამეფს დო მინშა მსახურებას ხოლო, სამუშაშ პრობლემეფშე  ფიფქრენდჷ. მართალ რე, ბრელ ფარას ვორთუდ, მარა ირიათო სტრესიშ თუდო ვორდჷ დო ოსურწკუმა ხოლო პრობლემეფ მიღუდ“.

⁹ დეივიდიქ ქიმეხვად, ნამდა მუდგარენეფ აფუდ ოთირალ. თინა იჩიებ: „მტკიცას გეგნობჭყვიდ, მუდგაინ დოფთირეკო“. დეივიდიქ გეგმაჭარ თიცალ გეგმა, ნამუთ საშვალებას მეჩანდჷ ნაკლებ იმუშუკო დო თე გეგმა მუშ უნჩაშის ქაძირუ. მუ შედეგიქ მაჸუნ თეს? დეივიდ სამუშაშე გუტეს. მუჭო მიქცუ თიქ? თინა იშინანს: „მაჟია დღას დამხმარე პიონერობა დობჭარ“. დუდიშ ეიოჯუმალარო, დეივიდ დო მუშ ოსურქ შხვადო ქიდიჭყეს მუშობა — თინეფ დიდ შენობეფს ასუფთენდეს. ჭიჭე ხანიშ უკულ, დეივიდიქ სრულ დროთ პიონერო მსახურება ქიდიჭყჷ დო უმოს გვიანო, თიშ ოსურქ ხოლო თაშ მიქცუ. თინეფ თიცალ სამუშას მუშენდეს, ნამდგას ბრელ ვეშკიდანდჷ, მარა თინეფშო არძაშ უმოს მნიშვნელოვან ვარდჷ თე სამუშა. მართალ რე, ასე თინეფს უღდესინ თიშე ვით თისხით ნაკლებ შემოსავალ უღნა, მარა ირ თუთას აუცილებერ ხარჯეფშო დასაბაღ ფარას შიბულენა. დეივიდის დო მუშ ოსურს ოკონა პირველ ადგილს იეჰოვა გიორინუან; თინეფქ მუნეფიშ დუდშა გეგმოცადეს, ნამდა ღორონთ ზრუნენს თინეფშო, მით სამეფოშ ინტერესეფს პირველ ადგილს გიორინუანს (მათ. 6:31—33).

10. მუჭო შეილებნა დოთხილუათ თქვან გურ?

¹⁰ ვა უღჷ მნიშვნელობა ბრელ ფარა მიღნა დო ვარ ჭიჭე, კურცხას ოკო ვორდათ, ნამდა დოფთხილუათ ჩქინ გურ. მუჭო შემლებნა თეშ კეთება? ვა გუვავითარათ ფარაშ ჸოროფა. დღას ვემიფრჩქინათ სამუშა უმოს მნიშვნელოვანო ვინემ იეჰოვაშ მსახურება. მუჭო შეილებნა თიშ გაგება, თქვა ხოლო ხომ ვეგერეთ თეცალ საფრთხეშ წოხოლე? ქოკითხით თქვან დუდის: ხშირას ხომ ვა ფიფქრენქ სამუშაშენ, მუჟამსით კრებას ვარდა მსახურებას ვორექ? ხშირას ხომ ვა ფიფქრენქ თიშე, ქუმაღვენუ დო ვარ დასაბაღ ფარა მომავალს? ჩქიმ მეუღლეწკუმა პრობლემეფიშ მიზეზ ფარა ვარდა მატერიალურ ნივთეფ ხომ ვა რე? ქუვორექო მზათ ქიმუფშუე თიცალ სამუშას, ნამდგას ხალხიშ უმენტაშ ვეშკიდანდჷ, მარა საშვალებას მუჩანს ვემსახურე იეჰოვას? (1 ტიმ. 6:9—12). თე კითხვეფშე ფიქრიშ დროს ირიათო რშუდან, ნამდა იეჰოვას უჸორთ დო არძა მუშ მეძღვინელ მსახურს თეცალ მუდგარენს ოპირ: „ვა დოიტენქ დო ვემგოტენქ“. ათეშენ, მოციქულ პავლექ ჭარჷ: „იცხოვრით ფარაშ ჸოროფაშ უმშო“ (ებრ. 13:5, 6).

11. მუჭო შილებე გართობაქ იმოქმედას პიროვნებაწკუმა?

¹¹ იეჰოვას ოკო ცხოვრებათ ქიფსიამოვნათ დო გართობა თეს ხეს უნწყუნს. ღორონთიშ სიტყვას ჭარჷ: „მუთუნ ვა რე კოჩშო თიშე უჯგუშ, ჭკუმას, შვას დო იხარას მუშ ხანდათ“ (ეკლ. 2:24). მარა გართობაშ ბრელ სახეობაქ შილებე გლახათ იმოქმედას ჩქინწკუმა. გართობაშ თეცალ სახეობეფს შეულებ თეშ გინაშქვას ხალხ, ნამდა თინეფშო მისაღებ რდას ვარდა ქიჸოროფუან თიცალ მუდგარენეფ ხოლო, მუდგას ღორონთიშ სიტყვა ვეწონუანს.

12. მუჭოთ 1 კორინთელეფიშ 10:21 დო 22-ს ჭარჷ, მუშენ ოკო გიშაბგორათ გართობა გონივრულო?

¹² ჩქი მოკონა განსაკუთრებულ ართგურობა გიმიფრჩქინათ იეჰოვაშ მიმართ. ათეშენ, შეიოლებერ ვა რე ბჭკუმუნდათ „იეჰოვაშ სუფრაშე . . . დო დემონეფიშ სუფრაშე ხოლო“ (წეკითხით 1 კორინთელები 10:21, 22). მიდგარენწკუმა ოჭკუმალიშ ჭკუმუა, ხშირ შემთხვევას მეგობრობაშ ნიშან რე. მუჟამსით თიცალ გართობას გიშაბგორუნთ, სოდეთ რე ძალადობა, სპირიტიზმი, უზნეობა ვარდა შხვა ხორციელ სურვილეფ, ჩქი, თაშ ქოფთქუათინ, ღორონთიშ ნტერეფიშ მომზადებულ ოჭკუმალს ბჭკუმუნთ. შედეგო, ქოთ ჩქინ დუდის ვაზარალენთ დო ქოთ იეჰოვაწკუმა ურთიერთობას გილებლუანთ.

13, 14. ა) მუ გაგებათ მოგენს გართობა ოჭკუმალს? ბ) მუჭოთ იაკობიშ 1:14 დო 15-ს ჭარჷ, მუშენ შილებე გლახა გართობაქ დუმაზარალან?

¹³ მუ გაგებათ შილებე გართობა ოჭკუმალს შევადარათ? ჭკუმუაშახ შემლებნა გიშაბგორათ ნამ ოჭკუმალ ბჭკუმათ. მარა მუჟამსით ოჭკუმალს გეგნობყინტუნთ, ჩქინ ორგანიზმ უკვე ავტომატურო ღებულენს ნუტრიენტეფს, შხვა სიტყვეფით ქოფთქუათინ, ოჭკუმალშა მიშურსინ თი ნივთიერებეფს. ჯანსაღ ოჭკუმალ ჯამრთელობას უნწყუნს ხეს, მარა ჯანსაღ ვა რენ ფერ ოჭკუმალ მოცილნა. შილებე შედეგეფქ ართ უცბას ვეგმიარგამას, მარა დრო-ხანიშ მიკულაშ უკულ თინეფ არგამა იჸუაფ.

¹⁴ გართობა მოქმედენს ჩქინ ფიქრეფ დო გრძნობეფწკუმა. ათეშენ, სოიშახ გართობას გიშაბგორუნდათ, ოკო დევეკვირათ მუს ინობდვანთ ჩქინ გონებას. ჯანსაღ გართობას შეულებ ძალეფ დომრთინუან, მარა გლახა გართობას შეულებ დუმაზარალან (წეკითხით იაკობი 1:14, 15). გლახა გართობაშ შედეგეფქ შილებე ართუცბას ვეგმორჩქინდას, მარა თინა დრო-ხანიშ მიკულაწკუმა ართო გეგმიარგამებ. ათეშენ ღორონთიშ სიტყვა მაფრთხილენა: „დუდ ვეღორათ: ღორონთიშ გეძიცა ვეგშქალენა, მუშენდა კოჩ მუდგას თასუნს, თის მიღენს. მით ხორცშო თასუნს, ხორცშე ჸორადუას მიღენს“ (გალ. 6:7, 8). მართალო მნიშვნელოვან რე, ვარია ქოფთქუათ თიცალ გართობაშე, ნამუთ იეჰოვას ჯოგჷ! (ფსალმ. 97:10).

15. მუ საჩუქარ მუჩეს იეჰოვაქ?

¹⁵ ბრელ იეჰოვაშ მოწმე სიამოვნებით უჯინე ჩქინ ინტერნეტ ტელევიზიას, JW მაუწყებლობას^®. ართ და, სახელო მერილინ იჩიებ: „JW მაუწყებლობა მოხვარ ირიათო დადებით განწყობა მიღდას. თეს გეძინელ, შემლებ თავისფალო ვუჯინე თის, მუშენდა მიჩქჷ, ნამდა თექ ირფელ ჯგირს ოძირანა. მუჟამსით ხვალე ვორექ ვარდა გურ მაფჷ გოტახილ, ოჭმარეშ თაყვანიშცემაშ პროგრამას ვუჯინექ. თენა მოხვარ იეჰოვა დო თიშ ორგანიზაციაწკუმა უმოს ხოლოს ვორდე. JW მაუწყებლობაქ მთლიანო დოთირუ ჩქიმ ცხოვრება“. თქვა ხოლო ქოსარგებლენთო იეჰოვაშ თე საჩუქარით? ირთუთიან პროგრამაწკუმა ართო, JW მაუწყებლობას რე შხვადოშხვა აუდიო დო ვიდეო პროგრამეფ დო თეს გეძინელ, გურიშ ემაკინალ ბირეფ ხოლო.

16. მუშენ ოკო ვაკონტროლათ, მუსხი დროს ვუთმენთ გართობას?

¹⁶ ჩქი ხვალე გართობაშ სახეობა ოკო ვეგშებგორათ; მნიშვნელოვან რე ყურადღება თის ხოლო ქიმვაქცუათ, მუსხი დროს ვუთმენთ თის. თაშ ვა ვაკეთით-და, შილებე გართობას უმოს მეტ დრო დავუთმათ ვინემ იეჰოვაშ მსახურებას. ბრელს უჭირს გაკონტროლას, მუსხი დრო დუთმას გართობას. ართ 18 წანერ და, სახელო აბიგაილ იჩიებ: „დღაშ  ბოლოს, მუჟამსით მანგარ შულადირ ვორექ, ტელევიზორიშ ჯინა მოხვარ გურ ქიგნუჸუნუე. მარა ფრთხილას ვა ვორექ-და, შილებე ტელევიზორიშ ჯინას მუსხირენ საათ ქიმკვახარჯე“. ართ ახალგაზრდა ჯიმა, სახელო სამუელ იჩიებ: „მინშა ინტერნეტის ბრელ ჭიჭე ვიდეოს ვუჯინექ. დიო ართიშ ჯინათ იბჭყანქ დო სოიშახ გურს გუჩანქ, სუმ ვარდა ოთხ საათ მიკურს თინეფიშ ჯინათ“.

17. მუჭო შემლებნა ვაკონტროლათ მუსხი დროს ვუთმენთ გართობას?

¹⁷ მუჭო შეილებ აკონტროლე მუსხი დროს დუთმენქ გართობას? პირველ რიგის, ოკო ქიგეგე, ასე მუსხი დროს უთმენქ თის. ხომ ვეშეილებუდ, გეგმოჭარკო ართ მარაშ დინახალე მუსხი დრო დუთმჷ გართობას? მაგალთო, დოჭარ მუსხი საათის უთმენქ ტელევიზორიშ ჯინას, ინტერნეტიშ გიმორნაფას დო ვიდეო ლაჸაფეფიშ ლაჸაფის სქან ტელეფონს. თეშ უკულ ქოძირ, თე ირფელს ბრელ დროს უთმენქ-და, ახალ გეგმა შეადგინ. თეშ დაგეგმჷ, ნამდა პირველ რიგის მნიშვნელოვან საქმეეფ გაკეთე დო უკულ გართობას ხოლო გეგმურთჷ დრო. ქოთხი იეჰოვას ქიმგეხვარას თე გეგმაშ მეჸუნას. თეშნერო, გაღვენუ დრო დო ენერგია, ნამუთ გოსაჭირ ბიბლიაშ პირად გურაფაშო, ოჯახურ თაყვანიშცემაშო, კრებაშ შეხვალამეფშა დასწრებელო დო მსახურებას მონაწილებაშ მიოღებელო. თაშ გაკეთენქ-და, გართობაშო გიმორთილ დრო სქანო უმოს სასიამოვნო იჸუაფ, მუშენდა გარჩქვენუ, ნამდა იეჰოვაშ ნება პირველ ადგილს გიორინე.

18, 19. მუჭო შემლებნა ვოძირათ, ნამდა განსაკუთრებულ ართგურობას გიმიფრჩქინანთ იეჰოვაშ მიმართ?

¹⁸ თიშ უკულ, მუთ პეტრექ სატანაშ ქვეყნიერებაშ განადგურებაშ დო ახალ ქვეყნიერებაშ გურშენ ჭარჷ, თქუ: „საჸოროფო კათა, თეს ელუთინ თიშენ, ირნერო ეცადით, თიშ წოხოლე ქიგედირთათ თიცალეფო, მიდგას ბრალ ვეგეძ, სუფთა რე დო მშვიდობა უღჷ“ (2 პეტ. 3:14). მუჟამსით თე რჩევას იფთვალისწინენთ დო ირფელს ვორთუთ, ნამდა ზნეობრივო დო სულიერო სუფთეფ ვორდათ, თეშნერო განსაკუთრებულ ართგურობას გიმიფრჩქინანთ იეჰოვაშ მიმართ.

¹⁹ სატანა დო თიშ ქვეყნიერება დიო ხოლო ეცადებ მიმოჩილითუან დო პირველ ადგილს ქიგმორინაფუან ნაკლებო მნიშვნელოვან საკითხეფ (ლუკ. 4:13). თე ირფელიშ უმკუჯინუო, ჩქი მითინს დო მუთუნს ვემეფჩანთ საშვალებას ჩქინ გურს იეჰოვაშ ადგილ ქიდეკინას. ჩქი გინოჭყვიდილ მაფნა განსაკუთრებულ ართგურობა გეგმიფრჩქინათ იეჰოვაშ მიმართ, მუდგას ხვალე თინა იმსახურენს!