ოგურაფალ სტატია 41
ვადინუათ ართგურობა „დიდ გასაჭირიშ“ დროს
„გიჸორდან იეჰოვა, მით თიშ ართგურეფ რეთ. იეჰოვა თხილანს ართგურეფს“ (ფსალმ. 31:23).
ობირეში 129 ბოლოშა მიბთვინენთ
შინაარსი *
1, 2. ა) მუს გიმაცხადენა მალას მსოფლიო ლიდერეფ? ბ) ნამ კითხვეფიშ პასუხეფს გებგენთ?
წერმიდგინით, ნამდა მსოფლიო ლიდერეფქ უკვე გეგმაცხადეს „მშვიდობა დო უსაფრთხოება“, მუდგაშ რაგადის ბრელ ხანს ველუდით. თინეფ შილებე იცქვანდან, ნამდა მსოფლიო თეცალ უსაფრთხო დღას ვა ჸოფე. მსოფლიო ლიდერეფს ოკონა მოფიქრებაფუან, ითამ სიტუაციას აკონტროლენა. მარა, სინამდვილეს შუროთ ვაკონტროლენა თი მოვლენეფს, მუთ მომავალს მოხვადუ. მუშენ იფჩიებუთ თეს? მუშენდა, მუჭოთ ბიბლიას რე ნაწინასწარმეტყველებ, „თიმწკუმა დუდის ქიგიოტირხუნა განადგურება . . . დო დუდ ვა დარსხებენა“ (1 თეს. 5:3).
2 მორთ, ქიგებგათ პასუხეფ მნიშვნელოვან კითხვეფშე: მუ მოხვადუ „დიდ გასაჭირიშ“ დროს? მუშ კეთებას ელჷ იეჰოვა ჩქინდე? მუჭო შემლებნა მივემზადათ ამდღა, ნამდა „დიდ გასაჭირიშ“ დროს ვა ვოდინუათ ართგურობა? (მათ. 24:21).
მუ მოხვადუ „დიდ გასაჭირიშ“ დროს?
3. მუჭოთ გამოცხადებაშ 17:5-ს დო 15—18-ს ინოჭარ, მუჭო განადგურენს ღორონთ „დიდ ბაბილონს“?
3 წეკითხით გამოცხადება 17:5, 15—18. „დიდ ბაბილონ„ მალას გენადგურებ! მუჭო მოხვადუ თენა? „ღორონთ გურშა ქენუდვანს თინეფს, [მსოფლიო ლიდერეფს] შეასრულან თიშ განზრახვა“. მუ იგულისხმებ თე განზრახვას? ღორონთიშ განზრახვა რე, განადგურას არძა ტყურა რელიგია, მუდგაშა ქრისტიანულ სამყაროშ * რელიგიეფ ხოლო მიშურს. ღორონთ გურშა ქენუდვანს თე განზრახვას „ვით რქალამ ალიშფერ მხეცის“. „ვით რქა“ ასიმბოლოენს არძა პოლიტიკურ მართველს, ნამუთ ხუჯის უკინენს „ალიშფერ მხეცის“ — გაერთიანებულ ერეფიშ ორგანიზაციას (გამოცხ. 17:3, 11—13; 18:8). მუჟამსით თე პოლიტიკურ მართველეფ „ტყურა რელიგიაშ“ წინააღმდეგ გიშელენა, თენა დიდ გასაჭირიშ დოჭყაფაშ ნიშან იჸუაფ. თენა იჸუაფ მაშტაბურ დო ოშკურანჯ მოვლენა, ნამუთ დედამიწას მახორუ არძა ადამიანს შეხებ.
4. ა) მუთ შილებე გამართლან მსოფლიო ლიდერეფქ „დიდ ბაბილონიშ“ წინააღმდეგ გიშულა? ბ) მუჭო მიქციებნა თე რელიგიეფიშ მიმაჸუნალეფ?
4 ჩქი ვა მიჩქნა მუთ გამართლენა მსოფლიო ლიდერეფ „დიდ ბაბილონიშ“ წინააღმდეგ გიშულას. თინეფქ შილებე თქუან, ნამდა მსოფლიო რელიგიეფ ოცილნა მშვიდობაშ დამყარებას დო ირიათო ოცადნა გავლენა უღდან პოლიტიკურ მართველეფწკუმა. თეს გეძინელ, შილებე თინა ხოლო თქუან, ნამდა თე რელიგიურ ორგანიზაციეფს ბრელ სიმდიდრე დო ქონება უღნა (გამოცხ. 18:3, 7). გონივრულ რე იფიფქრათ, მსოფლიო ლიდერეფ ვა განადგურენა თე რელიგიეფიშ არძა მიმაჸუნალს. მუჭოთ იძირენ, პოლიტიკურ ლიდერეფ მოსპუნა არძა რელიგიურ ორგანიზაციას. თე ორგანიზაციეფიშ განადგურებაშ უკულ, თინეფიშ მიმაჸუნალეფ ქოძირნა, ნამდა რელიგიურ ლიდერეფს ვეშეასრულებეს თი დუნაპირებუეფქ, მუდგას ირზენდეს დო ათეშენ, მიოტენა თე რელიგიეფს.
5. მუ პირობა დოდვჷ იეჰოვაქ „დიდ გასაჭირწკუმა“ დაკავშირებით დო მუშენ?
5 ბიბლია ზუსტას ვეჩიებ მუსხი ხანს გეგრძელებ „დიდ ბაბილონიშ“ განადგურება, მარა, მუჭოთ მიჩქნა თე მოვლენა მალას გეთებუ (გამოცხ. 18:10, 21). იეჰოვაქ პირობა დოდვჷ, ნამდა შეამოკლენს „დიდ გასაჭირს“ მუშენდა გინასქიდან მუშ „გიშაგორილეფქ“ დო თეს გეძინელ, ჭეშმარიტ რელიგიაქ ხოლო (მარ. 13:19, 20). მარა, მუშ კეთებას ითხინს იეჰოვა ჩქინდე „დიდ გასაჭირიშ“ დოჭყაფაშე არმაგედონშახ?
ირიათო ხუჯ ქუდუკინით იეჰოვაშ წმინდა თაყვანიშმცემლობას
6. მუშენ ვა რე დასაბაღ, ვარია ქოფთქუათ ტყურა რელიგიაშ წევრობაშე?
6 მუჭოთ წოხოლენ სტატიას რდუ გარჩიებულ, იეჰოვა მუშ თაყვანიშმცემლეფშე ელჷ, ნამდა დეთხიებნა „დიდ ბაბილონს“. მარა, თეშა უმოს მიშურს, ვინემ ტყურა რელიგიაშ წევრობაშე ვარიაშ რაგად. ჩქი გინოჭყვიდილ ოკო მაფდან, ხუჯ დუკინათ ჭეშმარიტ რელიგიას დო ვემსახურათ იეჰოვას. გუვარჩუათ ჟირ საშვალება, მუჭო შემლებნა თეშ კეთება.
მორთ დღას ვა გუვოჩილითუათ კრებაშ შეხვალამეფ, არძაშ უმოს რთულ პერიოდის ხოლო (ქოძირით აბზაცი 7) *
7. ა) მუჭო შემლებნა ხუჯ ქუდუკინათ იეჰოვაშ მაღალზნეობრივ ნორმეფს? ბ) მუჭო იძირე ებრაელეფიშ 10:24 დო 25-შე, ნამდა მნიშვნელოვან რე შეხვალამეფშა გილულა განსაკუთრებულო ამდღა?
7 პირველ, ჩქი ირიათო ოკო ქუდუკინათ ხუჯ იეჰოვაშ მაღალზნეობრივ ნორმეფს. ჩქი დღას ვემიბწონენთ ქვეყნიერებას გავრცელებურ უზნეობას. მაგალთო, ჩქინო მიუღებელ რე სექსუალურ უზნეობაშ არძანერ ფორმა, თინეფშა მიშურს ართ სქესიშ ადამიანეფიშ ქორწინება (მათ. 19:4, 5; რომ. 1:26, 27). მაჟია, ჩქი ოკო გუვაგრძელათ იეჰოვაშ თაყვანიშცემა თანაქრისტიანეფწკუმა ართო. თეს ვორთუთ ირდიხას, სოდგა შემლებნა, მაგალთო ჩქინ სამეფო დარბაზეფს. მარა თენა შეიოლებერ ვარენ-და, ჸუდეეფს ვარდა შხვა ადგილეფს იფშაყარუთ, თიმწკუმა ხოლო, მუჟამსით თენა არგამათ ვა მაკეთებენა. მუდგაქ ვა მოხვადას, ჩქი დღას ვემვოტენთ შეხვალამეფშა გილულას. თეს გეძინელ, ჩქი თით უმოსო მოსაჭირნა ართო შაყარუა, „მუთ უმოსო ვორწყეთ თი დღაშ მონჭაფას“ (წეკითხით ებრაელები 10:24, 25).
8. საეგებიოთ, მუჭო შილებე მომავალს დითირას თი ცნობაქ, ნამდგას ფქადაგენთ?
8 „დიდ გასაჭირიშ“ დროს საეგებიოთ, დითირუ თი ცნობა, ნამდგას ფქადაგენთ. ამდღა ჩქი ფქადაგენთ სახიოლო ამბეს სამეფოშ გურშენ დო ვოცადუთ მუვამზადათ მოწაფეეფ. მარა თი დროს, ჩქი შილებე ხალხის პირდაპირ ვუწუათ ორაგადე, ათეშენ ბიბლია თე ცნობას დიდ კირცხის ადარენს (გამოცხ. 16:21). შილებე პირდაპირ გუვაცხადათ, ნამდა სატანაშ ქვეყნიერება მალას საბოლათ გენადგურებ. დრო-ხანიშ მიკულაწკუმა ართო, უმოს ზუსტას ქიგებგენთ, მუნერ იჸუაფ თი ცნობა, მუდგას იფქადაგენთ დო მუჭო ვაკეთენთ თეს. კინ თი მეთოდეფით იფქადაგენთო, ნამდგას უკვე ბრელ ხან რე გიმიბრინუანთ მსახურებას დო ვარ შხვა მეთოდეფით გუვაგრძელენთ ქადაგებას? დრო ირფელს ქუმოძირანა. არძანერ ვარიანტის, ჩქი მაღვენუნა თიშ პატი, გაბედულო გუვაცხადათ გასამართლებაშ ცნობა, ნამუთ იეჰოვაშე რე! (ეზეკ. 2:3—5).
9. მუჭო შილებე ხალხიქ მიქცუას ჩქინ ცნობაშ მორჩქილაფაშ უკულ დო მუშა შემლებნა ვორდათ დარწმუნებულ?
9 საეგებიოთ, ჩქინ ცნობაშ მორჩქილაფაშ უკულ, ხალხ ეცადებ მიმოტებაფუან ქადაგება. ამდღა ჩქი იეჰოვაშ მოხვარაშ იმენდ მიღნა მსახურებაშ დროს. ათეშენ, თიმწკუმა ხოლო ოკო ვა ვოდინუათ იმენდ, ნამდა თინა ქიმმეხვარებნა. შემლებნა დარწმუნებულ ვორდათ, ღორონთ ქომჩანა ძალას, შევასრულათ თიშ ნება (მიქ. 3:8).
მემზადით „გოგი მაგოგელიშ“ თავდასხმაშო
10. მუჭოთ ლუკაშ 21:25—28-ს რე ნაწინასწარმეტყველებ, მუჭო მიქციებ ხალხიშ უმენტაშ „დიდ გასაჭიშ“ დროს, მუჟამსით მუშ თოლით ქოძირნა, მუ მოვლენეფ მოხვადუ?
10 წეკითხით ლუკა 21:25—28. „დიდ გასაჭირიშ“ დროს ხალხ შქურნაფილ დო გაკვირვებულ იჸუაფ თი ირფელით, მუდგას ძირნა. თინეფ ქოძირნა, ნამდა ქიდიჭყაფუ თი ირფელიშ განადგურება, მუთ სტაბილურო მიორჩქუდეს. თეშა მიშურს პოლიტიკურ, კომერციულ დო შხვა სისტემეფ. თინეფ „დეტანჯებნა“ თიშ შიშით, ნამდა სიცოცხლეს მიოდინუანა, მუშენდა კაცობრიობაშ ისტორიას არძაშ უმოს საშინელ პერიოდის იცხოვრენა (სოფ. 1:14, 15). თი დროს, იეჰოვაშ მოწმეეფშო ხოლო მანგარო გერთულებ ცხოვრება. ქვეყნიერებაშ ნაწილ ვა ვორეთინ თიშენ, უმოს სირთულეეფ მაღვენუნა. შილებე თე დროს, აუცილებერ საჭიროებეფიშ უმშო ქუდოფსქიდათ.
11. ა) მუშენ იჸუაფნა იეჰოვაშ მოწმეეფ ყურადღებაშ ცენტრის? ბ) მუშენ ოკო ვა მოშკურდან „დიდ გასაჭირშა“?
11 მუდგარენ მომენტის, თი ხალხიქ, მიდგაშ რელიგია გენადგურებ, შილებე გერისხას თი ფაქტიშ გურშენ, ნამდა იეჰოვაშ მოწმეეფიშ რელიგია ვა განადგურებე. წერმიდგინით, მუჭო გიმოხანტუნდან იჸი მუნეფიშ თეცალ რეაქციას ირდიხას, თინეფ შქას, სოციალურ მედიას ხოლო. მსოფლიო ლიდერეფ დო თინეფიშ მართველ სატანა, გომჯოგუანა, მუშენდა ხვალე ჩქინ რელიგია გინასქიდუ. თინეფს ვაჸინა შესრულებურ მუნეფიშ გეგმა, ნამდა არძა რელიგია მოსპან, მუთ დედამიწას არსებენს. თაშ ნამდა, ჩქი ყურადღებაშ ცენტრის იპჸუაფუთ. თეშნერო, მსოფლიო ლიდერეფ „გოგ მაგოგელიშ“ * როლს შეასრულენა. თინეფ ართო დიშაყარნა დო მთელ ძალეფით გიშელენა იეჰოვაშ ხალხიშ წინააღმდეგ (ეზეკ. 38:2, 14—16). შილებე ჭიჭეთ მნერვიანენდათ „დიდ გასაჭირიშ“ გურშენ, მუშენდა დეტალურო ვა მიჩქნა მუ მოვლენეფ მოხვადუ. მარა ართ მუდგარენ შემლებნა ბჯერდან — „დიდ გასაჭირშა“ ოკო ვა მოშკურდან, მუშენდა იეჰოვა ქომჩანა მითითებეფს, ნამუთ გინმოსკილიდუანა (ფსალმ. 34:19). თე დროს შემალებენა „გიფთინათ დო დუდეფ გებჭოფათ“, მუშენდა მარჩქვენუნა, ნამდა ჩქინ რსხება „მონჭაფილ რე“. *
12. მუჭო მამზადენა „ართგურ დო გონიერ მონა“ იეჰოვაშ დღაშო?
12 „ართგურ დო გონიერ მონა“ მამზადენა, ნამდა „დიდ გასაჭირიშ“ დროს ართგურეფქ ქუდოფსკიდათ (მათ. 24:45). თინა თეს შხვადოშხვა საშვალებეფით ორთჷ, მარა გუვარჩუათ ხვალე ართ მაგალით: 2016—2018 წანეფიშ კონგრესეფიშ პროგრამეფ, ნამდგაშ საშვალებათ, გურშა ელამკინეს, გუვაუჯგუშათ თი თვისებეფ, ნამუთ აუცილებერო მოსაჭირნა თით უმოსო, მუთ უმოს ხოლო რე იეჰოვაშ დღა. მორთ, მოკლეთ ქიგიფშინათ ნამ თვისებეფშე მიშჷ ჩიება.
გამანგარით თქვან ართგურობა, მოთვინება დო გაბედულება
ასეშე მემზადით „დიდ გასაჭირშო“ (ქოძირით აბზაცეფი 13—16) *
13. მუჭო შემლებნა გუვამანგარათ ართგურობა დო მუშენ ოკო ვაკეთათ თენა ამდღარშე?
13 ართგურობა: 2016 წანაშ რეგიონულ კონგრესიშ პროგრამაშ სათაურ რდუ „ბოლოშა ქუდოსქიდით იეჰოვაშ ართგურეფქ!“. თე პროგრამაშე ქიგებგით, ნამდა იეჰოვაწკუმა ჯგირ პირად ურთიერთობა ქომღუნან-და, თიშ ართგურეფ ქუდოფსქიდუთ. თეს გეძინელ, კონგრესიქ ქუგმოშინეს, ნამდა იეჰოვაწკუმა დაახლოება გააზრებულ ლოცვათ დო ბიბლიაშ გურგედვალირო გურაფათ შემლებნა. თენა მარზენა ძალას ქუგურზათ არძაშ უმოს რთულ პრობლემეფს. „დიდ გასაჭირ“ ხოლოს რე, ათეშენ ოკო ველდათ, ნამდა იეჰოვაშა დო თიშ სამეფოშა ჩქინ ართგურობა უმოსო გეგმიცადებ. საეგებიოთ, ხალხ კინ გაგრძელენს ჩქინ გოძიცას (2 პეტ. 3:3, 4). თეშ ართ-ართ მთავარ მიზეზ თინა რე, ნამდა ჩქინ ნეიტრალიტეტ ხოლო უმოსო გიმიცადებ. ათეშენ ამდღარშე ოკო გუვამანგარათ ჩქინ ართგურობა, ნამდა „დიდ გასაჭირიშ“ დროს ხოლო ართგურეფ ქუდოფსქიდათ.
14. ა) მუ ცვლილებეფ შეხებუ თი ჯიმალეფს, მიდგას ხემძღვანელობა ოვალ? ბ) მუშენ ოკო გიმიფრჩქინათ ართგურობა თე დროს?
14 „დიდ გასაჭირიშ“ დროს, ცვლილებეფ შეხებუ თი ჯიმალეფს, მიდგას ხემძღვანელობა ოვალნა. მუდგარენ მომენტის, არძა ცხებულ ქრისტიან, მით ამდღა დედამიწას რე, ზეცაშა იჸუაფ ეშაჸონაფილ, მუშენდა არმაგედონიშ ომს მონაწილება მიღან (მათ. 24:31; გამოცხ. 2:26, 27). თენა ნიშნენს, ნამდა ხემძღვანელ საბჭო უკვე ვეჸუაფ დედამიწას. მარა, „ანაყუ ხალხ“ იშენ ვა დოსქიდუ ხემძღვანელობაშ უმშო, მუშენდა გამოცდილ ჯიმალეფ, მით „შხვა შხურიშ“ ნაწილ რენა, თე ხალხის უხემძღვანელენა. ჩქი ართგურობას გეგმიფრჩქინანთ თით, ნამდა ხუჯის ქუდუკინენთ თე ჯიმალეფს დო მივაჸუნუთ თინეფიშ ხემძღვანელობას, ნამუთ ღორონთშე რე. ჩქინ რსხება თეშა რე დამოკიდებულ!
15. მუჭო შემლებნა მოთვინებაშ გამანგარება დო მუშენ რე თეშ კეთება მნიშვნელოვან ამდღა?
15 მოთვინება: 2017 წანაშ რეგიონულ კონგრესიშ პროგრამაშ სათაურ რდუ „ბოლოშა მითვინით!“. თე პროგრამაქ უმოსო გუმამანგარეს, ნამდა შემალებუან განსაცდელეფშა გარზებაქ. მუჭოთ თე კონგრესშე გებგით, მოთვინებაშ გიმორჩქინა იეჰოვაშ მენდებაშა რე დამოკიდებულ დო ვართ ხოლო თი სიტუაციეფშა, ნამუთ მაღვენუნა (რომ. 12:12). დღას ვეგიბჭყოლიდუათ იესოშ დუნაპირებ: „მით ბოლოშა მითვინენს, გინასქიდუ“ (მათ. 24:13). თე დუნაპირებ, თის ნიშნენს, ნამდა ირნერ რთულ სიტუაციას ართგურეფქ ოკო ქუდოფსქიდათ. ამდღანერ განსაცდელეფს მოთვინებათ ქოვურზუთ-და, „დიდ გასაჭირიშ“ დოჭყაფაშახ ჩქინ რწმენა უმოსო გემანგარებ.
16. მუშა რე დამოკიდებულ ნამდვილ გაბედულება დო მუჭო შემლებნა თიშ გამანგარება ამდღარშე?
16 გაბედულება: 2018 წანაშ რეგიონულ კონგრესიშ პროგრამაშ სათაურ რდუ „რდათ გაბედულეფ!“. თე პროგრამაქ ქუგმოშინეს, ნამდა გაბედულება ჩქინ უნარეფშა ვა რე დამოკიდებულ. მუჭოთ იეჰოვაშა მენდებათ რე შეიოლებერ მოთვინებაშ გიმორჩქინა, თეშ ნამდვილ გაბედულებას ხოლო იეჰოვაშა მენდება მარზენა. მუჭო შემლებნა უმოსო მივენდათ იეჰოვას? თეშ კეთება შეიოლებერ რე ბიბლიაშ ირდღაშიან კითხირით დო თიშე დაფიქრებათ, მუჭო გინასქილიდუ იეჰოვაქ ჯვეშო მუშ ხალხ (ფსალმ. 68:20; 2 პეტ. 2:9). მუჟამსით „დიდ გასაჭირიშ“ დროს მსოფლიო ლიდერეფ ჩქინ წინააღმდეგ გეგშულა, ოკო გეგმიფრჩქინათ განსაკუთრებულ გაბედულება დო ბოლოშა მივენდათ იეჰოვას (ფსალმ. 112:7, 8; ებრ. 13:6). ღორონთის ამდღა ქუვონდუთ-და, მომავალს, მუჟამსით „გოგ მაგოგელ“ ჩქინ წინააღმდეგ გეგშურს, უმოს გაბედულეფ იპჸით. *
მოთვინებათ ქუჯინით თქვან რსხებას
იესო დო თიშ ზეციერ ჯარ მალას არმაგედონიშ ომს გიშელენა ღორონთიშ ნტერეფიშ წინააღმდეგ! (ქოძირით აბზაცი 17)
17. მუშენ ოკო ვა მოშქურდან არმაგედონშა? (ქოძირით სურათ გალენ გვერდის)
17 მუჭოთ წოხლენ სტატიას რდუ მოჩამილ, ჩქი დებაბდით დო ფცხოვრენთ ბოლო დღალეფს. მარა მიღნა იმენდ, ნამდა „დიდ გასაჭირს“ გეგნიბღანთ. არმაგედონ იჸუაფ თე ქვეყნიერებაშ მოსპუალაშ ბოლო ეტაპი. მარა ჩქი შიშიშ მიზეზ ვა მიღნა, მუშენდა თენა ღორონთიშ ბრძოლა რე (იგავ. 1:33; ეზეკ. 38:18—20; ზაქ. 14:3). იეჰოვაშ მითითებაშ მეღებაშ უკულ, იესო ზეციერ ჯარს ობრძოლეფშა გეგშეჸონანს, ნამდგაშ შქას იჸუაფნა გათელებურ ცხებულ ქრისტიანეფ დო მილიარდობით ანგელოზ. თინეფ ართო ქებრძოლებნა სატანას, თიშ დემონეფს დო თინეფიშ მიწიერ ჯარს (დან. 12:1; გამოცხ. 6:2; 17:14).
18. ა) მუშ გარანტიას მარზენა იეჰოვა? ბ) მუჭო გარწმუნენა გამოცხადებაშ 7:9-ს დო 13—17-ის მოჩამილ სიტყვეფ, ნამდა გეგნოსქიდუთ?
18 იეჰოვა მარზენა გარანტიას: „სქან წინააღმდეგ კეთებულ ნამთინ იარაღ ვეჸუაფ წარმატებულ“ (ესაია 54:17). „ანაყუ ხალხ“, მით იეჰოვას ართგურო ომსახურ, „დიდ გასაჭირს“ გეგნიღანს! თეშ უკულ თინეფ გაგრძელენა წმინდა მსახურებას (წეკითხით გამოცხადება 7:9, 13—17). ბიბლია მარწმუნენა, ნამდა აუცილებერო გეგნოფსქიდუთ! ჩქი მიჩქნა, „იეჰოვა იცვენს ართგურეფს“ (ფსალმ. 31:23). არძას, მიდგას უჸორს იეჰოვა დო განადიდენს თის, გახარენს თიშ ძირაფა, მუჭო განწმინდენს იეჰოვა მუშ სახელს (ეზეკ. 38:23).
19. მუ დიდებულ იმენდ მიღნა მომავალიშ გურშენ?
19 დეფიქრით, მუჭო ეჭარუნდჷ პავლე 2 ტიმოთეშ 3:2—5-ის თი ხალხის, მით ახალ ქვეყნიერებას იცხოვრებ დო თავისფალ იჸუაფ სატანაშ გავლენაშე (ქოძირით ჩარჩო „ მუნერ იჸუაფ ხალხ თიმწკუმა?“). ჯიმა ჯორჯ განგასიქ, * ნამუთ ხემძღვანელ საბჭოშ წევრ რდუ, თე ირფელშე თეცალ მუდგარენ თქუ: „წერმიდგინით მუშმაჯგირა იჸუაფ მსოფლიო, მუჟამსით არძა ართიანიშ ჯიმა ვარდა და იჸი! მალას თქვა გაღვენუნა პატი, იცხოვრათ ახალ ქვეყნიერებას. თქვა თისხი ხანს იცოცხლენთ, მუსხი ხანსით იეჰოვა იცოცხლენს. ჩქი მარადიულო იფცხოვრენთ“. თენა მართალო დიდებულ იმენდ რე!
ობირეში 122 გიღდან ძალიერ რწმენა!
^ აბზ. 5 ჩქი მიჩქნა, ნამდა მალას „დიდ გასაჭირ“ ქიდიჭყაფუ. მუს ნიშნენს თენა ჩქინო? მუშ კეთებას ელჷ იეჰოვა ჩქინდე თე დროს? მუჭო შემლებნა მივემზადათ ამდღა, ნამდა „დიდ გასაჭირიშ“ დროს ვა ვოდინუათ ართგურობა? თე კითხვეფს თე სტატიას გუვარჩიენთ.
^ აბზ. 3 განმარტება: ქრისტიანულ სამყაროშა მიშურს თი რელიგიეფ, ნამდგაშ მიმაჸუნალეფს დუდ ქრისტიანეფო მიორჩქუნა, მარა ხალხის ვაგურუანა, ემსახურან იეჰოვას დო დეცვან თიშ ნორმეფ.
^ აბზ. 11 განმარტება: სიტყვეფ „გოგი მაგოგელ“ (დო თიშ შემოკლებულ ფორმა „გოგი“), მეუთითენს ერეფიშ კოალიციაშე, ნამუთ „დიდ გასაჭირიშ“ დროს წმინდა თაყვანიშმცემლობაშ წინააღმდეგ გეგშურს.
^ აბზ. 11 თი მოვლენეფიშ გურშენ, ნამდგას არმაგედონ მაჸუნუ, მეტ ინფორმაციაშ მეღება ქუგოკონან-და, ქოძირით 2013 წანაშ 15 კვირკვეშ „გინაჯინალ კოშკი“, გვ. 3—8. მეტ ინფორმაცია თიშ გურშენ, მუჭო გიშურს ღორონთიშ ხალხიშ წინააღმდეგ „გოგ მაგოგელ“ დო მუჭო დეცვენს ღორონთ მუშ ხალხის არმაგედონიშ დროს, შეილებნა ქოძირათ 2015 წანაშ 15 კვირკვეშ „გინაჯინალ კოშკი“, გვ. 14—19.
^ აბზ. 16 2019 წანაშ რეგიონულ კონგრესიშ პროგრამა, ნამუშ სათაურ რე „ჸოროფა დღას ვეთებ!“, მარწმუნენა, ნამდა შემლებნა უსაფრთხოთ ვორდათ, მუშენდა იეჰოვა ჸოროფათ მიცვენა (1 კორ. 13:8).
^ აბზ. 19 ქოძირით 1994 წანაშ 1 დეკემბერიშ „გინაჯინალ კოშკი“, გვ. 31.
