1. მუშ კეთება შეულებ იეჰოვას, ნამდა შეასრულას მუშ განზრახვა?

იეჰოვას შეულებ გინირთას თით, მუთ აუცილებერ რე მუშ განზრახვაშ შეიოსრულებერო. მაგალთო, თის შეულებ გინირთას მასწავლებერო, მოჸოროფე დო გურიშემაქექაფალ მუმათ დო მახარობელო, მარა თაქ ირფელ ვა რე რაგადებულ, მუდგათ გინორთა თის შეულებ (ეს. 48:17; 2 კორ. 7:6; გალ. 3:8). მართალ რე, თიშ შეულებ გინირთას ირფელო, მუთ აუცილებერ რე თიშ განზრახვაშ შეიოსრულებერო, მარა, ხშირას გიმირინუანს ადამიანეფს, ნამდა მუშ ნება შეიოსრულებაფუას (მათ. 24:14; 28:19, 20; 2 კორ. 1:3, 4). თეს გეძინელ, იეჰოვას შეულებ მუჩან სიბრძნე დო ძალა, ნამუთ მოსაჭირნა, გინიფრთათ თით, მუთ აუცილებერ რე თიშ განზრახვაშ შეიოსრულებერო. თენა რე ღორონთიშ სახელიშ სრულ მნიშვნელობა, მუჭოთ თეს მუსხირენ მეცნიერ იჩიებ.

2. ა) მუშენ შილებე მინშა დემეეჭვან, მართალო გიმომრინუანა დო ვარ იეჰოვა? ბ) მუს გუვარჩიენთ თე სტატიას?

² არძას მოკონა იეჰოვაქ გიმომრინუან, მარა ნამთინექ შილებე დეეჭვას, მართალო გიმირინუანს დო ვარ თის იეჰოვა. მუშენ იფჩიებუთ თეს? მუშენდა, თინეფ ფიქრენა, ნამდა ოკონან თისხი ვაკეთებენა ასაკიშ, მდგომარეობაშ ვარდა მუდგარენიშ კეთებაშ უნარ ვა უღნან თიშენ. ნამთინე შილებე თის ხოლო ფიქრენდას, ნამდა მუდგას ორთუნ თინა დასაბაღ რე დო საჭირო ვა რე უმოს მეტ გაკეთას. თე სტატიას გუვარჩიენთ, მუჭო მამზადენა იეჰოვა თითოულს, შევასრულათ მუშ განზრახვა. თეს გეძინელ, ბიბლიურ მაგალითეფშე ქობძირუნთ, მუჭო მეჩჷ იეჰოვაქ მუშ მსახურეფს, მუჭოთ ქომოლკოჩეფს თეშ ოსურკოჩეფს, სურვილ დო ძალა, ქიმოქმედესკო. ბოლოს გუვარჩიენთ თეცალ საკითხის, მუჭო შემლებნა მეფჩათ იეჰოვას საშვალება ჩქი ხოლო გიმომრინუან.

3. მუჭოთ ფილიპელეფიშ 2:13-ს ჭარჷ, მუჭო შილებე იეჰოვაქ მუჩან სურვილ იმოფქმედათ?

³ წეკითხით ფილიპელები 2:13. * იეჰოვას შეულებ მუჩან სურვილ, ნამდა იმოფქმედათ. მუჭო შილებე იეჰოვაქ თენა აკეთას? შილებე ქიგებგათ, ნამდა კრებას მიდგარენს მოხვარა ოსაჭირ ვარდა მუდგარენ საქმე რე ოკეთებელ. ვარდა უხუცესიქ შილებე წეკითხას წერილ ფილიალშე, სოდეთ მოშინაფილ რე, ნამდა ორგანიზაციას შხვადოშხვა საქმეეფს ოსაჭირ მოხვარა. შემლებნა ჩქინ დუდის თეცალ კითხვა დუსვათ: „პირადო მა, მუშ კეთება შემლებ?“. შილებე რთულ დავალებაშ შესრულება შემოფთავაზან დო ფიფქრენდათ, შემალებენა დო ვარ თიშ ჯგირო კეთება. შილებე ბიბლიურ მონაკვეთიშ კითხირიშ უკულ იფიფქრათ: „მუჭო შემლებ მეღებულ ინფორმაცია შხვეფიშ საჯგირობუოთ გეგმიბრინუე?“. იეჰოვა მუთუნიშ კეთებას ვა მანძალენა. მუჟამსით ორწყე, ნამდა ფიფქრენთ ხოლო მუშ კეთება შემლებნა მსახურებას, მარზენა სურვილს, გუვაკეთათ თინა მუთ იფიფქრით.

4. მუჭო მარზენა იეჰოვა ძალას იმოფქმედათ?

⁴ თეს გეძინელ, იეჰოვას შეულებ მუჩან ძალა, ნამდა იმოფქმედათ (ეს. 40:29). თის შეულებ მუჩან წმინდა შურ, ნამუთ მიმეხვარებნა გუვაუჯგუშათ ჩქინ უნარეფ (გამ. 35:30—35). მუშ ორგანიზაციას საშვალებათ იეჰოვას შეულებ შხვადოშხვა საქმეშ კეთება დუმოგურუან. მუჟამსით დარწმუნებულ ვა რეთ, მუჭო ოკო შეასრულათ თქვან დავალება, ქითხით მოხვარა. თეს გეძინელ, თავისფალო შეილებნა ლოცვას ქოთხუათ ზეციერ მუმას, ქიმერჩან „ძალა, ნამუთ ჩვეულებრივშე უმოს რე“ (2 კორ. 4:7; ლუკ. 11:13). ბიბლიას მოჩამილ რე თიშ ბრელ მაგალით, მუჭო მეხვარ იეჰოვაქ მუშ მსახურეფს თით, ნამდა მეჩჷ მოქმედებაშ სურვილ დო ძალა. თე მაგალითეფშე მსჯელობაშ დროს დეფიქრით, მუჭო შეულებ იეჰოვას თქვან გიმორნაფა თიცალ საქმეეფიშ ოკეთებელო, ნამუთ თინეფქ აკეთეს?

5. მუს ბგურაფლენთ თევრეშე, მუჟამ დო მუჭო გიმირინუ იეჰოვაქ მოსე მუშ ხალხიშ დარსხებელო?

⁵ იეჰოვაქ მეხვარ მოსეს გინორთედკო თიცალ პიროვნებათ, ნამდგას შეიალებედ ისრაელეფიშ ეგვიპტეშე გიშაჸონაფა. მარა, მუჟამ გიმირინუ თინა იეჰოვაქ? თიმწკუმა ხომ ვარ, მუჟამსით მოსე ფიქრენდჷ, ნამდა მზათ რდუ, მუშენდა „ეგვიპტელეფიშ სიბრძნე აფუდ ნაგურეფ“? (საქ. 7:22—25). ვარ, იეჰოვაქ მოსე თიშ უკულ გიმირინუ, მუჟამსით მეხვარ თის გინორთედკო თანდაბალ დო ლიბ ხასიათიშ პიროვნებათ (საქ. 7:30, 34—36). იეჰოვაქ მოსეს ქიმეჩ გაბედულება, ქიგედირთკო ეგვიპტეშ არძაშ უმოს ძალიერ მართველიშ წოხოლე (გამ. 9:13—19). მუს ბგურაფლენთ თევრეშე, მუჟამ დო მუჭო გიმირინუ იეჰოვაქ მოსე? იეჰოვა თინეფს გიმირინუანს, მით ოცად გეგმირჩქინას თიშ მოსაწონ თვისებეფ დო თიშა რე დაიმენდებულ (ფილ. 4:13).

6. მუს ბგურაფლენთ თევრეშე, მუჭო გიმირინუ იეჰოვაქ ბარზილაი მეფე დავითიშ მახვარებელო?

⁶ საუკუნეეფიშ უკულ იეჰოვაქ მეფე დავითიშ მახვარებელო ბარზილაი გიმირინუ. დავით დო თიშ ხალხ „შულადირეფ, შქირენულეფ დო ჸუმენულეფ“ რდეს, მუჟამსით დავითიშ სქუა, აბესალომშე მინტებდეს. ბარზილაიქ, ნამუთ უკვე ხანშა მიშულირ რდუ, დავით დო თიშ ხალხის ქიმეხვარკო თიშენ, შხვეფცალო მუშ სიცოცხლე ხოლო საფრთხეშა ქენიჸოთ. ბარზილაის ვა უფიქრებ, ნამდა მუშ ასაკიშ გურშენ იეჰოვას თინა უკვე მუთუნშო ვეგმარნედ. პირიქით, თიქ ხეგოფაჩილობა გეგმირჩქინ დო ღორონთიშ მსახურეფს ირფელ ქიმეჩ მუთ უღუდ (2 სამ. 17:27—29). მუს ბგურაფლენთ თავრეშე? ჩქინ ასაკიშ უმკუჯინუო, იეჰოვას შეულებ გეგმომრინუან, ნამდა ქიმვეხვარათ, მუჭოთ ჩქინ ტერიტორიას თეშ შხვა ქიანეფს მახორუ თი თანაქრისტიანეფს, მიდგას აუცილებერ მოთხოვნილებეფიშ დაკმაყოფილებაშ საშვალება ვა უღჷ  (იგავ. 3:27, 28; 19:17). შილებე პირადო ვემმახვარებუან, მარა შემლებნა მსოფლიო საქმეშო შესაწირავეფ გუვაკეთათ. თე შესაწირავეფიშ ჭყოლოფათ შეიოლებერ რე და დო ჯიმალეფიშ მოხვარა საჭირო დრო დო ადგილს (2 კორ. 8:14, 15; 9:11).

7. მუჭო გიმირინუ იეჰოვაქ სიმონ დო მუჭო შეულებ თე შემთხვევას გურშა ელამკინან?

⁷ იეჰოვაქ იერუსალიმს მახორუ ართ ხანშამიშულირ ართგურ კოჩის, სიმონს პირობა მეჩჷ, ნამდა თეიშახ ვა ღურუდ სოიშახ მესიას ვა ძირუნდჷ. მუშო ოკო რაგად, თე დუნაპირებ გურშა ელუკინანდჷ სიმონს, მუშენდა ბრელ წანას ელუდ მესიაშ მიკორჩქინას. იეჰოვაქ დაჯილდოვ თინა მუშ რწმენა დო მოთვინებაშ გურშენ. ართ დღას, „წმინდა შურით აღძრულ“ სიმონქ ტაძარშა გემნორთჷ. თექ ქოძირ ახალდაბადებულ იესო. თე დროს იეჰოვაქ სიმონიშ პიჯით ქიწინასწარმეტყველ თე ბაღანაშ გურშენ, ნამუთ ღორონთიშ ცხებულ იჸუაფუდ (ლუკ. 2:25—35). მართალ რე, სიმონქ იესოშ მსახურებაშ დოჭყაფაშახ დოღურ, მარა იშენით მარდულ რდუ, ნამდა თის იეჰოვაშე თეცალ პატიქ აშუ. თეს გეძინელ, გათელებურ სიმონ მომავალს უმოს მეტ კურთხევეფს მიღენს! ახალ ქვეყნიერებას თე ართგურ ქომოლკოჩ ქოძირუნს, მუ კურთხევეფს მოუღანს იესოშ მართველობა მთელ დედამიწას მახორუ ხალხის (დაბ. 22:18). ჩქი ხოლო შემლებნა მარდულეფ ვორდათ, ნამდა იეჰოვა შხვადოშხვანერო გიმომრინუანა.

8. მუჭო შილებე იეჰოვაქ ბარნაბაცალო გიმომრინუან?

⁸ ახ. წ. პირველ საუკუნეს ართ ხეგოფაჩილ კოჩიქ, იოსებიქ ქაძირუ, ნამდა მზათ რდუ იეჰოვაქ გეგმირინუკო (საქ. 4:36, 37). იოსებ თით გიშეგორუდ, ნამდა შხვეფშე უმოსო ოცადუდ თანაქრისტიანეფს გურშა ეუქექუკო. ათეშენ მოციქულეფქ თის ბარნაბა ქიგიოდვეს, მუთ „გურიშემაქექაფალ სქუას“ ნიშნენს. მაგალთო, მუჟამსით სავლექ ქრისტიანო გინირთჷ, ბრელ ჯიმას ოშქურუდ თიწკუმა ხოლოშიან ურთიერთობაშა, მუშენდა თეიშახ თინა კრებეფს თხოზუდ. მარა, ბარნაბაქ მთელ გურით ქელუდირთჷ სავლეს. მუშო ოკო რაგად, სავლე მანგარო დაფასენდჷ ბარნაბაშ თე საქციელს (საქ. 9:21, 26—28). უმოს გვიანო, იერუსალიმს მახორუ უხუცესეფქ ქიგეგეს, ნამდა ანტიოქიაშ სირიას მახორუ ჯიმალეფს გურიშელაკინა ოსაჭირდეს. თინეფქ ბარნაბა გოუტეს თეშ ოკეთებელო, მუთ მართალო ჯგირ არჩევან რდუ. ბარნაბაშ გურშენ ბიბლიას ჭარჷ: „თინა გურშა ელუკინანდჷ არძას, ნამდა ბოლოშახ უფალიშ ართგურეფ ქოჸოფედესკო“ (საქ. 11:22—24). იეჰოვას შეულებ ჩქი ხოლო მიმეხვარან, გურშა ეუქექუათ თანაქრისტიანეფს. მაგალთო, შილებე თიქ გეგმომრინუან, ნამდა გურშა ეუქექუათ თის, მიდგას ხოლოშიან პიროვნებაქ უღურ; შილებე აღბძრან, ქიმეფრთათ ვარდა დურეკათ თინეფს, მიდგას ლახალა აწუხენს ვარდა დეპრესიას რე დო გემუან სიტყვეფით გურშა ელუკინათ. ქიმეჩანთო იეჰოვას თიშ საშვალებას, ნამდა თეშ გიმოირინუან, მუჭოთ ბარნაბა გიმირინუ? (1 თეს. 5:14).

9. მუს ბგურაფლენთ თევრეშე, მუჭო მეხვარ იეჰოვაქ ჯიმა ვასილის, გინორთედკო ჯგირ სულიერ ჭყიშო?

⁹ იეჰოვაქ მეხვარ ჯიმა ვასილის, გინორთედკო ჯგირ სულიერ ჭყიშო. ჯიმა ვასილი 26 წანერ რდუ, მუჟამსით უხუცესო დენიშნჷ. თის ოშქურუდ, მუჭო შეიალებედ სულიერო ქიმკაჯინკო კრებას; განსაკუთრებულო თი და დო ჯიმალეფს, მიდგას პრობლემეფ უღუდ. მარა თის გამოცდილ უხუცესეფიშ რჩევეფქ დო „სამეფო მსახურებაშ სკოლას“ გურაფაქ მეხვარ. თეს გეძინელ, ვასილი ირნერო ოცადუდ გაუჯგუშებას. მაგალთო, თიქ დიო ჭიჭე მიზნეფიშ მეჭირნაფა გეგნოჭყვიდ. თითოულიშ მეჭირნაფაშ უკულ, თინა გიორჯგინანდჷ შიშის. ვასილი იჩიებ: „თის, მუდგაშა აიშახ მოშქურუდ ასე დიდ ხიოლ მოუღ ჩქიმდა. დიდ კმაყოფილებას ბგინაფლენქ, მუჟამსით იეჰოვა მოხვარ საჭირო ბიბლიურ მუხლეფ გეგშაბგორე, ნამდა გურშა ეუქექუე დას ვარდა ჯიმას“. ჯიმალეფ, იეჰოვაქ გიმოირინუან თიშო ვასილიცალო ირფელს ქართუთ-და, თინა მერჩანა საშვალებას დიდ პასუხიშმგებლობეფ შეასრულათ კრებას.

10. მუ აკეთ აბიგაილქ დო მუშ გურაფა შეილებნა თიშ მაგალითშე?

¹⁰ დავითის დო თიშ ართგურ მსახურეფს მეფე საულ ოჸვილარო თხოზუდ. ათეშენ, თინეფს მოხვარა ოსაჭირდეს. დავითიშ მსახურეფქ ართ მდიდარ ისრაელიან კოჩის, სახელო ნაბალს ქოთხის ჭიჭე ოჭკუმალ ქიმუჩამუდკო. თინეფს თამამას შეულებდეს ნაბალშა თეშ რაგად, მუშენდა უდაბნოს თიშ შხურეფს თხილანდეს. მარა თე ეგოისტ პიროვნებაქ, თინეფს მუთუნ ვემეჩ. დავითიქ მანგარო გერისხჷ დო გინოჭყვიდ, ნაბალწკუმა ართო არძა ქომოლკოჩ დუჸვილუდკო, ნამუთ თიშ ჸუდეს რდუ (1 სამ. 25:3—13, 22). მარა ნაბალიშ გურგოჩამილ ოსურქ, ნამუთ მეჯინელო ხოლო სქვამ რდუ, დიდ გაბედულება გიმირჩქინ, მუჟამსით დავითიშ წოხოლე ბირგულეფს ქეშანთხჷ დო ოხვეწუდ თის, ნაბალიშ დო თიშ მსახურეფიშ ჸვილუათ ზისხირ ვა დაბკო. თიქ ტაქტიანო ელუჩ დავითის, თე საკითხეფ იეჰოვას მიანდუკო. აბიგაილიშ თანდაბლობაქ დო გურგოჩამილ საქციელქ დავითწკუმა მანგარო იმოქმედ. დავითიქ ქიმეხვად, ნამდა თე პიროვნება იეჰოვაქ გიმირინუ (1 სამ. 25:23—28, 32—34). აბიგაილქ გავითარ თიცალ თვისებეფ, ნამდგაქ იეჰოვას ქიმეჩ საშვალება, გეგმირინუკო თე ოსურკოჩ. ამდღა ხოლო, თი ქრისტიან დალეფ, მით ოცადნა ტაქტიანეფ დო გურგოჩამილეფ რდან, შილებე იეჰოვაქ გეგმირინუას, ნამდა ოჯახეფ დო კრება გამანგარან (იგავ. 24:3; ტიტ. 2:3—5).

11. მუ აკეთეს შალუმიშ ოსურსქუალეფქ დო მი მეჸუნს ამდღა თინეფიშ მაგალითის?

¹¹ თე მოვლენაშე საუკუნეეფიშ უკულ, შალუმიშ ოსურსქუალეფ ხოლო თინეფ შქას რდეს, მით იეჰოვაქ გიმირინუ, ნამდა მონაწილება მიღესკო იერუსალიმიშ კიდალეფიშ აღდგენას (ნეემ. 2:20; 3:12). მართალ რე, თინეფიშ მუმა ხემძღვანელენდჷ მშენებლობას, მარა შალუმიშ ოსურსქუალეფ იშენით მზათ რდეს გაკეთესკო თე რთულ დო ოშქურანჯ საქმე (ნეემ. 4:15—18). მუშმადიდა განსხვავება რე თენეფ დო თეკოელ დიდებულეფ შქას, მით სიამაყეშ გურშენ ვა ღებულენდეს მონაწილებას თე საქმეს (ნეემ. 3:5). უბრალოთ წერმიდგინით, მუშმადიდა ხიოლ აღვენუდეს შალუმიშ ოსურსქუალეფს, მუჟამსით იერუსალიმიშ კიდალეფიშ აღდგენაქ 52 დღაშა გეთუ! (ნეემ. 6:15). ამდღარ დროს, დალეფ მზათ რენა ხიოლით მეუძღვინან დუდ თიცალ სპეციალურ მსახურებას, მუნერით რე იეჰოვაშა მეძღვინელ შენობეფიშ შენება დო მიკოლუაფა. თინეფიშ უნარეფ, ენთუზიაზმ დო ართგურობა მანგარ მნიშვნელოვან რე თე საქმეშ ჯგირო ოკეთებელო.

12. მუჭო შილებე იეჰოვაქ ტაბითაცალო ჩქი ხოლო გიმომრინუან?

¹² იეჰოვაქ აღძრჷ ტაბითა, ბრელ ჯგირ საქმე გაკეთკო დო ჭყოლოფა გეგმირჩქინკო, განსაკუთრებულო ქომონჯ ნაღურა ოსურეფწკუმა (საქ. 9:36). მუჟამსით თიქ ღურჷ, ბრელ მანგარო გენიცადენდჷ, მუშენდა ტაბითა თეცალ ხეგოფაჩილობას დო სიკეთეს გიმირჩქინანდჷ. მარა თინეფ მანგარ გახარებულეფ რდეს, მუჟამსით პეტრე მოციქულქ თინა გათელ (საქ. 9:39—41). მუს ბგურაფლენთ ტაბითაშ მაგალითშე? ვა უღჷ მნიშვნელობა ახალგაზრდა ვორეთ დო ვარ ხანშა მიშულირ, ოსურკოჩ დო ვარ ქომოლკოჩ, ჩქი არძას შემლებნა მუდგარენით მივეხვარათ თანაქრისტიანეფს (ებრ. 13:16).

13. მუჭო გიმირინუ იეჰოვაქ ართ მორდებუან და, სახელო რუთი დო მუ თქუ თიქ ბოლოს?

¹³ ართ მორდებუან დას, რუთის, ოკოდ მისიონერო იმსახურკო. ბაღანობას, თის მანგარო ოხიოლუდ კარდოკარ მეულა დო ჟურნალეფიშ დოტება. თე და იშინანს: „მანგარო მიჸორდჷ თე საქმეშ კეთება“. მარა კარეფწკუმა ჩიება დო ღორონთიშ სამეფოშ გურშენ ხალხწკუმა პირადო რაგად თიშო რთულ რდუ. თიშ უმკუჯინუო, ნამდა რუთი მორდებუან რდუ, თიქ სრულ დროთ პიონერო მსახურება ქიდიჭყჷ, მუჟამსით 18 წანერო გინირთჷ. 1946 წანას თიქ გალაადიშ სკოლა გემკორთჷ დო უმოს გვიანო ჰავაის დო იაპონიას მსახურენდჷ. იეჰოვაქ თე დაშ საშვალებათ  დიდებულო გავრცელ სახიოლო ამბე თე ადგილეფს. სოდგარენ 80 წანას თეცალ მსახურებაშ უკულ რუთიქ თქუ: „იეჰოვა ირიათო მამანგარენდჷ. თიქ მიმეხვარ გივორჯგინკო მორდებუანობას. ბოლოშა დარწმუნებულ ვორექ, ნამდა იეჰოვას შეულებ არძაშ გიმორნაფა, მით თიშ ნდობას გიმირჩქინანს“.

14. მუჭოთ კოლოსელეფიშ 1:29-ს ჭარჷ, მუ ოკო ვაკეთათ, მუჟამსით მოკონა, ნამდა იეჰოვაქ გეგმომრინუან?

¹⁴ ისტორიაშ დინახალე იეჰოვა ოხვარუდ მუშ მსახურეფს, შეასრულესკო შხვადოშხვა დავალებეფ. მუჭო შეულებ იეჰოვას თქვა ხოლო მიგეხვარან შეასრულათ თიშ ნება? ბრელ რე თიშა დამოკიდებულ, ქორეთ დო ვარ მზათ გურგედვალირო იხანდათ (წეკითხით კოლოსელები 1:29). იეჰოვას ნებას ქიმეჩანთ-და, თის შეულებ მიგეხვარან გინირთათ გურგედვალირ მაქადაგებელო, ჯგირ მასწავლებერო, გურიშემაკინალ დო უნარიან პიროვნებათ, შხვეფს ხუჯის ელურენ ფერ მეგობარო. შხვანერო ქოფთქუათინ, თიცალ პიროვნებათ, მით საჭირო რე თიშო, ნამდა შეასრულათ ღორონთიშ ნება.

15. მუჭოთ 1 ტიმოთეშ 4:12 დო 15-ს ჭარჷ, მუ ოკო თხუან ახალგაზრდა ჯიმალეფქ იეჰოვას?

¹⁵ მუშ რაგად შილებე თქვანდე, ახალგაზრდა ჯიმალეფშე, მით მალას სრულწლოვანეფ იჸუაფუთ? კრებას საჭირო რენა ახალგაზრდულ ძალეფით ეფშა ჯიმალეფ, მიდგას შეულებ მომსახურეთ მსახურება. ბრელ კრებას უხუცესეფ უმოს რენა ვინემ მომსახურეეფ. ახალგაზრდა ჯიმალეფ, შეილებნანო გევითარათ თიშ სურვილ, კრებას შხვა პასუხიშმგებლობეფ ხოლო მიღათ? მინშა ნამთინე ჯიმა იჩიებ: „ნათილ მაუწყებელ ვორექინ, თეთ ხოლო კმაყოფილ ვორექ“. თქვა ხოლო თაშ ქოფიქრენთ-და, ქოთხით იეჰოვას ქიმერჩან სურვილ, იმსახურათ მომსახურეთ. თეს გეძინელ, ქოთხით იეჰოვას, ქიმერჩან თიშ უნარ, მუთ შეილებნან ირფელ გაკეთათ თიშ მსახურებას (ეკლ. 12:1). ჩქი თქვან ელარნა მოსაჭირნა! (წეკითხით 1 ტიმოთე 4:12, 15).

16. მუ ოკო ფთხუათ იეჰოვას დო მუშენ?

¹⁶ იეჰოვას შეულებ მიგეხვარან, გინირთათ თიცალ პიროვნებათ, მუნერით საჭირო რე თიშ ნებაშ შეიოსრულებერო. თაშ ნამდა, ქოთხით თის ქიმერჩან მოქმედებაშ სურვილ დო თეშ უკულ ქოთხით ძალა, ნამუთ გოსაჭირნა. ვა უღჷ მნიშვნელობა ახალგაზრდა რეთ დო ვარ ხანშა მიშულირ, გეგმირინეთ თქვან დრო, ძალა დო უნარეფ, ნამდა განადიდათ იეჰოვა ამდღარშე (ეკლ. 9:10). დღას ვემეჩათ შიშის დო გამოუცდელობას თიშ საშვალება, გემკოჩილითუან დიდ პატის — მუთ შეილებნან ირფელ გაკეთათ იეჰოვაშ მსახურებას. მართალო დიდ პატი რე, ნამდა არძას შემლებნა მუდგარენიშ კეთება ჩქინ მოჸოროფე ღორონთიშ, იეჰოვაშ ოდიდებელო, მუდგას თინა მართალო იმსახურენს!