სინოპტიკოს ამოწმენს რადარეფშე მეღებულ გამოსახულებას. თინა ორწყე, ნამდა მალას ხალხით დასახლებურ ტერიტორიას ძალიერ ქარბორია იჸუაფ. თე სინოპტიკოსის ოკო ხალხიქ გინასქიდას, ათეშენ ირფელს ორთჷ, ნამდა სოიშახ დრო რე გაფრთხილას თინეფ.

თეშნერო, ამდღა იეჰოვა დედამიწას მახორუ ხალხის „ქარბორიაშ“ გურშენ აფრთხილენს, ნამუთ თი ქარბორიეფშე ბრელით უმოს ოშქურანჯ იჸუაფ, მუდგაშ გურშენ დღას გაუგებნა ამინდიშ პროგნოზშე. მუჭო აფრთხილენს იეჰოვა ხალხის დო მუშენ შემლებნა დარწმუნებულ ვორდათ, ნამდა ღორონთ დასაბაღ დროს არზენს თინეფს, მიქცუან თე გაფრთხილებაშ შესაბამისო? სოიშახ თე კითხვეფს ვუპასუხენდათ, გუვარჩუათ მუსხირენ გაფრთხილება, ნამუთ იეჰოვაქ ჯვეშო მეჩჷ ხალხის.

ბიბლიურ დროს, იეჰოვა აფრთხილენდჷ ხალხის შხვადოშხვა განაჩენიშ გურშენ, ნამუთ თინეფს ქიგიოტირხუდ დუდის, მით შეგნებულო ვამორჩილდეს ღორონთიშ მითითებეფს (იერ. 30:23). იეჰოვაქ ბრელ ხანით ადრე გაფრთხილ ხალხ დო თინა ხოლო უწუ, მუ ოკო აკეთესკო, ნამდა მუშ ნება შეასრულესკო (2 მეფ. 17:12—15; ნეემ. 9:29, 30). თე ხალხიქ იეჰოვაშ მოსაწონო მოქციება ქიდიჭყუკონ, ხშირას ღორონთ დედამიწას მახორუ მუშ ართგურ მსახურეფიშ საშვალებათ უცხადენდჷ თინეფს განაჩენიშ გურშენ დო ოხვარუდ თიშ გაგებას, ნამდა მალას ოკო დოთირუესკო მუნეფიშ ცხოვრება (ამოს. 3:7).

ნოე რდუ ართ-ართ ართგურ პიროვნება, ნამუთ იეჰოვაქ გიმირინუ განაჩენიშ გაცხადებელო. ნოე ბრელ წანას გაბედულო აფრთხილენდჷ თი დროს მახორუ უზნეო დო უბადო ხალხის წარღვნაშ გურშენ (დაბ. 6:9—13, 17). თეს გეძინელ, ნოე ურაგადუდ თინეფს გინასქიდესკონ თიშენ მუ ოკო აკეთესკო. ნოე თიზმას ქადაგენდჷ, ნამდა თის „სიმართლეშ მაქადაგებელქ“ ქიგიადვჷ (2 პეტ. 2:5).

ნოეშ თეცალ მონდომაშ უმკუჯინუო, ხალხიქ ვედემორჩილ ღორონთშე მეღებულ თე გაფრთხილებას. თინეფქ ვეგმირჩქინეს რწმენა. შედეგო, წარღვნაშ დროს გენადგურეს (მათ. 24:39; ებრ. 11:7). თე ხალხის ვარაგადედ, ნამდა ღორონთის ვა გუფრთხილებ თინეფ.

შხვა შემთხვევას, იეჰოვაქ ჭიჭე ხანით ადრე გაფრთხილ პიროვნებეფ მუშ განაჩენიშ გურშენ. თეს გეძინელ, თინა დასაბაღ დროს არზენდჷ თე ხალხის, დოთირუესკო მუნეფიშ ცხოვრება. მაგალთო, ღორონთიქ წინასწარ გაფრთხილ ეგვიპტელეფ ვით სასჯელიშ გურშენ. იეჰოვაქ მოსე დო აარონ მიდაშქვჷ, ნამდა ფარაონ დო თიშ მსახურეფ მაშქვითა სასჯელიშ, კირცხიშ გურშენ გაფრთხილესკო. თინა მანგარო დაზარალენდჷ ირფელს. თე სასჯელ მაჟია დღას დიჭყაფუდ. შემლებნანო ფთქუათ, ნამდა ღორონთიქ დასაბაღ დრო მეჩჷ თინეფს, დუდიშ გითაფორაფალ დოგორესკო დო გინუსქიდესკო კირცხის? ბიბლია მირაგადნა: „ფარაონიშ თი მსახურეფქ, მიდგას იეჰოვაშ სიტყვაშა ოშქურდეს, მუნეფიშ მსახურეფ დო საქონელ ჸუდეეფშა გემნიჸონეს, მარა მიდგაქ ველერჩქილუ იეჰოვაშ სიტყვა, მუნეფიშ მსახურეფ დო საქონელ მინდორს ქიმწიტუეს“ (გამ. 9:18—21). არგამა რე, იეჰოვაქ დასაბაღ დრო მეჩჷ თინეფს. მიდგაქ ხეთე მირჩქილუ ღორონთიშ გაფრთხილება, უმოს ნაკლებო დეზარალ კირცხით ვინემ შხვეფქ.

მავითა სასჯელშახ ღორონთიქ კინ გაფრთხილ ფარაონ დო თიშ მსახურეფ. მარა თინეფქ კინ ვემირჩქილუეს ღორონთიშ თე გაფრთხილება (გამ. 4:22, 23). შედეგო, თინეფიშ პირველ სქუალეფქ დოღურეს. მუშმადიდა ტრაგედია რდუ! (გამ. 11:4—10; 12:29). ქუღდესო თინეფს დასაბაღ დრო, ნამდა გეთვალისწინესკო თე გაფრთხილება?  მუშო ოკო რაგად, ქო! მოსექ ხეთეშე გაფრთხილ ისრაელეფ მავითა სასჯელიშ გურშენ დო მითითებეფ ქიმეჩ, მუჭო დეცვესკო მუნეფიშ ოჯახეფ (გამ. 12:21—28). ღორონთიშ მითითებეფიშ მეჸუნაშ შედეგო, მუჭოთ იჩიებნან, სუმ მილიონ პიროვნებაქ გინუსქიდ ღორონთიშ განაჩენს დო გეგშართეს ეგვიპტეშე, თინეფ შქას ისრაელეფ, ეგვიპტელეფქ დო თინეფქ ხოლო, მით ისრაელეფ ვა რდეს (გამ. 12:38).

მუჭოთ თე შემთხვევეფშე ბძირით, იეჰოვა ირიათო არზენდჷ ხალხის დასაბაღ დროს, ნამდა გეთვალისწინესკო თიშ გაფრთხილება (კან. 32:4). მუშენ ორთუდ ღორონთ თეს? მოციქულ პეტრე მირაგადნა, ნამდა იეჰოვას „ვაკო მითინქ დოღურას, თის ოკო, არძაქ მინანუას“ (2 პეტ. 3:9). ნამდვილო, ღორონთ ზრუნენდჷ ადამიანეფშე. თის ოკოდ ხალხიქ მინანუკო დო განაჩენიშ აღსრულებაშახ, თიშ მითითებეფ გეთვალისწინესკო (ეს. 48:17, 18; რომ. 2:4).

ამდღა ხოლო, არძაქ ოკო დემორჩილას თი მნიშვნელოვან გაფრთხილებას, ნამდგაშე მთელ მსოფლიოს მეურს რაგად. მუჟამსით იესო დედამიწას რდუ, ხალხის აფრთხილენდჷ, ნამდა სატანაშ ქვეყნიერება „დიდ გასაჭირიშ“ დროს საბოლათ გენადგურებუდ (მათ. 24:21). თეს გეძინელ, იესოქ დეტალურო იწინასწარმეტყველ თი მოვლენეფიშ გურშენ, მუდგას მუშ მიმაჸუნალეფ ქვეყნიერებაშ განადგურებაშახ ოკო ელდესკო. თეშნერო, იესოქ ეჭარ თი მნიშვნელოვან მოვლენეფ, ნამდგას ამდღა ჩქინ თოლით ვორწყეთ (მათ. 24:3—12; ლუკ. 21:10—13).

თე წინასწარმეტყველებაშ გაცხადებაწკუმა ართო, იეჰოვა მოუწოდენს არძას, დემორჩილან თის. ღორონთიშ სურვილ რე, მორჩილ ადამიანეფს უღდან უჯგუშ ცხოვრება ამდღა დო ახალ ქვეყნიერებას მიღან კურთხევეფ (2 პეტ. 3:13). იეჰოვას ოკო ხალხის მეხვარას, უღდან თიშ დუნაპირებუეფიშ რწმენა. თინა თეს „სახიოლო ამბეშ“ საშვალებათ ორთჷ, ნამდგაშ გურშენ იესოქ იწინასწარმეტყველ, ნამდა თის იქადაგენდეს „მთელ მსოფლიოს არძა ხალხშა გაცხადებელო“ (მათ. 24:14). ღორონთიქ აკოშაყარუ მუშ თაყვანიშმცემლეფ, ნამდა გაცხადან თე ცნობა, ნამდგას სოდგარენ 240 ქიანას ქადაგენა. იეჰოვას ოკო მუთ შილებე მეტ პიროვნებაქ გეთვალისწინას თე გაფრთხილება დო ენტას „ქარბორიას“ — ღორონთიშ სამართლიან განაჩენს (სოფ. 1:14, 15; 2:2, 3).

მთავარ კითხვა თინა ვა რე, ქარზენს დო ვარ ღორონთ ხალხის დასაბაღ დროს, გეთვალისწინან თიშ გაფრთხილება, მუშენდა ფაქტეფ ოძირანს, ნამდა თინა ირო ირზენს დასაბაღ დროს. მთავარ კითხვა რე: გეთვალისწინენსო ხალხ ღორონთიშ გაფრთხილებას, სოიშახ თეშ დრო რე? მორთ, მუჭოთ ღორონთიშ მსახურეფქ, მუთ შილებე მეტ ხალხის მივეხვარათ, გეგნუსქიდან თე ქვეყნიერებაშ განადგურებას.