1, 2. მუ გუვარჩით წოხოლენ სტატიას დო მუს გუვარჩიენთ თე სტატიას?

 წოხოლენ სტატიას მუსხირენ პრაქტიკულ რჩევა გუვარჩით ლევიანეფიშ მა-19 დუდშე. მაგალთო, მუჭოთ მა-3 მუხლშე იძირე, იეჰოვა ითხინდჷ ისრაელეფშე, ნამდა პატი ცესკო მშობლეფს. გუვარჩით, მუჭო შემლებნა თე რჩევაშ მეჸუნა დო ჩქინ მშობლეფიშ ფიზიკურ, სულიერ დო ემოციურ საჭიროებეფშე ზრუნვა. თე მუხლის საბატონიშ დაცვებაწკუმა დაკავშირებით ხოლო მეურს ჩიება; მუშო ოკო რაგად, ჩქი ვა მოვალნა საბატონიშ დაცვება, მარა სულიერ საკითხეფშა რეგურალურო დროშ დათმებათ, მეპჸუნთ პრინციპის, მუდგაშა თე კანონ რდჷ გერსხილ. თეშნერო ვოძირანთ, ნამდა ვოცადუთ, ვორდათ წმინდეფ, მუჭოთ ლევიანეფიშ 19:2 დო 1 პეტრეშ 1:15 ელამჩანა.

² თე სტატიას გუვაგრძელენთ ლევიანეფიშ მა-19 დუდიშ გარჩიებას. ჩქი მოკონა, ვორდათ წმინდეფ, მუჭოთ ღორონთ რე წმინდა. ათეშენ, მორთ ქობძირათ, მუჭო იძირე თე დუდშე, ნამდა გურშა ოკო მიბღათ ფიზიკურო შეზღუდულეფიშ მდგომარეობა, ვორდათ პატიოსანეფ საქმიან ურთიერთობეფიშ დროს დო ჸოროფა გეგმიფრჩქინათ შხვეფიშ მიმართ.

3, 4. მუჭოთ ლევიანეფიშ 19:14-შე იძირე, მუჭო ოკო მექცისკო ჸუჯის ვერჩქილე დო თოლს ვარწყენ ფერ პიროვნებეფს?

³ წეკითხით ლევიანეფიშ 19:14. იეჰოვა ელუდ მუშ ხალხშე, ნამდა გურშა მიღანდეს ფიზიკურო შეზღუდულეფიშ გაჭირებას. მაგალთო, ისრაელეფქ ოკო ვა ჭყუესკო ჸუჯის ვერჩქილენ ფერ კოჩ. ჭყალაშა შილებე მიშეშკო გლახათ მოქციება ვარდა თინეფიშ გურშენ საყალოშ რაგად.  მუ გლახა მდგომარეობას იჸუაფუდ მუთუნს ვერჩქილენ ფერ პიროვნება თეცალ დროს! თინა ვეგეგენდჷ, მუს თქუანდეს მუშ გურშენ დო ვართ დუდ დაცვებედ.

⁴ თეს გეძინელ, მა-14 მუხლშე ვორწყეთ, ნამდა ღორონთიშ მსახურეფქ თოლს ვარწყენ ფერს მუთუნ ეკახაბარკალ ოკო ვეწუდვესკო წოხოლე. თიცალ ადამიანეფიშ გურშენ, მით ფიზიკურო რენა შეზღუდულ ართ წიგნ იჩიებ: „ჯვეშ ახლო აღმოსავლეთის [თინეფს] უმენტაშო უბადოთ დო უსამართლოთ ოქცუდეს“. შილებე ნამთინე უგურე პიროვნება ეკახაბარკალს გეუდვანდკო წოხოლე თოლს ვარწყენ ფერს, ნამდა მუდგარენ უწყუნუკო ვარდა ქუგაძიცუკო. მუშმადიდა უბადობა რე! მა-14 მუხლის ენოჭარილ კანონ იეჰოვაშ ხალხის ოხვარუდ თიშ ინონჭაფას, ნამდა გურშა მიღესკო ფიზიკურო შეზღუდულეფიშ გაჭირება.

5. მუჭო შემლებნა გურშა მიბღათ თინეფიშ გაჭირება, მით ფიზიკურო რენა შეზღუდულ?

⁵ იესოს გურშა მეუღუდ ფიზიკურო შეზღუდულეფიშ გაჭირება. ქიგიშინით იოანე ნათლისმცემელშა მეჩამილ თიშ პასუხ: „ჸვერეეფ ორწყენა, ქულეფ გილულა, კეთროვნეფ სქიდუნა, ჸუნგეფ ირჩქილენა [დო] ღურელეფ ითელებნა“. იესოშ სასწაულეფიშ მიმაჯინე მთელ ხალხ ადიდენდჷ ღორონთის (ლუკ. 7:20—22; 18:43). ქრისტიანეფ ხიოლით მეჸუნა იესოშ მაგალითის დო გურშა მეუღნა ფიზიკურო შეზღუდულეფიშ გაჭირება. თეშნერო ჩქი გიმიფრჩქინანთ სიკეთეს, ყურადღებას დო მოთვინებას თეჯგურა ხალხიშ მიმართ. მართალ რე, ვა მიღნა სასწაულეფიშ კეთებაშ უნარ, მარა მიღნა პატი, ფიზიკურო ვარდა სულიერო თოლს ვარწყენან თინეფს გეგნოფჩათ სახიოლო ამბე, ნამდა ახალ ქვეყნიერებას ირკოჩის აღვენუ, ქოთ სულიერო დო ქოთ ფიზიკურო სრულყოფილ ჯამრთელობა (ლუკ. 4:18). თე სახიოლო ამბექ ბრელს მეხვარ, განადიდკო ღორონთ.

6. მუჭო ენწყუნს უმოს ტომბაშე ლევიანეფიშ მა-19 დუდ ვით მცნებას?

⁶ ლევიანეფიშ მა-19 დუდიშ ნამთინე მუხლ უმოს ტომბაშე ენწყუნს ვით მცნებას.  მაგალთო, მა-8 მცნება იჩიებ: „ვეხირა“ (გამ. 20:15). შილებე ნამთინე ფიქრენდჷ, ნამდა მუს ვაკუთნუდუნ თიჯგურას მუთუნს ვეჭოფუნდ-და, ასრულენდჷ თე მცნებას, მარა შხვანერო ხირულენდკო.

7. მუჭო შილებედ ვაჭარქ ვედემორჩილკო მა-8 მცნებას?

⁷ ვაჭარ შილებე იცქვანდკო, ნამდა დღას ვეუჭოფ თიჯგურა მუთუნ, მუთ მუს ვაკუთნუდ. მარა მუშ რაგად შილებედ თიშ საქმიანობაშენ? მუჭოთ ლევიანეფიშ 19:35, 36-ის ჭარჷ, იეჰოვაქ თქუ: „პატიოსნურო მიქცი, მუჟამსით მუდგარენს ზიმუნქ ვარდა ეწონუნქ. ზუსტ სასწორ, ზუსტ ოწონალ, ზუსტ ეფა დო ზუსტ ჰინ ოკო გიღდან“. ვაჭარ, ნამუთ ტყურა ოწონალეფს ირინუანდჷ კლიენტეფიშ ოღორებელო, სინამდვილეს ხირულენდჷ. თენა ჯგირო იძირე ლევიანეფიშ მა-19 დუდშე.

8. მუჭო მეხვარებუდ იუდეველეფს ლევიანეფიშ 19:11—13-ს ენოჭარილ დეტალეფ, დეცვესკო მა-8 მცნება დო ჩქი მუს მოხვარნა თე მუხლეფ?

⁸ წეკითხით ლევიანეფიშ 19:11—13. ლევიანეფიშ 19:11 თეშნერო იჭყაფ: „ვეხირა“. მა-13 მუხლ ხირუას უპატიოსნო საქმიანობაწკუმა აკავშირენს დო იჩიებ: „მუთუნ ვემდუღა სქან ჯიმას“. თაშ ნამდა, მითინ ფარას უპატიოსნოთ ქოშიბულენს-და, თინა ხირულენს. ლევიანეფიშ წიგნის ენოჭარილ დეტალეფ მეხვარებუდ იუდეველეფს თიშ ინონჭაფას, მუჭო დეცვესკო მა-8 მცნება. ჯგირ იჸუაფ, დეფიფქრათ, მუჭო უჯინე იეჰოვა ხირუას დო უპატიოსნობას. შემლებნა ჩქინ დუდის ბკითხათ: „ლევიანეფიშ 19:11—13-ს მოჩამილ სიტყვეფშე დაფიქრებაშ უკულ ჩქიმ ცხოვრებას ქიგნუოჯინექინ, ხომ ვა მაფჷ მუთუნ ოთირალ, განსაკუთრებულო სამუშაწკუმა დაკავშირებით?“.

9. მუჭო იცვენდჷ მუშეფს ლევიანეფიშ 19:13-ს მოჩამილ კანონ?

⁹ თე მუხლეფშე პატიოსნებაწკუმა დაკავშირებით ხოლო ართ მხარე იძირე, ნამდგაშე ოკო დეფიქრას ქრისტიანქ, მით შხვეფს ასაქმენს. ლევიანეფიშ 19:13 თაშ ითებ: „დაქირებულ მუშას ნამუშერ ფარა დღაშ ბოლოშახ ქიმეჩ“. ისრაელს დაქირებულ მუშას ნამუშერ ირ სამუშა დღაშ ბოლოს ოკო მეჩესკო. დამსაქმებელ დღაშ ბოლოს ფარას ვემეჩანდ-და, მუშას შილებე ოჯახიქ შქირენულქ ქუდასქიდკო. იეჰოვაქ ენწყჷ: „მუშენდა გაჭირებულ რე თინა დო თე ნამუშერს მიოჯინე“ (კან. 24:14, 15; მათ. 20:8).

10. მუს ბგურაფლენთ ლევიანეფიშ 19:13-შე?

¹⁰ ამდღა ნამუშერს თუთაშე ართშა ვარდა ჟირშა ეჭოფნა დო ვართ ხოლო ირდღას, მარა პრინციპ, ნამუთ ლევიანეფიშ 19:13-შე იძირე, ამდღა ხოლო მოქმედენს. ნამთინე დამსაქმებელ მუშეფს ოკუთნუნან თიშე ბრელით ნაკლებ ფარას არზენს. თინეფს უჩქუნა, ნამდა მუშეფს შხვა შარა ვა უღნა დო იშენ გაგრძელენა მუშობას. შილებე ირაგადუას, ნამდა თეცალ დამსაქმებელეფ ნამუშერს ვარზენა დასაქმებულეფს. ქრისტიანქ, ნამუთ შხვეფს ასაქმენს, ოკო დერწმუნას, ნამდა სამართლიანო ოქცუ თინეფს. მორთ ასე ქობძირათ, ხოლო მუშ გურაფა შემლებნა ლევიანეფიშ მა-19 დუდშე.

11, 12. მუჭო ოძირუ იესოქ, ნამდა მნიშვნელოვან რდჷ ლევიანეფიშ 19:17, 18-ს მოჩამილ მითითება?

¹¹ ღორონთ ჩქინდე თიშე უმოსის ელჷ, ვინემ შხვეფშა გლახაშ კეთებაშე დუდიშ ეჩილითაფა რე. თენა იძირე ლევიანეფიშ 19:17, 18-შე (წეკითხით). იეჰოვა არგამათ იჩიებ: „სქან ჯიმა სქან დუდცალო გიჸორდას“. თაშ ოკო აკეთას ქრისტიანქ, მიდგას ოკო, ღორონთის გურ გუხარას.

¹² იესოქ ქაძირუ, მუზმათ მნიშვნელოვან რდჷ ლევიანეფიშ 19:18-ს ენოჭარილ სიტყვეფ. ართშა იესოს ფარისეველქ კითხჷ: „ნამ რე არძაშ უდიდაშ მცნება კანონს?“,  იესოქ უპასუხ: «„გიჸორდას იეჰოვა, სქან ღორონთ, მთელ გურით, მთელ შურით დო მთელ გონებათ“. თენა რე პირველ დო არძაშ უდიდაშ მცნება». უკულ ლევიანეფიშ 19:18-ს ენოჭარილ სიტყვეფ მიჸონ: «მაჟია თეს მოგენს: „მოყვას სქან დუდცალო გიჸორდას“» (მათ. 22:35—40). ჩქი ბრელნერ საშვალებათ შემლებნა შხვეფიშ მიმართ ჸოროფაშ გიმორჩქინა; ნამთინე საშვალებას ლევიანეფიშ მა-19 დუდშე ბგურაფლენთ.

13. მუჭო შემლებნა უჯგუშო ქენვანჭათ ლევიანეფიშ 19:18-ს იოსებიშ მაგალითშე დაფიქრებათ?

¹³ შხვეფიშ მიმართ ჸოროფაშ გიმორჩქინაშ ართ-ართ საშვალება მოჩამილ რე ლევიანეფიშ 19:18-ს. თექ ჭარჷ: „მანგიორ ვეგნუგა სქან ჯიმას დო ჟღამ ხოლო ვალედვა გურშა თიშ მიმართ“. ჩქინდე უმენტაშ იფჩინენთ თიცალ ადამიანეფს, მიდგას გურ აფნა მოულირ თანამშრომლეფშე, სკოლაშ ამხანაგეფშე ვარდა ოჯახიშ წევრეფშე. ქიგიშინით იოსებიშ ვით ჯიმაჸონერიშ შემთხვევა. თინეფს გურ აფდეს მოულირ იოსებშე დო შედეგო თეიშახ ქიმერთეს, ნამდა უბადოთ მექცის თის (დაბ. 37:2—8, 25—28). მარა თე ირფელიშ უმკუჯინუო, იოსების მუშ ჯიმალეფცალო ვა მუქციებ. მუჟამსით თიქ მაღალ მდგომარეობას ქიმიოჭირინუ, შეულებუდ თინეფშა მანგიორიშ გინოგაფა. იოსების გურშა ჟღამ ველუდვალ, თეშ გინაწონს, თეშ მიქცუ, მუჭოთ ლევიანეფიშ 19:18-ს რე ენოჭარილ (დაბ. 50:19—21).

14. მუ ოძირანს, ნამდა ლევიანეფიშ 19:18-ს მოჩამილ პრინციპ ამდღა ხოლო მოქმედენს?

¹⁴ ქრისტიანეფქ, მიდგას ოკონა, გურ გუხარან ღორონთის, ოკო მიაჸუნან იოსებიშ მაგალითის, მიდგაქ ქაპატუ მუშ ჯიმალეფს დო მანგიორ ვეგნუგ. ართიანიშ პატიება იესოქ ლოცვაშ ნიმუშის ხოლო მიშინუ (მათ. 6:9, 12). პავლექ ხოლო თეცალ სიტყვეფ მეჭარ თანაქრისტიანეფს: „მანგიორ ვეგნუგათ“ (რომ. 12:19). თეწკუმა ართო, თეცალ რჩევა მეჩჷ: „მუთვინით დო მთელ გურით ქაპატით ართიანს თიმწკუმა ხოლო, მუჟამსით მიდგაინიშ წინააღმდეგ ჩიულიშ მიზეზ გიღნა“ (კოლ. 3:13). იეჰოვაშ პრინციპეფ დღას ვეთირუ. ლევიანეფიშ 19:18-ს მოჩამილ პრინციპ ამდღა ხოლო მოქმედენს.

15. ნამ მაგალით მოხვარნა თიშ გაგებას, მუშენ ოკო ვაპატუათ დო გიბჭყოლიდუათ გურჭუა?

 ¹⁵ დეფიფქრათ თეცალ მაგალითშე: გურიშელაჭუალა მოგენს ჭრილობეფს. ნამთინე ჭრილობა ჭიჭე რე, ნამთინე — დიდ. შილებე ოჭკუმალიშ კეთებაშ დროს კით ქინკიბჭკირათ დო მაწყუნან, მარა ჭუა ბრელ ხანს ვეგეგრძელებ, მუსხირენ დღაშა შურო ვეგმოხედან იჸი თინა. თეშნერო შილებე მეგობარქ გურუგუჩამუო სიტყვათ ვარდა საქმეთ გურ ქალმოჭუან დო თიშ პატიებაქ ვა გამჭირდან. მარა მუშ რაგად შილებე, მუჟამსით უმოს დიდ ჭრილობა მიღნა დო საჭირო რე თიშ ელაჭალა დო გოკირუა? ჭრილობაშ სოფაფის ქიდიბჭყანთ-და, უმოსო იბწყუნუანთ თის. სანარღოთ, თაშ შილებე მოხვადას, მუჟამსით პიროვნებას მანგარო აფჷ გურ წყუნაფილ. თინა მოხვალამირშე ირიათო ქიფიქრენს-და, თეცალ საქციელით ხვალე ზიანს მოუღანს მუშ დუდის. ბრელით უჯგუშ იჸუაფ, თეცალ პიროვნებაქ მიაჸუნას ლევიანეფიშ 19:18-ს მოჩამილ პრინციპის.

16. მუჭოთ ლევიანეფიშ 19:33, 34-შე იძირე, მუჭო ოკო მექცისკო ისრაელეფქ ხიზანეფს დო მუშ გურაფა შემლებნა თავრეშე?

¹⁶ იეჰოვას ისრაელეფშა ვა უთქუალ, ნამდა ხვალე მუნეფიშ ეროვნებაშ ხალხ უჸორდესკო; თინეფს ოკო უჸორდესკო უცხოელეფ ხოლო, მით მუნეფიშ გოხოლუას ცხოვრენდეს. თენა ჯგირო იძირე ლევიანეფიშ 19:33, 34-შე (წეკითხით). ხიზანს თეშ ოკო მექცუესკო, მუჭოთ თექიანს დო მუნეფიშ დუდცალო ოკო უჸორდესკო. მაგალთო, ისრაელეფშე კანონ ითხინდჷ, ნამდა ქოთ ხიზანეფს დო ქოთ თექიან ღარიბეფს ქიმეჩესკო უფლება, მუნეფიშ ჸვანეფს დოშაყარესკო დოსქილადირ მოსავალ (ლევ. 19:9, 10). უცხოელეფიშ ჸოროფაწკუმა დაკავშირებულ პრინციპ ქრისტიანეფს ამდღა ხოლო ოხუ (ლუკ. 10:30—37). მუჭო შემლებნა თეშ კეთება? ჩქინ გოხოლუას იმიგრანტეფ ქოცხოვრენან-და, მნიშვნელოვან რე, თინეფს პატიცემათ დო ღირსუანო მივექცუათ.

17, 18. ა) მუშ კეთებას ელამჩანა ლევიანეფიშ 19:2 დო 1 პეტრეშ 1:15? ბ) მუ მნიშვნელოვან საქმეშ კეთება ელუჩ პეტრექ ქრისტიანეფს?

¹⁷ ლევიანეფიშ 19:2 დო 1 პეტრეშ 1:15 ელამჩანა, ნამდა წმინდეფ ვორდათ. ლევიანეფიშ მა-19 დუდშე ბრელ მუხლ მოხვარნა, ქიგებგათ, მუ ოკო ვაკეთათ იეჰოვაშ  მოწონაშ მიოღებელო. ჩქი გუვარჩით მუხლეფ, სოვრეშეთ იძირე ნამთინე ჯგირ საქმე, ნამუთ ოკო ვაკეთათ დო ნამთინე გლახა საქმე, ნამდგაშ კეთებას დუდ ოკო ეუჩილითუათ. * ქრისტიანულ-ბერძნულ წერილეფშე იძირე, ნამდა იეჰოვას ოკო, ამდღა ხოლო მივაჸუნათ თე პრინციპეფს.

¹⁸ ჩქი შილებე რეგურალურო ვომსახურდათ იეჰოვას დო ჯგირს უკეთენდათ შხვეფს, მარა პეტრექ განსაკუთრებულო ართ მნიშვნელოვან საქმეშ კეთება ელუჩ ქრისტიანეფს: „მამზადით გონება საქმეშ ოკეთებელო“. თენა თეიშახ უწუ, სოიშახ სიწმინდეწკუმა დაკავშირებულ მითითებას მეჩანდკო (1 პეტ. 1:13, 15). მუ რდჷ თე საქმე? პეტრექ უწუ ქრისტეშ ცხებულ ჯიმალეფს, ნამდა გაცხადესკო თიშ აღმატებულობაშ გურშენ, მიდგაქ უკმელაშე მუშ სინთეშა გიშეჸონ (1 პეტ. 2:9). ამდღა ხოლო არძა ქრისტიანს უღჷ თიშ პატი, ნამდა შეასრულას მანგარ მნიშვნელოვან საქმე, ნამდგას ხალხშა ნინათ ვეიჭარენ ფერ ჯგირობუაშ მოღალა შეულებ. ჩქი, მუჭოთ წმინდა ხალხის, მიღნა პატი, რეგურალურო დო მთელ გურით მიბღათ მონაწილება ქადაგება დო გურაფაშ საქმეს (მარ. 13:10). მუჟამსით მთელ გურით მეპჸუნთ ლევიანეფიშ მა-19 დუდის მოჩამილ პრინციპეფს, ვამტკიცენთ, ნამდა მიჸორა ღორონთ დო მოყვას დო მოკონა, ვორდათ წმინდეფ არძანერ საქმეს.