არძა თქვან ოწუხებელ იეჰოვას მიანდით
„არძა თქვან ოწუხებელ თის [იეჰოვას] მიანდით, მუშენდა თინა ზრუნენს თქვანო“ (1 პეტ. 5:7).
ობირეშეფი: 60, 23
1, 2. ა) მუშენ ოკო ვა გამკვირდან, მინშა ოწუხებელ მიღუნან თიქ? (ქოძირით სურათ თე გვერდის). ბ) მუს გენიფხილენთ თე სტატიას?
ჩქი მანგარ დაძაბულ დროს ფცხოვრენთ. სატანა ეშმაკი გაჟღამებულ რე დო „გილურს, მუჭოთ მაღირთალ ლომი დო გორუნს მი გინორყინტას“ (1 პეტ. 5:8; გამოცხ. 12:17). ათეშგურშენ გასაკვირ ვა რე, ნამდა მინშა ღორონთიშ მსახურეფს მიღუდან მუდგაინნერ ოწუხებელ. იეჰოვაშ მოშიშ მსახურეფს ხოლო უღუდეს ოწუხებელ ჯვეშ დროს, მაგალთო, დავით მეფეს (ფსალმ. 13:2). ქიგიშინით, პავლე მოციქულ, ნამუსით კრებეფიშ ამბე აწუხენდ (2 კორ. 11:28). მარა ჩქი მუ შემლებუნა ვაკეთათ ოწუხებელ მიღუნან თი დროს?
2 ჩქინ მოჸოროფე ზეციერ მუმა ჯვეშო მუშ მსახურეფს ოხვარუდუნ თეშ, ჩქინო ხოლო ირფელს ორთუ ამდღა, ემქექუან გაჭირება დო უბედრობა. ბიბლია მომწოდენა: „არძა თქვან ოწუხებელ თის [იეჰოვას] მიანდით, მუშენდა თინა ზრუნენს თქვანო“ (1 პეტ. 5:7). მორთ, გენიფხილათ ოთხ საშვალება, ნამუთ მიგეხვარებუნა თქვან ოწუხებელ ღორონთის მიანდათ. თენა რე გურგინოფაჩილ ლოცვა, ღორონთიშ სიტყვაშ კითხირ დო თიშე დაფიქრება, იეჰოვაშ წმინდა შურიშ მოხვარა დო გურიშ გინოფაჩუა სანდო მეგობარშა. თე ოთხ საშუალებაშ განხილვაშ დროს, დეფიქრით, ნამ პრაქტიკულ ნაბიჯიშ გინოდგუმას ისხუნუანდით.
„თქვან ოღალ იეჰოვას მიანდით“
3. მუჭო შეილებუნა ლოცვაშ საშვალებათ „თქვან ოღალ იეჰოვას მიანდათ“?
3 პირველ ნაბიჯ რე გურგინოფაჩილ ლოცვა. მუჟამსით თიცალ სიტუაციეფს ვორეთ, ნამუსით მოჸუნს შიში დო წუხება, შემლებუნა გურ გეგნუფაჩათ მოჸოროფე ზეციერ მუმას ლოცვაშ დროს. ფსალმუნიშ მაბირე დავით თხინდ იეჰოვას: „ქუმურჩქილე, ღორონთი ჩქიმ ლოცვას“. კინ თე ფსალმუნს თინა იჩიებ: „იეჰოვას მიანდი სქან ოღალ დო თინა ქელაიდირთუ“ (ფსალმ. 55:1, 22). პრობლემაშ გინაჭყვიდირალო ირფელ გაკეთ-და, მუშო ოკო რაგად, იწუხენ თის უჯგუ, გურგინოფაჩილო ილოცენ. მარა მუჭო მიგეხვარებ ლოცვა, ვემგერუას გლახა აზრეფქ დო გურქ ვედგემონკას? (ფსალმ. 94:18, 19).
4. მუშენ რე ლოცვა მნიშვნელოვან, მუჟამსით ოწუხებელ მიღუნა?
4 წეკითხით ფილიპელეფიშ 4:6, 7. მუჟამსით გურგინოფაჩილო, მთელ გურით დო ხშირას ბლოცულენთინ, იეჰოვა პასუხენს ჩქინ ლოცვეფს. მუჭო პასუხენს? თინა მარზენა შინაგან სიმშვიდეს, ნამუთ ჩქინ გონება დო გურს ათავისუფალენს უარყოფით ემოციეფშე. ბრელს თენა მუშ პირად გამოცდილებაშე უჩქუ. წუხებაშ დო შიშიშ მანგიორო, იეჰოვაქ მეხვარ თინეფს თიცალ სიმშვიდე ქიგინესკონ, ნამუთ კოჩიშო რთულ წარმოსადგენ რე. შილებე სქან ცხოვრებას ხოლო ქუმოხვადას თეცალ მუდგარენქ. ათეშგურშენ „ღორონთიშ მშვიდობა“, ნამუთ ირფელიშ უმოს რენ, მიგეხვარებუნა, გიორჯგინათ ირნერ პრობლემას. თქვა შეილებუნა მთლიანო მიენდათ იეჰოვაშ დუნაპირებუს: „მა გუგამანგარენქ, მა მიგეხვარებუქ“ (ეს. 41:10).
ღორონთიშ სიტყვა შინაგან სიმშვიდეს მარზენა
5. მუჭო მარზენა ღორონთიშ სიტყვა შინაგან სიმშვიდეს?
5 მაჟია საშვალება რე, ბიბლიაშ კითხირ დო თიშე დაფიქრება. მუშენ რე თენა მნიშვნელოვან? ბიბლიას მოჩამილ რე პრაქტიკულ რჩევეფი, ნამუთ მიგეხვარებუნა ოწუხებელიშ ეჩილითაფას ვარდა ექექაფას. ვაგგოჭყორდან, ნამდა ღორონთიშ სიტყვა მიგეხვარებუნა დო შურს მოიდგუნა, მუშენდა თინა გერსხილ რე გუმაჭყაფალიშ სიბრძნეშა. მუჟამსით ოწუხებელ გიღუნან, ღორონთიშ აზრეფშენ ქიფიქრენთ დო ბიბლიაშ პრაქტიკულ რჩევეფს ქიგმირინუანთ-და, ნამდვილო გემანგარებუთ. იეჰოვაქ მუშ სიტყვაშ კითხირ გაბედულებას დო სიმანგარეს დუკავშირ დო ვართ ხოლო შიშის (იეს. 1:7—9).
6. მუჭო მოქმედენს იესოშ სიტყვეფ ჩქინწკუმა?
6 ბიბლიას იესოშ დუმამშვიდებელ სიტყვეფს პკითხულენთ. თიშ სიტყვეფ დო გურაფეფი ძალეფს არზენდ თიშ მარჩქილეფს. ხალხი მიკმაჭყორდუდ თის, მუშენდა თინა შურს მოუდგუნდ გურშეჭირებულეფს, ამანგარენდ დო გურშა ეუქექუანდ ძალაეშალიებურეფს (წეკითხით მათეშ 11:28—30). იესო ჸოროფას გიმირჩქინანდ დო დიდ ყურადღებას აქციენდ თინეფს, მიდგას მოხვარა ოსაჭირუდ სულიერ, ემოციურ დო ფიზიკურ მხარეთ (მარ. 6:30—32). იესოშ დუნაპირებუ ჩქი ხოლო მოხუნა. თიშ ყურადღება დო ელარინა შილებე ჩქი ხოლო იბგინათ, მუჭოთ თეს გინაფლენდეს თიშ მოციქულეფი. თეშო ვა რე აუცილებერ იესო ფიზიკურო ჩქინწკუმა რდასინ. მუჭოთ ზეციერ მეფე, იესო ირო ქელუკინანს გურშა ხალხის. ათეშგურშენ, მუჟამს ოწუხებელ გიღუნან, თის შეულებ შეიცოდილუან დო დროულო მიგეხვარან (ებრ. 2:17, 18; 4:16).
ღორონთიშ მოსაწონ თვისებეფი
7. მუჭო პასუხენს ღორონთი, მუჟამს წმინდა შურს ფთხინთ?
7 იესოქ დემეპირეს, ნამდა ჩქინ ზეციერ მუმა წმინდა შურს მეჩანს თინეფს, მით ითხინს (ლუკ. 11:10—13). მასმა ძალიერ საშვალება ოწუხებელიშ ეიოქექაფალო რე შურიშ ნაყოფი, ნამუსით ღორონთიშ წმინდა შურ გიმიღანს. დადებით თვისებეფი, ნამუთ ღორონთიშ ძალაშე მოურსინ, ირფელიშ შემალებე ღორონთიშ პიროვნებას მოძირანა (წეკითხით გალატელეფიშ 5:22, 23; კოლ. 3:10). შხვეფწკუმა უჯგუშ ურთიერთობა გაღვენუნა, მუჟამსით შურიშ ნაყოფის გავითარენთინ. თაშ ნამდა, ნაკლებო გაღვენუნა თიცალ სიტუაციეფი, ნამუთ ოწუხებელს იწვიენს. მორთ, დეფიფქრათ მუჭო შეულებ შურიშ ნაყოფის ჩქინ მოხვარა.
8—12. მუჭო მიგეხვარებუნა ღორონთიშ წმინდა შური, მერუათ ვარდა დუდ არიდათ დაძაბულ სიტუაციეფს?
8 „ჸოროფა, ხიოლ დო მშვიდობა“. მუჟამს ოცადუთ შხვეფს პატიცემათ მექცუათინ, შილებე უჯგუშო მერუათ უარყოფით ემოციეფს. მუჭო შილებე თეშ კეთება? ჯიმალურ ჸოროფას, ფაქიზ გრძნობეფს დო პატიცემას გეგმირჩქინანთ-და, ეიჩილითუანთ თიცალ სიტუაციეფს, ნამუსით ოწუხებელ მოჸუნს (რომ. 12:10).
9 „მოთვინება, ჯგირობუა დო სიჯგირა“. შეილებუნა მშვიდობას ხე შეუნწყუათ, მუჟამსით ქიმიაჸუნუთ თე მითითებას: „ჯგირო მექცით ართიანს, მუთ შილებე გეუქექეთ ართიანს დო მთელ გურით ქაპატით ართიანს, მუჭოთ ღორონთიქ გაპატის მთელ გურით ქრისტეთ“ (ეფეს. 4:32). თეცალ მოქმედებათ, დუც არიდენთ თიცალ სიტუაციეფს, სოდეთ წიმიჭკირუ ოწუხებელ. თქვა შეილებუნა მერუათ თიცალ სიტუაციეფს ხოლო, ნამუშ მიზეზ შილებე კოჩიშ არასრულყოფილება რდას.
10 „რწმენა“. ამდღა ოწუხებელიშ მიზეზ ხშირას ფარა დო მატერიალურ ნივთეფიშ შაყარუა რე (იგავ. 18:11). ათეშგურშენ, საჭირო რე თიშ რწმენა, ნამდა იეჰოვა იზრუნენს ჩქინო დო ელამდირთუნა, მივერუათ ზედმეტ ოწუხებელს. მუჭო რე თენა შეიოლებერ? თეს მიმეხვარებუნა ღორონთიშ შურით ჭარილ პავლე მოციქულიშ რჩევა, ნამდა გეუჯერდათ თის, მუთ მიღუნა. პავლე აგრძელენს: «მუშენდა თიქ [ღორონთიქ] თქუ: „ვადოიტენქ დო ვემგოტენქ. თენა მამხნევენა დო შემლებუნა ფთქუათ: „იეჰოვა რე ჩქიმ ალმარენჯი, ვამაშკურინე“. მუ ოკო ბღოლას კოჩიქ?» (ებრ. 13:5, 6).
11 „ლიბ ხასიათი, დუდშეკება“. დეფიქრით, მუ პრაქტიკულ დო მუშმაჯგირა შედეგეფი მოჸუნს თე თვისებეფიშ გიმორჩქინას. თქვა შეგალებენა დუდ ეუჩილითუათ თიცალ სიტუაციეფს, ნამუთ ოწუხებელს გოირჩქინანა. თეშ გარდა თქვანწკუმა ჯგირო იმოქმედენს, მუჟამსით დუც არიდენთ „გამწარებას, გურიშმოულას, რისხვას, ღვარაფის დო ლანძღუას“ (ეფეს. 4:31).
12 მუშო ოკო რაგად, თანდაბლობა რე საჭირო, ნამდა ქიდვემორჩილათ ღორონთიშ ძალიერ ხეს დო ჩქინ ოწუხებელ თის მივანდათ (1 პეტ. 5:6, 7). მარა თანდაბლობას გეგმიფრჩქინანთ-და, ღორონთიშ ჭყოლოფა დო ელარინა ვამმოკორდუნა (მიქ. 6:8). რეალურო შეაფასენთ თქვან ფიზიკურ, გონებრივ დო ემოციურ შესაძლებლობეფს დო მთლიანო ღორონთის ქიმიენდებუთ-და, ოწუხებელს მერიებუთ.
„დღას ვეწუხათ“
13. მუ იგულისხმებ იესოშ რჩევას, ნამდა დღას ოკო ვეპწუხათ?
13 მათეშ 6:34-ის (წეკითხით) ინოჭარ იესოშ დუმაფიქრებელ რჩევა: „დღას ვეწუხათ“. მარა შილებე თე რჩევაშ მეჸუნა ადვილ ვარდას. მუს გულისხმენდ იესო თე სიტყვეფს? მუშო ოკო რაგად, იესოს ვაუგულისხმებ, ნამდა ღორონთიშ მსახურეფს დღას ვაღვენუდეს ოწუხებელ. თეს დავითიშ დო პავლეშ სიტყვეფი ხოლო ამტკიცენს, ნამუთ ჟიშე რე მოშინაფილ. მარა იესოს ოკოდ ქუგაგებაფუკო მუშ მოწაფეეფს, ნამდაზედმეტ დო მეტიშმეტ წუხებათ პრობლემეფ ვეგნიჭკირუდ. არძა დღას მუშ სირთულეეფ უღუ, ათეშგურშენ ქრისტიანქ ულირშენ დო მომავალშენ ფიქრით ვემიძინას ოკო ოწუხებელ. მუჭო შეილებუნა მიაჸუნათ იესოშ რჩევას დო დუდ არიდათ ზედმეტ ოწუხებელს?
14. მუ მიგეხვარებუნა, ნამდა ვეწუხათ ულირს დაშვებულ შეცდომაშენ?
14 მინშა შილებე ულირს დაშვებულ შეცდომაშენ ვარდა საქციელიშ გურშენ ბწუხენდათ. შილებე წანეფიშ წოხოლე გლახათ მიფქცითკო დო თეშგურშენ ამდღა დანაშაულიშ გრძნობა მაწუხენდან. მინშა დავით მეფე ხოლო რდუ თეცალ მდგომარეობას დო ფიქრენდ, ნამდა დუდშა აფუდ გინოლუაფირ მუშ დანაშაულ. თიქ თქუ: „ბღელენანქ, მუშენდა ჩქიმ გურ კუსანს“ (ფსალმ. 38:3, 4, 8, 18). მუჭო უჯგუდ მიქცუკო დავითიქ თეცალ სიტუაციას დო მუჭო მიქცუ თიქ? დავითიქ გონივრულო მიქცუ, მუშენდა იეჰოვაშ ჭყოლოფაშ დო პატიებაშ იმენდ უღუდ. თიქ დარწმუნებულო თქუ: „ბედნერ რე თინა, მიდგას ქეპატუ ურჩობაქ“ (წეკითხით ფსალმუნიშ 32:1—3, 5).
15. ა) მუშენ ოკო ვაწუხენდათ ამდღარ მდგომარეობაშ გურშენ? ბ) მუ კონკრეტულ ნაბიჯეფიშ გინოდგუმა მიგეხვარებუნა, ნამდა ეიქექუან ოწუხებელ? ქოძირით ჩარჩო „ ოწუხებელიშ ეიოქექაფალ მუსხირენ საშვალება“).
15 მინშა შილებე ამდღა არსებულ მდგომარეობაქ დუგაფიქრან დო თექ წუხებაშ მიზეზიქ ქიჸუას. მაგალთო, მუჟამსით დავითი 55-ა ფსალმუნს ჭარუნდუნ, თიშ ცხოვრებას რთულ პერიოდ რდუ დო ოშკურუდ ვაჸვილესკონ (ფსალმ. 55, 2—5). მარა თიქ ვემეჩ უფლება შიშის, ნამდა იეჰოვაშა ნდობა მეუდინუაფუდუკო. დავითი ბრელს ლოცულენდ დო ირფელს, მუდგა აწუხენდუნ, ღორონთის ურაგადუდ, მარა თის თინა ხოლო არჩქილედ, ნამდა პრობლემეფს მერუკონ თიშენ, საჭირო რდუ კონკრეტულ ნაბიჯეფიშ გინოდგუმა (2 სამ. 15:30—34). თქვა ხოლო მიაჸუნით დავითიშ მაგალითის. ოწუხებელქ ვემგერუანინ თიშ გურშენ, მუთ შეილებუნან, ირფელ გაკეთით მდგომარეობაშ გიმასწორებელო დო ღორონთის მიანდით თქვან ოწუხებელ, თიშა დარწმუნებულეფქ, ნამდა თინა ქელაიდირთუნა.
16. მუჭო შეულებ ღორონთიშ სახელიშ მნიშვნელობაშ რჩქინას, გაიმანგარან რწმენა?
16 ხშირას საფუძველ ვაუღუნ ფერ ოწუხებელიშ მიზეზი, თინა რე, ნამდა ზედმეტო ფიფქრენთ მომავალ პრობლემეფიშ გურშენ. მარა წინასწარ ვეწუხათ დო ვენერვიათ ოკო გლახაშ გურშენ, მუთ დიო ვამოხვალამე, მუშენდა ხშირას ირფელ თეშ ვამოხვადუ, მუჭო თქვა ფიქრენთ. თეშ გარდა, ღორონთი, ნამდგაშა არძა თქვან ოწუხებელიშ მენდება შეილებუნა, აკონტროლენს ირნერ სიტუაციას. თიშ სახელი ნიშნენს „გინართინაფუანს„ (გამ. 3:14). თე სახელიშ მნიშვნელობას ბოლოშა ქინვანჭუთ-და, დებრწმუნებუთ, ნამდა ღორონთის შეულებ შეასრულას ირფელ, მუთ მუშ მსახურეფშა აფუ დაპირებულ. შეილებუნა დარწმუნებულ რდათ, ნამდა ღორონთი აკურთხენს მუშ ართგურ მსახურეფს დო ქიმეხვარებ, მერუან ოწუხებელს, ნამუთ ოხუ ულირს, ასეიან დროს დო მომავალს.
გურიშ გინოფაჩუა
17, 18. მუჭო შეულებ გურგინოფაჩილ რაგადის თქვან მოხვარა?
17 მანთხა საშვალება, ნამუთ მიგეხვარებუნა ოწუხებელს მერუათინ, თინა რე ნამდა გურ გეგნუფაჩათ სანდო მეგობარს. მეუღლეს, ხოლოიშიან მეგობარს ვარდა კრებაშ უხუცესის შეულებ, ქიმგეხვარან, ნამდა სწორ თოლწონუა მიღუდან პრობლემეფშენ. ბიბლიას ჭარ: „წუხება გურს უმონკენს კოჩის, მარა გემუან სიტყვა გურს უხარენს“ (იგავ. 12:25). გურგინოფაჩილ რაგადით შეგალებენა უმოსო ქინანჭათ თქვან პრობლემეფიშ მიზეზის დო გეგნიღათ თინა. ღორონთიშ სიტყვა იჩიებ: „გურგინოფაჩილ რაგადიშ უმშო, გეგმეფი აკოცენს; ბრელ ალმაჩამალ რენ თექ, მიზანშა მიჭირინე“ (იგავ. 15:22).
18 იეჰოვა კრებეფიშ საშვალებათ ხოლო ოხვარ ქრისტიანეფს, ნამდა გეგნოლახან ოწუხებელ. თაქ თქვა ურთიერთობა გიღუნა კრებაშ წევრეფწკუმა, მისით აწუხენს თქვან ამბე დო ოკონა გურშა ელაიკინან (ებრ. 10:24, 25). ართმაჟიაშ გურიშ ელაკინათ სულიერ ძალეფ ქიმგაჩამუნა დო უმოს ადვილო მერიებუთ ოწუხებელს (რომ. 1:12).
ღორონთწკუმა ურთიერთობა ძალაშ მუმაჩამალ რე
19. მუშენ შეილებუნა დარწმუნებულ რდათ, ნამდა იეჰოვაწკუმა ხოლოშიან ურთიერთობა გუგამანგარენა?
19 ქობძირათ, მუჭო დერწმუნ ართ კანადელ კრებაშ უხუცესიქ, ნამდა ღორონთშა ოწუხებელიშ მენდება მნიშვნელოვან რე. თინა სკოლას მასწავლებელო დო ელმაჩამალო მუშენს, ნამუთ მანგარ სტრესულ სამუშა რე. თეშ გარდა თის ნერვულ აშლილობა უღუ. მუჭო ობრძოლ თინა თე პრობლემეფს? თე ჯიმა იჩიებ: „ემოციურ პრობლემეფს მივერუენ თიშენ, არძაშ უმოს ძალას თინა მარზენს, ნამდა ირნერო ვოცადუქ იეჰოვაწკუმა ხოლოშიან ურთიერთობა მიღუდას. მეგობრეფიშ დო სულიერ და დო ჯიმალეფიშ ელარინა მანგარ მნიშნველოვან რე თე დროს. ჩქიმ ოჯახობას ირფელს ურაგადუქ, მუდგას ბგინაფლენქ დო მაწუხენს. უხუცესეფქ დო რაიონულ ზედამხედველქ მანგარო მიმეხვარეს, ნამდა სწორ თოლწონუა მიღუდკო ჩქიმ პრობლემეფშენ. ექიმიშ რჩევეფქ მიმეხვარ დო ბრელ მუთუნ ხოლო დობთირე, ნამდა დრო გეგმურთიკო მოსვანჯას დო ფიზიკურ ვარჯიშის. ჭიჭე ხანშა, უკვე უმოსო შემლებუდ ჩქიმ დუდიშ კონტროლი. მუჟამსით ვორწყექ, ნამდა სიტუაცია ვამაკონტროლებენ, თინა იეჰოვაშა მაფუ მენდებულ“.
20. ა) მუჭო შემლებუნა მივანდათ იეჰოვას ჩქინ ოწუხებელ? ბ) მუს გუვარჩიენთ ანწიან სტატიას?
20 ჩქი ქიგებგით, მუშმადიდა მნიშვნელობა უღუ, მივანდათ იეჰოვას ჩქინ ოწუხებელ გურგინოფაჩილ ლოცვათ, ბიბლიაშ კითხირით დო თიშა დაფიქრებათ. ჩქი თინა ხოლო ქიგებგით, ნამდა მნიშვნელოვან რე, განვავითარათ შურიშ ნაყოფი, გურ გეგნუფაჩათ სანდო მეგობარს დო გებმანგარათ თანამორწმუნეეფწკუმა გურიშემაკინალ ურთიერთობათ. ანწაინ სტატიას გუვარჩიენთ, მუჭო მუჩანა იეჰოვა ძალეფს ჯილდოშ იმენდით (ებრ. 11:6).
