მაჟია მეულას თე ოსურქ კინ გოლანძღ ანტონია. მუნერ რეაქცია უღუდ თის? „მანგარ რთულ სიტუაცია რდუ. ოლანძღარ სიტყვეფ ვემურკებ ჩქიმდა“, — იჩიებ თინა. მარა თეშ უმკუჯინუო, ანტონიაქ კინ მოუბოდიშ თე ოსურს დო უწუ, ნამდა არჩქილედ თიშ მდგომარეობა.

მუჭო მიქციებუდით, ანტონიაშ ადგილს თქვა ქოჸოფედითკონ? გეგმირჩქინანდითო ლიბ ხასიათის? გაიჭირდუდესო თქვან დუდიშ გაკონტროლება? მუშო ოკო რაგად, თეცალ სიტუაციეფს ადვილ ვარე სიმშვიდეშ გიმორჩქინა. სტრესიშ ვარდა პროვოკაციეფიშ დროს მანგარ რთულ რე დუდიშ შეკება დო ლიბ ხასიათიშ გიმორჩქინა.

მარა ბიბლია მოუწოდენს ქრისტიანეფს, რდან ლიბ ხასიათიშ. სინამდვილეს ღორონთიშ სიტყვა ლიბ ხასიათის სიბრძნეს უკავშირენს. მოციქულ იაკობ იჩიებ: „მი რე თქვან შკას ბრძენი დო ოგინუნ ფერ? ქაძირუას მუშ საქმეეფი ჯგირ საქციელით დო სიბრძნეშ მაძირაფალ ლიბ ხასიათით“ (იაკ. 3:13). მუჭო შილებე ლიბ ხასიათ სიბრძნეშ მაძირაფალ რდას დო მუ მიმეხვარებუნა განვავითარათ ღორონთიშ მოსაწონ თე თვისება?

ლიბ ხასიათიშ გიმორჩქინას შეულებ დაძაბულ სიტუაციაშ განმუხტვა. „მშვიდ პასუხი გაჟღამებულ კოჩის აწყნარენს, მწარე სიტყვა პირიქით — ახანგენს“ (იგავ. 15:1).

დაძაბულ სიტუაციაშ დროს გაჟღამება დაჩხირს ბენზინ მიშაბენ თიცალ რე, მუშენდა თეთ ხოლო უმოსო იძაბებუ სიტაუცია (იგავ. 26:21). მარა, თეცალ დროს ლიბ ხასიათიშ გიმორჩქინას ხშირას ჯგირ შედეგი მოჸუნს. თეცალ საქციელს შეულებ გადაჩხირებულ კოჩი დამშვიდას.

ანტონიაქ თენა მუშ მაგალითშე დამტკიც. ჟიშე მოშინაფილ ოსურს ჩილამურეფქ ქელაჸუნ, მუჟამსით ანტონიაქ მშვიდას უპასუხ თის. თიქ ანტონიას უწუ, ნამდა ქიანაშ პრობლემეფი უღუდ, მუჭოთ პირად თეშ ოჯახის ხოლო. ანტონიას ქაშუ საშვალებაქ, ქუქადაქუკო თე ოსურს დო ბიბლიაშ გურაფა ხოლო ქუდუჭყუ თის. თე ირფელქ ანტონიაშ ლიბ ხასიათიშ დო მშვიდ პასუხიშ ჭყოლოფუათ იჸუ.

ლიბ ხასიათის ჩქინო ბედნერობა მოუღ. „ბედნერ რენა ლიბ ხასიათ უღუნან თინეფ, მუშენდა დემკვიდრენა დედამიწას“ (მათ. 5:5).

მუშენ რენა ბედნერ ლიბ ხასიათ უღუნან თინეფ? ართ დროს ფიცხ ხასიათ უღუდეს თინეფ ამდღა ბედნერეფ რენა, მუშენდა ლიბ ხასიათის გიმირჩქინანა. თინეფიშ ცხოვრებაქ გეუჯგუშ დო დარწმუნებულ რენა, ნამდა დიდებულ მომავალ ელუნა (კოლ. 3:12). ადოლფო, ნამუთ ესპანეთის რაიონულ ზედამხედველო მსახურენსინ, იშინანს მუნერ ცხოვრება უღუდ ჭეშმარიტებაშ გაგებაშახ.

„ჩქიმ ცხოვრებას აზრი ვა უღუდ“. ხშირას ვოდინუანდ დუდიშ კონტროლს დო თეცალ ფიცხ ხასიათიშ გურშენ, ნამთინე ჩქიმ მეგობარს ხოლო ოშკურუდ ჩქიმდა. არჩა ჩხუპიშ დროს ამშვშა მუმოგეს ხამუ დო სოდგარენ დობსკიდ, — იჩიებ თინა.

ამდღა ადოლფო სიტყვათ დო საქმეთ შხვეფს ოხვარ ლიბ ხასიათიშ გიმორჩქინას. ბრელს მოწონს თიშ ჯგირ ხასიათი. ადოლფო იჩიებ, ნამდა ამდღა ბედნერ რე, მუშ ცხოვრება დოთირუნ თიშენ. თინა იეჰოვაშ მარდულ რე, ნამუქით მეხვარ ლიბ ხასიათიშ გიმორჩქინას.

ლიბ ხასიათიშ გიმორჩქინათ იეჰოვას უხარენთ გურს. „სქუა, რდა ბრძენ დო გურ გამხარ, ნამდა პასუხი ქიმეფჩე სქან გიმაძიცალს“ (იგავ. 27:11).

სატანა გიაძიცანს იეჰოვა ღორონთის. თეცალ შეურაცხყოფაშ გურშენ ღორონთის ირნერ მიზეზი უღუ გენრისხას, მარა ბიბლია იჩიებ, ნამდა თინა „რისხვას ვაჩქარენს“ (გამ. 34:6). მუჟამსით ვოცადუთ, ნამდა ღორონთცალო ჩქი ხოლო ვეფჩქარათ განრისხება დო მიღუდან ლიბ ხასიათ, თეთ ვოძირანთ ღორონთიშ მოსაწონ სიბრძნეს (ეფეს. 5:1).

ამდღა ხშირას შეფხვადუთ დაძაბულ სიტუაციეფს. შილებე თიცალ კათაწკუმა ქუმაშუან საქმექ, ნამუთ რენა „მუნეფიშ დუდშა დაჯერებულეფ, ამაყეფი, ღორონთის ოგორანან ფერეფი . . . ტყურაშ ეკმაწამებელეფ, დუდ უშუკებუეფი დო სასტიკეფ“ (2 ტიმ. 3:2, 3). მარა თექ ვეცილას ოკო ქრისტიანეფს ლიბ ხასიათიშ გიმორჩქინას. ღორონთიშ სიტყვა მირაგადუნა, ნამდა „ჟიშენო მოურსინ ფერ სიბრძნე . . . მშვიდობიან რე დო ახასიათენს სიჭკვერა“ (იაკ. 3:17). მშვიდობიანეფ ქუვორეთ დო სიჭკვერას ქიგმიფრჩქინანთ-და, ვოძირანთ ნამდა მიღუნა სიბრძნე, ნამუთ ღორონთშე მოურს. თეცალ სიბრძნე, მოხვარა ლიბას უპასუხათ, მუჟამსით ოცადუნა ჩქინ პროვოცირებას; თეშ გარდა, უმოსო დევეახლოებუთ იეჰოვას, ნამუთ უსაზღვრო სიბრძნეშ წყარო რე.