ქიგეჩიებუთ, მუჭო მოხვად თექ. დებაბდ 1929 წანაშ 29 კვირკვეს, სოფელს, ნამუთ ბულაკანიშ (ფილიპინები) მხარეს რდუ. უბრალოთ ფცხოვრენდით, მუშენდა ეკონომიკურო მანგარო ჭირდ. ახალგაზრდა ვორდ, მუჟამსით, იაპონელეფიშ ჯარქ ფილიპინებშა გემშართ დო ჩხუპიქ ქიდიჭყ. მარა ჩქიმ სოფელ ჩხუპიშ ადგილშე შორს რდუ დო იშენდოიშენ ვამგინაფნა ჩხუპიშ სინწარე. ვამღუდეს რადიო, ტელევიზორ დო გაზეთეფი, თაშ ნამდა ჩხუპიშ გურშენ ახალ ამბეფს ართიანშე ბგებულენდით.

ბრუო და დო ჯიმაშე მა მაჟია ვორდი. ბრუო წანერ ვორდინ თეშ, ბებ დო ბაბუქ მუნეფჸურე მიდამიჸონეს ოცხოვრებშა. კათოლიკეეფ ვორდით, მარა ჩქიმ ბაბუს შხვა რელიგიეფ ხოლო ოინტერესუდ დო შხვადოშხვა რელიგიურ ლიტერატურას შაყარანდ, ნამუსით მეგობრეფ არზენდეს. ართშა ჩქიმ ბაბუქ ქუმოძირუ ბიბლია დო თეს გეძინელ, ბუკლეტეფ „დაცვება“, „უსაფრთხოება“ დო „გიმოარგამება“ ტაგალურ ნინაშა, * ნამუთ აარგამენდ ტყურა რელიგიაშ გურაფეფს. მა ინტერესით პკითხულენდ ბიბლიას, განსაკუთრებულო ოთხ სახარებას, ნამუთიქ მიმეხვარ, მივაჸუნკო იესოშ მაგალითის (იოან. 10:27).

1945 წანას იაპონელეფიშ ჯარქ ქიდიტუ ჩქინ ქიანა. მშობლეფქ მიწუეს ჸუდეშა დომრთინუდკო. ჩქიმ ბაბუქ ხოლო ელამიჩ, მიდამრთუმუდკო, თაშ ნამდა, ულა გეგნობჭყვიდი.

ჭიჭე ხანშა, 1945 წანაშ დეკემბერს ქალაქ ანგატშე ჩქინ სოფელშა იეჰოვაშ მოწმეეფიშ ჯგუფიქ ქუმორთ ოქადაქებშა. ჩქი ართ ხანშამიშულირ მოწმექ მიქადაქეს, ნამუთიქ ემინწყეს, მუს იჩიებ ბიბლია ბოლო დღალეფიშ გურშენ (2 ტიმ. 3:1—5). თიქ ქუდმაპეჯეს ბიბლიაშ ოგურაფშა, ნამუთ მეზობელ სოფელს იტარებუდ. ჩქიმ მშობლეფქ ვარია ქოთქვის ულაშე, მარა მა მიდაფრთ. თექ სოდგარენ 20 კოჩ რდუ შაყარელ დო თინეფშე ნამთინე ბიბლიაშ გურშენ კითხვეფს სვენდ.

მუდგას იჩიებდესინ, მუთუნს ვა ბგებულენდ, ათეშენ ულა გინობჭყვიდ. მარა თე დროს სამეფოშ ობირეშიშ ბირა ქიდიჭყეს. თე ობირეშიქ თიცალო ქიმმეწონ,  ნამდა გაფჩენდი. ბირაშ დო ლოცვაშ უკულ არძა ქუდმაპეჯეს კრებაშ შეხვალამაშა, ნამუთ უკულიან ჟეშხას, ქალაქ ანგატის იტარებუდ.

მუსხირენ კოჩიქ ართო აკიბშაყარით დო 8 კილომეტრ მიდაფრთით, ნამდა კრუზეფიშ ჸუდეს კრებაშ შეხვალამას დევესწრითკო. თექ 50 კოჩ ოსწრუდ, თინეფს ბაღანეფ ხოლო ოკათუდ. თე ბაღანეფ რთულ ბიბლიურ საკითხეფშენ კომენტარეფს იჩიებდეს. თეშ ძირაფაქ ჩქიმდე მანგარო იმოქმედ. მუსხირენ შეხვალამაშ უკულ ართ ხანშამიშულირ პიონერ ჯიმაქ, დამიან სანტოსიქ მუშ ჸუდეშა ქუდმაპეჯ. თინა ადრე ქალაქიშ მერ რდუ. თიმ სერს ქიანაშ ხანს იფჩიებუდით ბიბლიურ საკითხეფშე.

თიმ დროს ბრელ ადვილო ღებულენდ ჭეშმარიტებას. მუსხირენ კრებაშ შეხვალამაშ უკულ ჯიმალეფქ მიწუეს: „გოკონანო ნათუა?“. მა ხეთეშე ვუწი: „ქო, მა მოკო ნათუა“. მოკოდ ვემსახურკო ჩქიმ „ბატონს, ქრისტეს“ (კოლ. 3:24). 1946 წანაშ 15 თებერვალს, ჟირ კოჩიქ მალწყარს დიბნათით.

მუჭოთ ნათილ ქრისტიანეფს, ჯგირო მარჩქილედეს, ნამდა აუცილებერ რდუ მივაჸუნითკო იესოშ მაგალითის დო რეგულარულო იფქადაქითკო. თექ ვემეწონ ჩქიმ მუმას დო მიწუ: „სი მანგარ ჭიჭე რექ ქადაქებაშო. თეს გეძინელ, მალწყარშა ენულა ვა ნიშნენს, ნამდა მაქადაქებელ იჸუაფუქ“. მუაჩქიმს ვუწი, ნამდა ღორონთიშ ნება რე, იფქადაქათ სახიოლო ამბე სამეფოშ გურშენ (მათ. 24:14). თეს გეძინელ, თინა ხოლო გევუნწყ, ნამდა ღორონთწკუმა დოდვალირ პირობა ოკო შევასრულკო. ზუსტას ათე დროს მიწუ მუაჩქიმქ თი სიტყვეფ, ნამუთ სტატიაშ დაჭყაფუს მიფშინე. თის ვაკოდ იფქადაქიკო, ათეშენ გეგნობჭყვიდ ქიდიპტეკო ირფელ დო სულიერ მიზნეფ ქიგვორინეკო პირველ ადგილს.

კრუზეფიშ ოჯახიქ მიწუ, ნამდა შემლებუდ თინეფიშ ოჯახწკუმა ართო იფცხოვრიკო ქალაქ ანგატის. მა დო მუნეფიშ უკლაშ ძღაბ ნორას, თინეფ ხშირას მირაგადდეს, მიმსახურებდესკო პიონერეფო. ჩქი ჟირხოლოქ, 1947 წანაშ 1 ნოემბერს პიონერო ქიდიბჭყით მსახურება. ნორაქ შხვა ქალაქშა გეგნორთ, მა კინ ქალაქ ანგატის გუვაგრძელ მსახურება.

პიონერო მსახურება სუმ წანაშ დოჭყაფილ მაფუდ, მუჟამსით ფილიალშე ერლ სტიუარტიქ ქუმორთ დო ქალაქიშ მოედანს 500 კოჩის წოხოლე მოხსენებათ გეგშართ. თიქ მოხსენება ინგლისურ ნინაშა აკეთ. თიშ უკულ, მა ტაგალურ ნინაშა გინოფთარგმნ მოხსენებაშ მთავარ აზრეფი. გვალო შკვით კლას მაფუდ ნათებ, მარა მასწავლებელეფ ხშირას ინგლისურო მირაგადდეს. ნინაშ გურაფას თიქ ხოლო მიმეხვარ, ნამდა ტაგალურ ნინაშა ბრელ პუბლიკაცია ვამღუდეს, ათეშგურშენ თინეფს ინგლისურო პკითხულენდ. თაშ ნამდა, შემლებუდ თე მოხსენებაშ დო უმოს გვიანო შხვა მოხსენებეფიშ თარგმნუა.

ჯიმა სტიუარტიშ მოხსენება გინოფთარგმნინ თიმ დღას, თექიან კრებას თიქ უწუ, ნამდა ფილიალს ოკოდ, ართ ვარდა ჟირ პიონერ ჯიმაშ ბეთელშა მოწვიება. თინეფ საჭირო რდეს ბეთელს თი დროშახ, ონდო თექ მსახურენდესინ თი მისიონერეფი ვედირთუდეს კონგრესშე, ნამუთ 1950 წანას ნიუ-იორკის იტარებუდ. მოწვიებულ ჯიმალეფშე ართ-ართ მა ვორდი. თაშ ნამდა, კინ მაჸუ დატებელქ ნაჩინებ ტერიტორიაქ, მარა ასე თიშენ, ნამდა ბეთელს ქივმსახურკო.

1950 წანაშ 19 ივანობას ქუმოფრთ ბეთელშა დო ახალ დავალებაშ შესრულებას ქეშუდირთი. ბეთელიშ ოჯახიშ წევრეფ ცხოვრენდეს ართ დიდ დო ჯვეშ ჸუდეს, ნამუსით ართ ჰექტარ დიხას დიდ ჯალეფ გოჸუნდ. თაქ დაუქორწინებელ ჯიმალეფ მსახურენდეს. იალონშა ებდირთუდ დო სამზარეულოს ვოხვარუდი. ჩხორო საათშე სამრეცხაოს მუფშენდ დო მუკაქუნალეფს ვუნთანდი. ნაონდღერს კინ თე საქმეეფს ვორთუდი. საერთაშორისო კონგრესშე მისიონერეფიშ დორთაშ უკულ ხოლო ვაგრძელენდ ბეთელს მსახურებას. მა შხვადოშხვა საქმეს ვორთუდ: ოჯღონალო ჟურნალეფს ვახაზირენდ, ბღებულენდ შეკვეთეფს დო მიმღების მუფშენდი.

1952 წანას, მა დო ხოლო ამშვ პიროვნებას ფილიპინებშე მოწვევაქ ქუმომრთეს გალაადიშ სკოლაშ მა-20 კლასშა. შეერთებულ შტატეფს ბრელ მუთუნ ახალ დო უცხო რდუ ჩქინო. თაქიანობა შუროთ ვა გუდ ჩქინ ჭიჭე სოფელს.

მაგალთო, ოგურაფალქ მაჸუეს, მუჭო გიმიბრინეთკო ელექტრო ტექნიკა დო შხვა მუდგარენეფ, ნამუთ ჩქინო უჩინებ რდუ. არძაშ უმოს განსხვავებულ ჩქინო ამინდ რდუ. ართ ოჭმარეს გალე გეგმოფრთ დო  ირფელქ გინორჩიალებურქ ქუდოფხვად. ჩქიმ ცხოვრებას თირ პირველო ბძირ. უკულ ქიბგინ, ნამდა ჩხურ რდუ, სანწალე ჩხურ!

მარა თე ირფელ მუთუნ ვარდ თი კურთხევეფიშ კარს, ნამუთ გალაადიშ სკოლაშ გურაფაშ დროს მიღუდ. ჩქინ მასწავლებერეფ გურაფაშ დროს ეფექტურ მეთოდეფს გიმირინუანდეს. ქიდიბგურეთ საკითხეფიშ უჯგუშო გიმორკვიება. გალაადიშ გურაფაქ მიმეხვარ სულიერო წიმი ულას.

სკოლაშ თებაშ უკულ დროებით დაბნიშნეს სპეციალურ პიონერო ბრონქსის (ნიუ-იორკი). ათეშენ 1953 წანაშ ზარხულს დევესწრ კონგრესის „ახალ ქიანაშ საზოგადოება“, ნამუთ თე ქალაქის ჩეტარ. კონგრესიშ უკულ კინ ფილიპინებშა დიბრთი.

ფილიალს მსახურენდესინ თი ჯიმალეფქ მიწის: „ასე დრო რე სარაიონო მსახურებას ქეშუდირთე“. თენა მუჩანდ საშვალებას, მივაჸუნკო იესოშ მაგალითის, ნამუთ დაშორებულ ქალაქეფშა დო სოფელებშა გილეშ დო ოხვარუდ იეჰოვაშ შხურეფს (1 პეტ. 2:21). რაიონულ ზედამხედველო დაბნიშნეს ლუსონიშ ცენტრალურ ნაწილს, ნამუთ ფილიპინებიშ არძაშ უდიდაშ კუნძულ რე. თიშა მიშურს ბულაკანიშ, ნუევა ესიხაშ, ტარლაკიშ დო ზამბალესიშ პროვინციეფი. ნამთინე ქალაქშა ქიმეფრთიკონ, სიერა-მადრეშ გვალეფ მაფუდ გინაულარი. თი ადგილეფშა დიდ მანქანეფიშ მეტ მუთუნნერ ტრანსპორტ ვეგლეშ. თინეფს ჯიკეფ გინმუღდეს დო შოფერეფს ფთხულენდ, ჯიკეფშა გეხუნაშ ნება ქომჩესკო. ხშირას თინეფ ვარიას ვამრაგადუდეს, მარა თეცალ ტრანსპორტით ულა, იშენდოიშენ მოხუჯურ ვა რდუ.

თექიან კრებეფიშ უმენტაშ ახალ გონწყუმილ რდუ დო ბრელ ხალხ ხოლო ვეგლეშ. ჯიმალეფ მანგარო აფასენდეს, ნამდა ვოხვარუდ თინეფს კრებაშ საქმეეფიშ ორგანიზებას დო მსახურებას.

უმოს გვიანო ახალ რაიონშა, ბიკოლიშ მხარეშა გეგნომჸონეს. თე მხარეშა მიშეშ დაშორებულ ტერიტორიეფი. თექ სპეციალურ პიონერეფ თიცალ ადგილეფს ქადაქენდეს, სოდეთ მითინს ვაფუდ ნაქადაქეფი. თექ ხალხ ჯგირ პირობეფს ვა ცხოვრენდ. მაგალთო, ართ ჸუდეს დიხა აფდეს ეშანთხორილ დო მელე-მოლე ჟირ ფიცარია გეუძუდეს. თეს ტუალეტო გიმირინუანდეს. ართშა მუჭოთ თე ფიცარიას კუჩხ ქიგებდგინ, თიქ თხორილს ქინოლ დო მახოლო ქინვაჸუნი. გვარიან ხანქ დემესაჭირ, გიბომნიკო დო დუდ გეფსუფთეკო.

თექ მსახურებაშ დროს ქიდიპჭყ ნორაშე ფიქრი. თიქ პიონერობა ბულაკანს დიჭყ. ასე ნორა ქალაქ დუმაგეტის მსახურენდ სპეციალურ პიონერო. მა თიშ ოძირაფშა მიდაფრთ. თეშ უკულ ჭიჭე ხანს ქოპჭარუნდით ართიანს წერილეფს დო 1956 წანას დეფქორწინით. ქორწინებაშ პირველ მარას კუნძულ რაპუ-რაპუს კრებაშ მონახულება მიღუდ. თექ გვალეფშა  კუჩხით მაფდეს ეკაულარ დო შხვა ადგილეფშა ხოლო ბრელს გილეფშით. მარა ჩქინო დიდ ხიოლ მოუღუდ და დო ჯიმალეფწკუმა ართო დაშორებულ ადგილეფს მსახურებას.

რაიონულ ზედამხედველო სოდგარენ ოთხ წანაშ მსახურებაშ უკულ ბეთელშა ქუდომძახეს. თაშ ნამდა, 1960 წანაშე თექ ქიდიპჭყით მსახურება. ბრელ მუთუნ დუმოგურუ თი ჯიმალეფწკუმა მსახურებაქ, მიდგას დიდ პასუხიშმგებლობეფ უღუდ. ნორა შხვადოშხვა საქმეს ორთუდ ბეთელს.

თექ მსახურებაშ დროს ჩქიმ თოლო ვორწყედ, მუჭო მიშ ფილიპინებს სულიერ რდუალა. მუჟამსით ბეთელს პირველო მსახურება დიპჭყინ, თე ქიანას სოდგარენ 10 000 მაქადაქებელ რდუ. მარა ამდღა თექ 200 000-შე უმოს მაქადაქებელ მსახურენს დო ოშობით ბეთელელ ხუც უკინენს ქადაქებაშ საქმეს.

დროშ მიკულაწკუმა ართო, საქმე იძინანდ დო ბეთელიშ შენობეფ ვა რდუ დასაბაღ. ათეშენ ხემძღვანელ საბჭოქ დუმავალეს თიცალ ადგილიშ გორუა, სოდეთ დიდ შენობაშ გედგუმა შემალებედეს. მა დო ართ ჯიმა, ნამუთ ბეშტუაშ საქმეს ზედამხედველენდუნ, ფილიალიშ შენობაშ გოხოლუას კარდოკარ გილეფშით დო მახორუეფს ვოკითხუდით, ხომ ვეგმოჩანდეს მუნეფიშ დიხას. თექ ბრელ ჩინელ ცხოვრენდ დო არძა ვარიას იჩიებუდ გიმოჩამაშე. ართ მახორუქ მიწის: „ჩინელეფ ვეგმოფჩანთ, ჩქი პჸიდულენთ“.

მარა ართ დღას ართ-ართ მახორუქ პკითხეს, ხომ ვა მოკოდეს დიხაშ ჸიდირ, მუშენდა ამერიკაშა აპირენდ გინულას. თეს შურო ვეველუდითინ ფერ ამბექ ქუმაჸუნ: ხოლო ართ მეზობელქ გეგნოჭყვიდ დიხაშ გიმოჩამა დო შხვეფს ხოლო ურაგადუდ, თაშ გუკეთებდესკო. თი კოჩშე ხოლო ქიპჸიდით დიხა, ნამუთ მირაგადდეს: „ჩინელეფ ვეგმოფჩანთ“. ჭიჭე ხანშა ფილიალიშ ტერიტორიაქ რდუნ თიშე სუმ თისხით ქიმიძინ. დარწმუნებულ ვორექ, იეჰოვას ოკოდ თენა თაშ ჸოფედკო.

1950 წანას ბეთელიშ ოჯახის არძაშ უმოს ახალგაზრდა წევრ ვორდი. მარა ასე მა დო ჩქიმ ოჯახობა არძაშ უხანაშეფ ვორეთ. ართ წუთის ხოლო ვამნარღენქ, ნამდა ქრისტეშ მოჩამილ არძა დავალებას ვასრულენდ. მართალ რე, მშობლეფქ ჸუდეშე გეგნობრაჸეს, მარა იეჰოვაქ თანამორწმუნეეფიშ დიდ ოჯახ ქუმაჩუქ. შუროთ ვამოეჭვ, იეჰოვა მუთ მოსაჭირნან, ირფელს ქომჩანა, ნამდა თიშე მოჩამილ დავალებეფ შევასრულათ. მა დო ნორა მარდულეფ ვორეთ იეჰოვაშ მოჩამილ კურთხევეფშე დო მოკონა შხვეფქ ხოლო გამორსან თენა მუნეფიშ დუდშა (მალ. 3:10).

იესოქ ფარაშ ემაშაყარალ მათეს უწუ: „ქეკმაჸუნი“. მუჭო მიქცუ თიქ? ბიბლია მირაგადნა: „თიქ ხოლო ირფელ მიოტუ, გედირთ დო ქეკაჸუნ თის“ (ლუკ. 5:27, 28). მა ხოლო თაშ ვაკეთ დო შხვეფს ხოლო ვურაგადუქ, თეშნერო მიქცუან დო გამორსან თი კურთხევეფ, ნამუთ თეს მოჸუნს.