„მა ხოლო მიღ ღორონთიშ იმენდი“
„უკანასკნელ ადამი — სიცოცხლეშ მუმაჩამალი“ (1 კორ. 15:45).
ობირეშეფი: 111, 12
1-3. ა) მუ რე ჩქინ რელიგიაშ ართ-ართ მთავარ გურაფა? ბ) მუშენ რე ღურელეფიშ გათელებაშ გურშენ გურაფა მნიშვნელოვანი? (ქოძირით სურათი თე გვერდის).
მუჭო უპასუხენდით პიროვნებას, მით გოკითხნა: „მუ რე სქან რელიგიაშ მთავარ გურაფეფი?“. მუშო ოკო რაგად, ქუწინდით, ნამდა იეჰოვა რე გუმაჭყაფალ დო სიცოცხლეშ მუმაჩამალ, რწანა ქრისტეშ, ნამუთიქ ჩქინ გურშენ ღურ. თის ხოლო ქიგუძინანდით, ნამდა დედამიწას მარადიულ სიცოცხლე მელნა, სოდეთ ღორონთიშ ხალხი ბედნერო იცხოვრენს. მარა ქიმიშინუანდითო ღურელეფიშ გათელებას, ნამუთ ართ-ართ გურიშ ემაკინალ გურაფა რე?
2 შილებე მიღდან იმენდ, ნამდა დიდ გასაჭირს ვა ბღურუთინ თეშ გეგნიბღანთ დო დედამიწას მარადიულო იფცხოვრენთ. ათეშენ შილებე დიდ ყურადღება ვემვაქცუათ ღურელეფიშ გათელებაშ ბიბლიურ იმენდის. მარა თეშ უმკუჯინუო, იშენით მნიშვნელოვანო ოკო მიფრჩქინათ თე გურაფა. მოციქულ პავლეშ სიტყვეფშე თენა ჯგირო იძირე: „ღურელეფიშ გათელება ვა რენ-და, ვართ ქრისტე გათელებე“. იესო ვა გათელებენ-და, გიშმურს, თინა ვა ჸოფე ჩქინ მეფე დო თიშ მართველობაშ გურშენ ჩქინ გურაფეფ, პოტიკ რე (წეკითხით 1 კორინთელები 15:12—19). * ჩქი ბჯერა, ნამდა იესოქ დასურო გეთელ დო ვაბგუთ სადუკეველეფს, მიდგას ვა წანდეს ღურელეფიშ გათელებაშ. შილებე ნამთინე გუმოძიცანდან, მარა ჩქი იშენით მიღნა თეშ იმენდი (მარ. 12:18; საქ. 4:2, 3; 17:32; 23:6—8).
3 პავლექ თქუ, ნამდა „ქრისტეშ გურშენ მთავარ გურაფეფ“ შქას ღურელეფიშ გათელება ართ-ართ მნიშვნელოვან გურაფა რე (ებრ. 6:1, 2). თის წანდ, ნამდა თენა დასურო ქიჸუაფუდ (საქ. 24:10, 15, 24, 25). ბიბლია ღურელეფიშ გათელებას მიშინუანს, მუჭოთ „ღორონთიშ წმინდა სიტყვეფიშ საფუძვლეფს“, ნამუთ დიო ხოლო ბიბლიაშ გურაფა დიბჭყითინ თი დროს გებგით. მარა ჩქი იშენით უმოს მეტიშ გაგება მოსაჭირნა თეშ გურშენ (ებრ. 5:12). მუშენ რე თენა საჭირო?
4. მუ კითხვეფქ შილებე წიმიჭკირას?
4 ბიბლიაშ მაგურაფალეფ გურაფაშ დოჭყაფაშ დროს გებულენა ჯვეშ დროს მოხვალამირ ღურელეფიშ გათელებაშ შემთხვევეფიშ გურშენ, მუჭომით რე ლაზარეშ შემთხვევა. თეს გეძინელ, თინეფ გებულენა, ნამდა ღორონთიშ ართგურ მსახურეფს აბრაამს, იობის დო დანიელს უღდეს იმენდ, მომავალს ღურელეფიშ გათელება იჸუაფუდუნ. მარა მუ პასუხის მეჩანდით პიროვნებას, მით გოკითხნა: მუშენ რჯერა საუკუნეეფიშ წოხოლე რაგადებულ თე დუნაპირებუშ? ქიჩიებნო ბიბლია მუჟამ იჸუაფ ღურელეფიშ გათელება? თე კითხვეფიშ პასუხეფ გამანგარენს ჩქინ რწმენას.
გათელება საუკუნეეფიშ უკულ
5. მუ მხარეთ გუვარჩიენთ გურაფას ღურელეფიშ გათელებაშ გურშენ?
5 ალბეთ უმოს ადვილ რე თიშ წარმოდგენა, მუჭო შილებე დართას სიცოცხლექ კოჩის, ნამუთიქ ბრელ ხან ვა რე ღურუნ, მუშენდა ბიბლიას თეცალ შემთხვევეფ მოშინაფილ რე (იოან. 11:11; საქ. 20:9, 10). მარა მუ შილებე ფთქუათ ღურელეფიშ გათელებაშ გურშენ დუნაპირებშე, ნამუთიქ მომავალს, წანეფიშ ვარდა საუკუნეეფიშ უკულ ოკო შისრულას? შემლებნანო ბჯერდან საუკუნეეფიშ წოხოლე ღორონთიშ დოდვალირ პირობაშ, ნამუთ ღურელეფიშ გათელებას ოხუ? ქორჯერანო, ნამდა ასერდე ნაღურა კათაწკუმა ართო, თინეფ ხოლო გეთელებნა, მიდგაქ ბრელ ხანიშ წოხოლე ღურეს? ფაქტიურო, ჩქი არძას ბჯერა, ღურელიშ გათელებაშ ართ შემთხვევაშ, ნამუთიქ წინასწარმეტყველებაშ რაგადშე საუკუნეეფიშ უკულ შისრულ. ნამ შემთხვევა რე თენა? მუჭო ოხუ თინა ღურელეფიშ გათელებას, ნამუსით მომავალს ველუთ?
6. მუს იჩიებ 118 ფსალმუნ იესოშ გურშენ?
6 გუვარჩუათ ღურელიშ გათელებაშ თე შემთხვევა, ნამუთ 118 ფსალმუნს საუკუნეეფით ადრე რდუ ნაწინასწარმეტყველეფი. საეგებიოთ, თე ფსალმუნ დავითიშ ნაჭარა რე. თექ პკითხულენთ: „იეჰოვა, ქორთხინთ, მირსხით! . . . კურთხეულ რდას თინა, მით იეჰოვაშ სახელით მოურს!“. ხალხი მესიაშ გურშენ ნაჭარა თე სიტყვეფს იმეორენდ, მუჟამსით 9 ნისანს, ღურაშე მუსხირენ დღათ ადრე, იესოქ იერუსალიმშა მინორთ (ფსალმ. 118:25, 26; მათ. 21:7—9). მუს იჩიებ 118 ფსალმუნ ღურელიშ გათელებაშ ართ შემთხვევაშე, ნამუთიქ საუკუნეეფიშ უკულ ოკო მოხვადკო? ყურადღება ქიმიაქცით ხოლო მუ წინასწარმეტყველება რე მოჩამილ თე ფსალმუნს: „მაშენებელეფიშ დაწონებულ ქუაქ კუნთხუშ დუც გიოდვალარ ქუათ გინირთ“ (ფსალმ. 118:22).
„მაშენებელეფქ“ ვარია ქოთქუეს მესიაშე (ქოძირით აბზაცი 7)
7. მუჭო მექცის იუდეველეფქ იესოს?
7 „მაშენებელეფქ“, ნამუთ იუდეველ წინამძღოლეფ რდესინ, ვემიღეს მესია. თენა იესოშ გურშენ ვარიაშ რაგადშე მეტის ნიშნენდ. იუდეველეფიშ უმენტაშ თიშ ჸვილუას ითხინდ (ლუკ. 23:18—23). მუშო ოკო რაგად, იესოშ ღურა თინეფიშ კისერს რე.
გათელებულ იესოქ „კუნთხუშ დუც გიოდვალარ“ ქუათ გინირთ (ქოძირით აბზაცეფი 8, 9)
8. მუჭო იჸუაფუდ იესო „კუნთხუშ დუც გიოდვალარ ქუა“?
8 იესოს დოჸვილუნდეს-და, მუჭო იჸუაფუდ თინა „კუნთხუშ დუც გიოდვალარ“ ქუა? თენა ხვალე თიმწკუმა შისრულებუდ, მუჟამსით ქრისტე გეთელებუდ. იესოქ ხოლო გეგმაარგამ თენა, მუჟამსით მაგალით ქიმიჸონ ართ პიროვნებაშ გურშენ, ნამუსით დიხაშ დიდ ნოკვეთ უღუდ. თიქ კათა ქიმუშქვ მუშ დიხას ამუშენდესინ თი მუშეფს. თინეფქ გლახათ მექცის მოშქუმალირ კათას. საბოლათ, დიხაშ ნოკვეთიშ მინჯექ მუშ ქომოლსქუა მიდაშქვ თი იმენდით, ნამდა თის ვარა ქოცენდეს პატის. მარა მუშეფქ თინა დოჸვილეს. თე მაგალითიშ უკულ იესოს მოჸუნს ფსალმუნიშ 118:22 მუხლის მოჩამილ წინასწარმეტყველება (ლუკ. 20:9—17). მოციქულ პეტრექ ხოლო ზუსტას თე წინასწარმეტყველება მიშინუ, მუჟამსით აკოშაყარელ მართველეფიშ, უხუცესეფიშ დო მწიგნობარეფიშ წოხოლე გერდ. პეტრე იჩიებუდ ნაზარეთელ იესო ქრისტეშ სახელით, ნამუთ იუდეველეფქ ქიმკაჭკადეს ბოძის, „მარა ღორონთიქ გათელ თინა“. საბოლათ თიქ თქუ: «თინა რე „ქუა, ნამუთ თქვა, მაშენებელეფქ მუთუნო ვემირჩქინით, მარა კუნთხუშ დუც გიოდვალარ ქუათ გინირთ“» (საქ. 3:15; 4:5—11; 1 პეტ. 2:5—7).
9. მუს ოძირანდ ფსალმუნიშ 118:22-ს ინოჭარილ წინასწარმეტყველება?
9 ოშობით წანათ წოხლე ფსალმუნიშ 118:22-ს ინოჭარილ წინასწარმეტყველება ოძირანდ, ნამდა ღურელიშ გათელებაქ ოკო მოხვადკო. მესიას ვემიღენდეს დო დოჸვილუნდეს, მარა თის ღორონთ გათელენდ დო თინა კუნთხუშ დუც გიოდვალარ ქუათ გინირთუდ. გათელებაშ უკულ იესო იჸუაფუდ თინა, მიდგაშე მიშ რსხება, „მუშენდა ვა არსებენს ცაშ თუდო ხალხშა მეჩამილ შხვა სახელი, ნამუთ გინმოსქილიდუანა“ (საქ. 4:12; ეფეს. 1:20).
10. ა) მუ რდუ ნაწინასწარმეტყველებ ფსალმუნიშ 16:10-ის? ბ) სოვრეშე მიჩქნა, ნამდა ფსალმუნიშ 16:10-ის დავითიშ გურშენ ვემურს ჩიება?
10 გუვარჩუათ ხოლო ართ მუხლი, სოდეთ კინ თე მოვლენა, ანთასობით წანაშ წოხოლე რდუ ნაწინასწარმეტყველეფი. თენა რწმენას მიმანგარენა, ნამდა მომავალს ღურელეფიშ გათელება იჸუაფ. მა-16 ფსალმუნს დავით ჭარუნს: „სი ვა დომტენქ სამარეს დო მუთუნფერო ვა ქიმინუნქ, სქან ართგურქ სასაფლა ქოძირას“ (ფსალმ. 16:10). თე სიტყვეფ დავითის მუშ დუდშე ვა უთქუალ. თის უჩქუდ, ნამდა დოღურუდ დო შხვეფცალო სამარეშა მიდეშ. ღორონთიშ სიტყვა არგამათ იჩიებ, ნამდა დავითიქ დირჩინ დო დოღურ. ბიბლიას პკითხულენთ: „დასაფლეს თინა მუშ ჯვეშეფიშ გვერდით დავითიშ ქალაქის“ (1 მეფ. 2:1, 10). საინტერესო რე, მიშ გურშენ მეურს რაგად ფსალმუნიშ 16:10-ის?
11. მუჟამ გარჩუ პეტრექ ფსალმუნიშ 16:10-ს ინოჭარილ სიტყვეფი?
11 თე ფსალმუნიშ ჭარუაშე ანთას წანაშ მიკულაშ უკულ პეტრექ გენწყ მიშ გურშენ მიშ ჩიება ფსალმუნიშ 16:10-ის. ქრისტეშ ღურაშე დო გათელებაშე მუსხირენ მარაშ უკულ, პეტრექ თე საკითხ ანთასობით იუდეველს დო პროზელიტის ეუნწყ (წეკითხით საქმეები 2:29—32). * თიქ მიშინუ დავითი, ნამუთიქ დოღურ დო დონთხორეს. პეტრეს ურჩქილედესინ თინეფს თე ამბე უკვე უჩქუდეს. ბიბლიას სოთინ ვა ჭარ, ნამდა თინეფქ ვედეთანხმეს პეტრეშ ნარაგადის: „[დავითიქ] წინასწარ ქოძირ დო თქუ, ნამდა ქრისტე გეთელებუდ“.
12. მუჭო შისრულ ფსალმუნიშ 16:10-ის ინოჭარილ სიტყვეფქ დო მუჭო მარწმუნენა თენა, ნამდა მომავალს ღურელეფიშ გათელება იჸუაფ?
12 პეტრექ მუშ მსჯელობა განამტკიც ფსალმუნიშ 110:1-ის ენოჭარილ დავითიშ სიტყვეფით (წეკითხით საქმეები 2:33—36). * თიქ თიცალ მუხლეფ ქიმიჸონ, მუდგაქ შაყარელ ხალხის მეხვარ თიშ დაჯერებას, ნამდა იესო რდუ „უფალ დო ქრისტე“. თინეფქ ქიმეხვადეს, ნამდა ფსალმუნიშ 16:10-იქ შისრულ თი დროს, მუჟამსით ღორონთიქ გათელ იესო. უმოს გვიანო, პავლე მოციქულქ ხოლო თე მტკიცებულება მიჸონ, მუჟამსით პისიდიაშ ქალაქ ანტიოქიას იუდეველეფს უქადაქუდ. თექ მანგარო იმოქმედ თინეფწკუმა დო უმოს მეტიშ გაგებაქ ქუმაკორინეს (წეკითხით საქმეები 13:32—37, 42). * იესოშ გათელებაშ გურშენ ბიბლიურ წინასწარმეტყველებეფქ შისრულ, თიშ უმკუჯინუო, ნამდა საუკუნეეფით ადრე რდუ ჭარილი. თეშ რჩქინაქ ჩქი ხოლო ოკო გამმანგარან რწმენა.
მუჟამ იუჸაფ ღურელეფიშ გათელება?
13. მუ კითხვაქ შილებე წიმიჭკირას ღურელეფიშ გათელებაშე?
13 ჩქინო გურიშ ემაკინალ რე თიშ რჩქინა, ნამდა საუკუნეეფით წოხლე ნაწინასწარმეტყველებ ღურელეფიშ გათელება მომავალს შისრულებ. მარა შილებე მითინქ იშენით ქიკითხას: ბრელ ხანს მაჸინო ოჯინე, სოიშა ჩქიმ საჸოროფო პიროვნებას ბძირუნქ? მუჟამ იჸუაფ ღურელეფიშ გათელება? იესოქ მუშ მოციქულეფს უწუ, ნამდა რდუ თიცალ საკითხეფ, ნამუთ თინეფს ვა უჩქუდეს დო ვართ გაგებედეს. იესოქ თინეფს უწუ: „დროეფ დო ვადეფ . . . მუმაშ ძალაუფლებას რე“ (საქ. 1:6, 7; იოან. 16:12). მარა თენა თის ვა ნიშნენს, ნამდა შურო მუთუნნერ ინფორმაცია ვამღუნა, მუჟამ იჸუაფ ღურელეფიშ გათელება.
14. მუ განსხვავება რე იესოშ გათელება დო თი კათაშ გათალება შკას, მიდგაქ თიშ ღურაშახ გეთელეს?
14 თეს უჯგუშო ქინვანჭათინ, ქიგიფშინათ ღურელეფიშ გათელებაშ მუსხირენ შემთხვევა, ნამუთ ბიბლიას რდუ ნაწინასწარმეტყველეფი. არძაშ უმოს მნიშვნელოვან, მუშო ოკო რაგად, იესოშ გათელება რე. თინა ვა გათელებედკონ, ვა მაღვენდეს თიშ საშვალება, კინ ქობძირითკო ჩქინ საჸოროფო პიროვნებეფი. მაგალთო, ელია დო ელისეშ გუნათელებ კათაქ, დრო ხანიშ უკულ კინ დოღურეს დო თინეფიშ სხეულქ დოჸორდ. თინეფიშ გინაწონს იესოშ სხეულ ვაჸორადე. ბიბლიას ჭარ, ნამდა გათელებულ იესო დღას „ვა ღურუ, ღურა უკვე ვა უნჩაშენს თიშა“. თინა ზეცას რე დო მარადიულო იარსებენს (რომ. 6:9; გამოცხ. 1:5, 18; კოლ. 1:18; 1 პეტ. 3:18).
15. მუშენ რე მნიშვნელოვან, ნამდა იესო „პირველ ნაყოფი“ რე?
15 იესო რდუ პირველ, მიდგაქ ზეციურ ცხოვრებაშო გეთელ დო თენა მნიშვნელოვან რე (საქ. 26:23). იესოწკუმა ართო ზეციურ ცხოვრებაშო შხვეფ ხოლო გეთელებუდეს. იესოქ დარწმუნ მუშ ართგურ მოციქულეფ, ნამდა მუწკუმა ართო იმეფენდეს ზეცას (ლუკ. 22:28—30). თე ჯილდოშ მიოღებელო, თინეფქ აუცილებერო ოკო დოღურესკო. თეშ უკულ ქრისტეცალო, თინეფ ხოლო სულიერ სხეულით გეთელებდეს. პავლექ ჭარ, ნამდა ქრისტექ გეთელ დო თინა რდუ „ღურაშ ლურით მიკორულაფირეფშე პირველ ნაყოფი“. თიშ ოძირაფალო, ნამდა ზეციურ ცხოვრებაშო შხვეფ ხოლო იჸუაფუდეს გათელებურინ, პავლექ გეუძინ: „არძა მუშ წეს დო რიგით: დიო ქრისტე, პირველ ნაყოფი, უკულ ხოლო თინეფ, მით ქრისტეშ რენა — მუჟამსით თინა მოულირ იჸუაფ“ (1 კორ. 15:20, 23).
16. სოვრეშე მიჩქუნა, მუჟამ ოკო დიჭყუკო ზეციურ გათელებაქ?
16 პავლეშ სიტყვეფშე იძირე, მუჟამ დიჭყაფუდ ზეციერ გათელება. თიქ ოკო დიჭყუკო, მუჟამსით იესო მეფეთ გინირთუდ. იეჰოვაშ მოწმეეფს დიდ ხან რე ბიბლიაშე უჩქნა, ნამდა ქრისტეშ მეფობაქ 1914 წანას დიჭყ დო თე უბადო ქიანაშ მოსპუალა კარს რე მონჭაფილი.
17, 18. მუ ელნა თი ცხებულეფს, მით დიდ გასაჭირს ცოცხალეფ მიოჭირინუანა?
17 ბიბლია ხოლო უმოს მეტის იჩიებ ზეციურ გათელებაშე: „მოკონა გიჩქუდან ღურაშ ლურით მიკორულაფირეფშენ . . . ქობწანა იესოქ დოღურ დო გეთელ-და, თიმწკუმა თინეფს ხოლო, მით ღურაშ ლურით ქიმკირულეს . . . ღორონთ ქიმიჸონანს თიწკუმა ართო . . . ჩქი მით ცოცხალო დოფსკიდუთ თი დროშა, მუჟამსით უფალ მოულირ იჸუაფ, ვა მაჭიშენა ღურაშ ლურით მიკორულაფირეფშა, მუშენდა უფალ ზეცაშე გეგმურს დო ქოზოჯუნს . . . დო თინეფ, მით ქრისტეწკუმა ართობას ღურესინ, პირველეფ გეთელებნა. უკულ ჩქი ხოლო, ცოცხალო დოსკილადირეფ თინეფწკუმა ართო იპჸუაფუთ მუნაფაშა ეშაჸონაფილ, ნამდა უფალს ქეწვაზადათ ჰაერს, ნამუშ უკულ ირიათო უფალწკუმა იპჸუაფუთ“ (1 თეს. 4:13—17).
18 ზეციერ გათელებაქ ქრისტეშ მეფობაშ დოჭყაფაშე ჭიჭე ხანშა ქიდიჭყ. თი ცხებულეფ, მით დიდ გასაჭირს ცოცხალეფ მიოჭირინუანან, „მუნაფაშა ეშაჸონაფილ“ იჸუაფნა (მათ. 24:31). მუს ნიშნენს თენა? თინეფ „ღურაშ ლურით“ ვედირულუანა თი გაგებათ, ნამდა ღურაშ უკულ ბრელ ხანს ვაჸინა ოჯინე, მუშენდა „თოლიშ გოვალაფაშა ბოლო საყვირიშ ხონარიშ დროს“ დითირნა დო ზეცაშა იჸუაფნა „ეშაჸონაფილ“ (1 კორ. 15:51, 52).
19. მუ რე „უჯგუშ გათელება“?
19 ამდღა ბრელ ართგურ ქრისტიან ცხებულ ვა რე, ათეშენ ქრისტეწკუმა ართო ვემეფენა ზეცას. თინეფ უჯინენა „იეჰოვაშ დღას“, მუჟამსით ბოლო მეღებუ უბადო ქიანას. მითინს ვა უჩქუ, მუჟამ მოხვადუ თენა, მარა ფაქტეფ ოძირანს, ნამდა ხოლოს ვორეთ თე დღაწკუმა (1 თეს. 5:1—3). თეშ უკულ, სამოთხეთ გინორთელ დედამიწას ქიდიჭყაფუ ღურელეფიშ გათელება. გათელებურეფს საშვალება აღვენნა სრულყოფილებას ქიმიოჭირინუან დო დღას ვა ღურან. თენა დასურო, „უჯგუშ გათელება“ იჸუაფ, ვინემ ჯვეშ დროს მოხვალამირ გათელებაშ შემთხვევეფი (ებრ. 11:35).
20. მუშენ შემლებნა ბჯერდან, ნამდა ღურელეფიშ გათელება მუშ წეს დო რიგით მოხვადუ?
20 ბიბლიას ჭარ, ნამდა ზეციურ გათელება მუშ წეს დო რიგით მოხვადუ (1 კორ. 15:23). ათეშენ შემლებნა ბჯერდან, ნამდა გათელება დედამიწას ხოლო წეს დო რიგით იჸუაფ. შილებე მოინტერესდან: ქრისტეშ ანთას წანიან მეფობაშ დაჭყაფუს დიო ბოლოს ნაღურა კათა ხომ ვეგეთელებუ, ნამდა მიდგაინქ ქიჩინას თინეფი? ხომ ვეგეთელებნა შხვეფშე უმოს ადრე ჯვეშ დროს ნაღურა თი ართგურ მსახურეფ, მიდგასით ხემძღვანელობაშ უნარ უღდეს, ნამდა მონაწილება მიღან ღორონთიშ ხალხიშ ორგანიზებას ახალ ქიანას? მუშ რაგად შილებე თი კათაშე, მით ვამსახურდეს იეჰოვას? მუჟამ გეთელებნა თინეფი? სიმართლე ქოფთქუათინ, ქორენო საჭირო ზედმეტ წუხება თე კითხვეფშე? ხომ ვაუჯგ ქიბჯინათ დო ჩქინ თოლო ქობძირათ თე ირფელი? მართალო სარკო იჸუაფ თიშ ძირაფა, მუჭო აკეთენს თეს იეჰოვა.
21. მუშ იმენდის მარზენა ღორონთი?
21 თე დროშ მულაშახ, იეჰოვაშ რწმენა ოკო გემამგარათ. ღორონთიქ დემეპირეს, ნამდა თინეფ, მით თიშ მეხსიერებას რენან, აუცილებერო გეთელებნა (იოან. 5:28, 29; 11:23). იესოქ ართშა თქუ, ნამდა აბრაამი, ისაკი დო იაკობი ღორონთიშ თოლს „ცოცხალეფ რდეს“. თეთ ქაძირუ, ნამდა იეჰოვას შეულებ ღურელეფიშ გათელება (ლუკ. 20:37, 38). ჩქი ხოლო მიღნა თიშ მიზეზი, ნამდა პავლეცალო ფთქუათ: „მიღ ღორონთიშ იმენდი, ნამდა იჸუაფ ღურელეფიშ გათელება“ (საქ. 24:15).
^ აბზ. 2 1 კორ. 15:12—19: 12 ქრისტეშ გურშენ ქოქადაქენა გეთელუა-და, მუჭო იჩიებ თქვანდე ნამთინე, ვა რენია ღურელეფიშ გათელება? 13 ვა რე ღურელეფიშ გათელება-და, ვართ ქრისტე გათელებე, 14 ქრისტე ვა გათელებე-და, ჩქინ ქადაქება დო რწმენა ხოლო პოტიკ ჸოფე. 15 ღურელეფ დასურო ვეგეთელებნან-და, ჩქი ღორონთიშ გურშენ ტყურაშ მარაგადეეფ გიშმურთ, მუშენდა ღორონთიშ წინააღმდეგ ვამოწმენთ, ნამდა თიქ გათელ ქრისტე, ნამუთ ვა გუთელებ, 16 მუშენდა ღურელეფ ვეგეთელებნან-და, ვართ ქრისტე გათელებე; 17 ქრისტე ვა გათელებენ-და, პოტიკ რე თქვან რწმენა დო დიო ხოლო ცოდეფს რეთ ინოსკილადირი. 18 თინეფ ხოლო სამუდამოთ მედინაფენა, მით ქრისტეწკუმა ართობას რდეს დო ღურაშ ლურით ქიმკირულეს. 19 ქრისტეშ იმენდ ხვალე თე ცხოვრებას ქომღუნან-და, არძაშე უმოს ცოდეფ პჸოფეთ.
^ აბზ. 11 საქმ. 2:29—32: 29 ჯიმალეფი, თქვანწკუმა შილებე თამამას ირაგადუას დავითიშ გურშენ, ნამდა თიქ დოღურ დო დონთხორეს დო თიშ სასაფლა ამდღარშა ჩქინ შქას რე. 30 თინა წინასწარმეტყველ რდუ დო უჩქუდ, ნამდა ღორონთიქ პირობა მეჩ, სქან გამნარყშე გიშნაულას ქიმეფჩანქია მეფობას, 31 თიქ წინასწარ ქოძირ დო თქუ, ნამდა ქრისტე გეთელებუდ, ვართ სამარეს იჸუაფუდ მეტებულ დო ვართ თიშ სხეულ ჸორდუდ. 32 თენა იესო რე, ნამუთ ღორონთიქ გათელ, მუდგაშ მოწმეეფ არძა ვორეთ.
^ აბზ. 12 საქმ. 2:33—36: 33 თიქ ღორონთიშ მარძგვანშე ემაღალ, დუნაპირებ წმინდა შურ მუმაშე მიღ დო ქომჩეს თინა, მუდგას ორწყეთ დო ირჩქილეთ. 34 დავითის ვეშურთუმ ზეცაშა, მარა იჩიებ: „იეჰოვაქ ჩქიმ უფალს უწუ, დოზოჯ ჩქიმ მორძგვშე, 35 სოიშახ სქან ნტერეფს სქან კუჩხიშ თუდო ვეთოირაგუანქ“. 36 თაშ ნამდა, მთელ ისრაელს ჯერდას, იესო, ნამუთ თქვა ბოძის მიკაჭკადითინ, ღორონთიქ უფალო დო ქრისტეთ გინართინუ“.
^ აბზ. 12 საქმ. 13:32—37, 42: 32 ათეშენ გიცხადენთ სახიოლო ამბეს ჩქინ ჯვეშეფშა მეჩამილ დუნაპირებუშ გურშენ, 33 ნამდა ღორონთიქ თინა კილ-კილშა შემსრულეს ჩქი, თინეფიშ სქუალეფს თით, ნამდა გათელ იესო, მუჭოთ მაჟია ფსალმუნს ჭარ: „სი ჩქიმ ქომოლსქუა რექ, მა ამდღა გინიფრთ სქან მუმათ“. 34 თიქ გათელ იესო, თიშენ ნამდა დღას ვა დართკო ჸორადუას დო თენა თეშნერო თქუ: „ქიმერჩანთ დავითწკუმა ართგურობათ გიმორჩქინელ ბრელ სიჯგირას“. 35 თინა შხვა ფსალმუნს ხოლო იჩიებ: „მუთუნფერო ვა ქიმინუნქ, ნამდა სქან ართგურქ დოჸორდას“. 36 დავითიქ ღორონთიშ არგამათ გიმოხანტილ ნებას მემსახურ მუშ გამნარყის. თიქ ღურაშ ლურით ქიდირულუ, მუშ ჯვეშეფწკუმა ქუდასვანჯეს დო დოჸორდ; 37 მარა თინა, მიდგა ღორონთიქ გათელუნ, ვა ჸორადე. 42 თინეფ გალე გიმიშეს დო ხალხ ოხვეწუდ, თეშ გურშენ ხოლო ქუჩიებინდესკო უკულიან საბატონს.
